མཇུག་བྱང་།^p1
ཕྱི་ཟླ་༡༠པའི་མཇུག་ཏུ། སྤྲུལ་སྐུ་བསྟན་འཛིན་རྒྱ་མཚོ་དང་ངེད་གཉིས་གསེར་རྟ་རྫོང་དུ་སོང་ནས། ཉིན་ལྔ་ཡི་རིང་ལ་བདག་གིས་ཕྱི་ལོགས་ནས་ཁྱེར་ཡོང་བའི་སྒྲ་གཟུགས་རྣམས་ཕྱོགས་གཅིག་ཏུ་བསྡུ་སྒྲིག་བྱས་རྗེས། རྒྱ་སྐད་དང་བོད་སྐད་ཀྱི་མཚམས་སྦྱོར་དང་བཅས་ཏེ། ཆོས་རྗེ་ཉིད་ནུབ་ཕྱོགས་སུ་ཕེབས་ནས་ཆོས་གསུངས་པའི་སྐོར་གྱི་དངོས་ཟིན་གློག་བརྙན་དུས་ཚོད་གསུམ་ཡོད་པ་ཞིག་བརྙན་སྡེར་དུ་བཟོས་རྗེས་སློབ་གླིང་དུ་འགྲེམ་སྤེལ་བྱས།^p2
དེ་ནས་ཆོས་རྗེ་ཉིད་ཨ་རིར་བཞུགས་དུས་སུ་སྔགས་སྲུང་མས་ལུང་བསྟན་གནང་བ་བཞིན། ཁོང་དང་ལོ་ཚོད་མཉམ་པའི་མི་སྐྱ་རྒན་པ་དང་གནས་སྐབས་རབ་ཏུ་བྱུང་བའི་སྐལ་བ་མི་ལྡན་པའི་ཁྱིམ་པ་རྣམས་ལ་དགོངས་ཏེ། ལེགས་ཚོགས་ཆར་འབེབས་གླིང་ཞེས་པའི་དགེ་བསྙེན་གྱི་སྡེ་ཞིག་གཟུག་རྒྱུ་གཏན་ཁེལ་མཛད་ནས་ཆོས་ཚོགས་དེའི་གཙུག་ལག་ཁང་བཞེང་བའི་མགོ་བརྩམས། སྐབས་དེར་དགེ་བསྙེན་གྱི་ཆོས་སྡེ་ལ་འཇུག་མཁན་རྣམས་ཐོ་འགོད་བྱེད་དུས། ཐོག་མར་ཁྱིམ་ཚང་བཞི་ལས་མི་འདུག་ཅིང་། དེ་དག་ལས་གཅིག་ནི་བདག་གི་ཕ་མ་རྣམ་གཉིས་ཡིན། དེ་རྗེས་རིམ་བཞིན་དུ་ཆོས་སྡེ་འདི་གཞི་རྒྱ་ཇེ་ཆེ་དང་དགེ་བསྙེན་གྱི་གྲངས་ཇེ་མང་དུ་སོང་སྟེ། ཕྱིས་སུ་བླ་རུང་ལུང་པའི་སྨད་ཕྱོགས་ཀྱི་ཉིན་སྲིབ་གཉིས་ཀ་གང་བར་གྱུར། སྔོན་ཆད་བོད་ཡུལ་དུ་དགེ་བསྙེན་གྱི་ཆོས་སྡེ་འཛུགས་པའི་སྲོལ་མེད་པས། རྗེ་ཉིད་ཀྱི་མཛད་པ་དེས་ནི་བོད་བརྒྱུད་ནང་བསྟན་ལ་སྲོལ་རྒྱུན་གསར་པ་ཞིག་གི་དབུ་ཁྱུད་བྲིས་པའང་ཡིན།^p3
དགེ་བསྙེན་གྱི་ཆོས་སྡེ་ཙམ་མ་ཟད། རྗེ་ཉིད་ལ་ནང་བསྟན་དང་འབྲེལ་བའི་བློ་ཡུལ་ལས་འདས་པའི་གསར་གཏོད་རང་བཞིན་གྱི་མཛད་པ་མང་དུ་ཡོད་དེ། དཔེར་ན། རིག་གསར་གྱི་དུས་སུ་གངས་ལྗོངས་ཀྱི་བསྟན་པ་རྙོག་མ་ཅན་དུ་གྱུར་པ་ན། རྗེས་སུ་བསླབ་ཁྲིམས་དང་དམ་ཚིག་ཉམས་པ་རྣམས་དགེ་འདུན་པ་དང་མཉམ་དུ་འཚོགས་མི་ཆོག་པར་བྱས་ཏེ་བསྟན་པ་དག་ཐེར་མཛད་པ་དང་། བླ་རུང་དུ་གཞི་རྒྱ་ཆེན་པོའི་སྒོ་ནས་བཙུན་མའི་ཆོས་སྡེ་བཙུགས་ཏེ་བུད་མེད་རྟེན་ཅན་གྱི་རབ་བྱུང་པ་མང་པོ་རྗེས་སུ་བཟུང་བ། རྒྱ་ནག་ཏུ་ནང་ཆོས་འཆད་ཉན་གྱི་བསྟན་པ་སྤེལ་ཏེ་རྒྱ་རིགས་སློབ་མ་རྣམས་རྗེས་སུ་བཟུང་བ་སོགས། ནང་བསྟན་གྱི་ལོ་རྒྱུས་ཐོག་འགྱེལ་དུ་མེད་པའི་རྡོ་རིང་གསར་བ་བཙུགས་པ་ལྟ་བུའི་མཛད་བཟང་རེ་རེ་ཡིས། རྗེ་ཉིད་ལ་མ་འོངས་འབྱུང་འགྱུར་གྱི་བྱ་བ་རྣམས་རྗེན་པར་གཟིགས་པའི་མཁྱེན་དཔྱོད་དང་། འཇིག་རྟེན་ལས་འདས་པའི་ཐུགས་བསྐྱེད་རྒྱ་ཆེར་མངའ་བ་སོགས་ལེགས་པར་མཚོན་ཐུབ་པ་ཡིན།^p4
ཆོས་རྗེ་ཉིད་ཕྱིར་བླ་རུང་དུ་བྱོན་པ་ནས་བཟུང་། མུ་མཐུད་དུ་དགེ་འདུན་པ་རྣམས་ལ་ཆོས་ཁྲིད་གནང་བའི་རྒྱུན་བསྐྱངས་ཤིང་། དགུན་དུས་སུ་རྒྱལ་བའི་དབང་པོ་ཀློང་ཆེན་རབ་འབྱམས་ཀྱི་བསྟན་བཅོས་ཆེན་མོ་རྫོགས་པ་ཆེན་པོ་སེམས་ཉིད་ངལ་གསོའི་འགྲེལ་ཆེན་ཤིང་རྟ་ཆེན་པོའི་བཀའ་ཁྲིད་གནང་བ་ན། བོད་ཡུལ་གྱི་གནམ་གཤིས་ནི་ཧ་ཅང་གྲང་ངར་དང་ལྡན་པ་ཡིན་ཡང་། རྗེ་ཉིད་ཀྱི་ཞབས་དྲུང་ནས་ཐེག་པ་ཆེན་པོའི་ཟབ་ཆོས་ཀྱི་བདུད་རྩིར་ལོངས་སུ་སྤྱོད་པའི་སྐལ་བ་ལྡན་པའི་སློབ་མ་རེ་རེའི་སེམས་ནི་དྲོད་ཁོལ་དང་བདེ་སྐྱིད་ཀྱིས་ཁེངས་ནས་ཡོད།^p5
དེ་ལྟར་ངེད་ཅག་སློབ་འབངས་རྣམས་ཀྱིས། སྔར་བཞིན་ཆོས་རྗེ་བླ་མ་དམ་པའི་སྐུ་དྲུང་ནས་མུ་མཐུད་དུ་ཐོས་བསམ་སྒོམ་གསུམ་གྱི་བྱ་བས་དུས་འདའ་བར་བྱས་པ་ལགས་སོ། །^p6
གང་གི་ཞལ་གསུང་བདུད་རྩི་མངར་མོའི་བཅུད། །བྱིན་རླབས་དྲོད་ཀྱི་ཁ་རླངས་མ་ཡལ་བ། །^p7
ལས་ཅན་བློ་གསལ་གཞོན་ནུའི་དགའ་སྟོན་དུ། །དམིགས་ཏེ་གསུང་མཆོག་ཡི་གེའི་རིས་སུ་སྤེལ། །^p8
ལུས་ཀྱི་ལང་ཚོ་མར་མར་རྒུད་ན་ཡང་། །སེམས་ཀྱི་ཉི་གཞོན་ཆེ་ཆེར་གསལ་བ་འདི། །^p9
རྩེ་གཅིག་དད་པས་བླ་མ་ལེགས་བསྟེན་ནས། །ཟབ་ཆོས་གདམས་པའི་བདུད་རྩི་མྱོང་བའི་དྲིན། །^p10
དྲིན་ལྡན་བླ་མའི་ཞལ་རྒྱུན་གདམས་དོན་གྱི། །ཚིག་ཟུར་ཙམ་ཞིག་ཉམས་ལའང་ཕངས་པའི་བློས། །^p11
སྙིང་རུས་བསྐྱེད་དེ་ཡི་གེར་བཀོད་ལགས་ན། །སྐལ་ལྡན་ཐར་འདོད་ཚོགས་རྣམས་དགྱེས་གྱུར་ཅིག །^p12
དོན་གྱི་གནད་ལ་འཁྲུལ་བ་མི་མངའ་ཡང་། །ཚིག་གི་སྡེབ་སྦྱོར་འགལ་དང་མ་འབྲེལ་བའི། །^p13
ཉེས་པ་ཅི་མཆིས་རྩ་གསུམ་ཆོས་སྐྱོང་དང་། །རྡོ་རྗེ་མཆེད་པོ་རྣམས་ལ་སྙིང་ནས་འཆགས། །^p14
འདིར་འབད་དགེ་བའི་དངོས་པོ་ཅུང་མཆིས་ན། །མར་གྱུར་འགྲོ་བ་མ་ལུས་ཀུན་ལ་བསྔོ། །^p15
དཔལ་ལྡན་བླ་མའི་གོ་འཕང་མངོན་གྱུར་ནས། །ཕྱམ་གཅིག་གདོད་མའི་ས་ལ་ཕྱིན་པར་ཤོག །^p16
ཅེས་བསོད་དར་རྒྱས་ནས་བོད་ཆུ་ཡོས་ལོའི་ཟླ་བ་གཉིས་པའི་ཚེས་ཉེར་ལྔའི་ཉིན་༼ཕྱི་ལོ་༢༠༢༣ལོའི་ཟླ་༤པའི་ཚེས་༡༥༽ལ་སྦྱར་བ་དགེའོ།། །།^p17
