འབབ་ཚུགས་བཅུ་པ། སླར་ལོག་པ་།^p1
འབབ་ཚུགས་བཅུ་པ། སླར་ལོག་པ་།^p2
༼ ༨·༣༡~༩·༢༤ ༽^p3
མཛད་རིམ།^p4
ཕྱི་ཟླ་༨པའི་ཚེས་༣༡ཉིན། ལས་རབ་གླིང་དང་ཞལ་གྱེས།^p5
ཕྱི་ཟླ་༩པའི་ཚེས་༡ཉིན། ཕེ་རིས་ནས་གནམ་གྲུ་བརྗེ་འདུག་མཛད།^p6
ཕྱི་ཟླ་༩པའི་ཚེས་༢ཉིན། ཧོང་ཀོང་ལ་འབྱོར།^p7
ཕྱི་ཟླ་༩པའི་ཚེས་༣ཉིན། འཇམ་དཔལ་ཞི་སྒྲུབ་ཀྱི་དབང་གནང་།^p8
ཕྱི་ཟླ་༩པའི་ཚེས་༤ཉིན། རྟེན་འབྲེལ་ཉེས་སེལ་གྱི་དབང་གནང་།^p9
ཕྱི་ཟླ་༩པའི་ཚེས་༥ཉིན། ཕུར་པ་མགུལ་ཁུག་མའི་དབང་དང་ཞལ་གདམས་གནང་།^p10
ཕྱི་ཟླ་༩པའི་ཚེས་༦ཉིན། ཐའེ་ཝན་དུ་འབྱོར།^p11
ཕྱི་ཟླ་༩པའི་ཚེས་༧ཉིན། ཨོ་རྒྱན་རིན་པོ་ཆེའི་དབང་དང་སྐྱབས་འགྲོའི་བསླབ་བྱ་གནང་།^p12
ཕྱི་ཟླ་༩པའི་ཚེས་༨ཉིན། ཕུར་པ་ཡང་ཟབ་སྙིང་པོའི་དབང་དང་ཞལ་གདམས་གནང་།^p13
ཕྱི་ཟླ་༩པའི་ཚེས་༩ཉིན། འཇམ་དཔལ་ཡེ་ཤེས་སེམས་དཔའི་དབང་དང་ཞལ་གདམས་གནང་།^p14
ཕྱི་ཟླ་༩པའི་ཚེས་༡༠ཉིན། འཕོ་བ་དང་བདེ་བ་ཅན་དུ་སྐྱེ་བའི་སྐོར་གྱི་ཆོས་ཁྲིད་གསུངས།^p15
ཕྱི་ཟླ་༩པའི་ཚེས་༡༡ཉིན། འཇམ་དཔལ་རྫོགས་པ་ཆེན་པོ་དང་ཕུར་པ་མགུལ་ཁུག་མའི་དབང་གནང་།^p16
ཕྱི་ཟླ་༩པའི་ཚེས་༡༢ཉིན། གུ་རུ་རྡོ་རྗེ་གྲོ་ལོད་ཀྱི་དབང་དང་རྫོགས་ཆེན་སྐོར་གསུངས།^p17
ཕྱི་ཟླ་༩པའི་ཚེས་༡༣ཉིན། ཧོང་ཀོང་ལ་ལོག^p18
ཕྱི་ཟླ་༩པའི་ཚེས་༡༤ཉིན། ཧྲེན་ཀྲེན་བརྒྱུད་ནས་ཁྲེང་ཏུའུ་ལ་འབྱོར།^p19
ཕྱི་ཟླ་༩པའི་ཚེས་༡༥ཉིན། སྔ་དྲོར་ཆིང་ཏིང་བླ་མར་ཚེ་དབང་གསུངས་ཤིང་ཕྱི་དྲོར་སྨན་ཁང་ནས་སྡོད་བཅོས་བྱས།^p20
ཕྱི་ཟླ་༩པའི་ཚེས་༡༦ནས་ཚེས་༡༧བར། སྐུ་ལུས་ལ་བརྟག་བཤེར་མཛད།^p21
ཕྱི་ཟླ་༩པའི་ཚེས་༡༨ཉིན། བཅོས་ཐོན་བྱུང་།^p22
ཕྱི་ཟླ་༩པའི་ཚེས་༡༩་ནས་ཚེས་༢༠བར། ཁྲ་ཏེན་ཙིར་དད་ལྡན་རྣམས་ལ་ཆོས་ཁྲིད་དང་དབང་བསྐུར།^p23
ཕྱི་ཟླ་༩པའི་ཚེས་༢༡ནས་ཚེས་༢༢བར། དར་མདོར་འབྱོར་རྗེས་འབྲེལ་ཡོད་ལས་ཁུངས་ལ་ཕྱི་བསྐྱོད་སྙན་ཞུ་ཕུལ།^p24
ཕྱི་ཟླ་༩པའི་ཚེས་༢༣ནས་ཚེས་༢༤བར། དར་མདོ་ནས་ཐོན་ཏེ་བླ་རུང་དུ་འབྱོར།^p25
ཧོང་ཀོང་བརྒྱུད་ནས་ཡོང་།^p26
ཕྱི་ཟླ་༨པའི་ཚེས་༣༡ཉིན། ཆོས་རྗེ་ཉིད་ལས་རབ་གླིང་དང་ཞལ་གྱེས་ཏེ་རླངས་འཁོར་དུ་བཞུགས་ནས་མོན་ཐི་ཕཱེལ་ལེར་（Montpellier）གནམ་ཐང་དུ་འབྱོར། དེ་ནས་སླར་ཡང་གནམ་གྲུར་ཞུགས་ཏེ་དུས་ཚོད་གཅིག་ཕྱེད་ཙམ་འཕུར་རྗེས་ཕེ་རིས་གྲོང་ཁྱེར་དུ་སླེབས་ཤིང་དགོང་མོ་དེར་ཞག་སྡོད་བྱས། ཕྱི་ཉིན་ཕྱི་དྲོར། ཕེ་རིས་ནས་གནམ་གྲུ་བརྗེས་ཏེ་ཆུ་ཚོད་བཅུ་ལྷག་ལ་འཕུར་བའི་རྗེས་སུ་སྟེ། ཕྱི་ཟླ་༩པའི་ཚེས་༢ཉིན་ཧོང་ཀོང་ལ་འབྱོར་ཞིང་། ཧོང་ཀོང་དཔལ་ཡུལ་ཆོས་ཚོགས་སུ་བསྡད་པ་ཡིན།^p27
ཧོང་ཀོང་དཔལ་ཡུལ་ཆོས་ཚོགས་ནི་སྐྱབས་རྗེ་པད་ནོར་རིན་པོ་ཆེས་འཛམ་གླིང་གི་ས་ཆ་སོ་སོར་ཆོས་ཚོགས་མང་དུ་བཙུགས་ཡོད་པའི་གྲས་ཀྱི་གཅིག་ཡིན་ལ། ཆོས་ཚོགས་འདི་ཕྱི་ལོ་༡༩༩༠ལོའི་ལོ་སྟོད་དུ་ཚུགས། ལོ་དེའི་ལོ་མཇུག་ཏུ་ངེད་ཅག་བལ་བོ་ནས་ཕྱིར་ཡོང་བའི་ལམ་བར་དུ་ཧོང་ཀོང་བརྒྱུད་སྐབས་ཀྱང་། གནས་འདི་ནས་ཞག་གཉིས་གསུམ་ལ་བསྡད་པ་ཡིན། ཆོས་ཚོགས་འདི་ནི་སྐྱབས་རྗེ་པད་ནོར་རིན་པོ་ཆེ་མཆོག་གི་རྒྱ་གར་རྣམ་གྲོལ་གླིང་དུ་གཏོགས་ཤིང་། རྣམ་གྲོལ་གླིང་ནས་བླ་མ་མངགས་ཏེ་བདག་གཉེར་བྱེད་པ་དང་ཆོས་ཁྲིད་གསུང་སའི་ས་ཚུགས་གཙོ་བོ་ཞིག་ཡིན།^p29
ད་ལན་ཆོས་རྗེ་ཉིད་མེ་གླིང་དང་ཡོ་རོབ་ཀྱི་རྒྱལ་ཁབ་སོ་སོར་བཀའ་ཆོས་གནང་བར་ཕེབས་ཏེ་གནས་འདིར་ཐོན་པ་ན། སྐུ་ངལ་ཆེན་པོ་མྱངས་ཡོད་ཀྱང་ངལ་གསོ་མ་མཛད་པར་ཧོང་ཀོང་དུ་ཉིན་གསུམ་རིང་ཆོས་ཀྱི་མཛད་སྒོ་སྤེལ། སྐབས་དེར་བདག་གིས་རྒྱ་སྐད་ཀྱི་ལོ་ཙཱ་བྱས་ཤིང་གཞན་ཞིག་གིས་སླར་ཡང་ཡུའེ་སྐད་（粤语）དུ་བསྒྱུར།^p30
ཕྱི་ཟླ་༩པའི་ཚེས་༣ནས་༤བར། དཔལ་ཡུལ་ཆོས་ཚོགས་ཀྱི་སློབ་མ་ནང་མ་རྣམས་ལ་བཀའ་དབང་གཉིས་དང་ཆོས་ཁྲིད་གསུངས་ཤིང་། ཉིན་དང་པོར་འཇམ་དཔལ་རྫོགས་པ་ཆེན་པོའི་དབང་དང་ཉིན་གཉིས་པར་རྟེན་འབྲེལ་ཉེས་སེལ་གྱི་དབང་གནང་།^p31
ཕྱི་ཟླ་༩པའི་ཚེས་༥ཉིན། ཆོས་རྗེ་ཉིད་ཀྱིས་མི་སྟོང་ཕྲག་ལྷག་ཤོང་བའི་ཚོགས་ཁང་ཆེན་མོར་རྡོ་རྗེ་ཕུར་པའི་ཆོས་ཚོགས་འཚོགས་ནས། ཕུར་པ་མགུལ་ཁུག་མའི་བཀའ་དབང་ཟབ་མོ་དང་། སྐྱབས་འགྲོའི་སྡོམ་པ། བྱམས་སྙིང་རྗེ། བྱང་ཆུབ་ཀྱི་སེམས་ཀྱི་སྐོར་ནས་བསླབ་བྱ་གནང་། ཆོས་ཞུ་མཁན་རྣམས་ཀྱིས་ཆོས་རྗེ་ཉིད་ལ་དད་པ་རྩེ་གཅིག་ཏུ་བཞག་ནས་ཉན་གྱིན་འདུག་ལ། ཆོས་ཁྲིད་ཀྱི་བར་སྐབས་སུ། གཙོ་སྒྲུབ་ཕྱོགས་ཀྱིས་གཟེངས་རྟགས་རྒྱན་ལེན་གྱི་བྱེད་སྒོ་སྤེལ་བས། ཡུལ་ངོས་ཀྱི་རྣམ་པ་ནི་ཤིན་ཏུ་སྤྲོ་སྐྱིད་དང་ལྡན་པ་ཞིག་ཏུ་གྱུར།^p33
ཐེངས་འདིར་ཆོས་རྗེ་ཉིད་ནུབ་ཕྱོགས་སུ་བསྐྱོད་ནས་ཟླ་བ་གསུམ་སོང་བའི་རིང་ལ། ཤར་ཕྱོགས་དང་ནུབ་ཕྱོགས་ཀྱི་མིའི་གཤིས་ཀ་ལ་ཁྱད་པར་ཆེན་པོ་འདུག་པར་མཐོང་བ་སྟེ། ཁོ་ཚོའི་སེམས་འགུལ་ཆེན་པོ་ཐེབས་ནས་སྡུག་གི་མཆི་མ་འདོན་ས་དང་སྐྱིད་ཀྱི་དགོད་སྒྲ་འབྱིན་ས་གཉིས་ཡེ་ནས་མི་འདྲ་བར་འདུག སྐབས་དེར་ཧོང་ཀོང་ཡང་དབྱིན་ཇིའི་མངའ་ཞབས་སུ་ཡོད་པ་ལས་རྒྱ་ནག་ལ་སྤྲད་མེད་ཀྱང་། ཧོང་ཀོང་གི་མི་རྣམས་ཀྱི་གཤིས་ཀ་ནི་ཕལ་ཆེར་ཤར་ཕྱོགས་དང་འདྲ་བར། ཚོར་ཤེས་རྣོ་བ་དང་སྤྲོ་སེམས་ཆེ་བ། སྣང་བ་སྐྱིད་པོ་ཡིན་པས། ཁོ་ཚོའི་སེམས་སུ་ཅི་ཡོད་ཐམས་ཅད་འཛེམ་པ་མེད་པར་ངག་གི་སྐད་ཆ་དང་ལུས་ཀྱི་རྣམ་འགྱུར་ལས་ཐོན་ཡོང་ཞིང་། སྤྲོ་སེམས་འཁོལ་བའི་རྣམ་པ་འདི་ཡང་། ཆོས་རྗེ་ཉིད་ཀྱིས་ཆོས་གསུང་བར་ཆེས་ལྷོད་པོ་དང་གུ་ཡངས་ཀྱི་མཐུན་རྐྱེན་དུ་སོང་སྟབས། ཁོང་གིས་དེར་འཁོད་རྣམས་ལ་ཕན་པ་ཆེ་བའི་ཞལ་གདམས་མང་དུ་གནང་སོང་།^p34
ཐའེ་ཝན་དུ་ཕྱིན་པ།^p36
ཕྱི་ཟླ་༩པའི་ཚེས་༦ཉིན། ཆོས་རྗེ་ཉིད་ཧོང་ཀོང་ནས་གནམ་གྲུར་བཞུགས་ཏེ་ཆུ་ཚོད་གཅིག་ལྷག་ལ་འཕུར་རྗེས་ཐའེ་ཝན་（台湾）གྱི་ཐའོ་ཡོན་（桃园）གནམ་གྲུ་ཐང་དུ་འབྱོར་ཅིང་། དེར་རྒྱ་བརྒྱུད་དང་བོད་བརྒྱུད་ཀྱི་རབ་བྱུང་པ་དང་ཆོས་པ་མང་པོས། དར་དཀར་དང་མེ་ཏོག་བསྣམས་ནས་ཕེབས་བསུ་རྒྱ་ཆེན་ཞུས།^p37
གནམ་གྲུ་ཐང་ནས་ཐོན་ཏེ་ཐད་ཀར་ཐའེ་པེ་（台北）གྲོང་ཁྱེར་གྱི་དཔལ་ཡུལ་ཆོས་ཚོགས་སུ་བྱོན། ཆོས་ཚོགས་དེ་ནི་སྐྱབས་རྗེ་པད་ནོར་རིན་པོ་ཆེས་ཐའེ་ཝན་དུ་དཔལ་ཡུལ་བྱང་ཆུབ་དར་རྒྱས་གླིང་ཞེས་ཆོས་ཚོགས་བདུན་བཙུགས་པའི་ནང་ཚན་ཞིག་ཡིན་ལ། ཆོས་རྗེ་ཉིད་ཀྱིས་ཐའེ་ཝན་ནས་ཉིན་དྲུག་གི་རིང་ཆོས་ཀྱི་མཛད་སྒོ་སྤེལ་བའི་སྐབས་ཐམས་ཅད་དུ་གནས་འདི་ནས་བཞུགས་པ་དང་། བདག་གིས་ཉིན་རེ་བཞིན་དུ་རྗེ་ཉིད་ཀྱིས་གསུངས་རྣམས་རྒྱ་སྐད་དུ་བསྒྱུར་བ་ཡིན།^p39
ཕྱི་ཟླ་༩པའི་ཚེས་༧ཉིན་གྱི་ཕྱི་དྲོར། ཆོས་རྗེ་ཉིད་ཀྱིས་དཔལ་ཡུལ་ཆོས་ཚོགས་སུ་ཨོ་རྒྱན་རིན་པོ་ཆེའི་དབང་དང་སྐྱབས་འགྲོའི་སྐོར་གྱི་བསླབ་བྱ་གནང་ཞིང་། བླ་མ་མུ་མཚོས་སྤྱན་རས་གཟིགས་ཀྱི་དབང་གསུངས།^p41
ཕྱི་ཟླ་༩པའི་ཚེས་༨ཉིན་གྱི་སྔ་དྲོར། དཔལ་ཡུལ་ཆོས་ཚོགས་སུ་ཕུར་པ་ཡང་ཟབ་སྙིང་པོའི་དབང་དང་བྱང་ཆུབ་སེམས་ཀྱི་སྐོར་ནས་གདམས་ངག་གནང་།^p44
ཕྱི་ཟླ་༩པའི་ཚེས་༩ཉིན། རྗེ་ཉིད་དུས་ཚོད་གསུམ་རིང་རླངས་འཁོར་དུ་བཞུགས་ཏེ་ཐའེ་ཀྲུང་（台中）དུ་བྱོན་ཅིང་། དགེ་བསྙེན་ཐེན་པི་ཧྲོང་（田璧双）གིས་ཕྱི་ལོ་༡༩༨༥ལོར་བཙུགས་པའི་གསང་སྙིང་གླིང་ཞེས་པ་རུ་འཇམ་དཔལ་ཡེ་ཤེས་སེམས་དཔའི་དབང་དང་བྱིན་རླབས་གནང་བར་མ་ཟད། གསང་སྔགས་ཀྱི་ཆོས་ཉམས་སུ་ལེན་པའི་གལ་ཆེན་རང་བཞིན་གསུངས་ཤིང་དགོང་མོར་སླར་ཡང་ཐའེ་པེ་ལ་ལོག^p47
ཕྱི་ཟླ་༩པའི་ཚེས་༡༠ཉིན་གྱི་སྔ་དྲོར། དཔལ་ཡུལ་ཆོས་ཚོགས་སུ་འཕོ་བ་དང་བདེ་སྨོན་སྐོར་གྱི་ཆོས་ཁྲིད་གསུངས།^p49
ཕྱི་ཟླ་༩པའི་ཚེས་༡༡ཉིན་གྱི་ཕྱི་དྲོར་། ཐའེ་ཐིའེ་ཐོག་ཁང་ཆེན་མོའི་སྒྱུ་རྩལ་འཁྲབ་སྟོན་ཁང་ཚོམས་（台铁大楼演艺厅）སུ་འཇམ་དཔལ་རྫོགས་པ་ཆེན་པོ་དང་ཕུར་པ་མགུལ་ཁུག་མའི་དབང་གནང་།^p50
ཕྱི་ཟླ་༩པའི་ཚེས་༡༢ཉིན་གྱི་སྔ་དྲོར། སླར་ཡང་དཔལ་ཡུལ་ཆོས་ཚོགས་སུ་གུ་རུ་རྡོ་རྗེ་གྲོ་ལོད་ཀྱི་དབང་དང་། རྫོགས་པ་ཆེན་པོའི་ལོ་རྒྱུས་དང་ཕན་ཡོན་གྱི་སྐོར་གསུངས། ཕྱི་དྲོར་དེར་འཁོད་རྣམས་དང་མཉམ་དུ་ཚོགས་ཀྱི་དགའ་སྟོན་ལ་རོལ་ཅིང་། བཀོད་སྒྲིག་ཚན་ཆུང་གི་མི་སྣ་རྣམས་ལ་དམིགས་བསལ་གྱི་མཇལ་ཁ་གནང་།^p53
ཕྱི་ཟླ་༩པའི་ཚེས་༡༣ཉིན། ཧོང་ཀོང་ལ་ཕྱིར་ལོག^p54
སྐྲ་ལོ་འཇའ་ཚོན་མ།^p56
ཉེ་ཆར་ང་ཚོས་ལྕམ་ཏིང་ནའེ་ཀྲུའུ་（丁乃竺）ལ་བཅར་འདྲི་བྱས་པ་ཡིན། མོ་རང་ནི་ཆོས་རྗེ་ཉིད་ཐའེ་ཝན་ལ་འབྱོན་སྐབས་ཀྱི་ལས་རིམ་བཀོད་སྒྲིག་མི་སྣ་ཞིག་ཡིན་ལ། ཐའེ་ཝན་བོད་བརྒྱུད་ནང་བསྟན་གྱི་ཆེས་སྔོན་གྲས་ཀྱི་སློབ་མ་ཞིག་ཀྱང་ཡིན། དུས་རབས་གོང་མའི་ལོ་རབས་བརྒྱད་ཅུའི་ནང་དུ། ཁོ་ཚོས་བོད་བརྒྱུད་ནང་བསྟན་གྱི་སྐྱེས་ཆེན་དམ་པ་མང་པོ་ཐའེ་ཝན་ལ་བཀའ་ཆོས་གནང་བར་གདན་ཞུ་བྱས་མྱོང་ཞིང་། མོ་རང་གིས་ཆོས་རྗེ་ཉིད་གླེང་བའི་སྐབས་སུ་ཕྱིར་དྲན་བྱས་པ་འདི་ལྟར།^p57
ང་རང་གིས་ཐའེ་ཝན་སློབ་ཆེན་གྱི་མཚན་ཉིད་རིག་པའི་སྡེ་ཁག་ཏུ་སློབ་སྦྱོང་བྱེད་བཞིན་པའི་སྐབས་སུ་བོད་བརྒྱུད་ནང་བསྟན་གྱི་ཆོས་དང་འཕྲད་པ་ཡིན། གྲོགས་པོ་ཞིག་གིས་ངོ་སྤྲོད་བྱས་པ་བརྒྱུད། རི་རྩེ་ལྔ་པའི་ལྷོ་ཕྱོགས་ཀྱི་རིན་ཆེན་འབྱུང་ལྡན་ཞིང་གི་ཆོས་ཚོགས་ལ་ཞུགས་ཤིང་། དེ་ནི་ཐའེ་ཝན་གྱི་ཆེས་སྔ་ཤོས་ཀྱི་བོད་བརྒྱུད་ནང་བསྟན་གྱི་ཆོས་ཚོགས་ཤིག་རེད། ལོ་རབས་བརྒྱད་ཅུ་པ་ནས་བཟུང་། ངས་རིན་པོ་ཆེ་འགའ་ཞིག་ཐའེ་ཝན་ལ་ཆོས་གསུང་པར་གདན་ཞུ་བྱས་ཤིང་། རྙིང་མ་པའི་ཆོས་ལུགས་ཀྱི་གཙོ་འཛིན་སྐྱབས་རྗེ་གྲུབ་དབང་པད་ནོར་ཡང་གདན་ཞུ་བྱེད་ཐུབ་པ་བྱུང་། ཁོང་ཐེངས་དང་པོར་ཐའེ་ཝན་ལ་ཕེབས་སྐབས་ང་རང་གི་ཁྱིམ་དུ་བཞུགས་ཤིང་། རྗེས་སོར་ཡང་ཐེངས་འགའ་ལ་བྱོན་པར་མ་ཟད། ལོ་ཁ་ཤས་ཀྱི་རིང་དུ་དཔལ་ཡུལ་བྱང་ཆུབ་དར་རྒྱས་གླིང་གི་ཆོས་ཚོགས་བཙུགས་ནས་སློབ་མའང་ཆེས་མང་པོ་རྗེས་སུ་བཟུང་།^p58
ཕྱི་ལོ་༡༩༩༠ལོ་ཡས་མས་ཤིག་ལ། པད་ནོར་རིན་པོ་ཆེ་ཐའེ་ཝན་ལ་འབྱོན་སྐབས། ཁོང་གིས་ང་ལ། ཆོས་རྗེ་འཇིགས་མེད་ཕུན་ཚོགས་ནི་ང་ཡི་རྩ་བའི་བླ་མ་ཡིན། ཁོང་ཐའེ་ཝན་ལ་འབྱོན་སྐབས་ཁྱོད་ཀྱིས་ནུས་པ་གང་ཡོད་ཀྱིས་སྣེ་ལེན་དང་ཞབས་ཞུ་ཡག་པོ་གྱིས་ཞེས་གསུངས་མ་ཐག ང་རང་ཅུང་ཟད་ཡ་མཚན་པར་གྱུར་ཏེ། པད་ནོར་རིན་པོ་ཆེ་ནི་དེ་འདྲའི་བླ་མ་ཕུལ་དུ་བྱུང་བ་ཞིག་དང་། རྟོགས་པའི་གདེང་ཚད་མཐོན་པོར་སོན་པ་ཞིག་ཡིན་ན། ཁོང་གི་རྩ་བའི་བླ་མ་དེ་ཅི་འདྲ་ཞིག་ཡིན་ནམ་སྙམ་པ་བྱུང་།^p59
དེ་རྗེས་ངེད་ཅག་གིས་ཆོས་རྗེ་འཇིགས་མེད་ཕུན་ཚོགས་ཐའེ་ཝན་ལ་བྱོན་ནས་བཀའ་སློབ་གནང་བའི་སྐོར་ལ་མཐོང་ཆེན་རྒྱ་ཆེན་པོའི་སྒོ་ནས། དཔལ་ཡུལ་ཆོས་ཚོགས་དང་གསང་སྙིང་གླིང་གཉིས་མཉམ་འབྲེལ་གྱིས་སྣེ་ལེན་བྱེད་པའི་སྟ་གོན་འཐུས་ཚང་བྱས། ཕྱི་ལོ་༡༩༩༣ལོའི་ཕྱི་ཟླ་༩པའི་ནང་། ཆོས་རྗེ་འཇིགས་མེད་ཕུན་ཚོགས་དུས་བཏབ་པ་ལྟར་དུ་ཐའེ་ཝན་ལ་ཕེབས་ཐུབ་པ་བྱུང་ཞིང་། ཁོང་གིས་བཀའ་ཆོས་གནང་བའི་རླབས་ཆེན་གྱི་མཛད་པ་རྣམས་རང་ཅག་སྐལ་ལྡན་རྣམས་ཀྱི་མཐོང་ཆོས་སུ་གྱུར།^p60
ཆོས་རྗེ་ཉིད་ཀྱིས་ཐའེ་པེ་དང་ཐའེ་ཀྲུང་གི་གནས་གང་དུ་ཆོས་ཀྱི་མཛད་སྒོ་སྤེལ་ཡང་། ཕྱོགས་སོ་སོ་ནས་ཡོང་བའི་དད་ལྡན་ཧ་ཅང་མང་པོ་ལྷན་ཅིག་ཏུ་འདུས་པར་གྱུར། དེ་ལས་འགའ་རེ་བོད་བརྒྱུད་ནང་བསྟན་པ་དང་འགའ་རེ་ནི་རྒྱ་བརྒྱུད་ནང་བསྟན་པ་སྟེ། ཁོ་ཚོའི་ཆོས་བརྒྱུད་ཐ་དད་ཡིན་ཡང་། རླབས་ཆེན་གྱི་བླ་མ་ཁོང་དང་ཆོས་ཀྱི་འབྲེལ་བ་འཇོག་ཚུལ་ལ་ཁྱད་པར་མེད་པར་ལྷན་འཛོམས་བྱུང་། སྐབས་དེར། ཐའེ་ཐིའེ་ཐོག་ཁང་ཆེན་མོའི་སྒྱུ་རྩལ་འཁྲབ་སྟོན་ཁང་ཚོམས་སུ་རྒྱ་ཆེ་བའི་དབང་བསྐུར་མཛད་སྒོ་སྤེལ། ཉིན་དེའི་དབང་བསྐུར་ཆོས་ཚོགས་ཀྱི་ཆེད་དུ། ང་ཚོས་སྔོན་ནས་སྨི་གཉིས་ཙམ་མཐོ་བའི་ཆོས་ཁྲི་ཆེན་པོ་ཞིག་བཟོས་ཤིང་། བཀྲ་ཤིས་རྟགས་བརྒྱད་དང་མེ་ཏོག་སྣ་ཚོགས་ཀྱི་མཆོད་པས་ཚོགས་ར་ཡོངས་སུ་ལེགས་པར་བརྒྱན་པ་ཡིན།^p61
ཐེངས་དང་པོར་ཆོས་རྗེ་འཇིགས་མེད་ཕུན་ཚོགས་མཇལ་བ་ན། ངའི་སེམས་གཏིང་དུ་ཁོང་ནི་ཧ་ཅང་བྱིན་རླབས་དང་ནུས་མཐུ་ཅན་གྱི་བླ་མ་ཞིག་ཡིན་པའི་ཚོར་སྣང་ཟབ་མོ་བྱུང་བ་སྟེ། ཁོང་གི་ཐུགས་རྗེ་ཤུགས་དྲག་པོའི་ནུས་མཐུ་ཡིས་ང་རང་ཧ་ལས་པར་གྱུར། ཆོས་རྗེ་འཇིགས་མེད་ཕུན་ཚོགས་མ་མཇལ་བའི་ཡར་སྔོན་དུ། ང་ལ་སྐྱབས་རྗེ་བདུད་འཇོམས་རིན་པོ་ཆེ་དང་དིལ་མགོ་མཁྱེན་བརྩེ་རིན་པོ་ཆེ་རྣམ་གཉིས་ཆེས་ཐག་ཉེ་པོའི་སྒོ་ནས་མཇལ་བའི་སྐལ་བ་ཐོབ་མྱོང་། ཁོང་རྣམ་པ་གཉིས་ལའང་བྱིན་མཐུ་ཧ་ཅང་ཆེན་པོ་ལྡན་པ་ཡིན་ཏེ། སྐྱབས་རྗེ་བདུད་འཇོམས་རིན་པོ་ཆེ་ལ་མ་གཤིས་དང་ཉེ་བའི་ཞི་འཇམ་གྱི་རྣམ་པ་ལྡན་ཞིང་། དིལ་མགོ་མཁྱེན་བརྩེ་རིན་པོ་ཆེ་ནི་སྐུ་བོངས་ཆེ་ཞིང་གཟི་བརྗིད་ཀྱི་ཉམས་དང་ལྡན་ཡོད། ཆོས་རྗེ་འཇིགས་མེད་ཕུན་ཚོགས་ཀྱི་ཟིལ་རྔམ་ལྡན་པའི་སྐུ་གཟུགས་ལས། མཚོན་ཆ་རྣོན་པོ་ལུས་ལ་ཟུག་པ་ལྟ་བུའི་བྱིན་རླབས་ཀྱི་ཚན་ཁ་དམིགས་བསལ་བ་ཞིག་སྟེར་གྱིན་འདུག དེ་འདྲའི་བྱིན་མཐུ་ཁྱད་པར་ཅན་དེས་ང་རང་ལ་བག་ཆགས་ཤིན་ཏུ་ཟབ་མོ་བཞག་བྱུང་།^p63
ད་དུང་ཆོས་རྗེ་འཇིགས་མེད་ཕུན་ཚོགས་དང་མཉམ་དུ་ཕེབས་པའི་བཙུན་མ་གཉིས་ཡོད་དེ། གཅིག་ནི་ཁོང་གི་སྐུ་སྲིང་མ་ཡིན་ལ། གཞན་དེ་ནི་ཁོང་གི་ཚ་མོ་སྟེ་མཁའ་འགྲོ་མ་ཡེ་ཤེས་མཚོ་རྒྱལ་གྱི་སྤྲུལ་པ་ཡིན་པར་འདུག དེ་མིན་གྲྭ་པ་འགའ་ཞིག་ཡོད་པ་ལས་གཅིག་ནི་མཁན་པོ་བསོད་དར་རྒྱས་རེད། ལོ་ན་ཆུང་བའི་བོད་ཀྱི་རབ་བྱུང་ཁོང་གིས་རྒྱ་ཡིག་ལེགས་པོ་མཁྱེན་གྱིན་ཡོད་པས། སྐབས་དེར་ང་རང་ཧ་ཅང་ངོ་མཚར་བར་གྱུར་ཅིང་། ཁོང་ནི་ལོ་ན་ཤིན་ཏུ་གཞོན་ལ་སྨྲ་བ་ཉུང་ཞིང་སྒམ་ཚུགས་ལྡན་པ། ཀུན་སྤྱོད་གཙང་ལ་བྱད་གཟུགས་ཤིན་ཏུ་ལེགས་པོ་ཞིག་འདུག་སྙམ་པ་བྱུང་།^p64
ཆོས་རྗེ་ཉིད་ཀྱི་ཐའེ་ཝན་གྱི་མཛད་རིམ་མང་ཆེ་བར་དབང་བསྐུར་བ་ཡིན་ལ། ང་ཚོས་ཁོང་གི་ཞབས་དྲུང་ནས་ཐོབ་པའི་ཆོས་རེ་རེ་བཞིན་དུ་ཧ་ཅང་གཙིགས་ཆེན་དང་གཅེས་སྤྲས་བྱས་པ་ཡིན། ཁོང་གིས་དབང་བསྐུར་བའི་རྗེས་སུ། ཚ་མོ་རྗེ་བཙུན་མ་དེས་ང་ཚོ་ལ་དབང་བསྐུར་དང་འབྲེལ་བའི་ཆོ་ག་དང་ཁྲིད་ཡིག་རྣམས་ཀྱི་ལུང་གསུངས། ཁོང་གི་ཚ་མོ་ནི་དེ་འདྲའི་དགུང་ལོ་ཆུང་ཞིང་བཞིན་རས་ལེགས་པ། ཞི་དུལ་དང་ལྡན་པ་ཞིག་སྟེ། མོའི་སྐུ་གཟུགས་ལས་ཀྱང་ཆུ་བོ་བཞུར་བ་ལྟ་བུའི་མཉེས་གཤིན་གྱི་ཉམས་ཤིག་མངོན་ནས་ཡོད། ལོ་རབས་དེའི་ནང་དུ། ཐའེ་ཝན་མ་ཟད་ནུབ་ཕྱོགས་སུའང་བུད་མེད་རྟེན་ཅན་གྱི་བླ་མས་ཆོས་གསུང་བ་ཤིན་ཏུ་དཀོན་པས། སྐབས་དེ་དུས་ཀྱི་སྣང་བརྙན་ཐམས་ཅད་ད་ལྟའང་ངའི་སེམས་སུ་གསལ་པོར་དྲན་གྱིན་ཡོད།^p65
དབང་གནང་བའི་བར་སྐབས་རྣམས་སུ། ཆོས་རྗེ་ཉིད་ཀྱིས་ང་ཚོ་ལ་ཁོང་གི་རྣམ་ཐར་འགའ་རེའང་གསུངས་བྱུང་། ངས་དྲན་སོས་པ་ཞིག་ལ། ཐེངས་ཤིག་ཁོང་གིས་ངོ་མཚར་བའི་གཏེར་ཞིག་བཞེས་རབས་གསུངས་ཤིང་། གཏེར་དེ་ནི་གནམ་གྲུ་ནས་འཕུར་སྐྱོད་མཛད་སྐབས་བྱུང་བ་དང་། སྐབས་དེར་ཁོང་གཟིམས་ཟིན་རྗེས་གཟོད་གཏེར་དེ་བཞེས་པའི་སྐོར་གསུངས་ཀྱང་ད་ལྟ་ཞིབ་ཕྲ་དྲན་གྱིན་མི་འདུག^p66
ད་དུང་ངས་མི་གཞན་གྱི་ངག་ཐོག་ནས་གོ་ཐོས་བྱུང་བ་ལྟར་ན། ཆོས་རྗེ་ཉིད་དགུང་ལོ་གཞོན་དུས་ཐོས་བསམ་སྒོམ་གསུམ་ལ་ཧ་ཅང་བརྩོན་འགྲུས་མཛད་བཞིན་པའི་ཉིན་ཞིག་ལ། ན་གཞོན་མཛེས་མ་ཞིག་ཁོང་གི་གམ་དུ་ལྷགས་ནས། ང་ནི་ཁྱེད་དང་སྐྱེ་བ་སྔ་མའི་ལས་འབྲེལ་ཡོད་པའི་ལས་ཀྱི་ཕྱག་རྒྱ་མོ་ཞིག་ཡིན་པས། ཉིད་ཀྱིས་དང་དུ་ལེན་པར་མཛོད་ཅེས་པ་ན། ཁོང་གིས་དང་ལེན་མ་མཛད་ཀྱང་། མོ་རང་གིས་ས་ཆ་ག་གེ་མོ་ནས་ཟླ་བ་གཅིག་ལ་བསྒུག་རྒྱུ་ཡིན་ཟེར་ནས་སོང་། དེ་ནས་ཟླ་བ་གཅིག་སོང་ཡང་ཆོས་རྗེ་ཉིད་ཀྱིས་ད་དུང་དང་ལེན་མ་བྱས་པས། རྗེས་སུ་བུད་མེད་དེ་ཉིད་ཀྱང་མི་སྣང་བར་གྱུར་སོང་སྐད། རྗེས་སོར་ཁོང་གི་བླ་མ་ཞིག་གིས། ད་ཁྱེད་རང་གིས་ཅུང་ཟད་ཅིག་ཉེས་སོང་། ཁྱེད་ཀྱིས་ནི་བཙུན་པའི་ཡོན་ཏན་ཁོ་ན་ལ་དགོངས་པ་གཏད་པ་ལས་གཞན་པའི་དགོས་པ་མ་ཤེས་པར་འདུག་ཅེས་གསུངས།^p67
ཆོས་རྗེ་ཉིད་ཀྱི་མཛད་པ་འདིས་བདག་ལ་སེམས་འགུལ་ཆེན་པོ་ཐེབས་ཤིང་། ཁྱད་པར་དུ་ཁོང་གི་བླ་མས་གསུངས་པའི་ཚིག་དེས་ནི། ཆོས་རྣམ་དག་ཅིག་བསྒྲུབ་པར་རབ་བྱུང་ཁོ་ན་ཡིན་མི་དགོས་པར། ཁྱིམ་པ་དང་རབ་བྱུང་སུ་ཡིན་ཡང་འགྲུབ་ངེས་ཡིན་ལ། ནང་ཆོས་ཀྱི་བྱིན་རླབས་ལ་བརྟེན་ན་རབ་ཏུ་བྱུང་བ་དང་ཁྱིམ་པའི་རྟེན་ཅན་ཐམས་ཅད་ལའང་འབྲས་བུ་མཆོག་ཏུ་འཐོབ་པར་འགྱུར་ཞེས་པའི་དོན་ཡིན་པ་ཤེས་སོང་།^p68
སྐབས་དེར་ང་རང་སྣེ་ལེན་པ་ཞིག་ཡིན་པས། རྗེ་ཉིད་དང་སྒེར་ངོས་ནས་མཇལ་འཕྲད་གནང་བའི་གོ་སྐབས་བཟང་པོ་བྱུང་ལ། ངས་བུ་མོ་ཁྲིད་ནས་ཆོས་རྗེ་ཉིད་ལས་ཕྱག་དབང་བླངས་ཏེ་མོ་རང་གི་རྒྱུད་ལ་ཐར་བའི་ས་བོན་བཞག ཁོང་གིས་ཅུང་ཟད་དབྱེས་ཆེ་བའི་ཕྱག་དེ་བདག་གི་མགོ་ལ་བཞག་ནས་མཚན་སྔགས་གསུང་ཞོར་བྱིན་རླབས་གནང་བ་ན། བཤད་མི་ཤེས་པའི་དྲོད་རྒྱུན་ཞིག་ལུས་ཀྱི་རྩ་ལམ་ཐམས་ཅད་ལ་ཁྱབ་པར་གྱུར། དེ་དུས་ཆོས་རྗེ་ཉིད་ཀྱི་སྤྱན་སྙུང་བཞིན་ཡོད་པས་ཁོར་ཡུག་རྣམས་གསལ་པོར་མི་གཟིགས་པར་བཤད་ཀྱང་། ང་ཚོས་ཐག་ཉེ་པོའི་སྒོ་ནས་མཇལ་སྐབས་སྤྱན་སྙུང་བཞིན་ཡོད་པའི་རྣམ་པ་གང་ཡང་མཐོང་མ་སོང་།^p69
དེའི་སྐབས་སུ། ང་རང་གིས་ཉིན་དཀར་ལས་ཞུགས་དང་བུ་མོ་གཉིས་ལ་ལྟ་སྐྱོང་བྱེད་དགོས་པར་མ་ཟད། ཞོར་དུ་ཁྱོ་ག་ལའེ་ཧྲེང་ཁྲོན་（赖声川）དང་མཉམ་དུ་འཁྲབ་སྟོན་ལས་སྒྲུབ་ཚོགས་པའི་བྱ་བར་རོགས་འདེགས་བྱེད་དགོས་པས་བྲེལ་འཚུབ་ཧ་ཅང་ཆེ་ཡང་། ཆོས་རྗེ་འཇིགས་མེད་ཕུན་ཚོགས་ཐའེ་ཝན་ལ་བྱོན་ནས་བཀའ་ཆོས་གནང་སྐབས། ངས་དུས་ཚོད་བཀོད་སྒྲིག་ཚགས་དམ་པོར་བྱས་ཏེ། ཁོང་གི་ཐའེ་ཝན་གྱི་ཆོས་ཀྱི་མཛད་སྒོ་ཚང་མར་ཞུགས་ཐུབ་པར་བྱས་པ་ཡིན། ཁོང་གནས་འདིར་བྱོན་པ་དེ་ནི། ང་ཚོ་མི་རེ་རེར་མཚོན་ནའང་སྐལ་བ་ཧ་ཅང་བཟང་པོར་གྱུར་པས་བཀའ་དྲིན་ཤིན་ཏུ་ཆེ།^p70
ཆོས་རྗེ་ཉིད་ཞིང་དུ་གཤེགས་ནས་ད་ལྟ་ལོ་ཉི་ཤུ་སོང་ཟིན་ཀྱང་། ངས་ནམ་རྒྱུན་ཁོང་དྲན་ཐེངས་རེ་རེར། སྟོབས་ཤུགས་ཆེ་བའི་བྱིན་མཐུ་ཁྱད་པར་ཅན་ཞིག་གིས་ང་རང་ཡོངས་སུ་བཅིངས་བ་ལྟ་བུའི་སྣང་བ་སྐྱེས།^p71
བཅར་འདྲི་མཇུག་རྫོགས་པར་ཉེ་བ་ན། ལྕམ་ཏིང་ནའེ་ཀྲུའུ་ཡིས་རང་གི་སྐྲ་ལོར་ལག་པས་རེག་ཙམ་བྱས་ནས་ཉམས་མཚར་གྱི་ཚུལ་དུ། ངས་སྐྲ་ལོའི་ཁ་དོག་འཇའ་ཚོན་ལྟར་དུ་བསྒྱུར་ཡོད། དེའི་རྒྱུ་མཚན་ནི་ང་རང་འཇའ་ཚོན་ལ་ཧ་ཅང་དགའ་བས་ཡིན། ང་རང་ཚེ་འདིར་འཇའ་ལུས་འོད་སྐུར་མ་འགྲུབ་ཀྱང་། འཇའ་ཚོན་ཐོད་ལ་བཏེགས་པའི་རྟེན་འབྲེལ་ལུས་ལ་བསྒྲིགས་ན། ནམ་ཞིག་སྐྱེ་བ་གང་རུང་ལ་འཇའ་ལུས་འོད་སྐུར་འགྲུབ་ངེས་ཡིན་ཞེས་བཤད།^p72
ཕྱིར་ཁྲེང་ཏུའུ་ལ་འབྱོར།^p74
ཕྱི་ཟླ་༩པའི་ཚེས་༡༤ཉིན་གྱི་ཞོགས་པར། ངེད་ཚོ་ཧོང་ཀོང་ནས་རླངས་འཁོར་ལ་ཞུགས་ཏེ་རྒྱལ་མཚམས་འགག་སྒོ་བརྒལ་ནས་ཧྲེན་ཀྲེན་གྲོང་ཁྱེར་དུ་འབྱོར། ནམ་རྒྱུན་རྒྱལ་མཚམས་འགག་སྒོ་རྒལ་སྐབས། ཁོ་ཚོས་ལྟ་བཤེར་ཞིབ་མོ་བྱས་ཏེ་སྙད་ཀ་སྣ་ཚོགས་འདོགས་ཡོང་བས་སེམས་ཁུར་ཅུང་ཟད་འདུག་ཀྱང་། ད་ལན་ནི་ཚེགས་མེད་བདེ་བླག་ཏུ་ཕྱིར་ལོག་ཐུབ་པ་བྱུང་།^p75
རྒྱལ་མཚམས་འགག་སྒོ་བརྒལ་རྗེས། ཆོས་རྗེ་ཉིད་ཀྱིས་ཟས་ཚོམས་ཤིག་ཏུ་ཞོགས་ཟས་གསོལ་ཅིང་། ཧོང་ཀོང་ནས་ཆོས་རྗེ་ཉིད་ལ་ཆེད་དུ་སྐྱེལ་མ་ཞུ་བར་ཡོང་མཁན་རྣམས་ཀྱི་རེ་བ་ལྟར། རྗེ་ཉིད་ཀྱིས་བོད་ཡིག་གི་ལམ་ནས། སངས་རྒྱས་འཕྲིན་ལས་ཕྱོགས་བཅུར་རྒྱས། །བཀྲ་ཤིས་དཔལ་དུ་འབར་གྱུར་ཅིག །སྦྱིན་བདག་ཚེ་རིང་ནད་མེད་ཅིང་། །ལོངས་སྤྱོད་ཕུན་སུམ་ཚོགས་པར་ཤོག །འཇིགས་མེད་ཕུན་ཚོགས་འབྱུང་གནས་ནས། ཞེས་སྨོན་ཚིག་ཅིག་ཕྱག་བྲིས་གནང་། འདི་ཉིད་ནི་ད་ཐེངས་ངེད་ཚོ་ཕྱི་ལོགས་སུ་འགྲོ་སྐབས་འབྲེལ་བ་ཐོགས་ཚད་ལ་ཐུགས་སྨོན་དུ་མཛད་པ་ཡིན་པར་གསུངས།^p76
དེ་རྗེས་ཧྲེན་ཀྲེན་གནམ་ཐང་ནས་ཆུ་ཚོད་གཉིས་ལྷག་ལ་འཕུར་སྐྱོད་བྱས་རྗེས་ཁྲེང་ཏུའུ་གྲོང་ཁྱེར་གྱི་ཧྲོང་ལིའུ་（双流）གནམ་ཐང་དུ་འབྱོར། ཁྲེང་ཏུའུ་ཡི་གནམ་གཤིས་ཧ་ཅང་ཚ་དྲོད་ཆེ་ཡང་། དེ་ནི་སློབ་འབངས་ཀྱི་ཚོགས་མང་དུ་འདུས་པའི་སྤྲོ་སེམས་ཀྱི་ཚ་རླབས་འཕྱུར་བ་དང་བསྡུར་ཐབས་མི་འདུག་སྟེ། སྤྲུལ་སྐུ་བསྟན་འཛིན་རྒྱ་མཚོ་དང་མཁན་པོ་ཚུལ་ཁྲིམས་བློ་གྲོས། མཁན་པོ་ཤེས་རབ་བཟང་པོ། མཁན་པོ་འཆི་མེད་རིག་འཛིན་སོགས་ཀྱི་གཙོས་བླ་རུང་ནང་བསྟན་སློབ་གླིང་གི་རབ་བྱུང་པ་ཤིན་ཏུ་མང་པོ་ཞིག་གིས། ཆོས་རྗེ་ཉིད་ཕྱིར་ཕེབས་པ་ཤེས་རྗེས་གནས་འདིར་བྱོན་ནས་ཉིན་མང་པོར་བསྒུགས་འདུག་པར་མ་ཟད། ཁོང་ཚོས་རྗེ་ཉིད་ཀྱི་ཕེབས་འབྱོར་ལ་དགའ་བསུ་ཚད་མེད་ཞུས། ད་དུང་རྒྱ་ནག་གི་ཞིང་ཆེན་སོ་སོའི་ཆོས་པ་མང་པོ་ཞིག་ཀྱང་གནས་དེར་འཛོམས་པས་མི་ཚོགས་ཀྱི་འདུ་བ་ལང་ལོང་དུ་གཡོ་བར་བྱས། ཁོ་ཚོས་དུས་ཡུན་རིང་པོར་རེ་སྒུག་བྱས་པའི་ཆོས་རྗེ་ཉིད་དངོས་སུ་འབྱོན་པར་མཇལ་བ་ན། ཉིན་ཞག་བརྒྱ་ཕྲག་ལྷག་གི་དྲན་གདུང་དེ་དགའ་སྤྲོའི་མིག་ཆུ་རུ་གྱུར་བ་དང་། འཚང་ཁ་ཤིག་ཤིག དགའ་འབོད་ལྷང་ལྷང་གི་སྒོ་ནས་དད་གུས་ཀྱི་རྣམ་པ་སྣ་ཚོགས་མངོན་པར་བྱས། དེ་ནི་གནམ་ཐང་དེ་ཚུགས་ནས་བཟུང་ཆེས་འདུ་འཛི་ཆེ་བའི་ཉིན་ཞིག་ཡིན་པར་བཤད།^p78
དེ་རྗེས་ཆོས་རྗེ་ཉིད་དར་མདོ་མགྲོན་ཁང་༼དེང་སྐབས་ཀྱི་དཀར་མཛེས་མགྲོན་བྲང་༽ དུ་བྱོན་ཅིང་། ལམ་བར་ནས་མཁན་པོ་འཆི་མེད་རིག་འཛིན་དང་མཁན་པོ་ནོར་པ་ངེད་ཅག་རླངས་འཁོར་གཅིག་ཏུ་བསྡད་དེ། དགའ་སྤྲོའི་ངང་རང་རང་གི་ཕྱོགས་ནས་གླེང་མོལ་སྣ་ཚོགས་བྱེད་ཀྱིན་སོང་། བདག་ལ་ཟླ་བ་གསུམ་གྱི་རིང་དུ་འཕྲིན་སྐྱེལ་སྟབས་བདེ་པོ་མེད་རྐྱེན། ཁོང་གཉིས་ལ་བདག་གི་ཕ་མ་གཉིས་བདེ་འཚམས་ཡིན་མིན་དྲིས་པ་ན། ཕ་མ་གཉིས་ཀྱིས་ད་ལྟ་བླ་རུང་སྒར་དུ་ཁྱེད་ཕྱིར་ཡོང་བར་བསྒུགས་ནས་འདུག་ཟེར།^p80
ངེད་ཅག་མགྲོན་ཁང་དུ་སླེབས་རྗེས། ཆོས་རྗེ་ཉིད་ཀྱི་ཉེ་འཁོར་དུ་སློབ་མ་རྒན་པ་རྣམས་ཀྱིས་ཡོངས་སུ་བསྐོར་བར་མཐོང་བ་ན། རྗེ་ཉིད་ཕྱི་ལོགས་སུ་འབྱོན་སྐབས་ཀྱི་བྱ་བ་མང་པོ་ཞིག་ལ་བདག་གཅིག་པུས་འགན་ལེན་དགོས་པས་སེམས་ཁུར་ཆེ་ནའང་། ད་ལྟ་ཕྱི་རྒྱལ་ནས་གནད་དོན་ཅི་ཡང་མ་བྱུང་བར་བདེ་བླག་ངང་རང་ཡུལ་དུ་ཕེབས་ཐུབ་པ་བྱུང་བས་ཤིན་ཏུ་ལེགས་སོ་སྙམ་བཞིན། ཕྲག་སྟེང་གི་ཁུར་བོ་སར་ཕབ་པ་ལྟར་བློ་བདེ་བག་ཕེབས་སུ་གྱུར།^p81
ཉིན་དེའི་དགོང་མོར། བདག་ལ་ཟླ་བ་གསུམ་རིང་ཡོང་མ་མྱོང་བའི་གཉིད་ཧ་ཅང་སྐྱིད་པོ་ཞིག་ཀྱང་ཁུག་སོང་།^p82
འགྱུར་མེད་ཀྱི་དད་པ།^p83
ཐེངས་འདིར་ཕྱི་ལོགས་སུ་རྗེ་ཉིད་ཀྱི་ཞབས་ཞུར་ཕྱིན་པ་ནས་བཟུང་། ཁོང་ལ་སྔར་ལས་ཀྱང་གཡོ་བ་མེད་པའི་དད་པ་བརྟན་པོ་ཞིག་བདག་ལ་སྐྱེས་སོང་།^p84
ཆོས་རྗེ་ཉིད་ནི་ཚེ་འདིའི་སྦྱངས་པ་ཁོ་ནས་མཁས་པའི་གྲལ་མགོར་སླེབས་པ་ལྟ་བུ་མ་ཡིན་པར། སྐུ་སྐྱེ་སྔ་མ་རྣམས་ཀྱི་སྐབས་སུ་ཡང་ཡང་གོམས་པའི་ཁྱད་འཕགས་ཀྱི་མཁྱེན་རབ་དང་མངོན་རྟོགས་སོགས་གནས་གང་དུ་རྐྱེན་ག་གེ་མོ་ཞིག་གིས་བསླངས་པ་ཙམ་གྱིས། འབད་མེད་རང་ཤུགས་ཀྱི་ཚུལ་དུ་རིག་ཀློང་ནས་རྡོལ་ཡོང་བ་ཞིག་ཡིན། ཁོང་གི་ཞལ་གསུང་རྨད་དུ་བྱུང་བ་འདི་དག་ནི། ཤེས་རབ་ཀྱི་ཉིང་བཅུད་དང་ལེགས་བཤད་ཀྱི་དྭངས་མ་ཡིན་པར་མ་ཟད། ཚེ་སྔ་ཕྱི་ཡོད་པའི་སྒྲུབ་བྱེད་ཀྱི་དན་རྟགས་གསལ་པོར་ཡང་འགྱུར་ཆོག་ཆོག་ཡིན།^p85
བདག་གི་སེམས་ཁོངས་སུ། བླ་མ་དགེ་བའི་བཤེས་གཉེན་ཟེར་བ་དེ་ཁོང་ལྟ་བུ་ཞིག་ལོས་ཡིན་སྙམ་ཞིང་། ཁོང་ལས་ལྷག་པ་ཞིག་ནི་ཡོད་མི་སྲིད་ལ། ཡོད་ཀྱང་མི་དགོས་ཏེ། ཨོ་རྒྱན་སངས་རྒྱས་གཉིས་པ་དང་ཀུན་མཁྱེན་ཀློང་ཆེན་རབ་འབྱམས་སོགས་སྐྱེས་ཆེན་གོང་མ་རྣམས་ཀྱང་། བྱོན་པའི་དུས་རབས་མི་གཅིག་པ་ཙམ་མ་གཏོགས། གལ་ཏེ་ཁོང་ཚོའི་དྲུང་དུ་ཡོད་ནའང་འདི་ལས་ཁྱད་པར་ཅི་ཡང་མེད་སྙམ་པའི་བཅོས་མིན་གྱི་དད་པ་ཞིག་རྟག་ཏུ་སྐྱེ་བཞིན་ཡོད།^p86
དད་པ་དེ་ནི་ཆེད་དུ་བཅོས་ནས་དག་སྣང་སྒོམ་པ་ཙམ་མིན་པར། རྗེ་ཉིད་ཀྱི་མཛད་སྤྱོད་གང་ལ་བལྟས་ཀྱང་སྐྱེ་བོ་ཕལ་བའི་སྤྱོད་ཡུལ་ལས་ཡོངས་སུ་འདས་པ་ཞིག་ཡིན་པས། གང་ཟག་སུ་ཡིན་ཡང་། ཁོང་གི་སྐུ་མཇལ་བ་ཙམ་གྱིས་སེམས་སུ་འགྱུར་བ་ཆེན་པོ་འབྱུང་ཞིང་། གསུང་ཐོས་པ་ཙམ་གྱིས་ཡིད་ཀྱི་དང་བ་རབ་ཏུ་འདྲེན་པར་བྱེད་ལ། གསོལ་བ་བཏབ་པ་ཙམ་གྱིས་རྒྱུད་ལ་བྱིན་རླབས་ཆེན་པོ་འཇུག་པར་འགྱུར་བས། འདི་ནི་སངས་རྒྱས་བྱང་སེམས་དང་དབྱེར་མ་མཆིས་པའི་བྱིན་མཐུ་ཁྱད་པར་བ་ཞིག་གིས་ལོས་ཡིན་སྙམ།^p87
བདག་གིས་ཕྱི་ལོ་༡༩༨༥ལོར་རྗེ་ཉིད་ཐོག་དང་པོར་མཇལ་བ་ནས་བཟུང་། མཐར་ཕྱི་ལོ་༢༠༠༤ལོར་ཁ་བྲལ་བའི་བར་གྱི་བགྲང་བྱ་༡༩ཙམ་ལ་བླ་མར་བསྟེན་པའི་གོ་རིམ་ཁྲོད། ལོག་ལྟ་ཐེངས་གཅིག་ཙམ་ཡང་སྐྱེས་མ་མྱོང་བ་ནི་བདག་གི་མི་ཚེ་འདིའི་དོན་སྙིང་ལྡན་ཞིང་རིན་ཐང་ཡོད་པའི་ཕྱིར་དྲན་ཞིག་ཡིན།^p88
ཆོས་རྗེ་ཉིད་ཀྱིས་ནམ་རྒྱུན་སློབ་མ་རྣམས་ལ། བཟང་པོའི་བླ་མ་འདི་དང་དུས་རྟག་ཏུ། །མི་འབྲལ་འགྲོགས་པར་འདོད་ཀྱང་འབྲལ་བར་ངེས། །ཞེས་གསུངས་ཤིང་། ཁོང་ཞིང་ལ་གཤེགས་པ་ནས་བཟུང་། བདག་ཅག་ནི་བྱམས་ལྡན་ཨ་མ་དང་བྲལ་བའི་དྭ་ཕྲུག་ཇི་བཞིན་འཇིག་རྟེན་འདིར་ཁེར་རྐྱང་དུ་ལུས་སོང་བས། ནམ་རྒྱུན་བླ་མ་ཁོང་ཡིད་ལ་དྲན་ཐེངས་རེར། སེམས་པ་ཧ་ཅང་སྟོང་ལྷང་ངེར་གནས་པ་ན། རང་གིས་རང་ལ་ངའི་བླ་མའི་གཟུགས་སྐུའི་བཀོད་པ་རེ་ཞིག་ཆོས་ཀྱི་དབྱིངས་སུ་བསྡུས་ཟིན་ཀྱང་། ཆོས་ཀྱི་སྐུ་ནི་ནམ་ཡང་བདག་ཅག་དང་འབྲལ་བ་མེད་ཅེས་སེམས་གསོ་ཡང་ཡང་བྱེད་ཀྱིན་ཡོད། དེ་ལྟ་ནའང་། ད་ལྟ་བརྙན་ཕབ་ལས་སྐུ་བརྙན་མཇལ་བ་ཙམ་དང་སྒྲ་ཕབ་ལས་གསུང་སྐད་ཐོས་པ་ཙམ། རྨི་ལམ་དུ་སྐུ་ཉིད་དང་འཕྲད་པ་ཙམ་ལས། རྒྱ་ཆེ་བའི་འཇིག་རྟེན་འདི་ནས་བདག་གི་བླ་མ་དངོས་ནི་ཇི་ལྟར་བཙལ་ཀྱང་རྙེད་དུ་མེད་པར་གྱུར།^p89
མང་པོ་ཞིག་གིས། རྒྱུན་དུ་བླ་མའི་གམ་དུ་བཅར་ནས་ཉེ་བར་བསྟེན་དྲགས་ན། བླ་མ་དེ་སྐྱེ་བོ་ཕལ་བ་ཇི་བཞིན་སྐྱོན་གྱི་ཆའང་མང་དུ་མཐོང་ཡོང་བར་བཤད་ཀྱང་། བདག་ནི་དེ་ལས་ལྡོག་སྟེ། བླ་མ་ཇི་ལྟར་ཉེ་བར་བསྟེན་པ་དེ་ལྟར་དུ་དད་པ་ཤུགས་དྲག་པོར་འཕེལ་ཡོང་སྟེ། བགྲང་བྱ་ཅི་ཙམ་འགོར་ཡང་དད་པ་ལ་འགྱུར་བ་ཁབ་རྩེ་ཙམ་སོང་མེད་པར་མ་ཟད། སྔར་ལས་ཀྱང་ཇེ་བས་ཇེ་བརྟན་དུ་འགྲོ་བཞིན་འདུག བླ་མ་ཞིང་དུ་གཤེགས་པ་ནི་ཕ་མ་སོགས་འཇིག་རྟེན་གཞན་དུ་ཆས་པ་དང་མི་འདྲ་བར། ཉིན་རེ་ནས་ཉིན་རེ་བཞིན་དུ་དྲན་གདུང་ཆེ་རུ་འགྲོ་བཞིན་ཡོད། དེ་ཡང་སྔོན་ཆད་ཁོང་གི་ཞལ་ནས། ང་ཤི་ཚར་རྗེས་ཁྱེད་ཅག་ང་རང་ལ་དད་པ་ཇེ་ཆེར་འགྲོ་ཤས་ཆེ་ཞེས་གསུངས་པ་དེ་ནི་ངོ་མ་བདེན་པར་འདུག་སྙམ་མོ། །^p90
སྙུང་གཞི་དྭངས་པར་གྱུར།^p91
ཕྱི་ལོ་༡༩༩༡ལོར་ང་ཚོས་མེན་དབྱང་（绵阳）གྲོང་ཁྱེར་དང་ཁྲུང་ཆིང་（重庆）གྲོང་ཁྱེར་སོགས་སུ་བཙུགས་པའི་ཆོས་ཚོགས་ཀྱི་སློབ་མ་རྣམས་ཀྱིས་གདན་ཞུ་བྱས་པ་ལྟར། ཕྱི་ཟླ་༩པའི་ཚེས་༡༥ཉིན། ཆོས་རྗེ་ཉིད་ཆོས་ཚོགས་དེ་དག་ཏུ་བྱོན་ནས་ཆོས་གསུང་རྒྱུའི་བཀོད་སྒྲིག་ཡོད་ཀྱང་། ཉིན་དེར་གློ་བུར་དུ་ཆིང་ཏིང་（清定）བླ་མའི་སྙུན་གཞི་ཇེ་སྡུག་ཏུ་སོང་ཚུལ་ཐོས་པ་དང་། ཨ་ནེ་མེ་སྒྲོན་ཡང་ཚབས་ཆེ་ཙམ་ཞིག་སྙུང་བཞིན་པས། ཆོས་རྗེ་ཉིད་ཀྱི་མཛད་རིམ་དེ་དག་ཀྱང་གནས་སྐབས་སུ་ཕྱིར་འཐེན་མི་བྱེད་ཐབས་མེད་དུ་གྱུར་སྟབས། ཁོང་གི་སྐུ་ཚབ་ལ་མཁན་པོ་ཚུལ་ཁྲིམས་བློ་གྲོས་དང་སྤྲུལ་སྐུ་བསྟན་འཛིན་རྒྱ་མཚོ་སོགས་མཁན་སྤྲུལ་བཞི་ཆོས་ཚོགས་དེ་དག་ལ་ཆོས་གསུང་དུ་མངགས།^p92
སྔ་དྲོར་ཆོས་རྗེ་ཉིད་ཁྲེང་ཏུའུ་གྲོང་ཁྱེར་གྱི་ཀྲའོ་ཅུའེ་（昭觉）དགོན་དུ་ཆིང་ཏིང་བླ་མ་ལ་སྙུན་འདྲིར་བྱོན་པ་ན། ཁོང་ནི་ཞལ་མདངས་ཉམས་ཤིང་སྐུ་ཤ་རིད་པར་གྱུར་ནས་ཧ་ཅང་སྙུང་བའི་ཚུལ་མཛད་ཀྱིན་ཡོད། སྐབས་དེར་ཆོས་རྗེ་ཉིད་ཀྱིས་ཁོང་ལ་ཚེ་དབང་བསྐུར་བའི་རྟེན་འབྲེལ་གྱིས་སྐུ་ཁམས་ཀྱང་རིམ་གྱིས་ཇེ་དྭངས་ལ་སོང་།^p93
ཨ་ནེ་མེ་སྒྲོན་སྐམ་དམག་གི་སྤྱིའི་སྨན་ཁང་དུ་བྱོན་ནས་བརྟག་དཔྱད་བྱས་པ་ན། ཁོང་ལ་མྱུར་གཤིས་རྒྱུ་ལྷག་གི་ནད་ཡོད་པར་ངོས་བཟུང་ཞིང་། ཆོས་རྗེ་ཉིད་ཀྱང་ཕྱི་ལོགས་སུ་འབྱོན་སྐབས་སྐུ་ངལ་ཧ་ཅང་ཆེ་བས་སྐུ་གཟུགས་ལ་བརྟག་དཔྱད་བྱ་ཕྱིར། ཉིན་དེར་ཁོང་རྣམ་པ་སྨན་ཁང་དེར་སྡོད་བཅོས་མཛད་ཅིང་བདག་གིས་སྐད་སྒྱུར་སོགས་ཀྱི་ཞབས་ཞུ་བསྒྲུབས་པ་ཡིན། ཐོག་མར་ཨ་ནེ་མེ་སྒྲོན་ལ་གཤག་བཅོས་བྱེད་དགོས་པར་བཤད་ཀྱང་། གནམ་ཁབ་ཀྱིས་ཚ་སེལ་ཉིན་གཅིག་ཙམ་བྱས་པས་གཤག་བཅོས་མ་དགོས་པར་སྙུང་གཞི་ཡོངས་སུ་དྭངས་པར་གྱུར། ཆོས་རྗེ་ཉིད་ལ་ཉིན་གཅིག་གཉིས་རིང་བརྟག་དཔྱད་བྱས་ཀྱང་སྐུ་ལུས་ལ་སྙུན་གཞི་གཞན་ཆེར་མི་འདུག་པས། ཉིན་གཉིས་ཙམ་གྱིས་ཚང་མ་སྨན་ཁང་ནས་བཅོས་ཐོན་བྱུང་།^p96
དེ་ནས་ཆོས་རྗེ་ཉིད་ཁྲ་ཏེན་ཙིར་（茶店子）བཞུགས་ནས་ཉིན་འགའ་ལ་རྒྱ་སྨན་བསྟེན་ནས་སྐུ་གཟུགས་གསོས་ཤིང་། དེ་དང་མཉམ་དུ། ནངས་སྔ་མོ་ནས་ཕྲེང་བསྒྲིགས་ཤིང་འཚང་ཁ་ཤིག་ཤིག་གིས་ཕྱོགས་སོ་སོ་ནས་ཡོང་བའི་དད་ལྡན་རྣམས་ཀྱི་རེ་བ་བསྐང་ཕྱིར། རྗེ་ཉིད་ཀྱིས་ཉིན་གང་པོར་ཆོས་འཆད་དང་དབང་ཁྲིད། ཕྱག་དབང་། བྱིན་རླབས་གནང་བ་སོགས་ཀྱིས་དུས་འདའ་བར་མཛད།^p97
སྐབས་དེར། བླ་རུང་སྒར་གྱི་ཇོ་སེར་དགེ་འདུན་སྤྱི་ལ་སྟབས་བདེ་བའི་ཆེད་དུ། ཆོས་རྗེ་ཉིད་ཀྱིས་ཤར་རླུང་རྟགས་ཅན་གྱི་རླངས་འཁོར་ཆེན་པོ་གཉིས་ཉོས་ཤིང་། དེའི་ནང་དུ་དགེ་འདུན་པ་རྣམས་ལ་གནང་རྒྱུའི་འབྲས་སྒྱེ་མང་པོ་བརྩིགས།^p98
བདག་གིས་ཀྱང་རྗེ་ཉིད་ནུབ་ཕྱོགས་སུ་འབྱོན་སྐབས་ཀྱི་སྐུ་པར་ལེགས་པོ་འགའ་རེ་ཆེད་དུ་བཀྲུས་ཏེ། ཆོས་ཀྱི་མཆེད་གྲོགས་རྣམས་ལ་ཕ་འབབ་གྲ་སྒྲིག་བྱས་པ་ཡིན།^p99
ཕྱིར་བླ་རུང་དུ་འབྱོར།^p100
ཕྱི་ཟླ་༩པའི་ཚེས་༢༡ཉིན། ཁྲེང་ཏུའུ་གྲོང་ཁྱེར་ནས་དར་རྩེ་མདོ་རུ་སླེབས་རྗེས། ཆོས་རྗེ་ཉིད་དེར་ཉིན་གཅིག་ལ་བཞུགས་ཏེ་འབྲེལ་ཡོད་ལས་ཁུངས་ལ་ཕྱི་ལོགས་སུ་སོང་བའི་སྐོར་གྱི་སྙན་ཞུ་ཕུལ་ཅིང་བཞུགས་མོལ་ཚོགས་འདུ་ལ་ཞུགས།^p101
ཚེས་༢༣ཉིན་དར་མདོ་ནས་ཐོན་ཏེ་ལྷ་སྒང་དུ་འབྱོར་བ་ན། ལྷ་སྒང་དགོན་པའི་དགེ་འདུན་པ་རྣམས་ཀྱིས་གདན་ཞུ་བྱས་པ་ལྟར། ཐོག་མར་རིང་བསྲེལ་ལྷ་ཁང་དུ་བྱོན་ནས་རབ་གནས་བྱིན་རླབས་མཛད་ཅིང་། དེ་ནས་ལྷ་སྒང་ཇོ་བོའི་མདུན་དུ་ཐམས་ཅད་དང་མཉམ་དུ་བཟང་སྤྱོད་སྨོན་ལམ་གསུངས་བར་མ་ཟད། དེར་འཁོད་ཀྱི་དད་ལྡན་པ་རྣམས་ལ་མཇལ་ཁའང་གནང་།^p102
བར་སྨད་དམ་དཔལ་སྨད་དུ་སླེབས་པ་ན། སྤྲུལ་སྐུ་ལུང་རྟོགས་ཀྱིས་ད་ལྟའི་ཁོང་གི་གདན་ས་ཡོད་སར་གུར་ཆེན་པོ་ཞིག་ཕུབ་ནས་རྗེ་ཉིད་གདན་ཞུ་བྱས། ཁོང་གིས་སྐབས་དེར་ཆོས་དུང་ཆེན་པོ་གཉིས་རྗེ་ཉིད་ལ་ཕུལ་བ་དེ། ཆོས་རྗེ་ཉིད་ཀྱིས་ལམ་སང་འབུད་འབུད་འགའ་མཛད་ནས་ངེད་བདུད་ལས་རྣམ་རྒྱལ་གླིང་ལ་གནང་བྱུང་།^p103
དགོང་མོར་ནགས་བྲིན་རྩྭ་ཐང་གི་རབ་སྒང་དགོན་པར་སླེབས། སྐབས་དེར་རྗེ་ཉིད་ཀྱི་སྐུ་འཁོར་ཅུང་ཟད་མང་བས། རབ་སྒང་དགོན་པའི་གྲྭ་པ་རེ་རེས་མི་རེ་རེར་སྣེ་ལེན་བྱས་ཤིང་། ལྷག་མ་རྣམས་གཙུག་ལག་ཁང་གི་ནང་དུ་སྣེ་ལེན་བྱས་པས་དེར་ཞག་སྡོད་བྱས་པ་ཡིན།^p104
ཚེས་༢༤ཉིན་གྱི་སྔ་དྲོར། རབ་སྒང་དགོན་ནས་ཐོན་ཏེ་རྟའུ་རྫོང་དུ་སླེབས་པ་ན། དེ་གའི་དད་ལྡན་མང་པོའི་རེ་བསྐུལ་ཞུས་པ་ལྟར། ཆོས་རྗེ་ཉིད་ཀྱིས་རྟའུའི་མཆོད་རྟེན་དཀར་པོར་རབ་གནས་དང་། མང་ཚོགས་རྣམས་ལ་བཀའ་སློབ་དང་བྱིན་རླབས་གནང་།^p105
སླར་ཡང་ལམ་དུ་ཆས་པ་ན། ལམ་འགྲམ་དག་ཏུ་ཕྱོགས་ཀྱི་དགོན་པ་སོ་སོའི་དགེ་འདུན་པ་རྣམས་དང་དད་ལྡན་མང་པོ་འདུས་ཏེ། འགའ་རེས་སྦྲ་གུར་ཕུབ་ནས་རྗེ་ཉིད་ཀྱིས་སྐུ་ངལ་གསོ་བར་གདན་ཞུ་བྱེད་ཅིང་། འགའ་རེས་ལྷ་བསང་ཕུད་དེ་ཆོས་རྗེ་ཉིད་ཕྱིར་ཕེབས་པར་དགའ་བསུ་ཞུས། ཁོང་གིས་དེ་དག་གི་འདོད་པ་བསྐང་བའི་ཆེད་དུ། རླངས་འཁོར་གྱི་དཀར་ཁུང་གི་ཤེལ་ཡོལ་མར་ཕབ་སྟེ་ཕྱག་དབང་དང་བྱིན་རླབས་གནང་ཞིང་། མཚམས་རེར་ཆོས་འབྲེལ་བསྡུས་པ་རེ་གསུང་བཞིན་འབྱོན་པར་མཛད།^p106
ཕྱི་དྲོའི་མཚམས་སུ་ད་གཟོད་བླ་རུང་ཆོས་སྒར་དུ་འབྱོར་བ་དང་། དེར་དགེ་འདུན་པ་རྣམས་ཀྱིས་ཆོས་གོས་མནབས་ཏེ་སེར་ཕྲེང་ཚར་དུ་དངར་བ་བསྒྲིགས་ཤིང་། བསང་དུད་ཀྱི་ཕུང་པོ་རབ་ཏུ་འཁྲིགས་པའི་ཀློང་དུ་རོལ་མོ་སྣ་ཚོགས་ཀྱི་དབྱངས་སྙན་དང་བཅས་ཕེབས་བསུ་རྒྱ་ཆེན་པོའི་ངང་ནས་གདན་ལ་འཇགས་པར་མཛད། ཆོས་རྗེ་ཉིད་ཐད་ཀར་ཀུན་དགའ་ར་བའི་ནང་དུ་ཕེབས་ནས། དགེ་འདུན་པ་རྣམས་ལ་ཕྱི་ལོགས་སུ་བྱོན་པའི་མཛད་རིམ་གྱི་སྐོར་བསྡུས་པ་ཞིག་གསུངས་རྗེས། དཔོན་སློབ་རྣམས་གཞིས་བྱེས་ལྷན་འཛོམས་བྱུང་བའི་དགའ་སྤྲོའི་ཡོ་ལང་གི་ཁྲོད་ནས་རང་རང་གི་གཟིམས་ཤག་ཏུ་བྱོན་ནོ། །^p108
དྲན་ངོགས་ཀྱི་ནུབ་བསྐྱོད་ལས་ཕྱིར་ལོག་པའི་མཛད་རིམ་ལེགས་པར་གྲུབ་པའི་སྐབས་ཏེ་བཅུ་པའོ། །^p110