གླེང་བསླང་བ་།^p1
༼ ༦.༡༢~༦.༡༧ ༽^p2
མཛད་རིམ།^p3
ཕྱི་ཟླ་༦པའི་ཚེས་༡༢ཉིན། བླ་རུང་ནས་ཆས་ཏེ་དར་མདོར་སླེབས།^p4
ཕྱི་ཟླ་༦པའི་ཚེས་༡༣ཉིན། ཁྲེང་ཏུའུ་ལ་འབྱོར།^p5
ཕྱི་ཟླ་༦པའི་ཚེས་༡༤ཉིན། ཀོང་ཀྲོའུ་ལ་འཕུར།^p6
ཕྱི་ཟླ་༦པའི་ཚེས་༡༥ཉིན། ཧྲེན་ཀྲེན་ནས་མཚོ་འགག་བརྒལ་ནས་ཧོང་ཀོང་ལ་ཕེབས།^p7
ཕྱི་ཟླ་༦པའི་ཚེས་༡༦ཉིན། འཇར་པན་གྱི་གྲོང་ཁྱེར་ཐོ་ཁེ་ཡོ་བརྒྱུད།^p8
ཕྱི་ཟླ་༦པའི་ཚེས་༡༧ཉིན། ཨ་རིའི་ཧཱ་ཝ་ཡེའི་ཕྱོགས་སུ་འཕུར།^p9
ལོ་གསུམ་གྱི་གསང་རྒྱ།^p10
མ་གཞི་བླ་མ་ཡིད་བཞིན་ནོར་བུ་༡༩༩༠ལོར་རྒྱ་གར་དུ་བྱོན་དུས་ནས། ནུབ་ཕྱོགས་སུ་ཆོས་གསུང་པར་འབྱོན་རྒྱུའི་འཆར་གཞི་ཡོད་པ་སྟེ། ཐེངས་ཤིག ཁོང་གིས་བདག་ཟུར་དུ་བོས་ནས། ད་ནས་ལོ་གསུམ་བཞི་ཙམ་གྱི་རྗེས་སུ་བདག་ཨ་རི་སོགས་ནུབ་ཕྱོགས་རྒྱལ་ཁབ་འགའ་ལ་ཆོས་གསུང་བར་འགྲོ་རྩིས་ཡོད་པས། གལ་ཏེ་ཁྱོད་རང་ལ་མོས་མཐུན་ཡོད་ཅིང་ཁྱིམ་མི་སོགས་ཀྱི་བློ་ལ་བབས་ན་ཁྲིད་དེ་འགྲོ་ཆོག དེ་ལྟ་ན་ཡང་། བྱ་བ་འདི་ལ་འགལ་རྐྱེན་འབྱུང་སྲིད་པས་གནས་སྐབས་སུ་སུ་ལའང་བཤད་མི་རུང་། སྤྱིར་བདག་ཅག་ཕྱི་རྒྱལ་སོགས་སུ་ཆོས་སྟོན་དུ་འགྲོ་བར་བཤད་མི་རུང་བ་གང་ཡང་མེད་ཀྱང་། བྱ་བ་འདི་ལེགས་འགྲུབ་ཡོང་ཆེད་གསང་རྒྱ་བྱེད་པ་ཅིས་ཀྱང་གལ་ཆེ། ཁྱོད་ངག་སྒོ་དམ་པོ་ཅན་ཞིག་ཡིན་པས་མི་སྐྱོན་ཡང་། དེའི་ཕྱོགས་ལ་གཟབ་ནན་བྱ་དགོས་ཞེས་གསུངས།^p11
བདག་གིས་ལགས་སོ་ཞུས་པ་ཡིན་ལ། ཕྱོགས་གཅིག་ནས་སྤྲོ་སྣང་ཆེན་པོ་སྐྱེས་ཤིང་ཕྱོགས་གཅིག་ནས་རང་ཉིད་ཀྱིས་འབྲེལ་ཡོད་ལས་ཀ་རྣམས་ལེགས་པར་འགྲུབ་བམ་སྙམ་པའི་གནོན་ཤུགས་ཀྱི་ཚོར་སྣང་ཡང་སྐྱེས། གང་ལྟར། བླ་མ་ཉིད་ལ་ཞབས་ཕྱི་ལེགས་པོ་བསྒྲུབས་ནས་ཐུགས་མཉེས་པོར་འོང་བ་ཞིག་ལ་བརྩོན་པ་སྔར་ལས་ལྷག་པ་བྱ་དགོས་སྙམ་དུ་རང་སེམས་ལ་དམ་བཅའ་ཡང་ཡང་བྱས།^p12
དེ་ནས་ཕྱི་ཕྱོགས་ཀྱི་བྱ་བ་རྣམས་མཁན་རྣམ་གྲོལ་གྱིས་འབྲེལ་གཏུག་བྱེད་པ་དང་ནང་ཕྱོགས་ཀྱི་འབྲེལ་ཡོད་བྱ་བ་རྣམས་བདག་གིས་འགན་ཁུར་བྱས། བདག་གིས་མངོན་ཆུང་གི་ཚུལ་གྱིས་སྔོན་འགྲོའི་གྲ་སྒྲིག་སྣ་ཚོགས་ཏེ། ཆོས་རྗེ་མཆོག་གིས་གསུང་དགོས་པའི་ཆོས་ཀྱི་དཔེ་ཆ་འཚོལ་སྡུད་དང་། ཕྱི་རྒྱལ་དུ་འགྲོ་བའི་ལམ་ཡིག་ལེན་པ། ལག་དངུལ་གསོག་འཇོག རྒྱུ་སྤུས་ཅུང་ལེགས་པའི་པར་ཆས་ཉོ་བ། འབྲེལ་ཡོད་ཡིག་ཆ་ཀློག་པ་སོགས་བྱས། སྐབས་དེར་དེང་སང་ལྟར་བརྡ་འཕྲིན་དང་དྲྭ་རྒྱ་སོགས་སྟབས་བདེ་པོ་མེད་པས། ཐབས་ཚུལ་གཞན་དང་ཡིག་རིགས་གཞན་ལ་བརྟེན་ནས། ནུབ་ཕྱོགས་ཀྱི་མི་རྣམས་ཀྱི་གཤིས་ཀ་དང་གོམས་སྲོལ། བྱ་བ་སྒྲུབ་སྟངས། འཚོ་བ་རོལ་སྟངས་སོགས་ལའང་རྒྱུས་ལོན་ཅུང་ཟད་རེ་བྱས་པ་ཡིན།^p13
དེའི་དུས་སུ། ཕྱི་ལོ་༡༩༩༠ལོ་ནས་བཟུང་ཆོས་རྗེ་བླ་མའི་སྤྱན་གྱིས་ཡི་གེ་དེ་ཙམ་མི་གཟིགས་པས། དབང་ཆོག་བསྡུས་པ་འགའ་རེ་ཐུགས་ཐོག་ཏུ་ཡོད་པ་མ་གཏོགས། གསུང་བྱའི་དབང་ཆོག་དང་གཞུང་གཞན་རྣམས་སྔོན་ནས་སྒྲ་འཇུག་བྱེད་དགོས་ཤིང་། མཁན་པོ་འཆི་མེད་རིག་འཛིན་ཀློག་ལ་མཁས་པས། བདག་གིས་ཁོང་ལ་ལྕེ་བཙུན་སྙིང་ཐིག་དང་མཁའ་ལྡིང་གཤོག་རླབས་སོགས་ཀྱི་སྒྲ་ལེན་དུ་བཅུག དེ་ཡང་ཆོས་རྗེ་ཉིད་ཀྱིས་དབང་ཁྲིད་གནང་སྐབས་སྒྲ་ཕབ་ལས་དུམ་བུ་རེར་གསན་རྗེས་འཕྲལ་སྡོད་འཐེབ་ཏུ་གནོན་ཙམ་བྱས་ནས་མུ་མཐུད་དུ་གསུང་བར་སྟབས་བདེ་བྱས་པ་ཡིན། ཐེངས་ཤིག་ཁོང་གིས། ཁྱེད་ཀྱིས་འདི་དག་སྒྲ་འཇུག་བྱས་ནས་ཅི་བྱ། བླ་མ་ཡིད་བཞིན་ནོར་བུ་ཡུལ་ཁམས་གང་ཞིག་ལ་འབྱོན་རྩིས་ཡོད་དམ་ཞེས་དྲིས་ཀྱང་། བདག་གིས་གླེང་ཕྱོགས་གཞན་དུ་བསྐོར་ནས་དྲི་བ་དེར་གཡོལ་ཐབས་བྱས་པ་ཡིན།^p14
དེའི་རིང་ལ། ཨ་རི་སོགས་ཡོ་རོབ་ཀྱི་རྒྱལ་ཁབ་གཞན་གྱི་ཆོས་ཚོགས་དག་གིས་གདན་ཞུའི་ཡི་གེ་ཚང་མ་དབྱིན་ཡིག་གི་ལམ་ནས་བསྐུར་བྱུང་བས། སྐབས་དེར་སློབ་གླིང་དུའང་དབྱིན་ཡིག་ཤེས་མཁན་ཆེར་མེད་ལ། ཡོད་ཀྱང་ཐད་ཀར་སྟོན་པ་སོགས་སྟབས་མི་བདེ་བས། བདག་གིས་ཐབས་ལམ་དམིགས་བསལ་བ་སྤྱད་ནས། གདན་ཞུའི་ཡི་གེ་རྣམས་ཀྱི་ནང་དོན་ཡང་གསང་སྟབས་ཀྱིས་བླ་མར་སྙན་ཞུ་བྱས། དེ་ལྟར། ནུབ་ཕྱོགས་སུ་ཕེབས་པའི་ཉེར་མཁོའི་སྟ་གོན་གྱི་བྱ་བ་རྣམས། ལོ་གསུམ་གྱི་རིང་ལ་གསང་བའི་སྒོ་ནས་ལེགས་པར་བསྒྲུབས་པ་ཡིན།^p16
ཐེངས་དང་པོའི་བདེ་ཆེན་ཞིང་སྒྲུབ་ཆེན་མོ།^p17
ཆོས་རྗེ་བླ་མ་ཉིད་དགུང་ལོ་དྲུག་ཅུ་སྟེ་ཆུ་མོ་བྱ་ཡི་ལོ་༼ཕྱི་ལོ་༡༩༩༣ལོ་༽ལ། བླ་རུང་སྒར་སྤྱི་ལ་གཉུག་སེམས་ཟུར་དཔྱད་རྡོ་རྗེ་རིན་ཆེན་ཕྲེང་བ་གསུངས་ཤིང་། སྐབས་དེར། ངེད་བདུད་ལས་རྣམ་རྒྱལ་གླིང་གི་ཐོག་མའི་མདོ་སྔགས་རིག་པའི་གཙུག་ལག་ཁང་ལེགས་འགྲུབ་བྱུང་བའི་རབ་གནས་ཀྱི་མཛད་སྒོའི་སྟེང་དུ་བྱོན་ནས། རྗེ་ཉིད་ཀྱིས་རྫོགས་པ་ཆེན་པོའི་བཀའ་དབང་དང་སེམས་ཉིད་རང་གྲོལ་གྱི་སྨིན་ཁྲིད་གནང་། དེ་ནས། མདོ་མང་དགོན་པའི་སྤྲུལ་རིན་པོ་ཆེ་ཏིཥྛ་དང་མཁན་ཏེ་པ་གཉིས་གདན་ཞུ་བྱས་ཏེ། སློབ་གླིང་སྤྱིའི་དགེ་འདུན་པ་རྣམས་ལ་སྤྱི་མདོ་དགོངས་འདུས་ཀྱི་དབང་དང་ཁྲིད་གསུང་དུ་བཅུག་ཅིང་། ཆོས་རྗེ་བླ་མ་ཁོང་ཉིད་བྲག་མགོ་དང་དཀར་མཛེས། དཔལ་ཡུལ། ཉག་རོང་། རྟའུ་སོགས་སུ་བྱོན་ནས་སྙིང་ཐིག་ཡ་བཞི་དང་དུས་འཁོར་དབང་ཆེན་སོགས་དབང་ལུང་མན་ངག་གི་དམ་པའི་ཆོས་སྤེལ།^p18
ང་རང་སྐབས་དེར་རང་ལོ་སོ་གཅིག་ལ་སོན་ཞིང་། སྒར་སྤྱིའི་དགེ་འདུན་པ་རྣམས་དང་མཉམ་དུ་ཟླ་ཕྱེད་ཀྱི་རིང་ལ་སྤྲུལ་རིན་པོ་ཆེ་ཏིཥྛའི་མདུན་ནས་འདུས་མདོའི་དབང་ཡོངས་རྫོགས་ཞུས་ཤིང་། མཁན་ཏེ་པའི་མདུན་ནས་དགོངས་འདུས་འགྲེལ་ཆེན་གྱི་ཁྲིད་ཀྱང་ཞུས། དུས་མཚུངས་སུ། བདག་གིས་རྒྱ་རིགས་དད་ལྡན་རྣམས་ལ་སྒྱུ་མ་ངལ་གསོའི་འགྲེལ་བ་ཤིང་རྟ་བཟང་པོ་དང་། བསམ་གཏན་ངལ་གསོའི་འགྲེལ་བ་ཤིང་རྟ་རྣམ་དག་སོགས་ཁྲིད་ཁུལ་བྱས། ཟླ་བ་གཅིག་ལྷག་གི་རྗེས་སུ། སྐྱབས་རྗེ་ཉིད་ཕྱིར་སྒར་ལ་བྱོན། དེ་ནས། དམ་པ་གོང་མ་དག་གིས་རྗེ་ཉིད་ལ་འབྲེལ་བ་ཐོགས་ཚད་བདེ་བ་ཅན་དུ་སྐྱེ་བ་སོགས་ལུང་བསྟན་པའི་དོན་བཞིན། སྐྱེ་བོ་གྲངས་མེད་པ་ཞིག་བདེ་ཆེན་དག་པའི་ཞིང་ལ་འདྲེན་པར་བྱེད་པའི་ཆོས་མཆོག་བདུད་རྩིའི་སྦྲང་ཆར་ཆེན་པོ་འབེབ་པའི་ཕྱིར། སྐབས་དང་པོའི་བདེ་ཆེན་ཞིང་སྒྲུབ་ཆེན་མོ་དེ་བོད་ཟླ་བཞི་པ་སྟེ། ས་ག་ཟླ་བའི་ཚེས་གཅིག་ནས་ཚེས་བཅོ་ལྔའི་བར་ལ་འཚོག་རྒྱུར་གཏན་ཁེལ་མཛད།^p20
དེ་ལ་ཕྱོགས་བཞི་མཚམས་བརྒྱད་ནས་མི་གྲངས་ཁྲི་བཅུ་ཕྲག་མང་པོ་ཡོངས་སུ་འདུས་ནས། ཐམས་ཅད་ཀྱིས་གནུབས་ཟུར་ཡུལ་ཤོག་གི་ལོ་པཎ་བསུ་སྐྱེལ་ཐང་དུ་སྦྲ་གུར་ཕུབ་ནས་ཆོས་ཚོགས་ལ་ཞུགས། དེ་དུས། ཡུལ་ལུང་ཐམས་ཅད་སྦྲ་གུར་གྱིས་གང་ཞིང་། མི་ཚོགས་ཀྱི་འདུ་བ་ནི་མུ་མཐའ་མེད་པའི་རྒྱ་མཚོ་འཕྱུར་བ་དང་འདྲ་ལ། དད་ལྡན་རྣམས་ཀྱིས་དར་དཀར་ཕུལ་བའི་རྣམ་པ་ནི་རྒྱ་མཚོའི་རླབས་ཕྲེང་མཁའ་ལ་འཕྱོ་བ་དང་ཀུན་ནས་མཚུངས། ཆོས་ཀྱི་སྒྲ་དབྱངས་ཀྱི་ངར་སྐད་ཀྱང་འབྲུག་སྟོང་དུས་གཅིག་ཏུ་ལྡིར་བ་དང་མཚུངས་པས། མདོར་ན་ཞིང་སྒྲུབ་ཆེན་མོ་དེ་རྣམ་པ་རྒྱ་ཆེ་ཞིང་བསམ་ཡུལ་ལས་འདས་པ་ཞིག་བྱུང་། རང་ཡུལ་ཕྱོགས་ནས་ཀྱང་དད་ལྡན་ཆེས་མང་པོ་འབྱོར་ཞིང་། བདག་གི་དྲིན་ཆེན་ཕ་མ་གཉིས་ལའང་ཆོས་ཚོགས་དེར་ཞུགས་པའི་སྐལ་བ་བཟང་པོ་ལྡན་པར་གྱུར། ཆོས་རྗེ་བླ་མ་ཡིད་བཞིན་ནོར་བུ་ཉིད་ཀྱིས་ཐམས་ཅད་ལ་འོད་དཔག་མེད་ཀྱི་དབང་གནང་ཞིང་། ཉིན་རེ་བཞིན་འོད་མདོ་དང་དྲང་སྲོང་ལུང་ཉི་སོགས་ཀྱི་བཀའ་ཁྲིད་བསྩལ་བ་མ་ཟད། མི་རེས་འོད་མཚན་བྱེ་བ་རེ་བཏོན་ན། ཆོས་སྤོང་དང་མཚམས་མེད་བྱས་པ་མ་གཏོགས་པའི་སྐྱེ་བོ་ཐམས་ཅད་བདེ་བ་ཅན་དུ་སྐྱེ་བར་འགྱུར་ངེས་ཡིན་ཞེས་ནན་གྱིས་གསུངས་བྱུང་། རྗེ་བཙུན་མ་མུ་མཚོ་མཆོག་གིས་ཀྱང་སྤྱན་རས་གཟིགས་ཀྱི་དབང་དང་རྒྱལ་སྲས་ལག་ལེན་གྱི་ཁྲིད་སོགས་དབང་ཁྲིད་ཀྱི་བཀའ་དྲིན་བསྐྱངས། དེ་ནི་ཡུལ་ཁམས་འདིའི་ཞིང་སྒྲུབ་ཐམས་ཅད་ཀྱི་ཐོག་མ་ཡིན་ཞིང་། ཚད་མེད་པའི་སེམས་ཅན་རྣམས་བདེ་ཆེན་དག་པའི་ཞིང་ལ་འཁྲིད་པར་བྱེད་པའི་ཁྱད་དུ་འཕགས་པའི་རྟེན་འབྲེལ་གྱི་སྒོ་འཕར་དང་པོ་ཕྱེས་པའང་ཡིན་ནོ། །^p23
ངོ་མཚར་བའི་ཁ་པར།^p25
བདེ་ཆེན་ཞིང་སྒྲུབ་ཆེན་མོའི་ཉིན་དང་པོའི་ཕྱི་དྲོར། ཆོས་རྗེ་ཉིད་ཀྱིས་ཆོས་ཁྲིད་གསུངས་ཟིན་མ་ཐག གློ་བུར་དུ་མི་ཞིག་ཆོས་རྗེ་ཉིད་ཀྱི་ཆོས་ཁྲིའི་གམ་དུ་བཅར་ནས། མཁན་པོ་རྣམ་གྲོལ་གྱིས་ཁྱེད་ལ་ཁ་པར་འབྱོར་བྱུང་བས། ཁྱེད་རང་གནུབས་ཟུར་ཡུལ་ཤོག་གི་སྲིད་གཞུང་གི་གཞུང་ལས་ཁང་དུ་བྱོན་ནས་གསན་རོགས་ཞུ་ཞེས་ཞུས་མ་ཐག ཁོང་གིས་བཟང་སྤྱོད་སྨོན་ལམ་ཡང་འདོན་ལོང་མེད་པར་ཆོས་ཁྲིའི་སྟེང་ནས་ཡར་བཞེངས་ཏེ། བདག་ལ་འགྲོ་རོགས་བྱོས་ཞེས་གསུངས། སྐབས་དེར། གནུབས་ཟུར་ཡུལ་ཤོག་ཡོངས་ལ་གདན་འཇོག་ཁ་པར་གཅིག་མ་གཏོགས་མེད་ཅིང་། ཞིང་སྒྲུབ་འཚོག་ས་ནས་ཡུལ་ཚོའི་སྲིད་གཞུང་བར་སྤྱི་ལེ་ཕྱེད་ཙམ་གྱི་བར་ཐག་ཡོད། བདག་ཅག་རླངས་འཁོར་ལ་བསྡད་ནས་དེར་ཐོན་ཚེ། ཆོས་རྗེ་ཉིད་ཀྱིས་ཁ་པར་བླངས་ཏེ་གསུང་སྐད་མཐོན་པོས་ང་འཇིགས་ཕུན་ཡིན་ཞེས་ལན་འགར་གསུངས་ཀྱང་། ཁ་པར་གྱི་རྒྱུ་སྤུས་ངན་ཞིང་འཛེར་སྐད་ཆེ་བས་ལེགས་པོ་ཞིག་ཚོར་མ་ཐུབ། སྐབས་རེར་བདག་གིས་ཉན་ལ་སྐབས་རེར་བླ་མས་གསན་ནས་དུས་ཚོད་རིང་ཙམ་འགོར་རྗེས་གཟོད་གོ་བརྡ་འཕྲོད་ཐུབ་པ་བྱུང་།^p26
མཁན་པོ་རྣམ་གྲོལ་ཁོང་རྒྱ་གར་ནས་ཕྱིར་ཁྲེང་ཏུའུ་（成都）ལ་སླེབས་ཏེ། ཆོས་རྗེ་ཉིད་ཕྱི་ཕྱོགས་སུ་འབྱོན་སྐབས་ཀྱི་ཆོས་གསུང་སའི་ས་ཚིགས་དང་དུས་ཚོད་སོགས་ཕལ་ཆེར་གཏན་ཁེལ་བྱས་ཟིན་པས། ཕྱི་རྒྱལ་དུ་འགྲོ་མཁན་རྣམས་ཀྱི་ཐོབ་དཔང་དང་ལམ་ཡིག་རྣམས་ཁྱེར་ནས་ཐོངས་མཆན་དགོད་དུ་ཡོང་དགོས་ཟེར། རྗེ་ཉིད་ནི་ཆོས་ཚོགས་ཆེན་པོའི་མཚམས་གཅད་རྒྱུ་མེད་པས་འབྱོན་ཐབས་མི་འདུག དེ་བས་བདག་གིས་ལམ་ཡིག་སོགས་འབྲེལ་ཡོད་རྒྱུ་ཆ་དག་བཟུང་ནས་ཁྲེང་ཏུའུ་རུ་སོང་བ་ཡིན། དེར་ཐོན་རྗེས། མཁན་པོ་རྣམ་གྲོལ་དང་ཐུག་ཕྲད་བྱས་ཏེ་ཨ་རིའི་གཞུང་ཚབ་ཁང་དུ་སོང་། གཞུང་ཚབ་ཁང་ལ་རྒྱ་ཁྱོན་ཆུང་བའི་ཁང་ཤག་གཉིས་དང་ར་སྐོར་ཆུང་ཆུང་ཞིག་ལས་ཅིའང་མི་འདུག ཉིན་དེར། མི་མང་པོ་ཞིག་ལ་ཐོངས་མཆན་བཀག་འདུག་པས། བུད་མེད་སློབ་ཆེན་པ་ཞིག་ངུས་ནས་གཏམ་ཡང་སྨྲ་མི་ཐུབ་པར་གྱུར་འདུག་ལ། གང་ཟག་གཞན་ཞིག་གི་ལམ་ཡིག་སྟེང་དུ་ཕྱིས་སུ་རྒྱལ་ཁབ་དེར་འགྲོ་མི་ཆོག་པའི་ཐེལ་ཙེ་བརྒྱབས་པ་སོགས་མཐོང་། བདག་ནི་སྐབས་དེར་ཨ་རི་སོགས་ནུབ་ཕྱོགས་རྒྱལ་ཁབ་ཏུ་འགྲོ་འདོད་ཆེ་ལ། ཆོས་རྗེ་ཉིད་དང་མཉམ་དུ་ཡུལ་དེ་དག་ལ་འགྲོ་རྒྱུ་བྱུང་ན་སྙམ་པའི་འདུན་པ་ལྷག་ཏུ་ཆེ་ནའང་། དེ་རིང་ཕལ་ཆེར་ཐོངས་མཆན་ལོན་ཐུབ་རྒྱུ་མ་རེད་སྙམ།^p27
དེ་ནས་བདག་གིས་ཆོས་རྗེ་ཉིད་དང་ཨ་ནེ་མེ་སྒྲོན། བླ་མ་མུ་མཚོ། བདག་རང་ཉིད་བཅས་ཀྱི་ལམ་ཡིག་རྣམས་ཕར་སྤྲད་ཚེ། ཐོངས་མཆན་འགོད་མཁན་གྱི་རྒད་པོ་མགོ་སེར་དེས། ཁྱེད་ཅག་ཚང་མ་ཨ་རི་ལ་འགྲོ་བ་ཡིན་ནམ། གཞན་རྣམས་མི་དངོས་སུ་མ་ཐོན་ན་ཐོངས་མཆན་འགོད་ཐབས་མེད་ཟེར། བདག་གིས། ཁོང་བླ་མ་ཆེན་པོ་ཞིག་ཡིན་ཞིང་། ད་ལྟ་མི་ཁྲི་ཕྲག་མང་པོར་ཆོས་ཚོགས་འཚོག་བཞིན་ཡོད། གཞན་གཉིས་ནི་ཁོང་གི་ཁྱིམ་མི་ཡིན། ཁྱེད་ཅག་གཞུང་ཚབ་ཁང་གིས་གཟའ་འཁོར་རེར་ཉིན་གཉིས་ཙམ་ལས་སྒོ་མི་ཕྱེ་བར་འདུག ངེད་ཅག་གིས་ཨ་རི་སོགས་ཀྱི་ལས་རིམ་དུས་ཚོད་གཏན་ཁེལ་བྱས་ཟིན་སྟབས་ད་ལྟ་སྒུག་ལོང་མེད་པས། ཁྱེད་ཀྱིས་ཐོངས་མཆན་དགོད་རོགས་བྱས་ན་འགྲིག་གམ་ཞེས་བཤད་ཚེ། མི་དེས་ང་ཚོས་རབ་བྱུང་གི་གོས་གྱོན་ཡོད་པ་ལ་དགའ་བའི་ཉམས་འགྱུར་བླ་ལྷག་དང་བཅས་ཏེ།“very good”ཞེས་ཟེར་བཞིན་ཐོངས་མཆན་བཀོད་བྱུང་།^p28
ཐོངས་མཆན་བཀོད་ཐུབ་སོང་བ་དེས་བདག་ལ་དགའ་ཚོར་ཆེན་པོ་སྐྱེས་ཤིང་། ཕྱིར་མཁན་པོ་རྣམ་གྲོལ་གྱི་མགྲོན་ཁང་དུ་སོང་བ་ན། ཁོང་བཞུགས་སའི་མགྲོན་ཤག་ནང་དུ་གདན་འཇོག་ཁ་པར་ཞིག་འདུག དེ་ནི་བདག་གིས་གདན་འཇོག་ཁ་པར་ཡོད་པའི་ཚད་མཐོའི་མགྲོན་ཤག་མཐོང་ཐེངས་དང་པོ་ཡིན་ལ། དེ་བཞིན་ངེད་གཉིས་ཕན་ཚུན་གླེང་མོལ་བྱེད་དུས། ཁོང་གིས། ཉིན་དེར་ཁྱེད་ཅག་གིས་ངའི་མགྲོན་ཤག་གི་ཁ་པར་ཨང་གྲངས་ཇི་ལྟར་ཤེས་ཏེ་འབྲེལ་གཏུག་བྱས་པ་ཡིན་ཞེས་ཟེར། བདག་གིས། ཁྱེད་ཀྱིས་གནུབས་ཟུར་ཡུལ་ཤོག་གི་གཞུང་ལས་ཁང་དུ་ཁ་པར་བཏང་པ་མ་ཡིན་ནམ་ཞེས་དྲིས་ཚེ། ཁོང་ཤིན་ཏུ་ཡ་མཚན་པའི་སྒོ་ནས། ངས་གནུབས་ཟུར་ཡུལ་ཤོག་ལ་ཁ་པར་ཡོད་པ་ཙམ་ཡང་མི་ཤེས་པས་ག་ལ་ཡིན་ཟེར། ད་དུང་མུ་མཐུད་དུ། ང་རང་ཁྲེང་ཏུའུ་རུ་སླེབས་པའི་ཕྱི་ཉིན་ནངས་མོར་ཆོས་རྗེ་ཉིད་ལ་འབྲེལ་གཏུག་བྱ་འདོད་ཀྱང་། སྤྱིར་གསེར་རྟའི་འཕྲིན་སྐྱེལ་སྟབས་བདེ་མིན་པས་ཁ་པར་ཡོད་ས་མང་པོ་མེད་ལ། ཡོད་པ་དེ་དག་ལའང་འབྲེལ་བ་བྱེད་ཐུབ་མ་སོང་། བྲེལ་བ་ཆེ་ཡང་དེ་རིང་གི་དུས་ཚོད་འཕྲོ་བརླག་ཏུ་གཏོང་བ་ལས་ཐབས་མི་འདུག་སྙམ་པ་བྱུང་། ཕྱི་དྲོར་ཅུང་ཙམ་གཉིད་དུ་ཡུར་བའི་སྐབས་སུ། གློ་བུར་དུ་མགྲོན་ཤག་གི་ཁ་པར་གྱི་སྒྲ་གྲགས་བྱུང་། ངས་གཉིད་མ་སད་ཀྱིས་ཁ་པར་ཡར་བླངས་ནས་ཉན་ཚེ། ཆོས་རྗེ་ཉིད་ཀྱིས་ང་འཇིགས་ཕུན་ཡིན་ཞེས་སོགས་གསུངས་བྱུང་ཞེས་ཟེར།^p29
སྐབས་དེར་རྒྱང་རིང་དུ་ཁ་པར་གཏོང་དགོས་ན་གླ་ཆ་ཅུང་ཆེ་ཡང་། ང་ཚོས་ནི་ཕན་ཚུན་དུ་ཁ་པར་བཏང་བ་མིན་ལ་གླ་ཆའང་སྤྲད་མེད་རུང་། ཕྱོགས་གཉིས་ནས་ངོ་མཚར་བའི་ངང་དུ་འབྲེལ་མཐུད་ཐུབ་པ་བྱུང་བས། ད་ལྟ་ད་དུང་ཡང་ངེད་གཉིས་ཀྱིས་ནམ་རྒྱུན་དོན་དེ་གླེང་སྐབས། ཆེས་ངོ་མཚར་བ་ཞིག་ཏུ་བརྩི་བཞིན་ཡོད་པ་མ་ཟད། དེ་ནི་ཆོས་སྐྱོང་སྲུང་མའི་ནུས་མཐུ་གཞན་ཞིག་ཡིན་ཡང་སྲིད་སྙམ།^p30
བོད་ཡུལ་དང་གྱེས་པ།^p31
ཐོངས་མཆན་ཐོབ་རྗེས་ང་རང་མྱུར་དུ་ཆོས་སྒར་ལ་ཕྱིར་ལོག སྐབས་དེར་ད་དུང་བདེ་ཆེན་ཞིང་སྒྲུབ་ཆེན་མོའང་གྲོལ་མི་འདུག བདག་གིས་འབྲེལ་ཡོད་གནས་ཚུལ་རྣམས་ཆོས་རྗེ་ཉིད་ཀྱི་སྙན་ལ་ཞིབ་མོར་ཞུས་པས། ཁོང་ཐུགས་ཤིན་ཏུ་མཉེས་པར་གྱུར། ཞིང་སྒྲུབ་ཆོས་ཚོགས་མཇུག་དྲིལ་ལ་ཉེ་བའི་སྐབས་སུ། ཁོང་གིས་ཕྱི་ཕྱོགས་ལ་ཕེབས་རྒྱུའི་འཆར་གཞི་དེ་ཀུན་ལ་བསྒྲགས་པ་སྟེ། བདག་ནུབ་ཕྱོགས་ཀྱི་རྒྱལ་ཁབ་འགའ་རེར་འགྲོ་རྩིས་ཡོད་ཅིང་། དེ་ནི་རང་བཞིན་གྱི་ཡུལ་སྐོར་དང་སྤྲོ་འཁྱམ་སོགས་ཀྱི་ཆེད་མ་ཡིན་པར། སངས་རྒྱས་ཀྱི་བསྟན་པ་སྤེལ་བའི་དགོས་པ་དང་རྟེན་འབྲེལ་ཁྱད་པར་བ་ཡོད། ད་ལན་བདག་ཅག་ཕྱི་རུ་འགྲོ་བ་ནི་གནས་གཞན་དུ་འགྲོ་བ་དང་མི་འདྲ་བས། ཁྱེད་དགེ་འདུན་པ་རྣམས་ཀྱིས་ཆོས་སྐྱོང་ལ་འཕྲིན་བཅོལ་དང་ཐུགས་གཏད་གཟབ་རྒྱས་གནང་རོགས། བདག་གིས་ཞབས་འབྲིང་ལ་ཕྱི་ཕྱོགས་ནས་མཁན་པོ་རྣམ་གྲོལ་དང་དངོས་གྲུབ་རྡོ་རྗེ་གཉིས་དང་། ནང་ལོགས་ནས་བསོད་དར་རྒྱས་འཁྲིད་རྒྱུ་ཡིན། རྒྱལ་ཁབ་དེ་དག་ཁ་ཐག་ཤིན་ཏུ་རིང་བའི་སར་ཡོད་པས། ངེད་ཅག་ཕྱིར་ལོག་ཐུབ་མིན་ཡང་མི་ཤེས། གལ་ཏེ་བསོད་དར་རྒྱས་ཕྱིར་ལོག་མ་ཐུབ་ནའང་། མདོ་དགོན་གྱི་སྤྲུལ་ཏིཥྛ་དང་མཁན་ཏེ་པ་གཉིས་ཀྱིས་བདག་ལ་གྱོད་རྒྱག་མི་ཡོང་སྙམ་པའི་ཡིད་ཆེས་ཡོད། ཁྱེད་གཞིས་སྡོད་ཀྱི་དགེ་འདུན་པ་རྣམས་ཀྱིས། མཁན་པོ་དང་མཁན་མོ་དག་གི་མདུན་དུ་ཆོས་ཁྲིད་ལེགས་པར་ཞུས་ནས། ཐོས་བསམ་སྒོམ་གསུམ་ལ་མུ་མཐུད་དུ་བརྩོན་པ་གནང་རྒྱུ་མ་འཆུགས་ཞེས་གསུངས།^p32
ཕྱི་ཕྱོགས་སུ་འགྲོ་ཁར། བདག་གིས་རྒྱའི་མཁན་པོ་དང་མཁན་མོ་གཉིས་བསྐོ་བཞག་བྱས་ནས། བདུད་ལས་རྣམ་རྒྱལ་གླིང་གི་རྒྱའི་དགེ་འདུན་པ་རྣམས་ལ་སྤྱོད་འཇུག་གསུང་དུ་བཅུག ཕ་མ་གཉིས་ཀྱང་གནས་སྐབས་སུ་བླ་རུང་ནས་འགྲོ་འདོད་མེད་པས། སྦྲ་ནག་གཅིག་གཡར་ནས་ཆོས་སྒར་དུ་འདུག་བཅུག་པ་ཡིན།^p33
སྤྱིར་སྔོན་ཆད་ནས་རྒྱ་གར་སོགས་ལ་སོང་བས་རྗེ་ཉིད་ལ་ཞབས་ཕྱི་བྱེད་པའི་ཉམས་མྱོང་ཅུང་ཟད་ཡོད་ཀྱང་། ད་ལན་སྔར་དང་མི་འདྲ་བར་ཆོས་རྗེ་ཉིད་ཀྱི་བྱོན་བཞུགས་ཀྱི་གསོལ་ཆས་དང་ན་བཟའ། བདེ་སྲུང་སོགས་འགན་ལེན་དགོས་པས་མི་ཚད། ཆོས་ཁྲིད་གསུང་རྒྱུའི་འབྲེལ་ཡོད་བྱ་བ་རྣམས་ཀྱང་བཀོད་སྒྲིག་བྱ་དགོས་པས་གནོན་ཤུགས་ཧ་ཅང་ཆེན་པོ་འདུག དེ་བས། བདག་གིས་རྒྱུན་སྤྱོད་ཀྱི་གསོལ་སྨན་དང་པར་ཆས། སྒྲ་ཕབ། འབྲི་དེབ་སོགས་ཅ་ལག་ལྗིད་ཏིག་གེ་བ་བཅུག་པའི་རྒྱབ་ཁུག་སེར་པོ་དེ་རྒྱུན་དུ་ཁུར་ནས་འགྲོ་དགོས།^p34
ཕྱི་ཟླ་༦པའི་ཚེས་༡༢ཉིན་ཏེ་ཞིང་སྒྲུབ་མཇུག་རྫོགས་པའི་ཕྱི་ཉིན། ངེད་ཅག་དཔོན་སློབ་རྣམས་ཆོས་སྒར་དང་ཞལ་གྱེས་ཏེ་ལམ་ལ་ཆས་ཤིང་ཕྱི་དྲོར་དར་རྩེ་མདོར་སླེབས། དེར་ཆོས་རྗེ་ཁོང་ཉིད་ཀྱི་གྲོགས་པོ་རྙིང་པ་སྤྱི་བདེ་ལས་ཁུངས་ཀྱི་མགོ་ཁྲིད་ཅིག་ཡོད་པ་ལ་ཐུག་ཕྲད་གནང་། མགོ་ཁྲིད་དེས། ད་ལྟ་ཕྱི་ནང་གི་གནས་བབས་ཛ་དྲག་ཆེ་ཞིང་རྙོག་དྲ་མང་བས། མྱུར་དུ་ཕྱི་ཕྱོགས་སུ་མ་སོང་ན་གནས་ཚུལ་ལ་འགྱུར་ལྡོག་འགྲོ་སྲིད། ཞིང་ཆེན་གྱི་འབྲེལ་ཡོད་ལས་ཁུངས་ལ་མ་གཏུགས་ཀྱང་ཆོག ཐད་ཀར་ཞིང་ཆེན་གཞན་བརྒྱུད་ནས་འགྲོ་བའམ་ཧོང་ཀོང་（香港）སོགས་ནས་ཕྱི་རྒྱལ་དུ་སོང་ན་བཟང་ས་རེད་ཅེས་དྲན་སྐུལ་བྱས་བྱུང་།^p35
ཕྱི་ཟླ་༦པའི་ཚེས་༡༣ཉིན། ངེད་ཅག་དར་མདོ་ནས་ཁྲེང་ཏུའུ་རུ་སླེབས། ཚེས་༡༤ཉིན་གྱི་ཞོགས་པའི་ཆུ་ཚོད་ལྔ་པའི་སྟེང་ནས་གནམ་གྲུར་ཞུགས་ཏེ་ཀོང་ཀྲོའུ་（广州）ལ་སླེབས། དེར་གོས་དམར་པོ་གྱོན་པའི་བུད་མེད་དགེ་བསྙེན་ཞིག་གིས། མགྲོན་ཁང་སོགས་མོ་རང་གིས་གྲ་སྒྲིག་བྱས་ཡོད་ཅེས་སྣེ་ལེན་བྱས་ཀྱང་། ངེད་ཅག་སུས་ཀྱང་ངོ་མི་ཤེས་པས་ཡིད་མ་ཆེས་པར་གྱུར་སྐབས། ཆོས་རྗེ་ཉིད་ཀྱིས། བལྟས་ཚོད་ལ་མོ་རང་ཆོས་པ་རྣམ་དག་ཅིག་ཡིན་པ་འདྲ། དེ་ལྟར་བྱས་ན་མི་འགྲིག་རྒྱུ་མི་འདུག་ཅེས་གསུངས་པས། ངེད་ཅག་ཀོང་ཀྲོའུ་ནས་ཞག་གཅིག་ལ་བསྡད་པ་ཡིན།^p36
བརྒལ་དཀའ་བའི་འགག་སྒོ།^p37
ཕྱི་ཟླ་༦པའི་ཚེས་༡༥ཉིན། ཧྲེན་ཀྲེན་（深圳）གྲོང་ཁྱེར་ནས་རྒྱལ་མཚམས་འགག་སྒོ་བརྒལ་ཏེ་ཧོང་ཀོང་ལ་འགྲོ་བའི་ལམ་དུ་ལམ་ཡིག་ལ་ལྟ་བཤེར་བྱས་པས། སྟབས་མ་ལེགས་པར་རྒྱལ་མཚམས་འགག་སྒོའི་ལྟ་བཤེར་པས་ཁྱེད་ཅག་གི་ལམ་ཡིག་ལ་གནད་དོན་འདུག་སྟེ། ཕྱི་ལོ་༡༩༩༠ལོར་རྒྱ་གར་ལ་འགྲོ་དུས་ལམ་ཡིག་སྟེང་དུ་ཐེལ་ཙེ་ཕོག་འདུག་ཀྱང་། ཕྱིར་ནང་དུ་ལོག་ཚེ་ཐེལ་ཙེ་བརྒྱབས་མི་འདུག་པས། དེ་ནི་ཁྲིམས་འགལ་རེད་ཅེས་ཟེར། མ་གཞིར། ལོ་དེར་བདག་ཅག་བལ་ཡུལ་ནས་ཕྱིར་བོད་དུ་ཡོང་སྐབས། གསེར་སྐུ་སོགས་སྐྱེལ་འདྲེན་སྟབས་བདེ་བའི་ཆེད་དུ། བལ་ཡུལ་ནས་གནས་སྐབས་ཀྱི་ལམ་ཡིག་བཟུང་ནས་ཡོང་བ་ཡིན་ལ། སྐབས་དེར་དེ་ལྟར་འགྲོ་བ་ནི་ཆེས་རྒྱུན་ལྡན་ཞིག་ཡིན་ཚུལ་གྱི་འགྲེལ་བཤད་སྣ་ཚོགས་ཁོ་ཚོར་དུས་ཡུན་རིང་པོར་བྱས་ཀྱང་། ཁོ་ཚོས་ཨུ་ཚུགས་མཐའ་སྐྱེལ་གྱིས་ངེས་པར་དུ་གོང་རིམ་ལ་ཡར་ཞུ་བྱ་དགོས་ཞེས་ངེད་ཅག་ཁང་པ་གཞན་ཞིག་གི་ནང་དུ་བཙུད་བྱུང་།^p38
སྐབས་དེར་འུ་ཅག་གིས་ཆོས་རྗེ་ཉིད་ལ། འགལ་རྐྱེན་འདི་སེལ་བའི་ཆེད་དུ་ཁྱེད་ཀྱིས་ཐུགས་བསྐྱེད་དང་འཕྲིན་བཅོལ་ཅི་ཡོད་དགོས་ས་རེད་མ་གཏོགས་ཅུང་དཀའ་བར་འདུག་ཅེས་ཞུས་ཚེ། ཁོང་གིས་འོ་ཡ་ཞེས་གསུངས་ནས། མཉམ་བཞག་ལྟ་བུའི་ངང་དུ་ཨོ་རྒྱན་ཆེན་པོ་ལ་གསོལ་འདེབས་དང་། གེ་སར་རྒྱལ་པོ་དང་གནོད་སྦྱིན་ཙིའུ་དམར་ལ་འཕྲིན་བཅོལ་མཛད་པ་སོགས་དར་ཅིག་ལ་བཟླས་བརྗོད་ཤུབ་བུར་མཛད། སྐར་མ་ཁ་ཤས་འགོར་རྗེས། ལྟ་བཤེར་མཁན་ནང་དུ་ཡོང་ནས། ཁྱེད་ཅག་ལ་གནས་ཚུལ་རྙོག་དྲ་ཅན་འདུག་ཀྱང་། ད་ལན་འགྲོ་ཆོག་པར་བྱ་ཞེས་མངགས་བྱུང་བས། བདག་གི་སེམས་ལ། ཛ་དྲག་གི་བར་ཆད་དེ་གློ་བུར་དུ་ངོ་མཚར་བའི་སྒོ་ནས་སེལ་ཐུབ་པ་བྱུང་བ་ནི། ལྷ་བླ་མ་དང་ཆོས་སྐྱོང་སྲུང་མའི་བྱིན་རླབས་དང་ནུས་མཐུ་བློ་ཡུལ་ལས་འདས་པ་ཞིག་རེད་སྙམ་པའི་ངེས་ཤེས་དང་ཚོར་སྣང་ཟབ་མོ་སྐྱེས།^p39
ངེད་ཅག་ཧྲེན་ཀྲེན་ནས་རླངས་འཁོར་ལ་བསྡད་དེ་ཧོང་ཀོང་ལ་ཐོན་རྗེས། གནས་དེའི་དཔལ་ཡུལ་ཆོས་ཚོགས་སུ་ཞག་གཅིག་ལ་བཞུགས། ཕྱི་ཉིན་སྔ་མོར། ཆོས་རྗེ་ཉིད་ཀྱིས་ཉིན་སྔ་མའི་འགག་སྒོ་བརྒལ་སྐབས་ཀྱི་གསོལ་འདེབས་དེ་ཡི་གེར་བཀོད་པ་འདི་ལྟ་སྟེ།^p40
༄༅། །ཧྲེན་ཀྲེན་དང་ཧོང་ཀོང་གི་ས་མཚམས་སུ་ལམ་ཡིག་ལ་ཞིབ་དཔྱད་བགྱིད་སྐབས། སེམས་ལ་ཡ་ང་བར་གྱུར་ཚེ་ཨོ་རྒྱན་པདྨ་ཐོད་ཕྲེང་རྩལ་དང་སེང་ཆེན་ནོར་བུ་དགྲ་འདུལ། གནོད་སྦྱིན་ཙིའུ་དམར་པོ་བཅས་ཀྱི་ཞལ་ཉམས་སྣང་དུ་མཇལ་སྐབས་བདག་གིས་གསོལ་བ་འདི་ལྟར་བཏབ་བོ། །^p41
མུ་མེད་ཞིང་གི་སྲས་བཅས་རྒྱལ་ཀུན་གྱི། །^p42
གསང་གསུམ་ཡོན་ཏན་གཅིག་ཏུ་འདུས་པའི་སྐུ། །^p43
པདྨ་ཐོད་ཕྲེང་རྩལ་ལ་གསོལ་བ་འདེབས། །^p44
བསམ་པ་ལྷུན་གྱིས་འགྲུབ་པར་བྱིན་གྱིས་རློབས། །^p45
མཁྱེན་བརྩེ་ནུས་པའི་ཡོན་ཏན་མཐའ་རུ་ཕྱིན། །^p46
གངས་ལྗོངས་འགྲོ་བ་ཡོངས་ལ་བུ་བཞིན་བརྩེ། །^p47
དོན་གྲུབ་ཝེར་མ་དཀར་པོ་ད་དགོངས་ཤིག །^p48
མཐུན་རྐྱེན་ཡིད་བཞིན་འགྲུབ་པར་བྱིན་གྱིས་རློབས། །^p49
བོས་ན་ཐུགས་རྗེ་ནམ་མཁའི་གློག་ལས་མྱུར། །^p50
རྦད་ན་ནུས་སྟོབས་གནམ་ལྕགས་ཐོག་ལས་ངར། །^p51
གནོད་སྦྱིན་དགྲ་བླའི་རྒྱལ་པོ་ཙིའུ་དམར། །^p52
འགལ་རྐྱེན་བར་ཆད་འཕྲལ་དུ་ཞི་བར་མཛོད། །^p53
ཅེས་པས་གསོལ་བ་བཏབ་པའི་ཚེ། །^p54
འཇིགས་སྐྲག་འཁྲུལ་སྣང་དབྱིངས་སུ་ཞི། །^p55
བདག་དང་ལྷ་ཡི་འཛིན་པ་ཀུན། །^p56
མི་དམིགས་ཆོས་སྐུའི་དབྱིངས་སུ་ཡལ། །^p57
ཞེས་པ་འདི་ནི་ཉིན་དེའི་ཕྱིར་ནངས་ཧོང་ཀོང་གྲོང་ཁྱེར་གྱི་གྲུབ་དབང་པདྨ་ནོར་བུའི་གཟིམ་ཆུང་དུ་ཡི་གེར་སྤེལ་བ་དགེ ཞེས་པའོ། །^p58
ཧོང་ཀོང་དུ་སྡོད་པའི་སྐབས་སུ། མཁན་པོ་རྣམ་གྲོལ་གྱིས་བདག་ལ་ནང་ལྭ་སེར་པོ་ཞིག་དང་སྟོད་འགག་ཅིག་གནང་ནས། ཁོང་གིས་རྒྱ་གར་ནས་ཁྱེར་ཡོང་བའི་རས་རྒྱུ་ཡག་ཤོས་ཤིག་ཡིན་ཞེས་གསུངས། གོས་འདི་གཉིས་ནི་བདག་ཕྱི་རྒྱལ་དུ་འགྲོ་བའི་རིང་ལ་ཆོས་རྗེ་ཉིད་ཀྱིས་དབང་ཁྲིད་ཟབ་ཆོས་སྟོན་པའི་སྐབས་ཀུན་ཏུ་གྱོན་པ་ཡིན་པས། བརྩེ་འདང་དམིགས་བསལ་བ་ཞིག་ཆགས་སོང་། ད་བར་ལོ་༣༠སོང་ཡང་སྔར་བཞིན་རྒྱུ་སྤུས་བཟང་ཞིང་ཚོན་མདོག་ལའང་འགྱུར་བ་ཆེར་སོང་མི་འདུག་ལ། བདག་ཕྱི་ལོགས་རྣམས་སུ་འགྲོ་སྐབས་རྒྱུན་དུ་གྱོན་བཞིན་ཡོད། དེ་ནི་འཛིན་པ་ཞིག་ཡིན་སྲིད་ལ་དད་པ་ཞིག་ཀྱང་ཡིན་སྲིད་དོ། །^p59
ཞི་བདེ་རྒྱ་མཚོའི་སྟེང་གི་འཕུར་སྐྱོད།^p60
ཆོས་རྗེ་ཉིད་ཕྱི་རྒྱལ་ལ་བྱོན་པའི་ལོ་རབས་དེར། རྒྱལ་ཁབ་སོ་སོའི་བར་དུ་སྒོ་ཕྱེས་པ་དེང་སང་ལྟར་དེ་ཙམ་གུ་ཡངས་པོ་ཞིག་མིན་པས། ངེད་ཅག་རྣམས་ནི་བོད་ཡུལ་ནས་ཐད་ཀར་ཨ་རི་ལ་འགྲོ་མཁན་གྱི་བོད་རིགས་ཐོག་མ་ལྟ་བུ་ཡིན་ཡང་སྲིད།^p61
སྐབས་དེར། ཨ་རིའི་དབྱར་དུས་སུ་ཁེལ་ཡོད་པས། ང་ཚོས་ཆོས་རྗེ་ཉིད་ལ་མནབས་ཆས་སྲབ་བུ་ཆ་གཉིས་དང་ནང་གོས་འགའ་རེ་གྲ་སྒྲིག་བྱས། ད་དུང་ཅ་ལག་འཇུག་སའི་སྒམ་སྤུས་ལེགས་འགའ་ཞིག་ཀྱང་ཉོས་པ་ཡིན། ཐེངས་སྔོན་མ་རྒྱ་གར་ལ་འགྲོ་བ་དང་བསྡུར་ན། ད་ལན་ཟས་རིགས་སྐོར་གྱི་ཅ་ལག་ཅུང་ཟད་ཉུང་དུ་བཏང་ནས་སྟབས་བདེར་བྱས་ཡོད།^p62
ཕྱི་ཟླ་༦པའི་ཚེས་༡༦ཉིན། ངེད་ཅག་ཧོང་ཀོང་ནས་གནམ་གྲུར་བསྡད་དེ་ཆུ་ཚོད་བཞི་ལ་འཕུར་རྗེས་འཇར་པན་（Japan）ནམ་ཉི་ཧོང་གི་རྒྱལ་ས་ཐོ་ཁེ་ཡོའམ་（Tokyo）ཏུང་ཅིང་གི་རྒྱལ་སྤྱིའི་གནམ་ཐང་དུ་བབས། ཉི་ཧོང་གི་གནམ་ཐང་ནི་ཆུ་ཤེལ་ལས་གྲུབ་པའི་འཇིག་རྟེན་དང་འདྲ་བར། གཙང་ཞིང་དྭངས་ལ་རྒྱ་ཆེ་ཞིང་འོད་དུ་འཚེར་བ། ཕྱོགས་ཐམས་ཅད་རྡུལ་གྱི་དྲི་མས་མ་གོས་པ་ཞིག་རེད། རྐང་ཐང་ལ་འགྲོ་སྐབས་རང་ཉིད་ཀྱི་ལྡོག་བརྙན་ཡང་པང་གཅལ་ངོས་སུ་གསལ་བར་འཆར་བ་སོགས་བཀོད་པ་ཤིན་ཏུ་ལེགས་པས། ངས་མི་ཚེ་འདིར་འཕེལ་རྒྱས་སུ་སོང་ཟིན་པའི་རྒྱལ་ཁབ་ཀྱི་རྣམ་པ་དེ་ཐེངས་དང་པོར་མཐོང་བས། འཇིག་རྟེན་གཞན་ཞིག་ཏུ་སླེབས་པ་ལྟ་བུའི་སྣང་བ་སྐྱེས།^p63
ཆོས་རྗེ་ཉིད་ཉི་ཧོང་ནས་དུས་ཡུན་རིང་པོར་མ་བཞུགས་ཀྱང་། དེའི་ཡུན་ལ་ཤར་བརྒྱུད་པའི་སྔགས་པ་དང་བོད་བརྒྱུད་ཀྱི་སྐལ་བ་ལྡན་པ་འགའ་ལ། སྙིང་རྗེ་དང་ཤེས་རབ་ལས་བརྩམས་པའི་ཞལ་གདམས་གནང་ཞིང་། ནང་ཆོས་དང་ཚན་རིག་སྐོར་ནས་བགྲོ་གླེང་ཡང་མཛད། ཆོས་རྗེ་ཉིད་ཀྱིས། ཚན་རིག་དང་ནང་ཆོས་གཉིས་ནི་འགྲོ་བ་མིའི་རིགས་ལ་མེད་དུ་མི་རུང་བ་ཡིན་ཏེ། ཚན་རིག་གིས་མི་རྣམས་ཀྱི་ཕྱི་དངོས་པོའི་དགོས་འདོད་བསྐངས་ཤིང་། ནང་ཆོས་ཀྱིས་ནང་སེམས་ཀྱི་བདེ་བ་སྟེར་བར་བྱེད་པས། ནང་ཆོས་མེད་པར་དངོས་པོའི་ལོངས་སྤྱོད་ཁོ་ནར་བསྙེགས་ན། འབྲས་བུ་དང་རེ་འདུན་གཉིས་གོ་ལྡོག་ཏུ་འགྱུར་ངེས་ཡིན། དེས་ན། ཡ་གླིང་སོགས་ཀྱི་རྒྱལ་ཁབ་མང་པོའི་མཐོ་བ་རྩེ་མོར་སོན་པའི་ཕྱུག་པོ་དང་དམའ་སྤྱི་དམངས་ཕལ་བ་ཡན་ཆད་ལ་དམ་པའི་ཆོས་ཀྱི་བདུད་རྩི་འདི་ཆེས་མཁོ་གལ་ཆེ་བ་ཡིན་ཞེས་པ་སོགས་གསུངས་པས། དེར་འདུས་རྣམས་ལ་སེམས་འགུལ་གཏིང་ནས་ཐེབས་ཤིང་། དགའ་བ་དང་གུས་པའི་རྣམ་པ་མང་དུ་མངོན།^p64
དེ་ནས། རྗེ་ཉིད་གྲུ་ཤག་དཀྱུས་མར་（经济舱）བཞུགས་ཏེ་ཨ་རིའི་（America）ཧཱ་ཝ་ཡེའི་（Hawaii）ཕྱོགས་སུ་སོང། ཨ་རིའི་གནམ་གྲུར་རིན་མེད་བཟའ་བཏུང་མེད་ཅིང་། མཁའ་ལམ་ཞབས་ཞུ་པ་རྣམས་ཀྱང་ལོ་ན་མཐོན་པོ་ཤ་སྟག་རེད། གནམ་གྲུ་མུ་མཐའ་མེད་པའི་ཞི་བདེ་རྒྱ་མཚོའི་མཁའ་དབྱིངས་ནས་ཡུན་རིང་པོར་འཕུར་ཞིང་། ནམ་མཁའ་དང་རྒྱ་མཚོ་ཆེན་པོའི་གཡུ་མདངས་གཅིག་ཏུ་འདྲེས་ཤིང་བཻཌཱུརྱའི་ཞུན་མ་ལྟར་མཛེས་སྡུག་ལྡན་པས་ཡིད་སེམས་ཀྱི་བརྟན་པ་དབང་མེད་དུ་འཕྲོག་པར་བྱས། དེ་ལྟ་ནའང་། རྒྱ་མཚོའི་སྟེང་ནས་ཡུན་རིང་དུ་འཕུར་བས། མཚམས་ལན་རེར་སེམས་སུ་ཁེར་རྐྱང་དང་སྐྱོ་ལྷང་ངེ་བའི་སྣང་བ་ཞིག་ཀྱང་དབང་མེད་དུ་སྐྱེས།^p66
རྗེ་ཉིད་ཀྱིས་སྨན་གསོལ་དུས་ཆུ་ཚན་དགོས་པས། བདག་གིས་ཀྱང་སྔ་ས་ནས་དབྱིན་སྐད་ཅུང་ཟད་རེ་རང་སྦྱོང་བྱས་པ་ཡིན་ལ། “hot water”ཞེས་ཐོག་མར་བེད་སྤྱོད་བྱས་པའང་ཡིན། རྗེ་ཉིད་ཀྱིས་སྐབས་འགར་ཅིའང་མི་གསུང་བར་ཕྱག་ཕྲེང་དམར་པོ་དེ་འདྲེན་བཞིན་སྒེའུ་ཁུང་ལས་ཕྱི་རོལ་ཏུ་ཡུན་རིང་ལ་གཟིགས་ཤིང་། སྐབས་འགར་གླེང་མོལ་ཉུང་ཙམ་རེ་གནང་ལ། སྐབས་འགར་དགོངས་པ་ཉམས་ལེན་གྱི་ངང་དུ་བཞུགས་པ་ལྟ་བུ་མཛད་པ་སོགས་ད་ལྟའང་དྲན་གྱིན་ཡོད། དུས་ཚོད་བདུན་ལ་འཕུར་བའི་རྗེས་སུ། ཨ་མེ་རུ་ཁའི་ཧཱ་ཝ་ཡེའི་ཙན་དན་རི་བོའི་རྒྱལ་སྤྱིའི་གནམ་ཐང་དུ་སླེབས།^p67
