འབབ་ཚུགས་དྲུག་པ། ཨ་རིའི་ཉིའུ་ཡོག^p1
འབབ་ཚུགས་དྲུག་པ། ཨ་རིའི་ཉིའུ་ཡོག^p2
༼ ༨·༡~༨·༨ ༽^p3
མཛད་རིམ།^p4
ཕྱི་ཟླ་༨པའི་ཚེས་༡ཉིན། ཉིའུ་ཡོག་ཏུ་འབྱོར།^p5
ཕྱི་ཟླ་༨པའི་ཚེས་༢ཉིན། དཔལ་དུས་ཀྱི་འཁོར་ལོའི་སྐོར་གྱི་ཆོས་ཁྲིད་གནང་།^p6
ཕྱི་ཟླ་༨པའི་ཚེས་༣ཉིན། སྔ་དྲོར་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་ཁང་དུ་བྱོན་པ་དང་། དགོང་མོར་འཇམ་དཔལ་ཞི་སྒྲུབ་ཀྱི་དབང་གནང་།^p7
ཕྱི་ཟླ་༨པའི་ཚེས་༤ཉིན། སྔ་དྲོར་འཛམ་གླིང་ཉོ་ཚོང་ལྟེ་གནས་སུ་བྱོན་པ་དང་། དགོང་མོར་ཕུར་པ་མགུལ་ཁུག་མའི་དབང་གནང་།^p8
ཕྱི་ཟླ་༨པའི་ཚེས་༥ཉིན། ཕུར་པའི་སྐོར་གྱི་སྤྱི་བསྒྲགས་གསུང་བཤད་གནང་།^p9
ཕྱི་ཟླ་༨པའི་ཚེས་༦ཉིན། ཚིག་བདུན་གསོལ་འདེབས་ཀྱི་ཁྲིད་གནང་།^p10
ཕྱི་ཟླ་༨པའི་ཚེས་༧ཉིན། སྔ་དྲོར་ལྕེ་བཙུན་སྙིང་ཐིག་གི་དབང་དང་། ཕྱི་དྲོར་ལྕེ་བཙུན་སྙིང་ཐིག་གི་ཁྲིད་གནང་།^p11
ཕྱི་ཟླ་༨པའི་ཚེས་༨ཉིན། སྔ་དྲོ་དང་ཕྱི་དྲོ་གཉིས་སུ་ལྕེ་བཙུན་སྙིང་ཐིག་གི་ཁྲིད་གནང་།^p12
ཉིའུ་ཡོག་གྲོང་ཁྱེར་དུ་འབྱོར་བ།^p13
ཕྱི་ཟླ་༨པའི་ཚེས་༡ཉིན། ཆོས་རྗེ་ཉིད་ཨ་རིའི་ཆབ་སྲིད་ཀྱི་ལྟེ་གནས་རྒྱལ་ས་ཝ་ཧྲིང་ཐོན་དང་ཞལ་གྱེས་ཏེ། གནམ་གྲུར་བཞུགས་ནས་དུས་ཚོད་གཅིག་ཙམ་བསྐྱོད་པ་ན། ཨ་རིའི་དཔལ་འབྱོར་གྱི་ལྟེ་གནས་གྲོང་ཁྱེར་ཉིའུ་ཡོག་གི་ལཱ་ཀུར་དྷི་ཡ་གནམ་ཐང་（LaGuardia Airport）དུ་འབྱོར།^p14
ཉིའུ་ཡོག་ནི་ཨ་རིའི་གྲོང་ཁྱེར་ཆེས་ཆེ་ཤོས་ཡིན་ལ། ཕྱི་ལོ་༡༧༨༩ལོར། ཨ་རིའི་སྲིད་འཛིན་ཐོག་མ་ལྗོར་ལྗི་ཝ་ཧྲིང་ཐོན་ཁྲི་འདོན་བྱས་ཏེ་རྒྱལ་སྲིད་སྐྱོང་སའི་གནས་སྐབས་ཀྱི་རྒྱལ་སའང་ཡིན། དུས་རབས་བཅུ་དགུ་པ་ནས་བཟུང་། ཐུན་མོང་མ་ཡིན་པའི་ས་ཁམས་གནས་སྟངས་ཀྱི་དབང་གིས། ཉིའུ་ཡོག་གྲོང་ཁྱེར་ནི་གནའ་ནས་ད་ལྟའི་བར་དུ་ཨ་རི་རྒྱལ་ཁབ་ཀྱི་དཔལ་འབྱོར་དང་དངུལ་རྩའི་དཀྱིལ་སྙིང་དང་ལྟེ་གནས་སུ་གྱུར་ཡོད་པར་མ་ཟད། འཁྲུག་ཆེན་གཉིས་པ་མཇུག་རྫོགས་རྗེས། འཛམ་གླིང་གི་དཔལ་འབྱོར་འཁོར་རྒྱུག་ཁྲོད་ཨ་སྒོར་གྱི་སྟངས་འཛིན་ནུས་པ་ཆེ་རུ་སོང་བ་དང་བསྟུན་ནས། གྲོང་ཁྱེར་འདིའང་འཛམ་གླིང་གི་དཔལ་འབྱོར་དང་དངུལ་རྩའི་ལྟེ་གནས་ཉིད་དུ་གྱུར། སྤྱི་ལེ་གྲུ་བཞི་མ་དྲུག་ཅུ་ཙམ་ལས་མེད་པའི་མན་ཧཱ་ཐིན་（Manhattan）གྱི་གླིང་ཕྲན་སྟེང་དུ། དངུལ་རྩ་དང་ཕྱི་ཕྱོགས་ཉོ་ཚོང་གི་སྡེ་ཁག་བགྲང་གིས་མི་ལང་བ་ཆགས་ཡོད་ཅིང་། འཛམ་གླིང་གི་ཆ་འཕྲིན་ཐམས་ཅད་གཅིག་ཏུ་འདུས་པའི་བང་མཛོད་ལྟ་བུའང་གནས་འདི་ཉིད་ཡིན་པས། ས་སྒང་རིལ་མོའི་སྟེང་དུ་གནས་ཚུལ་གང་བྱུང་ཐམས་ཅད་གྲོང་ཁྱེར་འདི་དང་དམ་པོར་འབྲེལ་ནས་ཡོད།^p15
ཆོས་རྗེ་ཉིད་གྲོང་ཁྱེར་འདིའི་བྷ་ཝེ་རའེ་ཁྲོམ་ལམ་གྱི་ཁང་རྟགས་༢༢༢པར་（222 Bowery Street）བཞུགས། ཐོག་ཁང་དེ་དག་ལ་ལོ་ངོ་བརྒྱ་ཕྲག་གི་ལོ་རྒྱུས་ལྡན་པར་མ་ཟད། སྔོན་སྐད་གྲགས་ཅན་གྱི་སྒྱུ་རྩལ་པ་རྣམས་ཀྱི་སྡོད་གནས་ཡིན་པས། མི་རྣམས་ཀྱིས་དེ་ལ་བཙན་རྫོང་（bunker）ཞེས་འབོད་ཅིང་། ད་ལྟའི་བར་དུ་ཉིའུ་ཡོག་གྲོང་ཁྱེར་གྱི་མཚོན་བྱེད་བཟོ་བསྐྲུན་དུ་གྱུར་ཡོད། དུས་རབས་གོང་མའི་ལོ་རབས་བདུན་ཅུའི་ནང་། སྐྱབས་རྗེ་བདུད་འཇོམས་རིན་པོ་ཆེའི་སློབ་མ་ཞིག་གིས་གནས་ཁང་དེ་ཉོས་ནས་སྔ་འགྱུར་རྙིང་མའི་ཆོས་ཚོགས་སུ་བསྒྱུར་ཅིང་། མིང་ལའང་ཨོ་རྒྱན་ཆོས་ཚོགས་སམ་ཡེ་ཤེས་སྙིང་པོའི་ཆོས་ཚོགས་ཞེས་བཏགས་འདུག^p17
ཆོས་རྗེ་ཉིད་ཀྱིས་གཟའ་འཁོར་གཅིག་གི་རིང་ལ་གནས་འདི་ནས་དབང་ཁྲིད་གནང་བ་ཡིན།^p19
ཉིའུ་ཡོག་གི་མཛད་རིམ་རགས་བསྡུས།^p20
ལོ་ངོ་སུམ་ཅུ་ཕྱིན་པའི་དེ་རིང་གི་དུས་སྐབས་འདིར། ཆོས་རྗེ་ཉིད་ཀྱིས་སྔོན་ཆད་ཉིའུ་ཡོག་དང་བྷོ་སི་ཐིན་（Boston）གྲོང་ཁྱེར་གཉིས་ཀྱི་ས་ཚིགས་སུ་གསུངས་པའི་འབྲེལ་ཡོད་རྒྱུ་ཆ་རྣམས་ད་ལྟ་སོ་སོར་འཐོར་སོང་རྐྱེན། ཕྱོགས་ཀུན་ལ་འདྲི་རྩད་གང་མང་བྱས་ཀྱང་ཉུང་ཙམ་ལས་ལག་སོན་མ་བྱུང་། ལག་སོན་བྱུང་བ་རྣམས་གཞིར་བཞག་གི་སྟེང་དུ། སྐབས་དེའི་མཛད་རིམ་རགས་བསྡུས་ཀྱི་བརྗེད་ཐོ་ཙམ་ཞིག་འདིར་བཀོད་པ་ཡིན། རྗེས་སུ་ཁོང་གི་གསུང་དག་མའི་སྒྲ་བརྙན་ཡིག་ཆ་སོགས་རྙེད་བྱུང་ན། མྱུར་དུ་ཁ་གསབ་བྱས་ཏེ་གཟིགས་མོར་དབུལ་ཆོག^p21
ཕྱི་ཟླ་༨པའི་ཚེས་༢ཉིན། ཇོ་ནང་པའི་ཆོས་ཚོགས་སུ་དཔལ་དུས་ཀྱི་འཁོར་ལོའི་སྐོར་གྱི་ཆོས་ཁྲིད་གནང་།^p23
ཕྱི་ཟླ་༨པའི་ཚེས་༣ཉིན། སྟོན་པའི་དྲིན་དྲན་གླིང་དུ་འཇམ་དཔལ་རྫོགས་པ་ཆེན་པོའི་དབང་གནང་།^p24
ཕྱི་ཟླ་༨པའི་ཚེས་༤ཉིན། ཨོ་རྒྱན་ཆོས་ཚོགས་སུ་ཕུར་བ་མགུལ་ཁུག་མའི་དབང་གནང་།^p25
ཕྱི་ཟླ་༨པའི་ཚེས་༥ཉིན། ཨོ་རྒྱན་ཆོས་ཚོགས་སུ་ཕུར་བའི་སྐོར་གྱི་སྤྱི་བསྒྲགས་གསུང་བཤད་གནང་།^p26
ཕྱི་ཟླ་༨པའི་ཚེས་༦ཉིན། གུ་རུ་རིན་པོ་ཆེའི་ངོ་སྤྲོད་ཀྱི་ཁྲིད་གནང་།^p27
ཕྱི་ཟླ་༨པའི་ཚེས་༧ཉིན། ཨོ་རྒྱན་ཆོས་ཚོགས་སུ། སྔ་དྲོར་ལྕེ་བཙུན་སྙིང་ཐིག་གི་དབང་དང་ཕྱི་དྲོར་ལྕེ་བཙུན་སྙིང་ཐིག་གི་ཁྲིད་གནང་།^p28
ཕྱི་ཟླ་༨པའི་ཚེས་༨ཉིན། ཨོ་རྒྱན་ཆོས་ཚོགས་སུ་སྔ་དྲོ་དང་ཕྱི་དྲོ་གཉིས་སུ་ལྕེ་བཙུན་སྙིང་ཐིག་གི་ཁྲིད་གནང་།^p29
ཉིའུ་ཡོག་བླ་རུང་མདོ་སྔགས་རིགས་པའི་ཆོས་ཚོགས།^p30
ཆོས་རྗེ་ཉིད་ཉིའུ་ཡོག་ཏུ་བཞུགས་སྐབས། གནས་འདིའི་མི་རྣམས་ཀྱིས་ཐོས་བསམ་སྒོམ་གསུམ་ཆ་ཚང་བའི་སྒོ་ནས་མདོ་སྔགས་ཀྱི་ཆོས་ཉམས་ལེན་བྱ་བདེ་བའི་ཆེད་དུ། བླ་རུང་གི་ཡན་ལག་ཆོས་ཚོགས་ཤིག་གཟུག་པའི་ཐུགས་དགོངས་ཡོད་ཚུལ་བདག་ལ་གསུངས།^p31
ང་ལ་ས་ཆ་འདིར་ཆ་རྒྱུས་མེད་ཅིང་སྐད་ཀྱང་ཆེར་མི་འཕྲོད་མོད། འོན་ཀྱང་ཕྱི་རྒྱལ་ནས་ཆོས་ཚོགས་ཐོ་འགོད་བྱེད་པར་དེ་ཙམ་དཀའ་ལས་མི་འདུག་པས། བདག་གིས་འབྲེལ་ཡོད་དད་ལྡན་འགའ་དང་ཐེངས་མང་དུ་གྲོས་བསྡུར་བྱས་ཏེ། ཉིན་ཁ་ཤས་ཀྱིས་མདོ་སྔགས་ཆོས་ཚོགས་ཐོ་འགོད་དང་འདུ་ཁང་གཏན་ཁེལ་སོགས་ཀྱི་བྱ་བ་ལེགས་གྲུབ་བྱུང་ནས། མིང་ལའང་བླ་རུང་མདོ་སྔགས་རིགས་པའི་ཆོས་ཚོགས་ཞེས་བཏགས། དེར་ཞུགས་མི་སྣ་རྣམས་དང་འབྲེལ་འདྲིས་སྟབས་བདེ་བའི་ཆེད། ཚོགས་མི་ཕལ་ཆེར་རྒྱ་ནག་པས་གྲུབ་ཡོད།^p32
ཆོས་ཚོགས་ལེགས་པར་གྲུབ་རྗེས། ཆོས་རྗེ་ཉིད་སྐུ་དངོས་སུ་དེར་བྱོན་ནས་འཇམ་དཔལ་ཡེ་ཤེས་སེམས་དཔའི་དབང་དང་བྱིན་རླབས་གནང་། བླ་རུང་མདོ་སྔགས་རིགས་པའི་ཆོས་ཚོགས་གསར་དུ་ཚུགས་པའི་སྐོར་ཉིའུ་ཡོག་འཛམ་གླིང་ཚགས་པར་དང་ཉིའུ་ཡོག་གཟའ་འཁོར་དུས་དེབ་སོགས་ཀྱི་པར་ངོས་དང་པོར་བཀོད་འདུག^p34
ཆོས་ཚོགས་འདི་ལས་གཉེར་ཡུན་རིང་བྱས་པའི་རྗེས་སུ། འཕྲིན་སྐྱེལ་སྟབས་མི་བདེ་བ་སོགས་རྒྱུ་རྐྱེན་འགའ་ཡིས་རྒྱུན་སྐྱོང་མ་ཐུབ་ཀྱང་། ཐོག་མའི་རྟེན་འབྲེལ་འདི་ཡིས། མི་རྣམས་ལ་རྗེ་ཉིད་ཀྱི་ཆོས་བརྒྱུད་ལ་འབྲེལ་བ་དང་ཐར་བའི་ས་བོན་འཇོག་པར་ནུས་པ་ཆེན་པོ་ཐོན། ད་ལྟ་ཡང་མི་མང་པོས་བླ་རུང་དང་འབྲེལ་བའི་ནང་ཆོས་ལ་མུ་མཐུད་དུ་ཐོས་བསམ་བྱས་ཏེ་ཤུགས་རྐྱེན་ལེགས་པོ་ཐེབས་པར་ཐོས།^p36
མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་ཁང་དུ་གཟིགས་སྐོར་ལ་ཕེབས་པ།^p38
ཆོས་རྗེ་ཉིད་ལ་མཉམ་འབྲེལ་རྒྱལ་ཚོགས་ཀྱི་དྲུང་ཡིག་གཞོན་པ་སྐུ་ཞབས་མཱོ་རའེ་སི་བྲང་（Maurice Strong）གིས་བསྐུར་བའི་འཕྲིན་ཡིག་འབྱོར་ཏེ། མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་བཀོད་འདོམས་ཁང་（United Nations Headquarters）དུ་གཟིགས་སྐོར་ལ་ཕེབས་པར་གདན་ཞུ་བྱས་ཤིང་། འབྲུག་རྒྱལ་ཁབ་ཀྱི་གཞུང་ཚབ་ཁང་ལ་སྣེ་ལེན་བྱེད་པར་མངགས་བཅོལ་གནང་འདུག^p39
ཕྱི་ཟླ་༨པའི་ཚེས་༣ཉིན། ཆོས་རྗེ་ཉིད་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་ཁང་དུ་བྱོན། ཐོག་ཁང་གི་མདུན་ཕྱོགས་སུ། སྐབས་དེའི་མཉམ་འབྲེལ་རྒྱལ་ཚོགས་ཀྱི་ཁོངས་ཞུགས་རྒྱལ་ཁབ་༡༨༤ཡི་༼ད་ལྟ་ཁོངས་ཞུགས་རྒྱལ་ཁབ་༡༩༣ཡོད་༽རྒྱལ་དར་རྣམས་གྲལ་འགྲིག་པོར་བསྒྲེངས་ཤིང་། དེ་དག་གི་དཀྱིལ་དུ་མཉམ་འབྲེལ་རྒྱལ་ཚོགས་ཀྱི་དར་ཆ་བསྒྲེངས་ནས་འདུག^p42
འབྲུག་རྒྱལ་ཁབ་ཀྱི་སྐུ་ཚབ་པ་རྣམས་ཀྱི་སྣེ་ཁྲིད་འོག ཆོས་རྗེ་ཉིད་ཀྱིས་དྲུང་ཡིག་ཐོག་ཁང་དང་ཚོགས་ཁང་ཆེན་མོ། གྲོས་མོལ་ཐོག་ཁང་། དཔེ་མཛོད་ཁང་སོགས་སུ་རིམ་པ་བཞིན་དུ་གཟིགས་སྐོར་གནང་། ལྷག་པར་དུ་ངེད་ཅག་ལ་གསེར་གྱི་གཏན་སྲོལ་ཞེས་པའི་མོ་སེ་ཁིའམ་རྒྱན་ཕག་（mosaic）རི་མོ་སྐད་གྲགས་ཆེ་བ་ཞིག་ངོ་སྤྲོད་བྱས་སོང་། སྒྱུ་རྩལ་བརྩམས་ཆོས་འདི་ལས། རིགས་རྒྱུད་དང་པགས་མདོག དད་མོས་སོགས་ཐ་དད་པའི་མི་རྣམས་འཆམ་མཐུན་མཉམ་གནས་ཡོང་བ་དང་། ཞི་བདེ་དང་བརྩི་བཀུར་གྱིས་འཚོ་བའི་ཁེ་དབང་འདྲ་མཉམ་དུ་ཡོད་པ་བསྟན་ཡོད་པར་བཤད། རི་མོ་དེའི་ངོས་སུ་དབྱིན་ཡིག་གི་ལམ་ནས། ཕ་རོལ་པོས་ཁྱོད་ལ་ཇི་ལྟར་བྱས་ན་དགའ་བ་ནང་བཞིན། ཁྱོད་ཀྱིས་ཀྱང་ཕ་རོལ་པོར་དེ་ལྟར་བྱ་དགོས་（Do unto others, as you would have them do unto you.）ཞེས་བཀོད་འདུག^p44
དེ་ནས་ཆོས་རྗེ་ཉིད་ཀྱིས་མཉམ་འབྲེལ་རྒྱལ་ཚོགས་ཀྱི་ཚོགས་ཁང་ཆེན་མོའམ། རྒྱལ་ཁབ་སོ་སོའི་འཐུས་མི་རྣམས་ལྷན་ཅིག་ཏུ་འཚོགས་སའི་ཚོགས་ཁང་དུ་གཟིགས་མོ་གནང་། ཉིན་དེར་ཚོགས་འདུ་གང་ཡང་མེད་པར་སྟོང་ལྷང་ངེར་འདུག་ནའང་། ཁོང་ཐུགས་ཤིན་ཏུ་སྤྲོ་བའི་ངང་ནས་འཛམ་གླིང་ཞི་བདེ་ཡོང་བར་ཐུགས་བསྐྱེད་དང་སྨོན་ལམ་རྒྱ་ཆེར་གནང་ཞིང་། ངེད་ཅག་སྐུ་འཁོར་རྣམས་དང་མཉམ་གཅིག་ཏུ་དབང་སྡུད་གསོལ་འདེབས་ཀྱང་གསུངས།^p46
ཧཱ་ཝར་ཌི་སློབ་ཆེན་གྱི་དགེ་རྒན་ཆེན་མོ་ཞིག་གི་ཕྱིར་དྲན།^p48
ཧཱ་ཝར་ཌི་སློབ་ཆེན་དུ་དགེ་རྒན་ཆེན་མོ་ལྗ་ནའེ་ཐུ་རྒྱ་མཚོ་（Janet Gyatso）ཟེར་བ་ཞིག་ཡོད་ཅིང་། བདག་ཐེངས་གཉིས་ལ་ཧཱ་ཝར་ཌི་སློབ་ཆེན་དུ་ནང་ཆོས་འཆད་ཁྲིད་བྱེད་དུ་འགྲོ་སྐབས། སྔ་གཞུག་ཏུ་ཁོང་གིས་སྣེ་ལེན་བྱས་པ་ཡིན། ཕྱི་ལོ་༡༩༩༣ལོར། མོས་ཆོས་རྗེ་ཉིད་ཞལ་མཇལ་མྱོང་བ་མ་ཟད་ཆོས་ཁྲིད་སྐད་སྒྱུར་ཡང་བྱས་མྱོང་། ཉེ་ཆར་བདག་གིས་ཁོང་ལ་བཅར་འདྲི་བྱས་ཤིང་། ཕྱིར་དྲན་གྱི་དོན་ཕལ་མོ་ཆེ་ཡིག་ཐོག་ཏུ་བཀོད་པ་འདི་ལྟ་སྟེ།^p49
སྐབས་དེར་ང་རང་ལཱན་ཧྥོ་སི་ཐྲེར་སློབ་ཆེན་（Lan Foster University）དུ་སློབ་ཁྲིད་བྱེད་བཞིན་ཡོད་པ་ལས་ཧཱ་ཝར་ཌི་སློབ་ཆེན་དུ་ལས་སྤོར་བྱས་མེད། ཆོས་རྗེ་མཆོག་གི་སྐད་སྒྱུར་བའི་ཕ་རྒན་ན་ནས་ཕ་ཡུལ་དུ་སྐོར་རྒྱག་ཏུ་འགྲོ་དགོས་བྱུང་བས། ཉིའུ་ཡོག་ཏུ་བཞུགས་པའི་དུས་སྐབས་ངེས་ཅན་གྱི་རིང་ལ་ངས་ཁོང་ལ་སྐད་སྒྱུར་བྱས་པ་ཡིན། ཁོང་གི་གསུང་སྐད་ནི་མགོ་ལོག་གི་འབྲོག་སྐད་རེད་འདུག ངས་བོད་སྐད་ཧ་ཅང་ཡག་པོ་མི་ཤེས་ཀྱང་། ཁོང་ནི་གོ་སླ་བའི་ཚིག་གིས་བརྡ་སྤྲོད་པར་ཤིན་ཏུ་མཁས་ཤིང་རིགས་ལམ་གྱི་འཁོར་ཕྱོགས་ཀྱང་ཧ་ཅང་གསལ་བས། ཅི་གསུངས་རྣམས་བདེ་བླག་ཏུ་ཤེས་ཐུབ་པ་བྱུང་།^p51
ཁོང་ནི་སྐུ་གཟུགས་ཧ་ཅང་སྟོབས་ཤིང་ཆེ་བ་ཞིག་རེད། ངས་ཐེངས་དང་པོར་ཁོང་མཇལ་བ་ན། གཟི་བརྗིད་ཆེ་བའི་སྐུ་གཟུགས་ཀྱི་བཀོད་པས་ང་རང་ཧ་ལས་སུ་བཅུག^p52
སྐབས་དེར་ངས་རིག་འཛིན་འཇིགས་མེད་གླིང་པའི་རྣམ་ཐར་དབྱིན་ཡིག་ཏུ་བསྒྱུར་ནས་པར་སྐྲུན་བྱ་བར་སྟ་གོན་བྱེད་བཞིན་པའི་སྒང་ཡིན་པས། ངས་ཁོང་ལ་དཔེ་ཆ་དེ་དང་འབྲེལ་བའི་དྲི་བ་མང་པོ་བཏོན་པ་ཡིན། དེ་ལས་དྲི་བ་གཅིག་ནི་ད་ལྟའང་གསལ་པོར་དྲན་ཀྱིན་འདུག འཇིགས་མེད་གླིང་པའི་རང་རྣམ་ལ་དེབ་གཉིས་ཡོད་པ་ལས། གཅིག་གི་མིང་ལ་མཁའ་འགྲོའི་གསང་གཏམ་ཆེན་མོ་ཞེས་བཏགས་འདུག་པས། ངས་ཆོས་རྗེ་མཆོག་ལ་འཇིགས་མེད་གླིང་པ་སྐྱེས་པ་ཡིན་བཞིན་དུ། ཁོང་གི་རྣམ་ཐར་ལ་བུད་མེད་ཀྱི་གསང་གཏམ་ཆེན་མོ་ཞེས་འདོགས་དགོས་དོན་ཅི་ཡིན་ཞེས་དྲིས་པ་ན། ཁོང་གིས་ཤིན་ཏུ་ཞིབ་ཕྲའི་སྒོ་ནས་འགྲེལ་བཤད་གསལ་པོ་གནང་སོང་བས། ངའི་ཡིད་ཀྱི་ཐེ་ཚོམ་ཐམས་ཅད་རྨེག་མེད་དུ་བཏང་།^p53
དེ་རྗེས་ཀྱི་ཉིན་ཞིག་ལ། ཆོས་རྗེ་མཆོག་ངེད་ཅག་མི་ལྔ་དྲུག་ཙམ་དང་མཉམ་དུ་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་བཀོད་འདོམས་ཁང་ལ་གཟིགས་སྐོར་དུ་སོང་། མཉམ་འབྲེལ་རྒྱལ་ཚོགས་སུ་འཛམ་གླིང་གི་རྒྱལ་ཁབ་སོ་སོ་ནས་ཡོང་བའི་སྐུ་ཚབ་སྡེ་ཁག་ཡོད་པ་ལས། ཆོས་རྗེ་མཆོག་ལ་འབྲུག་རྒྱལ་ཁབ་ཀྱི་སྐུ་ཚབ་པས་སྣེ་ལེན་བྱས་ཤིང་ཚོགས་ཁང་གི་ཕྱོགས་ཀུན་ཏུ་གཟིགས་སྐོར་ལ་ཁྲིད། ཁོང་གིས་དེར་རྒྱལ་ཁབ་སོ་སོའི་སྐུ་ཚབ་རྣམས་ཀྱིས་མཉམ་དུ་གྲོས་མོལ་བྱ་སའི་ཚོགས་ཁང་ཆེན་མོ་ཞིག་འདུག་པ་གཟིགས་ཚེ། འདི་འདྲའི་རྒྱལ་ཁབ་མང་པོའི་སྐུ་ཚབ་རྣམས་མཉམ་གཅིག་ཏུ་འཛོམས་ནས། གནད་དོན་སྣ་ཚོགས་གྲོས་མོལ་བྱེད་པ་ནི་ཆེས་ལེགས་པར་མཐོང་ཞེས་བསྟོད་བསྔགས་གནང་ཞིང་། འབྲུག་རྒྱལ་ཁབ་ཀྱི་སྐུ་ཚབ་རྣམས་ལ། འོས་འདེམས་དང་གྲོས་མོལ་ཇི་ལྟར་བྱེད་ཚུལ་སོགས་མཉམ་འབྲེལ་རྒྱལ་ཚོགས་ཀྱི་འགྲོ་སྟངས་སྐོར་ལ་རྒྱུས་ལོན་ཞིབ་ཕྲ་མཛད།^p54
མ་གཞི་ཁོང་ནི་ཧ་ཅང་རླབས་ཆེ་བའི་སྐྱེས་ཆེན་ཞིག་རེད། གཞན་མང་པོ་མ་སྨོས་ཀྱང་། བླ་རུང་ལྔ་རིག་ནང་བསྟན་སློབ་གླིང་ཕྱག་བཏབ་གནང་བ་འདི་ཁོ་ནའང་འགྲན་པའི་ཟླ་དང་བྲལ་བའི་མཛད་པ་ཞིག་ཡིན་ཏེ། བླ་རུང་གི་གཞི་རྒྱ་ཆེ་ཞིང་ནུས་སྟོབས་ཁྱད་དུ་འཕགས་པས་བོད་བརྒྱུད་ནང་བསྟན་སྤྱི་ལ་ཤུགས་རྐྱེན་གལ་ཆེན་ཐེབས་ཡོད་པར་མ་ཟད། ལྷག་པར་དུ་བླ་རུང་ན་བླ་སེར་དང་བཙུན་མ་མང་པོ་ཡོད་པས་ཀྱང་། བོད་བརྒྱུད་ནང་བསྟན་ཡུན་དུ་གནས་པར་གལ་ཆེ་བའི་ཕན་ནུས་ཐོན་འདུག^p55
གཞན་ཡང་གླེང་རིན་ཆེ་བ་ཞིག་ལ། བླ་རུང་གི་ཨཱརྱ་ཏཱ་རེའི་ཆོས་ཚོགས་ཀྱི་མཁན་མོ་རྣམས་ཀྱིས་བོད་ཀྱི་བུད་མེད་དམ་པ་དག་གི་གསུང་ཆོས་བསྡུ་སྒྲིག་དཔེ་ཡག་པོ་གནང་འདུག་ལ། དེ་ཡིས་བོད་བརྒྱུད་ནང་བསྟན་ལ་བྱས་རྗེས་ཆེན་པོ་བཞག་འདུག ཁོང་ཚོས་དེ་ལྟ་བུའི་བྱ་བ་རླབས་ཆེན་འགྲུབ་པ་དེ་ཡང་། ཆོས་རྗེ་མཆོག་གི་བྱིན་རླབས་དང་ཐུགས་བསྐྱེད་ཀྱི་མཐུ་ལས་བྱུང་བ་རེད་སྙམ།^p56
འཛམ་གླིང་ཉོ་ཚོང་ལྟེ་གནས་སུ་ཕྱིན་པ།^p57
ཕྱི་ཟླ་༨པའི་ཚེས་༤ཉིན། ཆོས་རྗེ་ཉིད་སྐད་གྲགས་ཆེ་བའི་འཛམ་གླིང་ཉོ་ཚོང་ལྟེ་གནས་ཀྱི་ཆ་གཅིག་ཐོག་ཁང་（World Trade Center）ལ་གཟིགས་སྐོར་དུ་བྱོན། རྩེ་མོ་ཨ་སྔོན་དབྱིངས་སུ་ཟུག་པ་ལྟ་བུའི་ཐོག་ཁང་འདི་གཉིས་ལ། བརྩེགས་རིམ་བརྒྱ་དང་བཅུ། མཐོ་ཚད་ལ་སྨི་བཞི་བརྒྱ་བཅུ་བདུན་ཡོད། དེ་ནི་འཛམ་གླིང་ལ་ལྟ་བའི་སྒེའུ་ཁུང་ཞེས་གྲགས་པ་ནང་བཞིན། སྐབས་དེའི་འཛམ་གླིང་སྟེང་གི་ཆེས་མཐོ་བའི་འཛུགས་སྐྲུན་དུ་གྱུར་བར་མ་ཟད། ཨ་རི་རྒྱལ་ཁབ་ཀྱི་ཕུན་སུམ་ཚོགས་པའི་དར་རྒྱས་ཀྱི་མཚོན་རྟགས་སུའང་གྱུར་ཡོད།^p58
ཐོག་ཁང་འདིའི་མདུན་ཐང་དུ། མི་ཚོགས་ཀྱི་འདུ་བ་རྒོད་པའི་དྲན་རྟེན་ཚོང་ཁང་སྣ་ཚོགས་ཡོད་ཅིང་། ངེད་ཅག་དེར་སོང་བ་ན། སྤྲོ་འཁྱམ་པ་དག་གིས་སྲིད་འཛིན་ཁཱི་ལིན་ཐོན་གྱི་འདྲ་གཟུགས་སྣ་ཚོགས་ཀྱི་འགྲམ་དང་། མགོ་བོ་ཁཱི་ལིན་ཐོན་དང་ལུས་པོ་ཁྱི་ཡི་དབྱིབས་ཅན་སོགས་ལ་ཞོན་ནས་རྣམ་འགྱུར་སྣ་ཚོགས་སྟོན་བཞིན་འདྲ་པར་ལེན་མཁན་མང་དུ་མཆིས། དེ་མིན་ཁཱི་ལིན་ཐོན་ལ་དམའ་འབེབས་བྱེད་པའི་རྩེད་ཆས་ཀྱང་མང་པོ་འཚོང་བཞིན་འདུག ངེད་ཅག་གིས་ཆོས་རྗེ་ཉིད་ལ་སྐུ་པར་ལེན་པའི་རེ་བ་ཞུས་པ་ལྟར། ཁོང་གིས་ཕྱག་གཡས་ཁཱི་ལིན་ཐོན་གྱི་ཕྲག་མགོར་བཞག་ནས་དྲན་རྟེན་གྱི་འདྲ་པར་བསྐྱོན།^p60
དེ་ནས་ངེད་ཅག་གློག་སྐས་ལ་བསྡད་དེ་ཐད་ཀར་ཁང་བརྩེགས་བརྒྱ་དང་བཅུ་པའི་སྟེང་དུ་སོང་ཞིང་། དེར་རྒྱང་ཤེལ་མང་ཙམ་ཡོད་པར་ཚང་མས་རེས་མོས་སུ་བལྟས་པ་ན། འཛམ་གླིང་གི་དངུལ་རྩའི་གྲོང་ཁྱེར་ཉིའུ་ཡོག་གི་བཀོད་པ་གསལ་བར་མཐོང་ཐུབ། སླར་ཡང་ཁང་བརྩེགས་ཀྱི་ཡང་སྟེང་དུ་སོང་བ་ན། དེ་ནི་ལྷག་ཏུ་ཁད་ཡངས་མོ་ཡིན་ལ་མན་ཧཱ་ཐིན་གྱི་གྲོང་ཁྱེར་ཧྲིལ་པོ་མིག་འོག་ཏུ་ཚུད་པར་མ་ཟད། ཐག་མི་རིང་བའི་མཚམས་ཀྱི་རང་དབང་ལྷ་མོའི་འདྲ་སྐུ་ལའང་ལྟད་མོར་རོལ་ཆོག འདྲ་སྐུ་དེ་ནི་ཧྥ་རན་སི་རྒྱལ་ཁབ་ཀྱིས་ཨ་རི་རྒྱལ་ཁབ་དབུ་བརྙེས་ནས་ལོ་བརྒྱ་ལོན་པར་ལེགས་སྐྱེས་སུ་ཕུལ་བ་ཡིན་ལ། ད་ལྟ་ཨ་རིའི་མཚོན་རྟགས་དང་འཛམ་གླིང་སྟེང་རང་དབང་མཚོན་བྱེད་ཀྱི་བརྐོས་བརྙན་གྲགས་ཆེ་ཤོས་སུ་གྱུར་ཡོད།^p62
འཛམ་གླིང་ཉོ་ཚོང་ལྟེ་གནས་ནི་ཤིན་ཏུ་ངོ་མཚར་ཆེ་བའི་འཛུགས་སྐྲུན་ཞིག་སྟེ། ཨ་སྒོར་དུང་ཕྱུར་བརྒྱ་དང་ལྔ་བཅུ་ང་ལྔ་ཙམ་འགྲོ་གྲོན་དུ་བཏང་ནས་ལོ་བདུན་གྱི་རིང་འཛུགས་སྐྲུན་བྱས་ནས་གྲུབ་པ་རེད། གང་གིས་ཀྱང་མི་ཚུགས་པའི་བརྟན་ཅིང་བརླིང་བའི་ཐོག་ཁང་མཐོན་པོ་དེ་ལྟ་བུ་ཡང་། མཐར་ཕྱི་ལོ་༢༠༠༡ལོའི་ཟླ་༩པའི་ཚེས་༡༡ཉིན། འཇིགས་སྐུལ་རིང་ལུགས་པའི་ཐོལ་རྒོལ་ཐེབས་ཏེ་ཆུ་ཚོད་གཉིས་ཙམ་གྱི་རིང་ལ་ཐལ་བ་རྡུལ་དུ་བརླགས། ཕྱིས་སུ་ཉིའུ་ཡོག་གྲོང་ཁྱེར་གྱི་སྲིད་འཛིན་སྡེ་ཁག་གིས། འཛམ་གླིང་ཉོ་ཚོང་ལྟེ་གནས་ཀྱི་ཐོག་ཁང་སླར་ཡང་འཛུགས་སྐྲུན་བྱ་རྒྱུའི་འཆར་གཞི་བཞག་སྟེ། ཐོག་ཁང་ལྔ་དང་འདས་གྲོངས་སུ་སོང་བ་དག་ལ་དྲན་རྟེན་ཁང་བཅས་བཞེངས་ཤིང་། ད་ལྟ་འཛུགས་སྐྲུན་དེ་དག་གྲུབ་ལ་ཉེ་བར་གྱུར་འདུག^p64
སྐབས་དེ་དུས་ཀྱི་འཛམ་གླིང་ཉོ་ཚོང་ཐོག་ཁང་ཆེན་མོ་ད་ལྟ་རྡུལ་དུ་བརླགས་ཟིན་ལ། ཆོས་རྗེ་ཉིད་ཀྱང་ང་ཚོ་དང་བྲལ་ནས་ལོ་ཉི་ཤུ་སོང་འདུག་ཀྱང་། དེ་དུས་དྲན་རྟེན་དུ་བསྒྲོན་པའི་སྐུ་པར་རྣམས་ནི་བདག་གིས་ད་དུང་ཡང་ཉར་ཚགས་བྱས་ནས་ཡོད།^p66
བླ་རུང་གི་དགེ་བསྙེན་ཆོས་ཚོགས་ཀྱི་བྱུང་བ།^p67
ང་ཚོ་བོད་ཡུལ་དུ་མི་སེར་ཡོངས་རྫོགས་ཆོས་ལ་དད་མཁན་ཤ་སྟག་ཡིན་ཡང་། ཁྱིམ་པ་རྣམས་མཉམ་གཅིག་ཏུ་ཚོགས་ནས་ནང་ཆོས་སློབ་སྦྱོང་བྱེད་པའི་སྲོལ་རྒྱུན་ཆེར་མེད། ཉིན་ཞིག་ཆོས་རྗེ་ཉིད་ཀྱིས། བདག་ལ་སྔགས་སྲུང་མས་དབུགས་དབྱུང་གནང་སྟེ། བླ་རུང་ནས་དགེ་བསྙེན་གྱི་ཆོས་སྡེ་ཞིག་བཙུགས་ན་དད་ལྡན་གྱི་ཁྱིམ་པ་མང་པོར་ཕན་ཐོགས་ཤིང་ཐར་ལམ་ཟིན་པར་འགྱུར་བར་ལུང་བསྟན་པས། ཕྱིར་རང་ཡུལ་དུ་ལོག་རྗེས་དགེ་བསྙེན་གྱི་ཆོས་སྡེ་ཞིག་གཟུག་རྒྱུ་ཡིན་ཞེས་ངེད་ཅག་འགའ་ལ་གློ་བུར་དུ་གསུངས།^p68
བདག་གིས་ཆོས་རྗེ་ཉིད་ལ་ལུང་བསྟན་དེ་སྔགས་སྲུང་མ་སྐུ་དངོས་སྣང་ནས་གསུངས་སམ་ཉམས་དང་རྨི་ལམ་དུ་བྱུང་ཞེས་འདྲི་མ་སྤོབས་ཀྱང་། གསུང་དེ་ཐོས་མ་ཐག་སེམས་པ་ཤིན་ཏུ་དགའ་བར་གྱུར། ངའི་ཕ་མ་གཉིས་ཀྱང་སྐབས་དེར་གསེར་རྟ་རུ་ཡོད་ཅིང་། ཕྱིར་ལོག་སྐབས་ཕ་ཡུལ་དུ་སོང་མ་ཚར་ན་བླ་རུང་ནས་སྡོད་དུ་འཇུག་དགོས་སྙམ་ཞིང་། རྗེ་ཉིད་ལ་རྟེན་འབྲེལ་ཡོད་ཤས་ཆེ་བས། ངས་ཀྱང་ཕ་མ་གཉིས་དགེ་བསྙེན་ནང་དུ་འཇོག་ཨེ་ཐུབ་བལྟ་རྒྱུ་ཡིན་ཞེས་ཞུས།^p69
སྟོན་ཁར་རྗེ་ཉིད་ཕྱིར་བླ་རུང་ལ་བྱོན་རྗེས། བླ་རུང་ལུང་པའི་སྨད་ཕྱོགས་སུ་ས་དཔྱད་མཛད་དེ་དགེ་བསྙེན་གྱི་གཙུག་ལག་ཁང་བཞེང་བའི་དབུ་བརྩམས། དེ་ནི་བོད་ཡུལ་གྱི་ཁྱིམ་པ་རྣམས་ཀྱི་གཙུག་ལག་ཁང་དང་པོ་དེ་ཡང་ཡིན་ཤས་ཆེ། ཐོག་མར་གནས་དེར་ངའི་ཕ་མ་དང་བཅས་དགེ་བསྙེན་ཁྱིམ་ཚང་བཞི་ཙམ་ལས་མེད་ཀྱང་། གཙུག་ལག་ཁང་འཛོམས་རྗེས་རིམ་གྱིས་ཆོས་པ་ཇེ་མང་དུ་གྱུར་ནས་དགེ་བསྙེན་གྱི་ཆོས་སྡེའི་གཞི་རྒྱ་ཆེ་རུ་སོང་། ཆོས་སྡེ་འདི་ནས་ཁྱིམ་པ་རྣམས་ཀྱིས་ནང་ཆོས་ཉམས་ལེན་ལ་འབད་བརྩོན་བྱས་པས། འཆི་ཁར་གྲུབ་པའི་རྟགས་མཚན་སྣ་ཚོགས་ཐོན་མཁན་ཡང་མང་དུ་བྱུང་།^p70
རྗེས་སུ་བོད་ཡུལ་གྱི་ས་ཆ་མང་པོ་ཞིག་གིས་འདི་ལ་དཔེར་བྱས་ཏེ། དགེ་བསྙེན་གྱི་ཆོས་སྡེ་བཙུགས་ནས་ཁྱིམ་པ་རྣམས་ཀྱིས་མཉམ་དུ་ནང་ཆོས་ཉམས་ལེན་བྱེད་པའི་སྲོལ་བཟང་ཆགས།^p71
རླངས་འཁོར་ཁ་ལོ་པ་ཞིག་གི་ཕྱིར་དྲན།^p72
མ་གཞི་ཆོས་རྗེ་མཆོག་གིས་ཉིའུ་ཡོག་གྲོང་ཁྱེར་དུ་ཆོས་ཁྲིད་གསུངས་བའི་རྒྱུ་ཆ་ཅི་ཡང་ལག་སོན་མ་བྱུང་མོད། འོན་ཀྱང་སྟབས་ལེགས་པ་ཞིག་ལ། སྐབས་དེར་ང་ཚོའི་རླངས་འཁོར་ཁ་ལོ་པ་སྐུ་ཞབས་ཨེ་བོན་（Yvon Chausseblanche）གྱིས་ཆོས་ཁྲིད་འགའ་ཞིག་ཁོ་རང་སྒེར་གྱི་སྒྲ་ཐག་ཏུ་ཕབ་འདུག་པ་རྣམས་རྙེད་སོང་། དེ་དག་ལས་ཀྱང་ཆོས་ཁྲིད་ཀྱི་སྒྲ་ཕལ་ཆེ་བ་ལོ་མང་འགོར་བའི་དབང་གིས་གསལ་པོར་ཚོར་ཐབས་མེད་ཀྱང་། ཅུང་ཟད་གོ་ཐུབ་པའི་ཆོས་ཐུན་གཅིག་འདིར་བཀོད་པ་ཡིན། ང་ཚོས་སྐུ་ཞབས་ཨེ་བོན་ལ་བཀའ་དྲིན་ཞུ་བ་དང་མཉམ་དུ་ཁོང་ལ་བཅར་འདྲི་ཐེངས་གཅིག་བྱས་པ་ཡིན། ཁོང་གིས་ཆོས་རྗེ་མཆོག་གི་སྐོར་གླེང་བ་ན། དད་པ་ཤུགས་དྲག་པོའི་ངང་མིག་ནས་མཆི་མ་འཐོར་བཞིན་སེམས་འགུལ་ཐེབས་པའི་སྒོ་ནས་འདི་ལྟར་བཤད།^p73
ཆོས་རྗེ་མཆོག་ཉིའུ་ཡོག་ལ་བྱོན་སྐབས་ཀྱི་སྡོད་གནས་ནི་བྷ་ཝེ་རའེ་ཁྲོམ་ལམ་གྱི་ཁང་རྟགས་༢༢༢པ་ཡིན་ལ། དེ་ནི་སྒྱུ་རྩལ་པ་མང་པོའི་འདུ་ལོང་ཆེ་ཞིང་བསྟན་འཛིན་གྱི་སྐྱེས་བུ་མང་པོར་སྣེ་ལེན་བྱ་ཡུལ་ཞིག་ཀྱང་ཡིན།^p75
གཟའ་འཁོར་དེའི་ནང་དུ། ངས་དུས་ཚོད་མང་ཆེ་བར་ཆོས་རྗེ་མཆོག་དང་སྐུ་འཁོར་རྣམས་ཀྱི་བཞུགས་འཁོར་ཁ་ལོ་པའི་ལས་འགན་ཁུར་བ་ཡིན། ནམ་རྒྱུན། ཆོས་རྗེ་མཆོག་དང་སྐུ་འཁོར་རྣམས་ཆོས་ཚོགས་སུ་བསྐྱལ་ནས་རླངས་འཁོར་ལས་བབས་རྗེས། ངས་ཐོག་མར་རླངས་འཁོར་འཁོར་ལྷས་སུ་བཞག་ནས་གཟོད་ཆོས་གསུང་སའི་ཚོགས་ཁང་དུ་ཕྱིན་པ་ཡིན་ལ། ཁོང་ཉིའུ་ཡོག་ལ་བྱོན་པའི་གོ་སྐབས་ཧ་ཅང་དཀོན་མོ་ཡིན་རྒྱུ་རེད་སྙམ་ནས། སྒྲ་ཕབ་ཆས་ཤིག་གྲ་སྒྲིག་བྱས་ཏེ་ཁོང་གི་གསུང་ཚང་མ་སྒྲ་འཇུག་བྱས། འོན་ཀྱང་། སྐབས་འགར་རླངས་འཁོར་འཇོག་པར་དུས་ཡུན་ངེས་ཅན་འགོར་འགྲོ་བས། གསུང་ཁ་ཚང་བར་སྒྲ་འཇུག་བྱེད་མ་ཐུབ་པའི་ཁར། གྲལ་མཐའ་ནས་སྒྲ་ཕབ་པ་ལ་ཙག་སྒྲ་མང་དུ་འདྲེས་ནས་སེམས་ཚིམ་པོ་ཞིག་ཡོང་མེད།^p76
ཆོས་རྗེ་མཆོག་གིས་དབང་གནང་བ་ན། ང་རང་ལ་འཇམ་དཔལ་དབྱངས་དངོས་ཀྱིས་དབང་སྐུར་བཞིན་པའི་སྣང་བ་ཤར་བ་ཡིན། ཁོང་གིས་གཏེར་ཆོས་དེ་བཞེས་ནས་ཡུན་རིང་མ་འགོར་བ་ཡིན་ཚོད་འདུག རྗེས་སུ་ང་རང་བྷོ་སི་ཐིན་ལ་སོང་ནས་དབང་ཞུ་སྐབས། ཁོང་གིས་རི་བོ་རྩེ་ལྔ་ནས་གཏེར་བཞེས་པའི་སྐོར་གྱི་སྐུ་པར་ཞིག་ཀྱང་རྙེད་བྱུང་།^p77
ལྕེ་བཙུན་སྙིང་ཐིག་གི་དབང་སྐུར་སྐབས་སྐད་རིགས་གསུམ་ལ་བསྒྱུར་ཏེ་གསུངས་ཤིང་། དེ་ལས་རྒྱ་སྐད་དུ་སྒྱུར་མཁན་ནི་མཁན་པོ་བསོད་དར་རྒྱས་རེད། ཆོས་རྗེ་མཆོག་གིས་ངེས་འབྱུང་སྒོམ་ཐབས་གསུངས་རྗེས་ཚང་མར་སྒོམ་རྒྱག་ཏུ་བཅུག ཅུང་ཙམ་འགོར་རྗེས། ཁོང་གི་ཞལ་ནས། དེ་རིང་ང་ཚོའི་ཚོགས་རར་ནུབ་ཕྱོགས་པ་དང་བོད་རིགས། རྒྱ་རིགས་བཅས་འདུས་ཡོད་པ་ལས། རིགས་གཅིག་གིས་ལུས་པོ་དང་མགོ་བོ་གཉིས་ཀ་མི་འགུལ་བར་མཉམ་པར་བཞག་འདུག རིགས་གཅིག་གིས་མགོ་བོ་མི་འགུལ་ཡང་མིག་གིས་ཕར་ལྟ་ཚུར་ལྟ་བྱེད་ཀྱིན་འདུག ཡང་རིགས་གཅིག་གིས་ནི་མགོ་དང་ལུས་པོ་གཉིས་ཀ་འགུལ་བཞིན་འདུག་པས་ཅུང་ཟད་མི་བཟང་བའི་ཆ་རེད། ཁྱེད་ཚོས་རང་ཉིད་རིགས་གང་དུ་གཏོགས་པ་ཨེ་ཁེད་ལྟོས་གསུངས་པ་ན། ཚོགས་ར་ཡོངས་སུ་དགོད་སྒྲས་གང་བར་གྱུར། དེ་ནི་སྐབས་དེར་ང་ལ་བཞག་པའི་བརྗེད་པར་དཀའ་བའི་བག་ཆགས་ཤིག་ཡིན།^p78
ཆོས་རྗེ་ཉིད་ཉིའུ་ཡོག་ཏུ་བཞུགས་པའི་ཉིན་ཐ་མའི་དུས་སུ། ངས་ཁོང་མྱུར་དུ་ས་ཆ་འདི་ནས་ཕེབས་རན་པ་རེད་ཨང་སྙམ་ནས། བུ་ཆུང་ཨ་མ་དང་འབྲལ་བ་ལྟར་སྡུག་བསྔལ་ཞིང་ངུས་པ་ཡིན། ཁོང་བྷོ་སི་ཐིན་ལ་བྱོན་ནས་ཉིན་གཉིས་འགོར་རྗེས། ངས་བླ་མ་ཁོང་ཧ་ཅང་དྲན་དྲགས་པས། མགོ་ཁྲིད་ལ་དགོངས་པ་ཞུས་ཤིང་འཕྲུལ་རྟར་ཞོན་ཏེ་བྷོ་སི་ཐིན་གྱི་ཕྱོགས་སུ་བསྐྱོད། ཉིན་དེར་གནམ་གཤིས་མི་ལེགས་ཤིང་དྲག་ཆར་རྒྱུན་ཆད་མེད་པར་བབས་པས། ལམ་བར་ནས་ཟམ་འོག་ཏུ་ཆར་ཡིབ་བྱེད་ཞོར་བྷོ་སི་ཐིན་ལ་སླེབས་སོང་།^p79
སྐལ་བ་བཟང་པོ་ཞིག་ལ། ཆོས་རྗེ་མཆོག་གིས་དབང་གནང་བ་དག་ང་ལ་སླར་ཡང་ཐོབ་སོང་བར་མ་ཟད། ང་ཚོ་འགའ་ཞིག་གིས་རེ་བསྐུལ་ཞུས་པ་ལྟར། ཆེད་དུ་ཆོས་ཁྲིད་དང་ལུང་འགའ་ཞིག་ཀྱང་གསུངས་བྱུང་བས་སེམས་འགུལ་ཚད་མེད་པ་ཐེབས། སྐབས་དེར་ཁོང་གི་སྐུ་ལུས་མི་བདེ་ཞིང་སྙུང་གཞི་ཅུང་ཙམ་ཚབས་ཆེ་བར་གྱུར་པས། ཅུང་མིན་ན་ལས་རིམ་ཕྱི་མ་རྣམས་ཀྱང་བསྟུང་དགོས་ཐུག་པ་སོགས་ཕྱིས་སུ་ད་གཟོད་ཤེས་པ་ཡིན། ཁོང་གིས་ང་ཚོ་ལ་ཐུགས་རྗེ་ཆེན་པོས་གཟིགས་ཏེ་རེ་བ་ཡོངས་སུ་བསྐང་བ་ནི་ཆེས་ངོ་མཚར་ཞིང་ཡིད་འགུལ་ཐེབས་པ་ཞིག་རེད།^p80
གུ་རུ་རིན་པོ་ཆེའི་ངོ་སྤྲོད།^p81
ཕྱི་ཟླ་༨པའི་ཚེས་༦ཉིན། ཆོས་རྗེ་ཉིད་ཀྱིས་ཨོ་རྒྱན་ཆོས་ཚོགས་སུ་གུ་རུ་རིན་པོ་ཆེའི་སྒྲུབ་ཐབས་གསུངས། ཆོས་ཐུན་འདིའི་ནང་དོན་ནི་དཀའ་ཁག་མང་དུ་བརྒྱུད་ནས་རྙེད་པ་ཡིན་ལ། གསུང་ཆོས་ཀྱི་རྒྱུ་ཆ་མཁོ་སྤྲོད་གནང་མཁན་ནི་སྐབས་དེར་ཆོས་རྗེ་ཉིད་ཀྱི་བཞུགས་འཁོར་ཁ་ལོ་པ་ཡིན། ཁོང་ནམ་རྒྱུན་རླངས་འཁོར་འཇོག་ཏུ་འགྲོ་དགོས་པས། ཆོས་ཁྲིད་ཀྱི་མགོའི་ཆ་ཤས་ཉུང་ཙམ་ཆད་འདུག་ཀྱང་ནང་དོན་ཕལ་ཆེར་ཁ་ཚང་བས། འདིར་ཡི་གེར་བཀོད་དེ་ཀུན་ལ་མིག་དང་སེམས་ཀྱི་དགའ་སྟོན་དུ་ཕུལ་བ་ལགས།^p82
བསམ་པ་དེ་ཡང་ཇི་ལྟར་བཅོས་པར་བྱ་ཞེ་ན། བསམ་པ་རྒྱ་ཆེ་བ་བྱང་ཆུབ་སེམས་ཀྱི་ཀུན་སློང་དང་། ཐབས་རྒྱ་ཆེ་བ་གསང་བ་སྔགས་ཀྱི་ཀུན་སློང་རྣམ་པ་གཉིས་གང་རུང་གི་སྒོ་ནས་འཆོས་པར་བྱ་དགོས་པ་ཡིན། བསམ་པ་རྒྱ་ཆེ་བ་བྱང་ཆུབ་སེམས་ཀྱི་ཀུན་སློང་དེ་ཇི་ལྟ་བུ་ཞིག་ཡིན་སྙམ་ན། ནམ་མཁས་གར་ཁྱབ་སེམས་ཅན་གྱིས་ཁྱབ། སེམས་ཅན་གྱིས་གར་ཁྱབ་ལས་དང་ཉོན་མོངས་པས་ཁྱབ། ལས་དང་ཉོན་མོངས་པས་གར་ཁྱབ་ཀྱི་སེམས་ཅན་རྣམས་ལ་སྡུག་བསྔལ་མུ་མཐའ་མེད་པས་ཁྱབ་ཡོད། སྡུག་བསྔལ་མུ་མཐའ་མེད་པ་ལ་སྤྱོད་པའི་སེམས་ཅན་རྣམས་ཀྱང་ཐོག་མ་མེད་པའི་དུས་ནས་རང་གི་ཕ་མ་མ་བྱས་པ་གཅིག་ཀྱང་མེད་ཚུལ་བཅོམ་ལྡན་འདས་ཀྱིས་མདོ་སྡེ་རྣམས་སུ་གསལ་པོར་གསུངས་ཡོད། ཕ་མར་གྱུར་པའི་དུས་སུ་ད་ལྟའི་ཕ་མ་དང་ཁྱད་མེད་པར་བསམ་པ་དཀར་པོ་དང་སྤྱོད་པ་བཟང་པོའི་སྒོ་ནས་དྲིན་ཆེན་པོས་བསྐྱངས་པ་ཤ་སྟག་ཡིན། དྲིན་ཆེན་པོས་བསྐྱངས་པའི་སེམས་ཅན་དེ་དག་ཐམས་ཅད་ཀྱིས་འདོད་པ་བདེ་བ་འདོད་ཀྱང་བདེ་བའི་རྒྱུ་དགེ་བ་ནི་བསྒྲུབ་མི་ཤེས། མི་འདོད་པ་སྡུག་བསྔལ་ཡིན་ཡང་སྡུག་བསྔལ་གྱི་རྒྱུ་དང་དུ་བླངས་ནས་ཞེ་འདོད་དང་ལག་ལེན་གཉིས་རྒྱབ་འགལ་དུ་གྱུར་པ་རེད།^p83
དེ་བས་སྡུག་བསྔལ་དང་ལྡན་པའི་སེམས་ཅན་དེ་དག་ཐམས་ཅད་སྡུག་བསྔལ་དང་བྲལ་བར་གྱུར་ན་ཅི་མ་རུང་སྙམ་པའི་བསམ་པ་བཟང་པོ་རེ་བསྐྱེད་དགོས་པ་ཡིན། སྡུག་བསྔལ་དང་བྲལ་ན་སྙམ་པའི་བློ་དེ་ཡང་སེམས་ཅན་དེ་དག་ལུས་བདེ་བ་དང་སེམས་སྐྱིད་པ་སོགས་ཕུན་སུམ་ཚོགས་པའི་བདེ་བ་ལ་དགོད་དགོས་སྙམ་པའི་བསམ་པ་བཟང་པོ་བསྐྱེད་དགོས། བདེ་བ་དང་ལྡན་པའི་རྟེན་དེ་ཡང་ངན་སོང་གནས་གསུམ་ལྟ་བུ་ལ་ནི་བདེ་བའི་གོ་སྐབས་ཤིག་རྩ་བ་ནས་མེད་ཅིང་། མཐོ་རིས་ལྷ་མིའི་ལུས་རྟེན་རྐྱང་བ་ལ་བདེ་བ་མྱོང་དགོས་པ་ཡིན་མོད། འོན་ཀྱང་ལྷ་དང་མིའི་བདེ་བ་ཡང་གནས་སྐབས་བདེ་བ་ཙམ་དུ་སྣང་ཡང་། དོན་དུ་མི་རྟག་པ་དང་འགྱུར་བའི་སྡུག་བསྔལ་ལས་མ་འདས་པ་ཡིན་པས་དེ་ལ་ཡང་སྙིང་པོ་མེད། དེའི་ཕྱིར་ན་སེམས་ཅན་ཐམས་ཅད་གནས་སྐབས་ལྷ་དང་མིའི་བདེ་བ་ཙམ་ལ་བཀོད་ན་ཡང་ཕན་འབྲས་ཆེན་པོ་ཞིག་མེད་པ་ཤེས་དགོས། འཁོར་བའི་རྒྱུ་ལས་དང་ཉོན་མོངས་པ། དེའི་འབྲས་བུ་སྡུག་བསྔལ་ཐམས་ཅད་དང་བྲལ་བ་ཉན་ཐོས་དང་རང་སངས་རྒྱས་ཀྱི་གོ་འཕང་ཐོབ་ན་ཡང་རང་དོན་དུ་བདེ་བ་ཕུན་སུམ་ཚོགས་པ་ཡོད་ཀྱང་། གཞན་དོན་རྒྱ་ཆེན་པོ་བསྒྲུབ་པའི་གོ་སྐབས་མེད་པའི་ཕྱིར་ན། དེ་ལ་སེམས་ཅན་ཐམས་ཅད་བཀོད་ཀྱང་ཕན་འབྲས་ཆེན་པོ་མེད་པར་ཤེས་དགོས། དེས་ན་བདག་མེད་རྟོགས་པའི་ཤེས་རབ་ཀྱིས་སྲིད་པའི་སྡུག་བསྔལ་ཐམས་ཅད་རྩ་བ་ནས་སྤོང་པ་དང་། སྙིང་རྗེ་ཆེན་པོས་ཞི་མཐའ་ལ་མི་གནས་པར་ནམ་མཁའ་ཇི་སྲིད་དུ་སེམས་ཅན་གྱི་དོན་མཛད་པ་སྟེ། སྲིད་ཞི་གཉིས་ཀྱི་མཐའ་ལ་མི་གནས་པ་རྫོགས་པའི་སངས་རྒྱས་ཀྱི་གོ་འཕང་ལ་སེམས་ཅན་ཐམས་ཅད་དགོད་པར་བྱའོ་སྙམ་དུ་བྱང་ཆུབ་མཆོག་ཏུ་སེམས་བསྐྱེད་དགོས།^p84
དེ་ལྟ་བུའི་སངས་རྒྱས་ཀྱི་གོ་འཕང་ཡང་རྒྱུ་མེད་རྐྱེན་མེད་དུ་འབྱུང་བ་མ་ཡིན་པར་དེ་འགྲུབ་པར་བྱེད་པའི་རྒྱུ་ཕུན་སུམ་ཚོགས་པ་ལ་བསླབ་དགོས། རྒྱུ་ཕུན་སུམ་ཚོགས་པ་གང་ཞེ་ན། ཚུལ་ཁྲིམས་ཕུན་སུམ་ཚོགས་པ་དང་། ཏིང་ངེ་འཛིན་ཕུན་སུམ་ཚོགས་པ། ཤེས་རབ་ཕུན་སུམ་ཚོགས་པ་སྟེ་རྣམ་པ་གསུམ་ལ་བསླབ་དགོས་པ་ཡིན།^p85
དང་པོ་ཚུལ་ཁྲིམས་རྣམ་པར་དག་པ་ཇི་ལྟར་སྲུང་བར་བྱེད་ཅེ་ན། གཞན་ལ་གནོད་པ་རྩ་བ་ནས་སྤོང་བར་བྱེད་པ་ནི་སོ་སོར་ཐར་བའི་ཚུལ་ཁྲིམས་ཞེས་བྱ་བ་ཡིན། བསྐལ་མང་གི་ཡུན། འགྲོ་མང་གི་གྲངས། བྱ་དཀའ་བའི་གནས་ལ་སོགས་པ་ལ་མི་འཇིགས་མི་སྐྲག་པར་སེམས་ཅན་ཐམས་ཅད་ལ་ཕན་པ་དང་བདེ་བ་སྒྲུབ་པར་བྱེད་པ་ནི་བྱང་ཆུབ་སེམས་དཔའི་ཚུལ་ཁྲིམས་ཡིན། རང་དང་གཞན་གྱི་དོན་རྒྱ་ཆེན་པོ་བདེ་མྱུར་དུ་སྒྲུབ་པར་བྱེད་པ་ནི་གསང་སྔགས་རྡོ་རྗེ་ཐེག་པའི་ཚུལ་ཁྲིམས་ཡིན།^p86
དེ་ཡང་བདེ་མྱུར་ཞེས་པའི་བདེ་བ་ནི་འདོད་ཡོན་ལྔ་པོ་མ་སྤངས་པར་ཅི་དགར་ལོངས་སུ་སྤྱོད་བཞིན་དུ་སེམས་ཀྱི་བདེ་བ་རྒྱ་ཆེན་པོ་ཐོབ་པར་བྱེད་པའི་ཐབས་དེ་ཡིན། མྱུར་བ་ནི་ཡུན་རིང་པོའི་ཚེགས་ལ་མི་ལྟོས་པར་སྙིགས་དུས་ཀྱི་ཚེ་ཐུང་གཅིག་ལ་སངས་རྒྱས་རྡོ་རྗེ་འཆང་གི་སྐུ་འགྲུབ་པར་བྱེད་པའི་ལམ་ཡིན།^p88
སེམས་རྩེ་གཅིག་ཏུ་གནས་པར་བྱེད་པ་ལ་ཏིང་ངེ་འཛིན་ཞེས་བྱ། སེམས་གནས་པར་བྱེད་པའི་མན་ངག་ནི་ཉེས་པ་ལྔ་སྤངས། འདུ་བྱེད་བརྒྱད་བསྟེན། སེམས་གནས་པའི་ཐབས་དགུ་ལ་བསྟེན་ནས་སེམས་གནས་དགོས། དེ་དག་གི་འབྲས་བུ་ནི་མཐར་གྱིས་གནས་པའི་སྙོམས་པར་འཇུག་པ་དགུ་ཞེས་བྱ་ཞིང་། རྒྱས་པར་བྱམས་པ་མགོན་པོའི་གཞུང་ལས་ཇི་ལྟར་གསུངས་པ་བཞིན་དུ་ཤེས་པར་བྱ། མན་ངག་གི་དབང་དུ་བྱས་ན། རང་གི་སེམས་ཀྱིས་སེམས་ལ་བལྟས་ཏེ་རང་བབས་སུ་བཞག་ནས་རྣམ་རྟོག་ཐམས་ཅད་རིམ་གྱིས་ཞི་རུ་འཇུག་པའི་བློ་དེ་ཡིན།^p89
ཤེས་རབ་ཅེས་བྱ་བ་ལ་ཐོས་པའི་ཤེས་རབ་དང་བསམ་པའི་ཤེས་རབ། སྒོམ་པའི་ཤེས་རབ་སྟེ་རྣམ་པ་གསུམ་ཡོད། ཐོས་པའི་ཤེས་རབ་ནི། མཚན་ཉིད་དང་ལྡན་པའི་བླ་མའི་མདུན་ནས་མདོ་སྔགས་ཀྱི་ཆོས་སྤྱི་དང་། ཁྱད་པར་དུ་རང་གིས་གང་ཉམས་སུ་བླང་བའི་ཆོས་དེ་གསལ་བོར་ཐོས་པ་ལས་བྱུང་བའི་བློ་དེ་ལ་ཟེར། བསམ་པའི་ཤེས་རབ་ནི། གང་ཐོས་པའི་ཆོས་དེ་དག་གི་ཚིག་དང་དོན་གྱི་ཆ་ལ་ཡང་ནས་ཡང་དུ་དཔྱད་ནས། མ་རྟོགས་ལོག་རྟོགས་ཐེ་ཚོམ་གྱི་མུན་པ་ཐམས་ཅད་བསལ་ཏེ་གནས་ལུགས་ཀྱི་དོན་ལ་ངེས་པ་འདྲོང་བའི་བློ་དེ་ལ་ཟེར། སྒོམ་པའི་ཤེས་རབ་ནི། གང་ཐེ་ཚོམ་ཆོད་པའི་དོན་དེ་རང་གི་རྒྱུད་ལ་ཡང་ནས་ཡང་དུ་སྦྱར་ཞིང་ཉམས་སུ་ལེན་པའི་བློ་དེ་ལ་ཟེར། སངས་རྒྱས་འཐོབ་པར་བྱེད་པའི་རྒྱུ་ཚུལ་ཁྲིམས་ཏིང་འཛིན་ཤེས་རབ་ཀྱི་བསླབ་པ་གསུམ་ཉམས་སུ་ལེན་པ་ཡིན།^p90
ད་རེས་ཀྱི་སྐབས་སུ་བབ་པ་ནི། ཆོས་རྣམ་དག་ཅིག་རང་གིས་ཉམས་སུ་བླང་བར་བགྱིའོ་སྙམ་དུ་ཀུན་སློང་བཅོས་ནས་ཆོས་མཉན་དགོས་པ་ཡིན།^p91
དེ་ནས་ཐབས་རྒྱ་ཆེ་བ་གསང་བ་སྔགས་ཀྱི་ཀུན་སློང་ནི། ཕུན་སུམ་ཚོགས་པ་ལྔས་གསལ་བཏབ་ནས་མཉན་དགོས་པ་ཡིན། ཕུན་སུམ་ཚོགས་པ་ལྔ་ནི། ཆོས་འཆད་ཉན་བྱེད་པའི་གནས་སྐབས་འདིར་མཚོན་ན། གནས་ཕུན་སུམ་ཚོགས་པ་ཟངས་མདོག་དཔལ་གྱི་རི་བོ་པདྨ་འོད་ཀྱི་ཕོ་བྲང་དངོས་ཡིན་སྙམ་པ་དང་། སྟོན་པ་ཕུན་སུམ་ཚོགས་པ་ཆོས་འཆད་པ་པོའི་གང་ཟག་དེ་ཡང་ཨོ་རྒྱན་པདྨ་འབྱུང་གནས་དངོས་ཡིན་སྙམ་པའི་དད་གུས་དང་ལྡན་པའི་སྒོ་ནས་མཉན། ཆོས་ཕུན་སུམ་ཚོགས་པ་གསང་སྔགས་རྡོ་རྗེ་ཐེག་པའི་ལམ་གང་ཞིག ཟབ་པ་དང་རྒྱ་ཆེ་བའི་ཆོས་ཚུལ་རྨད་དུ་བྱུང་བ་ཡིན་པ་ལ་ཡིན་པར་ཤེས་པའི་བློ་བཞག་ནས་མཉན། དུས་ཕུན་སུམ་ཚོགས་པ་སྐལ་བ་དང་ལྡན་པའི་གང་ཟག་ནམ་གནས་ཀྱི་བར་དུ། འཕྲིན་ལས་དུས་ལས་མི་ཡོལ་བར་ཆོས་འཆད་པའི་རང་བཞིན་ཅན་ཡིན་པར་ཤེས་པའི་སྒོ་ནས་མཉན། འཁོར་ཕུན་སུམ་ཚོགས་པ་ཉན་པ་པོའི་གང་ཟག་རྣམས་འཁོར་རིག་འཛིན་དཔའ་བོ་དཔའ་མོའི་རང་བཞིན་ཡིན་པར་ཤེས་པའི་སྒོ་ནས་མཉན་དགོས་པ་ཡིན།^p92
ཐོག་མར་ཁྱེད་རྣམས་ཀྱིས་དེ་ལྟ་བུའི་མདོ་སྔགས་ཀྱི་ཀུན་སློང་རྣམ་པ་གཉིས་བཅོས་ནས་གང་གསན་པར་བྱ་བའི་ཆོས་ནི། དེ་ཡང་ཁྱེད་རང་རྣམས་སྐྱེ་བོ་གཞན་དང་མི་འདྲ་བར་ཆོས་སྒྲུབ་པའི་མཐུན་རྐྱེན་རྣམ་པ་བཞི་ཚང་བ་ལ་དགའ་སྤྲོ་བསྐྱེད་དགོས། མཐུན་རྐྱེན་བཞི་ནི། སྐྱེ་བར་དཀའ་བ་ལྷོ་རྒྱལ་འཛམ་བུ་གླིང་དུ་སྐྱེ་བ་བླངས་པ་ལ་དགའ་བ་དང་སྤྲོ་བ་བསྐྱེད་པ་དང་། འཛམ་བུ་གླིང་གི་མི་ལུས་ཐོབ་པ་ཙམ་དུ་མ་ཟད་སྐྱེས་བུ་དམ་པ་དང་ཆོས་སྟོན་པའི་བླ་མ་དགེ་བའི་བཤེས་གཉེན་དང་འཕྲད་པ་འདི་ཡང་སྐལ་བ་བཟང་པོ་ཡིན་པར་ཤེས་དགོས། དེ་ལྟ་བུའི་མཐུན་རྐྱེན་སྔ་མ་གཉིས་འགྲུབ་པར་བྱེད་པའི་རྒྱུ་ནི་སྔོན་གྱི་དུས་སུ་བདག་ཉིད་ལེགས་པར་སྨོན་པ་དང་། བསོད་ནམས་བསགས་པའི་གྲུབ་འབྲས་ད་ལྟ་མངོན་དུ་གྱུར་བས་ཁྱེད་རྣམས་ཀྱིས་དགའ་སྤྲོ་ཁྱད་པར་ཅན་བསྐྱེད་དགོས་ཤིང་། དེ་ལྟ་བུའི་མཐུན་རྐྱེན་ཕུན་སུམ་ཚོགས་པ་དང་ལྡན། རང་ཡང་སྐྱེ་བོ་ཕལ་བ་གཞན་དང་མི་འདྲ་བར་ཆོས་ལ་མོས་པ་ཡོད་པ་ཡང་ཆོས་སྒྲུབ་པའི་མཐུན་རྐྱེན་ཁྱད་པར་ཅན་ཡིན། དེས་ན་ཆོས་སྒྲུབ་པར་བྱེད་པ་ལ་མཐུན་རྐྱེན་དེ་བཞི་ངེས་པར་ཚང་དགོས། ཁྱེད་རྣམ་པ་ལ་མཐུན་རྐྱེན་ཆེན་པོ་དེ་དག་ཀྱང་ཚང་འདུག^p93
མཐུན་རྐྱེན་ཆེན་པོ་བཞི་ཚང་ཡང་མི་ཞེས་པ་ནི་ངེས་པར་འཆི་བ་དང་ནམ་འཆི་ཆ་མེད་ཀྱི་བདག་ཉིད་ཅན་ཡིན་པའི་ཕྱིར་དང་། འཆི་བའི་ཚེ་ན་ཆོས་མིན་པ་གང་གིས་ཀྱང་ཕན་པ་མེད་པས། ད་ལྟ་ཉིད་ནས་ཆོས་རྣམ་པར་དག་པ་ཞིག་བསྒྲུབ་དགོས། དེས་ན་སངས་རྒྱས་ཀྱི་ཆོས་དེ་ཡང་གང་ཟག་གི་ཁམས་རབ་འབྲིང་ཐ་མ་དང་། དབང་པོ་ཡང་རབ་འབྲིང་ཐ་མ། མོས་པ་ཡང་རབ་འབྲིང་ཐ་མ་མང་པོ་ཡོད། དེའི་ཕྱིར་ན་ཁམས་དབང་མོས་པ་བསམ་པའི་བྱེ་བྲག་གིས་བཅོམ་ལྡན་འདས་ཀྱིས་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་གསུངས་ཡོད་ཀྱང་། དེ་ཚང་མ་ཉམས་སུ་ལེན་ཤེས་རྒྱུ་མ་རེད་ལ་ཉམས་སུ་ལེན་ཡང་མི་དགོས། དེ་དག་ཐམས་ཅད་ཀྱི་གནད་གཅིག་ཏུ་བསྡུས་པ་སྙིང་རྗེ་དང་དད་པ་འདི་གཉིས་ཁོ་ན་སྒོམས་དང་དེས་ཆོག མཐའ་ཡས་པའི་སེམས་ཅན་ཐམས་ཅད་ཀྱི་ལུས་ཀྱི་ན་ཚ་དང་སེམས་ཀྱི་སྡུག་བསྔལ་ལ་སོགས་པ་ཡོངས་སུ་ཞི་བར་བྱ་བའི་ཐབས་ལ་ཡང་ནས་ཡང་དུ་བརྩོན་པར་བྱ་བ་ནི་སྙིང་རྗེ་ཡིན། སེམས་ཅན་གྱི་སྡུག་བསྔལ་ཞི་བར་བྱ་བའི་ཐབས་སུ་སངས་རྒྱས་དང་བྱང་ཆུབ་སེམས་དཔའ་རྣམས་ལ་དད་པ་བཞག གསོལ་བ་བཏབ་ན་སེམས་ཅན་གྱི་སྡུག་བསྔལ་སེལ་ཐུབ་རྒྱུ་རེད་མ་གཏོགས། རང་བཞིན་རྒྱུ་མེད་རྐྱེན་མེད་ཀྱིས་སེམས་ཅན་གྱི་སྡུག་བསྔལ་བྲལ་སོང་ན་བསམ་ན་ཡང་དེ་ཙམ་གྱིས་ཞི་བར་མི་འགྱུར།^p94
གུ་རུའི་ཐུན་མིན་གྱི་ཡོན་ཏན།^p95
སངས་རྒྱས་དང་བྱང་ཆུབ་སེམས་དཔའ་རྣམས་ལ་གསོལ་བ་འདེབས་དགོས་ན། ད་ལྟ་རང་རེ་རྣམས་ལ་སྣང་བའི་དམ་པའི་ཆོས་ཀྱི་ནང་དུ་ཡོད་པའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་མཚན་རྐྱང་པ་བརྗོད་དགོས་ན་ཡང་བརྗོད་ཐུབ་རྒྱུ་མ་རེད། དེས་ན་སངས་རྒྱས་དང་བྱང་ཆུབ་སེམས་དཔའ་ཐམས་ཅད་གཅིག་ཏུ་འདུས་པའི་ངོ་བོ་དེ་གང་ཡིན་ན་བླ་མ་ཨོ་རྒྱན་ཆེན་པོ་རེད། ཨོ་རྒྱན་ཆེན་པོ་ལ་གསོལ་བ་རྩེ་གཅིག་ཏུ་བཏབ་ན་དེའི་ནང་དུ་མ་འདུས་པ་གང་ཡང་མེད། ཨོ་རྒྱན་རིན་པོ་ཆེ་ནི་ཆོས་སྐུའི་སངས་རྒྱས་ཐམས་ཅད་ཀྱི་ཐུགས་དགོངས་ལས་ཤར། ལོངས་སྐུའི་སངས་རྒྱས་ཐམས་ཅད་ཀྱིས་བྱིན་གྱིས་བརླབས། སྤྲུལ་སྐུའི་སངས་རྒྱས་ཐམས་ཅད་ཀྱིས་རྒྱལ་ཚབ་ཏུ་མངའ་གསོལ་བ་ཡིན།^p96
ཨོ་རྒྱན་རིན་པོ་ཆེ་སངས་རྒྱས་ཐམས་ཅད་འདུས་པའི་ངོ་བོ་ཇི་ལྟར་ཡིན་སྙམ་ན། ཨོ་རྒྱན་རིན་པོ་ཆེ་ནི་གདུལ་བྱ་རྣམས་ཀྱི་བསོད་ནམས་རྣམ་པར་དག་པ་དུས་སུ་སྨིན་པའི་མཐུ་ལས། དུས་གསུམ་གྱི་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མཐའ་དག་གཅིག་ཏུ་བསྡུས་ནས་ཡི་གེ་ཧྲཱིཿ ཡི་རྣམ་པར་སངས་རྒྱས་འོད་དཔག་མེད་ཀྱི་ཐུགས་ཀར་བསྡུས་པ་ཡིན། ཡི་གེ་ཧྲཱིཿ ཡིག་དེ་ཉིད་ཨོ་རྒྱན་ལྷོ་ནུབ་འོ་མ་ཅན་གྱི་རྒྱ་མཚོའི་ནང་དུ་ཕ་ཡི་རྒྱུ་དང་མ་ཡི་རྐྱེན་ལས་མ་བསྐུལ་བར་རང་བྱུང་རིག་པ་ཐོལ་སྐྱེས་ཀྱི་ཚུལ་དུ་བརྫུས་ཏེ་བལྟམས་པ་ཡིན། དེའི་སྐབས་སུ་ཁོང་གི་སྐུ་ལུས་ཀྱང་ཆོས་སྐུ་རྡོ་རྗེ་འཆང་དང་དབྱེར་མེད་པའི་རྣམ་པ་ཅན། མཁའ་འགྲོ་དང་དཔའ་བོ་རྣམས་ཀྱིས་རིགས་ཀྱི་བདག་པོ་ཉིད་དུ་མཆོད་ཅིང་བཀུར་བསྟི་བྱེད་པའི་གནས་སུ་གྱུར་པ་ནི་ཨོ་རྒྱན་མཚོ་སྐྱེས་རྡོ་རྗེ་ཞེས་བྱ་བ་ཡིན། ཨོ་རྒྱན་གྱི་རྒྱལ་པོ་ཨིནྟྲ་བོ་དྷིས་འགྲོ་བ་མཐའ་དག་གི་དབུལ་བའི་སྡུག་བསྔལ་བསལ་བར་བྱ་བའི་ཕྱིར་དུ་རྒྱ་མཚོའི་གླིང་དུ་ནོར་བུ་ལེན་དུ་སོང་བའི་གནས་སྐབས་ན། ལམ་བར་ནས་ལྷོ་ནུབ་འོ་མ་ཅན་གྱི་རྒྱ་མཚོའི་ནང་ནས་སྤྲུལ་པའི་སྐུ་དང་འཕྲད་དེ་རྒྱལ་པོའི་བུ་སྐལ་དུ་གདན་དྲངས། རྒྱལ་ཚབ་ཏུ་བསྐོས། རྒྱལ་སྲིད་ཚང་མ་ལ་མངའ་དབང་བསྒྱུར། རྒྱལ་སྲིད་ཆོས་བཞིན་དུ་སྐྱོང་བའི་རྒྱལ་པོའི་ཆ་བྱད་དང་ལྡན་པ་ལ་པདྨ་རྒྱལ་པོ་ཞེས་མཚན་གསོལ་བ་ཡིན། དེ་ནས་རྒྱལ་སྲིད་སྤངས་ཏེ་རིག་པ་བརྟུལ་ཞུགས་ཀྱི་སྤྱོད་པས་དུར་ཁྲོད་ཆེན་པོ་བརྒྱད་ལ་སོགས་པར། དཔའ་བོ་དང་མཁའ་འགྲོ་མ་ཐམས་ཅད་ལ་ཐེག་པ་ཆེན་པོའི་ཆོས་ཀྱི་འཁོར་ལོ་བསྐོར་བའི་གནས་སྐབས་ན་གུ་རུ་ཉི་མ་འོད་ཟེར་ཞེས་བྱ་ལ། འགྲོ་འདུག་གི་དུས་སུ་ཉི་མའི་ཟེར་ལ་ཆིབས་ནས་རླུང་བཞིན་ཐོགས་པ་མེད་པར་རྒྱུ་བའི་རྫུ་འཕྲུལ་དང་ལྡན་པ་ཡིན། སློབ་དཔོན་པྲ་བྷ་ཧསྟི་སོགས་རྒྱ་གར་གྱི་གྲུབ་ཆེན་བརྒྱད་ལ་སོགས་པ་བསྟེན་ནས་ཐུན་མོང་དང་ཐུན་མོང་མ་ཡིན་པའི་གཞུང་ལུགས་རབ་འབྱམས་ལ་མཁས་པའི་ཤེས་རབ་དང་ལྡན་པ་ལ་སློབ་དཔོན་བློ་ལྡན་མཆོག་སྲེད་ཅེས་བྱ་བའི་མཚན་བཏགས་པ་ཡིན། ཨ་སུ་ར་ཡི་བྲག་ཕུག་ཏུ་བཅོམ་ལྡན་འདས་ཀྱི་ཉེར་གནས་ཀུན་དགའ་བོའི་དྲུང་དུ་རབ་ཏུ་བྱུང་སྟེ་ཚུལ་ཁྲིམས་རྣམ་པར་དག་པ་བསྲུངས་ནས་དགེ་སློང་གི་ཚུལ་འཛིན་པ་ནི་དགེ་སློང་པདྨ་སཾ་བྷ་ཝ་ཞེས་ཡོངས་སུ་གྲགས་པ་ཡིན། རྡོ་རྗེ་གདན་དུ་བྱོན་པའི་གནས་སྐབས་ན་སྐུ་ལུས་གསེར་བཙོ་མའི་མདོག་ལྟར་དུ་གྱུར། མཛད་པ་གང་ལ་བརྟག་ཀྱང་སྟོན་པ་སངས་རྒྱས་དང་གཉིས་སུ་མེད་པ་ལྟ་བུར་གྱུར་པ་ལ་ཤཱཀྱ་སེངྒེ་ཞེས་པའི་མཚན་གསོལ་བ་ཡིན། རྒྱ་གར་བྱང་ཕྱོགས་སུ་བྱོན་ནས་ཟ་ཧོར་རྒྱལ་པོ་ཆོས་ལ་དགོད་པའི་ཕྱིར་ལས་ཀྱི་ཕྱག་རྒྱ་མོ་ལྷ་ལྕམ་མན་དཱ་ར་བ་ལ་བརྟེན་ནས་རིག་པ་བརྟུལ་ཞུགས་ཀྱི་སྤྱོད་པ་མཛད་པའི་དུས་སུ། ཟ་ཧོར་རྒྱལ་པོས་གསོན་སྲེག་མཛད་པའི་ཚེ་འབྱུང་བ་མེ་ཡིས་མ་ཚིག་པར། མཚོ་ཡན་ལག་བརྒྱད་ལྡན་གྱི་དབུས་སུ་པད་སྡོང་གི་རྩེ་ལ་རང་བྱུང་གི་ཚུལ་དུ་བཞུགས་པ་ནི་གུ་རུ་ཐོད་ཕྲེང་རྩལ་ཞེས་བྱ་བ་ཡིན།^p98
དེ་ནས་བལ་ཡུལ་དུ་བྲག་ཕུག་མ་ར་ཏི་ཀ་རུ་བྱོན་ནས། གཟུངས་མ་མནྡྷ་ར་བ་ལ་བརྟེན་ནས་འཆི་མེད་ཚེ་ཡི་རིག་འཛིན་གྲུབ་པར་གྱུར་པ་ལ་འཆི་མེད་པདྨ་འབྱུང་གནས་ཞེས་བྱ་བའི་མཚན་བཏགས་པ་ཡིན། བལ་ཡུལ་ཡངས་ལེ་ཤོད་ཀྱི་བྲག་ཕུག་ཏུ་བྱོན་ནས་ཕྱག་རྒྱ་ཆེན་པོའི་དངོས་གྲུབ་མངོན་དུ་བརྙེས་ནས། བདུད་སྲིན་དམ་སྲི་མ་རུངས་པ་ཐམས་ཅད་གདུལ་བར་བྱ་བའི་ཕྱིར་དུ་ཁྲོ་བོའི་རྒྱལ་པོ་དཔལ་ཕྱག་ན་རྡོ་རྗེའི་རྣམ་པར་བཞེངས་པ་ལ་གུ་རུ་སེངྒེ་སྒྲ་སྒྲོག་ཅེས་བྱ་བ་ཡིན། དེའི་རྗེས་སུ་མཁའ་འགྲོ་མ་སེངྒེའི་གདོང་པ་ཅན་ལ་བསྟེན་ནས་མུ་སྟེགས་པའི་གྲོང་ཁྱེར་བསམ་གྱིས་མི་ཁྱབ་པ་མང་པོ་བརླགས་པར་མཛད། དེ་དག་ནི་འཆི་མེད་པདྨ་འབྱུང་གནས་དང་གུ་རུ་སེངྒེ་སྒྲ་སྒྲོག་གཉིས་ཀྱིས་དེང་སང་གི་བལ་པོའི་ཡུལ་ཞེས་ཡོངས་སུ་གྲགས་པ་ནས་བསྟན་པ་དང་སེམས་ཅན་གྱི་དོན་ཇི་ལྟར་བསྒྲུབས་པའི་ཚུལ་ཡིན།^p99
དེ་དག་ནི་ཨོ་རྒྱན་རིན་པོ་ཆེས་རྒྱ་གར་འཕགས་པའི་ཡུལ་དང་བལ་པོའི་ཡུལ་དུ་བསྟན་པ་དང་སེམས་ཅན་གྱི་དོན་ཇི་ལྟར་མཛད་པའི་ཚུལ་ཡིན།^p100
དེ་ནས་དེང་སང་གི་གནས་སྐབས་ན་འབྲུག་པ་ཞེས་རྒྱལ་ཁབ་ལོགས་སུ་ཆགས་ཡོད་པའི་གནས་སྤ་གྲོ་སྟག་ཚང་ཞེས་བྱ་བར། སྣང་སྲིད་ཀྱི་དྲེགས་པ་མ་ལུས་པ་དབང་དུ་བསྡུས་ཏེ་དམ་འོག་ཏུ་བཙུད། དེ་ནས་བོད་ཀྱི་སྟོད་མངའ་རིས་སྐོར་གསུམ། བར་དབུས་གཙང་རུ་བཞི། སྨད་མདོ་ཁམས་སྒང་དྲུག་ཐམས་ཅད་ལ་ཆོས་གཏེར་དང་རྫས་གཏེར་སོགས་གཏེར་ཁ་བསམ་གྱིས་མི་ཁྱབ་པ་སྦས། ཕྱི་མའི་དུས་ན་ཡང་གཏེར་སྟོན་བརྒྱ་རྩ་བརྒྱད་ལ་སོགས་པ་མང་པོ་ཞིག་འབྱུང་བར་ལུང་བསྟན། སྨོན་ལམ་གྱི་གཏད་རྒྱ་དང་བཅས་པར་མཛད་པ་ལ་གུ་རུ་རྡོ་རྗེ་གྲོ་ལོད་ཅེས་གྲགས།^p101
དེ་ལྟར་ཨོ་རྒྱན་རིན་པོ་ཆེ་བོད་ཡུལ་དུ་ལོ་ང་ལྔ་ཙམ་ལ་བཞུགས་ཏེ་ལྷོ་འཛམ་བུ་གླིང་སྤྱི་དང་བོད་ཀྱི་ཡུལ་དུ་སྐུ་དངོས་ཀྱི་གདུལ་བྱ་རྫོགས་རྗེས། སྲིན་པོ་མ་རུངས་པ་ཐམས་ཅད་ཁ་དར་བས་དེ་དག་གདུལ་བར་བྱ་བའི་ཕྱིར་རྔ་ཡབ་སྲིན་པོའི་གླིང་དུ་གཤེགས། དེ་ལྟར་སྲིན་པོ་རྣམས་ཀྱི་ཁ་གནོན་མཛད་པ་དང་སངས་རྒྱས་ཀྱི་བསྟན་པ་དར་བར་མཛད་ནས། སྲིན་པོ་མ་རུངས་པ་རྣམས་ཆོས་ལ་བཙུད་པའི་ཕྱིར་དྲག་པོའི་སྐུར་བཞེངས་པ་དེར་གུ་རུ་དྲག་པོ་རྩལ་ཞེས་བྱ་བའི་མཚན་ཆགས། དེ་ཡང་རྒྱས་པའི་གཏེར་ཁ་རྣམས་སུ་གྲུབ་རྟགས་འདྲ་མིན་མཚོན་ཕྱིར་ཞལ་ཕྱག་ཀྱང་མང་པོ་ཅན་ཡོད།^p102
གུ་རུ་དྲག་པོ་ནི་རྔ་ཡབ་དཔལ་གྱི་རི་བོ་ན། སྐུ་ལུས་མ་སྤངས་པར་འཇའ་ལུས་འཕོ་བ་ཆེན་པོའི་སྐུར་བཞེངས་ནས་ད་ལྟ་ཡང་སྐུ་འཚོ་ཞིང་གཞེས་ལ་ཆོས་སྟོན་པའི་སྒང་ཡིན། ད་ལྟ་གུ་རུ་རིན་པོ་ཆེ་བཞུགས་པའི་ས་ཆ་ལ་རྔ་ཡབ་སྲིན་པོའི་གླིང་ཞེས་བྱ། དེ་ལ་མཐའ་སྐོར་དུ་སྲིན་པོའི་ཡུལ་གླིང་ཉི་ཤུ་རྩ་གཅིག་དང་། དབུས་ན་ཟངས་མདོག་དཔལ་གྱི་རི་བོ་ཞེས་བྱ་བ་ཙིཏྟའི་དབྱིབས་ལྟ་བུ་ཞིག་ཡོད། རི་བོ་དེའི་རྩེ་ན་པདྨ་འོད་ཀྱི་ཕོ་བྲང་ཞེས་བྱ་བ་བརྩེགས་གསུམ་ཅན། འོག་ན་སྤྲུལ་སྐུའི་ཞིང་ཁམས་དང་སྲིན་རྒྱལ་རཀྴ་ཐོད་ཕྲེང་གིས་སྲིན་པོ་རྣམས་ལ་ཆོས་སྟོན་པ། བར་དུ་ལོངས་སྐུ་ཐུགས་རྗེ་ཆེན་པོའི་རྣམ་པས་ངེས་པ་ལྔ་ལྡན་གྱི་སྒོ་ནས་ཆོས་གསུངས་པ། སྟེང་ན་ཆོས་སྐུ་ཀུན་ཏུ་བཟང་པོའི་རྣམ་པས་ཆོས་ཉིད་སྐྱེ་བ་མེད་པའི་དོན་ལ་མཉམ་པར་བཞག་པ་དེ་ལྟ་བུའི་གཞལ་ཡས་ཁང་ཁྱད་པར་ཅན་ཞིག་ཡོད་པ་ཡིན།^p103
རྔ་ཡབ་དཔལ་གྱི་རི་བོ་པདྨ་འོད་ཀྱི་ཕོ་བྲང་གི་ཕྱོགས་མཚམས་སྟེང་འོག་སྟེ་གནས་སུམ་ཅུ་སོ་དྲུག་ན། ཨོ་རྒྱན་རིན་པོ་ཆེས་སྤྲུལ་བ་མི་འདྲ་བ་སུམ་ཅུ་སོ་དྲུག་གི་སྒོ་ནས་འགྲོ་དོན་མཛད་བཞིན་པའི་སྒང་ཡིན། ཁོང་གི་སློབ་མར་གྱུར་པའི་རྗེ་འབངས་གྲུབ་ཐོབ་རིག་པ་འཛིན་པའི་ཚོགས་བསམ་གྱིས་མི་ཁྱབ་པ་ཡང་འཁོར་དུ་འདུས་ཤིང་། སྐལ་བ་དང་ལྡན་པའི་གདུལ་བྱ་གཞན་རྣམས་ལའང་ཆོས་ཀྱི་འཁོར་ལོ་སྐོར་བཞིན་བཞུགས་ཡོད་པ་ཡིན།^p105
གུ་རུའི་གཏེར་ཆོས།^p106
དེ་ནས་བོད་ཡུལ་དུ་བྱོན་པའི་སྤྲུལ་པའི་གཏེར་སྟོན་རྣམས་ཀྱང་ཨོ་རྒྱན་རིན་པོ་ཆེའི་ཚོགས་ཀྱི་འདུ་བ་ལ་ལོངས་སྤྱོད་པའི་དུས་སུ། ཨོ་རྒྱན་རིན་པོ་ཆེས་ཁོང་གི་ཚོགས་ཀྱི་དྲངས་བ་དེ་སྤྲུལ་པའི་སྐུ་གང་ལ་གཏད་པ་དེ་ཉིད་བོད་ཁ་བ་ཅན་གྱི་ཡུལ་དུ་འགྲོ་དོན་ལ་བྱོན་དགོས་ཞེས་བཀའ་བསྩལ་བ་དང་། ཨོ་རྒྱན་རིན་པོ་ཆེའི་སྤྲུལ་པ་རྣམས་ལས་མང་ཆེ་བ་ཞིག་ཟབ་པ་ས་ཡི་གཏེར་དང་རྒྱ་ཆེ་བ་དགོངས་པའི་གཏེར་ལ་དབང་འབྱོར་བ་ཡིན། སྤྲུལ་པའི་གཏེར་སྟོན་དེ་རྣམས་ལ་བརྒྱུད་པ་གཞན་དང་མི་འདྲ་བའི་ཁྱད་པར་དུ་འཕགས་པ་གསུམ་ཡོད་དེ། དང་པོ་གཏེར་སྟོན་དེ་ལ་ཚེ་གཅིག་གི་འགྲོ་དོན་དང་མཛད་པ་ཇི་ལྟར་བསྒྲུབ་དགོས་པ་ཚང་མ་ཡང་ཨོ་རྒྱན་རིན་པོ་ཆེས་དུས་དུས་སུ་བཀའ་བསྩལ་དགོས་པ་ཡིན་པས་དེ་ལ་བཀའ་བབས་ལུང་བསྟན་གྱི་བརྒྱུད་པ་ཟེར། གཉིས་པ་ཨོ་རྒྱན་རིན་པོ་ཆེའམ་ལྡན་མ་རྩེ་མང་། བེེ་རོ་ཙ་ན། ཡེ་ཤེས་མཚོ་རྒྱལ་གང་རུང་གི་ཤོག་སེར་གྱི་ངོས་སུ་བྲིས་པའི་ཕྱག་བྲིས་ལ། ཨོ་རྒྱན་རིན་པོ་ཆེས་དགོངས་པ་གཏད་པའི་སྟོབས་ཀྱིས་ཤོག་སེར་དེའི་ཚིག་དང་དོན་གྱི་ཆ་ཐམས་ཅད་ཟབ་གཏེར་བདག་པོ་རང་ཉིད་མ་གཏོགས་གཞན་གང་གིས་ཀྱང་མི་ཁྲོལ། དེ་ལ་ནི་ཤོག་སེར་ཚིག་གི་བརྒྱུད་པ་ཟེར། གསུམ་པ་ལས་ཅན་གྱི་གཟུངས་མར་ལུང་བསྟན་ལ། སྨོན་ལམ་བཏབ་པར་མ་ཟད། ཆོས་སྲུང་བའི་མཁའ་འགྲོ་མ་བསམ་གྱིས་མི་ཁྱབ་པ་ལ་གཏད་རྒྱ་མཛད་ཅིང་། སྐྱེས་བུ་གང་དེར་སྡོངས་གྲོགས་བྱེད་པར་བཀའ་བསྒོས་ཡོད་པ་ལ་མཁའ་འགྲོ་གཏད་རྒྱའི་བརྒྱུད་པ་ཟེར།^p107
དེ་ཡང་གཏད་རྒྱ་དེ་རྣམས་ཐོག་མར་བསམ་ཡས་དབུ་རྩེ་རིགས་གསུམ་དུ་རྗེ་འབངས་ཉེར་ལྔ་ལ་སོགས་པ་འཚོགས་པའི་དུས་སུ་ཡང་གཏད་རྒྱ་མཛད་ཡོད་པ་མང་པོ་ཡོད་ལ། དེའི་དུས་སུ་སྨོན་ལམ་གྱི་གཏད་རྒྱ་མ་ཐེབས་པར་རྗེས་སུ་རྔ་ཡབ་དཔལ་གྱི་རི་བོ་རུ་གསར་དུ་གཏད་རྒྱ་ཐེབས་པ་ཡང་མང་པོ་ཡོད་རྒྱུ་རེད། དེ་ལྟ་བུའི་སྤྲུལ་པའི་གཏེར་སྟོན་ལ་ནི་བསྟན་འགྲོའི་རྒུད་པ་གསོ་བ་དང་། སེམས་ཅན་ལ་བདེ་སྐྱིད་འབྱུང་བའི་ཐད་གང་ཟག་གཞན་དང་མི་འདྲ་བའི་ཁྱད་པར་དུ་འཕགས་པའི་ཁྱད་ཆོས་ཆེས་ཤིན་ཏུ་མང་པོ་ཡོད་པ་ཡིན།^p108
སྤྲུལ་པའི་གཏེར་སྟོན་དེ་ས་ཆ་གང་ལ་འབྱུང་ན། སྤྱིར་འཛམ་བུ་གླིང་གང་དང་གང་ལ་ཡང་རེ་རེ་གཉིས་རེ་འབྱུང་སྲིད་ཀྱང་། མང་ཆེ་བ་བོད་ཁ་བ་ཅན་དུ་འབྱུང་བ་ཡིན། དེ་ནི་ཨོ་རྒྱན་རིན་པོ་ཆེའི་སྔར་གྱི་དགོངས་པ་གཏད་ལུགས་དང་ཆོས་སྐྱོང་སྲུང་མ་རྣམས་ལ་གཉེར་གཏད་ལུགས། གཏེར་གནས་བྱིན་རླབས་མཛད་ལུགས་ཀྱི་དབང་གིས་རེད། སྤྲུལ་པའི་གཏེར་སྟོན་ཞེས་བྱ་བའི་གྲུབ་པ་ཐོབ་པའི་གང་ཟག་དེ་ཆོས་ལུགས་གང་ལ་ཡོད་ན། ཨོ་རྒྱན་རིན་པོ་ཆེའི་རྗེས་སུ་འཇུག་པའི་རྙིང་མ་པ་ལ་ཡོད་རྒྱུ་རེད་མ་གཏོགས། གཞན་དག་ལ་དེ་ལྟ་བུའི་གྲུབ་པ་ཐོབ་པའི་གང་ཟག་དཀོན་མོ་ཡིན་རྒྱུ་རེད།^p109
ཨོ་རྒྱན་རིན་པོ་ཆེའི་གཏེར་ཆོས་དེ་དག་ཐམས་ཅད་ཀྱང་གཏེར་དུ་སྦས་པ་པོ་དང་གཏེར་ནས་འདོན་པ་པོ་གང་ཡིན་ན། ཁོང་གི་གཟུངས་མ་མཁར་ཆེན་བཟའ་ཡེ་ཤེས་མཚོ་རྒྱལ་རེད། ཨོ་རྒྱན་རིན་པོ་ཆེ་སྲིན་ཡུལ་དུ་བྱོན་པའི་རྗེས་སུ། མཁར་ཆེན་བཟའ་མཚོ་རྒྱལ་གྱིས་ལོ་བདུན་གྱི་བར་དུ་ཨོ་རྒྱན་རིན་པོ་ཆེའི་གསུང་ཚང་མ་བཀའ་བསྡུ་མཛད། ས་གནས་སོ་སོ་ལ་གཏེར་དུ་སྦས། སྨོན་ལམ་བཏབ་པས། ད་ལྟ་ཡང་སྤྲུལ་པའི་གཏེར་སྟོན་རྒྱུན་མི་ཆད་པར་འབྱུང་བ་ནི་ཡེ་ཤེས་མཚོ་རྒྱལ་གྱི་བདག་རྐྱེན་ཡིན།^p110
བོད་གངས་རིའི་ལྗོངས་ཀྱི་ཨོ་རྒྱན་རིན་པོ་ཆེའི་ཆོས་བརྒྱུད་འཛིན་པ་ཚང་མ་ལ་བསམ་བློ་བཏང་ན། ཨོ་རྒྱན་རིན་པོ་ཆེ་དང་ཁྱད་པར་མེད་པའི་བཀའ་དྲིན་ཆེ་བ་དེ་ཡེ་ཤེས་མཚོ་རྒྱལ་ཁོང་ཁོ་ན་ཡིན། ཨོ་རྒྱན་རིན་པོ་ཆེ་སྲིན་ཡུལ་དུ་གཤེགས་པའི་རྗེས་སུ། ཡེ་ཤེས་མཚོ་རྒྱལ་གྱིས་ལོ་བདུན་གྱི་རིང་ལ་འཇམ་དཔལ་རྫོགས་པ་ཆེན་པོའི་ཆོས་ཉམས་སུ་བླངས་ཏེ། འཕོ་བ་ཆེན་པོའི་སྐུར་གྲུབ་ནས་རྔ་ཡབ་པདྨ་འོད་ཀྱི་ཕོ་བྲང་དུ་ཨོ་རྒྱན་རིན་པོ་ཆེ་དངོས་ཀྱི་སྐུ་མདུན་དུ་བྱོན་ནས་ད་ལྟ་ཡང་དེ་རུ་བཞུགས་ཡོད། དེ་ལྟ་བུའི་བཀའ་དྲིན་ཅན་གྱི་ཨོ་རྒྱན་ཡབ་ཡུམ་གཉིས། ད་ལྟ་ཐག་རིང་པོ་རྔ་ཡབ་སྲིན་པོའི་གླིང་དུ་ཡོད་པས་གསོལ་བ་བཏབ་ཀྱང་བྱིན་རླབས་མི་འབྱུང་སྙམ་ན་དེ་ཡང་མིན་ཏེ། ཨོ་རྒྱན་རིན་པོ་ཆེས། དད་པ་ཅན་ལ་གང་དུ་མ་བཞུད་བཞུགས། །འགྲོ་དྲུག་གང་དུ་སྐྱེས་ཀྱང་ང་ཡིས་འདྲེན། །ཞེས་གསུངས།^p111
ཨོ་རྒྱན་རིན་པོ་ཆེ་ལ་གསོལ་བ་བཏབ་ནས་བསྒྲུབ་ན། སངས་རྒྱས་དང་བྱང་ཆུབ་སེམས་དཔའ་གཞན་གང་ལས་ཀྱང་བྱིན་རླབས་ཆེ་བ་ཡིན། ཁྱད་པར་དུ་འདི་བླ་མའི་སྒྲུབ་པ་ཡིན། རང་རེ་སྔ་འགྱུར་གསང་སྔགས་རྙིང་མའི་ཆོས་ཉམས་སུ་ལེན་མཁན་ཚང་མས་བླ་མ་ཨོ་རྒྱན་ཆེན་པོ་སྒྲུབས་དང་། ལྷ་སྐུ་འབུམ་ཕྲག་བསྒོམ་པ་ལས་བླ་མ་སྐད་ཅིག་ཙམ་ལ་དྲན་ན་ཕན་ཡོན་ཆེ། བསྙེན་སྒྲུབ་ས་ཡ་བྱེ་བ་མང་པོ་འདོན་པ་ལས་བླ་མར་གསོལ་འདེབས་ལན་གཅིག་བྱས་ན་ཕན་ཡོན་ཆེ་ཞེས་རྒྱུད་སྡེ་ཐམས་ཅད་ཀྱི་ནང་དུ་གསུངས་ཡོད་པས། གང་ནས་བསམ་བློ་བཏང་ཡང་ཨོ་རྒྱན་རིན་པོ་ཆེ་ལ་གསོལ་བ་བཏབ་ན་བྱིན་རླབས་ལྷག་པར་ཆེ་བ་ཡིན། སྨོན་ལམ་གྱི་དབང་གིས་ཨོ་རྒྱན་རིན་པོ་ཆེ་སངས་རྒྱས་གཞན་དང་མི་འདྲ་བར་འཛམ་བུ་གླིང་གི་སེམས་ཅན་རྣམས་ལ་ཐུགས་ལྷག་པར་བརྩེ་བ་ཡིན།^p112
ཨོ་རྒྱན་རིན་པོ་ཆེའི་རྣམ་ཐར་གྱི་ནང་དུ། འཛམ་བུ་གླིང་དུ་འགྲོ་བའི་དོན་ལ་བྱོན། །ཉི་ཟེར་འཆར་སྡུད་མདངས་ལ་ཆིབས་ཏེ་བྱོན། །ཞེས་དུས་རྟག་ཏུ་ཉི་མ་འཆར་བ་དང་ནུབ་པའི་དུས་ཀྱི་ཟེར་ལ་ཆིབས་ཏེ་འཛམ་བུ་གླིང་གི་སེམས་ཅན་གྱི་དོན་ལ་བྱོན་ནས་འགྲོ་དོན་མཛད་པར་གསུངས་ཡོད། དེ་བཞིན་དུ་ཁོང་གི་ཞལ་ནས། སྤྱིར་སངས་རྒྱས་ཐམས་ཅད་ཀྱི་ཐུགས་རྒྱུད་ཀྱི་ཡོན་ཏན་གཅིག་པ་ཡིན་ཡང་། སྨོན་ལམ་གྱི་སྟོབས་ཀྱིས་ཁོང་བསྒྲུབ་ན་སངས་རྒྱས་གཞན་བསྒྲུབ་པ་ལས་བརྒྱ་འགྱུར་སྟོང་འགྱུར་གྱིས་བྱིན་རླབས་ཆེ་བ་དང་ཐུགས་རྗེ་མྱུར་བ་ཡིན་གསུངས།^p113
ཨོ་རྒྱན་རིན་པོ་ཆེ་རང་ཉིད་ཀྱི་ཞལ་ནས། ང་བཀུར་སངས་རྒྱས་ཐམས་ཅད་བཀུར། །ང་མཐོང་སངས་རྒྱས་ཐམས་ཅད་མཐོང་། །ང་ཉིད་བདེ་གཤེགས་འདུས་པ་ཡིན། །ཞེས་ཁོང་བསྒྲུབ་ན་སངས་རྒྱས་ཐམས་ཅད་བསྒྲུབས་པའི་གོ་ཆོད། ཁོང་མཇལ་ན་སངས་རྒྱས་ཐམས་ཅད་ཀྱི་ཞལ་མི་མཇལ་བ་གཅིག་ཀྱང་མེད། ཁོང་བདེ་གཤེགས་ཐམས་ཅད་འདུས་པའི་ངོ་བོ་ཡིན་པར་གསུངས་ཡོད། བདེ་གཤེགས་ཐམས་ཅད་འདུས་པ་ཇི་ལྟར་ཡིན་ན། ཨོ་རྒྱན་རིན་པོ་ཆེ་རང་ཉིད་ཀྱི་ཞལ་ནས། སྔོན་ཚེ་སྣང་བ་མཐའ་ཡས་འོད་དཔག་མེད། །རི་བོ་ཏ་ལར་མགོན་པོ་སྤྱན་རས་གཟིགས། །དྷ་ན་ཀོ་ཤ་པདྨ་འབྱུང་གནས་ང་། །མཚོན་ཚུལ་ཙམ་ལ་སྐུ་གསུམ་སྣང་གྱུར་ཀྱང་། །དོན་ལ་དབྱེར་མེད་སོ་སོར་ཐ་མི་དད། །ཆོས་དབྱིངས་གནས་སུ་ཀུན་ཏུ་བཟང་པོ་དང་། །སྟུག་པོ་བཀོད་དུ་རྡོ་རྗེ་འཆང་ཆེན་པོ། །རྡོ་རྗེ་གདན་དུ་ཐུབ་པ་ཆེན་པོ་ཉིད། །གཉིས་མེད་པདྨ་ང་རུ་ལྷུན་གྱིས་གྲུབ། །ཞེས་དེ་གསུམ་པོ་ཡང་ཁོང་ཡིན་པར་གསུངས།^p115
དེས་ན་སངས་རྒྱས་དང་བྱང་ཆུབ་སེམས་དཔའ་གཞན་ལ་བསྐལ་པ་མང་པོའི་བར་དུ་གསོལ་བ་བཏབ་པ་དང་སྒོམ་སྒྲུབ་བྱེད་པ་ལས། ཨོ་རྒྱན་རིན་པོ་ཆེ་ལ་ཐུན་ཐུང་ངུ་ཙམ་ལ་གསོལ་བ་བཏབ་ན་བྱིན་རླབས་དང་དངོས་གྲུབ་མྱུར་བ་ཤེས་དགོས།^p116
ཚིག་བདུན་གསོལ་འདེབས།^p117
ཨོ་རྒྱན་རིན་པོ་ཆེ་སྒྲུབ་པའི་ཐབས་དེ་ཡང་རྒྱས་པར་གཏེར་ཁ་སོ་སོ་ན་ཆེས་ཤིན་ཏུ་མང་པོ་ཡོད་ཀྱང་། སྒྲུབ་ཐབས་ཐམས་ཅད་ཀྱི་མཐར་ཐུག་པ་ནི་རྡོ་རྗེའི་ཚིག་བདུན་པོ་འདི་ལ་བརྟེན་ནས་བསྒྲུབ་པར་བྱ་བ་ཁོ་ན་ཡིན། ཚིག་བདུན་གསོལ་འདེབས་ཞེས་བྱ་བ་འདི་ནི་གང་ཟག་ཐ་མལ་བ་ཞིག་གིས་ཆེད་དུ་བརྩམས་པ་མིན་པར། ཆོས་ཉིད་སྐྱེ་བ་མེད་པའི་ཀློང་དང་ལོངས་སྐུ་འགག་པ་མེད་པའི་རྩལ་ལས་ཤར་ཡོང་བའི་རྡོ་རྗེའི་རང་སྒྲ་རང་ཤུགས་ཀྱི་ཚུལ་དུ་གྲགས་ཡོང་བ་ཡིན།^p118
ཨོ་རྒྱན་རིན་པོ་ཆེའི་རྗེས་འཇུག་གི་སྤྲུལ་བའི་གཏེར་སྟོན་ཞིག་ཡིན་ནས་བཟུང་སྟེ། དེའི་གཏེར་ཁ་ན་ཚིག་བདུན་གསོལ་འདེབས་ཤིག་མེད་པ་མི་སྲིད་པ་ལྟ་བུ་ཡིན། འདི་ནི་སྔོན་གྱི་དུས་སུ་ཨོ་རྒྱན་རིན་པོ་ཆེ་ཚོགས་ཀྱི་འདུ་བ་ལ་སྤྱན་འདྲེན་པའི་མཁའ་འགྲོ་མ་རྣམས་ཀྱི་བརྡ་སྐད་ཀྱང་ཡིན་པའི་ཕྱིར་ན། འདི་ཡི་དོན་མ་ཤེས་པར་ཚིག་རྐྱང་བ་བརྗོད་པས་ཀྱང་ཨོ་རྒྱན་རིན་པོ་ཆེ་རྔ་ཡབ་དཔལ་རི་ནས་བྱོན་ཏེ་རྒྱུད་བྱིན་གྱིས་བརླབ་པར་འགྱུར་བ་ཡིན། ཚིག་བདུན་གསོལ་འདེབས་འདི་ཡིས་གཞིའི་དུས་ན་རྣམ་ཤེས་ཚོགས་བདུན་མཚོན། ལམ་གྱི་དུས་ན་བྱང་ཆུབ་ཡན་ལག་བདུན་མཚོན། འབྲས་བུའི་དུས་ན་དོན་དམ་དཀོར་བདུན་ཡང་མཚོན་པ་ཡིན།^p119
ཚིག་བདུན་གསོལ་འདེབས་ཀྱིས་གུ་རུ་རིན་པོ་ཆེ་སྒྲུབ་ཐབས་ལ། ཕྱི་ལྟར་གསོལ་འདེབས་ཀྱི་ཚུལ་དུ་བྱས་པའི་སྒྲུབ་ཐབས་དང་། ནང་ལྟར་བསྐྱེད་རིམ་དང་སྦྱར་བའི་སྒྲུབ་ཐབས། གསང་བ་གྲོལ་ལམ་ལྟར་དུ་སྒྲུབ་ཐབས། ཤིན་ཏུ་གསང་བ་ཐབས་ལམ་ལྟར་དུ་སྒྲུབ་ཐབས། མཐར་ཐུག་རྫོགས་པ་ཆེན་པོའི་མན་ངག་དང་སྦྱར་ནས་སྒྲུབ་ཐབས་ཀྱང་ཡོད། དེ་ཐམས་ཅད་ཀྱང་ཚིག་བདུན་གསོལ་འདེབས་རང་གི་ཚིག་ཁོ་ན་མ་གཏོགས་ཚིག་གཞན་གྱིས་ལྷན་པོ་སྦྱར་ནས་འགྲེལ་མི་དགོས། ཁོ་རང་གི་ནང་དུ་དེ་ཐམས་ཅད་ཀྱི་དོན་ཆ་ཚང་བ་ཞིག་བཤད་ཡོད།^p120
འདིར་ཚིག་བདུན་གསོལ་འདེབས་དེ་ཕྱི་ལྟར་རྡོ་རྗེ་ཚིག་བདུན་བླ་མའི་རྣལ་འབྱོར་ལྟར་སྒྲུབ་པའི་ཚིག་མདོར་བསྡུས་ཙམ་ཞིག་བཤད་ན། ཁྱེད་རང་རྣམས་ཐ་མལ་དུ་གནས་པའི་མདུན་དུ་ཨོ་རྒྱན་དྲི་མེད་དྷ་ན་ཀོ་ཤའི་མཚོ་གཏིང་ཟབ་པ་ཡན་ལག་བརྒྱད་ཀྱི་ཆུས་གང་བའི་ནང་ན། རང་བྱུང་པདྨའི་སྡོང་པོའི་རྩེར་ཨོ་རྒྱན་རིན་པོ་ཆེ་དང་ཡེ་ཤེས་མཚོ་རྒྱལ་དཀར་ལ་དམར་བའི་མདངས་ཆགས་པ། ཡབ་ཡུམ་གཉིས་མེད་དུ་འཁྲིལ་བ། འཁོར་དུ་དཔའ་བོ་དང་མཁའ་འགྲོ་ཆོས་སྐྱོང་སྲུང་མའི་ཚོགས་ཐམས་ཅད་བཀྲ་ལམ་མེར་བཞུགས་ཡོད་པ་ཞིག་གསལ་འདེབས་དགོས། བདག་གིས་དུས་ད་ནས་བཟུང་སྟེ་བྱང་ཆུབ་སྙིང་པོ་མ་ཐོབ་ཀྱི་བར་དུ་སྐྱིད་སྡུག་ལེགས་ཉེས་མཐོ་དམན་ཅི་བྱུང་ཡང་། ཨོ་རྒྱན་རིན་པོ་ཆེ་ཁྱེད་མ་གཏོགས་པའི་རེ་ས་དང་སྐྱབས་གནས་གཞན་དུ་མི་འཚོལ། ཁྱེད་ཁོ་ནས་བདག་རྒྱུད་བྱིན་གྱིས་བརླབ་པར་མཛད་དུ་གསོལ་སྙམ་ནས་དད་མོས་དྲག་པོ་བསྐྱེད་དགོས།^p121
རང་གཞན་སེམས་ཅན་ཐམས་ཅད་ཀྱིས་ལུས་ངག་ཡིད་གསུམ་གྱི་གུས་འདུད་དང་ལྡན་པའི་སྒོ་ནས་ཕྱག་འཚལ་བར་བགྱི་བ་དང་། དངོས་འབྱོར་ཡིད་སྤྲུལ་གྱི་མཆོད་པ་སྣ་ཚོགས་འབུལ་བ། ཚེ་རབས་ཐོག་མེད་ནས་བསགས་པའི་སྡིག་ལྟུང་ཐམས་ཅད་ལ་འགྱོད་སེམས་དྲག་པོའི་སྒོ་ནས་ཡོངས་སུ་བཤགས་པ་སྟེ་ཡན་ལག་དང་པོ་གསུམ་བསྐྱེད་དགོས། རང་གཞན་གྱིས་དུས་གསུམ་དུ་བསགས་པའི་དགེ་བ་རྣམས་ལ་ཕྲག་དོག་མེད་པར་རྗེས་སུ་ཡི་རང་བ་དང་། འཆི་མེད་ཞི་བ་དམ་པའི་སྐུར་རྟག་ཏུ་བཞུགས་སུ་གསོལ་བ་དང་། འགྲོ་བ་རྣམས་ལ་ཆོས་ཀྱི་འཁོར་ལོ་བསྐོར་བར་བསྐུལ་བ་དང་། དེ་ཚེ་དགེ་རྩ་བསགས་པ་ཀུན་ཀྱང་ཨོ་རྒྱན་རིན་པོ་ཆེའི་གོ་འཕང་འཐོབ་པར་བྱ་བའི་ཕྱིར་ཡོངས་སུ་བསྔོ་བ་སྟེ་ཡན་ལག་ཕྱི་མ་བཞི་ཡང་ཚུལ་བཞིན་དུ་ཉམས་སུ་ལེན་དགོས།^p122
དེ་ལྟར་གུ་རུ་རིན་པོ་ཆེ་ལ་གསོལ་བ་བཏབ་ཅིང་ཡན་ལག་བདུན་གྱི་ཚོགས་བསགས་པའི་མཐུས། གུ་རུ་རིན་པོ་ཆེའི་སྐུ་ལས་འོད་ཟེར་སྣ་ཚོགས་པ་འཕྲོས། བདག་དང་སེམས་ཅན་ཐམས་ཅད་ལ་ཕོག་པས་ལུས་ངག་ཡིད་གསུམ་གྱི་སྒྲིབ་པ་དག སྐུ་གསུང་ཐུགས་ཀྱི་དངོས་གྲུབ་ཐོབ་པའི་སྐལ་བ་ཅན་དུ་བྱས་པར་མོས་ལ། ཚིག་བདུན་གསོལ་འདེབས་དང་བཛྲ་གུ་རུ་ཅི་རིགས་བགྲང་དགོས།^p123
ཧཱུྃ༔ ཨོ་རྒྱན་ཡུལ་གྱི་ནུབ་བྱང་མཚམས༔ པདྨ་གེ་སར་སྡོང་པོ་ལ༔^p124
ཡ་མཚན་མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔^p125
འཁོར་དུ་མཁའ་འགྲོ་མང་པོས་བསྐོར༔ ཁྱེད་ཀྱི་རྗེས་སུ་བདག་བསྒྲུབ་ཀྱིས༔^p126
བྱིན་གྱིས་རློབས་ཕྱིར་གཤེགས་སུ་གསོལ༔ གུ་རུ་པདྨ་སིདྡྷི་ཧཱུྃ༔^p127
ཨོཾ་ཨཱཿ ཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔^p128
སྔོན་ཆད་མཁའ་འགྲོ་མ་རྣམས་ཀྱི་བརྡ་སྐད་དུ་ཡང་། འདི་ལྟ་བུའི་ཚིག་བདུན་གསོལ་འདེབས་དང་བཛྲ་གུ་རུ་འདོན་པའི་སྲོལ་ཡོད་ཀྱང་། ད་ལྟ་མཁའ་འགྲོའི་བརྡ་སྐད་ཀྱི་སྲོལ་དེ་འུ་ཅག་སུ་གཅིག་གིས་ཀྱང་ལབ་མི་ཤེས་པས། ཁྱེད་རྣམ་པས་འདོན་པའི་གནས་སྐབས་ན་བོད་སྐད་གཞིར་བཞག་གིས་ཐོན་དང་། ཨོ་རྒྱན་རིན་པོ་ཆེ་རང་ཉིད་ཀྱིས་ཞལ་གྱིས་བཞེས་ཤིང་བྱིན་གྱིས་བརླབས་པའི་ཚིག་ཡིན།^p129
ཚིག་བདུན་གསོལ་འདེབས་དེ་མཁའ་འགྲོའི་བརྡ་སྐད་དུ་གཏན་ནས་འདོན་མི་ཤེས་པ་ཞིག་ཡིན་ནམ་སྙམ་ན། འདོན་ཤེས་པ་ཡིན་ཏེ། སྤྲུལ་པའི་གཏེར་སྟོན་རྣམས་ཀྱིས་འདོན་ཤེས་པ་ཡིན། མཁའ་འགྲོ་མའི་བརྡ་ཡིག་དེ་ལའང་མཁའ་འགྲོའི་ཡུལ་གླིང་གཙོ་བོའི་རིགས་སུམ་ཅུ་སོ་གཉིས་ལ་བརྡ་ཡིག་མི་འདྲ་བ་སུམ་ཅུ་སོ་གཉིས་ཡོད། དེའི་བརྡ་སྐད་ཚང་མ་ལ་རྡོ་རྗེ་ཚིག་བདུན་འདི་ཉིད་སྔོན་ཆད་ནས་གྲགས་ཟིན་ཡང་། སྤྲུལ་པའི་གཏེར་སྟོན་སུས་ཀྱང་མཁའ་འགྲོའི་བརྡ་སྐད་དུ་བསླབ་སྲོལ་མེད་པར་བོད་སྐད་ཀྱིས་བསླབས་པ་ཡིན། དེས་ན་ཁྱེད་རྣམས་ཀྱིས་ཀྱང་བོད་སྐད་ཀྱིས་ཐོན།^p131
མཁའ་འགྲོ་མ་རྣམས་ཀྱི་བརྡ་སྐད་ལྟར་དུ་བསླབ་ན་ཡང་། མཁའ་འགྲོ་མ་རྣམས་ཀྱིས་དེའི་དོན་གོ་རྒྱུ་རེད་མ་གཏོགས་གཞན་པ་རྣམས་ཀྱིས་དེའི་ཚིག་དོན་ལ་གོ་བ་མི་ལོན། ཚིག་འགའ་རེ་གོ་བའི་དབང་དུ་བྱས་ཀྱང་། གུ་རུ་དྲག་པོའི་མཚན་སྔགས་ཨ་རྩིག་ནེ་རྩིག་སོགས་སུ་གཅིག་གིས་ཀྱང་མི་གོ་བ་དེ་ལྟ་བུ་ཞིག་ཡིན། བོད་སྐད་ཀྱི་ཚིག་དེ་འགྲེལ་དགོས་ན་ཡང་འུ་ཅག་ཚང་མས་འགྲེལ་ཤེས་ངེས་ཡིན། མཁའ་འགྲོའི་བརྡ་སྐད་དེ་ཇི་ལྟ་བུ་ཞིག་ཡིན་ན། འུ་ཚོ་བོད་ལུང་པ་ན་སྤྱིར་ཡུལ་སྐད་མང་པོ་ཡོད་ཀྱང་། དེའི་ནང་ནས་རྒྱལ་རོང་གི་ཡུལ་སྐད་འགའ་ཞིག་གཞན་སུས་ཀྱང་མི་གོ་བ་ལྟ་བུ་ཡིན། མཁའ་འགྲོའི་བརྡ་སྐད་ཀྱང་དེ་དང་འདྲ་བོ་རེད།^p132
དེ་ལྟར་ཁྱེད་ཅག་གིས་ཨོ་རྒྱན་རིན་པོ་ཆེ་ལ་གསོལ་བ་རྩེ་གཅིག་ཏུ་བཏབ་པའི་མཐར། ཨོ་རྒྱན་རིན་པོ་ཆེའི་སྤྱི་བོ་མགྲིན་པ་སྙིང་ག་གསུམ་ནས་འོད་ཟེར་དཀར་དམར་མཐིང་གསུམ་བྱུང་ནས་ཁྱེད་རང་རྣམས་ཀྱི་གནས་གསུམ་དུ་ཐིམ་པས་གུ་རུའི་སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་མ་ལུས་པ་ཐོབ་པའི་མོས་པ་མཛོད། མཐར་གུ་རུ་ཡབ་ཡུམ་འོད་དུ་ཞུ་ནས་ཐིག་ལེ་དཀར་ལ་དམར་བའི་མདངས་ཆགས་པ། ཧཱུཾ་ཡིག་གིས་མཚན་པ་ཞིག་རང་གི་སྙིང་གར་ཐིམ་པས་བླ་མའི་ཐུགས་དང་རང་སེམས་དབྱེར་མེད་དུ་གྱུར་ཅིང་། སེམས་རྩེ་གཅིག་ཏུ་སྤྲོ་བསྡུ་གང་ཡང་མེད་པའི་ངང་ལ་མཉམ་པར་ཞོག མཐར་ཏིང་ངེ་འཛིན་ལས་ལྡང་བ་ན་སྣང་བ་ཐམས་ཅད་བླ་མའི་སྐུ་དང་། སྒྲ་གྲགས་ཐམས་ཅད་བླ་མའི་གསུང་། དྲན་རྟོག་ཐམས་ཅད་བླ་མའི་ཐུགས་སུ་ཤེས་པར་གྱིས་ལ་ཟ་ཉལ་འགྲོ་འདུག་གི་སྤྱོད་ལམ་རྣམ་པ་བཞི་ལ་འཇུག་པར་བྱ་དགོས། དེ་དག་ནི་གུ་རུ་རིན་པོ་ཆེ་དངོས་སུ་སྒྲུབ་ཐབས་ཡིན།^p133
ལས་རབ་འབྱམས་སྒྲུབ་པའི་ཐབས་ནི། ཨོ་རྒྱན་རིན་པོ་ཆེའི་བསམ་པ་ལྷུན་འགྲུབ་མའི་ནང་གི་ཡིད་བཞིན་ནོར་བུ་ལྟ་བུའི་མན་ངག་བཅུ་གསུམ་དང་ལྡན་པའི་ཚིག་བདུན་གསོལ་འདེབས་འདིའི་སྒོ་ནས་སྒྲུབ་དགོས། དེས་ན་སངས་རྒྱས་ཀྱི་ཆོས་ཚུལ་རབ་འབྱམས་ཀྱི་ནང་ན་ཟབ་པའི་མཐར་ཐུག་པ་དེ་ནི་བླ་མ་ཨོ་རྒྱན་ཆེན་པོ་ལ་གསོལ་བ་འདེབས་པ་དང་། འོད་གསལ་རྫོགས་པ་ཆེན་པོ་ཉམས་སུ་ལེན་པ་འདི་ལས་བཟང་བ་དང་ཟབ་པ་ཞིག་རྩ་བ་ནས་མེད་པས། ཁྱེད་རྣམས་ཀྱིས་ཀྱང་རྒྱུན་དུ་དེ་ལྟ་བུ་ཐུགས་ལ་བཟུང་ནས་ཉམས་སུ་ལེན་པར་ཞུ།^p134
དྲན་ངོགས་ཀྱི་ནུབ་བསྐྱོད་ལས་ཡུལ་ཉིའུ་ཡོག་གི་མཛད་རིམ་ལེགས་པར་གྲུབ་པའི་སྐབས་ཏེ་དྲུག་པའོ། །^p135
