འབབ་ཚུགས་དང་པོ། ཨ་རིའི་ཧཱ་ཝ་ཡེ།^p1
འབབ་ཚུགས་དང་པོ། ཨ་རིའི་ཧཱ་ཝ་ཡེ།^p2
༼ ༦·༡༨~༦·༢༡ ༽^p3
མཛད་རིམ།^p4
ཕྱི་ཟླ་༦པའི་ཚེས་༡༨ཉིན། སྔ་དྲོར་གནས་ཆུང་དགོན་ནས་བྱང་ཆུབ་སེམས་དཔའི་སྡོམ་པ་གནང་།^p5
ཕྱི་ཟླ་༦པའི་ཚེས་༡༩ཉིན། སྔ་དྲོར་འཇམ་དཔལ་ཞི་སྒྲུབ་ཀྱི་དབང་དང་། ཕྱི་དྲོར་ཁྲིད་ཡིག་སངས་རྒྱས་ལག་སྟེར་གསུངས།^p6
ཕྱི་ཟླ་༦པའི་ཚེས་༢༠ཉིན། སྔ་དྲོར་རྟེན་འབྲེལ་ཉེས་སེལ་གྱི་དབང་གནང་། ཕྱི་དྲོར་ཁྲིད་ཡིག་སངས་རྒྱས་ལག་སྟེར་གསུངས་རྗེས། ཞི་བདེ་རྒྱ་མཚོའི་འགྲམ་གྱི་མེ་རི་དང་ཧཱ་ཝ་ཡེ་རྒྱལ་ཁབ་མེ་རིའི་སྤྱི་གླིང་དུ་གཟིགས་སྐོར་ལ་བྱོན།^p7
ཕྱི་ཟླ་༦པའི་ཚེས་༢༡ཉིན། སྔ་དྲོར་ཕུར་པ་མགུལ་ཁུག་མའི་དབང་གནང་། ཕྱི་དྲོར་བྱེ་ནག་སྤྱི་གླིང་དུ་གཟིགས་སྐོར་ལ་ཕེབས་ཤིང་། དགོང་མོར་འབབ་ཚུགས་ཕྱི་མའི་ཕྱོགས་སུ་བསྐྱོད།^p8
འགག་སྒོའི་གསོལ་རྩམ།^p9
ཧཱ་ཝ་ཡེ་ཞེས་པ་འདི་ནི་འཛམ་གླིང་ན་གྲགས་ཆེ་བའི་ཡུལ་སྐོར་སྤྲོ་འཆམ་གྱི་ལྟེ་གནས་ཤིག་སྟེ། ཚང་ཚིང་འཁྲིགས་པའི་ཙན་དན་གྱི་ནགས་ཀླུང་དང་། བྱུར་དམར་གྱི་སྡོང་པོ། དངུལ་དཀར་གྱི་བྱེ་ཐང་། རྨ་བྱའི་ཟློས་གར། གཡུ་མདོག་གི་རྒྱ་མཚོ། སྤྲིན་དཀར་གྱི་བླ་བྲེ། དྲོད་འཇམ་གྱི་མཚོ་རླུང་སོགས་རང་བྱུང་གི་བཀོད་པ་དུ་མས་རབ་ཏུ་བརྒྱན་པའི་གནས་མཆོག་ཅིག་ཡིན་པ་གོ་ཚོར་བྱུང་བས། ད་ཐེངས་གནས་འདིར་དངོས་སུ་སླེབས་པར་སྤྲོ་སྣང་རབ་ཏུ་འཕེལ། ཡིན་ནའང་། བདག་གིས་གནམ་གྲུའི་ནང་ནས་ས་ཁྲར་ལྟ་སྐབས། གླིང་ཕྲན་འདི་ནི་རྒྱ་མཚོ་ཆེན་པོའི་དཀྱིལ་དུ་ལྷུང་བའི་སྲིན་བུ་ཞིག་གི་ཆེ་ཆུང་ཙམ་ལས་མི་འདུག་པས། ང་ཚོ་མཐའ་མེད་པའི་རྒྱ་མཚོའི་དཀྱིལ་གྱི་ཁེར་རྐྱང་གི་གླིང་ཕྲན་གང་དེར་འབྱོར་སོང་བ་རེད་ཨང་བསམ་ན། ཁེར་རྐྱང་དང་འཇིགས་སྣང་གི་ཚོར་བའང་ངང་གིས་སྐྱེ་ཡོང་།^p10
འདི་ནས་ཨ་རིའི་རྒྱལ་མཚམས་ཀྱི་འགག་སྒོ་རྒལ་བའི་སྐབས་སུ། གློ་བུར་བའི་གནས་ཚུལ་ཞིག་དང་འཕྲད་བྱུང་སྟེ། ངེད་ཅག་གིས་བོད་ཡུལ་ནས་ཁྱེར་ཡོང་བའི་གསོལ་རྩམ་ཅུང་ཟད་ཡོད་པ་དེ། ཉེན་ཁྱིས་ཤེས་སོང་བས་ཉེན་རྟོག་པ་རྣམས་ང་ཚོའི་མཐར་རུབ་ནས། རྩམ་པ་ཁུག་མ་དེ་ནི་ཉལ་ཐའམ་དུག་རྫས་ཤིག་ཏུ་ངོས་བཟུང་ཞིང་། ང་ཚོ་ནི་ཉལ་ཐ་འབོར་ཆེན་ལྐོག་འཚོང་རྒྱག་པའི་ཚོགས་པ་ཞིག་ཏུ་འཁྲུལ་སོང་།^p12
ངེད་ཅག་གིས་འདི་ནི་ཟས་རིགས་ཤིག་ཡིན་པར་བསྙད་ནས་འགྲེལ་བཤད་མང་དུ་བྱས་ཀྱང་ཡིད་མ་ཆེས་པས། ཡུལ་དངོས་ནས་ཁམ་འགའ་ཟོས་ཏེ་ཚོད་ལྟ་བྱས་ཚེ་ད་གཟོད་འགྲོ་ཆོག་པར་བྱས། འགྲོ་ཁར་ཉེན་རྟོག་པ་ཞིག་གིས། མི་དམངས་ཀྱི་བདེ་འཇགས་དང་བདེ་ཐང་གི་ཆེད་དུ། ཨ་རི་ལ་ཕྱི་ལོགས་ནས་ཡོང་བའི་ཟས་རིགས་ལ་ལ་བཀག་རྒྱ་ཡིན་པས། ཐེངས་རྗེས་མར་དེ་འདྲ་མི་འཁྱེར་རོགས་ཞེས་དྲན་སྐུལ་ཡང་བྱས་བྱུང་།^p13
དོན་དག་དེའི་རྐྱེན་གྱིས་དུས་ཐོག་ཏུ་ཙན་དན་རི་བོ་ནས་ཧི་ལོ་（Hilo）ཞེས་པའི་ཡན་ལག་གི་གླིང་ཕྲན་ཞིག་ཏུ་འགྲོ་དགོས་ཀྱང་གནམ་གྲུའི་རྗེས་མ་ཆོད་པས། འཕུར་རེས་རྗེས་མའི་གནམ་གྲུ་ཅུང་ཙམ་ཡུན་རིང་དུ་སྒུག་དགོས་བྱུང་། ཆོས་རྗེ་ཉིད་དུས་ཚོད་ཡུན་རིང་དུ་གནམ་གྲུར་བཞུགས་ནས་ཡོང་བ་དང་། བོད་ཡུལ་དང་ས་གནས་འདི་གཉིས་བར་ལ་དུས་ཁྱད་ཆུ་ཚོད་བཅོ་བརྒྱད་ཡོད་ཅིང་། ཉིན་མཚན་ལྡོག་པར་གྱུར་ཡོད་པས་ཁོང་གིས་ཀྱང་འོ་བརྒྱལ་ཅུང་ཙམ་ཞིག་མྱོང་དགོས་བྱུང་། དེ་ནས་གནམ་གྲུ་ཆུང་བ་ཞིག་ཏུ་བསྡད་དེ་ཆུ་ཚོད་གཅིག་ཙམ་ལ་འཕུར་རྗེས། གནས་ཆུང་སྒྲ་དབྱངས་གླིང་གི་དགོན་པར་（Nechung Dorje Drayang Ling）འབྱོར།^p14
རྒྱལ་སྤྱིའི་རྒྱང་རིང་ཁ་པར།^p15
ངེད་ཅག་དགོན་པ་དེར་བདེ་འཚམས་ངང་གནས་སྡོད་བྱས་ཚར་རྗེས། ཆོས་རྗེ་ཉིད་ཀྱིས་བདག་ལ། ཁྱོད་སོང་ནས་སློབ་གླིང་དུ་ཁ་པར་ཞིག་ཨེ་འཕྲོད་ལྟོས་ལ། ངེད་ཅག་བདེ་བླག་ངང་ཨ་རིར་འབྱོར་སོང་ཞེས་ཤོད། དར་རྩེ་མདོ་ཡི་སྤྱི་བདེ་ལས་ཁུངས་ཀྱི་མགོ་ཁྲིད་ལ་ཡང་འདིར་ཐོན་ཡོད་རབས་ཤོད་ཅེས་བཀའ་བསྒོས་བྱུང་། སྐབས་དེར་དྲྭ་རྒྱ་དང་འཕྲིན་ཕྲན་སོགས་གང་ཡང་མེད་པར་ཁ་པར་ཁོ་ནར་བརྟེན་དགོས་ཤིང་། དགོང་མོ་དེར་འཕྱིས་དྲགས་པས་ཕྱི་རོལ་ཏུ་ཁ་པར་འཚོལ་བར་སྟབས་མི་བདེ་ཕྱིར་དགོན་དཔོན་བླ་མ་བློ་བཟང་དོན་ལྡན་ལ་ཐབས་ཡོད་མེད་ཞུས་ཚེ། ཁོང་གིས་ང་ལ་ལག་འཕྲིན་（Cellular phone）ཞེས་པའི་ཁ་པར་ཞིག་གཡར་བྱུང་། བདག་གིས་སློབ་གླིང་དུ་ཁ་པར་ལན་མང་བརྒྱབས་ཀྱང་འཕྲོད་ཐབས་མ་བྱུང་ཡང་། རྗེ་ཉིད་ཀྱི་གྲོགས་པོ་མགོ་ཁྲིད་དེར་ཁ་པར་འཕྲོད་སོང་བས། ཁོང་ལ་ང་ཚོ་བདེ་བླག་ངང་ཨ་རིར་འབྱོར་བའི་སྐད་འདི་སློབ་གླིང་དུ་འཕྲོད་ཐབས་གནང་རོགས་ཞེས་མངག་བཅོལ་བྱས་པ་ཡིན། སྐབས་དེར་ཁོ་རང་ཆང་གིས་ཅུང་ཟད་བཟི་འདུག་ཀྱང་རིག་པ་དྭངས་བར་གནས་པས། ད་འགྲིག་སོང་། ཁྱེད་རྣམ་པ་ཕར་སོང་བའི་ཕྱི་ཟླ་༦པའི་ཚེས་༡༦ཉིན། གོང་རིམ་ནས་ད་ལོར་ཁྱེད་ཅག་ཕྱི་རྒྱལ་དུ་འགྲོ་མི་ཆོག་པའི་ཡིག་ཆ་ཐོན་བྱུང་། ད་ཁྱེད་ཚོ་བདེ་བླག་ཏུ་འབྱོར་ཟིན་པས་བཟང་འདུག་ཟེར། བདག་གིས་ཁོང་ལ་སྐད་ལན་བྱིན་པའི་སྐབས་སུ། མཁན་རྣམ་གྲོལ་གྱིས། མང་པོ་ལབ་ཀི་མ་འདུག རྒྱལ་སྤྱིའི་རྒྱང་རིང་ཁ་པར་རིན་གོང་ཤིན་ཏུ་ཆེ་བས་མཚམས་ཞོག་ཅེས་གསུངས་པས་མཚམས་བཞག་པ་ཡིན།^p16
ཕྱི་ཉིན། ཆོས་རྗེ་ཉིད་ཀྱིས་ཀྱང་གྲོགས་པོ་མགོ་པ་དེར་ཁ་པར་བརྒྱབས་ནས་ཡུན་རིང་ཙམ་ལ་གླེང་མོལ་མཛད་པས། མཁན་རྣམ་གྲོལ་གྱིས་ཐེངས་འགར་ཁོང་ལ་ལྟ་ཙམ་རེ་བྱེད་པ་ལས་དྲན་སྐུལ་ཞུ་མ་ཕོད་སྟབས། བདག་ལ་མཚར་སྣང་སྐྱེས་ཤིང་ཁོང་དགོད་ཤོར། གཞན་ཡང་ཆོས་རྗེ་ཉིད་ཀྱི་ཐེངས་འདིའི་ཆོས་ཁྲིད་གསུང་སྐབས་ཀྱི་དབྱིན་ཇིའི་སྐད་སྒྱུར་པ་ནི་སངས་རྒྱས་མཁའ་འགྲོ་ཞེས་པའི་ཨ་རིའི་བུད་མེད་ཅིག་ཡིན་ལ། མོ་རང་གིས་སྔོན་ཆད་ཀྱང་བོད་བརྒྱུད་ནང་བསྟན་གྱི་བླ་མ་མང་པོས་ཆོས་གསུང་དུས་སྐད་སྒྱུར་བྱས་མྱོང་འདུག ད་ལན་མོ་རང་ཁཱ་ལི་ཧྥོར་ནེ་ཡ་（California）ནས་ཆེད་དུ་གནམ་གྲུར་བསྡད་ནས་ཐོན་ཞིང་རྗེ་ཉིད་དང་མཇལ་ཁ་ཞུས། དུས་དེ་ནས་བཟུང་། ཆོས་རྗེ་ཉིད་ཀྱིས་ཨ་རི་ནས་གདུལ་བྱ་རྣམས་ལ་ཆོས་ཀྱི་བདུད་རྩི་གནང་བའི་དབུ་བརྩམས་པ་ཡིན།^p17
ཐེངས་དང་པོའི་ཆོས་ཁྲིད།^p18
ཕྱི་ཟླ་༦པའི་ཚེས་༡༨ཉིན་གྱི་སྔ་དྲོར། ཆོས་རྗེ་བླ་མ་ཉིད་ཀྱིས་གནས་ཆུང་དགོན་པ་རུ། ཆོས་ཁྲིད་ཀྱི་མཛད་སྒོ་ལ་ཐོག་མར་བྱང་ཆུབ་སེམས་དཔའི་སྡོམ་པ་གནང་ཞིང་། ནུབ་ཕྱོགས་སུ་གནང་བའི་ཆོས་ཁྲིད་ཐེངས་དང་པོ་ཡིན་པའི་རྐྱེན་གྱིས། གཙོ་སྒྲུབ་ཕྱོགས་ཀྱི་དགོན་པས་ཆོས་རྗེ་ཉིད་ལ་ཚིགས་སུ་བཅད་པའི་སྒོ་ནས་བཀྲ་ཤིས་པའི་བསྟོད་དབྱངས་ཕུལ་རྗེས། མདོ་འཛིན་པས་ངོ་སྤྲོད་འདི་ལྟར་མཛད།^p19
དེ་རིང་ནི་བཀྲ་ཤིས་པའི་ཉི་མ་ཞིག་སྟེ། ངེད་ཅག་ཐམས་ཅད་འདིར་དགའ་བའི་ལྷན་འཛོམས་བྱུང་བས་རྟེན་འབྲེལ་ཕུན་སུམ་ཚོགས་པ་བྱུང་། ཆོས་རྗེ་བླ་མ་རིན་པོ་ཆེ་ས་ཆ་འདི་ནས་ཉིན་བཞི་ཙམ་མ་གཏོགས་ཡུན་རིང་པོར་བཞུགས་ལོང་མེད་པས། ཆེས་རིན་ཐང་བྲལ་བའི་དུས་ཚོད་ཐུང་ཐུང་འདི་ལ། ངེད་ཅག་ཚང་མས་བློ་གཅིག་སེམས་གཅིག་གིས་ཆོས་ཞུ་བ་དང་། ཆོས་ཀྱི་དོན་ཉམས་སུ་ལེན་ཐུབ་པར་འདུན་པ་དྲག་པོས་སྨོན་ལམ་བཏབ་ནས། འཕྲད་པར་དཀའ་བའི་གོ་སྐབས་ལེགས་པོ་འདི་དམ་འཛིན་བྱེད་འོས་པ་ཡིན།^p20
ཁོང་བོད་ཡུལ་ན་བཞུགས་དུས། རྒྱ་གར་དང་བོད་ཀྱི་ས་ཆ་གཞན་ནས་ཡོང་བའི་མཇལ་སྐོར་བ་དང་ཆོས་པ་རྣམས་ཀྱིས། ཆོས་རྗེ་ཉིད་ཀྱི་སྐུ་མདུན་ནས་ཆོས་འབྲེལ་རེ་ཐོབ་པའི་ཕྱིར་དུ། རྒྱང་ཐག་ཇི་འདྲ་རིང་ཡང་དཀའ་བ་བརྒྱ་ཕྲག་ཁྱད་དུ་བསད་ཅིང་། ངལ་བ་སྣ་ཚོགས་དང་དུ་བླངས་ནས་མདུན་དུ་གཅར་ཐབས་བྱེད་ཀྱིན་ཡོད་ལ། ཁོང་བཞུགས་སའི་ཡུལ་དེའང་གྲང་ངར་ཧ་ཅང་ཆེ་ཞིང་འཚོ་བའི་ཆ་རྐྱེན་ཞན་པས། གནས་དེར་སྡོད་པ་ལྟ་ཞོག འགྲོ་དགོས་པ་ཙམ་ཡང་དཀའ་ཁག་ཤིན་ཏུ་ཆེ་བ་ཡིན། འོན་ཀྱང་། ཆོས་དོན་གཉེར་བ་ཤིན་ཏུ་མང་པོས་དཀའ་ངལ་སྣ་ཚོགས་ལ་བཟོད་བསྲན་བགྱིས་ཏེ་རྒྱུན་དུ་གནས་དེར་བསྡད་ནས་ཆོས་ཞུ་བཞིན་ཡོད།^p21
ད་ལན་ངེད་ཅག་ལ་མཚོན་ན། འདི་ལྟར་ལས་སླ་མོ་ཞིག་གིས་རིན་པོ་ཆེ་ཉིད་ཀྱི་གསེར་ཞལ་མཇལ་བ་དང་ཆོས་ཀྱི་བདུད་རྩི་མྱོང་བའི་སྐལ་བ་ཐོབ་པ་ནི། དངོས་གནས་སྔོན་གྱི་སྨོན་ལམ་རྣམ་པར་དག་པའི་མཐུ་ལས་བྱུང་བ་ཡིན།^p22
ཁྱེད་ཅག་འདིར་བཞུགས་རྣམས་འཚོ་བ་ཧ་ཅང་བྲེལ་འཚུབ་ཆེ་ཞིང་མི་མང་པོ་ཞིག་ལ་བྱ་བ་གལ་ཆེན་ཡོད་ཀྱང་། ཉིན་འདི་དག་གི་རིང་ལ་བྱ་བ་གཞན་རྣམས་ཟུར་དུ་བསྐྱུར་ཏེ། སེམས་རྩེ་གཅིག་གིས་ཆོས་ཁྲིད་ལེགས་པོ་ཞིག་ཞུ་ཐུབ་ན་དེར་འབྲས་བུ་བཟང་པོ་འཐོབ་ངེས་ཡིན། དེ་བཞིན་ཉིན་འདི་དག་གི་ཆོས་ཁྲིད་སོ་སོའི་ཁྲིད་ཡུན་ཡང་དེ་ཙམ་རིང་པོ་མིན་པས། འཇིག་རྟེན་གྱི་བྱ་བ་རྣམས་ཆེ་བཞག་ཆུང་བསྐྱུར་བྱས་ཏེ་ནན་ཏན་གྱིས་ཆོས་ཞུ་བ་ནི་ཧ་ཅང་གལ་ཆེ་ལ། ཕྱིན་ཆད་ནས་འདི་འདྲའི་སྐྱེས་བུ་དམ་པར་འཕྲད་པ་ཤིན་ཏུ་དཀའ་ངེས་པས། ད་རེས་ངེད་ཅག་ཆོས་པ་མང་པོས་འདི་ལྟར་ལྷན་ཅིག་ཏུ་ཆོས་ཞུས་པ་ཡིན་ན། ཀུན་གྱིས་བསམ་པ་བཟང་པོ་རེ་བསྐྱེད་ནས་ཡང་དག་པའི་ཆོས་ཀྱི་དོན་རྣམས་གཞན་ལ་སྤེལ་པར་བྱ་རྒྱུའང་ངེད་ཅག་ཐུན་མོང་གི་རེ་བ་ཡིན་པར་བཤད།^p23
དེ་ནས་ཆོས་རྗེ་བླ་མ་ཉིད་ཐུགས་བརྩེ་བ་ཆེན་པོས་ཆོས་ཁྲི་ལ་འཁོད་ནས། ཆོས་ཁྲིད་དངོས་སུ་གསུང་བར་ཉེ་བ་ན། སྔར་གསུང་མ་མྱོང་བའི་བཀྲ་ཤིས་པའི་ཚིགས་སུ་བཅད་པ་འདི་ཉིད་ཐུགས་ཀློང་ནས་བརྡོལ་བ་སྟེ།^p24
མཁའ་ལ་བཀྲ་ཤིས་ལྷ་མོའི་འཇའ་སྤྲིན་གཏིབ། །^p25
ས་ལ་བཀྲ་ཤིས་མི་རྣམས་དགེ་བཅུར་སྤྱོད། །^p26
ལོགས་ལ་བཀྲ་ཤིས་ཞི་ཁྲོའི་བཀོད་པ་རྫོགས། །^p27
བཀྲ་ཤིས་འདི་ཡང་དར་རྒྱས་ཕུན་ཚོགས་ཤོག །^p28
ཅེས་ཆོས་རྗེ་ཉིད་ཀྱིས་ཚང་མར་བཀྲ་ཤིས་བདེ་ལེགས་ཀྱི་མཚམས་འདྲི་དང་བཅས་འདི་ལྟར་བཀྲལ།^p29
དེ་ཡང་ཚིག་རྐང་དང་པོའི་ནང་དུ། ཁར་རྩང་གི་དུས་སུ་བཀྲ་ཤིས་པའི་ལྷ་མོས་ནམ་མཁའ་ལ་འཇའ་ཤར་ཞིང་སྤྲིན་གཏིབ་པ་སོགས་དགའ་བའི་རྣམ་འགྱུར་དཔག་ཏུ་མེད་པ་ངོམས་འདུག་ཅེས་དང་། ཚིག་རྐང་གཉིས་པར། འདིར་འཚོགས་པའི་ནང་པ་སངས་རྒྱས་པའི་ཆོས་ལ་དགའ་བ་ཐམས་ཅད། དགེ་བཅུའི་ལམ་ལ་རྟག་ཏུ་སྤྱོད་ཀྱིན་ཡོད་པ་ཡང་བཀྲ་ཤིས་ཕུན་སུམ་ཚོགས་པ་ཞིག་རེད་ཅེས་པའི་དོན་ཡིན། ཚིག་རྐང་གསུམ་པའི་དོན་ནི། བདེ་བ་ཅན་གྱི་ཞིང་གི་བཀོད་པ་ལྟར་ཕུན་སུམ་ཚོགས་པ་དང་ལྡན་པའི་ས་གཞི་འདི་ལྟ་བུ་ནི་ཞི་བའི་ཞིང་གི་བཀོད་པ་དང་། ལོགས་སུ་ལྷ་མོས་ཁྲོ་བོའི་དཀྱིལ་འཁོར་སྟོན་པའི་གནས་སྐབས་ན། སྟེང་ཕྱོགས་མེ་རི་འབར་བའི་ཞིང་ཁམས་ལ་འགྲན་བཟོད་པའི་མེ་རི་དང་མེ་དཔུང་གི་སྣང་བ་ཡོངས་སུ་རྒྱས་པ་ལྟ་བུ་ནི་ཁྲོ་བོའི་ཞིང་ཁམས་ཀྱི་བཀོད་པ་ཡོངས་སུ་རྫོགས་པས་བཀྲ་ཤིས་གསུམ་པ་རེད། ཚིག་རྐང་ཕྱི་མས་དེ་ལྟ་བུའི་བཀྲ་ཤིས་ཕུན་སུམ་ཚོགས་པ་འདི་དར་ཞིང་རྒྱས་ལ། ཡུན་ནས་ཡུན་དུ་གནས་ཤིང་ཕུན་སུམ་ཚོགས་པ་ཉིད་དུ་འགྱུར་བར་ཤོག་ཅིག་ཅེས་སྨོན་འདུན་ཞུས་པ་ཡིན།^p30
ཁོང་རྣམ་པས་བསྟོད་ཚིག་གི་གླུ་དབྱངས་སྙན་མོ་གསར་དུ་བླངས་འོངས་དུས། ངའི་ཞེ་ལའང་རྩོམ་འདི་ཐད་ཀར་གསལ་པོ་ཤར་ཡོང་བ་ཡིན་མ་གཏོགས། སྔར་ནས་བཀོད་སྒྲིག་ལྟར་བརྩམས་པ་ཞིག་མིན།^p31
ཆོས་རྗེ་ཉིད་ཀྱིས་དེ་ལྟར་གསུངས་པ་ན། འཁོར་རྣམས་ཀྱི་སེམས་སུའང་ཉི་འོད་འཕྲོས་པ་ཇི་བཞིན་རབ་ཏུ་དགའ་བར་གྱུར་ཅིང་། ཡ་མཚན་པ་ཞིག་ལ། དགོན་པའི་མདུན་ཐང་དུ་བག་ཡངས་སུ་རྒྱུ་བའི་རྨ་བྱ་དག་གིས་དབྱངས་སྙན་སྒྲོག་གིན་པ་དེའང་། ལྷ་ཁང་དུ་ཆོས་ཉན་བཞིན་པའི་འཁོར་རྣམས་ཀྱི་རྣ་བའི་དཔྱིད་དུ་སོན། དེ་ནས་རིམ་གྱིས་བྱང་སྡོམ་གསུང་པའི་ཆོས་ཁྲིད་དངོས་ལ་ཞུགས།^p32
དུས་གསུམ་སངས་རྒྱས་ཐམས་ཅད་ཀྱི་ངོ་བོ་རིགས་དང་དཀྱིལ་འཁོར་རྒྱ་མཚོའི་ཁྱབ་བདག་བཀའ་དྲིན་མཚུངས་པ་མེད་པ་རྗེ་བཙུན་དཔལ་མགོན་རྩ་བའི་བླ་མ་རིན་པོ་ཆེ་རྣམས་ཀྱི་ཞབས་ཀྱི་རྡུལ་དྲི་མ་མེད་པ་ལ་མགོ་བོས་རབ་ཏུ་བཏུད་དེ་གུས་པས་ཕྱག་འཚལ་ཞིང་སྐྱབས་སུ་མཆིའོ་བྱིན་གྱིས་བརླབ་པར་མཛད་དུ་གསོལ།^p33
གང་གི་ཞལ་བཟང་ལྟ་བས་མི་ངོམས་གེ་སར་འཛུམ་པའི་མདངས་བཀྲ་ཞིང་། །^p34
མཚན་དཔེའི་གཟི་འོད་ཟེའུ་འབྲུ་གསལ་བས་འགྲོ་ཀུན་མིག་གི་བདུད་རྩིར་གྱུར། །^p35
ཐུགས་རྗེའི་འདབ་མ་ཀུན་ནས་དཀྱུས་རིང་འཇིག་རྟེན་གསུམ་གྱི་ཁོངས་ཁྱབ་པ། །^p36
ཐུབ་དབང་པད་མ་དཀར་པོའི་ཞབས་པད་དེ་རིང་བདག་བློའི་པད་མཚོར་སྐྱོངས། །^p37
རྒྱལ་ཀུན་མཁྱེན་བརྩེ་ནུས་པའི་ངོ་བོ་ཉིད། །^p38
བགྲང་ཡས་དཀྱིལ་འཁོར་འཁོར་ལོ་ལེགས་འཆང་ནས། །^p39
ཞིང་འདིར་སློབ་དཔོན་ཚུལ་བཟུང་ཐེག་མཆོག་གི །^p40
སྟོན་པ་མཚུངས་མེད་པདྨ་ཀ་ར་རྒྱལ། །^p41
ཆོས་ཟད་ཀློང་དུ་ཆོས་སྐུའི་དགོངས་པ་བརྙེས། །^p42
འོད་གསལ་དབྱིངས་སུ་ལོངས་སྐུའི་ཞིང་སྣང་གཟིགས། །^p43
གདུལ་བྱའི་སྣང་ངོར་སྤྲུལ་སྐུའི་འགྲོ་དོན་མཛད། །^p44
ཀུན་མཁྱེན་ཆོས་ཀྱི་རྒྱལ་པོ་ལ་ཕྱག་འཚལ། །^p45
སྨྲ་བའི་སེང་གེའི་མཁྱེན་རབ་སྙིང་ལ་ཤར། །^p46
ཀུན་ཏུ་བཟང་པོའི་སྨོན་ལམ་རྣམ་པར་སྦྱངས། །^p47
སྲས་བཅས་རྒྱལ་བའི་ཕྲིན་ལས་འཛིན་མཛད་པ། །^p48
འཇམ་དབྱངས་བླ་མའི་ཞབས་ལ་ཕྱག་འཚལ་ལོ། །^p49
དགོངས་བརྡ་སྙན་བརྒྱུད་རིག་འཛིན་བླ་མ་དང་། །^p50
ཞི་ཆགས་ཁྲོ་བོའི་ཚུལ་འཆང་ཡི་དམ་ལྷ། །^p51
གནས་གསུམ་མཁའ་འགྲོ་རྒྱུད་གསུམ་དྲེགས་ཚོགས་བཅས། །^p52
རབ་འབྱམས་རྩ་གསུམ་ལྷ་ལ་མགོས་ཕྱག་འཚལ། །^p53
གང་ཚེ་བདག་གིས་གཞན་ཕན་སེམས་ཀྱིས་སུ། །^p54
སྙིང་དབུས་པདྨོར་གཞོན་ནུ་ཁྱེད་དྲན་ནས། །^p55
ལེགས་བཤད་བདུད་རྩིའི་སྒྲ་དབྱངས་སྒྲོག་བགྱིད་ན། །^p56
འཇམ་དཔལ་བདག་གི་ཡིད་ལ་དཔལ་སྩོལ་ཅིག །^p57
སྲིད་གསུམ་སྡུག་བསྔལ་ཇི་འདྲ་ཁྱེད་ཀྱིས་མཁྱེན། །^p58
དམྱལ་སོགས་མེ་དཔུང་ཞི་བར་བགྱིད་ལ་སོགས། །^p59
སེམས་ཅན་དོན་ལ་མྱུར་དུ་བདག་བརྩོན་ན། །^p60
དམ་པ་རྣམས་ཀྱིས་ནུས་མཐུ་བསྩལ་དུ་གསོལ། །^p61
གང་དག་ཕྱོགས་བཅུ་སྟོང་གི་འཇིག་རྟེན་ན། །^p62
བདེ་གཤེགས་སློབ་མར་གྱུར་བ་གང་སུ་དག །^p63
དེང་འདིར་སྟོན་པའི་ཆོས་ཀྱི་ཆར་འབེབས་ཀྱིས། །^p64
གསན་པར་འདོད་པ་ཐམས་ཅད་འདིར་གཤེགས་ཤིག །^p65
ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་གཏན་བདེ་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་འཐོབ་པར་བྱ། དེའི་ཕྱིར་དུ་དམ་པའི་ཆོས་གང་ཞིག་གསན་ནས་དོན་ཉམས་སུ་བླང་བར་བགྱིའོ་སྙམ་པའི་བྱང་ཆུབ་མཆོག་ཏུ་ཐུགས་བསྐྱེད་པ་དང་བཅས་ཏེ་གསན་འཚལ། དེ་ལ་གང་གསན་པར་བྱ་བའི་ཆོས་ནི་བྱང་ཆུབ་སེམས་དཔའི་སྡོམ་པ་འབོག་རྒྱུ་དེ་ཡིན།^p66
དེ་རིང་ངའི་སེམས་ཀྱང་ཧ་ཅང་དགའ་པོ་བྱུང་། དེའི་རྒྱུ་མཚན་ནི། འདིར་དུས་ཚེས་སྟོན་འཁོར་ཆོས་ལ་སོགས་པ་ཐམས་ཅད་ཀྱང་ཕུན་སུམ་ཚོགས་པ་ཞིག་བྱུང་བས་ཡིན།^p67
ཕུན་སུམ་ཚོགས་པ་ལྔ།^p68
དེ་ལ་གནས་དུས་སྟོན་འཁོར་ཆོས་ཕུན་སུམ་ཚོགས་པ་ལྔ་ལས།^p69
དུས་ཕུན་སུམ་ཚོགས་པ་ནི། ཟླ་བ་འདི་བདག་ཅག་གི་སྟོན་པ་ཐུགས་རྗེ་ཅན་ལྷུམས་སུ་ཞུགས་པ་དང་། མངོན་པར་རྫོགས་པར་སངས་རྒྱས་པ། མྱང་ངན་ལས་འདའ་བ་སྟེ། སྟོན་པ་ཐུགས་རྗེ་ཅན་གྱིས་དང་པོའི་མཛད་པ་ནས་བཟུང་སྟེ་ཐ་མའི་བར་གྱི་མཛད་པ་ཆ་ཚང་སྟོན་སའི་དུས་ཚོད་ལ་ཁེལ་ཡོད་པའི་ཕྱིར་ན། མ་བསྒྲིགས་རང་འགྲིག་ཏུ་གྱུར་པ་འདི་ལ་བསམ་ནས་ཀྱང་འུ་ཅག་དགའ་སྤྲོ་སྐྱེ་འོས་པ་ཡིན།^p70
ཁྱད་པར་དུ་ང་རང་ངོས་ནས་བསམ་བློ་བཏང་ན། ཟླ་བ་འདིའི་སྟོད་ལ་བོད་ཡུལ་ནས་བླ་སེར་ཁྲི་ཕྲག་གསུམ་ཙམ་དང་མི་སྐྱ་འབུམ་ཕྲག་གཉིས་ཙམ་ལ་བདེ་ཆེན་ཞིང་སྒྲུབ་ཅེས་པ་ཚོགས་ནས་མི་མང་པོའི་རྒྱུད་ལ་ཐར་པའི་ས་བོན་ཐེབས་པའི་དུས་ཚེས་བཟང་པོ་ཡིན།^p71
གནས་ཕུན་སུམ་ཚོགས་པ་ནི། འཛམ་གླིང་ན་སྟོབས་ལྡན་རྒྱལ་ཁབ་ཅེས་ཡོངས་སུ་གྲགས་པའི་ཨ་མེ་རི་ཁའི་ས་ཆ་འདིར་ཐོན་ནས། ཟླ་བ་འདིའི་མཇུག་ལ་དད་ལྡན་གྱི་མི་དམངས་ཐམས་ཅད་ལ་ཆོས་བཤད་རྒྱུའི་སྐལ་བ་བཟང་པོ་བྱུང་བས་དགའ་སྤྲོ་སྐྱེས་བྱུང་།^p72
ཆོས་ཕུན་སུམ་ཚོགས་པ་ནི། སྤྱིར་འཛམ་བུ་གླིང་ན་ཆོས་ལུགས་མང་པོ་ཡོད་ཀྱང་། དེའི་ནང་ནས་ནང་པ་སངས་རྒྱས་པའི་ཆོས་ནི་འཚེ་མེད་ཞི་བའི་ལམ་བཟང་ཁོ་ན་སྟེ། རང་གཞན་ཐམས་ཅད་བདེ་སྐྱིད་ཀྱི་ལམ་ལ་འགོད་པར་བྱེད་པའི་ཆོས་བཟང་པོ་འདིར་ཕྲད་པའང་སྐལ་བ་བཟང་།^p73
སྤྱིར་སངས་རྒྱས་པའི་ཆོས་ལ་ཡང་ཐེག་པ་དམན་པ་ཞེས་རང་དོན་འབའ་ཞིག་སྒྲུབ་པ་དང་། ཐེག་པ་ཆེན་པོ་ཞེས་གཞན་དོན་གཙོར་བྱས་ནས་སྒྲུབ་པ་གཉིས་ཡོད་པ་ལས། ད་ལན་འུ་ཅག་ཚང་མ་ཐེག་པ་ཆེན་པོའི་ཆོས་དང་འཕྲད། དེ་ལས་ཀྱང་མྱུར་བ་ཉིད་དུ་ཚེ་འདི་ཉིད་ལ་ཟུང་འཇུག་གི་སྐུ་འགྲུབ་པར་བྱེད་པའི་སྔགས་རྡོ་རྗེ་ཐེག་པའི་ཆོས་ལ་མཉམ་དུ་སྤྱོད་རྒྱུའི་སྐལ་བ་ལྡན་པར་གྱུར་པས་ཧ་ཅང་དགའ་པོ་བྱུང་།^p75
སྟོན་པ་ཕུན་སུམ་ཚོགས་པ་ནི། ང་རང་གི་ངོ་སྤྲོད་མདོར་བསྡུས་ཙམ་ཞིག་ཞུས་ན། སྤྱིར་སྐྱེས་མ་ཐག་པ་ནས་ཆོས་དང་ཕྲད་པ་ཞིག་ཡིན་ཞིང་། ལོ་བཅུ་བཞིའི་དུས་ནས་བཟུང་སྟེ་གཞན་ལ་ཆོས་འཆད་པ་དང་རྩོམ་པ་ལ་སོགས་པའི་ཁུར་བླངས་ནས་ད་ལྟའི་བར་ཐུག་སོང་བ་ཡིན། ཆོས་རྐྱང་བའི་ངོས་ནས་བསམ་བློ་བཏང་ན་སྔོན་ཆད་ཤེས་ཡོན་འབྲིང་ཙམ་ཞིག་ཡོད་ཀྱང་། ད་སྐབས་ནི་ལོ་ཧ་ཅང་མཐོ་བ་དང་ནད་ཚབས་ཆེ་བ། མིག་གིས་ཀྱང་ཡི་གེ་གཏན་ནས་མི་མཐོང་བས་ཆོས་ཀྱི་ཤེས་ཡོན་དེ་ཡང་ཧ་ཅང་གི་སྡུག་པོ་རེད་སོང་།^p76
དེ་ལས་གཞན་པའི་ཆབ་སྲིད་ཀྱི་འགྲོ་ཕྱོགས་དང་རྒྱལ་ཁབ་སོ་སོའི་གནས་སྟངས། ཚན་རིག་གི་ཤེས་བྱ་སོགས་གང་ཅིའི་ཐད་ནས་ཧ་ཅང་དབུལ་པོ་ཡིན། ཐ་ན་འཛམ་གླིང་རྒྱལ་ཁབ་སོ་སོའི་མི་རྣམས་ཀྱི་ཟ་མ་ཟ་སྟངས་ཙམ་ཡང་ལེགས་པོར་ཤེས་ཀྱིན་མེད། དེས་ན། ད་རེས་ཀྱི་གནས་སྐབས་སུ་ཡང་ཁྱེད་རྣམ་པ་ལྟ་བུའི་ཤེས་ཡོན་ཅན་དག་གི་ཀླད་ནས་ཆོས་ཀྱི་སྐད་ཆ་ཞིག་བཤད་དགོས་ནའང་ངོ་ཧ་ཅང་གནོང་མོ་རེད། འོན་ཀྱང་སྐྱེ་བ་སྔོན་གྱི་ལས་ཀྱིས་འདི་ལྟ་བུ་ཞིག་བཤད་པའི་དུས་སྐབས་ལ་ཐུག་སོང་བ་རེད། གང་ལྟར་ཡང་ངས་བཤད་ལུགས་ཀྱིས་མ་ཐོན་པ་དང་ནོར་བ། འཆུགས་པ་སོགས་ཡོད་ན་ཁྱེད་རྣམ་པས་དྲང་བཅོས་བྱ་རྒྱུའི་རེ་བ་ཡིན།^p77
འཁོར་ཕུན་སུམ་ཚོགས་པ་ནི། ཁྱེད་ཅག་འདིར་བཞུགས་ཀྱི་ཆོས་པ་ཚང་མ་ས་ཆ་དང་རྒྱལ་ཁབ་སོ་སོ་ནས་ལྷགས་ཤིང་མི་རིགས་ཀྱང་མི་འདྲ་བའི་དད་པ་དང་ཤེས་རབ་ལྡན་པ་ཤ་སྟག་ཡིན་པས་བདག་ལ་དགའ་སྤྲོ་སྐྱེས།^p78
ཐུན་མོང་གི་སྔོན་འགྲོ།^p79
ད་ཆོས་ཁྲིད་དངོས་ལ་འཇུག་པ་ནི། ད་རེས་ཀྱི་གནས་སྐབས་ན་ངེད་ཅག་གིས་ཆོས་སྒྲུབ་པའི་སྐལ་བ་དང་ལྡན་པའི་མི་ལུས་རིན་པོ་ཆེ་འདི་རྙེད་ཡོད། འདི་ནི་ཤིན་ཏུ་ནས་ཀྱང་རྙེད་པར་དཀའ་བ་ཞིག་ཡིན། ཅིའི་ཕྱིར་ཞེ་ན། ལུས་རྟེན་འདི་རྒྱུའི་སྒོ་ནས་རྙེད་པར་དཀའ་སྟེ། སྐལ་པ་མང་པོར་དགེ་སྒྲུབ་སྡིག་སྤོང་བྱས་པའི་འབྲས་བུ་ལས་འདི་ལྟ་བུའི་ཆོས་ལྡན་གྱི་ལུས་རྟེན་ཞིག་ཐོབ་ཐུབ་པ་མ་གཏོགས། རང་བཞིན་ཅི་མ་གང་ཡིན་གྱིས་ཐོབ་མི་སྲིད།^p80
དེ་བཞིན་དུ་དཔེའི་སྒོ་ནས་རྙེད་དཀའ་ཚུལ་ནི། གྱང་ངོས་འཇམ་པོ་ལ་སྲན་མ་སྤར་གང་གཏོར་ན་དེར་ཆགས་མི་སྲིད་པ་ལྟར་མི་ལུས་འདི་ཤིན་ཏུ་རྙེད་པར་དཀའ།^p81
གྲངས་ཀྱི་སྒོ་ནས་རྙེད་དཀའ་ཚུལ་ནི། ཆོས་མིན་ལ་སྤྱོད་པའི་སེམས་ཅན་དེ་ས་ཆེན་པོའི་རྡུལ་ཙམ་ཞིག་ཡོད་སྲིད་ན། ཆོས་སྒྲུབ་པའི་གང་ཟག་ནི་སེན་མོའི་སྟེང་ལ་ཆགས་པའི་རྡུལ་ཙམ་ཞིག་ལས་མེད་ཅེས་བཅོམ་ལྡན་འདས་ཀྱི་མདོ་སྡེ་ལས་གསུངས་པ་ཡིན།^p82
དེ་ལྟ་བུའི་ལུས་རྟེན་ཡང་རྙེད་ན་དོན་ཆེ་བ་དང་ལྡན་པ་ཞིག་ཡིན་ཏེ། འུ་ཅག་གི་ལུས་རྟེན་འདིའི་སྟེང་ནས་ཆོས་རྣམ་དག་ཅིག་བསྒྲུབས་ན། ཚེ་འདིར་ཚེ་རིང་བ་དང་ནད་མེད་པ། ལོངས་སྤྱོད་ཆེ་བ། སྙན་གྲགས་རྒྱས་པ་སོགས་ལུས་རྟེན་འདིར་བརྟེན་ནས་སྒྲུབ་ཆོག་ཅིང་། ཚེ་ཕྱི་མ་སྟེ་འཇིག་རྟེན་གཞན་དུའང་ལུས་དང་སེམས་ལ་སྡུག་བསྔལ་ཅུང་ཟད་ཙམ་མེད་པར། བདེ་སྐྱིད་ལོངས་སྤྱོད་བསམ་གྱིས་མི་ཁྱབ་པ་ཡོད་པའི་སངས་རྒྱས་ཀྱི་གོ་འཕང་དེ་བསྒྲུབ་པར་འདོད་ན་ཡང་། འུ་ཅག་གི་ལུས་རྟེན་འདིའི་སྟེང་ནས་བསྒྲུབས་ཐུབ་པ་ཡིན།^p83
དེ་འདྲའི་དོན་ཆེན་གྱི་ལུས་རྟེན་འདི་ཐོབ་དུས། རང་དོན་དང་གཞན་དོན་གང་བསྒྲུབ་དགོས་རུང་མྱུར་དུ་མ་བསྒྲུབས་ན། ཤི་བ་ཟེར་བ་གློ་བུར་དུ་ཐོན་ཡོང་ཞིང་། འཆི་བའི་དུས་སུ་ལས་དབང་གིས་འཇིག་རྟེན་གཞན་དང་གཞན་དུ་སྐྱེས་ནས་དགེ་བ་བསྒྲུབ་བསམ་ཞིང་བདེ་བ་འཐོབ་པར་འདོད་ཀྱང་རང་དབང་ཡོད་མི་སྲིད་པས། ད་ལྟ་རང་དབང་ཡོད་པའི་གནས་སྐབས་འདིར་དགེ་བ་རྣམ་པར་དག་པ་ཞིག་བསྒྲུབ་དགོས་པ་ཡིན།^p84
དེས་ན་དགེ་བ་སྒྲུབ་པར་བྱེད་པ་ལའང་སྟོན་པ་ཐུགས་རྗེ་ཅན་ཤཱཀྱ་ཐུབ་པས་ཐབས་མང་པོ་ཞིག་གསུངས་ཡོད་དེ། དཔེར་ན་འཇིག་རྟེན་གྱི་རྒྱུ་རྫས་ཕལ་པ་དང་འདྲ་བའི་ཆོས་སྒྲུབ་སྟངས་དང་། གསེར་ལྟ་བུའི་ཆོས་སྒྲུབ་སྟངས། རྡོ་རྗེ་ཕ་ལམ་དང་མཚུངས་པའི་ཆོས་སྒྲུབ་སྟངས་བཅས་ཡོད། དེ་ཐམས་ཅད་ལས་ཁྱད་པར་དུ་འཕགས་པ་ནི་ཡིད་བཞིན་ནོར་བུ་ལྟ་བུའི་ཆོས་སྒྲུབ་སྟངས་དེ་ཡིན། དེ་ལྟ་བུའི་ཆོས་ལ་རྣམ་གྲངས་ཀྱི་རིམ་པ་མང་པོ་ཞིག་བཅོམ་ལྡན་འདས་ཀྱིས་གསུངས་ཡོད་ན། ཁྱེད་རྣམ་པས་དེ་དག་ལས་གང་བསྒྲུབ་འདོད་དམ། ཆོས་ཨང་དང་པོ་དེ་བསྒྲུབ་བསམ་མམ། ཡང་ན་གཞན་གང་རུང་ཞིག་བསྒྲུབ་བསམ་པར་འདུག ཅེས་དྲིས་པར། མང་པོ་ཞིག་གིས་ཨང་དང་པོ་དེ་བསྒྲུབ་འདོད་ཅེས་ཞུས། ༼དགོད་སྒྲ།༽^p85
འོ་ཡ་ཡ། ད་ཨང་དང་པོ་དེ་བསྒྲུབ་བསམ་ན། སངས་རྒྱས་ཀྱིས་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་གི་ནང་དུ་ཡང་བྱང་ཆུབ་ཀྱི་སེམས་དང་རྫོགས་པ་ཆེན་པོའི་ཆོས་ལས་ལྷག་པ་ཞིག་གསུངས་ཡོད་པ་མིན།^p86
དེ་ཡང་བྱང་ཆུབ་ཀྱི་སེམས་ཞེས་པ་ནི། ཐེག་ཆེན་པ་ཡོངས་སུ་རྫོགས་པའི་བསྒྲུབ་བྱ་ཡིན་ལ། རྫོགས་པ་ཆེན་པོ་ཞེས་པ་ནི། ཐེག་ཆེན་གྱི་ནང་ནས་ཐེག་ཆེན་ཁྱད་པར་བ་སྟེ། གསང་སྔགས་རྡོ་རྗེ་ཐེག་པ་ཞེས་གང་ཟག་ཆེས་མཆོག་ཏུ་གྱུར་པ་ཞིག་མ་གཏོགས། གཞན་ཐེག་ཆེན་པ་ཡིན་ཡིན་གྱིས་བསྒྲུབ་མི་ཆོག་པའི་ཆོས་ཟབ་མོ་ཞིག་ཡིན། དེས་ན་ཁྱེད་ཅག་གིས་དེ་གཉིས་ཀ་བསྒྲུབ་བསམ་མམ། ཅིག་ཤོས་དེ་བསྒྲུབ་འདོད་པ་ཡིན། ཞེས་དྲིས་ཚེ། ཚང་མས་གཉིས་ཀ་བསྒྲུབ་འདོད་ཅེས་ཞུས། ༼དགོད་སྒྲ།༽^p87
འོ་དེ་ནི་ཧ་ཅང་ཡག་པོ་རེད། འུ་ཅག་ཚང་མས་གཉིས་ཀ་བསྒྲུབ་དགོས་པ་ཡིན། ངེད་བོད་ཡུལ་ལུང་པ་ན་ཡོད་པའི་བླ་མ་བཟང་པོ་ཞིག་ཡིན་ནས་བཟུང་སྟེ། ཚང་མས་ཀྱང་གཉིས་ཀ་སྒྲུབ་པ་ལས་གང་རུང་ཞིག་ཡ་བྲལ་བྱས་ནས་སྒྲུབ་ཀྱིན་ཡོད་པ་མིན། ཁྱེད་རྣམ་པས་ཀྱང་གཉིས་ཀ་བསྒྲུབ་ཟེར་རྒྱུ་དེ་ཧ་ཅང་ཡག་པོ་རེད།^p88
དེས་ན་དང་པོ་བྱང་ཆུབ་ཀྱི་སེམས་འདི་ལས་འཕྲོས་པའི་གཏམ་མདོར་བསྡུས་ཙམ་ཞིག་ཁྱེད་རྣམ་པ་ལ་ཞུ།^p89
བྱང་ཆུབ་སེམས་ཀྱི་ཕན་ཡོན།^p90
དེ་ལ་བྱང་ཆུབ་ཀྱི་སེམས་ཞེས་པ་འདི་ནི། བདག་ཅག་གི་སྟོན་པ་ཐུགས་རྗེ་ཅན་གྱིས་བསྐལ་པ་གྲངས་མེད་དཔག་ཏུ་མེད་པ་མང་པོའི་གོང་རོལ་ནས། ཡང་ནས་ཡང་དུ་བློ་ཤེས་རབ་ཀྱིས་རྣམ་པར་བརྟགས་ཤིང་དཔྱད་ནས་སེམས་ཅན་ཐམས་ཅད་ལ་ཕན་པའི་ཐབས་དང་། སྡུག་བསྔལ་སེལ་བའི་ཐབས་ལ་གང་དགའ་གང་དྲག་དགོངས་པ་ན། མཐར་སེམས་ཅན་ལ་ཕན་བདེ་སྒྲུབ་པར་རིན་ཆེན་བྱང་ཆུབ་ཀྱི་སེམས་འདི་ལས་ལྷག་པའི་ཐབས་ཤིག་མེད་པར་མཁྱེན་ནས་འདི་ཉིད་གསུངས་བ་རེད།^p91
བྱང་ཆུབ་ཀྱི་སེམས་འདི་ཉིད་ཀྱིས། གནས་སྐབས་སུ་ལྷ་དང་མིའི་བདེ་འབྲས་ཕུན་སུམ་ཚོགས་པ་འགྲུབ་པར་བྱེད་ཅིང་། མཐར་ཐུག་སངས་རྒྱས་ཀྱི་གོ་འཕང་ཡང་བདེ་བླག་ཏུ་འགྲུབ་པར་བྱེད་པ་ཡིན། དེའི་ཕྱིར་འཇིག་རྟེན་ཁམས་ཀྱི་སྡུག་བསྔལ་ཐམས་ཅད་མེད་པར་འདོད་པ་དང་། བདེ་བ་ཐམས་ཅད་འཐོབ་པར་འདོད་པའི་གང་ཟག་ཅིག་ཡིན་ནས་བཟུང་སྟེ། ངེས་པར་དུ་བྱང་ཆུབ་ཀྱི་སེམས་འདི་ཉིད་རྒྱུད་ལ་བསྟེན་དགོས་པ་ཡིན།^p92
བྱང་ཆུབ་ཀྱི་སེམས་འདི་ཉིད་རྒྱུད་ལ་སྐྱེས་ན། གང་ཟག་དེའི་མིང་ཡང་གནས་འགྱུར་འགྲོ་སྟེ། སྔོན་རང་བཞིན་གྱི་སེམས་ཅན་དང་མི་ཞེས་པ་ལས་མིང་གཞན་མེད་ཀྱང་། དེ་ནས་བཟུང་སྟེ་རྒྱལ་བའི་སྲས་དང་བྱང་ཆུབ་སེམས་དཔའ་ཞེས་པར་མིང་གནས་འགྱུར་བ་ཡིན། དོན་ཡང་གནས་འགྱུར་ནས་འཇིག་རྟེན་གྱི་ཆེ་དགུ་ལྷ་དང་ཀླུ། གནོད་སྦྱིན། དྲི་ཟ། མི་མ་ཡིན་ལ་སོགས་ཡོད་ཚད་ཚང་མས་ཀྱང་གུས་བཀུར་དང་ལེན་གྱིས་ཕྱག་འཚལ་བའི་འོས་སུ་འགྱུར་བ་ཡིན། དེའི་ཕྱིར་ན་བྱང་ཆུབ་ཀྱི་སེམས་འདི་ཉིད་བསྒོམ་དགོས།^p93
དཔེར་ན་འཇིག་རྟེན་ཁམས་ན་གསེར་འགྱུར་གྱི་རྩི་ཞེས་པ་སྲང་གང་གིས་ལྕགས་ཕལ་པ་སྲང་སྟོང་ཕྲག་ཡོད་པ་ཡང་སྐད་ཅིག་ཉིད་ལ་གསེར་དུ་བསྒྱུར་བ་བཞིན་དུ། བྱང་ཆུབ་ཀྱི་སེམས་འདིས་ཀྱང་ད་སྔོན་ངེད་ཅག་གི་མི་གཙང་བ་ཡིད་དུ་མི་འོང་བའི་རང་བཞིན་གྱི་ལུས་འདི་ཡང་། མྱུར་བ་ཉིད་དུ་སངས་རྒྱས་ཀྱི་སྐུ་མཚན་དང་དཔེ་བྱད་ལྡན་པ། མཐོང་ན་མི་མཐུན་པ་མེད་པ། དུས་རྟག་ཏུ་སེམས་ཅན་རྣམས་ལ་ཕན་བདེ་སྟེར་བའི་སྐུ་ཉིད་དུ་བསྒྱུར་བར་བྱེད་པ་ཡིན།^p94
བྱང་ཆུབ་སེམས་ཀྱིས་མ་ཟིན་པའི་ལུས་ཀྱིས་ཕྱག་འཚལ་བ་དང་སྐོར་བ་བྱེད་པ། ཁ་ཏོན་འདོན་པ་ལ་སོགས་པའི་དགེ་རྩ་གཞན་ཐམས་ཅད་ནི། དཔེར་ན་ཆུ་ཤིང་གི་སྡོང་པོ་དང་འདྲ་བར་འབྲས་བུ་ལན་ཅིག་བསྐྱེད་ནས་ཟད་པའམ་སྐམ་པར་འགྱུར་བ་ཡིན། བྱང་ཆུབ་སེམས་ཀྱིས་ཟིན་པའི་དགེ་རྩ་དེ་ནི། ལྷའི་དཔག་བསམ་གྱི་ཤིང་ལྟར་དུ་འབྲས་བུ་ཡུན་ནས་ཡུན་དུ་བསྐྱེད་ནས། གནས་སྐབས་སུ་མིའི་ཡུལ་དུ་འཁོར་ལོ་བསྒྱུར་རྒྱལ་དང་། ལྷའི་གནས་སུ་དབང་པོ་དང་ཚངས་པ་ལ་སོགས་པའི་སྐྱེ་བ་བླངས་ནས། མཐར་ཐུག་སངས་རྒྱས་ཐོབ་པའི་གནས་སྐབས་ན་ཡང་འབྲས་བུ་མི་འཛད་པར། སེམས་ཅན་གྱི་དོན་རྟག་ཁྱབ་ལྷུན་གྲུབ་ཆེན་པོ་རུ་འབྱུང་བར་བྱེད་པའི་ཕྱིར་ན། བྱང་ཆུབ་ཀྱི་སེམས་འདི་ཉིད་བསྒོམ་པ་ཤིན་ཏུ་གལ་ཆེ།^p95
བྱང་ཆུབ་ཀྱི་སེམས་འདི་ཉིད་ཀྱིས་ཚེ་རབས་ཐོག་མེད་ནས་བསགས་པའི་སྲོག་བཅད་པ་དང་མ་བྱིན་པ་བླངས་པ་ལ་སོགས་པའི་སྡིག་པ་མི་དགེ་བ་ཆུང་རིམ་ཐམས་ཅད། རྩྭ་ཕུང་སྐམ་པོ་ལ་མེ་མཆེད་པ་བཞིན་དུ་སྐད་ཅིག་དེ་ཉིད་ལ་ལྷག་མེད་དུ་བྱང་བར་བྱེད་ཅིང་། སྡིག་པ་ཆེན་པོ་ཕ་བསད་པ་དང་མ་བསད་པ་ལྟ་བུའི་སེམས་ཅན་ངན་སོང་དུ་འགྲོ་དགོས་ངེས་ཅན་དེ་དག་གིས་ཀྱང་ཡུན་ཐུང་ངུ་སེ་གོལ་གཏོགས་ཡུན་ཙམ་མ་གཏོགས་ངན་སོང་གི་སྡུག་བསྔལ་ཡུན་རིང་པོར་མྱོང་མི་དགོས།^p96
དེའི་ཕྱིར་ན་སྡིག་པ་འདག་པར་འདོད་པ་རྣམས་ཀྱིས་ཀྱང་བྱང་ཆུབ་ཀྱི་སེམས་འདི་ཉིད་བསྒོམ་དགོས།^p97
དེ་ནི་བྱང་ཆུབ་སེམས་ཀྱི་ཕན་ཡོན་འབྲིང་པོའི་ཚུལ་དུ་བཤད་པ་ཡིན་ཞིང་། ད་དུང་རྒྱས་པར་ཤེས་འདོད་པ་རྣམས་ཀྱིས་སྡོང་པོ་བཀོད་པའི་མདོ་ལས་དཔེ་བརྒྱ་དང་ལྷག་ཙམ་གྱི་སྒོ་ནས་གསལ་པོར་བཤད་པ་དེ་དག་ལས་ཤེས་དགོས་པ་ཡིན།^p98
དེ་ནས་བྱང་ཆུབ་སེམས་ཀྱི་ཕན་ཡོན་མདོར་བསྡུས་ཤིག་བཤད་ན། དོན་ཚན་གསུམ་གྱི་སྟེང་ནས་ཤེས་དགོས།^p99
གཅིག བྱང་ཆུབ་ཀྱི་སེམས་རྒྱུད་ལ་སྐྱེས་པའི་གང་ཟག་རྣམས་ངན་སོང་གསུམ་དུ་སྐྱེ་བར་མི་འགྱུར།^p100
གཉིས། མཐོ་རིས་ལྷ་དང་མིའི་བདེ་བ་ཐམས་ཅད་ཀུན་ཀྱང་འབད་མེད་དུ་འབྱུང་བ་ཡིན།^p101
གསུམ། རྒ་ཤི་མེད་པའི་སངས་རྒྱས་ཀྱི་གོ་འཕང་འཐོབ་པར་བྱེད་པ་ཡིན།^p102
དེ་རིང་འུ་ཅག་གིས་མཉམ་དུ་བྱང་ཆུབ་སེམས་ཀྱི་སྡོམ་པ་ཞིག་ལེན་རྒྱུ་ཡིན།^p103
སྔོན་འགྲོ་སྐྱབས་སུ་འགྲོ་བ།^p104
ཐོག་མར་སྐྱབས་སུ་འགྲོ་བར་བྱེད་པ་ལ། དགོངས་སུ་གསོལ་བ་གསུམ་སྔོན་དུ་འགྲོ་དགོས། དེ་ནི་ཕྱོགས་བཅུའི་རྒྱལ་བ་སྲས་དང་བཅས་པ་དང་། བླ་མ་རྡོ་རྗེ་འཛིན་པ་ཐམས་ཅད་རང་གི་མདུན་གྱི་ནམ་མཁར་སྒོམས། དེའི་མདུན་ནས་བྱང་ཆུབ་མཆོག་ཏུ་སེམས་བསྐྱེད་པ་ཡིན་སྙམ་དུ་ཚིག་འདི་རྗེས་ཟློས་གྱིས།^p105
ཕྱོགས་བཅུ་ན་བཞུགས་པའི་སངས་རྒྱས་བཅོམ་ལྡན་འདས་ཐམས་ཅད་དང་ས་བཅུ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་། བླ་མ་རྡོ་རྗེ་འཛིན་པ་ཆེན་པོ་རྣམས་བདག་ལ་དགོངས་སུ་གསོལ།^p106
བྱང་ཆུབ་མཆོག་ཏུ་སེམས་བསྐྱེད་པར་བྱེད་པ་ལ་ཐོག་མར་སྐྱབས་སུ་འགྲོ་དགོས་ཤིང་། སྐྱབས་སུ་མ་སོང་ན་ནང་པ་སངས་རྒྱས་པའི་ཆོས་གང་ཡང་སྒྲུབ་ཐབས་མེད། དེས་ན་ཐོག་མར་སྐྱབས་སུ་འགྲོ་བའི་སྡོམ་པ་འདི་འབོག་རྒྱུ་ཡིན།^p107
སྐྱབས་སུ་འགྲོ་བའི་དམིགས་རིམ་ནི། ཁྱེད་རྣམ་པས་དུས་ད་ནས་བཟུང་སྟེ་སྐྱེ་བ་ཚེ་རབས་ཐམས་ཅད་དུ་སྟོན་པ་དེ་སངས་རྒྱས་ཤཱཀྱ་ཐུབ་པ་ཁོང་མ་གཏོགས་གཞན་མི་བསྟེན་སྙམ་དུ་དམ་བཅའ་བ་ནི་སངས་རྒྱས་ལ་སྐྱབས་སུ་འགྲོ་བ་ཡིན་ལ། སངས་རྒྱས་བཅོམ་ལྡན་འདས་ཀྱིས་གསུངས་བའི་ཆོས་དེ་ཁོ་ན་ཉམས་སུ་ལེན་པ་ལས་གཞན་གང་ཡང་ཉམས་སུ་མི་ལེན་སྙམ་པའི་དམ་བཅའ་བ་ནི་ཆོས་ལ་སྐྱབས་སུ་འགྲོ་བ་དང་། སངས་རྒྱས་ཤཱཀྱ་ཐུབ་པའི་རྗེས་འཇུག་མགོན་པོ་འཇམ་དཔལ་དབྱངས་དང་ཕྱག་ན་རྡོ་རྗེ། སྤྱན་རས་གཟིགས། ཨོ་རྒྱན་རིན་པོ་ཆེ་ལྟ་བུ་སོགས་དང་ལྟ་སྤྱོད་མཐུན་པར་བྱ་ཞིང་། གསུང་ལ་མཉན། རྗེས་སུ་སློབ་སྙམ་པའི་ཁས་ལེན་དམ་བཅའ་བྱེད་པ་ནི་དགེ་འདུན་ལ་སྐྱབས་སུ་འགྲོ་བ་ཡིན།^p108
མདོར་ན་རང་གི་སྲོག་ལ་ཐུག་ཀྱང་དཀོན་མཆོག་གསུམ་མི་སྤོང་བར། དཀོན་མཆོག་གསུམ་ཁོ་ན་སྐྱབས་སུ་བསྟེན་སྙམ་པའི་ཁས་ལེན་དམ་བཅའ་དང་ལྡན་པའི་སྒོ་ནས་ཚིག་འདི་རྗེས་ཟློས་གྱིས།^p109
བྱང་ཆུབ་སྙིང་པོར་མཆིས་ཀྱི་བར། །སངས་རྒྱས་རྣམས་ལ་སྐྱབས་སུ་མཆི། །^p110
ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། །^p111
འོ་ཡ། ད་སྐྱབས་འགྲོའི་སྡོམ་པ་རྒྱུད་ལ་སྐྱེས་པ་ཡིན། ཁྱེད་ཅག་གིས་གོ་སོང་ངམ།^p112
སྐྱབས་སུ་མ་སོང་ན་ནང་པ་སངས་རྒྱས་པ་ཟེར་བ་མིན་པས། དུས་དེ་རིང་ནས་བཟུང་སྟེ་ཁྱེད་རྣམ་པ་ཚང་མ་ནང་པ་སངས་རྒྱས་པར་གྱུར་བ་ཡིན། དེ་ཡིན་པར་ཧ་གོ་དགོས་པ་རེད། ད་ནས་བཟུང་སངས་རྒྱས་ཀྱི་ཆོས་གང་དང་གང་ལ་བསླབ་ན་ཡང་འདི་ལྟ་བུའི་འདུན་པ་བསྐྱེད་དགོས་ཏེ། ཁྱེད་ཅག་གིས་ཆོས་གང་བསྒྲུབ་ཀྱང་སྔར་དང་མི་འདྲ་བའི་འབྲས་བུ་དང་ནུས་པ་ཆེན་པོ་འཐོབ་རྒྱུའང་ཤེས་དགོས། དེ་བཞིན་དུ་འཇིགས་པ་དང་སྡུག་བསྔལ་ཇི་ལྟ་བུ་བྱུང་ཡང་དཀོན་མཆོག་གསུམ་ཁོ་ན་ལ་གསོལ་བ་འདེབས་པ་ལས། སྐྱབས་གཞན་ལ་མ་བསྟེན་ན་དཀོན་མཆོག་གསུམ་པོས་སྐྱོབ་མི་ཐུབ་པ་ཞིག་རྩ་བ་ནས་མེད། བདེ་འབྱོར་སྙན་གྲགས་སོགས་གང་དང་གང་ཞིག་འདོད་ན་ཡང་དཀོན་མཆོག་རིན་པོ་ཆེ་འདི་ཁོ་ན་ལ་གསོལ་བ་རྩེ་གཅིག་ཏུ་ཐོབས་དང་། དེས་སྟེར་མི་ཐུབ་པ་ཞིག་རྩ་བ་ནས་མེད།^p113
སྐྱབས་སུ་འགྲོ་བའི་བསླབ་བྱ་ནི། དུས་རྒྱུན་དུ་སེམས་ཅན་མཆོག་དམན་རབ་འབྲིང་སུ་ལ་ཡང་གནོད་མི་སྐྱེལ་བར་ཕན་པ་བསྒྲུབ་རྒྱུ་ཁོ་ན་དང་དུ་ལེན་དགོས་པ་དེ་རྩ་བ་ཡིན།^p114
དངོས་གཞི་སེམས་བསྐྱེད་པ།^p115
བྱང་ཆུབ་མཆོག་ཏུ་སེམས་བསྐྱེད་པ་དངོས་ལ། སྨོན་པ་སེམས་བསྐྱེད་དང་འཇུག་པ་སེམས་བསྐྱེད་གཉིས་ཡོད།^p116
སྨོན་པ་སེམས་བསྐྱེད་ཅེས་པ་ནི། སེམས་ཅན་ཐམས་ཅད་སངས་རྒྱས་ཀྱི་གོ་འཕང་ཐོབ་པར་གྱུར་ན་ཅི་མ་རུང་སྙམ་པ་དང་། འཇུག་པ་སེམས་བསྐྱེད་ནི་སེམས་ཅན་ཐམས་ཅད་སངས་རྒྱས་ཀྱི་གོ་འཕང་འཐོབ་པའི་ཕྱིར་དུ་སྦྱིན་པ་གཏོང་བ་དང་། ཚུལ་ཁྲིམས་སྲུང་བ། བཟོད་པ་སྒོམ་པ་ལ་སོགས་པའི་དགེ་བའི་བྱ་བ་རྣམས་ལ་དངོས་སུ་འཇུག་པར་བྱེད་པ་དེ་ཡིན།^p117
འོག་གི་བྱང་སྡོམ་གྱི་ཚིག་རྣམས་རྗེས་ཟློས་ལན་གསུམ་དགོས་པ་ལས། རྗེས་ཟློས་དང་པོའི་དུས་སུ། རང་གི་རྒྱུད་ལ་སྨོན་པ་སེམས་བསྐྱེད་སྐྱེས་སོང་བར་སོམས། གཉིས་པའི་དུས་སུ་རྒྱུད་ལ་འཇུག་པ་སེམས་བསྐྱེད་སྐྱེས་སོང་བར་སོམས། གསུམ་པའི་དུས་སུ་གཉིས་ཀ་བརྟན་པར་གྱུར་ཅིང་རང་ཉིད་བྱང་ཆུབ་སེམས་དཔའ་ཉིད་དུ་གྱུར་སོང་བར་སོམས་ལ་འདི་ལྟར་རྗེས་ཟློས་གྱིས།^p118
ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང་། །^p119
བྱང་ཆུབ་སེམས་དཔའི་བསླབ་པ་ལ། །དེ་དག་རིམ་བཞིན་གནས་པ་ལྟར། །^p120
དེ་བཞིན་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང་། །^p121
དེ་བཞིན་དུ་ནི་བསླབ་པ་ལའང་། །རིམ་པ་བཞིན་དུ་བསླབ་པར་བགྱི། །^p122
ད་ནས་རིན་ཆེན་བྱང་ཆུབ་ཀྱི་སེམས་ཞེས་པ་དེ་ཁྱེད་རྣམ་པའི་རྒྱུད་ལ་སྐྱེས་པ་ཡིན་ལ། དུས་ད་ནས་བཟུང་སྟེ་བྱང་ཆུབ་སེམས་དཔའ་ཞེས་མིང་གནས་གྱུར་བ་དང་། ཁྱད་པར་དུ་ཁྱེད་རྣམ་པས་བསམ་པ་འདིའི་ཐོག་ནས་ལུས་ངག་གི་དགེ་བ་ཞིག་བསྒྲུབས་ན་འཇུག་པ་སེམས་བསྐྱེད་དུ་འགྱུར་འགྲོ་ཞིང་། སྨོན་འཇུག་གཉིས་ལས་བཟང་ཤོས་ནི་འཇུག་པ་སེམས་བསྐྱེད་དེ་ཡིན།^p123
དེ་བཞིན་སྨོན་པ་སེམས་བསྐྱེད་ཡོད་ན་གོང་དུ་བཤད་པའི་ཕན་ཡོན་ཆ་ཚང་ཐོབ་ཀྱང་། འཇུག་པ་སེམས་བསྐྱེད་རྒྱུད་ལ་སྐྱེ་བ་ནས་བཟུང་སྟེ། དངོས་སུ་དགེ་བ་མ་བསྒྲུབས་པར་བག་མེད་པར་གྱུར་པ་དང་། གཉིད་ལོག་པར་གྱུར་པ། དུས་རྟག་ཏུ་དོན་མེད་འབའ་ཞིག་ལ་གཡེང་ན་ཡང་། དགེ་བ་དེ་རྒྱུན་ཆགས་སུ་གོང་ནས་གོང་དུ་ཆུ་ཀླུང་ཆེན་པོའི་རྒྱུན་བཞིན་རང་གི་རྒྱུད་ལ་འཕེལ་ཡོང་བ་ཡིན། འཇུག་པ་སེམས་བསྐྱེད་ཀྱི་ཕན་ཡོན་ནི་ནམ་མཁའི་ཁམས་ལ་ཡང་མི་ཤོང་བ་ལྟ་བུའི་བསམ་གྱིས་མི་ཁྱབ་པ་ཞིག་ཡིན། དེས་ན་སྨོན་འཇུག་གཉིས་ལས་གཙོ་བོ་འཇུག་པ་སེམས་བསྐྱེད་འདི་ལ་བསླབ་དགོས།^p124
བྱང་ཆུབ་ཀྱི་སེམས་ཞེས་པ་ལ་དེ་ལྟ་བུའི་ཕན་ཡོན་རྒྱ་ཆེན་པོ་ཡོད་པའི་རྒྱུ་མཚན་ཅི་ཡིན་ཞེ་ན། དཔེར་ན། ནམ་མཁའ་སྟོང་པ་འདིས་མ་ཁྱབ་ས་ཞིག་མེད། འདིས་ཁྱབ་ཚད་ལ་སེམས་ཅན་གྱིས་ཁྱབ་ཡོད། དེ་དག་རེ་རེ་བཞིན་དུ་བདེ་བ་དང་ལྡན། སྡུག་བསྔལ་དང་བྲལ་ན་སྙམ་པའི་བསམ་པ་སྐྱེས། ལག་ལེན་དུ་ཡང་དེ་དག་བདེ་ཐབས་སྐྱིད་ཐབས་ལ་བརྩོན་པར་བྱས་ན། དེ་ལ་ཕན་ཡོན་གཞལ་དུ་མེད་པ་ཞིག་ཡོད་པ་ནི་རྗེས་སུ་དཔག་པ་ལས་ཀྱང་ཤེས་ཐུབ།^p125
འོ་ན་བསམ་པ་བཟང་པོས་སེམས་ཅན་ཐམས་ཅད་བདེ་སྐྱིད་དང་ལྡན་ན་སྙམ་པའི་བསམ་པ་རྐྱང་བ་ཙམ་ལ་དེ་འདྲའི་ཕན་ཡོན་ཅིའི་ཕྱིར་ཡོད་སྙམ་ན། དེ་ལ་ཕན་ཡོན་ཡོད་པའི་རྒྱུ་མཚན་ཞིག་ངོ་སྤྲད་རྒྱུ་ཡོད་དེ། སྔོན་བསྐལ་པ་མང་པོ་ཞིག་གི་སྔོན་རོལ་ན། དེད་དཔོན་མཛའ་བོའི་བུ་མོ་ཞེས་པ་དེ་ལས་ཀྱི་དབང་གིས་ངན་སོང་དུ་སྐྱེས། ཁོ་འཇིག་རྟེན་མི་ཡུལ་དུ་སྡོད་པའི་སྐབས་སུ་མ་ལ་རྡོག་ཐོས་བསྣུན་པའི་རྣམ་སྨིན་གྱིས་ཀླད་པ་ལ་ལྕགས་ཀྱི་འཁོར་ལོ་ཟུག་ནས་འཁོར་བ་ཡིན། དེ་དུས་ཁོའི་བསམ་པ་ལ་འདི་ལྟ་བུའི་སྡུག་བསྔལ་མྱོང་བཞིན་ཡོད་པའི་སེམས་ཅན་དེ་དག་སྙིང་རེ་རྗེ། འདི་དག་གི་སྡུག་བསྔལ་མེད་སོང་ན་ཅི་མ་རུང་སྙམ་པའི་བསམ་པ་བཟང་པོ་ཞིག་སྐྱེས་མ་ཐག་ཏུ། ཀླད་པའི་འཁོར་ལོ་དེ་ནམ་མཁར་ཡལ་ནས་ཁོ་རང་བདེ་བ་དང་ལྡན་པར་གྱུར་པ་ཡིན།^p126
སེམས་ཅན་གཅིག་ཙམ་སྡུག་བསྔལ་དང་བྲལ་ན་བསམ་པ་ལ་ཡང་དེ་ལྟ་བུའི་ཕན་ཡོན་དཔག་ཏུ་མེད་པ་ཞིག་ཡོད་ན། ནམ་མཁས་གར་ཁྱབ་ཀྱི་སེམས་ཅན་ཐམས་ཅད་བདེ་བ་དང་ལྡན་ཞིང་སྡུག་བསྔལ་དང་བྲལ་བར་འདོད་ན་ཕན་ཡོན་དཔག་ཏུ་མེད་པ་ཡོད་པ་སྨོས་མ་དགོས་པ་ཡིན།^p127
བྱང་ཆུབ་སེམས་ཀྱི་ཕན་ཡོན་ནི་དུས་གསུམ་གྱི་སངས་རྒྱས་ཐམས་ཅད་ལ་ལོ་དུང་ཕྱུར་མང་པོའི་བར་དུ་རིན་པོ་ཆེ་དང་། ཟས། རྒྱན་ཆ་ལ་སོགས་རྣམ་པ་སྣ་ཚོགས་ཀྱིས་མཆོད་པ་ཕུལ་བ་ལས། སེམས་ཅན་ཐམས་ཅད་སངས་རྒྱས་ཀྱི་གོ་འཕང་འཐོབ་པར་གྱུར་ཅིག་སྙམ་པའི་བསམ་པ་བཟང་པོ་འདི་ལན་ཅིག་སྐྱེས་ན་དེ་ཉིད་ཀྱི་ཕན་ཡོན་ཆེ་བ་ཡིན།^p128
མཇུག་རང་གཞན་དགའ་བ་སྒོམ་པ།^p129
དེས་ན་འདི་ལྟ་བུའི་བྱང་ཆུབ་ཀྱི་སེམས་དེ་ནི། རྙེད་པར་དཀའ་བ་ཡིད་བཞིན་གྱི་ནོར་བུ་ལྟ་བུ་ཡིན། ཡིད་བཞིན་གྱི་ནོར་བུ་ཟེར་བ་ནི་སྔོན་བསྐལ་པ་བཟང་པོའི་དུས་སུ་ཡོད་ཀྱང་དེང་སང་མཐོང་རྒྱུ་མེད། འཁོར་ལོས་བསྒྱུར་བའི་རྒྱལ་པོ་འཇིག་རྟེན་གྱི་ཁམས་སུ་བྱོན་དུས་ཡིད་བཞིན་གྱི་ནོར་བུ་ཟེར་བ་དེ་འབྱུང་ལ། དེས་དཔག་ཚད་རེ་རེར་ཡང་ཟས་འདོད་པ་ལ་ཟས་དང་། གོས་འདོད་པ་ལ་གོས། ནོར་འདོད་པ་ལ་ནོར་གྱི་ཆར་བ་འབེབ་པར་བྱེད་ཀྱང་། མི་དབུལ་པོ་ཞིག་གིས་ནི་རྙེད་མི་སྲིད་པ་ཡིན།^p130
དེ་ལས་ཀྱང་རྙེད་པར་དཀའ་བའི་བྱང་ཆུབ་ཀྱི་སེམས་རིན་པོ་ཆེ་འུ་ཅག་གི་རྒྱུད་ལ་སྐྱེས་པ་འདིར། ང་རེ་དགའ་ལ་ང་རེ་སྤྲོ་སྙམ་པའི་དགའ་སྤྲོ་བསྒོམ་དགོས། དེ་ལྟར་དུ་རང་གིས་དགའ་བ་སྒོམ་བཞིན་ཚིག་འདི་རྗེས་ཟློས་གྱིས།^p131
དེང་དུས་བདག་ཚེ་འབྲས་བུ་ཡོད། །མི་ཡི་སྲིད་པ་ལེགས་པར་ཐོབ། །^p132
དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་ད་གྱུར་ཏོ། །^p133
ད་ནི་བདག་གིས་ཅི་ནས་ཀྱང་། །རིགས་དང་མཐུན་པའི་ལས་བརྩམས་ཏེ། །^p134
སྐྱོན་མེད་བཙུན་པའི་རིགས་འདི་ལ། །རྙོག་པར་མི་འགྱུར་དེ་ལྟར་བྱ། །^p135
ལོང་བས་ཕྱག་དར་ཕུང་པོ་ལས། །ཇི་ལྟར་རིན་ཆེན་རྙེད་པ་ལྟར། །^p136
དེ་བཞིན་ཅི་ཞིག་ལྟར་སྟེས་ནས། །བྱང་ཆུབ་སེམས་ནི་བདག་ལ་སྐྱེས། །^p137
དེ་ནས་གཞན་དགའ་བ་སྒོམ་པ་ཟེར་བ་ནི། འཇིག་རྟེན་གྱི་ཁམས་ན་ལྷ་ཀླུ་སྡེ་བརྒྱད་མི་མ་ཡིན་ལ་སོགས་པ་མཐུ་བོ་ཆེ་ཁྱེད་རྣམས་ཀྱིས་དགའ་བ་སྒོམས་ལ་སྤྲོ་བར་གྱིས། ང་ལ་མཐུན་རྐྱེན་སྡོང་གྲོགས་སྒྲུབས་དང་། ངས་ཁྱེད་ཅག་ཚང་མ་འཁོར་བའི་སྡུག་བསྔལ་ལས་བསྒྲལ་ནས་སངས་རྒྱས་ཀྱི་གོ་འཕང་ལ་དགོད་པར་བྱ་ཞེས་ཁས་བླངས་ཤིང་དམ་བཅས་ཚར་བ་ཡིན་པས། ཁྱེད་ཅག་གིས་དགའ་བ་སྒོམས་ཤིག་ཅེས་འཇིག་རྟེན་ཁམས་ཀྱི་མི་མ་ཡིན་ཐམས་ཅད་ལ་དེ་ལྟར་བསྒྲགས་དགོས་པ་ཡིན། ཁྱད་པར་དུ་འུ་ཅག་ཧཱ་ཝ་ཡེ་ཡི་ཡུལ་ཁམས་འདི་ལ་དབང་བསྒྱུར་བའི་ལྷ་མོ་འཇིགས་བྱེད་དྲག་མོ་（Goddess of Volcanoes and Fire:Pele）ཞེས་སྐུ་ལ་མེ་འབར་གྱིན་ཡོད་པ་དེ་གཙོ་བོར་གྱུར་པའི་སྣང་སྲིད་ཀྱི་ལྷ་འདྲེ་དྲེགས་པ་ཅན་ཐམས་ཅད་དགའ་བར་གྱིས་ལ་སྤྲོ་བར་གྱིས་དང་། ངས་ཁྱེད་རྣམས་ལ་འགལ་སྤོང་མཐུན་སྒྲུབ་ཀྱི་ཐབས་ལ་བརྩོན་པར་བྱེད་ལ། ཁྱེད་རྣམས་ཀྱིས་ཀྱང་ཡུལ་ཁམས་འདི་ལ་ཁ་འཛིན་སྡོང་གྲོགས་དང་། སྒོས་སུ་ངས་བྱང་ཆུབ་བསྒྲུབ་པ་ལ་ཁ་འཛིན་སྡོང་གྲོགས་གྱིས་སྙམ་པའི་སྒོ་ནས་རྗེས་ཟློས་བྱེད་དགོས་པ་ཡིན།^p138
བདག་གིས་དེ་རིང་སྐྱོབ་པ་ཐམས་ཅད་ཀྱི། །^p139
སྤྱན་སྔར་འགྲོ་བ་བདེ་གཤེགས་ཉིད་དང་ནི། །^p140
བར་དུ་བདེ་ལ་མགྲོན་དུ་བོས་ཟིན་གྱིས། །^p141
ལྷ་དང་ལྷ་མིན་ལ་སོགས་དགའ་བར་གྱིས། །^p142
བྱང་ཆུབ་སེམས་མཆོག་རིན་པོ་ཆེ། །^p143
མ་སྐྱེས་པ་རྣམས་སྐྱེ་གྱུར་ཅིག །^p144
སྐྱེས་པ་ཉམས་པ་མེད་པར་ཡང་། །^p145
གོང་ནས་གོང་དུ་འཕེལ་བར་ཤོག །^p146
རྗེ་ཉིད་ཀྱིས་དེ་ལྟར་གསུངས་པའི་སྡོམ་ཆོག་འདི་ཆེས་རིན་ཐང་ཆེ་ཞིང་། བྱང་སྡོམ་གྱི་མན་ངག་དང་འབོགས་ཆོག་སོགས་གནད་འདུས་ལ་ལག་ལེན་སླ་བ་ཡིན་པས། རང་གིས་ཉམས་སུ་ལེན་པའམ་གཞན་ལ་གནང་ནའང་ཕན་པ་ཤིན་ཏུ་ཆེ་བར་སྣང་།^p147
སྐབས་འདིར་མང་པོ་ཞིག་གིས་ཆོས་ཁྲིད་ཀྱི་ནང་དོན་སྐོར་ལ་དྲི་བ་འགའ་རེ་ཡོད་ཟེར་བས། འདི་ལྟར་དྲི་བ་དྲིས་ལན་གྱི་གོ་སྐབས་ཤིག་ཀྱང་གནང་བྱུང་།^p148
དྲི་བ། དཀོན་མཆོག་གསུམ་ལ་སྐྱབས་སུ་འགྲོ་སྟངས་དེ་ཤེས་མ་སོང་བས། དེ་གཅིག་གསུངས་རོགས་གནོངས།^p149
ལན། དཀོན་མཆོག་གསུམ་ལ་སྐྱབས་སུ་འགྲོ་ཚུལ་ནི། སྟོན་པ་ནི་སངས་རྒྱས་ཁོ་ན་དང་། རང་གིས་བསྒྲུབ་རྒྱུ་དེ་ནི་དམ་པའི་ཆོས་ཁོ་ན། གྲོགས་ནི་འཕགས་པའི་དགེ་འདུན་པ་ཁོ་ན་ཡིན་ཞིང་། དེ་དག་ཁོ་ནར་བསྟེན་བསམ་རྒྱུའི་དམ་བཅའ་བ་ནི་སྐྱབས་སུ་འགྲོ་བ་ཡིན།^p150
དྲི་བ། འཇུག་པ་སེམས་བསྐྱེད་སྐོར་གྱི་ཕར་ཕྱིན་དྲུག་ལས། སྦྱིན་པ་དང་ཚུལ་ཁྲིམས། བཟོད་པ་གསུམ་གསུངས་སོང་། བརྩོན་འགྲུས་དང་བསམ་གཏན། ཤེས་རབ་ཀྱི་སྐོར་དེ་གང་འདྲ་ཡིན་ཚུལ་གསུང་རོགས།^p151
ལན། བརྩོན་འགྲུས་ནི་དགེ་བར་སྤྲོ་བ་དང་། བསམ་གཏན་ནི་སེམས་གཞན་དུ་མི་གཡེང་བ། ཤེས་རབ་ནི་སྟོང་ཉིད་རྟོགས་པའི་བློ་ལ་ཟེར་བ་ཡིན།^p152
དྲི་བ། ཐེག་པ་ཞེས་པའི་དོན་གང་ཡིན། མཚན་ཉིད་ཐེག་པ་དང་རྡོ་རྗེ་ཐེག་པ་གཉིས་ཀྱི་དོན་སོ་སོར་གསུང་རོགས་ཞུ།^p153
ལན། ཐེག་པ་ཞེས་པ་སྤྱིར་ཡར་འདེགས་ནུས་པའི་དོན་ལ་གོ་ཞིང་། དེ་ལ་འདིས་འདེགས་པ་རྒྱུ་ཡི་ཐེག་པ་ཞེས་དང་པོ་རྒྱུ་ལ་བརྟེན་ནས་འདེགས་པ་དང་། འདིར་འདེགས་པ་འབྲས་བུའི་ཐེག་པ་ཞེས་འདེགས་འགྲོ་སའི་ཡུལ་དེ་ལ་འབྲས་བུའི་ཐེག་པ་ཟེར་བ་ཡིན། སྡུད་པ་ལས། ཐེག་པ་འདི་ནི་མཁའ་འདྲ་གཞལ་མེད་ཁང་ཆེན་ཏེ། །དགའ་སྐྱིད་བདེ་བ་མངོན་པར་འཐོབ་བྱེད་ཐེག་པའི་མཆོག །དེ་གང་ཞོན་ནས་སེམས་ཅན་ཐམས་ཅད་མྱ་ངན་ཟློ། །ཞེས་ཐེག་པའི་སྒྲ་དོན་དང་བཅས་གསུངས་པ་ལྟ་བུ་ཡིན། མདོ་མཚན་ཉིད་ཐེག་པ་ནི། ད་ལྟ་སངས་རྒྱས་མ་ཡིན་པ་ཞིག་གིས་སངས་རྒྱས་ཀྱི་ལམ་ལ་བསླབ་ནས་གཟོད་སངས་རྒྱས་ཐོབ་པ་སྟེ་གཞི་དང་འབྲས་བུ་གཉིས་ཐ་དད་དུ་འདོད། རྡོ་རྗེའི་ཐེག་པས་ནི་སེམས་ཅན་རྣམས་གཞི་ནས་སངས་རྒྱས་ཡིན་པ་ལ་ཡིན་པར་ངོ་ཤེས་པ་ཙམ་ལ་འབྲས་བུའི་ཐེག་པ་ཞེས་ཟེར་ཞིང་། གཞི་འབྲས་གཉིས་ཀ་སོ་སོར་དབྱེར་མེད་པར་འདོད་པ་ཡིན།^p154
དྲི་བ། ཁྱེད་ས་ཆ་འདིར་ཕེབས་པར་ཕྲན་དགའ་སྤྲོ་ཆེན་པོ་སྐྱེས་སོང་། དེང་སང་བོད་ཀྱི་ལུང་པ་ལ་དབང་སྒྱུར་པ་དག་གིས་སྡུག་པོ་གཏོང་བ་སོགས་རྙོག་དྲ་འདྲ་མིན་འབྱུང་བཞིན་ཡོད་ཅེས་གོ་བྱུང་། སྤྱིར་གང་ན་ཡང་རྙོག་དྲ་ཕྲན་བུ་ཙམ་རེ་ཡོད་ཀྱང་། བོད་ཀྱི་ལུང་པ་ན་ནང་པའི་ཆོས་རྒྱ་ཆེར་དར་ཞིང་། ས་ཆ་བྱིན་རླབས་ཅན་རེད། མི་ཐམས་ཅད་བྱང་ཆུབ་སེམས་རྒྱུད་ལྡན་ཡིན་ན། དེ་འདྲའི་རྙོག་དྲ་དེ་ཇི་ལྟར་བྱུང་ཡོང་བ་ཡིན་ནམ།^p155
ལན། བྱང་ཆུབ་སེམས་དཔའ་ལ་དེ་ལྟ་བུའི་རྙོག་དྲའམ་གཞན་གྱི་གནོད་པ་བསྐྱལ་བ་ཤིན་ཏུ་ཉུང་ཞིང་། གལ་ཏེ་ཡོད་ནའང་ཧ་ཅང་དགའ་བ་བསྒོམ་སའི་ཡུལ་ཡིན་ཏེ། བདག་ཅག་གི་སྟོན་པ་ཐུགས་རྗེ་ཅན་གྱིས་ཐེངས་མང་པོར་རང་གི་དབུའང་སེམས་ཅན་རྣམས་ལ་སྦྱིན་པ་བཏང་མྱོང་བས་དེ་ཡང་སེམས་ཅན་གྱི་དོན་རེད། དེའི་རྒྱུ་མཚན་གཞན་ཤེས་པར་འདོད་ན་མང་པོ་གླེང་རྒྱུ་ཡོད་ཀྱང་དེ་ཙམ་གྱིས་ཆོག་པར་བྱ།^p156
དྲི་བ། བྱང་ཆུབ་ཀྱི་སེམས་དེ། སེམས་ཤིག་རེད་དམ། ལུས་དང་འབྲེལ་བ་ཡོད་པ་ཞིག་རེད།^p157
ལན། བྱང་ཆུབ་གྱི་སེམས་དེ་སེམས་ཡིན་ལ། འུ་ཅག་གི་ལུས་འདི་ཡོད་པའི་རིང་ལ་ལུས་པོ་དང་འབྲེལ་བ་ཡོད་པ་རེད།^p158
འཇམ་དཔལ་གྱིས་གནང་བའི་འཇམ་དཔལ།^p159
ཕྱི་ཟླ་༦པའི་ཚེས་༡༨ཉིན་གྱི་སྔ་དྲོའི་ཆོས་ཁྲིད་དང་བྱང་སྡོམ་གསུངས་རྗེས། མ་གཞི་ཕྱི་དྲོའི་དུས་སུ་ཆོས་རྗེ་ཉིད་ཀྱིས་ངལ་གསོས་ཏེ་དུས་ཁྱད་སྙོམ་སྒྲིག་བྱ་དགོས་ཀྱང་། མཇལ་ཁ་དང་བྱིན་རླབས་ཞུ་རུ་ཡོང་བའི་མི་མང་བས་ཁོང་གིས་མི་རེ་རེ་བཞིན་གྱི་འདོད་པ་བསྐངས་ལ། ཁྱད་པར་དུ་ནུབ་ཕྱོགས་པ་དག་དྲི་བ་འདྲི་བར་དགའ་པོ་ཡོད་པས། ཆོས་རྗེ་ཉིད་དང་བླ་རུང་། བོད་ཡུལ་སོགས་དང་འབྲེལ་བའི་དྲི་བ་མང་པོ་དྲིས།^p160
བདག་གི་དྲན་པའི་ཡོལ་བའི་ངོས་སུ་རྗེ་ཉིད་ལ་མི་ཞིག་གིས་འདི་ལྟར་དྲིས་པ་འཆར་ཡོང་སྟེ། ཁྱེད་ཉིད་རིག་གསར་གྱི་དུས་སུ་བོད་ཡུལ་དུ་སྒྲུབ་ཕུག་གི་ནང་དུ་སྐུ་མཚམས་ལ་བཞུགས་སྐབས་དམར་སྲུང་དམག་མི་རྣམས་ཀྱིས་ཕྱིར་དྲུད་པ་ན། ཁྱེད་ཀྱི་སྐུ་ལུས་ཇེ་ཆེ་དང་ཇེ་ལྕིར་སོང་ནས་འདྲུད་མ་ཐུབ་པ་རེད་ཟེར་བ་ཐོས་པས། ཁྱེད་ཀྱིས་དེ་ཇི་ལྟར་བྱས་པ་ཡིན་ཞེས་དྲིས་པ་ལ། རྗེ་ཉིད་ཀྱིས། དེ་ནི་ཁོ་རང་ཚོར་དེ་ལྟར་སྣང་བ་ཙམ་རེད། བདག་གིས་ཁོ་ཚོ་དང་མཉམ་དུ་རྩེད་མོ་བརྩེས་པ་ཙམ་ཡིན་ཞེས་གསུངས།^p161
དེར་མཱེས་ཀཱེལ་（Miguel Schwabe）ཞེས་པའི་ནུབ་ཕྱོགས་པ་ཞིག་ཡོད་ཅིང་། ཁོང་ནི་གནས་ཆུང་དགོན་ནས་ངེད་ཅག་ལ་སྣེ་ལེན་བྱེད་མཁན་གཙོ་བོ་ཞིག་ཡིན་ལ་བོད་སྐད་ཀྱང་ཉུང་ཙམ་ཤེས། རྗེ་ཉིད་ལ་ཆོས་ཁྲིད་མེད་སྐབས། ཁོ་རང་རྒྱུན་དུ་སྐུ་མདུན་དུ་བཅར་ནས་གླེང་མོལ་བྱེད་ཅིང་དྲི་བ་སྣ་ཚོགས་འདོན་གྱིན་ཡོད་པར་མ་ཟད། སྐབས་དེར་ཆོས་རྗེ་ཉིད་ཀྱིས་མི་དེར་གྲུབ་རྟགས་ཤིག་ཀྱང་བསྟན་མྱོང་ཞེས་བདག་གིས་ཐོས་པས། རྗེས་སུ་ངས་དོན་དེ་བདེན་མིན་རྩར་གཅོད་པར་མི་ཞིག་ཆེད་དུ་མངགས་ཤིང་། དེས་ཕྱི་ལོ་༢༠༡༧ལོའི་ཟླ་༡༠པའི་ཚེས་༢༠ཉིན་མཱེས་ཀཱེལ་ལ་བཅར་འདྲི་བྱས་པའི་ནང་དོན་ཡི་གེར་བཀོད་པ་གཤམ་གསལ་ལྟར།^p162
བདག་གིས་ཆོས་རྗེ་རིན་པོ་ཆེ་ལ། ཁྱེད་རྣམས་རྒྱ་ནག་རི་བོ་རྩེ་ལྔ་རུ་བྱོན་པ་དེ་ཇི་ལྟར་ཡིན་ཞེས་དྲིས་པ་ན། ཁོང་གིས། སྐབས་དེར་མི་ཧ་ཅང་མང་པོ་ཡོད་ཅིང་། མི་རྣམས་ཀྱིས་ངེད་ཅག་རི་བོ་རྩེ་ལྔ་ལ་གནས་མཇལ་དུ་འགྲོ་བ་ཐོས་པས། ལམ་བར་ནས་མེ་འཁོར་དུ་ཞུགས་མཁན་ཡང་ཇེ་མང་ནས་ཇེ་མང་དུ་སོང་སྟེ་ཉེན་རྟོག་པ་རྣམས་ཀྱང་བྲེལ་འཚུབ་ཆེན་པོ་ལངས་དགོས་ཐུག ཚང་མ་ང་དང་མཉམ་དུ་གནས་མཇལ་དང་གནས་སྐོར་ལ་འགྲོ་འདོད་པ་ཙམ་ལས། སྐབས་དེར། རྒྱ་ནག་གི་མི་རྣམས་བོད་བརྒྱུད་ནང་བསྟན་ལ་རྒྱུས་ལོན་དེ་ཙམ་མེད། བདག་ས་ཆ་མང་པོར་འགྲོ་མ་འདོད་པར་མཚམས་ལ་བསྡད་པ་ཡིན་གསུངས།^p164
ངས་ཁོང་ལ་ཁྱེད་ཀྱིས་འཇམ་དཔལ་དབྱངས་མཇལ་ཨེ་བྱུང་ཞེས་དྲིས་པར། ཁོང་གིས། མཇལ་བྱུང་། ངས་ནོར་བཟང་ཕུག་པ་ནས་མཚམས་གྲོལ་ལ་ཉེ་ཁར་འཇམ་དཔལ་དབྱངས་དངོས་སུ་མཇལ་བྱུང་ལ། སྐབས་དེའི་མཚམས་སྒྲུབ་ལ་གྲུབ་འབྲས་ཧ་ཅང་ཡག་པོ་ཐོབ་སོང་ཞེས་གསུངས།^p165
ངས་འཇམ་དཔལ་དབྱངས་ཀྱིས་ཁྱེད་ལ་ཅི་ཞིག་གནང་བྱུང་ཞེས་དྲིས་ཚེ། ཁོང་གིས། གནང་བྱུང་ཡ་ཞེས་གསུང་ཞོར་དུ་ཕྱག་གིས་དབུ་ལ་ཉུག་ཉུག་མཛད་ནས། ཆེ་ཆུང་མཐོ་གང་ཙམ་གྱི་སྐུ་ཆེན་པོ་ཞིག་ཕྱག་ཏུ་བླངས་བྱུང་། དེ་ནི་ཁོང་གིས་ཁུག་མའི་ནང་ནས་བཙལ་བ་མ་ཡིན་ལ། ཅོག་ཙེའི་སྟེང་ནས་བླངས་པའང་མིན་པར་དབུ་ལ་ཉུག་ཉུག་བྱེད་སྐབས། གློ་བུར་དུ་ནམ་མཁའ་ནས་འཇམ་དཔལ་དབྱངས་ཀྱི་སྐུ་ཞིག་བླངས་བྱུང་བ་བདག་གིས་མངོན་སུམ་དུ་མཐོང་བྱུང་།^p166
ཁོང་གིས་སྐུ་དེ་ང་ལ་གཏད་པ་ན། ངས་ལག་པ་གཉིས་ཀྱིས་བླངས་ནས་མགོ་ཐོག་ཏུ་གཏུག་ཙམ་བྱས་ཏེ། མིག་གཉིས་མ་བཙུམ་པར་གཟབ་ནན་གྱིས་སྐུ་དེར་རྩེ་གཅིག་ཏུ་བལྟས་ཤིང་། འདི་ནི་ཆེས་དམིགས་བསལ་བ་ཞིག་སྟེ། ང་ལ་འཇམ་དཔལ་དབྱངས་དངོས་ཀྱིས་གནང་བའི་འཇམ་དཔལ་དབྱངས་ལག་ཏུ་ལེན་པའི་སྐལ་བ་ཐོབ་པ་ནི། ཅི་འདྲའི་བསོད་ནམས་བཟང་བ་ལ་ཨང་སྙམ་བཞིན་སེམས་པ་ཤིན་ཏུ་དགའ་བའི་ངང་སྐུ་དེར་ཞིབ་ཏུ་མཇལ་བ་ན། དེའང་སྤུས་ཀ་དང་བཟོ་བཀོད་ཤིན་ཏུ་ལེགས་ཤིང་། ལག་ཏུ་བླངས་ན་ལྗིད་ཏིག་གེར་ཡོད་པས་འཁྲུལ་བའི་སྣང་བ་ནི་མིན་ཐག་ཆོད་ཡིན། ངས་དེ་ལྟར་སྐར་མ་གསུམ་བཞི་ཙམ་ལ་མཇལ་ནས་སླར་ཆོས་རྗེ་རིན་པོ་ཆེའི་ཕྱག་ཏུ་གཏད་པ་ན། དེ་ཉིད་ཁོང་གི་ཕྱག་ནས་གློ་བུར་དུ་འཇའ་ཡལ་བ་ལྟར་མི་སྣང་བར་གྱུར་སོང་།^p168
གནས་ཚུལ་དེ་དངོས་སུ་མཐོང་སྐབས་ངའི་ཡིད་ལ། འདི་རྫུ་འཕྲུལ་དང་གྲུབ་རྟགས་བསྟན་པ་ཡིན་ནམ་སྙམ། སྔོན་ཆད་བདག་གིས་བླ་མ་ལ་ལ་མཚམས་ལ་བཞུགས་སྐབས་གྲུབ་རྟགས་བསྟན་པ་འགའ་ཞིག་མཐོང་མྱོང་ཡང་། ཆོས་རྗེ་རིན་པོ་ཆེའི་ཚུལ་འདི་ནི་གཞན་དང་མི་འདྲ་བར་ཆེས་ཧ་ལས་ཤིང་ངོ་མཚར་བའི་གནས་སུ་གྱུར་པ་ཞིག་རེད། དེ་ནི་ཁོང་གཏེར་ཆེན་ལས་རབ་གླིང་པ་དང་འབྲེལ་བ་ཡོད་པས་ཡིན་ཤས་ཆེ།^p169
ད་ལྟ་གནས་ཚུལ་དེ་འདྲ་མཇལ་རྒྱུའི་གོ་སྐབས་མང་པོ་མེད་པས། ང་ནི་ཤིན་ཏུ་སྐལ་བ་བཟང་པོ་དང་ལྡན་པ་ཡིན་སྙམ་བཞིན་ཡོད། ཅེས་ཟེར།^p170
ནུབ་ཕྱོགས་ཀྱི་མི་རྣམས་ནི་ཆུང་དུས་ནས་དྲང་བདེན་དང་དངོས་ཐོག་བདེན་འཚོལ་གཙོ་བོར་བྱེད་པ་ཡིན་པས། དོན་འདི་ནི་སྒྲོ་བཏགས་པ་ཙམ་མིན་པར་ཡིད་ཆེས་ནས་ཡི་གེར་བཀོད་པ་ཡིན།^p171
རྫོགས་ཆེན་གྱི་རྣམ་གཞག་ངོ་སྤྲོད།^p172
ཆོས་རྗེ་ཉིད་ཀྱིས་ཆོས་ཁྲིད་སྐབས་སུ། བོད་བརྒྱུད་ནང་བསྟན་གྱི་ཟབ་ཆོས་གཉིས་ནི་བྱང་ཆུབ་ཀྱི་སེམས་དང་རྫོགས་པ་ཆེན་པོ་ཡིན་པར་གསུངས་པ་ལས། བྱང་ཆུབ་སེམས་ཀྱི་སྐོར་ནི་སྔ་དྲོའི་བྱང་སྡོམ་གནང་སྐབས་རྒྱས་པར་ངོ་སྤྲོད་གནང་ཟིན་ལ། འཇམ་དཔལ་ཞི་སྒྲུབ་ཀྱི་དབང་དང་ཁྲིད་ཡིག་སངས་རྒྱས་ལག་སྟེར་སོགས་རྫོགས་པ་ཆེན་པོའི་སྐོར་དེ་ཉིན་གཉིས་པ་ནས་བཟུང་སྟེ་གསུང་རྩིས་ཡིན་ཡང་། རྫོགས་པ་ཆེན་པོའི་ཆོས་ལ་རྒྱུས་ལོན་ནམ་དང་བ་སྐྱེ་བའི་ཕྱིར་དུ་ཐམས་ཅད་ལ་དགོང་མོའི་དུས་སུ་འདི་ལྟར་གསུང་།^p173
དེ་ཡང་ཕྱི་རོལ་མུ་སྟེགས་པ་དང་ནང་པ་སངས་རྒྱས་པ་གང་དང་གང་ཡིན་ནའང་། ཐོག་མར་ཆོས་འཆད་ཉན་དང་སྒོམ་སྒྲུབ་ཀྱི་དུས་སུ་རང་གང་མོས་ཀྱི་ལྷ་ལ་ཕྱག་འཚལ་བ་དང་མཆོད་པར་བརྗོད་པ་སྔོན་དུ་འགྲོ་བ་དེ་ནི་གྲུབ་མཐའ་འཛིན་པ་སྤྱིའི་འགྲོ་ལུགས་ཡིན་པ་ལྟར། ད་ལྟ་བདག་གིས་ཀྱང་རང་གི་ལྷག་པའི་ལྷ་ལ་ཕྱག་འཚལ་བ་དང་མཆོད་པར་བརྗོད་པ། གདུལ་བྱ་རྣམས་ལ་ཆོས་ཀྱི་འཁོར་ལོ་བསྐོར་བར་དམ་བཅས་པ་རྣམས་སྔོན་དུ་སོང་བ་རེད།^p174
ནང་པ་སངས་རྒྱས་པའི་ཐེག་ཆེན་ཐུན་མོང་མ་ཡིན་པའི་ལུགས་སྲོལ་འདི་ལ། ཆོས་འཆད་ཉན་སྒོམ་སྒྲུབ་གང་གི་དུས་སུ་ཡང་། ད་ནངས་བཤད་ཟིན་པ་ལྟར་བྱང་ཆུབ་མཆོག་ཏུ་སེམས་བསྐྱེད་པ་ནི་དུས་རྒྱུན་མེད་དུ་མི་རུང་བ་ཡིན་ལ། ཆོས་ཉན་སྟངས་ཀྱི་ཆ་ནས་ནི། བདག་གིས་སེམས་ཅན་ཐམས་ཅད་སངས་རྒྱས་ཀྱི་གོ་འཕང་ལ་དགོད་པར་བྱ་བའི་ཆེད་དུ་ཆོས་འདི་ཉན་པ་ཡིན་སྙམ་པའི་ཀུན་སློང་སྔོན་དུ་སོང་ནས་མཉན་དགོས།^p175
དེ་ལྟར་ཆོས་ཉན་པ་ལ་སེམས་ཅན་ཐམས་ཅད་སངས་རྒྱས་འཐོབ་བྱེད་ཀྱི་ནུས་པ་ཇི་ལྟར་ལྡན་ནམ་སྙམ་ན། དེ་ལ་བཅོམ་ལྡན་འདས་ཀྱིས། སྒྲུབ་པ་ལོ་དགུར་བྱེད་པ་ལས་ཆོས་ལན་གཅིག་འཆད་ཉན་བྱས་པའི་ཕན་ཡོན་ཆེ་ཞེས། འུ་ཅག་གིས་སྒོམ་སྒྲུབ་ཉམས་ལེན་ལོ་དགུར་བྱས་པ་ལས། བླ་མའི་དྲུང་ནས་ཆོས་ཉན་ཞིང་དེའི་དོན་ལ་སེམས་པ་ཕན་ཡོན་ཆེ་བར་གསུངས་པས། སེམས་ཅན་གཞན་གྱི་དོན་སྒྲུབ་པར་བྱེད་པ་ལ་ཆོས་མཉན་རྒྱུ་དེ་ཅི་ནས་ཀྱང་གལ་ཆེ་བ་རེད།^p176
དེར་མ་ཟད། ཆོས་འཆད་པའི་དུས་སྟོན་པའི་ཕྱིར་དུ་ཐོག་མར་རྔ་རྡུང་བ་དང་དུང་འབུད་པ། མཁར་རྔ་རྡུང་བ་ལ་སོགས་པའི་སྒྲ་སྐད་རྣམས་དུད་འགྲོའི་སྐྱེ་གནས་སུ་གཏོགས་པའི་བྱ་བྱེའུ་རི་དྭགས་ཡན་ཆད་ཀྱི་རྣ་ལམ་དུ་ཐོས་པ་ཙམ་གྱིས་ཀྱང་ངན་སོང་གི་སྐྱེ་སྒོ་ཁེགས་ནས་ལུས་རྟེན་དམན་པའི་སྐྱེ་བ་མི་ལེན་པར་གསུངས་ན། ཆོས་དངོས་སུ་ཐོས་པ་ལ་ཕན་ཡོན་བསམ་གྱིས་མི་ཁྱབ་པ་ཡོད་པ་སྨོས་ཅི་དགོས། ཆོས་ཐོས་པས་ནི་རང་རྒྱུད་ཀྱི་མི་ཤེས་པ་དང་རྨོངས་པའི་ཆ་ཐམས་ཅད་སེལ་བར་བྱེད་པའང་ཡིན།^p178
གཞན་ཡང་མཁས་པ་ཤེས་རབ་ཅན་དང་འཕྲད་ན། སྐྱེས་ཐམས་ཅད་ཀྱི་མཆོག་ཏུ་གྱུར་པའང་ཐོས་པ་འདི་ཉིད་ཡིན་པའི་ཕྱིར། ཚེ་འདིར་འབྱུང་བའི་ཕན་ཡོན་ཡང་བསམ་གྱིས་མི་ཁྱབ་པ་ཡོད་ཅིང་། ཚེ་ཕྱི་མར་འབྱུང་བའི་ཕན་ཡོན་ལ་བསམ་བློ་བཏང་ན། ཡར་དཀོན་མཆོག་གི་ཞིང་ས་ལ་མཆོད་པ་དུ་མ་བྱས་པ་དང་། མར་ངན་སློང་གི་སེམས་ཅན་ཐམས་ཅད་ལ་ལོ་མང་པོའི་རིང་དུ་སྦྱིན་པ་བྱས་པ་ལས། ཐོས་པ་ལན་གཅིག་བྱས་པའི་ཕན་ཡོན་ཆེ་ལ། ས་སྟེང་མ་ལུས་པ་ཐམས་ཅད་རིན་པོ་ཆེ་སྣ་བདུན་ལས་བྱས་པའི་མཆོད་རྟེན་དང་སྐུ་གཟུགས་རྣམ་པ་སྣ་ཚོགས་ཀྱིས་བཀང་བ་ལས། ཐེག་པ་ཆེན་པོའི་ཆོས་ཚིག་བཞི་གཅིག་ཉན་ན་དེའི་ཕན་ཡོན་ཆེ་བར་མདོ་སྡེ་རྣམས་སུ་གསུངས་ཡོད།^p179
དེ་བཞིན་དུ་ཕྱོགས་བཅུའི་ཞིང་རབ་འབྱམས་པ་ན་བཞུགས་པའི་རྒྱལ་བ་དང་དེའི་སྲས་བྱང་ཆུབ་སེམས་དཔའི་ཚོགས་ཐམས་ཅད་ལ། ཉིན་རེ་བཞིན་དུ་ཡོ་བྱད་རྣམ་པ་སྣ་ཚོགས་ཀྱིས་མཆོད་པ་དང་བསྙེན་བཀུར་སྣ་ཚོགས་བྱེད་པ་ལས། ཐེག་པ་ཆེན་པོའི་ཆོས་ཚིག་བཞི་བའི་ཚིགས་སུ་བཅད་པ་གཅིག་ཉན་ན་དེའི་ཕན་ཡོན་ཆེ་ཚུལ་ཡང་མདོ་སྡེ་དང་བསྟན་བཅོས་མང་པོར་གསུངས་ཡོད། དེ་ལྟ་བུའི་ཐེག་པ་ཆེན་པོའི་ཆོས་མཉན་པ་ནི་དེ་འདྲའི་ཕན་ཡོན་ཆེན་པོ་དང་ལྡན་པའི་ཕྱིར་ན། བདག་གིས་ཆོས་འདི་ཉན་པའི་དགེ་བ་ཡིས། སེམས་ཅན་ཐམས་ཅད་བདེ་བ་དང་ལྡན་ཞིང་སྡུག་བསྔལ་དང་བྲལ་བར་གྱུར་ཅིག་སྙམ་པའི་བསམ་པ་བཟང་པོ་སྔོན་དུ་སོང་ནས་ཆོས་ལ་མཉན་དགོས་པ་ཡིན།^p180
སྟོན་པ་བྱོན་ཚུལ།^p181
སྐབས་སུ་བབས་པའི་འཆད་བྱའི་ཆོས་དེ་གང་ཡིན་ཞེ་ན། དེ་ཡང་བསྐལ་པ་གྲངས་མེད་པའི་སྔོན་རོལ་དུ། བདག་ཅག་གི་སྟོན་པ་ཐུགས་རྗེ་ཅན་མཉམ་མེད་ཐུབ་པའི་དབང་པོ་ཀུན་མཁྱེན་བུ་རམ་ཤིང་པ་དེ་ཉིད་སློབ་པ་ལམ་གྱི་གནས་སྐབས་ན། དེ་བཞིན་གཤེགས་པ་ཤཱཀྱ་ཐུབ་ཆེན་ཞེས་བྱ་བ་འཇིག་རྟེན་གྱི་ཁམས་འདིར་བྱོན་པ་དང་མཇལ་བས། ཁོང་གིས་དེ་ལ་མཆིལ་ལྷམ་ཟུང་གཅིག་དང་ཀ་ཤི་ཀའི་གདུགས། འགྲོན་བུ་ལྔ་བརྒྱ་བཅས་ཕུལ་ནས། སེམས་ཅན་ཐམས་ཅད་ཀྱི་དོན་དུ་བྱང་ཆུབ་སེམས་དཔའི་ལམ་ལ་བསླབ་པར་བྱའོ་ཞེས་དང་པོ་བྱང་ཆུབ་མཆོག་ཏུ་ཐུགས་བསྐྱེད་ཅིང་། རིམ་གྱིས་སྦྱིན་པ་དང་ཚུལ་ཁྲིམས། བཟོད་པ། བརྩོན་འགྲུས། བསམ་གཏན་ཏེ་དམིགས་བཅས་བསོད་ནམས་ཀྱི་ཚོགས་དང་། ཤེས་རབ་བདག་མེད་རྟོགས་པའི་ཡེ་ཤེས་ཏེ་དམིགས་མེད་ཡེ་ཤེས་ཀྱི་ཚོགས་ཏེ་ཚོགས་གཉིས་ཟུང་འབྲེལ་དུ་བསྒོམས་ནས། བསྐལ་ཆེན་གྲངས་མེད་གཅིག་ལ་ཚོགས་ལམ་དང་སྦྱོར་ལམ་སྟེ་སོ་སོའི་སྐྱེ་བོའི་ལམ་གཉིས་བགྲོད་པར་མཛད། དེ་ནས་བསྐལ་ཆེན་གྲངས་མེད་གཅིག་གིས་ཚོགས་བསགས་སྒྲིབ་པ་སྦྱངས་བའི་ལག་རྗེས་ལ། མཐོང་ལམ་རབ་ཏུ་དགའ་བའི་ཡེ་ཤེས་ཞེས་བྱ་བ་དང་སྒོམ་ལམ་གྱི་མ་དག་ས་བདུན་རིམ་བཞིན་བགྲོད་པར་གྱུར། དེ་ནས་བསྐལ་ཆེན་གྲངས་མེད་གཅིག་གི་རིང་ས་བརྒྱད་པ་དང་དགུ་པ། བཅུ་པ་སྟེ་དག་པ་ས་གསུམ་ཐོབ་པར་གྱུར།^p182
ས་བཅུའི་རྒྱུན་མཐའ་ལ་དགའ་ལྡན་ལྷའི་གནས་སུ་ལྷའི་བུ་དམ་པ་ཏོག་དཀར་པོ་ཞེས་བྱ་བའི་སྐྱེ་བ་བཞེས་ནས། དགའ་ལྡན་པའི་ལྷ་རྣམས་ལ་ཆོས་ཀྱི་འཁོར་ལོ་རྒྱ་ཆེར་བསྐོར་བར་མཛད། དེ་ནས་ས་མོ་ལུག་གི་ལོའི་བོད་ཟླ་དྲུག་པ་དབྱར་འབྲིང་ཆུ་སྟོད་ཟླ་བའི་ཚེས་བཅོ་ལྔ་ལ། འཛམ་བུ་གླིང་གི་སེམས་ཅན་རྣམས་ཡོངས་སུ་གདུལ་བར་བྱ་བའི་ཕྱིར། དགའ་ལྡན་ལྷ་ཡི་གནས་ནས་མི་ཡུལ་སེར་སྐྱའི་དྲུང་དུ་ཡུམ་སྒྱུ་མ་ལྷ་མཛེས་མའི་ལྷུམས་སུ་ཞུགས་ཤིང་། ཟླ་བ་བཅུ་རྫོགས་པའི་དུས་སུ་ལུམྦི་ནིའི་སྐྱེད་ཚལ་ཞེས་བྱ་བར་ཡུམ་གྱི་མཆན་ཁུང་གཡས་པ་ནས་སྡུག་བསྔལ་མེད་པར་སྐུ་བལྟམས་པར་མཛད། ༼ལུམྦིའི་ཚལ་ནི་ད་ལྟའི་ནེ་པ་ལའམ་བལ་ཡུལ་གྱི་ས་ཆ་ཡིན།༽ དེ་ནས་དགུང་ལོ་ཉི་ཤུ་རྩ་དགུའི་རིང་དུ་རྒྱལ་པོ་ཟས་གཙང་མའི་རྒྱལ་སྲིད་བཟུང་ནས་སེར་སྐྱའི་གནས་སུ་བཞུགས། དགུང་ལོ་ཉེར་དགུའི་སྟེང་། འཁོར་བ་མཐའ་དག་ལ་སྐྱོ་བ་སྐྱེས་ནས་མཆོད་རྟེན་རྣམ་དག་གི་དྲུང་དུ་དབུ་སྐྲ་བསིལ་ཏེ་རབ་ཏུ་བྱུང་། ཆུ་བོ་ནེ་རཉྫ་ནའི་འགྲམ་དུ་ཉིན་རེར་ཆུ་ཐིགས་པ་རེ་དང་འབྲས་ཉག་མ་རེ་གསོལ་ནས་ལོ་དྲུག་གི་རིང་དུ་དཀའ་བ་སྤྱད་ནས་བཞུགས་ཤིང་། དེ་ནི། ཕྱིས་འབྱུང་གི་གང་ཟག་ཐམས་ཅད་ཀྱིས་ཆོས་ཉམས་སུ་ལེན་པར་དཀའ་སྤྱད་སྙིང་རུས་དགོས་ཞེས་གདམས་པའི་དོན་དུ་དཀའ་སྤྱད་ཀྱི་ཚུལ་མཛད་པ་རེད། དཔྱིད་ཟླ་ཐ་ཆུང་སྟེ་ས་ག་ཟླ་བའི་ཚེས་བཅོ་ལྔ་ལ་རྒྱ་གར་རྡོ་རྗེ་གདན་དུ་མངོན་པར་རྫོགས་པར་སངས་རྒྱས་ཤིང་། དེ་ནས་ཞག་བདུན་ཕྲག་བདུན་ཏེ་བདུན་བདུན་བཞི་ཅུ་ཞེ་དགུའི་རྗེས་སུ། ཡུལ་ཝཱ་ར་ཎཱ་སིའི་དྲང་སྲོང་ལྷུང་བ་རི་དྭགས་ཀྱི་ནགས་སུ་བཀའ་དང་པོ་བདེན་པ་བཞིའི་ཆོས་ཀྱི་འཁོར་ལོ་བསྐོར་ལ། བྱ་རྒོད་ཕུང་པོའི་རི་ལ་བཀའ་བར་བ་མཚན་ཉིད་མེད་པའི་ཆོས་ཀྱི་འཁོར་ལོ་བསྐོར། ཡངས་པ་ཅན་ལ་སོགས་པའི་ཡུལ་ངེས་མེད་རྣམས་སུ་བཀའ་ཐ་མ་ལེགས་པར་རྣམ་པར་ཕྱེ་བའི་ཆོས་ཀྱི་འཁོར་ལོ་བསྐོར་ནས། མཐར་རྩྭ་མཆོག་གྲོང་དུ་ཐུན་མོང་གི་གདུལ་བྱ་རྣམས་རྟག་འཛིན་ལས་བཟློག་པར་བྱ་བའི་ཕྱིར་དུ་སྐུ་མྱ་ངན་ལས་འདའ་བའི་ཚུལ་བསྟན།^p183
དེ་དག་ནི་མདོ་ཕར་ཕྱིན་ཐེག་པ་ལས་བསྟན་པ་ལྟར་སངས་རྒྱས་ཇི་ལྟར་བྱོན་པའི་ཚུལ་མདོར་བསྡུས་པ་ཙམ་བཤད་པ་ཡིན།^p184
ལུང་གིས་བསྟན་ཚུལ།^p185
དེ་ནས་གསང་སྔགས་རྡོ་རྗེ་ཐེག་པའི་བསྟན་པ་ཇི་ལྟར་དར་ཚུལ་ནི། སངས་རྒྱས་དངོས་སུ་བཞུགས་པའི་གནས་སྐབས་སུ་ནུབ་ཕྱོགས་ཨོ་རྒྱན་གྱི་ཡུལ་དུ་ཨིནྡྲ་བྷུ་ཏི་ལ་དཔལ་གསང་བ་འདུས་པའི་ཆོས་ཀྱི་འཁོར་ལོ་བསྐོར་ཞིང་། རྒྱ་གར་ལྷོ་ཕྱོགས་དཔལ་ལྡན་འབྲས་སྤུངས་ཀྱི་མཆོད་རྟེན་ཆེན་པོ་རུ། ཤམ་བྷ་ལའི་ཆོས་རྒྱལ་ཟླ་བ་བཟང་པོ་ལ་སོགས་པའི་འཁོར་འདུས་པ་བསམ་གྱིས་མི་ཁྱབ་པ་ལ་འཇམ་དཔལ་མཚན་བརྗོད་དང་དཔལ་དུས་ཀྱི་འཁོར་ལོའི་རྒྱུད་སྡེ་རྣམས་གསུངས། གཞན་ཡང་ལྷ་དང་ཀླུ་དང་གནོད་སྦྱིན་དང་དྲི་ཟ་ལ་སོགས་པའི་ཡུལ་རྣམས་སུ། གདུལ་བྱ་སྐལ་བ་དང་ལྡན་པ་ཉུང་ཤས་ལ་གསང་སྔགས་རྡོ་རྗེ་ཐེག་པའི་ཆོས་བསྟན་ཡོད། དེ་བཞིན་གཤེགས་པ་མྱ་ངན་ལས་འདའ་ཁར། ཁོང་གིས་སྔོན་བདག་གིས་གདུལ་བྱ་མང་པོ་ལ་མཚན་ཉིད་རྒྱུའི་ཐེག་པའི་ཆོས་རྒྱ་ཆེར་བསྟན་པ་ལས། འབྲས་བུ་གསང་སྔགས་རྡོ་རྗེ་ཐེག་པ་ཞེས་པ་ཁྱབ་བརྡལ་དུ་མ་བཤད་ཀྱང་། མ་འོངས་པའི་གནས་སྐབས་སུ་གསང་སྔགས་ཀྱི་ཆོས་དེ་རྒྱ་ཆེན་པོ་དར་ཞིང་རྒྱས་པར་འགྱུར་རོ་ཞེས་ལུང་བསྟན་གནང་། གསང་སྔགས་ཆོས་ཀྱི་འཁོར་ལོ་སྐོར་བ་པོའི་ཐད་ལ། བཅོམ་ལྡན་འདས་ཀྱིས་ཁོང་མྱ་ངན་ལས་འདས་ནས་ལོ་ཉི་ཤུ་རྩ་བརྒྱད་ཀྱི་རྗེས་སུ། དམ་པའི་རིགས་ཅན་དྲྭ་མ་ལྔ་ཞེས་པས་བསྐུལ་ནས་གསང་སྔགས་ཀྱི་ཆོས་རྒྱ་ཆེན་པོ་སྟོན་པར་འགྱུར་ལ། དེར་མ་ཟད། དམ་པའི་རིགས་ཅན་དྲྭ་མ་ལྔ་སིང་ག་ལ་ཡི་རི་བོ་མ་ལ་ཡ་གནམ་ལྕགས་འབར་བ་ཞེས་བྱ་བའི་ཡུལ་གང་དེར་བྱོན་ནས་གསང་སྔགས་ཀྱི་ཆོས་སྟོན་པར་འགྱུར་རོ་ཞེས་ཡུལ་ཁམས་ཀྱང་ལུང་གིས་བསྟན་ཡོད། ཁོང་མྱ་ངན་ལས་འདས་ནས་ལོ་བརྒྱད་ཀྱི་དུས་སུ་ཨོ་རྒྱན་མཚོ་སྐྱེས་རྡོ་རྗེ་ཞེས་པ་བྱོན་ནས། གསང་སྔགས་ཀྱི་བསྟན་པ་རྒྱ་ཆེན་དར་བར་འགྱུར་ཞེས་ལུང་བསྟན། ད་ལྟ་མང་པོ་ཞིག་གི་བཤད་སྲོལ་ལྟར་ན། ཨོ་རྒྱན་མཚོ་སྐྱེས་རྡོ་རྗེ་ནི་ཡུལ་ཕ་ཀི་སི་ཐན་（Pakistan）གྱི་མཚོ་འོ་མ་ཅན་ཞེས་བྱ་བར་འཁྲུངས་པ་ཡིན་པར་འདོད།^p186
གཞན་ཡང་བཅོམ་ལྡན་འདས་ཀྱི་ལྷ་མོ་དྲི་མ་མེད་པའི་མདོ་ལས། སངས་རྒྱས་ཀྱི་བསྟན་པ་འདི་བྱང་ནས་བྱང་དུ་བྱང་ཕྱོགས་ཁ་བ་ཅན་གྱི་ཡུལ་དུ་དར་བར་གསལ་པོར་གསུངས་པ་དང་། གཞན་ཡང་ལྷོ་ནས་ལྷོ་རུ་དར་བར་འགྱུར་ཞེས་སོགས་ལུང་དུ་བསྟན་ཡོད། ད་ལྟ་ཡང་སངས་རྒྱས་ཀྱི་བསྟན་པ་རྒྱ་ཆེར་དར་སའི་སྙིང་པོ་ལྟ་བུ་ནི་སིང་ག་ལ་ཡིན་ཞིང་། དེར་ཐེག་པ་ཐུན་མོང་གི་ཆོས་རྒྱ་ཆེར་དར་ལ། བོད་ཡུལ་དུ་ཐེག་པ་ཆེན་པོ་གསང་སྔགས་ཀྱི་ཆོས་འདི་རྒྱ་ཆེར་དར་བར་གྱུར།^p188
དེ་བཞིན་དུ་བཅོམ་ལྡན་འདས་ཀྱི་མདོ་སྡེ་རྣམས་སུ། རྒྱ་གར་གྱི་ཡུལ་དུ་འབྱོན་པར་འགྱུར་བའི་སློབ་དཔོན་ཀླུ་སྒྲུབ་དང་ས་ར་ཧ་པ་ལ་སོགས་པའི་མཁས་པ་དང་གྲུབ་པ་མང་པོ་ལུང་དུ་བསྟན་ལ། བོད་གངས་རིའི་ལྗོངས་ཀྱི་ཆོས་རྒྱལ་རིམ་བྱོན་མང་པོ་ཞིག་ཀྱང་ལུང་དུ་བསྟན་ཡོད། དེར་མ་ཟད་རྙིང་མའི་ཨོ་རྒྱན་རིན་པོ་ཆེ་དང་། གསར་མའི་རྗེ་རིན་པོ་ཆེ་བློ་བཟང་གྲགས་པ། ས་སྐྱའི་གོང་མ་རྣམས། གཞན་ཡང་མི་ལ་རས་པ་སོགས་ཀུན་ཀྱང་སངས་རྒྱས་ཀྱི་བཀའ་ལས་ལུང་དུ་བསྟན་ཡོད།^p189
དེ་དག་ཐམས་ཅད་ལ་བསམ་བློ་བཏང་ན། འུ་ཅག་གི་སྟོན་པ་ནི་གཞན་གང་དང་ཡང་མ་འདྲ་བ་ཞིག་སྟེ། འཇིག་རྟེན་ཁམས་ཀྱི་ཚན་རིག་པ་རྣམས་ཀྱིས་སྔར་མང་དུ་དཔྱད་མྱོང་ལ། ད་ལྟ་ཡང་དཔྱད་བཞིན་པ་རེད། མ་འོངས་པར་ཡང་དཔྱད་པར་འགྱུར་བ་ཡིན་ཡང་། འབྱུང་འགྱུར་གྱི་དོན་རྣམས་གནད་ཐིག་པར་དངོས་སུ་སྟོན་ཐུབ་པ་རང་ཅག་གི་སྟོན་པ་ལྟ་བུ་ས་སྟེང་གང་དུ་ཡང་བྱོན་པ་ཉུང་ལ། དེ་ལྟ་བུའི་མངོན་ཤེས་དང་ལྡན་ཞིང་ཐུགས་རྗེ་ཅན་བཅོམ་ལྡན་འདས་ཀྱིས་ལུང་བསྟན་པ་བཞིན། གསང་སྔགས་ཀྱི་བསྟན་པ་དེ་རྗེས་སུ་རིམ་བཞིན་དུ་ཕྱོགས་ཀྱི་ཡུལ་གྲུ་མང་པོར་དར་བར་གྱུར།^p190
རྫོགས་ཆེན་དར་ཚུལ།^p191
སྤྱིར་གསང་སྔགས་ཀྱི་ཆོས་ལ་ཡང་ཕྱི་རྒྱུད་སྡེ་གསུམ་དང་། ནང་རྒྱུད་ཡོ་ག་གསུམ་གྱི་དར་ཚུལ་སོགས་མང་དུ་འཆད་རྒྱུ་ཡོད་ཀྱང་། དེ་དག་ཁྱེད་རྣམ་པས་རེ་བསྐུལ་བྱས་པའི་ཆོས་མིན་པས་གནས་སྐབས་མི་བཤད། ད་རེས་སྐབས་སུ་བབས་པ་རྫོགས་པ་ཆེན་པོའི་ཆོས་ཇི་ལྟར་དར་ཚུལ་འཆད་རྒྱུ་ཡིན།^p192
རྫོགས་པ་ཆེན་པོའི་བསྟན་པ་ཇི་ལྟར་དར་བ་ཡིན་ཞེ་ན། དང་པོ་སངས་རྒྱས་ཐམས་ཅད་ཀྱི་ཐོག་མ་ཆོས་སྐུ་ཀུན་ཏུ་བཟང་པོ་ཞེས་པ་མངོན་པར་རྫོགས་པར་སངས་རྒྱས་ཤིང་། དེ་ནས་ཀུན་ཏུ་བཟང་པོའི་བྱིན་རླབས་ཀྱི་རྩལ་ལས་སྐུ་རྟེན་དུ་རྡོ་རྗེ་སེམས་དཔའི་སྐུ་ཚེ་ལོ་བརྒྱ་པའི་མིའི་ལུས་ཚད་དང་མཉམ་པ་རིན་པོ་ཆེ་བརྒྱ་རྩ་གཅིག་གིས་གྲུབ་པ་ཞིག་དང་། གསུང་རྟེན་དུ་བསྟན་པ་བུ་གཅིག་གི་རྒྱུད་ཅེས་པ་བཻཌཱུརྱའི་ཤོག་བུ་ལ་གསེར་གྱི་སྣག་ཚའི་ཡི་གེ་རང་བྱུང་གི་ཚུལ་དུ་དོད་ཡོད་པའི་གླེགས་བམ་སོར་བཞི་པ། ཐུགས་རྟེན་དུ་ཤེལ་གྱི་རྡོ་རྗེ་ཚེ་ལོ་བརྒྱ་པའི་མིའི་ཕྱག་གང་བ་ཞིག་བཅས་རང་བྱུང་དུ་འཁྲུངས་པར་གྱུར་བ་ལ་བསྟན་པའི་བཙས་གསུམ་མམ་རྒྱལ་ཚབ་གསུམ་ཞེས་གསོལ། དེ་དག་ཞིང་ཁམས་གང་དུ་ཡོད་ན་ཡུལ་དེར་བདེ་བ་དང་ལྡན་ལ་སྡུག་བསྔལ་དང་བྲལ་ཞིང་། གསང་སྔགས་རྡོ་རྗེ་ཐེག་པའི་ཆོས་ཀྱང་རང་ཤུགས་སུ་འབྱུང་བ་མ་ཟད། སྐྱེ་བོ་ཐམས་ཅད་ཀྱང་འབད་པ་མི་དགོས་པར་རང་ཤུགས་ཀྱིས་གྲུབ་པ་ཐོབ་པར་འགྱུར་བ་ཡིན།^p193
དེ་གསུམ་གྱི་བྱིན་རླབས་ཀྱིས། རྫོགས་ཆེན་སྟོན་པའི་སྟོན་པ་བཅུ་གཉིས་ཞིང་ཁམས་གཞན་དང་གཞན་རྣམས་སུ་འབྱོན་པར་འགྱུར། འོག་མིན་གྱི་གནས་སུ་བསྟན་པའི་བཙས་གསུམ་པོ་རང་བྱུང་བའི་ཚེ་ན། ཀུན་ཏུ་བཟང་པོའི་ཐུགས་ཀྱི་རྩལ་ལས། རྒྱལ་བ་རིགས་ལྔ་ལ་རྫོགས་པ་ཆེན་པོའི་ཆོས་འདི་ཉིད་རང་གིས་རང་ལ་དགོངས་པ་གཏད་པ་ཙམ་གྱིས་འཕོས་པར་གྱུར་ལ། ལོངས་སྐུའི་ཞིང་ཁམས་འོག་མིན་དུ། དཔལ་རྡོ་རྗེ་སེམས་དཔའི་ཕྱག་ཏུ་རང་བྱུང་བསྟན་པ་བུ་གཅིག་གི་རྒྱུད་འདི་ཉིད་བབས་ནས། རྫོགས་པ་ཆེན་པོའི་ཆོས་དེ་ལྷ་ཀླུ་མི་ལ་སོགས་དག་པའི་རིགས་ཅན་གྱི་ཞིང་དུ་དར་ཞིང་རྒྱས་པར་གྱུར་ཅིང་། རང་བྱུང་བསྟན་པ་བུ་གཅིག་གི་རྒྱུད་འདི་སྤྲུལ་སྐུའི་ཞིང་ཁམས་ཏེ་རྒྱ་གར་རྡོ་རྗེ་གདན་གྱི་སྟེང་གི་ནམ་མཁའ་རུ་རང་སྒྲ་དང་བཅས་ཏེ་ད་ལྟ་ཡང་མངོན་སུམ་དུ་བཞུགས་ཡོད་པ་མ་ཟད། མ་འོངས་པའི་ལོ་མང་པོའི་རིང་ལའང་རྡོ་རྗེ་གདན་གྱི་ནམ་མཁར་བཞུགས་པར་འགྱུར་བ་ཡིན། དེའི་རིང་ལ་རྫོགས་པ་ཆེན་པོའི་བསྟན་པ་འདི་མི་ནུབ་པར་དར་ཞིང་རྒྱས་ནས། འཛམ་བུ་གླིང་གི་སེམས་ཅན་སུས་བསྒོམ་ནའང་གྲུབ་པ་ཐོབ་པ་དང་མཆོག་གི་དངོས་གྲུབ་བརྙེས་པར་འགྱུར་ལ། སྐུ་རྟེན་དང་ཐུགས་རྟེན་གྱིས་ཞིང་ཁམས་གཞན་དང་གཞན་ལ་འགྲོ་དོན་མཛད་ཀྱིན་ཡོད་པ་རེད།^p194
བསྟན་པ་བུ་གཅིག་གི་རྒྱུད་ཀྱི་བྱིན་རླབས་ཀྱིས། སློབ་དཔོན་དགའ་རབ་རྡོ་རྗེ་ཞེས་པ་ཕ་ཡི་རྒྱུ་རྐྱེན་ལ་མ་ལྟོས་པར་ནུབ་ཕྱོགས་ཨོ་རྒྱན་གྱི་ཡུལ་དུ་འཁྲུངས་ཤིང་། ཁོང་སེ་གོལ་གཅིག་གཏོགས་པའི་ཡུན་ལ་འོག་མིན་གྱི་གནས་སུ་རྡོ་རྗེ་སེམས་དཔའི་དྲུང་དུ་བྱོན་ནས། རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞི་དང་རྩལ་དབང་རྒྱལ་ཐབས་སྤྱི་བླུག་ལ་སོགས་པའི་དབང་ཁྲིད་མན་ངག་ཐམས་ཅད་ཀྱང་རྫོགས་པར་ཞུས། རྡོ་རྗེ་སེམས་དཔའི་དྲུང་ནས་ཞུས་ཚད་ལ་ཤོ་ལོ་ཀ་འབུམ་ཕྲག་དྲུག་ཅུ་རྩ་བཞི་ཡོད་པ་དེ་ནི། དགའ་རབ་རྡོ་རྗེས་ཐུགས་ལ་བཟུང་ཞིང་བསྡུས་པའི་རྫོགས་པ་ཆེན་པོའི་ཆོས་ཡིན།^p195
སློབ་དཔོན་དགའ་རབ་རྡོ་རྗེས་དེ་ལྟར་ཆོས་ཀྱི་འཁོར་ལོ་སྐོར་བཞིན་པའི་སྐབས་སུ། རྒྱ་གར་གྱི་ཡུལ་དུ་སློབ་དཔོན་འཇམ་དཔལ་བཤེས་གཉེན་ཞེས་རིག་པའི་གནས་བཅུ་ལ་མཁས་པ་ཞིག་ཡོད་པ་དེས་གསན་ཏེ། ད་ལྟ་རྒྱུ་འབྲས་ལས་འདས་པའི་ཆོས་སྟོན་མཁན་ཞིག་འདུག་པ་དེ་ལ་ཁོང་གིས་རྩོད་དགོས་ཞེས་སྨྲས་ནས་དགའ་རབ་རྡོ་རྗེའི་དྲུང་དུ་བྱོན་ཀྱང་། སློབ་དཔོན་དགའ་རབ་རྡོ་རྗེ་ལ་ཐེག་པ་མཐོ་དམན་གང་ནས་བརྩད་ཀྱང་མ་ཐུབ་ལ། རྫུ་འཕྲུལ་སྣ་ཚོགས་བསྟན་ནས་བརྩད་ཀྱང་འགྲན་མ་བཟོད་པའི་གནས་སྐབས་ན། རང་གིས་ཉེས་པ་དེ་ཉེས་པ་ཡིན་པར་ཤེས་ནས། དགའ་རབ་རྡོ་རྗེ་ལ་བཟོད་གསོལ་ཞུས་ཤིང་ཁོང་གི་རྗེས་སུ་ཞུགས་ཏེ་རྫོགས་པ་ཆེན་པོའི་ཆོས་མ་ལུས་པ་ཞུས།^p196
དེ་ལྟར་སློབ་དཔོན་དགའ་རབ་རྡོ་རྗེའི་མཛད་པ་ཐམས་ཅད་རྫོགས་ནས་ཆུ་བོ་དན་ཏིག་ཅེས་པའི་སར་སྐུ་མྱ་ངན་ལས་འདས་པའི་ཚུལ་སྟོན་པའི་དུས་སུ། འཇམ་དཔལ་བཤེས་གཉེན་གྱིས། ཁྱེད་ཡོངས་སུ་མྱ་ངན་ལས་འདའ་བར་འགྱུར་ན། སངས་རྒྱས་ཀྱི་བསྟན་པའི་སྒྲོན་མེ་ནུབ་པར་འགྱུར་ཞིང་། འགྲོ་བ་རྣམས་སྡུག་བསྔལ་གྱི་གནས་ལ་སྦྱར་བར་འགྱུར་རོ་ཞེས་གདུང་བའི་སྨྲེ་སྔགས་བཏོན་པ་ན། ཁོང་གི་སྐུ་ལུས་ཀྱང་མི་སྣང་བར་འོད་དུ་དེངས་པའི་ནམ་མཁའི་འོད་ཕུང་གི་དཀྱིལ་ནས་ཕྱག་གཡས་པའི་གྲུ་མོ་མན་ཆད་ཕྱུང་ཞིང་། འདས་རྗེས་ཚིག་གསུམ་གནད་དུ་བརྡེག་པའི་མན་ངག་ཅེས་པ་འཇམ་དཔལ་བཤེས་གཉེན་གྱི་ཕྱག་ཏུ་བབས། དེ་ནས་འཇམ་དཔལ་བཤེས་གཉེན་གྱིས་སློབ་དཔོན་དགའ་རབ་རྡོ་རྗེའི་གསུང་འབུམ་ཕྲག་དྲུག་ཅུ་རྩ་བཞི་བཀའ་བསྡུ་བྱས་ནས། ཕྱི་སེམས་སྡེ་དང་། ནང་ཀློང་སྡེ། གསང་བ་མན་ངག་གི་སྡེ་ཞེས་སྡེ་ཆེན་པོ་གསུམ་གྱི་ནང་དུ་བསྡུས་ནས་བཀྲལ་བ་རེད།^p197
དུར་ཁྲོད་ཆེན་པོ་སོ་ས་གླིང་ཞེས་པར་འཇམ་དཔལ་བཤེས་གཉེན་གྱིས་མི་དང་མི་མ་ཡིན་པ་ཐམས་ཅད་ལ་ཆོས་ཀྱི་འཁོར་ལོ་སྐོར་བའི་དུས་སུ། རྒྱ་ནག་པོའི་བཀྲ་ཤིས་ཁྲི་སྒོ་༼ད་ལྟའི་ཞི་ཨན་༽ ཞེས་པ་ན་སློབ་དཔོན་ཤྲཱི་སིངྷ་ཞེས་ཐུན་མོང་གི་གྲུབ་པ་བརྒྱད་ལ་མངའ་དབང་འབྱོར་ཞིང་། རིག་པའི་གནས་བཅོ་བརྒྱད་ལ་ཆགས་ཐོགས་མེད་པའི་མཁས་པ་ཆེན་པོ་ཞིག་ཡོད་པ་དེ་ལ། ཐུགས་རྗེ་ཆེན་པོ་སྤྱན་རས་གཟིགས་དབང་ཕྱུག་གིས་རིགས་ཀྱི་བུ་ཁྱོད་ཀྱི་ཚེ་རབས་ལས་ཀྱི་བླ་མ་རྒྱ་གར་གྱི་དུར་ཁྲོད་ཆེན་པོ་སོ་ས་གླིང་དུ་བཞུགས་པས་ཁོང་གི་དྲུང་དུ་སོང་ཞིག་ཅེས་ལུང་བསྟན་པ་དང་། ཤྲཱི་སིངྷ་རྒྱ་ནག་ནས་རྒྱ་གར་བར་ས་ལ་ཁྲུ་གང་མ་རེག་པ་ཙམ་གྱི་ནམ་མཁར་ཞག་བདུན་གྱི་རིང་རྫུ་འཕྲུལ་གྱིས་བྱོན་ཏེ། འཇམ་དཔལ་བཤེས་གཉེན་གྱི་དྲུང་ནས་གདམས་པ་མ་ལུས་པ་ཞུས་པར་མཛད་པའི་རྗེས་སུ། འཇམ་དཔལ་བཤེས་གཉེན་གྱི་སྐུ་ལུས་ཀྱང་འོད་ཀྱི་ཕུང་པོ་གཅིག་ཏུ་གྱུར་ཏེ་མི་སྣང་བར་གྱུར་སོང་། དེའི་ཚེ་ཤྲཱི་སིངྷས་སྨྲེ་སྔགས་བཏོན་ཅིང་གསོལ་བ་བཏབ་པ་ན། ནམ་མཁའ་ནས་འདས་རྗེས་སྒོམ་ཉམས་དྲུག་པ་ཞེས་བྱ་བ་བབས་ཤིང་། ཤྲཱི་སིངྷས་དེ་ཉིད་བཀླགས་པ་ཙམ་གྱིས་དཔོན་སློབ་དགོངས་པ་དབྱེར་མེད་དུ་གྱུར།^p198
ཤྲཱི་སིངྷ་རང་ཡུལ་དུ་ཕེབས་ནས། རྒྱ་ནག་རི་བོ་རྩེ་ལྔའི་འདབས་ན་དུར་ཁྲོད་ཆེན་པོ་བསིལ་སྦྱིན་ཞེས་པ་ཞིག་ཡོད་པ་དེར་སྒོམ་ལ་རྩེ་གཅིག་ཏུ་མཉམ་པར་བཞག་པའི་དུས་སུ། རྒྱ་གར་ཤར་ཕྱོགས་ཀྱི་པཎྜི་ཏ་ཆེན་པོ་སློབ་དཔོན་ཛྙཱ་ན་སུ་ཏྲ་དང་བི་མ་ལ་མི་ཏྲ་གཉིས་ནི་ཚེ་རབས་ལྔ་བརྒྱའི་རིང་ལ་ལྷན་ཅིག་ཏུ་ཆོས་ཞུས་པའི་གྲོགས་པོ་ཡིན་ལ་ཐུགས་ཀྱང་ཧ་ཅང་མཐུན་པས། ཉིན་ཞིག་སྐྱེད་མོའི་ཚལ་དུ་སྐྱོ་བསང་ལ་སོང་ཚེ། ནམ་མཁའི་ཁམས་ནས་རྡོ་རྗེ་སེམས་དཔའ་བྱོན་ནས། རིགས་ཀྱི་བུ་ཁྱེད་གཉིས་ཀྱིས་སྐྱེ་བ་ལྔ་བརྒྱར་པཎྜི་ཏའི་སྐྱེ་བ་བརྒྱུད་མར་བླངས་ཀྱང་ད་དུང་སངས་རྒྱས་ཀྱི་འབྲས་བུ་མ་ཐོབ་པ་རེད། ཚེ་འདིར་སངས་རྒྱས་ཐོབ་པར་འདོད་ན། རྒྱ་ནག་པོའི་དུར་ཁྲོད་བསིལ་སྦྱིན་དུ་སོང་ཞིག་ཅེས་ལུང་བསྟན། བི་མ་ལ་མི་ཏྲ་ནི་ཐུགས་ཐག་ཐུང་ཞིང་སྙིང་སྟོབས་ཆེ་བ་ཡིན་པས། དེ་མ་ཐག་ཏུ་ཁྱིམ་ལ་བྱོན་ནས་ཆོས་གོས་དང་ལྷུང་བཟེད་བསྣམས་ཏེ། རྒྱ་ནག་གི་ཡུལ་དུ་བྱོན་ནས་ལོ་དགུའི་རིང་ལ་ཤྲཱི་སིངྷའི་སྐུ་མདུན་དུ་དབང་ཁྲིད་དང་གདམས་པ་མ་ལུས་པ་ཡོངས་སུ་རྫོགས་པ་ཞུས། ལོ་དགུའི་རྗེས་སུ། ཛྙཱ་ན་སུ་ཏྲ་བྱོན་ནས་ཤྲཱི་སིངྷ་སློབ་དཔོན་དུ་བསྟེན་ཅིང་། ལོ་ཉི་ཤུ་རྩ་གཅིག་གི་རིང་དུ་དབང་ཁྲིད་གདམས་པ་སོགས་སྔར་ལས་ལྷག་པའི་ཆོས་མང་པོ་ཞུས་པ་རེད།^p199
ཤྲཱི་སིངྷ་རྒྱ་ནག་བསིལ་སྦྱིན་ན་བཞུགས་པའི་དུས་སུ། སློབ་དཔོན་པདྨ་འབྱུང་གནས་དང་ལོ་ཆེན་བཻ་རོ་ཙ་ན་རྣམ་པ་གཉིས་ཀྱང་ཁོང་གི་སྐུ་མདུན་ལ་བྱོན་ནས་རྫོགས་པ་ཆེན་པོའི་ཆོས་ཞུས། ཤྲཱི་སིངྷ་ཡོངས་སུ་མྱ་ངན་ལས་འདས་པ་ན་ཛྙཱ་ན་སུ་ཏྲ་ལ་འདས་རྗེས་གཟེར་བུ་བདུན་པ་ཞེས་པ་བབས་ནས་དཔོན་སློབ་དགོངས་པ་དབྱེར་མེད་དུ་གྱུར། ཛྙཱ་ན་སུ་ཏྲ་ཡོངས་སུ་མྱ་ངན་ལས་འདས་པའི་དུས་སུ། འོད་ཕུང་གི་དཀྱིལ་ནས་འདས་རྗེས་བཞག་ཐབས་བཞི་པ་ཞེས་པ་དེ་བི་མ་ལ་མི་ཏྲའི་ཕྱག་ཏུ་བབས།^p200
དེའི་ཡན་ཆད་ཀྱི་བླ་མ་མིའི་རྣམ་པས་བྱོན་ཚད་ཚང་མ་ཡང་སྐུ་ལུས་འོད་དུ་གྱུར་ནས་མི་སྣང་བར་གྱུར། ཨོ་རྒྱན་རིན་པོ་ཆེ་ནི་ད་ལྟ་ཡང་སྐུ་མྱ་ངན་ལས་མ་འདས་པར་ལྷོ་ནུབ་རྔ་ཡབ་སྲིན་པོའི་གླིང་དུ་སྲིན་པོ་རྣམས་ཀྱི་ཁ་གནོན་མཛད་ནས་བཞུགས་ཡོད་ཅིང་། བི་མ་ལ་མི་ཏྲ་ནི་རྒྱ་ནག་རི་བོ་རྩེ་ལྔ་རུ་སྐུ་ལུས་མ་སྤང་པར་ད་ལྟ་ཡང་མངོན་སུམ་དུ་བཞུགས་ནས་ལོ་བརྒྱ་རེའི་མཚམས་ན་བོད་ཡུལ་དུ་ཁོང་གི་སྤྲུལ་པ་དངོས་རེ་འབྱོན་གྱིན་ཡོད་ཅིང་། རྒྱུན་དུ་ཡང་སྤྲུལ་པ་བར་མ་ཆད་པར་འབྱོན་གྱིན་ཡོད།^p202
ཕྱི་ལོ་༡༩༨༧ལོར། ང་ཚོ་བོད་མི་ཁྲི་ཕྲག་གཅིག་རི་བོ་རྩེ་ལྔར་བི་མ་མི་ཏྲ་མཇལ་དུ་སོང་བ་ཡིན། སྐབས་དེར་མི་རྣམས་ཀྱི་ནང་ནས་ལ་ལས་ནམ་མཁའི་དཀྱིལ་ནས་བི་མ་ལ་མི་ཏྲ་དང་འཇམ་དཔལ་དབྱངས་ཀྱི་སྐུ་དངོས་མཇལ་ཞིང་། ལ་ལས་སེང་གེ། ལ་ལས་འཇའ། ལ་ལས་མི་དང་བྱ་ལ་སོགས་པའི་རྣམ་པར་ངོ་མཚར་བའི་ལྟས་བསམ་གྱིས་མི་ཁྱབ་པ་མཇལ་ལ། ད་ལྟ་ཡང་མི་མང་ཆེ་བས་དེ་ལྟར་མཇལ་ཐུབ་ཀྱིན་ཡོད།^p203
བི་མ་ལ་མི་ཏྲའི་ཡེ་ཤེས་སྒྱུ་མའི་སྐུ་སླར་ཡང་མངོན་སུམ་དུ་བོད་ཡུལ་ལ་བྱོན་ནས་ལྕེ་བཙུན་སེང་གེ་དབང་ཕྱུག་ལ་དབང་ཁྲིད་ཅིང་མན་ངག་རྫོགས་པར་གནང་བར་མཛད། ལྕེ་བཙུན་སེང་གེ་དབང་ཕྱུག་གིས་མཁའ་འགྲོ་མ་བྱེ་བ་འབུམ་གྱི་དབུས་སུ་ཚོགས་ཀྱི་འཁོར་ལོ་སྐོར་བཞིན་པའི་སྐབས་སུ་སྐུ་མི་སྣང་བར་འོད་ཀྱི་གོང་བུ་ཉིད་དུ་གྱུར་བའི་ཚེ། མཁའ་འགྲོ་མ་རྣམས་ཀྱིས་གསོལ་བ་བཏབ་པའི་ངོར་འདས་རྗེས་དུམ་བུ་གསུམ་པ་ཞེས་པ་བབས་པ་རེད།^p204
དེ་ལྟར་བླ་མ་ཐམས་ཅད་རིམ་བཞིན་དུ་བྱོན་ཅིང་ཆོས་འདི་ཉམས་སུ་ལེན་པའི་གང་ཟག་མང་དུ་བྱུང་སྟེ། དཔེར་ན་ཁམས་ཕྱོགས་ཀྱི་ཀཿ ཐོག་དགོན་ཞེས་པར་དུས་ཐོག་གཅིག་ལ་འཇའ་ལུས་པ་འབུམ་ཕྲག་རེ་བྱོན་མྱོང་བ་མ་ཟད། སྐུ་ལུས་འཇའ་དང་འོད་དུ་དེངས་ནས་མི་སྣང་བར་འཇའ་ལུས་སུ་གྲུབ་པ་ཐོབ་པ་བསམ་གྱིས་མི་ཁྱབ་པ་བར་མ་ཆད་པར་ད་ལྟའི་བར་དུ་ཡང་བྱུང་བ་རེད། དེ་དག་དཔེ་མཚོན་ཙམ་ཞིག་བཤད་ན། སྐྱབས་རྗེ་བདུད་འཇོམས་ཀྱི་ཆོས་འབྱུང་དུ་བཀོད་པ་ཁྱེད་རྣམ་པ་མང་ཆེ་བའི་ཐུགས་ལ་གསལ་རྒྱུ་རེད། རྫོགས་པ་ཆེན་པོའི་ཆོས་ཉམས་སུ་ལེན་མཁན་ཡིད་ལྷུང་གི་རྒན་པོ་བསོད་རྒྱལ་ཞེས་པ་ཡང་འཇའ་ལུས་སུ་དེངས་སོང་བར་གསུངས།^p205
ད་ལྟ་ང་ཚོའི་སློབ་གླིང་བཙུགས་ཡོད་ས་ནི་ད་ལྟའི་སྐྱབས་རྗེ་བདུད་འཇོམས་པ་ཁོང་གི་སྐུ་ཐོག་སྔ་མའི་གདན་ས་ཡིན་ལ། གདན་ས་དེར་དུས་གཅིག་ཏུ་འཇའ་ལུས་པ་བཅུ་གསུམ་བྱོན་མྱོང་། དེ་བཞིན་དུ་བོད་ཡུལ་གྱི་དགོན་པ་སོ་སོ་དང་ང་ཚོའི་སློབ་བརྒྱུད་མང་ཆེ་བ་ཞིག་འཇའ་ལུས་སུ་འཕོ་བ་དང་། སྐུ་ལུས་ཇེ་ཆུང་ལ་སོང་བའི་རྟགས་མཚན་ཅན་གྱི་གང་ཟག་ད་ལྟའི་བར་དུའང་ཆེས་མང་པོ་ཞིག་སྔར་བྱུང་ལ། ད་ལྟ་ཡང་འབྱུང་བཞིན་པ་ཡིན། མདོར་ན་རྫོགས་ཆེན་གྱི་དོན་དངོས་གནས་ཉམས་སུ་ལེན་པའི་གང་ཟག་རྣམས་ལས། བརྒྱ་ཆ་དྲུག་ཅུ་ཡས་མས་ལ་གྲུབ་པའི་རྟགས་མཚན་ཅི་རིགས་མངོན་དུ་གྱུར་ཡོད།^p206
དེ་ནི་རྫོགས་ཆེན་གྱི་ཆོས་ལ་ཡིད་ཆེས་བསྐྱེད་པའི་ཆེད་དུ་ལོ་རྒྱུས་ཅུང་ཟད་བརྗོད་པ་ཡིན། ཆོས་རྣམ་པར་དག་པ་ཡིན་མིན་དེ་ཉམས་སུ་ལེན་པའི་གང་ཟག་རྣམས་ལ་རྟགས་མཚན་ཐོན་མིན་ལ་བལྟ་དགོས་ཤིང་། ད་ལྟའི་བར་དུ་རིག་འཛིན་བརྒྱུད་པའི་གྲུབ་ཐོབ་བར་མ་ཆད་པར་བྱུང་བ་ནི་རྫོགས་པ་ཆེན་པོ་ཞེས་པའི་ཆོས་དེ་རྣམ་པར་དག་པ་ཡིན་པའི་རྟགས་མཚན་མིག་མཐོང་ལག་ཟིན་ཡིན།^p207
རྫོགས་ཆེན་གྱི་ཐུན་མིན་ཁྱད་ཆོས།^p208
འོ་ན། རྫོགས་པ་ཆེན་པོའི་ཆོས་དེ་ཇི་ལྟར་ཤེས་དགོས་པ་རེད་ཅེ་ན། རྒྱ་ཆེན་པོ་ཤེས་དགོས་ན་ཚིག་དོན་རྣམ་པ་བཅུ་གཅིག་གི་སྒོ་ནས་ཤེས་དགོས་ཏེ། དེ་དག་གི་གནད་བསྡུས་ན་ཉམས་ལེན་གྱི་སྙིང་པོ་ཀ་དག་ཁྲེགས་ཆོད་དང་། ལྷུན་གྲུབ་ཐོད་རྒལ་ཞེས་རྣམ་པ་གཉིས་ཡོད་པ་རེད།^p209
ཁྲེགས་ཆོད་ཅེས་པ་ཅི་འདྲ་ཡིན་ཞེ་ན། ཆོས་ཐམས་ཅད་སྟོང་ཉིད་དུ་གོ་བྱེད་ཀྱི་ཉམས་ལེན་ལ་ཟེར་ཞིང་། དེ་ནི་ཕལ་ཆེར་ས་སྐྱ་དང་། རྙིང་མ། བཀའ་བརྒྱུད། དགེ་ལྡན་ལ་སོགས་པ་ཐམས་ཅད་ལ་མན་ངག་གི་ཆ་ཤས་རེ་ཉམས་སུ་ལེན་ཐབས་ཡོད་དེ། དཔེར་ན། གསར་མ་པའི་རྗེ་ཙོང་ཁ་པ་ཆེན་པོའི་བདུད་རྩི་སྨན་མཆོག་ཅེས་པར་མཚོན་ན། རྙིང་མ་པའི་རྫོགས་པ་ཆེན་པོ་དང་ཐོག་མཐའ་བར་གསུམ་ཀུན་ནས་ཁྱད་པར་ཅུང་ཟད་ཀྱང་མེད་པའི་ཆོས་ཡིན་ལ། དེར་མ་ཟད། གསར་མའི་རྗེ་རིན་པོ་ཆེའི་ཆོས་བརྒྱུད་འཛིན་པ་ལའང་རྫོགས་པ་ཆེན་པོ་ཉམས་སུ་ལེན་མཁན་ལྕང་སྐྱ་རོལ་བའི་རྡོ་རྗེ་སོགས་གྲུབ་བརྙེས་ཀྱི་གང་ཟག་མང་པོ་བྱོན་མྱོང་།^p210
ལྷུན་གྲུབ་ཐོད་རྒལ་ཞེས་པ་ནི་གཞན་གང་ན་ཡང་ཕལ་ཆེར་མེད་པ་ཞིག་སྟེ། རྫོགས་པ་ཆེན་པོ་རང་གི་ཆོས་ལ་ཡང་སྐོར་ཚོ་ཆེན་པོ་བཞིར་ཡོད་དེ། སློབ་དཔོན་འཇམ་དཔལ་བཤེས་གཉེན་གྱི་རྒྱུད་འབུམ་ཕྲག་དྲུག་ཅུ་རྩ་བཞི་དེ་ཕྱི་སེམས་སྡེ་དང་། ནང་ཀློང་སྡེ། གསང་བ་མན་ངག་གི་སྡེ་གསུམ་ལ་བསྡུས་ནས་བསྟན་ཅིང་། སློབ་དཔོན་ཤྲཱི་སིངྷས་གསང་བ་མན་ངག་གི་སྡེའང་ལ་ཕྱི་སྐོར་དང་། ནང་སྐོར། གསང་སྐོར། ཡང་གསང་གི་སྐོར་ཏེ་སྐོར་ཚོ་བཞིར་བྱས་པ་ལས། ཡང་གསང་སྙིང་ཐིག་གི་སྐོར་མ་གཏོགས་གཞན་རྫོགས་པ་ཆེན་པོ་རང་གི་ནང་དུ་ཡང་ཐོད་རྒལ་ཉམས་སུ་ལེན་ཚུལ་བསྟན་མེད།^p211
ཉམས་སུ་ལེན་ཚུལ་གྱི་དབང་དུ་བྱས་ན། ཁྲེགས་ཆོད་དང་ཐོད་རྒལ་གཉིས་ཀྱི་སྒོ་ནས་ཉམས་སུ་ལེན་དགོས། དེ་ལ་པདྨའི་མཁའ་འགྲོ་སྙིང་ཐིག་དང་། བི་མའི་བི་མ་སྙིང་ཐིག་སྟེ་སྙིང་ཐིག་མ་གཉིས་དར་ཞིང་། བོད་ཡུལ་དུ་པདྨ་འབྱུང་གནས་དང་། བི་མ་ལ་མི་ཏྲ་གཉིས་ལ་སྙིང་ཐིག་གི་བཀའ་ཐོག་མར་བབས་པས་སྙིང་ཐིག་མ་གཉིས་སུ་གྲགས་པ་རེད། རྗེས་སུ་ཀུན་མཁྱེན་ཀློང་ཆེན་རབ་འབྱམས་ཀྱིས་བི་མ་སྙིང་ཐིག་གི་བུ་ཡིག་བླ་མ་ཡང་ཏིག་དང་། མཁའ་འགྲོ་སྙིང་ཐིག་གི་བུ་ཡིག་མཁའ་འགྲོ་ཡང་ཏིག་གཉིས་མཛད་པས། སྙིང་ཐིག་མ་གཉིས་དང་བུ་གཉིས་ཞེས་སྙིང་ཐིག་ཡ་བཞི་རུ་གྲགས། དེ་དག་གི་ཟབ་གནད་ཕྱོགས་གཅིག་ཏུ་བསྡུས་པ་ཟབ་མོ་ཡང་ཏིག་ཅེས་པའང་མཛད།^p212
ཆོས་དེ་རྣམས་ཉམས་སུ་ལེན་སྟངས་ལ། བཤད་རྒྱུད་དང་སྙན་རྒྱུད་གཉིས་སུ་ཕྱེས་ཏེ་གསུངས་ཡོད་ཅིང་། སྙན་རྒྱུད་ཅེས་པ་ནི་སྐལ་ལྡན་མཁས་པ་རེ་ཟུང་ལ་བཤད་བྱའི་གསང་སྐོར་གྱི་ཆོས་དེ་རེད།^p213
བཤད་པའི་རྒྱུད་ཅེས་བྱ་བ་ནི། གང་ཟག་ལས་འཕྲོ་དང་ལྡན་པ་ཡིན་ན། ཚོགས་པ་མང་པོ་ལའང་སྤེལ་རུང་བ་ཡིན། ཀུན་མཁྱེན་ཀློང་ཆེན་རབ་འབྱམས་ཡན་ཆད་ཀྱི་བླ་མ་རྣམས་ཀྱིས། རྫོགས་པ་ཆེན་པོའི་ཆོས་འདི་སློབ་མ་གཅིག་ནས་གཅིག་ཏུ་བརྒྱུད་པ་མ་གཏོགས་གང་ཟག་མང་པོ་ལ་སྤེལ་མ་མྱོང་། ཀུན་མཁྱེན་ཆེན་པོ་མན་ཆད་ནས་སློབ་མའི་གྲངས་ཇེ་མང་ནས་ཇེ་མང་དུ་སོང་ཞིང་། སློབ་མ་སྣོད་ལྡན་ཡིན་ལ་བླ་མ་ཡང་གྲུབ་པ་ཐོབ་པ་ཡིན་ན་མི་བརྒྱ་ཕྲག་དང་ཁྲི་ཕྲག་མང་པོ་ལ་སྟབས་གཅིག་ཏུ་གསུངས་ཆོག་པ་སྟེ། དཔེར་ན། ད་ལྟ་བོད་ཡུལ་དུ་ཡོད་པའི་བླ་མ་གྲུབ་པ་བརྙེས་པ་རྣམས་ཀྱིས་ཁྲོམ་ཚོགས་མང་པོར་གསུང་བཞིན་འདུག་ལ། དེ་བཞིན་དུ། རྒྱ་གར་ལུང་པ་ལ་སོགས་པའི་ཡུལ་ཁམས་གཞན་དུ་བྱོན་པའི་སྐྱབས་རྗེ་བདུད་འཇོམས་རིན་པོ་ཆེ་དང་། དིལ་མགོ་མཁྱེན་བརྩེ་རིན་པོ་ཆེ། གྲུབ་དབང་པདྨ་ནོར་བུ་ལ་སོགས་པ་རྣམས་ཀྱིས་ཀྱང་། ཚོགས་པ་མང་པོ་ལ་རིན་ཆེན་གཏེར་མཛོད་དང་སྙིང་ཐིག་ཡ་བཞི་སོགས་གསང་སྔགས་ཀྱི་དབང་བསྐུར་དང་སྐུར་བཞིན་པ་རེད།^p214
དེ་ལྟར་གསུངས་པའི་རྒྱུ་མཚན་ཅི་ཡིན་ཟེར་ན། དེ་ནི་སྔོན་གྱི་དུས་སུ་སྣོད་ལྡན་གྱི་སློབ་མ་ཉུང་བ་དང་། དེང་སང་སྣོད་ལྡན་གྱི་སློབ་མ་མང་བས་རེད།^p216
དེ་ལྟར་བཤད་ན་ཐམས་ཅད་ལ་དོགས་པ་ཞིག་སྐྱེ་སྲིད་དེ། སྤྱིར་ནང་པ་སངས་རྒྱས་པའི་ཆོས་ཀྱི་བཤད་ཚུལ་གྱི་དབང་དུ་བྱས་ན། རྒྱལ་བ་བྱམས་པ་མ་བྱོན་གྱི་བར་དུ་དུས་ཇེ་ངན་དང་བསྐལ་པ་ཇེ་སྙིགས། སེམས་ཅན་རྣམས་ལས་དང་སྐལ་བ་ཇེ་ངན་ནས་ཇེ་ངན་དུ་འགྲོ་བ་ལས་ཇེ་བཟང་དུ་འགྲོ་རྒྱུ་མེད་གསུངས་ཡོད་ན། ཆོས་འདི་ཇེ་བཟང་ནས་ཇེ་བཟང་ལ་འགྲོ་བ་འདི་ཅི་ཡིན་སྙམ་ན།^p217
དེ་ནི་རྒྱུད་སྡེ་སྤྱིའི་འགྲོ་ཚུལ་ཏེ། ཉོན་མོངས་པ་ཇི་ལྟར་མང་ན་ཆོས་ཀྱང་དེ་ལྟར་ཟབ་དགོས་པ་ཡིན་ལ། ཆོས་ཟབ་ཀྱིན་ཟབ་ཀྱིན་ཉོན་མོངས་པ་ཤིན་ཏུ་བདོ་བས་བག་མེད་ཆེ་བའི་དུས་ལ་ཆོས་དེ་གནད་ཐོག་ཏུ་འགྲོ་བ་ཡིན། སྤྱིར་བྱ་རྒྱུད་ནི་ཚེ་ལོ་དཔག་མེད་ཀྱི་དུས་སུ་དར་ཞིང་རྒྱུད་སྡེ་ཐམས་ཅད་ཀྱི་དམའ་ཤོས་དེ་ཡིན་ལ། ཚེ་ལོ་བརྒྱད་ཁྲིའི་དུས་སུ་སྤྱོད་རྒྱུད་ཀྱི་ཆོས་དར། ཚེ་ལོ་སུམ་ཁྲིའི་དུས་སུ་རྣལ་འབྱོར་གྱི་རྒྱུད་དར། རྩོད་ལྡན་གྱི་དུས་སྙིགས་མ་ལྔ་བདོ་བའི་སྐབས་སུ་རྣལ་འབྱོར་བླ་ན་མེད་པའི་རྒྱུད་དར་བ་རེད། དུས་ཇི་ལྟར་སྙིགས་ན་རྒྱུད་སྡེ་ཐམས་ཅད་དེ་ལྟར་ཇེ་ཟབ་ནས་ཇེ་ཟབ་བྱས་ནས་གདུལ་བྱ་རྣམས་ལ་སྟོན་པ་ཡིན་ལ། བསྐལ་པ་མར་མར་སྙིགས་ནས་ནམ་ཞིག་མི་རྣམས་ཀྱིས་ཚེ་ལོ་བཅུ་མ་གཏོགས་མི་ཐུབ་པའི་དུས་ཤིག་འབྱུང་ཞིང་། དེའི་ཚེ་རྫོགས་པ་ཆེན་པོ་སྔར་ལས་ཀྱང་དར་ཁྱབ་ཆེ་བར་གྱུར་ནས། མཁའ་འགྲོ་མ་དཔལ་འཛིན་ཞེས་བྱ་བ་ཞིག་གིས་ཆོས་འདི་བསྟན་ནས་མཐོང་ཐོས་དྲན་རེག་གི་སེམས་ཅན་ཐམས་ཅད་གྲོལ་བར་འགྱུར་བ་ཡིན། ཆོས་གཞན་རྣམས་ནི་དུས་ཚོད་སྙིགས་པ་དང་མཉམ་དུ་ཆོས་ཀྱི་ནུས་པའང་ཇེ་ཆུང་ནས་ཇེ་ཆུང་ལ་འགྲོ་བ་ཡིན་ཡང་། རྫོགས་པ་ཆེན་པོའི་ཆོས་ཀྱི་ནུས་པ་ནི་དུས་ཇི་ལྟར་སྙིགས་ན་དེ་ལྟར་ཇེ་ཆེར་འགྲོ་བ་ཡིན་ཏེ། ཀུན་མཁྱེན་མི་ཕམ་རྒྱ་མཚོའི་ཞལ་ནས། སྙིགས་མའི་རྒུད་པ་མུན་ལྟར་འཁྲིགས་ན་ཡང་། །རྒྱལ་དབང་པདྨའི་འཕྲིན་ལས་ཟླ་ལྟར་གསལ། །ཞེས་གསུངས་པ་ལྟར་ཡིན།^p218
སངས་རྒྱས་ཀྱི་བཀའ་ལས། འབྲས་བུའི་དུས་དང་སྒྲུབ་པའི་དུས། ལུང་གི་དུས་དང་རྟགས་ཙམ་འཛིན་པའི་དུས་རྣམས་ལས། འབྲས་བུའི་དུས་ཡོལ་ཞིང་སྒྲུབ་པའི་དུས་ཀྱང་ཡོལ་ནས་དེང་སང་ལུང་གི་དུས་ལ་ཐུག་ཡོད་པས། འཆད་ཉན་བྱེད་པ་ཙམ་མ་གཏོགས་མདོ་ཕྱོགས་ཀྱི་བསྟན་པ་ཟབ་མོ་ཞིག་མེད་པར་གསུངས་ཡོད། སངས་རྒྱས་ཀྱི་བཀའ་སྤྱིའི་དབང་དུ་བྱས་ན་བསྟན་པའི་ནུས་པ་ལྡབ་འགྱུར་གྱིས་ཇེ་ངན་ལ་སོང་ཚར་བ་རེད།^p219
དངོས་ཐོག་ར་སྤྲོད་ཀྱི་སྟེང་ནས་བསམ་བློ་བཏང་ན་ཡང་ངོ་མ་དེ་འདྲ་ཞིག་སྟེ། དཔེར་ན། སྔོན་གྱི་དུས་སུ་སློབ་དཔོན་པདྨ་འབྱུང་གནས་དང་། པཎ་ཆེན་བི་མ་མི་ཏྲ་ཁོང་རྣམ་གཉིས་རྒྱ་གར་གྱི་ཤར་ལྷོ་ནུབ་བྱང་ཐམས་ཅད་ལ་བྱོན་པར་མ་ཟད་བོད་ཡུལ་དུ་ཡང་བྱོན་པ་རེད། ཡིན་ཡང་སྐབས་དེར་རྫོགས་པ་ཆེན་པོ་དར་ཁྱབ་ལ་དེ་ཙམ་སོང་མེད། དེང་དུས་སུ་བོད་ཀྱི་བླ་མ་རྣམ་པའང་ཕྱིའི་རྒྱལ་ཁབ་མང་ཆེ་བར་བྱོན་ནས་ཆོས་གསུངས་ཤིང་དབང་སྐུར་གྱིན་ཡོད་དེ། འཛམ་གླིང་གི་སྟོབས་ལྡན་རྒྱལ་ཁབ་ཨང་དང་པོ་ཨ་མེ་རི་ཁའི་ཡུལ་ཁམས་ལའང་རྫོགས་པ་ཆེན་པོའི་ཆོས་དར་ཁྱབ་ཏུ་འགྲོ་བཞིན་པ་ནི། རྫོགས་པ་ཆེན་པོའི་ཆོས་ཀྱི་ནུས་པ་ཇེ་བཟང་དུ་སོང་བའི་རྟགས་རེད།^p220
དེ་ནི་ཚོགས་པ་འདིར་ཡོད་པའི་མི་རྣམས་ཀྱི་སེམས་ཁམས་ལ་བལྟས་ནའང་དཔག་ཐུབ་སྟེ། སྤྱིར་ཁྱེད་ཅག་སངས་རྒྱས་ཀྱི་ཆོས་ལ་དད། བྱེ་བྲག་བོད་བརྒྱུད་ནང་བསྟན་ལ་དད། ཁྱད་པར་དུ་རྫོགས་པ་ཆེན་པོའི་ཆོས་ལ་ལྷག་པར་མོས་འདུན་ཡོད་པ་ནི། ཁྱེད་རྣམས་ཀྱི་རྒྱུད་ལ་རྫོགས་པ་ཆེན་པོའི་ཆོས་ཀྱི་བྱིན་རླབས་འཇུག་པའི་དུས་ལ་བབས་ཤིང་ཆོས་རྫོགས་པ་ཆེན་པོའི་གདུལ་བྱར་གྱུར་བའི་རྟགས་རེད། ཁྱེད་ཅག་གིས་དེ་འདྲ་ཞིག་རེད་བསམ་མམ། ༼དགོད་སྒྲ།༽^p221
བོད་ཡུལ་ནི་ལུང་པ་ཆུང་ཆུང་ཡིན་པས། དེང་རབས་ཀྱི་ཚན་རིག་སོགས་ཤེས་པའི་མི་ཤེས་རྒྱ་ཆེན་པོ་ཅན་མང་པོ་མེད་ཀྱང་། ཆོས་ཟབ་མོ་བྱིན་རླབས་ཅན་རྫོགས་པ་ཆེན་པོ་འདི་ཉིད་དར་བའི་སྟབས་ཀྱིས། ད་ལྟ་བོད་ཀྱི་བླ་མ་རྣམས་ཀྱིས་འཛམ་གླིང་གི་ཡུལ་ཁམས་སོ་སོ་ལ་སངས་རྒྱས་ཀྱི་བསྟན་པ་སྤྱི་དང་། ཁྱད་པར་དུ་རྫོགས་པ་ཆེན་པོའི་ཆོས་འདི་དར་སྤེལ་མཛད་བཞིན་པ་ནི། སྤྱིར་ཐེག་པ་ཆེན་པོའི་ཆོས་དང་སྒོས་སུ་རྫོགས་པ་ཆེན་པོའི་ཆོས་ལ་དེ་འདྲའི་བྱིན་རླབས་དང་ནུས་མཐུ། ཡོན་ཏན་བསམ་གྱིས་མི་ཁྱབ་པ་ཡོད་པའི་རྟགས་མངོན་གསལ་ཡིན།^p222
ཡང་ཁྱེད་རྣམས་ལ་འདི་འདྲའི་དོགས་པ་ཞིག་སྐྱེ་སྲིད་དེ། སྔོན་གྱི་དུས་སུ་རྫོགས་པ་ཆེན་པོའི་རྣལ་འབྱོར་པ་ལ་ལས་སྐུ་ལུས་མ་སྤངས་པར་རིག་འཛིན་གྱི་ས་ལ་གཤེགས་ཏེ་ད་སྐབས་མངོན་སུམ་དུ་ཞིང་ཁམས་སུ་བཞུགས་ཡོད་ལ། ཕལ་ཆེར་འོད་སྐུར་གྲོལ་སོང་བ་ཡིན་ཡང་། རྫོགས་པ་ཆེན་པོ་ཉམས་ལེན་ཆེ་བའི་ཚད་དུ་འཇོག་པ་སྐྱབས་རྗེ་བདུད་འཇོམས་པ་དང་། དིལ་མགོ་མཁྱེན་བརྩེ་ལ་སོགས་པ་རྣམས་ཀྱིས་ཀྱང་སྐུ་ལུས་ཤུལ་དུ་བཞག་ཡོད་པ་ཅི་ཡིན་ནམ་སྙམ་ན།^p223
ཁོང་རྣམ་པའི་སྐུ་གདུང་ཤུལ་དུ་འཇོག་རྒྱུ་དེར་རྒྱུ་མཚན་རྣམ་པ་གཉིས་ཡོད་དེ། གཅིག་ཏུ་ཁོང་གི་སྐུ་ལུས་འོད་སྐུར་དེངས་ནུས་ཀྱང་ཆེད་དུ་གདུལ་བྱ་རྣམས་ལ་དད་པའི་རྟེན་དུ་བཞག་པ་ཞིག་ཀྱང་ཡོད། དེ་ཡང་དད་རྟེན་དུ་སྐུ་ལུས་ཧྲིལ་པོ་བཞག་པས་འགྲོ་དོན་ཡོང་ན་སྐུ་ལུས་ཧྲིལ་བོར་འཇོག་རྒྱུ་དང་། དབུ་སྐྲ་དང་སེན་མོ་ཙམ་གྱིས་འགྲོ་དོན་ཡོང་ན་སྐྲ་སེན་མ་གཏོགས་སྐུ་ལུས་འཇའ་འོད་དུ་དེངས་འགྲོ་བ་རེད། དེང་སང་བླ་མ་ལ་ལས་སྐྲ་སེན་ཤུལ་དུ་བཞག་ཡོད་པ་དང་། ལ་ལས་སྐུ་ལུས་ཧྲིལ་བོར་བཞག་ཡོད་པ་ནི། སྐུ་ལུས་ཀྱིས་ཀྱང་དད་པ་དང་ཕྱག་འཚལ་བ། སྐོར་བ་བྱེད་པའི་སེམས་ཅན་ཐམས་ཅད་ངན་སོང་གི་གནས་ནས་ཟློག་པར་བྱེད་པའི་དགོས་པ་ཁྱད་པར་ཅན་ཡོད་པ་ལ་དགོངས་ནས་བཞག་པ་ཡིན།^p224
རྒྱུ་མཚན་གཉིས་པ་ནི། སློབ་མ་རྣམས་ཀྱི་ངོས་ནས་ཀྱང་ལས་མ་དག་པ་མང་པོ་ཡོད་ན། དེ་དག་གི་གྲིབ་ཕོག་ནས་སྐུ་ལུས་ཡོངས་རྫོགས་འོད་དུ་དེངས་མི་ཐུབ་པ་ཡང་ཡོད།^p225
དེས་ན་གདུལ་བྱའི་ཁམས་ལ་བསམ་བཞིན་དུ་སྐུ་གདུང་བཞག་པ་དེ་དང་། སྐུ་གདུང་འོད་དུ་ཞུ་མི་ཐུབ་པར་ལྷག་འགྲོ་བ་གཉིས་ཀྱི་ཁྱད་པར་ཅི་ཞིག་ལ་ངོས་འཛིན་དགོས་སྙམ་པའི་དོགས་པ་ཞིག་ཀྱང་སྐྱེ་སྲིད་རྒྱུ་རེད།^p226
དེ་ནི་དཔེར་ན། སྐྱབས་རྗེ་བདུད་འཇོམས་པ་ཆེན་པོ་དང་དིལ་མགོ་མཁྱེན་སྤྲུལ་ལྟ་བུ་ལ་མཚོན་ན། བདུད་འཇོམས་རིན་པོ་ཆེ་ནི་ཨོ་རྒྱན་རིན་པོ་ཆེ་བསམ་བཞིན་མི་ཡུལ་དུ་བྱོན་པ་དངོས་ཡིན་པས། ཁོང་གི་སྐུ་ལུས་ལ་ས་སྟེང་དམ་ཉམས་ཀྱིས་གང་ཡང་སྒྲིབ་ཐུབ་རྒྱུ་མ་རེད། དིལ་མགོ་མཁྱེན་བརྩེ་རིན་པོ་ཆེ་ནི། ཆོས་རྒྱལ་ཁྲི་སྲོང་ལྡེ་བཙན་གྱི་སྤྲུལ་པ་རེད། ཁོང་ལ་ཡང་ས་སྟེང་གི་སྐྱེ་འགྲོ་ཐམས་ཅད་དམ་སློབ་མ་ཡོངས་རྫོགས་དམ་ཉམས་སུ་གྱུར་སོང་ཡང་རྩ་བ་ནས་སྒྲིབ་ཐུབ་རྒྱུ་མ་རེད། དེས་ན་ཁོང་རྣམ་པ་གཉིས་ཀྱི་སྐུ་གདུང་བཞག་ཡོད་རྒྱུ་ནི། ད་ལྟ་ཁྱེད་རྣམ་པའི་གཙོས་དད་ལྡན་རྣམས་ལ་ཕྱག་མཆོད་སྐོར་བ་བྱེད་སའི་རྟེན་དུ་བཞག་པ་རེད།^p227
འུ་ཅག་ལྟ་བུའི་ཐ་མལ་བ་དང་ལས་དང་པོ་པ་ཞིག་གིས། རྫོགས་པ་ཆེན་པོའི་ལམ་བསྒོམས་ཤིང་དོན་རྟོགས་ནས་འཇའ་ལུས་ལ་དེངས་དགོས་ན། སློབ་མ་ལ་གཟབ་དགོས་པ་རེད་མ་གཏོགས། སྤྱིར་ལུས་པོ་འདི་དང་པོ་ཉིད་ནས་སྡུག་བདེན་དང་མ་དག་པའི་ཕུང་པོ་རེད། དེའི་ཁར་སློབ་མ་དམ་ཉམས་ཡོད་ན་དེ་ཡིས་བསྒྲིབས་ནས་འཇའ་ལུས་སུ་དེངས་མི་ཐུབ་པར་སྐུ་ལུས་ཤུལ་དུ་ལྷག་འགྲོ་བ་ཡིན། འུ་ཅག་འདི་ན་ཡོད་ཚད་ཚང་མའི་རྒྱུད་ཚོད་མི་ཟིན་ཀྱང་། དཔེར་ན། ང་འདྲ་བ་དག་གིས་སློབ་མ་ལ་གཟབ་གཟབ་མ་བྱས་ན། སློབ་མའི་དམ་སེལ་གྱིས་བསྒྲིབས་ནས་འཇའ་ལུས་སུ་དེངས་ཐུབ་པ་མིན། དེ་ནི་རྫོགས་པ་ཆེན་པོའི་ལོ་རྒྱུས་ཀྱི་སྐོར་ཡིན།^p228
རྫོགས་ཆེན་གྱི་བྱིན་རླབས།^p229
རྫོགས་པ་ཆེན་པོ་ལ་ཕན་ཡོན་ཅི་འདྲ་ཡོད་ཟེར་ན། རྫོགས་ཆེན་རྣ་ལམ་དུ་དངོས་སུ་ཐོས་པའི་གང་ཟག་ཅིག་ཇི་ལྟར་འཕྱི་རུང་སྐྱེ་བ་བདུན་གྱི་རྗེས་སུ་འཚང་མི་རྒྱ་བ་གཏན་ནས་མི་སྲིད། རྫོགས་པ་ཆེན་པོའི་དབང་དང་ཁྲིད་ཐོབ་པ་མ་ཟད། བླ་མ་ལ་ལོག་ལྟ་སྐུར་འདེབས་མ་བྱས། ཆོས་ལ་དད་པ་མ་ལོག་ན་ཇི་ལྟར་འཕྱི་ཡང་བར་དོར་ངེས་པར་དུ་གྲོལ་ངེས་ཡིན།^p230
རྫོགས་པ་ཆེན་པོའི་དབང་ཁྲིད་ཐོབ་ཅིང་དེའི་དོན་ཤེས་ནས་ནན་ཏན་གྱིས་བསྒོམ་ན། དད་པ་བཟང་པོ་ཡོད་ན་ཟླ་བ་དྲུག་དང་། འབྲིང་ཙམ་ཡོད་ན་ལོ་བདུན། ཐ་མ་ཞིག་ཡོད་ནའང་ལོ་བཅུ་གཉིས་ཀྱི་དུས་སུ་ངེས་པར་དུ་སངས་རྒྱས་ཀྱི་གོ་འཕང་འཐོབ་པར་འགྱུར་བའི་ཐབས་ཡོད། གཞན་དབང་ཁྲིད་ཐོབ་ཅིང་སྒོམ་མ་ནུས་ནའང་། དམ་ཚིག་མ་ཉམས་ན་དེའི་གླེགས་བམ་ལུས་ལ་རེག་པ་ཙམ་གྱིས་ཀྱང་བར་དོ་ན་སངས་རྒྱས་པར་འགྱུར་ལ། རྫོགས་པ་ཆེན་པོའི་ཆོས་དེ་སེམས་ཅན་འཆི་ཁ་མའི་རྣ་ལམ་དུ་བསྒྲགས་པ་དང་། རྫོགས་པ་ཆེན་པོའི་གླེགས་བམ་མགོ་སྔས་སུ་བཞག་ནས་དེར་ཕྱག་འཚལ་ཞིང་སྐོར་བ་བྱས། མར་མེ་ཕུལ་བ་སོགས་བྱས་ན། དེ་ཡང་རིང་པོར་མི་ཐོགས་པར་འཚང་རྒྱ་བར་འགྱུར།^p231
དེས་ན་ཐེག་པ་ཐམས་ཅད་ཀྱི་རྩེ་མོ་ཡིན་པའི་རྒྱུ་མཚན་ནི། ཐེག་པ་རིམ་དགུའི་ཆོས་གང་དང་ཡང་མི་འདྲ་བ་འདི་ཉིད་མཐོང་ཚད་དང་། རེག་ཚད། དྲན་ཚད། ཐོས་ཚད་ཀུན་འཚང་རྒྱ་བར་འགྱུར་བས། རྫོགས་པ་ཆེན་པོ་ནི་ཐོས་གྲོལ་དང་རེག་གྲོལ་ཡིན་ཞེས་ཟེར་བའང་དེ་ཡིན། རྫོགས་པ་ཆེན་པོ་ནི་དེ་འདྲའི་ཆོས་བསམ་གྱིས་མི་ཁྱབ་པ་ཡིན་པས། ད་ནས་བཟུང་སྟེ་འུ་ཅག་གིས་ཆོས་དང་བླ་མ་ལ་ལོག་པར་མ་བལྟས་ཤིང་སྐུར་འདེབས་སོགས་མ་བྱས་ན། མྱུར་བ་ཉིད་དུ་སངས་རྒྱས་པ་མ་གཏོགས་ལུས་ལ་ན་ཚ་དང་སེམས་ལ་སྡུག་བསྔལ་གཏན་ནས་མྱོང་དགོས་པ་མ་རེད། ཁྱེད་རང་ཚོ་དགའ་བོ་བྱུང་སོང་ངམ། ༼དགོད་སྒྲ ། ༽^p232
ཆོས་སྒྲུབ་པའི་རྨང་གཞི།^p233
ཕྱི་ཟླ་༦ཚེས་༡༩ཡི་སྔ་དྲོར། གནས་ཆུང་དགོན་པའི་དད་ལྡན་དང་གནས་གཞན་ནས་འོངས་པ་དག་ལ་རྗེ་རང་ཉིད་ཀྱི་གཏེར་ཆོས་ཏེ། འཇམ་དཔལ་ཞི་སྒྲུབ་ཀྱི་དབང་བསྐུར་བའི་ཐོག་མར་འདི་སྐད་དུ།^p234
དེ་རིང་འཇམ་དཔལ་ཞི་སྒྲུབ་ཀྱི་ཆོས་སྐོར་གྱི་ཆོས་ཞུ་བའི་སྐབས་སུ་ཁྱེད་རྣམ་པས་འདི་ལྟར་སོམས། ངས་འཛམ་གླིང་གི་འགྲོ་བ་མཐའ་དག་ལ་ཕན་པའི་ཆེད་དུ་ཆོས་འདི་ཉན་པ་དང་སྤེལ་བ་ཡིན་སྙམ་དུ་སེམས་སྐྱེད། ཁྱེད་རྣམ་པས་ཆོས་འདི་ཡུལ་ཁམས་སོ་སོའི་ཡི་གེའི་ཐོག་ནས་དེབ་སྣ་ཚོགས་བསྒྲིག་རྒྱུ་དང་། ཆོས་འདི་སྐད་རིགས་སྣ་ཚོགས་ཀྱི་སྒོ་ནས་བཤད་དེ། འཛམ་གླིང་གི་རྒྱལ་ཁབ་སོ་སོར་དར་ཁྱབ་རྒྱ་ཆེ་བ་ཞིག་ཡོང་བར་བརྩོན་ལེན་བྱེད་པར་ངས་གནང་བ་ཐོབ་པ་ཡིན།^p235
ཁྱེད་རྣམ་པ་ཚང་མ་ལ་ནང་ཆོས་དར་ཁྱབ་ལ་གཏོང་བའི་འོས་འགན་ཡོད་དེ། དཔེར་ན། མཁན་པོ་རྣམ་གྲོལ་ཀྱིས་རྒྱ་གར་ཡུལ་གྱི་བོད་ཀྱི་བླ་སེར་མང་པོར་རྒྱ་ཆེར་སྤེལ་བ་མ་ཟད། ཐེ་ཝན་དང་ཧོང་ཀོང་ལ་སོགས་པའི་ཡུལ་དུ་ཡང་དར་སྤེལ་དུ་བཏང་བས། བསྟན་འགྲོའི་དོན་རྒྱ་ཆེན་པོ་ཞིག་བསྒྲུབས་མྱོང་ཡོད། དེ་བཞིན་དུ་ཁྱེད་རྣམ་པ་རང་རང་ལའང་ནུས་པ་རེ་ཡོད་ངེས་པས། ཆོས་འདི་དར་ཁྱབ་རྒྱ་ཆེན་པོར་བཏང་ན། ཐེག་པ་ཆེན་པོའི་ལམ་གྱི་བསླབ་བྱ་གཙོ་བོ་སྟེ། སེམས་ཅན་ཐམས་ཅད་ལ་ཕན་རྒྱ་ཆེན་པོ་ཐོགས་པ་ཡིན། ཁྱེད་རང་ཚོས་ང་ལ་འོས་འགན་མེད་མ་བསམ་རོགས། ཐམས་ཅད་ལ་འོས་འགན་ཡོད་པ་ཡིན་པས། ཀུན་གྱིས་འགན་དེ་གཙང་བཞེས་བྱ་རྒྱུ་མ་འཆུགས། ཡང་དཔེར་ན། མཁན་པོ་བསོད་དར་རྒྱས་ཀྱིས་ཀྱང་རྒྱ་ནག་གི་ཞིང་ཆེན་སོ་སོའི་རབ་བྱུང་བ་དང་དགེ་བསྙེན་མང་པོ་ལ་ཆོས་འདི་རྒྱ་ཆེར་སྤེལ་བ་རེད། དེ་བཞིན་དུ་ཁྱེད་རྣམས་པས་ཀྱང་ཡུལ་ཁམས་སོ་སོར་ཆོས་འདི་དར་རྒྱས་ཕུན་སུམ་ཚོགས་པ་འབྱུང་བར་བརྩོན་ལེན་བྱ་རྒྱུ་མ་བརྗེད།^p236
དབང་བསྐུར་རྗེས་ཉིན་གཉིས་ཀྱི་རིང་ལ་འཇམ་དཔལ་ཞི་སྒྲུབ་ཀྱི་ཁྲིད་ཡིག་སངས་རྒྱས་ལག་སྟེར་གསུངས་ཤིང་། ཉིན་དང་པོར་ཁྲིད་ཡིག་གི་མགོ་ནས་སེམས་བསྐྱེད་བར་གསུངས་ལ། སྐབས་དེར་གསུངས་པའི་ཚིག་དོན་རྣམས་མཐར་ཆགས་སུ་རེ་རེ་ནས་མ་བཀོད་པར། འཕྲོས་དོན་ཆ་ཤས་ཤིག་འགོད་པ་ནི་འདི་ལྟ་སྟེ།^p237
ཆོས་འདི་གསན་པའི་ཐོག་མར། གོང་དུ་ཞུས་པ་བཞིན་དུ་ཁྱེད་རྣམ་པས་ནམ་མཁས་གར་ཁྱབ་ཀྱི་སེམས་ཅན་ཐམས་ཅད་སངས་རྒྱས་ཀྱི་གོ་འཕང་ལ་དགོད་པར་བྱ། དེའི་ཆེད་དུ་བདག་གིས་དམ་པའི་ཆོས་འདི་ཉན་ནས་དོན་ཉམས་སུ་བླང་བར་བགྱིའོ་སྙམ་པའི་ཀུན་སློང་སྔོན་དུ་སོང་བའི་སྒོ་ནས་གསན་པར་ཞུ། གང་གསན་པར་བྱ་བའི་ཆོས་ནི། འཇམ་དཔལ་ཞི་སྒྲུབ་ཀྱི་ཆ་ལག་ཁྲིད་ཡིག་སངས་རྒྱས་ལག་སྟེར་འདི་ཡིན།^p238
འཇམ་དཔལ་ཞི་སྒྲུབ་ཀྱི་ལམ་འདི་ཉིད་ཉམས་སུ་ལེན་པར་བྱེད་པ་ལ། ཐོག་མར་ལམ་གྱི་རིམ་པ་སྤྱིར་བསྟན་པ་དང་། ལམ་སྒོམ་པའི་མན་ངག་བྱེ་བྲག་ཏུ་བཤད་པ་གཉིས་ཡོད་པ་ལས།^p239
དང་པོ་ལམ་གྱི་རིམ་པ་སྤྱིར་བསྟན་པ་ནི། ཆོས་འདིའི་ཆ་ལག་སྙིང་གཏམ་སྙིང་གི་ཐིག་ལེ་ལས་གསལ་བོར་བསྟན་ཡོད་ཅིང་། ལམ་སྒོམ་པའི་མན་ངག་ཉམས་སུ་ལེན་ཚུལ་དེ། ཁྲིད་ཡིག་སངས་རྒྱས་ལག་སྟེར་གྱིས་གསལ་བོར་བསྟན་ཡོད། དེ་གཉིས་ཀྱི་བཤད་སྟངས་དེ་ཡང་། སྔ་མ་ནི་རྒྱ་ཆེ་བ་པཎྜི་ཏའི་ལུགས་ཀྱི་བཤད་སྟངས་ཡིན་ལ། ཕྱི་མ་ནི་ཟབ་པ་ཀུ་སཱ་ལིའི་ལུགས་ཀྱི་བཤད་སྟངས་ཡིན།^p240
དེ་གཉིས་གང་ལྟར་དུ་ཉམས་སུ་བླངས་ཀྱང་། སྐྱེས་བུ་གཅིག་མངོན་པར་རྫོགས་པར་འཚང་རྒྱ་བའི་ལམ་ཚང་ལ་ནོར་བ་མེད་པ་ཡིན་པར་གཞུང་རང་རང་གི་ནང་དུ་བསྟན་ཡོད་ལ། ད་རེས་ཁྲིད་ཡིག་སངས་རྒྱས་ལག་སྟེར་འདི་ཉིད་འཆད་རྒྱུ་ཡིན། འདི་ཉིད་འཆད་པར་བྱེད་པ་ལ། ཐོག་མར་ལམ་གྱི་ཆ་ལག་ཆ་ཤས་ཤིག་སྙིང་གཏམ་སྙིང་གི་ཐིག་ལེ་ལས་ཁ་གསབ་བྱ་དགོས་པས། ངས་སྤྱི་དོན་གྱི་ཚུལ་དུ་ཁྱེད་རྣམ་པ་ལ་ཚིག་འགའ་ཞིག་འཆད།^p241
འདོད་ཆུང་ཆོག་ཤེས།^p242
འུ་ཅག་གིས་ཆོས་རྣམ་པར་དག་པ་ཞིག་སྒྲུབ་པར་བྱེད་པ་ལ་ཐོག་མར་འདོད་པ་ཆུང་ཞིང་ཆོག་ཤེས་པ་ཞིག་དགོས། དེ་ཡང་། གཞན་ལ་རྒྱུ་རྫས་མང་པོ་དང་ཐོབ་མངའ་ཐང་། མཚན་སྙན་གྲགས་སོགས་ཡོད་ན། དེ་དག་ང་ལ་ཐོབ་སོང་ན་ཅི་མ་རུང་སྙམ་པའི་བསམ་པ་རྩ་བ་ནས་སྤངས་ཐུབ་ན་འདོད་པ་ཆུང་བ་ཡིན། ཆོག་ཤེས་པ་ནི། རང་ལ་བཟའ་རྒྱུ་འཐུང་རྒྱུ་བཟང་ངན་ཅི་ཡོད་ན་དེ་ཙམ་ཞིག་གིས་ཆོག་པར་བྱས་ནས། འདོད་རྔམ་གྱིས་ཟས་ནོར་འཚོལ་བའི་བྱ་བ་མང་པོ་མི་སྒྲུབ་པ་ཞིག་ལ་ཟེར། དེ་འདྲའི་འདོད་ཆུང་ཆོག་ཤེས་ཀྱི་སྒོ་ནས་ཚེ་འདིའི་བདེ་འབྱོར་སྙན་གྲགས་ལ་ཞེན་ཆགས་མེད་པ་ཞིག་དགོས་པ་རེད་མ་གཏོགས། ཚེ་འདི་ཁོ་ནར་ཞེན་ཆགས་སྐྱེས་ནས་བཟུང་སྟེ་ཆོས་པ་རྣམ་དག་ཅིག་ཡོང་ཐབས་མེད། དེའི་རྒྱུ་མཚན་ནི། འདོད་པའི་ལོངས་སྤྱོད་ལ་ཅི་ཙམ་སྤྱད་ཀྱང་སྲེད་པ་འཕེལ་བ་ལས་ཚིམ་ཞིང་ངོམས་པའི་དུས་མེད། དཔེར་ན། མི་ཞིག་ལ་གསེར་རྒྱ་མ་གང་ཡོད་ཚེ་གསེར་རྒྱ་མ་དོ་ཡོད་ན་བསམ་ཡོང་ཞིང་། ཡུལ་ཁམས་གཅིག་གི་བདག་པོར་གྱུར་ཀྱང་ཡུལ་ཁམས་གཉིས་ཀྱི་བདག་པོར་གྱུར་ན་སྙམ། རྒྱལ་ཁབ་གཅིག་གི་བདག་པོར་གྱུར་ཀྱང་གཉིས་ཀྱི་བདག་པོར་ཨེ་འགྱུར་བསམ་ནས་འདོད་པའི་ཁ་གང་བའི་དུས་ཤིག་ཡོང་རྒྱུ་མེད། དེའི་ཕྱིར་འདོད་པ་ཆུང་བ་ལ་སློབ་དགོས། ཚེ་འདིའི་བྱ་གཞག་ཐམས་ཅད་ཇི་ལྟར་བསྒྲུབས་ཀྱང་འགྲུབ་པའི་དུས་ཤིག་མི་ཡོང་། མི་ཚེ་གཅིག་ལ་བདེ་བ་དང་། འབྱོར་བ། སྙན་གྲགས་ཐོབ་པའི་ཆེད་དུ་ཉིན་རེའི་བྱ་བ་ཡང་སྒྲུབ་བསྐྱར་སྒྲུབ་བྱེད་པར་ཇི་ལྟར་འབད་ཀྱང་། གང་ཡང་འགྲུབ་པ་མེད་པར་ནམ་ཞིག་རང་ཉིད་འཆི་དགོས་པ་ཡིན།^p243
དེས་ན་བྱ་བ་ཐམས་ཅད་ཆེ་བཞག་ཆུང་བསྐྱུར་བྱས་ནས་དགེ་བ་འབའ་ཞིག་བསྒྲུབ་དགོས་ཤིང་། དེ་མིན་སྲིད་པའི་བདེ་འབྱོར་དང་སྙན་གྲགས་གང་ལ་བསམ་ཡང་། རྨི་ལམ་གྱི་ནང་དུ་ཚོང་ལས་བྱེད་པ་རྨིས་ན། སྐབས་རེར་ཁེ་བཟང་ཐོབ་པས་དགའ་སྣང་སྐྱེས་ཤིང་། ཐེངས་རེར་ཕམ་ཁ་བྱུང་བས་ཡིད་ཆད་སྐྱེས་པ་ལ་སྙིང་པོ་མེད་དེ། རྨི་ལམ་ནང་དུ་ཚོང་བྱེད་པ་ལ་རྒྱལ་ཕམ་དང་ཐོབ་ཤོར་སོགས་བདེན་པར་མ་གྲུབ་པ་བཞིན་དུ། ཚེ་འདིའི་བདེ་འབྱོར་སྙན་གྲགས་སོགས་ཀྱི་སྣང་བ་འདི་དག་ཐམས་ཅད་ཀྱང་བདེན་པར་མ་གྲུབ་པ་རྨི་ལམ་གྱི་སྣང་བ་དང་ཁྱད་པར་གང་ཡང་མེད། དཔེར་ན། རང་ཅག་ཁྱིམ་ཚང་གང་བོ་འདི་ལ་བསམ་བློ་བཏང་ན། སྐྱེས་ནས་ད་བར་དུ་མི་ལ་ལས་ཚེ་སྟོད་ལ་བདེ་སྐྱིད་ཆེན་པོ་མྱོང་ཞིང་། ལ་ལས་སྡུག་བསྔལ་མང་པོ་མྱོང་། ལ་ལས་བདེ་སྡུག་རེས་མོས་སུ་མྱོང་ཡང་། དེ་དག་ནི་མདང་སུམ་རྨིས་པའི་རྨི་ལམ་དང་ཁྱད་པར་ཅི་ཡང་མེད་དེ། དེ་རིང་སེམས་ཀྱིས་དྲན་པ་ཙམ་ལས་བདེ་སྡུག་དེ་དག་ཡང་བསྐྱར་མྱོང་རྒྱུ་ཡོད་པ་མིན། འདས་པའི་དོན་རྣམས་སོང་ཟིན་ཡང་ད་ལྟ་འུ་ཅག་ལ་སྐྱིད་སྡུག་འདི་དག་འདུག་བསམ་ན། དེ་ཡང་རྨི་ལམ་གྱི་སྣང་བ་དང་འདྲ་བ་ཡིན་ཏེ། རྨི་ལམ་གྱི་སྐབས་སུ་སྐྱིད་པོ་རྨིས་ན་དགའ་ཞིང་སྡུག་པོ་རྨིས་ན་མི་དགའ་བའི་སྣང་བ་འཆར་ཡང་། ཕྱི་ཉིན་ཡར་སད་དུས་གང་ཡང་མེད། དེ་བཞིན་དུ་འུ་ཅག་ལ་དེ་རིང་སྐྱིད་སྡུག་ཅི་སྣང་ཡང་། སང་ཉིན་ནམ་ལངས་དུས་གང་ཡང་ཡོད་པ་མིན་པས་སྙིང་པོ་མེད་ཚུལ་རྨི་ལམ་དང་མཚུངས། དེ་བཞིན་དུ་སང་ཉིན་དང་གནངས་ཉིན་གྱི་སྣང་བ་ཡང་། སང་ནུབ་དང་གནངས་ནུབ་ཀྱི་རྨི་ལམ་གྱི་སྣང་བ་དང་ཁྱད་པར་མེད་ཅིང་རྟག་བརྟན་མིན་པས། བདེ་སྡུག་གི་སྣང་བ་འདི་དག་གཏན་ནས་གྲུབ་མ་མྱོང་ཞིང་འཁྲུལ་བ་ཡིན་པས་ཞེན་ཆགས་སྐྱེ་མི་རུང་བ་ཡིན།^p244
མི་སུ་དང་སུ་ཡིན་ཡང་ཆོས་རྣམ་དག་ཅིག་སྒྲུབ་བསམ་པ་ནས་བཟུང་སྟེ། འཁྱག་ལྟོག་མེད་པ་ཙམ་གྱིས་འགྲིག་སྙམ་པའི་ཆོག་ཤེས་བྱ་དགོས་པ་ཡིན། དེ་ལས་གཞན་པའི་རྩོལ་སྒྲུབ་མང་པོ་བྱས་ན་ཆོས་རྣམ་དག་ཅིག་འགྲུབ་མི་སྲིད། དེས་ན་བཟའ་རྒྱུ་དང་གོན་རྒྱུ་ཅུང་ཙམ་ཞིག་ཡོད་ན་དེ་ཙམ་གྱིས་ཆོག་ཤེས་བྱ་རྒྱུ་མ་གཏོགས། འུ་ཅག་འཛམ་བུ་གླིང་གི་བདག་པོའམ་རྒྱལ་པོར་གྱུར་སོང་ཡང་། བཟའ་རྒྱུ་དང་གོན་རྒྱུ་ཙམ་ཞིག་མ་གཏོགས་གང་ཡང་ལོངས་སུ་སྤྱད་རྒྱུའི་སྐལ་བ་མེད་པས། རྒྱུ་ལོངས་སྤྱོད་དང་མཚན་སྙན་གྲགས། བདེ་འབྱོར་མང་པོ་ཞིག་ལ་དགོས་པ་ཅི་ཡང་མེད་པའང་ཤེས་དགོས།^p245
འཇིག་རྟེན་ཚེ་འདིའི་བྱ་གཞག་ཐམས་ཅད་ལ་ཅུང་ཙམ་ཡང་མི་ཆགས་པར། ཆོས་ཁོ་ན་བསྒྲུབ་བསམ་པའི་གང་ཟག་ནི། ནང་པ་སངས་རྒྱས་པའི་ལུགས་ཀྱི་ཆོས་པ་ཨང་དང་པོ་ཡིན། དེ་ལྟར་མ་ཡོང་ན། ཚེ་འདིའི་བདེ་བ་དང་འབྱོར་བ་བསྒྲུབ་རྒྱུ་དང་དམ་པའི་ཆོས་བསྒྲུབ་རྒྱུ་གཉིས་ཀ་འདྲ་མཉམ་གྱི་སྒོ་ནས་ལག་ལེན་བྱས་ན། དེས་ཀྱང་ཆོས་པ་འབྲིང་ཙམ་ཞིག་ཡོང་རྒྱུ་རེད། ཚེ་འདིའི་བདེ་འབྱོར་ལ་ཞེན་ཆགས་ཆེན་པོ་ཡོད་ཀྱང་ཆོས་ལ་ཅུང་ཙམ་དགའ་ན་དེས་ཆོས་པ་ཐ་མ་ཞིག་ཡོང་རྒྱུ་རེད། ཚེ་འདིའི་བདེ་འབྱོར་ཁོ་ན་མ་གཏོགས་ཆོས་སྒྲུབ་འདོད་ཀྱི་འདུན་པ་རྩ་བ་ནས་མེད་ན་ནམ་ཡང་ཆོས་པར་འགྱུར་ཐབས་མེད་ཅིང་། ནང་པ་སངས་རྒྱས་པའི་གྲལ་དུ་ཚུད་ཐབས་གཏན་ནས་མེད། དེས་ན་ཁྱེད་རྣམས་ཀྱིས་རང་རང་སོ་སོའི་རྒྱུད་ཚོད་ལ་བརྟག་ནས། རང་ཉིད་སྔོན་ཆད་ཆོས་པ་ཞིག་གཏན་ནས་མིན་ནའང་། ད་ནས་ཆོས་པ་ཐ་མ་ཞིག་ཡོང་ཐབས་བྱ་རྒྱུ་དང་། ཆོས་པ་ཐ་མ་ཞིག་ཡིན་ན་ཆོས་པ་འབྲིང་ཞིག་གི་གོ་གནས་ལོན་ཐབས་བྱ་རྒྱུ། ཆོས་པ་འབྲིང་ཞིག་ཡིན་ན་ཆོས་པ་ཨང་དང་པོ་ཚེ་འདི་ལ་ཞེན་པ་གཏན་ནས་མེད་པ་ཞིག་ཡོང་ཨེ་ཐུབ་བལྟ་དགོས་པ་ཡིན།^p246
བླ་མ་ཞིག་བསྟེན་དགོས།^p247
ཆོས་པ་ཡང་དག་ཡོང་བ་ལ་ཐོག་མར་འདོད་ཆུང་ཆོག་ཤེས་ཉམས་སུ་ལེན་རྒྱུ་ཅིས་ཀྱང་གལ་ཆེ་ལ། འདོད་ཆུང་ཆོག་ཤེས་དང་ལྡན་པ་གཞིར་བཞག་གི་སྟེང་ནས་བླ་མ་ཞིག་བསྟེན་དགོས།^p248
བླ་མ་བསྟེན་དགོས་པའི་རྒྱུ་མཚན་གང་ཡིན་ཟེར་ན། རང་རྒྱུད་དུ་སྐྱོན་ངན་པ་སངས་རྒྱས་ཀྱི་ཆོས་དང་མི་མཐུན་པ་ཡོད་པ་ཐམས་ཅད་ཟད་ཅིང་། སྔར་མེད་པའི་སངས་རྒྱས་ཀྱི་ཆོས་དང་དམ་པའི་ཡོན་ཏན་ཐམས་ཅད་གསར་དུ་རྒྱུད་ལ་སྐྱེ་བའི་དགོས་པ་ཡོད། བསྟེན་བྱའི་བླ་མ་ཅི་འདྲ་ཞིག་དགོས་ཤེ་ན། ནང་པ་སངས་རྒྱས་པའི་ཆོས་སྐད་དུ་མཚན་ཉིད་དང་ལྡན་པའི་བླ་མ་ཟེར་ཞིང་། དེ་ལྟ་བུའི་བླ་མ་ཚད་དང་ལྡན་ཞིང་ཡོན་ཏན་ཕུན་སུམ་ཚོགས་པ་ལྡན་པ་ཞིག་བསྟེན་དགོས་པ་ཡིན། བླ་མའི་ཡོན་ཏན་ནི། ཐུགས་རྒྱུད་ན་རང་ཤུགས་ཀྱིས་སེམས་ཅན་ཐམས་ཅད་བདེ་བ་དང་ལྡན་འདོད་ཀྱི་བྱམས་པ་དང་། སེམས་ཅན་ཐམས་ཅད་སྡུག་བསྔལ་དང་འབྲལ་འདོད་ཀྱི་སྙིང་རྗེ་གཉིས་ཐུགས་ལ་མངའ་བ་གཞིར་བཞག་ཐོག སངས་རྒྱས་ཀྱི་ཆོས་སེམས་ཅན་རྣམས་ལ་ཡང་དག་པར་འཆད་ཤེས་མཁན་ཞིག་ཡིན་ན། དེ་ལ་བླ་མ་མཚན་ཉིད་དང་ལྡན་པ་ཟེར་བས། དེ་ལྟ་བུའི་བླ་མ་ཞིག་བསྟེན་དགོས་པ་ཡིན།^p249
སློབ་མས་བླ་མ་ཇི་ལྟར་བསྟེན་དགོས་ཟེར་ན། རབ་ན་བླ་མ་དགྱེས་པའི་ཕྱིར་དུ་བླ་མས་གསུངས་པའི་ཆོས་ཉམས་སུ་ལེན་དགོས་པ་ཡིན་ལ། འབྲིང་ན་བླ་མའི་ཐུགས་མཉེས་པའི་ཕྱིར་དུ་བླ་མ་ལ་ཞབས་ཞུ་རྣམ་དག་ཅི་ནུས་ཅི་ལྕོགས་ཀྱིས་སྒྲུབ་དགོས། ཐ་མ་ཡིན་ན་རང་གིས་བླ་མའི་ཐུགས་ལོན་པ་དང་བཀའ་དྲིན་གཟོ་བའི་ཆེད་དུ། འབྱོར་བ་གང་ཡོད་བླ་མའི་ཕྱོགས་སུ་ཕུལ་ནས་ཞབས་ཞུ་སྒྲུབ་དགོས་པ་ཡིན་ལ། དེ་དག་ནི་མཉེས་པ་གསུམ་གྱི་སྒོ་ནས་བླ་མ་བསྟེན་ཚུལ་ཡིན།^p251
དེ་ནས་བླ་མའི་དྲུང་ནས་ཆོས་ཞུ་དགོས་པ་ཡིན་ལ། ཞུ་བྱའི་ཆོས་དེ་ཡང་། རབ་ན་སངས་རྒྱས་ཀྱི་བཀའ་དང་། དེ་མིན་འཕགས་ཡུལ་དུ་བྱོན་པའི་རྒྱན་དྲུག་མཆོག་གཉིས་སོགས་ཀྱིས་མཛད་པའི་སངས་རྒྱས་ཀྱི་བཀའ་ཡི་དགོངས་པ་འགྲེལ་བའི་བསྟན་བཅོས་དང་། བོད་གངས་ཅན་གྱི་སྒྲུབ་བརྒྱུད་ཤིང་རྟ་བརྒྱད་སོགས་མཁས་གྲུབ་རྣམས་ཀྱི་གསུང་ཆོས་ཡོད་ཚད་བླ་མ་ལས་ཞུ་དགོས་ཤིང་། བླ་མའི་དྲུང་ནས་མཉན་པ་ཙམ་གྱིས་མི་འཇོག་པར་ཚིག་དོན་ཐམས་ཅད་ཡིད་ལ་འཇགས་དགོས་པ་ཡིན། གལ་ཏེ་དེ་འདྲའི་རྒྱ་ཆེན་པོ་ཞིག་མ་ཤེས་ཀྱང་། གང་ཉམས་སུ་བླང་བྱའི་ཆོས་དེ་ངེས་པར་དུ་ཤེས་དགོས། དཔེར་ན། འུ་ཅག་གིས་གོང་དུ་འཆད་ཉན་བྱས་པའི་འཇམ་དཔལ་ཞི་སྒྲུབ་ལྟ་བུའི་ཟབ་ཆོས་འདིར་མཚོན་ན། དེའི་ཆ་ལག་ཡོངས་སུ་རྫོགས་ཤིང་ཆ་ཚང་བ་ཞིག་བླ་མའི་དྲུང་དུ་མཉན་ནས་ཚིག་དོན་ལ་སྒྲོ་འདོགས་གཅད་དགོས་ངེས་ཡིན། དེ་མིན། རང་གིས་དཔེ་ཀློག་བྱས་པ་ཙམ་དང་གདམས་ངག་ལ་ཚོད་དཔག་བྱས་པ་ཙམ་གྱིས་སངས་རྒྱས་ཀྱི་ཆོས་རྩ་བ་ནས་ཤེས་ཐུབ་པ་མིན།^p252
ཁྱད་པར་དུ་གསང་སྔགས་ཀྱི་ཆོས་ལ་མཚོན་ན། དཔེ་ཀློག་ཇི་ལྟར་བྱས་ཀྱང་གསང་བའི་ཚིག་དང་མན་ངག་གི་གནད་མང་པོ་ཞིག་དེབ་ཀྱི་ནང་དུ་བསྟན་མེད་པས། ངེས་པར་དུ་མཚན་ཉིད་དང་ལྡན་པའི་བླ་མ་བསྟེན་དགོས་པ་ཡིན།^p253
ཆོས་འཆད་ཚུལ་དེ་ཡང་། གང་ཟག་སོ་སོའི་ཁམས་དང་དབང་པོ། དད་པ་དང་མོས་པ། རྒྱུད་ཀྱི་ཉོན་མོངས་སོགས་ཐ་དད་ཡིན་པས། དེ་དག་དང་བསྟུན་ནས་ཆོས་སྟོན་དགོས་པ་ལས་ལྷན་ཅིག་ཏུ་ཆོས་བཤད་རྒྱུ་ཡོད་པ་མ་རེད། དཔེར་ན། སྨན་སྣ་གཅིག་ནད་པ་ཡོད་ཚད་ལ་བཏང་ན་ཕལ་ཆེར་ལ་མི་འཕྲོད་པར་མ་ཟད་གནོད་པ་འབྱུང་ངེས་པ་ལྟ་བུ་ཡིན།^p254
གང་ཟག་སུ་དང་སུས་ཁྲིད་ཡིག་སངས་རྒྱས་ལག་སྟེར་ད་ལྟ་ཡིག་ཐོག་ཏུ་བཀོད་ཡོད་པ་འདི་ཙམ་ཞིག་ཉམས་སུ་བླངས་ནའང་ཕན་པ་ཆེན་པོ་ཡོད་ངེས་ཡིན། བོད་ཀྱི་གསོ་རིག་ཏུ། སྨན་ཨ་རུ་ར་ལ་ནད་རིགས་བཞི་བརྒྱ་རྩ་བཞི་སེལ་བའི་ནུས་པ་ཡོད་པར་བཞེད་ཅིང་། སྨན་སྡེབ་སྦྱོར་བྱེད་པའི་སྐབས་སུ། ཨ་རུ་ར་ནད་དང་བསྟུན་ནས་སྨན་གཞན་གྱིས་ཁ་ཚར་འཕངས་ཏེ་གཏོང་དགོས་པ་བཞིན། ཁྲིད་ཡིག་སངས་རྒྱས་ལག་སྟེར་འདི་སྨན་ཨ་རུ་ར་འདྲ་བར། དེ་ལ་བླ་མའི་མན་ངག་གིས་ཟུར་བརྒྱན་ཏེ་སློབ་མ་ལ་བཤད་དགོས་པ་རེད་མ་གཏོགས། གདམས་ངག་གཅིག་གིས་ཡོངས་རྫོགས་སངས་རྒྱས་པར་འགྱུར་དཀའ་བ་ཡིན།^p255
ཁྱད་མཚར་བའི་ནུས་པ།^p256
ཚེས་༡༩ཉིན་ཆོས་རྗེ་ཉིད་དགོན་པའི་ཉེ་འགྲམ་གྱི་ལྗང་མདོག་གི་སྤང་ཐང་དུ་བག་ཡངས་ངང་བཞུགས་སྐབས། གློ་བུར་དུ་སྐྲ་ཁམ་པ་དང་མིག་སེར་པོ་ཅན་གྱི་མེ་གླིང་བྱང་མའི་ལྟ་སྐོར་པ་མི་གྲངས་སུམ་ཅུ་ལྷག་དང་། ཡང་ཕྱོགས་གཞན་ཞིག་ནས་སྐྲ་སེར་པོ་དང་མིག་སྔོན་པོ་ཅན་གྱི་མེ་གླིང་ལྷོ་མའི་ལྟ་སྐོར་པ་མི་གྲངས་བདུན་ཅུ་ཙམ་དུས་བཏབ་པ་བཞིན་ཆོས་རྗེ་ཉིད་ཀྱི་སྐུ་དྲུང་ལ་མཉམ་གཅིག་ཏུ་ལྷགས་ཏེ། དགའ་བའི་རྣམ་འགྱུར་དང་བཅས་ཡུལ་ཁམས་གང་ནས་ཕེབས་པ་ཡིན་སོགས་ཀྱི་བཀའ་འདྲི་ཞུས་པ་ལ། རྗེ་ཉིད་ཀྱི་ཞལ་ནས། དེ་རིང་མེ་གླིང་བྱང་མ་ནས་འོངས་པའི་སྐྲ་ཁམ་པ་ཅན་དང་། མེ་གླིང་ལྷོ་མ་ནས་འོངས་པའི་སྐྲ་སེར་པོ་ཅན་དང་། ཤར་ཕྱོགས་ཨེ་ཤ་ཡའི་གླིང་ནས་འོངས་པའི་སྐྲ་ནག་པོ་ཅན་བཅས་དུས་གཅིག་ཏུ་འཛོམས་པ་རྟེན་འབྲེལ་ཤིན་ཏུ་ལེགས་གསུངས་ནས། མི་ཚེའི་རིན་ཐང་སོགས་ལས་འཕྲོས་པའི་གསུང་མོལ་གནང་བ་ན། ཁོང་ཚོ་ཆོས་རྗེ་མཆོག་ལ་ཤིན་ཏུ་དད་པར་གྱུར་ཅིང་། དེར་འཁོད་ཕྱི་རྒྱལ་བ་མི་བརྒྱ་ལྷག་ཙམ་ཡོད་པ་ཚང་མས་དུས་ཐོག་གཅིག་ཏུ་སྐྱབས་འགྲོའི་སྡོམ་པ་མནོས་ཏེ་ནང་པ་སངས་རྒྱས་པའི་ཆོས་སྒོར་ཞུགས་སོ། །^p257
ཉིན་དེའི་དགོང་མོར། གླིང་དེའི་ལྷོ་ཕྱོགས་ཀྱི་ས་ཆ་ཞིག་ཏུ་མེ་རི་འཕྱུར་ཏེ་མི་རྣམས་འཇིགས་སྣང་ཆེན་པོའི་ངང་ཉེན་ཁའི་རླུབས་སུ་ཚུད་པའི་གནས་ཚུལ་རྣམས་ཆོས་རྗེའི་སྙན་ལ་ཞུས་ཚེ། ཁོང་གི་ཞལ་ནས། ལོ་ངོ་སྟོང་ཕྲག་གཅིག་ལྷག་གི་ཡར་སྔོན་དུ། བོད་ཁམས་ཡུལ་དབུས་ཀྱི་ཆར་གཏོགས་བསམ་ཡས་ཧས་པོ་རི་ལ་མེ་ཤོར་བའི་སྐབས། སྣ་ནམ་རྡོ་རྗེ་བདུད་འཇོམས་ཀྱིས་རྫུ་འཕྲུལ་དྲག་པོའི་མཐུས་མེ་དཔུང་འཕྲལ་དུ་ཞི་བར་བྱས་པའི་གཏམ་རྒྱུད་དེ་ད་ལྟའི་བར་ཡོངས་སུ་གྲགས་པས། ཁོ་བོ་རྡོ་རྗེ་བདུད་འཇོམས་དངོས་ཀྱི་སྤྲུལ་པ་ཡིན་མིན་ལ་མ་ལྟོས་པར་ཁོང་གི་མཚན་ཙམ་ལྡན་པའི་རྟེན་འབྲེལ་དང་ནུས་མཐུ་ལ་བརྟེན་ནས། མེ་རི་འཕྱུར་བའི་འཇིགས་པ་དེ་ཉིད་འཕྲལ་དུ་ཞི་བར་གྱུར་ཅིག ཅེས་ཐུགས་དམ་ལ་བཞུགས་ནས་ཕྱག་ཏུ་རྡོ་རྗེ་ཕུར་པ་བསྣམས་ཤིང་བསྙེན་པ་བཟླས་པས། ཡུན་རིང་མ་འགོར་བར་མེ་རི་འཕྱུར་མཚམས་ཆད་སོང་། ཕྱི་ཉིན། རྟག་ཏུ་མེ་རི་འཕྱུར་བའི་གྲོང་ཁྱེར་དེའི་ས་གཤིས་རིག་པའི་ཆེད་མཁས་པ་རྣམས་ཆེད་དུ་ཆོས་རྗེ་ཉིད་མཇལ་དུ་ཐོན་ཞིང་། ཁོང་ཚོས་ཆོས་རྗེ་ཉིད་ལ་བོད་བརྒྱུད་ནང་བསྟན་གྱི་ཕན་ནུས་དང་ཁྱེད་ཀྱི་བྱིན་རླབས་ནི་ངོ་མཚར་ཞིང་རྨད་དུ་བྱུང་བ་ཞིག་རེད་ཅེས་བསམ་པ་རྣམ་དག་གིས་བཀའ་དྲིན་ཞུས་པ་མ་ཟད། དོན་དེ་ས་གནས་དེའི་གསར་འགྱུར་ཁག་ཏུའང་བཀོད་འདུག་ཅེས་བདག་ལ་བླ་མ་བློ་བཟང་དོན་ལྡན་གྱིས་གསུངས་བྱུང་།^p258
རྟོགས་པ་བརྙེས་པའི་རྣམ་པ་གཞན་ཞིག^p259
ཐེངས་ཤིག་ཆོས་རྗེ་ཉིད་ཀྱིས་བདག་ལ་གསུངས་དོན། ད་ལན་ངེད་ཅག་ནུབ་ཕྱོགས་སུ་འགྲོ་བ་ནི་སྔོན་དང་ཅུང་ཟད་མི་འདྲ་སྟེ། དེ་སྔོན་བདག་བོད་ཡུལ་དང་རྒྱ་གར། བལ་པོ། འབྲུག་ཡུལ་སོགས་གནས་གྲགས་ཅན་རྣམས་སུ་འགྲོ་དུས། གཏེར་ཆོས་འགའ་རེ་འབྲི་རྒྱུ་ཡོད་ལ། རྒྱ་གར་དང་རྒྱ་ནག་རི་བོ་རྩེ་ལྔ་རྣམས་སུ་འགྲོ་དུས་ཀྱང་། དག་སྣང་དང་ཉམས་ཆོས་ཀྱི་སྐོར་འབབ་རྒྱུ་ཡོད། འོན་ཀྱང་ནུབ་ཕྱོགས་ཀྱི་རྒྱལ་ཁབ་ཕལ་ཆེ་བར་ལོ་བརྒྱ་ཕྲག་འགའ་རེའི་ལོ་རྒྱུས་ལས་མེད་ཅིང་། སངས་རྒྱས་བཅོམ་ལྡན་འདས་དང་གུ་རུ་རིན་པོ་ཆེ་སོགས་བྱོན་མ་མྱོང་བས་གཏེར་ལེན་རྒྱུ་མེད་ཤས་ཆེ། དེ་ལས་ཀྱང་ནུབ་ཕྱོགས་ཀྱི་མི་འདི་རྣམས་ནི་རྟོག་གེ་བ་དང་དངོས་ཡོད་རིང་ལུགས་པ་ཡིན་པས། འཇིག་རྟེན་ལས་འདས་པའི་ཆོས་དང་དུ་ལེན་པའི་ངེས་པའང་མེད། དེས་ན་ད་རེས་བདག་གིས་དབང་དང་ཆོས་ཁྲིད་འཆད་རྒྱུ་གཙོ་བོ་ཡིན་པས། ཁྱེད་རང་གིས་དེ་དག་ལ་མཁོ་ཆས་ཙམ་མ་གཏོགས་གཞན་སྒྲ་ཕབ་དང་ཟིན་ཐོ་སོགས་གྲ་སྒྲིག་བྱ་མི་དགོས་ཞེས་གསུངས།^p260
རྗེས་སུ། ཆོས་རྗེ་ཉིད་ཀྱིས་གསུངས་པ་བཞིན། ཐེངས་འདིར་ཕྱི་རྒྱལ་དུ་ཕེབས་བཞུགས་མཛད་པའི་རིང་ལ་དབང་དང་གདམས་ངག་ཁྲིད་པ་ཙམ་མ་གཏོགས། གྲུབ་རྟགས་འགྱེད་པ་དང་ཟབ་པ་ས་གཏེར་དང་རྒྱས་པ་དགོངས་གཏེར་སོགས་བཞེས་པ་ནི་སྐབས་དེར་སྔ་མ་བཞིན་དུ་མཐོང་ཐོས་སུ་ཆེར་མ་གྱུར། ཁོང་ཉིད་བོད་བརྒྱུད་ནང་བསྟན་གྱི་ཆོས་པའམ་ཤེས་ཡོན་པ་རང་ག་བ་ཞིག་གི་རྟེན་གྱིས་ནུབ་ཕྱོགས་པའི་མི་རྣམས་ལ་འབྲེལ་བ་བཞག^p261
དེ་ལྟ་ནའང་། གྲུབ་པ་བརྙེས་པའི་སྐྱེས་བུ་དམ་པ་ནི་སྨོན་ལམ་དང་ཐུགས་བསྐྱེད་ཁྱད་པར་བའི་བདག་ཉིད་ཅན་ཡིན་པས། ཁོང་གི་སྐུ་མཇལ་བ་དང་གསུང་ཐོས་པའི་ནུབ་ཕྱོགས་པ་ཕལ་མོ་ཆེའི་སེམས་ལ་འགྱུར་བ་གཏིང་ནས་བྱུང་སྟེ་ནང་ཆོས་ལ་དད་པར་གྱུར་ཅིང་། བླ་མ་ལ་ཆེས་དགའ་པོ་བྱེད་ཀྱིན་འདུག དེ་བཞིན། ནང་དུ་ཉམས་རྟོགས་ལྡན་པའི་དམ་པ་ནི། ལྟར་སྣང་ལ་ཆེས་སྤྱིར་བཏང་གི་སྤྱོད་པ་དང་སྐད་ཆ་ཕལ་བ་ཞིག་ཡིན་རུང་། སློབ་ཚོགས་རྣམས་ཀྱི་སེམས་ཁམས་ལ་འགྱུར་བ་སོང་ནས་ཕན་པ་ཆེན་པོ་འབྱུང་བ་ནི་ང་ཚོའི་བསམ་ཡུལ་ལས་འདས་པ་ཞིག་ཡིན་པར་སྣང་།^p263
ང་དང་གནས་ཆུང་ཆོས་སྐྱོང་།^p264
གནས་ཆུང་དགོན་པ་རུ་བཞུགས་དུས། དགོན་པའི་ཕྱོགས་ནས་རེ་བསྐུལ་ཞུས་པ་ལྟར་ཆོས་རྗེ་ཉིད་ཀྱིས་གནས་ཆུང་གི་གསོལ་འདེབས་བསྡུས་པ་ཞིག་མཛད་པ་འདི་ལྟར།^p265
མེ་ལོང་ཡེ་ཤེས་རང་མདངས་དྲེགས་པའི་རྗེ། །^p266
གནས་ཆུང་རྒྱལ་པོ་འཁོར་དང་ཡང་འཁོར་བཅས། །^p267
གསོལ་ལོ་མཆོད་དོ་དགྱེས་པ་བསྐང་གྱུར་ཅིག །^p268
གང་བཅོལ་འཕྲིན་ལས་ཐོགས་མེད་མྱུར་འགྲུབ་མཛོད། །^p269
ཅེས་མཚོ་དབུས་གླིང་ཕྲན་ཉམས་དགར་འཁོད་པའི་གནས་ཆུང་བླ་མ་བློ་བཟང་དོན་ལྡན་གཙོས་ཆོས་ཚོགས་པ་རྣམས་ཀྱི་བཞེད་སྐོང་དུ་ངག་དབང་བློ་གྲོས་མཚུངས་མེད་པས་སྤེལ་བ་དགེའོ། །^p270
ཕྱི་ལོ་༡༩༩༣ལོའི་ཟླ་༦པའི་ཚེས་༡༩ལའོ། །^p271
སྐབས་དེར་བདག་གིས་ཡི་གེ་པ་བྱས་ནས་བྲིས་པའི་གསོལ་འདེབས་འདི་ནི། ད་ལྟའི་བར་དུ་གནས་ཆུང་དགོན་པའི་མགོན་ཁང་དུ་བཞག་འདུག^p273
ཕྱི་ཟླ་༦པའི་ཚེས་༢༠ཡི་སྔ་དྲོར། ཆོས་རྗེ་ཉིད་ཀྱིས་གཏེར་ཆེན་ལས་རབ་གླིང་པས་མཛད་པའི་རྟེན་འབྲེལ་ཉེས་སེལ་གྱི་དབང་བསྡུས་པ་ཞིག་གནང་ཞིང་། དབང་གི་ཐོག་མར། རྗེ་ཉིད་ཀྱིས་ཆོས་སྐྱོང་དང་འབྲེལ་བའི་གཏམ་གླེང་བ་འདི་ལྟར།^p274
མཚམས་འདི་ནས་གཏེར་ཆེན་ལས་རབ་གླིང་པའམ་ཡོངས་གྲགས་ལ་ཉག་བླ་བསོད་རྒྱལ་ཟེར་བའི་ལོ་རྒྱུས་ནང་གི་གནས་ཆུང་ཆོས་སྐྱོང་དང་འབྲེལ་བ་ཡོད་ཚུལ་སོགས་མདོར་བསྡུས་ཙམ་ཞིག་ཞུ།^p275
ཉག་བླ་བསོད་རྒྱལ་ཁོང་ནི། བོད་གངས་རིའི་ལྗོངས་ཀྱི་སྔགས་པ་ཕུར་ཐོགས་ཡོངས་ཀྱི་གཙོ་བོ་སྔགས་པ་རྡོ་རྗེ་བདུད་འཇོམས་ཀྱི་སྐུའི་སྤྲུལ་པ་དང་། མཁའ་འགྲོ་རྡོ་རྗེ་ཕག་མོའི་གསུང་གི་སྤྲུལ་པ། རྒྱལ་དབང་མཚོ་སྐྱེས་རྡོ་རྗེའི་ཐུགས་ཀྱི་སྤྲུལ་པ་སྟེ། ནམ་མཁའ་ལ་བྱ་ལྟར་དུ་འཕུར་བ་དང་། ཆུ་ལ་ཉ་ལྟར་དུ་འགྲོ་ཐུབ་པ་དང་། རི་བྲག་ལ་ཟང་ཐལ་དུ་འགྲོ་ནུས་པ་དང་། གཞན་སེམས་ཤེས་པའི་མངོན་ཤེས་ཐོགས་པ་མེད་པ་དང་། བོད་གངས་རིའི་ལྗོངས་ཀྱི་རྒུད་པ་མཐའ་དག་སེལ་བར་བྱེད་པའི་ནུས་མཐུ་མཆོག་དང་ལྡན་པའི་གཏེར་སྟོན་བསམ་གྱིས་མི་ཁྱབ་པ་ཞིག་ཡིན། གཞན་ཡང་གངས་ལྗོངས་མཁས་གྲུབ་ཡོངས་ཀྱི་བླ་མར་གྱུར་པ་དང་། ཁྱད་པར་དུ་རྒྱལ་དབང་སྐུ་ཕྲེང་བཅུ་གསུམ་པ་རྒྱལ་བ་ཐུབ་བསྟན་རྒྱ་མཚོའི་ཐུན་མོང་མ་ཡིན་པའི་བླ་མ་དང་། གནས་ཆུང་རྡོ་རྗེ་གྲགས་ལྡན་དང་དུས་རྒྱུན་དུ་མི་དང་མི་ལབ་པ་བཞིན་དུ་ཕན་ཚུན་གཏམ་སྨྲ་བ་དང་། ཕན་ཚུན་གཅིག་གིས་གཅིག་ལ་ལུང་བསྟན་དང་བླང་དོར་གྱི་བསླབ་བྱ་ཡང་སྟོན་རེས་བྱེད་ནུས་པའི་བླ་མ་ཞིག་ཡིན།^p276
ཁོང་ནི་གནས་ཆུང་རྡོ་རྗེ་གྲགས་ལྡན་དང་ཧ་ཅང་འབྲེལ་བ་ཆེན་པོ་རེད། དེའི་རྒྱུ་མཚན་མདོར་བསྡུས་ཙམ་ཞིག་བཤད་ན། ན་ནིང་གཞེས་ནིང་ང་རང་དྷ་ས་རུ་ཐོན་པའི་སྐབས་སུ་གནས་ཆུང་གི་ལྷ་པ་དེ་ངའི་དྲུང་དུ་ཐོན་འདུག བདག་གིས་སྔོན་ཆད་གཏེར་སྟོན་བསོད་རྒྱལ་དང་གནས་ཆུང་རྡོ་རྗེ་གྲགས་ལྡན་གཉིས་ལ་དམ་ཚིག་གི་འབྲེལ་བ་ཆེན་པོ་ཡོད་ཚུལ་བཤད་མ་ཐག་ཏུ། ལྷ་པ་ཁོང་ལ་གནས་ཆུང་རྡོ་རྗེ་གྲགས་ལྡན་བབས་པས་ལམ་སང་སྔོན་གནས་རྗེས་སུ་དྲན་ཏེ་མིག་ནས་མཆི་མ་ཕྱུང་། ལུས་ལ་འདར་ཡོམ་བྱས་ཏེ་དགའ་གུས་རྣམ་འགྱུར་མང་པོ་གནང་བ་ཀུན་ལ་མཐུན་སྣང་དུ་གྱུར། དེ་ནས་གནས་ཆུང་རྡོ་རྗེ་གྲགས་ལྡན་འདི་ནི་སྔོན་ཆད་ཉག་བླ་བསོད་རྒྱལ་དང་། ད་ལྟ་ང་ལ་ཡང་ཐོག་མཐའ་བར་གསུམ་ཀུན་ཏུ་བཀའ་དྲིན་ཧ་ཅང་ཆེ་བའི་ཆོས་སྐྱོང་ཞིག་ཡིན་ཏེ། སྔོན་ཉག་བླ་བསོད་རྒྱལ་ཁོང་ཕར་ལྟར་སྣང་ལ་རྙིང་མའི་བླ་མ་སྔགས་རྒན་ཞིག་ཡིན། ཁམས་ཕྱོགས་ན་ཁོང་ལ་རྩི་མཐོང་ཆེན་པོ་ཡོད་ཀྱང་། དབུས་གཙང་ཕྱོགས་སུ་སྐད་གྲགས་མི་ཆེ་བའི་བླ་རྒན་རང་ག་བ་ཞིག་རེད། ཁོང་དབུས་ཀྱི་ལྷ་སའི་ཁྲོམ་ཚོགས་ནང་ལ་ཐོན་དུས། གནས་ཆུང་རྡོ་རྗེ་གྲགས་ལྡན་གློ་བུར་དུ་ཐོག་བབས་བྱས་ནས་ཕྱག་གིས་དར་ཁ་བསྣམས་ནས། ད་ལྟ་བོད་ཡུལ་དུ་ཨོ་རྒྱན་རིན་པོ་ཆེ་དངོས་སུ་བྱོན་འདུག་ཅེས་ཉག་བླ་བསོད་རྒྱལ་ལ་མི་མང་པོའི་ཁྲོད་དུ་མཇལ་དར་ཕུལ་ཞིང་ཕྱག་བཙལ། གུས་འདུད་ཞུས་པ་རེད། དེའི་དབང་གིས་བོད་ཡུལ་གྱི་མི་ཚང་མས་ཀྱང་རྩི་བཀུར་རྒྱ་ཆེར་ཐོབ། དེ་ནས་བཟུང་སྟེ་རྒྱལ་བ་ཐུབ་བསྟན་རྒྱ་མཚོ་ལའང་ཁོས་མཚམས་སྦྱོར་གྱི་སྐད་ཆ་མང་པོ་གླེང་མཐར་བླ་སློབ་ཉིད་དུ་གྱུར་ནས། ཉག་བླ་བསོད་རྒྱལ་གྱི་འཕྲིན་ལས་རྒྱ་ཆེན་པོ་རྒྱས་པར་བྱེད་པའི་སྣ་འདྲེན་པ་པོ་ཡང་གནས་ཆུང་རྡོ་རྗེ་གྲགས་ལྡན་རེད།^p277
དེ་བཞིན་ང་རང་ཡང་དྷ་ས་ལ་ཐོན་ནས་ཕུར་བ་མགུལ་ཁུག་མའི་དབང་སྐུར་བའི་དུས་སུ། གནས་ཆུང་རྡོ་རྗེ་གྲགས་ལྡན་གློ་བུར་དུ་ཐོག་བབས་བྱས་ཏེ། ང་ལ་དད་པའི་ཕྱག་འཚལ་བ་སྔོན་དུ་སོང་བའི་སྒོ་ནས་སྐུ་གསུང་ཐུགས་རྟེན་ཕུལ་ཞིང་འདས་མ་འོངས་ཀྱི་ལུང་བསྟན་དང་། ཆེ་བརྗོད་ཀྱང་མང་དུ་གནང་། དེ་ལྟར་བྱས་པའི་སྟོབས་ཀྱིས་དེ་ན་གནས་པའི་བོད་མི་ཚང་མས་ང་ལའང་གུས་བཀུར་དམིགས་བསལ་བ་ཞིག་ཐོབ། ངས་བྱ་བ་གང་བརྩམས་ཐམས་ཅད་ལ་བར་ཆད་མི་འབྱུང་བའི་འཕྲིན་ལས་རྒྱ་ཆེར་དར་བའི་བྱེད་པོ་ཉིད་མཛད་པ་ཡིན། ད་ལྟ་བསམ་བློ་བཏང་ན་ཡང་གནས་ཆུང་རྡོ་རྗེ་གྲགས་ལྡན་ནི་ང་ལ་བཀའ་དྲིན་ཧ་ཅང་ཆེན་པོ་ཡིན།^p278
སྤྱིར་ང་བོད་ལུང་པ་ན་ཡོད་དུས། ངའི་བསམ་པ་ལ་ཨ་རིའི་ཡུལ་ཁམས་ན་གནས་ཆུང་གི་ཆོས་ཚོགས་ཤིག་ཡོད་པར་གྲགས་པས། དེ་ལ་ང་རང་ཐོན་ཐུབ་ན་ཧ་ཅང་ཡག་པོ་རེད། ཡིན་ནའང་གྲ་སྒྲིག་ནང་ལ་མེད་པས་ད་རེས་ཐོན་ཐུབ་རྒྱུ་མ་རེད་སྙམ། རྗེས་སུ་ཞི་བདེ་རྒྱ་མཚོའི་དབུས་སུ་ཡོད་པའི་ཧཱ་ཝ་ཡེ་ཟེར་བའི་གླིང་ཕྲན་ཞིག་ཏུ་གནས་པའི་གནས་ཆུང་རྡོ་རྗེ་གྲགས་ལྡན་གྱི་ཆོས་ཚོགས་ཡོད་པ་ལ་ཡང་འགྲོ་རྒྱུའི་གཏན་འཁེལ་བྱས་ཡོད་ཟེར། དེའི་སྐབས་ན་ང་ལ་དགའ་ཚོར་ཧ་ཅང་ཆེན་པོ་བྱུང་།^p280
དེ་ཡང་སྤྱིར་ཆོས་སྐྱོང་ལ་ཡེ་ཤེས་པ་དང་འཇིག་རྟེན་པ་གཉིས་ཡོད། འཇིག་རྟེན་པ་ནི་འུ་ཅག་མི་ཕལ་བ་ལྟ་བུའི་ལས་དང་ཉོན་མོངས་པའི་རང་བཞིན་ཅན་ཡིན། གནས་ཆུང་རྡོ་རྗེ་གྲགས་ལྡན་ནི་ཨོ་རྒྱན་རིན་པོ་ཆེའི་ཐུགས་རྗེའི་རྩལ་ལས་ཤར་བའི་རྒྱལ་ཆེན་སྐུ་ལྔའི་ནང་གི་འཕྲིན་ལས་ཀྱི་རྒྱལ་པོ་ཆེན་པོ་སྟེ་ཡེ་ཤེས་པའི་ལྷ་མངོན་སུམ་པ་ཞིག་ཡིན། ཨོ་རྒྱན་རིན་པོ་ཆེས་ཆོས་སྐྱོང་སྲུང་མ་ཡོངས་རྫོགས་ཀྱི་ནང་ནས་གནས་ཆུང་རྡོ་རྗེ་གྲགས་ལྡན་ཁོང་བོད་ཀྱི་སངས་རྒྱས་ཀྱི་བསྟན་པ་ཡོངས་སུ་སྲུང་བ་པོ་དང་། སེམས་ཅན་ལ་བདེ་སྐྱིད་སྟེར་བ་པོ་གཙོ་བོ་ཉིད་དུ་མངའ་གསོལ་ཡོད། གང་ཟག་སུ་ཞིག་གིས་གནས་ཆུང་རྡོ་རྗེ་གྲགས་ལྡན་འདི་དུས་རྒྱུན་དུ་སྐྱབས་སུ་འཛིན་པའམ་བསྟེན་པར་བྱས་ན། མི་འདོད་པ་དང་ཉེར་འཚེ་ཐམས་ཅད་ཞི་བར་འགྱུར་བ་ཡིན། དེས་ན་ཁྱེད་རྣམ་པའི་ཆོས་ཚོགས་འདི་ནི་ཡུལ་འདིའི་བསྟན་པ་ཡོངས་རྫོགས་ཀྱི་སྲོག་ཤིང་ལྟ་བུར་གྱུར་ཡོད། རྗེས་སུ་ཆོས་ཚོགས་འདི་བརྟན་མོ་དང་བརླིང་མོ་ཡོང་བར་བརྩོན་དགོས། ཁྱད་པར་དུ་གནས་ཆུང་རྡོ་རྗེ་གྲགས་ལྡན་ལ་མཆོད་པ་དང་བསྟོད་པ་ལ་སོགས་པ་བྱ་རྒྱུ་ནི་ཅི་ནས་ཀྱང་གལ་ཆེ་བ་ཡིན།^p281
ང་རང་ནུབ་ཕྱོགས་ཀྱི་རྒྱལ་ཁབ་གང་ལ་ཡང་མ་ཐོན་པའི་སྔོན་དུ། གནས་ཆུང་ཆོས་ཚོགས་འདིར་ད་ལྟའི་ཆོས་ཁྲིད་བཤད་རྒྱུ་འདི་ཡང་ཧ་ཅང་སྐལ་བ་བཟང་པོ་བྱུང་། ད་ཕྱིན་ཆད་བདག་གིས་བྱ་བ་གང་བརྩམས་ཐམས་ཅད་ལ་བར་ཆད་དང་ཉེར་འཚེ་གང་ཡང་འབྱུང་རྒྱུ་མ་རེད་སྙམ་པའི་ཡིད་ཆེས་དང་དགའ་སྤྲོ་ཆེན་པོ་ཞིག་ཡོད།^p282
གཞན་ཡང་དེང་ཕྱིན་ཆད་ཁྱེད་རྣམ་པ་ཚང་མས་ཨོ་རྒྱན་རིན་པོ་ཆེ་ལ་གསོལ་འདེབས་དང་ཨོ་རྒྱན་རིན་པོ་ཆེའི་བསྐྱེད་རིམ་དང་རྫོགས་རིམ་སོགས་བསྒོམ་པ་ལ་རྟག་ཏུ་འབད་དགོས། འབད་དགོས་པའི་རྒྱུ་མཚན་ཡང་། སྤྱིར་ཨོ་རྒྱན་རིན་པོ་ཆེ་འདི་སངས་རྒྱས་ཐམས་ཅད་ཀྱི་འཕྲིན་ལས་ཀྱི་བྱེད་པོ་ཡིན་པས། དེ་ལ་གསོལ་བ་བཏབ་ན་སངས་རྒྱས་གཞན་ལས་ཐུགས་རྗེ་དང་འཕྲིན་ལས་མྱུར་བ་ཡིན། ཁྱད་པར་དུ་ས་གནས་འདི་ལ་དཔེ་མཚོན་ན། འདིར་བཞུགས་ཀྱི་འུ་ཅག་ཚང་མ་སྐྱབས་སུ་འགྲོ་ས་ནི་ཨོ་རྒྱན་རིན་པོ་ཆེ་རེད། ཆོས་སྐྱོང་གནས་ཆུང་རྡོ་རྗེ་གྲགས་ལྡན་ཁོང་གི་སྐྱབས་གནས་མཐར་ཐུག་ནི་བླ་མ་ཨོ་རྒྱན་རིན་པོ་ཆེ་ཁོ་ན་ཡིན་པས་ན། ལྷ་དང་མི་གཉིས་ཀ་བསམ་པ་མཐུན་པའི་སྒོ་ནས་བླ་མ་གཅིག་ལ་གསོལ་བ་བཏབ་ན་དངོས་གྲུབ་ཀྱང་ལྷག་པར་འབྱུང་བ་ཡིན། ངས་གོང་དུ་བཤད་པ་བཞིན་གནས་ཆུང་རྡོ་རྗེ་གྲགས་ལྡན་སྲུང་མ་རྣམས་ཀྱི་གཙོ་བོ་ཉིད་དུ་ཐོག་མར་འཇོག་མཁན་ཡང་ཨོ་རྒྱན་རིན་པོ་ཆེ་ཡིན་ཞིང་། དེར་མ་ཟད་གནས་ཆུང་རྡོ་རྗེ་གྲགས་ལྡན་གྱི་གསོལ་ཁ་མང་པོ་ཞིག་གི་གོང་ནོན་དུ་རང་ཉིད་ཨོ་རྒྱན་རིན་པོ་ཆེར་གསལ་བཏབ་ཡོད། དེ་སྔོན་རྒྱ་གར་ལ་འགྲོ་དུས་བདག་ལ་གནས་ཆུང་རྡོ་རྗེ་གྲགས་ལྡན་གྱིས། ཁོ་བོས་ནི་སྔར་ཡང་ཨོ་རྒྱན་རིན་པོ་ཆེའི་བཀའི་ཐ་ཚིག་ལས་འདའ་མ་མྱོང་ལ། ད་ལྟ་ཡང་མི་འདའ། ཕྱིས་སུ་ཡང་འདའ་བར་མི་འགྱུར། ཁྱོད་ཀྱིས་ཀྱང་ནི་ཨོ་རྒྱན་རིན་པོ་ཆེའི་འཕྲིན་ལས་ཀྱི་གཙོས་བསྟན་པ་རྒྱ་ཆེན་པོ་སྤེལ་བར་གྱིས་ཞེས་ང་ལ་སྐུལ་མ་མཛད། དེ་དག་ཡིག་ཐོག་ན་ཡོད་པ་ནི་ད་ལྟ་ཁྱེད་རྣམས་ལ་བསྟར་ཡོད་པ་དེ་རེད།^p283
འཇམ་དཔལ་གྱི་བླ་རྣམ།^p284
ཕྱི་དྲོར་མུ་མཐུད་དུ་ཁྲིད་ཡིག་སངས་རྒྱས་ལག་སྟེར་གྱི་བླ་རྣམ་ནས་རྫོགས་རིམ་བར་དུ་གསུངས་ཤིང་། རྫོགས་ཆེན་གྱི་སྐོར་རྣམས་ལུང་གསུངས་པ་ཙམ་གྱིས་འཐུས་པར་བྱས་ལ། བླ་རྣམ་གྱི་སྐབས་སུ་འདི་སྐད་དུ།^p285
ཁ་ཅིག་གིས་བླ་མ་མི་ངོ་མ་ཞིག་ཏུ་མཐོང་ཞིང་། རེག་ན་ཡང་ཤ་ཁྲག་གིས་གྲུབ་པ་ཞིག་ཡིན། ཁ་ཅིག་གིས་བལྟས་ན་བླ་མ་འཇམ་པའི་དབྱངས་ཉིད་དུ་མཐོང་ལ། རེག་ན་ཡང་འཇམ་པའི་དབྱངས་ཀྱི་སྐུའི་རེག་བྱ་མྱོང་ངེས། དོན་ལ་དེ་གཉིས་ལས་བླ་མ་གང་ཡིན་ཟེར་ན། འཇམ་དབྱངས་ཉིད་དུ་མཐོང་བ་དངོས་གནས་ཡིན་པ་རེད། དེའི་རྒྱུ་མཚན་མང་པོ་བཤད་རྒྱུ་ཡོད་ཀྱང་། དེ་རིང་འུ་ཅག་གིས་མང་པོ་བཤད་ན་དུས་ཚོད་ཀྱི་ཁོམ་ལོང་མེད་པས་དེ་ཙམ་གྱིས་ཆོག་པར་བྱ།^p286
བླ་མ་ནི་དོན་ལ་འཇམ་པའི་དབྱངས་སུ་སྣང་རྒྱུ་ཡིན་པས། རྣམ་པ་འཇམ་པའི་དབྱངས་ཉིད་དུ་བསྒོམ་དགོས་པའི་རྒྱུ་མཚན་ཡང་དེ་ཡིན། ངོ་བོ་རྩ་བའི་བླ་མ་ཡིན་པ་བསྒོམ་དགོས་པའི་རྒྱུ་མཚན་ནི། རྣམ་པ་དང་ངོ་བོ་གཉིས་ཀ་འཇམ་པའི་དབྱངས་ཉིད་དུ་བསྒོམས་བསྡད་ན་འཇམ་པའི་དབྱངས་ལ་འུ་ཅག་འབྲེལ་བ་ཅུང་ཟད་ཀྱང་ཡོད་པ་མ་རེད། སྔོན་ཆད་སྟོན་པ་ཐུགས་རྗེ་ཅན་རྒྱ་གར་ལ་བཞུགས་པའི་དུས་སུ་འཇམ་དཔལ་དབྱངས་ཀྱང་དེར་བཞུགས་པར་གསུངས་ཀྱང་། དོན་དངོས་སུ་ཁོང་ནི་རྒྱ་ནག་རི་བོ་རྩེ་ལྔ་ན་བཞུགས་པའི་བྱང་ཆུབ་སེམས་དཔའ་ཞིག་སྟེ། ད་ལྟ་འུ་ཅག་གི་ས་གནས་འདི་དང་འབྲེལ་བ་མེད་པའི་མི་ལྟ་བུ་ཞིག་རེད། དེ་ལ་གསོལ་བ་བཏབ་ནའང་བྱིན་རླབས་ཆེན་པོ་འབྱུང་མི་ཐུབ་པ་ཡིན། རྩ་བའི་བླ་མ་ནི་ས་གནས་འདི་ལ་དངོས་སུ་བྱོན་ཏེ་རང་ཉིད་ལ་དབང་བསྐུར་ཞིང་ཆོས་བཤད་པ་ཡིན་པས། དེ་ལ་གསོལ་བ་བཏབ་ན་བྱིན་རླབས་ལྷག་པར་འཇུག་པ་ཡིན་པས་ངོ་བོ་རྩ་བའི་བླ་མ་ཡིན་པར་བསྒོམ་དགོས་པ་ཡིན། དེས་ན་རང་གི་རྒྱུད་ལ་རྫོགས་པ་ཆེན་པོའི་དོན་སྔོན་ཆད་མ་སྐྱེས་པ་ཐམས་ཅད་སྐྱེ་བར་བྱེད་པ་ལ་བླ་མར་གསོལ་བ་བཏབ་ན་དེ་ལས་བཟང་བ་ཡོད་པ་མིན། སྔར་སྐྱེས་ཡོད་ན་ཉམས་དང་རྟོགས་པ་ཐམས་ཅད་ཡར་རྒྱས་ཤིང་ཇེ་བཟང་ལ་སོང་ནས། མྱུར་དུ་སངས་རྒྱས་ཀྱི་གོ་འཕང་འཐོབ་བྱེད་ལའང་བླ་མ་ལ་གསོལ་བ་འདེབས་པ་ལས་བཟང་བ་ཡོད་པ་མ་རེད། དེའི་ཕྱིར་བླ་མ་བསྒོམས་ནས་གསོལ་བ་འདེབས་དགོས་པ་ཡིན།^p287
སྒོམ་སྟངས་ནི་དྲིན་ཆེན་རྩ་བའི་བླ་མ་དེ་ཉིད་རང་གི་མདུན་གྱི་ནམ་མཁར་བསྒོམས་ནས། ད་ནས་བཟུང་སྟེ་ཁྱེད་མ་གཏོགས་སྐྱབས་གནས་གཞན་ཞིག་ནི་དངོས་སུ་ཅི་ལ་འཚོལ། ཐ་ན་མཚན་མོའི་རྨི་ལམ་གྱི་སྐབས་ན་ཡང་བླ་མ་ཁྱེད་ཁོ་ནར་གསོལ་བ་གདབ་རྒྱུ་ཡིན་བསམ་ནས་བླ་མ་ལ་དད་པ་འཇོག་དགོས་ཤིང་། ལུས་ལོངས་སྤྱོད་དུས་གསུམ་གྱི་དགེ་བ་ཐམས་ཅད་ཁྱེད་ལ་འབུལ་སྙམ་དུ་མཎྜལ་དབུལ་དགོས།^p289
ཚེ་རབས་ཐོག་མེད་ནས་བསགས་པའི་སྡིག་སྒྲིབ་ཉེས་ལྟུང་ཐམས་ཅད་བླ་མ་ཁྱེད་ལ་བཤད་ཅིང་བཤགས། ཕྱིན་ཆད་སྲོག་ལ་བབས་ཀྱང་མི་བྱེད་བསམ་རྒྱུ་ནི་སྡིག་པ་སྦྱོང་བའི་གཉེན་པོ་ཡིན། བླ་མ་ཁྱེད་ཁོ་ནར་གསོལ་བ་འདེབས་པ་ལགས་ན་བདག་ལ་དབང་བསྐུར་མན་ངག་གནང་ནས་རྒྱུད་སྨིན་ཅིང་གྲོལ་བར་མཛད་དུ་གསོལ་བསམ་དགོས། ངས་འོད་གསལ་རྫོགས་པ་ཆེན་པོའི་ལམ་དེ་བསྒོམ་ནས་རྩ་བའི་བླ་མ་ཁྱེད་འདྲ་བ་ཞིག་ཏུ་འགྱུར་བར་བྱིན་གྱིས་བརླབ་ཏུ་གསོལ་སྙམ་དུ་གསོལ་བ་འདེབས་དགོས་པ་ཡིན།^p290
གསོལ་འདེབས་ཀྱི་ཚིག་འདི་ནི་སངས་རྒྱས་ཀྱི་བཀའ་ཡིན་པས་བྱིན་རླབས་ལྷག་པར་ཆེ་བས། ཚིག་འདི་འདོན་པའི་སྐབས་སུ་དབྱིན་སྐད་སོགས་ལ་བསྒྱུར་ཏེ་འདོན་མི་རུང་བར། ཁོ་རང་གི་སྐད་སོར་བཞག་བྱས་ནས་འདོན་དགོས་པ་ཡིན།^p291
དེ་ནས་གསོལ་འདེབས་ནི།^p292
གཞོན་ནུའི་སྐུ་ལུས་འཆང་བ་པོ། །ཡེ་ཤེས་སྒྲོན་མེས་རབ་ཏུ་བརྒྱན། །^p293
འཇིག་རྟེན་གཏི་མུག་མུན་སེལ་བ། །འཇམ་པའི་དབྱངས་ལ་གསོལ་བ་འདེབས། །^p294
གཞོན་ནུའི་སྐུ་ལུས་འཆང་བ་པོ། །ཞེས་འཇམ་དཔལ་དབྱངས་དེ་ཅི་འདྲ་ཞིག་ཡིན་ན། ལོ་བཅུ་དྲུག་ལོན་པའི་ལང་ཚོ་དང་ལྡན་ཞིང་གཞོན་ནུའི་སྐུ་ལུས་འཆང་ཡོད་པ་ཞིག་ཡིན་པར་གསུངས། ཡེ་ཤེས་སྒྲོན་མེས་རབ་ཏུ་བརྒྱན། །ཞེས་སངས་རྒྱས་ཐམས་ཅད་ཀྱི་མཁྱེན་པའི་ཡེ་ཤེས་ལྷར་ཤར་བ་དེ་འཇམ་དཔལ་དབྱངས་ཡིན་པས། ཁྱེད་ལ་སངས་རྒྱས་ཐམས་ཅད་ཀྱི་ཡེ་ཤེས་ཀྱི་སྒྲོན་མེས་བརྒྱན་འདུག་པར་གསུངས་པ་ཡིན། འཇིག་རྟེན་གཏི་མུག་མུན་སེལ་བ། །ཞེས་དཔེར་ན་སྒྲོན་མེ་གསལ་ཡོང་དུས་མུན་པ་ཐམས་ཅད་སེལ་འགྲོ་བ་བཞིན་འཇམ་པའི་དབྱངས་ཀྱི་ཐུགས་རྗེས་འགྲོ་བ་ཐམས་ཅད་ཀྱི་རྒྱུད་ཀྱི་མ་རྟོགས་པ་དང་རྨོངས་པ་ཐམས་ཅད་སེལ་བར་བྱེད་ནུས་པར་གསུངས་ལ། དེ་ལྟ་བུའི་མགོན་པོ་འཇམ་པའི་དབྱངས་དེ་ལ་གསོལ་བ་འདེབས་ཤིང་། བདག་གི་རྒྱུད་བྱིན་གྱིས་བརླབ་ཏུ་གསོལ་བསམ་དགོས་པ་ཡིན།^p295
ཚིག་བཞི་འདི་བརྒྱ་སྟོང་ཁྲི་འབུམ་སོགས་ཀྱིས་རྩེ་གཅིག་ཏུ་གསོལ་བ་བཏབ་མཐར། བླ་མའི་སྤྱི་བོ་དང་། མགྲིན་པ། སྙིང་ཁ་གསུམ་ནས་འོད་ཟེར་དཀར་དམར་མཐིང་གསུམ་བྱུང་ནས། རང་གི་སྤྱི་བོ་དང་། མགྲིན་པ། སྙིང་ཁ་གསུམ་ལ་ཐིམ་ནས་ལུས་ངག་ཡིད་གསུམ་གྱི་སྡིག་སྒྲིབ་ཐམས་ཅད་དག་ཅིང་བླ་མའི་སྐུ་གསུང་ཐུགས་ཀྱི་ཡོན་ཏན་ཐོབ། མཐར་བླ་མ་ཡང་འོད་དུ་ཞུ་ནས་རང་ལ་ཐིམ་སོང་བར་བསམ་ཞིང་། རང་དང་བླ་མ་དབྱེར་མེད་དུ་གྱུར་པར་རྫོགས་པ་ཆེན་པོའི་ལྟ་བའི་ངང་ལ་རྩེ་གཅིག་ཏུ་ཀློད་ལ་འཇོག་དགོས། སླར་ཡང་རྣམ་རྟོག་སྐྱེ་ཡོང་དུས་སྣང་སྲིད་ཐམས་ཅད་བླ་མའི་སྐུ་ཡིན་པར་བསམ། སྒྲ་གྲགས་ཚད་ཐམས་ཅད་བླ་མའི་གསུང་ཡིན་པར་བསམ། དྲན་རྟོག་ཐམས་ཅད་བླ་མའི་ཐུགས་ཡིན་པར་བསམ་ནས་དག་སྣང་གི་ངང་ནས་དགེ་རྩ་སངས་རྒྱས་ཀྱི་གོ་འཕང་འཐོབ་པའི་ཕྱིར་དུ་བསྔོ་དགོས་པ་ཡིན།^p296
གུ་རུའི་བླ་རྣམ།^p297
དེ་ནས་བླ་མ་མི་ཕམ་གྱིས་མཛད་པའི་གུ་རུའི་བླ་རྣམ་གྱི་ལུང་གནང་ཞིང་། གུ་རུའི་བླ་རྣམ་སྒོམ་ཚུལ་བསྡུས་པ་ཞིག་འདི་སྐད་དུ།^p298
ཐོག་མར་རང་གི་ལུས་དེ་ལྷ་འདྲ་བ་ཞིག་ཏུ་བསྒོམ་མི་དགོས་པར། ད་ལྟའི་ལུས་ཅི་འདྲ་ཞིག་ཡིན་ན་དེ་འདྲ་ཞིག་བསྒོམ་ན་ཆོག་པས། ཐ་མལ་དུ་གནས་པའི་རང་གི་མདུན་གྱི་སྟེང་གི་ནམ་མཁའ་ན། ཨོ་རྒྱན་ཆེན་པོ་དང་པོ་འཁྲུངས་སའི་ཡན་ལག་བརྒྱད་ལྡན་གྱི་དྷ་ན་ཀོ་ཤའི་མཚོ་ཞིག་སྒོམས། མཚོ་དེའི་དབུས་ན་མེ་ཏོག་པདྨའི་སྡོང་པོ་འདབ་མ་སྟོང་དང་ལྡན་པ་ཞིག་སྒོམས། མེ་ཏོག་པདྨ་སྟོང་ལྡན་གྱི་དབུས་སུ་ཟླ་བའི་དཀྱིལ་འཁོར་གྱི་སྟེང་ན་ཨོ་རྒྱན་རིན་པོ་ཆེ་སྐུ་མདོག་དཀར་ལ་དམར་བའི་མདངས་ཆགས་པ། ཕྱག་གཡས་པར་རྡོ་རྗེ་དང་གཡོན་པས་ཐོད་བུམ་བསྣམས། སྐུ་ལ་དར་དང་རིན་པོ་ཆེའི་རྒྱན་གྱིས་བརྒྱན། ཡུམ་མཚོ་རྒྱལ་དཀར་མོས་ཕྱག་གཡས་ཀྱིས་གྲི་གུག་དང་གཡོན་པས་ཐོད་པ་བསྣམས་ནས་སྐུ་ལ་འཁྱུད་པ། སྐུ་ལ་རང་བྱུང་རྒྱུད་སྡེའི་དཀྱིལ་འཁོར་གྱི་ལྷ་ཚོགས་ཐམས་ཅད་བཀྲ་ལམ་མེར་གསལ་ཡོད་པ་ཞིག་སྒོམ་དགོས། རང་གིས་དེ་ལྟར་གསལ་བའི་མདུན་དུ་བདག་མཐོ་རུ་གཏོང་ངམ། དམའ་རུ་གཏོང་ངམ། སྐྱིད་སྡུག་ལེགས་ཉེས་ཅི་བྱུང་ཡང་ཨོ་རྒྱན་རིན་པོ་ཆེ་ཁྱེད་ཤེས་ཁྱེད་མཁྱེན། ཁྱེད་ཀྱིས་བདག་བྱིན་གྱིས་བརླབ་པར་མཛད་དུ་གསོལ་བསམ་ནས། དད་གུས་གདུང་ཤུགས་དྲག་པོའི་སྒོ་ནས་གསོལ་བ་འདེབས་དགོས།^p299
གུ་རུ་རིན་པོ་ཆེ་ལ་རང་གི་ལུས་གུས་པས་ཐལ་མོ་སྦྱར། ངག་གུས་པས་གསོལ་བ་བཏབ། ཡིད་གུས་པས་ཡོན་ཏན་དྲན་པའི་སྒོ་ནས་ཕྱག་འཚལ་ལོ་སྙམ་དུ་ཕྱག་འཚལ་བའི་ཡན་ལག དེ་ནས་རང་གི་གཅེས་པར་བཟུང་བའི་དངོས་པོ་གཙོ་བོ་རང་གི་ལུས་དང་ལོངས་སྤྱོད། དུས་གསུམ་དུ་བསགས་པའི་དགེ་བའི་རྩ་བ་ཐམས་ཅད་དང་ཡིད་དུ་འོང་བའི་དངོས་པོ་ཇི་སྙེད་ཡོད་པ་རྣམས་བློས་བླངས་ཏེ། ཨོ་རྒྱན་རིན་པོ་ཆེ་ཁྱེད་ལ་ཡར་འབུལ་བ་ཡིན་བསམ་པའི་མཆོད་པ་དབུལ་བའི་ཡན་ལག རང་གིས་ཚེ་རབས་ཐོག་མ་མེད་པ་ནས་ད་ལ་ཐུག་གི་བར་དུ་ཉོན་མོངས་པ་འདོད་ཆགས་དང་། ཞེ་སྡང་། གཏི་མུག་གི་དབང་གིས་སྡིག་པ་མི་དགེ་བ་བགྱིས་ཚད་ཐམས་ཅད་ཨོ་རྒྱན་རིན་པོ་ཆེ་ཁྱེད་ལ་ཡར་བཤགས། སྔར་བྱས་ཀྱི་སྡིག་པ་ལ་འགྱོད་ཅིང་ཕྱིན་ཆད་སྲོག་ལ་བབས་ཀྱང་མི་བགྱིད་ན། བདག་གི་སྡིག་ལྟུང་དག་པར་མཛད་དུ་གསོལ་བསམ་པ་སྡིག་པ་བཤག་པའི་ཡན་ལག གཞན་གྱི་དགེ་བ་སྟེ་ཕ་རོལ་པོ་གང་ཟག་མཆོག་དམན་རབ་འབྲིང་ཐམས་ཅད་ཀྱིས་དགེ་བ་སྒྲུབ་པ་ལ་ཕྲག་དོག་དང་ཟུག་རྔུ་མེད་པར་རྗེས་སུ་ཡི་རང་ཞིང་དགའ་བ་བསྒོམ་ན་རང་ལ་ཡང་དགེ་རྩ་དེ་མཉམ་དུ་འཐོབ་པར་མ་ཟད། དེའི་དགེ་རྩ་ལས་ཀྱང་ལྷག་པ་ཞིག་འཐོབ་པའི་ཕྱིར་ན། གཞན་མཆོག་དམན་རབ་འབྲིང་གི་དགེ་བ་ཐམས་ཅད་ལ་རང་གིས་དགའ་བས་རྗེས་སུ་ཡི་རང་ངོ་བསམ་པའི་རྗེས་སུ་ཡི་རང་བའི་ཡན་ལག དེ་ནས་ཨོ་རྒྱན་རིན་པོ་ཆེ་ནི་ནམ་མཁའ་སྟོང་པ་འདི་སྟོང་མ་སོང་གི་བར་དུ་རྡོ་རྗེའི་སྐུ་ལ་སྐྱེ་འཆི་ཡོད་པ་མིན་པས། དེ་ལ་ཆེད་དུ་བཞུགས་གསོལ་ཞུ་མི་དགོས་ཀྱང་། སེམས་ཅན་སོ་སོའི་བསམ་པ་བཞིན་དུ་ཁྱེད་ཀྱི་སྤྲུལ་པའི་སྐུ་ལ་སྐྱེ་འཆི་མེད་པར་བཞུགས་སུ་གསོལ་བ་འདེབས་པ་གསོལ་བ་འདེབས་པའི་ཡན་ལག སྤྲུལ་པ་དེའང་འཁོར་བ་མ་སྟོང་གི་བར་དུ་མྱ་ངན་ལས་མི་འདའ་བར་བཞུགས་ནས། སེམས་ཅན་ཐམས་ཅད་ལ་ཆོས་ཀྱི་འཁོར་ལོ་བསྐོར་དུ་གསོལ་བསམ་པ་ཆོས་འཁོར་བསྐོར་བར་བསྐུལ་བའི་ཡན་ལག་སྟེ། དེ་ལྟར་རང་གིས་དགེ་བ་བསགས་ཚད་ཀྱང་ཨོ་རྒྱན་རིན་པོ་ཆེ་ཁྱེད་ཀྱི་གོ་འཕང་འཐོབ་པའི་ཕྱིར་དུ་བསྔོ་བར་བགྱིའོ་བསམ་པ་བསྔོ་བའི་ཡན་ལག་བཅས་སྒོམ་དགོས།^p300
ཨོ་རྒྱན་རིན་པོ་ཆེ་ཁྱེད་ཀྱིས་བདག་གི་རྒྱུད་ཀྱི་ལུས་ངག་ཡིད་གསུམ་གྱི་སྡིག་སྒྲིབ་ཉེས་ལྟུང་ཐམས་ཅད་དག་པར་མཛད་པ་དང་། ཁྱེད་ཀྱི་སྐུ་གསུང་ཐུགས་ཀྱི་ཡོན་ཏན་ཐམས་ཅད་བདག་གི་རྒྱུད་ལ་འཕོས་ནས། བསྟན་པ་དང་སེམས་ཅན་གྱི་དོན་རྒྱ་ཆེན་པོ་འགྲུབ་པར་བྱིན་གྱིས་བརླབ་ཏུ་གསོལ་བསམ། དེ་ལྟར་གསོལ་བ་བཏབ་པས་བླ་མ་ཨོ་རྒྱན་རིན་པོ་ཆེའི་ཐུགས་ཀ་ནས་འོད་ཟེར་སྣ་ལྔ་བ་ཐག་བརྐྱངས་པ་འདྲ་བ་ཞིག་བྱུང་ནས་རང་གི་སྙིང་དབུས་སུ་ཐིམ། བླ་མའི་སྐུ་གསུང་ཐུགས་ཀྱི་ཡོན་ཏན་ཐམས་ཅད་རང་གི་རྒྱུད་ལ་འཕོས་པར་བསམ་ཞིང་། ཚིག་བདུན་གསོལ་འདེབས་དང་བཛྲ་གུ་རུ་ཅི་ནུས་འདོན་དགོས། དེ་དག་གི་དོན་བཀྲལ་ན་ནི་སངས་རྒྱས་ཀྱི་ཆོས་ཡོངས་སུ་རྫོགས་པ་དེའི་ནང་དུ་བསྡུས་ནས་བཤད་ཀྱང་འཆད་ཐུབ་རྒྱུ་རེད། དེ་ཡང་ཀུན་མཁྱེན་མི་ཕམ་རྒྱ་མཚོས་ཚིག་བདུན་གསོལ་འདེབས་ཀྱི་རྣམ་བཤད་དུ་རྒྱ་ཆེར་བཀྲལ་ཡོད་ཀྱང་ད་རེས་དེའི་ཚིག་དོན་མི་འགྲེལ། མདོར་ན་གཞན་གང་དང་མི་འདྲ་བའི་བྱིན་རླབས་ཅན་གྱི་ཆོས་ཤིག་ཡིན། དེའི་ཕྱིར་ན་ད་ལན་ངས་དེ་དག་གི་ལུང་ཞིག་འདོན།^p302
ཧཱུྃ༔ ཨོ་རྒྱན་ཡུལ་གྱི་ནུབ་བྱང་མཚམས༔^p303
པདྨ་གེ་སར་སྡོང་པོ་ལ༔^p304
ཡ་མཚན་མཆོག་གི་དངོས་གྲུབ་བརྙེས༔^p305
པདྨ་འབྱུང་གནས་ཞེས་སུ་གྲགས༔^p306
འཁོར་དུ་མཁའ་འགྲོ་མང་པོས་བསྐོར༔^p307
ཁྱེད་ཀྱི་རྗེས་སུ་བདག་སྒྲུབ་ཀྱིས༔^p308
བྱིན་གྱིས་བརླབ་ཕྱིར་གཤེགས་སུ་གསོལ༔^p309
གུ་རུ་པདྨ་སིདྡྷི་ཧཱུྃ༔^p310
ཨོཾ་ཨཱཿ ཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔^p311
ཁྱེད་རྣམ་པས་རྒྱུན་དུ་འདོན་པའི་དུས་ན། བཛྲ་གུ་རུ་དང་ཚིག་བདུན་གསོལ་འདེབས་ཅི་མང་བཟླས་བའི་རྗེས་སུ་བླ་མའི་དཔྲལ་བ་དང་མགྲིན་པ། སྙིང་ཁ་གསུམ་གྱི་འོད་ཟེར་དཀར་དམར་མཐིང་གསུམ་འཕྲོས་ནས་རང་གི་གནས་གསུམ་དུ་ཐིམ་པའི་སྟོབས་ཀྱིས། བླ་མའི་སྐུ་གསུང་ཐུགས་ཀྱི་བྱིན་རླབས་ཐམས་ཅད་རང་གི་རྒྱུད་ལ་ཞུགས་སོང་བར་བསམ། མཐར་བླ་མ་ཡང་འོད་དུ་ཞུ་ནས་འོད་ཟེར་ཐིག་ལེ་ཀོར་ཀོར་དཀར་ལ་དམར་མདངས་ཆགས་ཡོད་པ། དཀྱིལ་ན་ཡི་གེ་ཧཱུྃ་ཡིག་གིས་བརྒྱན་པ་ཞིག་རང་གི་སྙིང་དབུས་སུ་ཐིམ་པ་མ་ཟད། བླ་མའི་ཐུགས་དང་རང་སེམས་གཉིས་ཀ་དབྱེར་མེད་རོ་གཅིག་ཏུ་གྱུར་སོང་བར་བསམ་ཞིང་། ཨོ་རྒྱན་རིན་པོ་ཆེའི་ཐུགས་དང་དབྱེར་མེད་རོ་གཅིག་ཡིན་སྙམ་བཞིན་ཡེ་ནས་ཆོས་སྐུ་སྤང་བླང་བྲལ་བའི་ངང་དུ་རྩེ་གཅིག་ཏུ་མཉམ་པར་བཞག་ལ་ཨ་ཨ་ཞེས་གསུངས།^p312
དེ་རྗེས་གུ་རུའི་ཚོགས་བསྡུས་ཀྱི་ལུང་ཞིག་གནང་ནས་སླར་ཡང་འདི་སྐད་དུ།^p313
རེ་འགའ་རང་གི་བཟའ་བཏུང་ཅི་ཡོད་དཀོན་མཆོག་གི་རྟེན་དྲུང་དུ་བཤམས། ཡང་ན་ལོགས་སུ་མཆོད་པ་ཞིག་བཤམས་ན་ཡང་ཆོག ཨོ་རྒྱན་རིན་པོ་ཆེ་དང་རིག་འཛིན་མཁའ་འགྲོའི་ཚོགས་ཐམས་ཅད་ལ་ཡོངས་སུ་ཕུལ་ཞིང་། ཚོགས་མཆོད་འདི་བཏོན་ནས་ལྷ་ཚོགས་དེ་དག་གི་གསོལ་ལྷག་རང་གིས་དངོས་གྲུབ་ཀྱི་ཚུལ་དུ་རོལ་བར་བྱས་ན། དཀའ་ཚེགས་མེད་པར་ཚོགས་མྱུར་དུ་རྫོགས་པར་འགྱུར་བ་ཡིན་པས། ཚོགས་མཆོད་འདི་རྒྱུན་དུ་འདོན་དགོས་པ་ཡིན།^p314
འདིའི་འདོན་ལུགས་ཀྱང་ངས་བཤད་པ་བཞིན་དུ་ཁྱེད་རྣམ་པའི་ཕྱག་ལེན་ལྟར་དུ་བཏོན་ན་ཡང་ཆོག ཡང་ན་བླ་མ་མི་ཕམ་གྱིས་གསུངས་པའི་ཚོགས་བསྡུས་ཀྱི་ཚིག་རྐྱང་འདེད་བྱས་ནས་བཏོན་ཡང་མི་འགྲིག་པ་མེད། སྐབས་ཅི་བདེ་གྱིས།^p315
ཁྱད་པར་དུ་ཟ་མ་ཟ་བའི་དུས་སུ། ཨཱཿ ལས་ཆོས་དབྱིངས་སོགས་ཐོན་དང་། ཟས་ཟོས་པའང་དགེ་བར་འགྱུར་ངེས་ཡིན། རང་བཞིན་འུ་ཅག་གིས་ཟ་མ་ཟོས་པ་ལ་དགེ་བ་ཡོད་པ་མ་ཡིན་ཡང་། ཚོགས་འདི་བཏོན་ནས་ཨོ་རྒྱན་རིན་པོ་ཆེར་མཆོད་ན་ཟས་ཟོས་པས་ཀྱང་ཚོགས་རྒྱ་ཆེན་པོ་རྫོགས་འགྲོ་བས། ཐམས་ཅད་ཀྱིས་དུས་རྒྱུན་དུ་ཚོགས་མཆོད་འདི་འདོན་རྒྱུ་མ་འཆུགས།^p316
མཉམ་འགྲོགས་སུ་སྙེག་པའི་འཇའ་ཚོན།^p317
དགོན་པའི་ཉེ་ཟུར་གྱི་མཚོ་གླིང་གི་འདབས་དང་ཞི་བདེ་རྒྱ་མཚོའི་འདྲེས་མཚམས་ཀྱི་ཧཱ་ཝ་ཡེ་རྒྱལ་ཁབ་མེ་རི་སྤྱི་གླིང་དུ་ནམ་རྒྱུན་འཕྱུར་བའི་མེ་རི་ཞིག་ཡོད་ཅིང་། ཉིན་དེའི་ཕྱི་དྲོར་ཆོས་རྗེ་ཉིད་དེ་རུ་གཟིགས་སྐོར་ལ་བྱོན། ལམ་བར་དུ་རི་ལུང་འགའ་ཞིག་བརྒྱུད་དེ་འགྲོ་དགོས་ལ། ཡུལ་དེ་གའི་མི་རྣམས་ཀྱིས་གནས་འདིར་ལོ་བཅུ་ཕྲག་མང་པོའི་ཡར་སྔོན་ནས་མེ་རི་འབར་བ་ཡིན་ཞེས་ཟེར་ཞིང་། ངེད་ཅག་ལ་མེ་རི་འཕྱུར་བའི་རྡོ་ཞུན་འབྱམས་མེར་དཀག་པའི་རྔམ་བརྗིད་ཀྱི་རྗེས་ཤུལ་ཡང་བསྟན་བྱུང་།^p318
དེ་ནས་རླངས་འཁོར་བསྐོར་ནས་མཚོ་ཁར་ཕྱིན་པ་ན། ང་ཚོ་ཐེངས་དང་པོར་མུ་མཐའ་མེད་པའི་ཞི་བདེ་རྒྱ་མཚོའི་ཉེ་སར་སླེབས་པ་ཡིན་ཞིང་། དེའི་ཕྱོགས་གཅིག་གི་རྒྱང་རིང་གི་མཚམས་སུ་མཚོ་ནང་ན་མེ་རིའི་དུད་རླངས་འཕྱུར་ལ་མཚོ་ཆུ་ཁོལ་བཞིན་པ་ཡང་མཐོང་ཐུབ། ཉེ་ཟུར་གྱི་མི་རྣམས་ཀྱིས་དྲོད་ཚད་མཐོ་བའི་མཚོ་ཆུ་འདིའི་ནང་དུ་ཉ་རིགས་མང་པོ་གནས་ཡོད་པར་བཤད་པར། ཆོས་རྗེ་ཉིད་ཀྱིས་སེམས་ཅན་གྱི་ལས་སྣང་བསམ་གྱིས་མི་ཁྱབ་པ་ཡིན་ཚུལ་གསུངས་པ་སོགས་ད་ལྟའང་དྲན་གྱིན་འདུག^p322
ཕྱིར་ཡོང་དུས་གྱི་ལམ་བར་དུ་ངོ་མཚར་བ་ཞིག་ལ། ཁ་དོག་སྣ་ལྔའི་འཇའ་ཚོན་གྱི་འོད་ཁྱིམ་ཞིག་ཡུན་རིང་པོའི་བར་རྗེ་ཉིད་ཀྱི་རླངས་འཁོར་གྱི་མཐའ་བསྐོར་ནས་བསྙེགས་ཡོང་། སྤྱིར་ཧཱ་ཝ་ཡེ་ལ་འཇའ་ཚོན་གྱི་གླིང་ཞེས་གྲགས་པས་འཇའ་ཤར་བར་དེ་ཙམ་མི་མཚར་ཡང་། འདི་ནི་ཆེས་སྤྱིར་བཏང་མ་ཡིན་པ་ཞིག་ཏུ་སྣང་། རྗེ་ཉིད་ལམ་བར་དུ་རླངས་འཁོར་ནས་བབས་ཏེ་ཅུང་ཙམ་ངལ་གསོ་མཛད་ཚེ། ཁོང་གི་ཞལ་ནས་ཀྱང་སྒྲ་མི་གསལ་བའི་ཚུལ་གྱིས་ཅི་ཞིག་གསུང་བཞིན་འདུག བདག་ཅག་གིས་འཇའ་ཚོན་རྒྱབ་ལྗོངས་བྱས་ཏེ་སྐུ་པར་འགའ་རེ་བསྒྲོན་ནས་ཅུང་ཟད་འགོར་བ་ན། འཇའ་ཚོན་ཡང་ནམ་མཁའི་དབྱིངས་སུ་དེངས་བར་གྱུར། སྐབས་དེར་བདག་གི་བསམ་པ་ལ། ལྷ་མོ་འཇིགས་བྱེད་དྲག་མོ་ཁོང་འོད་ཀྱི་རྣམ་པར་བརྫུས་ནས་རྗེ་ཉིད་ལ་སྐྱེལ་མ་བྱས་པ་ཡིན་ནམ་སྙམ།^p324
དེ་རྗེས་ངེད་ཅག་དགོན་པ་དང་ཐག་མི་རིང་བའི་སར་ཡོད་པའི་ཧཱ་ཝ་ཡེའི་རྒྱལ་ཁབ་མེ་རིའི་སྤྱི་གླིང་（Hawaii Volcanoes National Park）དུ་སོང་ནས། ཧཱ་ཝ་ཡེའི་ས་ཆར་ཐེངས་འགར་མེ་རི་འཕྱུར་བའི་དངོས་ཟིན་གློག་བརྙན་ལ་བལྟས་ཤིང་། དུས་མཚུངས་སུ་འབྲེལ་ཡོད་ཀྱི་ངོ་སྤྲོད་དང་ལོ་རྒྱུས་ལའང་ཉན་པ་ཡིན།^p325
ཞབས་ལྷམ་ཆ་གཅིག་བཞག^p326
ཆོས་རྗེ་ཉིད་བོད་ཡུལ་ནས་བྱོན་དུས། ན་བཟའ་སྲབ་པ་རྣམས་ཕལ་ཆེར་གྲ་སྒྲིག་ལེགས་པར་བྱས་ཀྱང་། ཞབས་རྐང་ལ་ནང་ངོས་བལ་སྤུ་ཅན་གྱི་ལྷམ་ཞིག་མནབས་ཡོད་པས། དེ་ནི་ཧཱ་ཝ་ཡེ་ཡི་ཚ་ཁུལ་གླིང་ཕྲན་གྱི་གནམ་གཤིས་དང་མི་འཕྲོད་ཅིང་། ཤིན་ཏུ་དྲོ་ཆེ་བས་མནབས་ཐབས་མི་འདུག དེ་བས་བདག་གིས་ཁོམ་སྐབས་དང་བསྟུན་ཏེ་གནས་ཆུང་དགོན་པའི་མི་ཞིག་རོགས་པར་སྦྲན་ནས་ཉེ་འགྲམ་གྱི་ཧི་ལོ་ཉོ་ཚོང་ཁང་དུ་སོང་། ཨ་རིའི་སྒོ་རྩིས་ཚོང་རར་མདུན་སྟེགས་ཀྱི་ཚོང་པ་སོགས་མེད་པར། ཅ་ལག་རྣམས་ཅི་དགར་འདེམས་ཆོག་པའི་སྣང་ཚུལ་ཐོག་མར་མཐོང་བས་བདག་ལ་མཚར་སྣང་སྐྱེས།^p327
དེར་ཨ་སྒོར་༧༠བྱིན་ནས་བསིལ་ལྷམ་སྤུས་ལེགས་ཤིག་བདམས་ཤིང་ཉོས་ལ། དམངས་སྒོར་དུ་ཕབ་ན་སྒོར་༨༠༠ལ་ཉེ་བས་རིན་གོང་ཤིན་ཏུ་མཐོན་པོ་རེད། ཆོས་རྗེ་ཉིད་སྐུ་གཟུགས་ཆེ་བས། ནང་ལོགས་སུ་ཡོད་དུས་ལྷམ་ཆེ་ཤོས་ཡིན་ཡང་ཞབས་རྐང་ལ་དེ་ཙམ་འཚམ་པོ་མེད་ཀྱང་། གནས་འདིའི་མི་རྣམས་གཟུགས་ཆེ་བ་ཤ་སྟག་ཡིན་པས། ཞབས་ལྷམ་ཀྱང་ཆེ་ཆུང་འཚམ་པོ་རེད་སྙམ་པ་ཞིག་ཉོས་ནས་ཕྱིར་དགོན་ནང་དུ་ལོག་པ་ཡིན། དེ་ནས་ཆོས་རྗེ་ཉིད་ཀྱིས་ལྷམ་དེ་མནབས་ཚེ། ཞབས་རྐང་ལ་ཤིན་ཏུ་འཕྲོད་པས་སེམས་སུ་དགའ་སྤྲོ་ཆེན་པོ་སྐྱེས། རྗེས་སུ་ཁོང་ཕྱི་རྒྱལ་དུ་བྱོན་པའི་དུས་ཐམས་ཅད་དུ་དེ་ཉིད་མནབས་ཤིང་། བོད་དུ་ལོག་རྗེས་ཀྱང་ཡུན་རིང་ལ་མནབས་རུང་ད་དུང་ཐེད་མི་འདུག་པས། རྗེས་སུ་དེ་ནི་ཚོང་རྟགས་（Birkenstock）ཡི་ཐོན་རྫས་ཡིན་པ་གཞི་ནས་ཧ་གོ་བྱུང་།^p330
ཆོས་རྗེ་ཉིད་ཀྱིས་བོད་ནས་མནབས་ཡོང་བའི་ཞབས་ལྷམ་རྙིང་པ་དེ་དགོན་པ་དེར་བཞག་བྱུང་། དགོན་བདག་བླ་མས་གཙིགས་ཆེན་མཛད་ནས་རས་སེར་པོའི་ཁུད་དུ་གཅུད་དེ་སྒམ་ཞིག་ཏུ་ཉར་ཚགས་བྱས་སོང་། མི་ཉུང་ཤས་མ་གཏོགས་མཇལ་ཁའང་མི་གཏད་པར་མི་ལོ་སུམ་ཅུའི་བར་དུ་གླིང་ཚོམ་དེར་ཉར་ནས་བཞག^p331
རྗེས་སུ་བདག་གིས་འབྲེལ་ཡོད་མི་སྣ་བརྒྱུད་ནས་ཞབས་ལྷམ་དེ་བླུ་ཐབས་ཐེངས་མང་བྱས་མཐར་གྲོས་བགྱིས་ཏེ་བླུ་རྒྱུ་རྙེད་སོང་། ༢༠༡༧ལོར་ཧཱ་ཝ་ཡེའི་སློབ་གྲྭ་དང་དགོན་པས་བདག་ཆོས་ཁྲིད་བཤད་པར་གདན་འདྲེན་ཞུས་ཤིང་། བདག་ལའང་དགོན་པ་དེར་འགྲོ་འདོད་ཆེན་པོ་སྐྱེས་ཀྱང་། རྗེས་སུ་འགལ་རྐྱེན་དུ་མའི་དབང་གིས་ཕྱི་ལོགས་སུ་འགྲོ་མ་ཐུབ་པ་ཡིན།^p332
གནས་ཆུང་ཆོས་སྐྱོང་སླར་ཡང་གླེང་བ།^p334
ཕྱི་ཟླ་༦ཚེས་༢༡ཉིན་གྱི་སྔ་དྲོར། ཆོས་རྗེ་ཉིད་ཀྱི་གཏེར་ཆོས་ཕུར་བ་མགུལ་ཁུག་མའི་དབང་ཅུང་མ་གནང་བའི་སྔོན་ལ། གནས་ཆུང་ཆོས་སྐྱོང་དང་ཁོང་གི་འབྲེལ་བའི་སྐོར་སླར་ཡང་འདི་སྐད་དུ་གསུང་།^p335
སྔོན་ཨོ་རྒྱན་རིན་པོ་ཆེས་བོད་ཡུལ་དུ་སངས་རྒྱས་ཀྱི་བསྟན་པ་ཉི་མ་ཤར་བ་ལྟ་བུར་གསལ་བར་མཛད་ཅིང་། ཁོང་གིས་བོད་ལ་ཆོས་གང་ཡང་མ་གསུངས་པའི་སྔོན་དུ་འགལ་རྐྱེན་བར་ཆད་ཐམས་ཅད་ཞི་ཞིང་མཐུན་རྐྱེན་ཡིད་བཞིན་དུ་འགྲུབ་པར་བྱ་བའི་ཕྱིར་དུ། ཡི་དམ་ཕུར་པ་རྡོ་རྗེ་གཞོན་ནུའི་སྒྲུབ་ཐབས་འདི་རང་ཉིད་ཀྱི་མགུལ་གྱི་ཁུག་མའི་ནང་དུ་བསྡུས་ནས། གཞན་སུ་ལའང་མི་སྟོན་པའི་མན་ངག་ཁྱད་པར་ཅན་དུ་འཆང་བ་ཡིན་པས་མིང་ལ་ཕུར་པ་མགུལ་ཁུག་མ་ཞེས་ཡོངས་སུ་གྲགས།^p336
སྤྱིར་ཆོས་ཟབ་མོ་ཡིན་རུང་རྟེན་འབྲེལ་ལེགས་པོ་མ་འགྲིག་ན་འགྲོ་དོན་དེ་ཙམ་ཞིག་མི་འོང་ཞིང་། ཆོས་དེ་ཙམ་མི་ཟབ་ནའང་རྟེན་འབྲེལ་ལེགས་པོ་འགྲིག་ན་འགྲོ་དོན་རྒྱ་ཆེན་པོ་འོང་བ་ནི་ཆོས་སྤྱི་ཁྱབ་ཀྱི་འགྲོ་ལུགས་ཤིག་རེད། ཆོས་འདི་ལ་ཕྱི་ནང་གསང་གསུམ་གྱི་རྟེན་འབྲེལ་ཐམས་ཅད་ལེགས་ཕྱོགས་སུ་འགྲིག་པ་ལས། རྟེན་འབྲེལ་ངན་པ་སྣ་གཅིག་ཀྱང་བྱུང་མེད།^p337
ཆོས་འདི་ཆོས་བདག་བསྟན་རྒྱམ་རིན་པོ་ཆེ་དང་ཆོས་སྐྱོང་ཐམས་ཅད་ཀྱི་གཙོ་བོ་གནས་ཆུང་རྡོ་རྗེ་གྲགས་ལྡན་རྩལ་གཉིས་ལ་འཕྲོད་དགོས་པ་ཡང་ལེགས་པར་འཕྲོད་ཡོད།^p338
རིན་པོ་ཆེ་ལ་འཕྲོད་ཚུལ་ནི། ངས་བསྟན་རྒྱམ་རིན་པོ་ཆེ་ལ་འདི་ལྟ་བུའི་ཆོས་ཤིག་ཡོད་པས་ཉམས་སུ་བླངས་ན་བཟང་ཞེས་ཕར་བསྐུལ་མ་དགོས་པར། བསྟན་རྒྱམ་རིན་པོ་ཆེ་ཉིད་ཀྱིས་ཁྱེད་ཀྱི་ཕུར་པའི་ཆོས་དེའི་དབང་ཁྲིད་མན་ངག་བཅས་ཐོག་མར་ང་ལ་གནང་དགོས་ཞེས་ཚུར་ལ་གསུངས་བས། ངས་ཀྱང་ཁོང་ལ་མཎྜལ་གྱི་ཚུལ་དུ་དབང་ཁྲིད་མན་ངག་བཅས་ཕུལ་བ་ཡིན།^p339
དེར་མ་ཟད། ཁོང་གིས་དགྱེས་ཚོར་ཚད་མེད་པའི་ངང་ནས། ངའི་སྐྱེ་ཕྲེང་དང་སྦྲགས་ཏེ་བརྒྱུད་འདེབས་བརྩམས། གཞན་ཡང་ཆོས་འདི་ལ་མེ་མཆོད་ཅིག་ཡོད་པ་དེ་ངའི་སེམས་ལ་ཤར་འོང་བའི་སྐབས་སུ། ཁོང་གིས་ཡི་གེ་པ་བྱས་ནས་ཕྱག་བྲིས་གནང་བ་ཡིན། བསྟན་རྒྱམ་རིན་པོ་ཆེ་ཁོང་ནི་འཛམ་གླིང་ཞི་བདེའི་དེད་དཔོན་ཆེན་མོ་ཡིན་པས། ཁོང་གིས་ཡི་གེ་པ་བྱས་པ་ནི་མི་སྲིད་པ་ལྟ་བུ་ཞིག་ཡིན་ཡང་། སྔོན་གྱི་སྨོན་ལམ་དང་རྟེན་འབྲེལ་གྱི་དབང་གིས་དེ་ལྟར་མཛད་པ་ཡིན།^p340
དེ་བཞིན་ཆོས་སྐྱོང་ལ་འཕྲོད་ཚུལ་ཡང་། གནས་ཆུང་རྡོ་རྗེ་གྲགས་ལྡན་ཁོང་ལྷ་བབས་ཡོད་དུས་ཆོས་འདིའི་དབང་དངོས་སུ་ཞུས། སྤྱིར་ཁོང་ལྷ་དྲག་འབབ་ཡིན་ལ། དྲག་འབབ་ཀྱི་དུས་སུ་དབང་ཞུ་ལོང་དང་ཆོས་ཞུ་ལོང་མེད་ཀྱང་། ཆོས་འདིའི་དབང་སྐུར་བའི་གནས་སྐབས་ན་ཁོས་ཀྱང་དད་གུས་དང་ལྡན་པའི་སྒོ་ནས་ཉན་ཞིང་། ཆོས་ཉན་པའི་དུས་སུའང་ང་ལ་རྟེན་གསུམ་ཕུལ། ད་རུང་ཆོས་འདིས་འགྲོ་དོན་རྒྱ་ཆེར་མཛད་དགོས་ཤིང་། སྨད་ལས་སམ་བསྒྲལ་ལས་ཀྱི་ཆོ་ག་ཞིག་ཀྱང་རྩོམ་དགོས་ཞེས་བདག་ལ་སྐུལ་མའང་མཛད།^p341
སྐབས་དེར་གནས་ཆུང་རྡོ་རྗེ་གྲགས་ལྡན་གྱིས་ང་རང་གི་བསམ་པ་བཞིན་དུ་འདོད་དོན་ཕྲིན་ལས་བསྒྲུབས་པའི་གཏང་རག་ཏུ། ངས་ཀྱང་དྷ་ས་ནས་གསོལ་ཁ་ཞིག་བརྩམས་པ་ཡིན་ལ། ད་རེས་གནས་འདིར་ཐོན་མ་ཐག་ཏུ། གནས་ཆུང་རྡོ་རྗེ་གྲགས་ལྡན་དང་ཁྱེད་འཁོར་སློབ་རྣམས་ཀྱིས་བསྐུལ་ངོར་ངས་ཁོང་ལ་གསོལ་ཁ་ཚིག་བཞི་ཞིག་ཀྱང་བརྩམས་ཡོད། གསོལ་ཁ་དེ་གཉིས་ཁྱེད་རྣམ་པས་རྒྱུན་དུ་བཏོན་ན། གནས་ཆུང་རྡོ་རྗེ་གྲགས་ལྡན་གྱིས་གཞན་གང་དང་ཡང་མི་འདྲ་བའི་ཁ་འཛིན་སྡོངས་གྲོགས་དང་སྲུང་སྐྱོབ་མངོན་སུམ་དུ་མཛད་ངེས་ཡིན།^p342
ཆོས་སྐྱོང་ངེད་གཉིས་བར་གྱི་འབྲེལ་བ་ཡང་གསར་དུ་བཞག་པ་ཞིག་མ་ཡིན་པར། ཚེ་རབས་མང་པོའི་བར་དུ་འབྲེལ་བ་ཡོད་ངེས་ཡིན། དེ་ཡང་སྔོན་གཏེར་སྟོན་བསོད་རྒྱལ་གྱིས་ཀྱང་གནས་ཆུང་རྡོ་རྗེ་གྲགས་ལྡན་ལ་ཆོས་བཤད་ཅིང་། དབང་བསྐུར། བཀའ་སློབ་ཀྱང་མང་པོ་གནང་ཡོད་ཅིང་། གནས་ཆུང་རྡོ་རྗེ་གྲགས་ལྡན་གྱིས་རེ་འགར་ཁོང་ལ་ལུང་བསྟན་ཅིང་། གཏེར་ཡོད་སའི་གནས་ཐམས་ཅད་གསལ་པོར་བཤད་དེ་ལམ་ཁྲིད་ལྟ་བུ་མཛད། རེ་འགར་སྐུ་ཕྲེང་བཅུ་གསུམ་པ་ཐུབ་བསྟན་རྒྱ་མཚོ་མཆོག་དང་གཏེར་སྟོན་བསོད་རྒྱལ་གཉིས་ཀྱི་བར་ལ་འཕྲིན་ཡར་སྐྱེལ་མར་སྐྱེལ་གྱི་འཕྲིན་ལས་ཀྱང་མཛད།^p344
ཁ་སང་བཤད་པ་བཞིན་ང་དྷ་ས་རུ་ཐོན་ཚེ་གནས་ཆུང་གི་སྐུ་རྟེན་དེ་ངའི་དྲུང་དུ་ཐོན་དུས། ངས་སྔར་གྱི་ལོ་རྒྱུས་མདོར་བསྡུས་ཙམ་བཤད་པའི་གནས་སྐབས་ན། ཁོ་རང་ཕ་དང་བུ་འཕྲད་པ་ལྟ་བུའི་སྒོ་ནས་ང་ལ་དགའ་དད་ཚད་མེད་པའི་ངང་དུ་ལྷ་ཐོག་བབས་སུ་བྱུང་ནས། མིག་ནས་མཆི་མ་ཕྱུང་། དད་གུས་ཚད་མེད་པའི་རྣམ་འགྱུར་ཡང་བསྟན་སོང་།^p345
ཕྱི་ཉིན་ང་གནས་ཆུང་དགོན་ནང་དུ་འགྲོ་བའི་དུས་སྐབས་ན། གནས་ཆུང་དགོན་པའི་གྲྭ་ཚང་རྣམས་ཀྱིས། དེ་རིང་ཁྱེད་ཀྱིས་ལྷ་སྤྱན་འདྲེན་བྱ་རྒྱུ་ཨེ་ཡིན་ཟེར། དེ་དུས་ངའི་བསམ་པ་ལ། ཆབ་སྲིད་ཀྱི་སྐད་ཆ་མང་པོ་བཤད་འོངས་ན་ང་ལ་སྟབས་བདེ་པོ་མི་འདུག་ལ། རྗེས་མར་རང་ཡུལ་ལ་འོང་དུས་དཀའ་མོ་རེད་སྙམ་བཞིན་དུ་ངས་ལྷ་ནི་ཕབ་རྒྱུ་མིན་ཞེས་ལན་བཏབ།^p346
དེར་གནས་ཆུང་གྲྭ་ཚང་གི་གྲྭ་པ་རྣམས་ཀྱིས། ལྷ་དེ་ཁྱེད་ཀྱིས་དངོས་སུ་སྤྱན་འདྲེན་མ་མཛད་རུང་། ལྷ་དེ་ཁྱེད་ལ་དད་གུས་དང་དགའ་འདུན་ཡོད་ལུགས་ལ་བལྟས་ན། ལྷ་དེ་ཐོག་བབ་ཏུ་འབབ་འོང་ཤས་ཆེ་ཟེར་ནས་ལྷ་ཆས་ཚང་མ་གྲ་སྒྲིག་བྱས་སོང་། ཕྱི་ཉིན་དབང་སྐུར་བའི་སྐབས་སུ་ལྷ་ཡང་ཐོག་བབ་ཀྱི་ཚུལ་དུ་བབས་ཤིང་། བབས་མ་ཐག་ཏུ་ཁོང་དགོན་པའི་གྲྭ་ཚང་རྣམས་ཀྱིས་ལྷ་ཆས་ཡོངས་རྫོགས་སྐུ་ལ་གསོལ་ཐལ།^p347
སྐབས་དེར་ལྷས་ཀྱང་ང་ལ་གུས་འདུད་ཚད་མེད་པའི་ངང་ནས་སྐུ་གསུང་ཐུགས་ཀྱི་རྟེན་གསུམ་ཕུལ་བ་དང་། ང་རང་གི་བསམ་པ་དང་མཐུན་པར་ཆབ་སྲིད་ཀྱི་སྐད་ཆ་གང་ཡང་མེད་པར། སངས་རྒྱས་ཀྱི་བསྟན་པ་དར་ཐབས་དང་སེམས་ཅན་ལ་བདེ་སྐྱིད་འབྱུང་ཐབས། རིན་པོ་ཆེའི་སྐུ་ཚེའི་མཛད་འཕྲིན་རྒྱས་ཐབས་ཀྱི་བླང་དོར་དང་བསླབ་སྟོན་སོགས་གསལ་པོར་བསྒྲགས་སོང་། ཡི་གེ་དེ་ད་ལྟ་ཁྱེད་རྣམ་པ་ལའང་ཡོད་ཅིང་དེར་འཁོད་པ་ནང་བཞིན་ཡིན།^p348
གཞན་ཡང་རྟེན་འབྲེལ་གྱི་སྣ་ཁ་མང་པོ་ཞིག་འགྲིག་པའི་ལོ་རྒྱུས་ཡོད་ཀྱང་། ཁྱེད་རྣམ་པས་དེ་ཚང་མར་ཉན་དགོས་ན་དུས་ཚོད་རིང་པོ་དགོས་པས་བསྐྱུར་བ་ཡིན། མདོར་ན་ཆོས་འདི་ཆོས་ཀྱི་བདག་པོ་བསྟན་རྒྱམ་རིན་པོ་ཆེ་དང་ཆོས་ཀྱི་སྲུང་མ་གནས་ཆུང་རྡོ་རྗེ་གྲགས་ལྡན་གྱི་ལག་ལ་འཕྲོད་ཚུལ་དེ་ཁྱེད་རྣམ་པ་ལ་གོ་སླ་བའི་སྒོ་ནས་བཤད་པ་ལྟར་རྟེན་འབྲེལ་ཕུན་སུམ་ཚོགས་པ་འགྲིག་ཐལ།^p349
དེའི་རྐྱེན་གྱིས་ཆོས་འདི་གཞན་གང་དང་ཡང་མི་འདྲ་བའི་བྱིན་རླབས་ཆེན་པོ་ཡིན་ཏེ། ཨོ་རྒྱན་རིན་པོ་ཆེས་བོད་ཡུལ་དུ་ཆོས་མང་པོ་གསུངས་པའི་ཐོག་མའི་ཨ་མ་ལྟ་བུ་ནི་ཕུར་པ་མགུལ་ཁུག་མ་འདི་ཉིད་ཡིན། འདི་ཉིད་སུ་དང་སུས་ཉམས་སུ་བླངས་ན་དེར་ཁ་དགེ་ཞིང་བཀྲ་ཤིས། མི་འདོད་པ་ཐམས་ཅད་ཉེ་བར་ཞི་ཞིང་། བསམ་དོན་ཐམས་ཅད་ཡིད་བཞིན་དུ་འགྲུབ་པར་འགྱུར་བ་ཡིན་པའི་ཕྱིར་ན། ད་ལྟ་ཁྱེད་ཅག་རྣམས་ལ་རྡོ་རྗེ་ཕུར་པ་འདིའི་དབང་བསྐུར་བའི་སྐབས་སུ་བབས་པ་ཡིན།^p350
ཉིན་དེའི་ཕྱི་དྲོར། ཆོས་རྗེ་ཉིད་བྱེ་ཐང་ནག་པོའི་སྤྱི་གླིང་（Punaluʻu Black Sand Beach Park）དུ་བྱོན། ཡུལ་དེའི་ས་ངོས་ཀྱི་ཆགས་ཚུལ་ནི་མེ་རི་འཕྱུར་བའི་རྡོ་ཞུན་ཁོལ་མ་བཞུར་ནས་རྒྱ་མཚོར་འདྲེས་ཏེ་ཚ་དྲོད་ཡལ་བའི་རྗེས་ཤུལ་དེ་རང་བྱུང་རླུང་འགྱུར་དང་མཚོ་ཆུས་ཡང་ཡང་བཤལ་བ་ལས་གྲུབ་པ་ཡིན། བྱེ་ཐང་ནག་པོ་ནི་ས་ཆ་འདིར་ཤིན་ཏུ་གྲགས་ཆེ་ཞིང་། ཉེ་ཟུར་དུ་མཛེས་སྡུག་ལྡན་པའི་གླིང་ག་ཞིག་འདུག་པ་དེར་སྤྲོ་འཆམ་དུ་རྒྱུ་བའི་མི་རྣམས་བག་ཡངས་ངང་རྩེད་འཇོར་རོལ་བཞིན་མཆིས་ལ། ཡུལ་ལྗོངས་ཀྱི་བཀོད་པ་ནི་ཀུན་གྱི་སྣང་བ་བཟི་བར་བྱེད་པ་ལྟ་བུ་ཞིག་རེད། ཆོས་རྗེ་ཉིད་དེར་གཟིགས་མོར་བྱོན་ནས། ཐུགས་ལྷོད་པོའི་ངང་སྤྲོ་གསེང་ཅུང་ཙམ་མཛད།^p351
ཆོས་རྗེ་ཉིད་ཀྱི་ཧཱ་ཝ་ཡེའི་མཛད་རྣམ་ཀུན་མཚམས་འདི་ནས་ལེགས་པར་གྲུབ་པ་ཡིན།^p355
ངོ་མཚར་བའི་ཡུལ་ཁམས།^p356
ཐེངས་འདིར་ཧཱ་ཝ་ཡེའི་ས་ཆར་ཐོན་ནས་ང་ལ་བཞག་པའི་ཆེས་ཟབ་པའི་བག་ཆགས་ནི། ནུབ་ཕྱོགས་ཀྱི་འཕེལ་རྒྱས་སོང་ཟིན་པའི་རྒྱལ་ཁབ་ཀྱི་ཚན་རྩལ་དང་དཔལ་འབྱོར་དེ་ཡིན།^p357
དཔེར་ན་ང་ཚོ་སྡོད་སའི་ཁང་པའི་སྒོར་ཚོར་གློག་ཅིག་འདུག་ཅིང་། མི་ནང་དུ་ཡོང་ཚེ་གསལ་བར་འགྱུར་ལ་མི་སོང་ཚར་རྗེས་རང་བྱེད་ཀྱིས་ཟུམ་འགྲོ་བ་མ་ཟད། ཐ་ན་གློ་ལུ་ཙམ་བྱས་ཀྱང་གསལ་ཡོང་བར་འདུག གློག་སྒྲོན་སྤྱིར་བཏང་བ་ཙམ་ལས་དེ་འདྲ་ཡེ་ནས་མཐོང་མ་མྱོང་བའི་བདག་ལ་ཡ་མཚན་ཆེན་པོ་སྐྱེས་བྱུང་། དེ་ལ་གནས་གཞན་ཞིག་ཏུ་མིས་ཚོད་འཛིན་བྱེད་ཀྱིན་ཡོད་དམ་སྙམ་ནས། མི་མང་པོར་རྒྱུ་མཚན་དྲིས་ཀྱང་། ཁོང་ཚོས་ཀྱང་བེད་སྤྱོད་བྱེད་པ་ཙམ་ལས། ལག་རྩལ་དེའི་རྩ་བའི་རིགས་པ་ཤེས་ཀྱིན་མི་འདུག^p358
གཞན་ཡང་། ཆོས་ཞུ་རུ་འོངས་བའི་མི་སོ་སོས་ལག་ཏུ་ལག་འཕྲིན་བཟུང་ཞིང་། རླངས་འཁོར་ཆུང་ངུ་རེ་བསྐོར་ཡོང་བར་ཡང་ཡ་མཚན་ཆེན་པོ་སྐྱེས། སྐབས་དེར། བོད་ཡུལ་གྱི་སྒོར་ཁྲིའི་བདག་པོར་གྱུར་པའི་ཕྱུག་པོར་བརྩི་བའི་ཁྱིམ་ཚང་གི་སྒོ་ཁ་ནའང་ལྕགས་རྟ་ཙམ་མ་གཏོགས་འཕྲུལ་རྟ་ཡང་མཐོང་རྒྱུ་དཀོན། སྲིད་གཞུང་གི་འགོ་ཁྲིད་ཆེན་པོ་འགའ་རེར་ལྗིབ་འཁོར་རེ་སྤྱོད་དབང་ཡོད་ཀྱང་། དེ་ལ་ཁ་ལོ་བ་ཆེད་དུ་བསྒྲིགས་ཡོད། ཡུལ་འདིའི་མི་རང་རང་ལ་རླངས་འཁོར་ཡོད་པར་མ་ཟད་རང་གིས་ཁ་ལོ་བྱེད་པ་ནི། བདག་ལ་མཚོན་ན་བློ་ཡུལ་ལས་འགོངས་ཤིང་བརྗེད་ཐབས་མེད་པ་ཞིག་རེད།^p359
དེ་ལྟ་ནའང་། རིམ་གྱིས་གོམས་སོང་བས་ཚོར་བ་མེད་པར་གྱུར། ཆོས་རྗེ་བླ་མ་ཉིད་ཀྱིས་ནི་འདི་དག་ལ་ཐུགས་སྣང་ཆེར་མི་མཛད་པར། གཙོ་བོ་སེམས་ཅན་རྣམས་ཀྱི་ཉོན་མོངས་གཅོད་པ་དང་ཐར་བ་འཐོབ་པ་ཁོ་ན་ལ་ཐུགས་དགོངས་གཏད་ནས་མཆིས་སྙམ།^p361
དུང་དཀར་དུ་སྦས་པའི་བྱིན་རླབས།^p362
ང་ཚོས་སྔོན་ཆད་ཆོས་རྗེ་ཉིད་མཇལ་མྱོང་བའི་ཨ་རིའི་ཆོས་པ་སྐུ་ཞབས་གྷི་རའེ་ཀུ་（Greg Herbst）ལ་བཅར་འདྲི་ཞིག་བྱས། ཁོང་ནི་ལྷག་བསམ་ལྡན་ཞིང་རྗེ་ཉིད་ལ་དད་པ་ཡང་ལྷག་ཏུ་ཆེ། བཅར་འདྲི་བྱེད་སྐབས། ཁོང་གིས་ཕྱིར་དྲན་བྱས་པ་འདི་ལྟར།^p363
ཆོས་རྗེ་ཉིད་གནས་འདིར་འབྱོན་སྐབས། ངས་ཧཱ་ཝ་ཡེའི་རྒྱལ་ཁབ་མེ་རིའི་སྤྱི་གླིང་དུ་བྱ་བ་སྒྲུབ་བཞིན་ཡོད་ཅིང་། གནས་ཆུང་དགོན་པའི་བླ་མ་བློ་བཟང་དོན་ལྡན་ནི་ངའི་དགེ་རྒན་ཡིན། ངས་རྒྱུན་དུ་ནང་ཆོས་སློབ་སྦྱོང་བྱེད་པ་ལས་གཞན། ཐེངས་མང་པོར་ཧཱ་ཝ་ཡེའི་གདོད་མའི་ཆོས་ལུགས་ཀྱི་མཛད་སྒོར་ཞུགས་མྱོང་།^p365
ཧཱ་ཝ་ཡེའི་གདོད་མའི་ཆོས་ལུགས་ཀྱི་མཛད་སྒོའི་སྐབས་སུ་དུང་དཀར་འབུད་པའི་སྲོལ་ཡོད་པས། ང་རང་དུང་འབུད་པར་ཤིན་ཏུ་མཁས་པར་གྱུར། ཆོས་རྗེ་ཉིད་ཀྱིས་ཆོས་ཁྲིད་མ་གསུང་སྔོན་ལ། ངས་ནམ་རྒྱུན་ནང་ཆོས་ཀྱི་འགྲོ་ལུགས་ལྟར་ཆོས་དུང་བུས་ཤིང་། ཆོས་ཁྲིད་གསུང་སྐབས་སུ་དུང་དཀར་དེ་ཁོང་གི་བཞུགས་ཁྲིའི་འགྲམ་དུ་བཞག་པ་ཡིན། ཧཱ་ཝ་ཡེའི་མི་རྣམས་ཀྱི་ཟེར་སྲོལ་ལྟར་ན། དེ་ལྟར་བྱས་ན་ཆོས་རྗེ་ཉིད་ཀྱི་གསུང་སྐད་དེ་ནུས་ཤུགས་གཞན་ཞིག་གི་རྣམ་པས་ཆོས་དུང་གི་ནང་དུ་ཉར་ཚགས་བྱ་ཆོག་པར་བཤད་ལ། ལྟ་ཚུལ་དེ་ནི་ནང་ཆོས་ཀྱི་བྱིན་རླབས་ཤིག་ལ་ཟེར་གྱིན་ཡོད་པ་འདྲ།^p366
ཆོས་རྗེ་ཉིད་ཧཱ་ཝ་ཡེ་རུ་བཞུགས་པའི་རིང་ལ། ངས་བྱ་བ་སྒྲུབ་སའི་རྒྱལ་ཁབ་མེ་རིའི་སྤྱི་གླིང་དུ་བྱོན་ཅིང་། ངེད་སྤྱི་གླིང་གི་ལྟ་སྐུལ་སློབ་སྟོན་པའི་གཞུང་ལས་ཁང་དུའང་གདན་ཞུ་བྱས། དེར་ནད་བཅོས་ཐུབ་པར་གྲགས་པའི་སྨན་རྡོ་ཞིག་ཡོད་པ་ལ། ཆོས་རྗེ་ཉིད་ངོ་མཚར་ཞིང་ཞལ་འཛུམ་བཞིན། སྨན་རྡོ་འདིས་ངའི་ནད་བཅོས་ཐུབ་བམ་གསུངས་པས། ངས་ཁོང་གི་སྐུ་ཁམས་ལ་སྙུང་གཞི་ཡོད་ཚོད་འདུག་སྙམ་དུ་རྗེས་དཔག་བྱས།^p367
གཞན་ཡང་ང་ཚོ་མེ་རི་འབར་བའི་གནས་ལ་ལྟ་སྐོར་དུ་ཕྱིན་ཅིང་། འཇའ་ཚོན་ཡོད་སར་པར་ཡང་བླངས། དེ་ནས་རླངས་འཁོར་དུ་བཞུགས་ཤིང་མཚོ་འགྲམ་དུ་བྱོན་ཏེ། རྡོ་ཞུན་ཁོལ་མ་རྒྱ་མཚོར་བཞུར་བའི་རླངས་པ་ལྷོག་ལྷོག་འཕྱུར་བ་ལ་གཟིགས་ཤིང་ངོ་མཚར་བའི་ཚུལ་མཛད་ཅིང་། ཆོས་རྗེ་ཁོང་མཱེས་ཀཱེལ་དང་ངེད་གཉིས་ཀྱི་བར་དུ་བཞུགས་པའི་པར་ཞིག་ཡོད་པའང་སྐབས་དེར་བླངས་པ་ཡིན།^p368
ལོ་དེ་འདྲ་མང་པོ་ཞིག་སོང་ཟིན་ཀྱང་། ཁོང་གནས་འདིར་ཕེབས་པས་བདག་གི་སེམས་སུ་བག་ཆགས་ཟབ་མོ་བཞག་འདུག དེ་ནི་ཕྱོགས་གཅིག་ནས་ཁོང་གི་སྐུ་དངོས་ཀྱི་བྱིན་རླབས་ཐད་ཀར་ཞུགས་པ་དང་། ཕྱོགས་གཞན་ཞིག་ནས་དུང་དཀར་འདིའི་ནང་དུ་ཁོང་གི་གསུང་སྐད་ཀྱི་བྱིན་རླབས་ཞུགས་ཡོད་པས་ཡིན་སྲིད། དེ་རིང་ངས་ཆོས་དུང་དེ་ཆེད་དུ་ཁྱེར་ཡོད་པས། ད་ལྟ་ཁྱེད་ལ་ཐེངས་གཅིག་འབུད་རྒྱུ་ཡིན་ཏུའུ་ཏུའུ་་་་་་ཞེས་དུང་བུས་བྱུང་།^p369
ང་ལ་ད་ལྟ་ད་དུང་ཡང་སེམས་འགུལ་ཆེན་པོ་ཐེབས་པ་ཞིག་ལ། རླབས་ཆེན་གྱི་སྐྱེས་བུ་ཁོང་གིས། ས་ཐག་ཧ་ཅང་རིང་བའི་བོད་ཡུལ་ནས་དཀའ་ཚེགས་མང་དུ་བརྒྱུད་དེ། ང་ཚོའི་དགོན་པ་ཆུང་ངུ་འདིར་བྱོན་ནས་ཐུགས་རྗེས་གཟིགས་ཤིང་བྱམས་སྐྱོང་གནང་བ་ནི་ཆེས་བསམ་ཡུལ་ལས་འདས་པ་ཞིག་རེད་ཅེས་གླེང་བྱུང་།^p371
དྲན་ངོགས་ཀྱི་ནུབ་བསྐྱོད་ལས་ཡུལ་ཧཱ་ཝ་ཡེའི་མཛད་རིམ་ལེགས་པར་གྲུབ་པའི་སྐབས་ཏེ་དང་པོའོ། །^p372
