འབབ་ཚུགས་བཞི་པ། ཨ་རིའི་ནཱ་ཕཱ་ལུང་།^p1
འབབ་ཚུགས་བཞི་པ། ཨ་རིའི་ནཱ་ཕཱ་ལུང་།^p2
༼ ༧·༧~༧·༢༢ ༽^p3
མཛད་རིམ།^p4
ཕྱི་ཟླ་༧པའི་ཚེས་༧ཉིན། ཨ་ཏི་གླིང་དུ་འབྱོར།^p5
ཕྱི་ཟླ་༧པའི་ཚེས་༨ཉིན། སན་ཧྥི་རན་སའེ་སི་ཁོར་གཟིགས་སྐོར་དུ་ཕེབས།^p6
ཕྱི་ཟླ་༧པའི་ཚེས་༩ཉིན། ཕྱི་དྲོར་རྟེན་འབྲེལ་ཉེས་སེལ་གྱི་དབང་གནང་།^p7
ཕྱི་ཟླ་༧པའི་ཚེས་༡༠ཉིན། སྔ་དྲོར་ལྕེ་བཙུན་སྙིང་ཐིག་གི་དབང་དང་། ཕྱི་དྲོར་དེའི་ཁྲིད་ཐུན་དང་པོ་གསུངས།^p8
ཕྱི་ཟླ་༧པའི་ཚེས་༡༡ཉིན། ཕུར་པ་མགུལ་ཁུག་མའི་དབང་དང་ཟབ་ཆོས་རྣམ་གཉིས་ཉམས་སུ་ལེན་ཚུལ་གསུངས།^p9
ཕྱི་ཟླ་༧པའི་ཚེས་༡༢ཉིན། ཕྱི་དྲོར་ལྕེ་བཙུན་སྙིང་ཐིག་གི་ཁྲིད་ཐུན་གཉིས་པ་གསུངས།^p10
ཕྱི་ཟླ་༧པའི་ཚེས་༡༣ཉིན། སྔ་དྲོར་ཧྥ་རན་སིའི་གཞུང་ཚབ་ཁང་དུ་བྱོན་པ་དང་། ཕྱི་དྲོར་ལྕེ་བཙུན་སྙིང་ཐིག་གི་ཁྲིད་ཐུན་གསུམ་པ་གསུངས།^p11
ཕྱི་ཟླ་༧པའི་ཚེས་༡༤ཉིན། སྔ་དྲོར་མཚོ་གླིང་སྐྱེད་ཚལ་དུ་བྱོན་པ་དང་། ཕྱི་དྲོར་ལྕེ་བཙུན་སྙིང་ཐིག་གི་ཁྲིད་ཐུན་བཞི་པ་གསུངས།^p12
ཕྱི་ཟླ་༧པའི་ཚེས་༡༥ཉིན། སྔ་དྲོར་དབྱིངས་སྐྱོད་དབུགས་ལྒང་ལ་ཞུགས་པ་དང་། ཕྱི་དྲོར་འཇམ་དཔལ་ཞི་སྒྲུབ་ཀྱི་དབང་དང་གསང་སྔགས་གསང་དགོས་ཚུལ་གསུངས།^p13
ཕྱི་ཟླ་༧པའི་ཚེས་༡༦ཉིན། སྔ་དྲོར་ཁྲིད་ཡིག་སངས་རྒྱས་ལག་སྟེར་གསུངས་པ་དང་། ཕྱི་དྲོར་མི་སྒེར་གནམ་གྲུར་བཞུགས།^p14
ཕྱི་ཟླ་༧པའི་ཚེས་༡༧ཉིན། ཕྱི་དྲོར་ཕུར་པ་ཡང་ཟབ་སྙིང་པོའི་དབང་དང་འཕྲོས་དོན་གསུངས་ཤིང་། རྒྱལ་སྲས་ལག་ལེན་གྱི་ལུང་གནང་།^p15
ཕྱི་ཟླ་༧པའི་ཚེས་༡༨ཉིན། ཕྱི་དྲོར་ཚེ་དབང་དང་ཚོགས་འཁོར་རྒྱ་ཆེན་བསྐོར།^p16
ཕྱི་ཟླ་༧པའི་ཚེས་༡༩ཉིན། རིག་འཛིན་གླིང་དུ་བྱོན་ནས་དགོང་མོར་རྟེན་འབྲེལ་ཉེས་སེལ་གྱི་དབང་གནང་།^p17
ཕྱི་ཟླ་༧པའི་ཚེས་༢༠ཉིན། བཀྲ་ཤིས་ཆོས་གླིང་དུ་བྱོན་ནས་དད་ལྡན་རྣམས་ལ་ཆོས་ཁྲིད་དང་ཞལ་གདམས་གནང་།^p18
ཕྱི་ཟླ་༧པའི་ཚེས་༢༡ཉིན། ཕྱི་དྲོར་རྡོར་སེམས་ཀྱི་སྐུ་ལ་རབ་གནས་མཛད་པ་དང་། དགོང་མོར་འཕོ་བ་དང་ཚེ་དབང་གནང་།^p19
ཕྱི་ཟླ་༧པའི་ཚེས་༢༢ཉིན། ཡེ་ཤེས་སྙིང་པོའི་ཆོས་ཚོགས་སུ་བྱོན་ནས་འཇམ་དཔལ་ཡེ་ཤེས་སེམས་དཔའི་དབང་གནང་།^p20
ནཱ་ཕཱ་ལུང་（Napa Valley）དུ་འབྱོར་བ།^p21
ཕྱི་ཟླ་༧པའི་ཚེས་༧ཉིན་གྱི་སྔ་མོར། ངེད་ཅག་རི་བོ་རཱོ་ཁཱེས་ཀྱི་ཆོས་ཚོགས་དང་ཁ་གྱེས་ནས། ཆུ་ཚོད་གསུམ་ལ་རླངས་འཁོར་དུ་བསྡད་དེ་ཏེན་ཝིར་（Denver）གྲོང་ཁྱེར་གྱི་སི་ཏཱའེ་ཕོར་ཐིན་（Stapleton）གནམ་ཐང་དུ་ཕྱིན། མཁའ་ལམ་ནས་ཆུ་ཚོད་གསུམ་ཙམ་ལ་འཕུར་རྗེས། ཁཱ་ལི་ཧྥོར་ནེ་ཡ་（California）ཁུལ་གྱི་སན་ཧྥི་རན་སའེ་སི་ཁོའི་（San Francisco）རྒྱལ་སྤྱིའི་གནམ་ཐང་དུ་བབས། དེ་ནས་རླངས་འཁོར་དུ་བསྡད་དེ་ཆུ་ཚོད་གཉིས་དང་ཕྱེད་ཙམ་སོང་བ་ན་སྙན་གྲགས་ཆེ་བའི་ནཱ་ཕཱ་ལུང་དུ་འབྱོར་སོང་།^p22
ནཱ་ཕཱ་ལུང་ནི་ཨ་རིའི་འཛམ་གླིང་རིམ་པའི་རྒུན་ཆང་ཐོན་སྐྱེད་བྱ་ཡུལ་ཐོག་མ་ཡིན་ལ། གནས་འདིར་ཡུལ་ལྗོངས་ཀྱི་རྣམ་པ་ལྟ་ན་སྡུག་ཅིང་གནམ་གཤིས་ཀྱི་དྲོ་གྲང་ལུས་ལ་འཕྲོད། འཇང་འཇོང་འབར་འབུར་གྱི་རྒུན་འབྲུམ་ར་བས་ག་ས་གང་དུ་ཁྱབ་འདུག དུས་རབས་ཉི་ཤུ་པའི་ལོ་རབས་བརྒྱད་ཅུའི་ནང་། གནས་འདི་གའི་རྒུན་ཆང་གི་མིང་གྲགས་རབ་ཏུ་འབར་བ་དང་བསྟུན་ནས། ཡུལ་སྐོར་སྤྲོ་འཁྱམ་གྱི་ལས་རིགས་ཤིན་ཏུ་དར་ཏེ། ལུང་པ་འདི་ཡང་ཁཱ་ལི་ཧྥོར་ནེ་ཡ་ཁུལ་གྱི་བྲེལ་སྒོ་ཆེ་ཤོས་ཀྱི་ཡུལ་སྐོར་སྤྲོ་འཁྱམ་ས་ཚིགས་སུ་གྱུར་ལ། མི་རྣམས་ཀྱིས་གནས་འདིར་ཟས་རིགས་དང་སྒྱུ་རྩལ་སྣ་ཚོགས་ལ་ཅི་དགར་ལོངས་སུ་སྤྱད་ཆོག^p24
ཕྱི་དྲོར་ཉི་མ་ནུབ་རིར་བཞུད་ལ་ཉེ་བའི་དུས་སུ། ང་ཚོ་ནཱ་ཕཱ་ལུང་གི་ཨ་ཏིའི་གླིང་（Ati Ling）དུ་སླེབས། ཆོས་ཚོགས་འདི་ནི་ཁྲོམ་དགེ་འཇིགས་མེད་རིན་པོ་ཆེས་ཕྱག་བཏབ་གནང་ཞིང་། ཁོར་ཡུག་ཤིན་ཏུ་ཉམས་དགའ་བའི་ནགས་རི་ཞིག་གི་རྐེད་དུ་ཆགས་འདུག ཆོས་ཚོགས་དང་ཉེ་འཁོར་གྱི་ཁང་པ་རྣམས་ཡལ་ག་དང་ལོ་འདབ་རྒྱས་པའི་ཤིང་ཚལ་སྟུག་པོའི་ནང་དུ་ཡིབ་ཅིང་། ནགས་ཚལ་གྱི་ལོ་འདབ་གསེབ་ནས་ཉི་མའི་ཟེར་ཐག་བརྐྱངས་པའང་མིག་འཕྲུལ་བཞིན་དུ་མཐོང་། ཉིན་དེར་སྤྱིར་གནམ་གཤིས་ཧ་ཅང་དྲོ་ཡང་། ནགས་ཚལ་རྒྱས་པའི་གནས་འདིར་སླེབས་པ་ན་ཤིན་ཏུ་བསིལ་བའི་སྣང་བ་སྐྱེས།^p26
ཆོས་རྗེ་ཉིད་གནས་འདི་ནས་ཉིན་བཅུ་གཅིག་རིང་ལ་བཞུགས་དགོས་ཤིང་། ད་ལན་ང་ཚོ་ཕྱི་ཕྱོགས་སུ་ཡོང་ནས་བཞུགས་ཡུན་ཆེས་རིང་ཤོས་ཀྱི་ས་ཚིགས་ཀྱང་ཡིན། འདི་ནས་ཐག་མི་རིང་བའི་མཚམས་ན་ལིན་ཁིན་ཟློས་གར་གླིང་（Abraham Lincoln Recreation Center）ཞེས་པ་ཞིག་འདུག་ཅིང་། དེ་ནི་གཞུག་གི་ཉིན་ཤས་རིང་ཆོས་འཁོར་བསྐོར་སའི་གནས་ཡིན།^p28
སན་ཧྥི་རན་སའེ་སི་ཁོ་རུ་གཟིགས་སྐོར་དུ་ཕེབས་པ།^p31
ཕྱི་ཟླ་༧པའི་ཚེས་༨ཉིན། ངེད་ཅག་གིས་ཉིན་ཧྲིལ་བོ་གཅིག་གི་དུས་ཚོད་སྤྱད་ནས་སྙན་གྲགས་ཆེ་བའི་སན་ཧྥི་རན་སའེ་སི་ཁོ་ཡི་གྲོང་ཁྱེར་ལ་ལྟ་སྐོར་དུ་ཕྱིན། ཡུལ་འདི་ནི་ཨ་རིའི་ཆེས་ཁྱད་ཆོས་ལྡན་ལ་གསར་གཏོད་ཀྱི་རྣམ་པ་སྣ་ཚོགས་འཛོམས་པའི་གྲོང་ཁྱེར་ཞིག་ཡིན། ཨི་ཐ་ལི་དང་། སི་ཕེན། མེག་སི་ཁོ། ཉི་ཧོང་། ཀྲུང་གོ་སོགས་རང་རང་གི་ཁྱད་ཆོས་ལྡན་པའི་སྡོད་དམངས་ཀྱི་གཞིས་ཁང་རྣམས་གྲོང་ཁྱེར་གྱི་གནས་སོ་སོར་ཆགས་ཡོད། གྲོང་ཁྱེར་འདི་གུ་ཡངས་སྒོ་འབྱེད་དང་རིག་གནས་མཉམ་འདྲེས་ཀྱི་ས་ཆ་ཞིག་སྟེ། རི་མོ་མཁན་གྱི་ལག་ནང་གི་ཚོན་སྡེར་ཇི་བཞིན་ཡིད་དུ་འོང་།^p32
ང་ཚོས་གྲོང་ཁྱེར་ཧྲིལ་པོའི་ཡུལ་ལྗོངས་ཀྱི་བཀོད་པར་ལྟ་སྐོར་བྱས་ཤིང་། ཁྱད་པར་དུ་གནས་འདིའི་གུ་ཡངས་རང་བཞིན་གྱི་རིག་གནས་དང་མི་རྣམས་ཀྱི་ཤེས་མང་སྣ་འཛོམས་ལ་མཉམ་རོལ་བྱས་ཤིང་ངོ་མཚར་སྐྱེས། དེ་རྗེས་ཆེད་དུ་གསེར་སྒོ་ཟམ་ཆེན་（Golden Gate Bridge）ཞེས་པར་ལྟ་སྐོར་དུ་སོང་།^p33
ཕྱི་ལོ་༡༩༣༧ལོར་ལེགས་འགྲུབ་བྱུང་བའི་གསེར་སྒོ་ཟམ་ཆེན་ནི་གྲོང་ཁྱེར་འདིའི་མཚོན་རྟགས་སུ་བརྩི་ཞིང་། རིང་ཚད་ལ་སྤྱི་ལེ་༢.༧དང་མཐོ་ཚད་ལ་སྨི་༢༢༧འདུག སྐབས་དེར་འཛམ་གླིང་སྟེང་གི་ཆེས་རིང་ཞིང་མཐོ་བའི་ཟམ་པ་ཡིན་ལ། བཟོ་སྐྲུན་དང་མདོག་དབྱིབས་གང་ནས་ཀྱང་འཛམ་གླིང་ལ་སྙན་གྲགས་ཆོད་པའི་བཀོད་པ་ལེགས་ཤོས་ཀྱི་ཟམ་ཆེན་དུ་གྲགས། ཡིན་ནའང་། མཐོ་ཚད་སྨི་༧༥ཅན་གྱི་ཟམ་ངོས་འདི་ནི་འཛམ་གླིང་གི་རང་གསོད་བྱེད་མཁན་ཆེས་མང་སའི་གནས་ཡིན་ཏེ། ཕྱི་ལོ་༡༩༣༧ལོར་ཟམ་པ་གྲུབ་ནས་ཟླ་གསུམ་མ་ལོན་གོང་། དམག་མི་རྒན་པ་ཞིག་ཟམ་སྟེང་ནས་མཆོངས་ཏེ་རང་གསོད་བྱས་ཤིང་། དེ་ནས་རིམ་བཞིན་ནུབ་ཕྱོགས་རྒྱ་མཚོའི་ངོགས་ཀྱི་རང་གསོད་བྱེད་གྲངས་ཆེས་མཐོ་བའི་གནས་སུ་གྱུར། ངེད་ཅག་འགྲོ་བའི་སྐབས་སུ། མི་སྟོང་ཙམ་གྱིས་ཟམ་པ་འདིའི་སྟེང་ནས་རང་སྲོག་བཅད་མྱོང་ཟེར་བས། ང་ཚོས་ཀྱང་ཤི་བོ་དེ་དག་ལ་མ་ཎིས་བསྔོ་སྨོན་བྱས་ཏེ་དགོང་མོ་ཕྱིར་ཆོས་ཚོགས་སུ་ལོག^p35
རྟེན་འབྲེལ་ཉེས་སེལ།^p36
ཕྱི་ཟླ་༧པའི་ཚེས་༩ཉིན་ནས་བཟུང་། ཆོས་རྗེ་ཉིད་ཀྱིས་ལིན་ཁིན་ཟློས་གར་གླིང་དུ་ཐེངས་དང་པོའི་ཆོས་ཁྲིད་གསུང་བའི་མགོ་བརྩམས།^p37
སྐབས་འདིའི་ཆོས་ཁྲིད་ཀྱི་མཛད་སྒོ་ནི་ཨ་ཏི་གླིང་དང་རིག་འཛིན་དགོན། བཀྲ་ཤིས་ཆོས་གླིང་དགོན། ཡེ་ཤེས་སྙིང་པོའི་ཆོས་ཚོགས་བཅས་ཀྱིས་མཉམ་སྒྲུབ་ཀྱི་སྒོ་ནས་སྤེལ་བ་ཡིན་ལ། ཆོས་ཞུ་མཁན་ཕལ་ཆེ་བ་ནི་རྙིང་མའི་ཆོས་ལ་དད་པ་ཆེ་ཞིང་ལོ་མང་པོར་ཉམས་ལེན་བྱས་པའི་ནང་པ་བ་ཤ་སྟག་ཡིན། མཛད་སྒོ་འདིར་ཞུགས་མཁན་གཙོ་བོའང་གནས་འདི་དང་སན་ཧྥི་རན་སའེ་སི་ཁོའི་མི་ཡིན་ལ། དེ་མིན་སཱེ་ཡ་ཐཱོལ་（Seattle）དང་ལོ་སཱན་ཅི་ལཱེ་སི་（Los angeles）སོགས་ཡུལ་ཁམས་གཞན་གྱི་མི་སྣའང་མང་པོ་འདུས་པས། མི་སྟོང་ཕྲག་མང་པོ་ཤོང་སའི་ཟློས་གར་གླིང་དུ། རྒྱལ་ཁབ་མི་འདྲ་བ་དང་པགས་མདོག་མི་འདྲ་བའི་མི་མང་པོས་འཚང་ཁ་ཤིག་ཤིག་གི་སྒོ་ནས་ཆོས་རྗེ་ཉིད་འབྱོན་པ་ལ་སྤྲོ་སེམས་འཁོལ་བའི་བསུ་བ་གཟབ་རྒྱས་ཞུས། སྐབས་འདིའི་གསུང་སྒྱུར་མཁན་ནི་ཨ་རི་བ་ཆོས་ཀྱི་ཉི་མ་（Chokyi Nyima）ཡིན།^p38
ཕྱི་ཟླ་༧པའི་ཚེས་༩ཉིན་གྱི་ཕྱི་དྲོར། ཆོས་རྗེ་ཉིད་ཀྱིས་གཏེར་ཆེན་ལས་རབ་གླིང་པའི་རྟེན་འབྲེལ་ཉེས་སེལ་གྱི་དབང་གནང་བ་ཡིན། སྤྱིར་རྟེན་འབྲེལ་ཉེས་སེལ་གྱི་དབང་ལ་རྒྱས་འབྲིང་བསྡུས་གསུམ་ཡོད་པ་ལས་ཐེངས་འདིར་དབང་ཆོག་འབྲིང་པོ་ལྟར་དུ་གསུངས།^p40
ལྕེ་བཙུན་སྙིང་ཐིག་གི་ཁྲིད་ཐུན་དང་པོ།^p42
ཕྱི་ཟླ་༧པའི་ཚེས་༡༠ཉིན་གྱི་སྔ་དྲོར། ཆོས་རྗེ་ཉིད་ཀྱིས་ཀོང་སྤྲུལ་ཡོན་ཏན་རྒྱ་མཚོས་མཛད་པའི་ལྕེ་བཙུན་ཆེན་པོ་བི་མ་ལའི་སྙིང་ཐིག་གི་སྨིན་བྱེད་དབང་གི་ལག་ལེན་གསལ་བར་བཀོད་པ་གསེར་འགྱུར་རྩི་མཆོག་ཅེས་པའི་དབང་གནང་།^p43
ཕྱི་དྲོར། རྗེ་ཉིད་ཀྱིས་འཇམ་དབྱངས་མཁྱེན་བརྩེ་དབང་པོའི་གཏེར་ཆོས་ལྕེ་བཙུན་སྙིང་ཐིག་དུམ་བུ་གསུམ་པའི་སྟེང་ནས་ཁྲིད་གསུངས་པ་ཡིན། སྐབས་འདིའི་ཆོས་ཁྲིད་ཐུན་བཞིར་བགོས་ཏེ་གསུངས་ཤིང་། ཆོས་ཐུན་དང་པོ་ནི་འདི་ལྟར།^p45
འོད་གསལ་སྣང་བཞི་མཐར་ཕྱིན་ནས༔ རིག་པ་མི་འགྱུར་སྐུ་ལྔར་བཞེངས༔^p46
འཇའ་ལུས་འཕོ་ཆེན་དྭངས་མའི་གཟུགས༔ འཆི་མེད་བི་མ་མི་ཏྲ་ཀྱེ༔^p47
བདག་ལ་ཐུགས་རྗེས་བརྩེར་དགོངས་ནས༔ མངོན་སུམ་བྱིན་རླབས་དེང་སྩོལ་ཅིག༔^p48
དེ་ལ་འདིར་འོ་སྐོལ་རྣམས་ཀྱི་སྟོན་པ་ཐབས་མཁས་ལ་ཐུགས་རྗེ་ཆེན་པོ་དང་ལྡན་པ་འདི་ཉིད་ཀྱིས་བསྐལ་པ་གྲངས་མེད་པ་དུ་མའི་སྔོན་རོལ་ནས་བྱང་ཆུབ་མཆོག་ཏུ་སེམས་བསྐྱེད། བར་དུ་བསྐལ་ཆེན་གྲངས་མེད་གསུམ་ལ་སོགས་པར་ཚོགས་བསགས། ཐ་མ་རྒྱ་གར་རྡོ་རྗེ་གདན་དུ་མངོན་པར་རྫོགས་པར་སངས་རྒྱས་པའི་ཚུལ་བསྟན་པ་ཡིན།^p49
དེ་ནས་ཐེག་དམན་ཐུན་མོང་དང་ཐུན་མོང་མ་ཡིན་པའི་གདུལ་བྱ་རྣམས་རྗེས་སུ་འཛིན་པར་བྱ་བའི་ཕྱིར་དུ་ཡུལ་ཝཱ་རཱ་ཎ་སཱིའི་དྲང་སྲོང་ལྷུང་བ་རི་དྭགས་ཀྱི་ནགས་སུ་མིའི་འཁོར་ལྔ་སྡེ་བཟང་པོ། ལྷ་བརྒྱད་ཁྲི་དང་བཅས་པ་ལ་བཀའ་དང་པོ་བདེན་པ་བཞིའི་ཆོས་ཀྱི་འཁོར་ལོ་བསྐོར་བ་དང་། ཐེག་ཆེན་ཐུན་མོང་བའི་གདུལ་བྱ་རྣམས་ལ་སྟོན་པ་དེ་ཉིད་ཀྱིས་གནས་བྱ་རྒོད་ཕུང་པོའི་རི་བོ་རུ། གཟུགས་ནས་རྣམ་མཁྱེན་གྱིས་བསྡུས་པའི་ཆོས་ཐམས་ཅད་རང་གི་ངོ་བོ་ཉིད་མེད་པར་གཏན་ལ་ཕབ་པ་ཡུམ་རྒྱས་འབྲིང་བསྡུས་གསུམ་ལ་སོགས་པའི་ཆོས་ཀྱི་འཁོར་ལོ་བསྐོར། ཐེག་ཆེན་ཐུན་མིན་གྱི་གདུལ་བྱར་གྱུར་པ་རྣམས་ལ་གནས་ངེས་པ་མེད་པ་ཡུལ་པདྨ་ཅན་ལ་སོགས་པ་རུ་བཀའ་ཐ་མ་ལེགས་པར་རྣམ་པར་ཕྱེ་བའི་ཆོས་ཀྱི་འཁོར་ལོ་གསལ་བར་བསྟན། དེ་ནས་དབང་པོ་ཤིན་ཏུ་རྣོན་པོར་གྱུར་པའི་གང་ཟག་རྣམས་ལ་གསང་སྔགས་རྡོ་རྗེ་ཐེག་པའི་ཆོས་ཀྱི་འཁོར་ལོ་གསང་བའི་ཚུལ་དུ་མདོར་བསྡུས་པ་ཙམ་ཞིག་བསྟན། དེ་ཡང་དཔེར་མཚོན་ན་ནུབ་ཕྱོགས་ཨོ་རྒྱན་གྱི་ཡུལ་དུ་གསང་བ་འདུས་པའི་རྒྱུད་ཀྱི་རྒྱལ་པོ་དང་། དེ་བཞིན་དུ་ལྷོ་ཕྱོགས་འབྲས་སྤུངས་ཀྱི་མཆོད་རྟེན་ཆེན་པོ་རུ་དཔལ་དུས་ཀྱི་འཁོར་ལོ་ལ་སོགས་པས་མཚོན་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ནམ་མཁའ་ལྡིང་ལ་སོགས་པའི་ཡུལ་དུ་ཡང་རིགས་ཅན་ཐུན་མོང་མ་ཡིན་པའི་གང་ཟག་རྣམས་ལ་གསང་སྔགས་རྡོ་རྗེ་ཐེག་པ་བསྟན། དགོངས་པ་མྱ་ངན་ལས་འདའ་བ་ལ་ཉེ་བའི་ཁར་བཅོམ་ལྡན་འདས་རང་ཉིད་ཀྱི་ཞལ་ནས། ང་ནི་འདི་ནས་མི་སྣང་བར། །གྱུར་ནས་ལོ་བརྒྱད་ལོན་པ་ན། །ཨོ་རྒྱན་ཡུལ་གྱི་ནུབ་བྱང་མཚམས། །དྷ་ན་ཀོ་ཤའི་མཚོ་གླིང་དུ། །པདྨ་འབྱུང་གནས་ཞེས་བྱ་བ། །ང་ལས་ལྷག་པའི་སྐྱེས་བུ་ཞིག །ངེས་པར་འབྱུང་བར་འགྱུར་བ་ཡིན། །ཞེས་ལུང་བསྟན་པ་རེད། ད་དུང་རྫོགས་ཆེན་སྟོན་པ་བཅུ་གཉིས་ཀྱི་ནང་ཚན་དུ་གྱུར་པ་རྒྱལ་བ་རྡོ་རྗེ་འཆང་གིས་ཚེ་ལོ་དཔག་མེད་ཀྱི་དུས་སུ་སྒྲ་ཐལ་འགྱུར་རྩ་བའི་རྒྱུད་ལ་སོགས་པའི་རྒྱུད་སྡེ་མང་པོ་ཞིག་ཀྱང་གསུངས། སྒྲ་ཐལ་འགྱུར་རྩ་བའི་རྒྱུད་དེ་ཉིད་ལས། རྩོད་ལྡན་སྙིགས་མ་ལྔ་བདོ་བའི་གནས་སྐབས་ན་དགའ་རབ་རྡོ་རྗེ་དང་། འཇམ་དཔལ་བཤེས་གཉེན། ཤྲཱི་སིང་ཧ། ཛྙཱ་ན་སུ་ཏྲ་ལ་སོགས་པས་ཡང་ཟབ་ཀྱི་ཆོས་རྫོགས་པ་ཆེན་པོ་འདི་ཉིད་གསལ་བར་བྱེད་པར་ལུང་བསྟན་ཏེ། སྒྲ་ཐལ་འགྱུར་གྱི་རྩ་བ་ལས། དྷ་ན་ཀོ་ཤའི་ལྷ་ལྕམ་ལ། །ཕ་མེད་བུ་ནི་བཛྲ་ཧེ། །སོགས་ཀྱིས་དགའ་རབ་རྡོ་རྗེ་དང་། མཉྫུ་ཤྲཱི་པ་ཏི་ཞེས། །ཞེས་སོགས་ཀྱིས་འཇམ་དཔལ་བཤེས་གཉེན་དང་། ཁྱིམ་བདག་རིགས་ལ་ཤྲཱི་སིངྷ་། །ཞེས་སོགས་ཀྱིས་ཤྲཱི་སིངྷ་དང་། ཛྙ་ན་སཱུ་ཏྲས་འདི་ཉིད་འཛིན། །ཞེས་སོགས་ཀྱི་ཛྙ་ན་སཱུ་ཏྲ་བསྟན་ལ། གཞན་ཡང་། པདྨ་འབྱུང་གནས་དང་བི་མ་ལ་འདི་གཉིས་ནི་བོད་ཡུལ་མུན་པའི་གླིང་དུ་འོད་གསལ་རྫོགས་པ་ཆེན་པོའི་བསྟན་པ་གསལ་བར་བྱེད་པའི་ཤིང་རྟ་ཆེན་པོ་མཆོག་ཏུ་གྱུར་པ་ཡིན། བི་མ་ལ་མི་ཏྲའི་བཀའ་སྲོལ་དེ་ནི་ཡང་ཟབ་སྙིང་པོའི་རྒྱུད་ཆེན་བཅུ་བདུན་གྱི་རྗེས་སུ་འབྲངས་ཏེ་གསེར་ཡིག་ཅན་དང་། གཡུ་ཡིག་ཅན། དུང་ཡིག་ཅན། ཕྲ་ཡིག་ཅན་ཏེ་ཟབ་པ་པོད་བཞི་རུ་བཀྲལ། དེ་ལྟ་བུའི་ཟབ་པ་པོད་བཞིའི་གནད་དེ་ཡང་ཚུར་བསྡུས་ན་མན་ངག་སྙིང་པོ་བརྒྱ་དང་བཅུ་དགུའི་ནང་དུ་འདུ། བི་མ་སྙིང་ཐིག་ཆེན་པོ་དེ་ལ་སྙིང་ཐིག་རྙིང་མའམ་སྙིང་ཐིག་བཀའ་མ་ཞེས་ཡོངས་སུ་གྲགས་པ་དང་། པདྨ་ཀ་རས་ཀློང་གསལ་འབར་མའི་རྒྱུད་དང་བཏགས་གྲོལ་སྙིང་པོའི་རྒྱུད་དྲུག་ལ་སོགས་པའི་རྗེས་སུ་འབྲངས་ནས། གནས་ཁྱད་པར་ཅན་གཞི་སྟོད་ཏི་སྒྲོའི་བྲག་ཏུ་ལོ་བདུན་གྱི་བར་དུ་མཁའ་འགྲོ་ཡེ་ཤེས་མཚོ་རྒྱལ་ལ་གཅེས་ནོར་གྱི་ཚུལ་དུ་གནང་བ་དེ་ལ་མཁའ་འགྲོ་སྙིང་ཐིག་ཅེས་ཡོངས་སུ་གྲགས་ཤིང་། དེ་ལ་སྙིང་ཐིག་གསར་མའམ་སྙིང་ཐིག་གཏེར་མ་ཞེས་ཀྱང་གྲགས། སྙིང་ཐིག་བཀའ་མ་དེ་བསྟན་པའི་གནས་ཚད་ཡུན་ཧ་ཅང་རིང་ལ་བྱིན་རླབས་ཀྱི་ཚན་ཁ་དེ་ཙམ་མི་མྱུར་བ་ཞིག་ཡིན་པར་ཡང་གསུངས། སྙིང་ཐིག་གཏེར་མ་དེ་ནི་བསྟན་པའི་གནས་ཚད་ཡུན་ཅུང་ཐུང་ཡང་བྱིན་རླབས་ཀྱི་ཚན་ཁ་སྙིང་ཐིག་རྙིང་མ་ལས་ཀྱང་ཤིན་ཏུ་མྱུར་བ་ཞིག་ཡིན་པར་གསུངས། དེ་ལྟ་བུའི་བི་མ་ལ་མི་ཏྲས་མཛད་པའི་སྙིང་ཐིག་བཀའ་མ་དང་པདྨ་ཀ་རས་མཛད་པའི་སྙིང་ཐིག་གཏེར་མ་གཉིས་ལ་སྙིང་ཐིག་མ་གཉིས་ཞེས་ཡོངས་སུ་གྲགས་པ་རེད། སྙིང་ཐིག་མ་གཉིས་ཀྱི་དགོངས་པ་འགྲེལ་བར་བྱེད་པ་ལ། ཀུན་མཁྱེན་ཆོས་ཀྱི་རྒྱལ་པོ་ཀློང་ཆེན་རབ་འབྱམས་ཀྱིས་བི་མ་སྙིང་ཐིག་གི་གནད་མཐའ་དག་ཡོངས་སུ་བཀྲལ་བ་བླ་མ་ཡང་ཏིག་ཅེས་ཆོས་སྡེ་ལྔ་བཅུ་ང་གཅིག་གི་བདག་ཉིད་ཅན་དང་། མཁའ་འགྲོ་སྙིང་ཐིག་ཆེན་པོའི་དགོངས་པའི་གནད་གསལ་བར་བྱེད་པ་མཁའ་འགྲོ་ཡང་ཏིག་ཅེས་བྱ་བ་མཛད་པ་རེད། དེ་ལྟར་བླ་མ་ཡང་ཏིག་དང་མཁའ་འགྲོ་ཡང་ཏིག་གཉིས་ལ་སྙིང་ཐིག་བུ་གཉིས་ཞེས་ཡོངས་སུ་གྲགས་ཤིང་། སྙིང་ཐིག་མ་གཉིས་དང་བུ་གཉིས་ལ་སྙིང་ཐིག་ཡ་བཞི་ཞེས་ཡོངས་སུ་གྲགས་པ་རེད། གཞན་ཡང་ཟབ་མོའི་མན་ངག་ཕལ་ཆེར་ཕྱོགས་གཅིག་ཏུ་བསྒྲིགས་པ་ཟབ་མོ་ཡང་ཏིག་ཅེས་བྱ་བའང་ཀུན་མཁྱེན་བླ་མས་མཛད་པ་རེད། དེ་ནས་གསང་སྔགས་རྙིང་མའི་ཁྲོད་དུ་རྫོགས་པ་ཆེན་པོའི་ཁྲིད་དེ་ལ་ཟབ་པ་ཀུ་སཱ་ལིའི་བཤད་ཚུལ་དང་རྒྱ་ཆེ་བ་པཎྜི་ཏའི་ལུགས་ཀྱི་བཤད་ཚུལ་རྣམ་པ་གཉིས་སུ་ཡོད་པ་ལས། སྙིང་ཐིག་མ་གཉིས་བུ་གཉིས་དེ་ནི་ཟབ་པ་ཀུ་སཱ་ལིའི་ལུགས་ཀྱི་བཤད་སྟངས་དང་། རྒྱ་ཆེ་བ་པཎྜི་ཏའི་ལུགས་ཀྱི་བཤད་སྟངས་ནི་ཡང་ཟབ་སྙིང་པོའི་རྒྱུད་ཆེན་བཅུ་བདུན། བཀའ་སྲུང་ནག་མོ་ཁྲོས་མའི་རྒྱུད་དང་བཅོ་བརྒྱད། ཀློང་གསལ་འབར་མའི་རྒྱུད་དང་བཅུ་དགུ་སྟེ་མ་ཡིག་དང་། རྒྱུད་དེ་དག་རྡོ་རྗེ་འཆང་གི་བཀའ་སོར་བཞག་ཏུ་བཤད་པ་མ་ཡིན་ཀྱང་རིག་འཛིན་སོ་སོའི་མན་ངག་གི་རྗེས་སུ་འབྲངས་ཏེ་བཤད་པ་ལ་བུ་ཡིག་ཅེས་ཡོངས་སུ་གྲགས་པ་སྟེ་གཉིས་ཀྱི་སྟེང་ནས་བཤད་དགོས་པ་རེད། རྒྱ་ཆེ་བ་པཎྜི་ཏའི་ལུགས་ཀྱི་བཤད་ཚུལ་དེ་བླ་མའི་གསུང་རྒྱུན་གྱིས་ཟུར་བརྒྱན་ཏེ་བཤད་ན། ཀུན་མཁྱེན་ཆོས་ཀྱི་རྒྱལ་པོ་ཀློང་ཆེན་རབ་འབྱམས་ཀྱི་མཛོད་ཆེན་བདུན་དང་ངལ་གསོ་སྐོར་གསུམ་ལ་སོགས་པས་ཇི་སྐད་བཤད་པ་ལྟ་བུས་བཤད་དགོས། དེ་ལྟར་པདྨ་ཀ་རའི་དགོངས་པ་དེ་གསལ་བར་བཀྲལ་བར་བྱེད་པ་ལ་གཙོ་བོ་ཕྱིས་སུ་གཏེར་སྟོན་བརྒྱ་རྩ་ལ་སོགས་པའི་བཀའ་སྲོལ་ལས་བྱུང་བ་ཚང་མ་རེད། དེ་ནས་རྗེ་འབངས་ཉེར་ལྔའི་ནང་ནས་ཀྱང་ཨོ་རྒྱན་རིན་པོ་ཆེའི་ཐུགས་ལ་ཧ་ཅང་འཕྲོད་པའི་སློབ་མ་གཙོ་བོ་གསུམ་ནི་མཁར་ཆེན་མཚོ་རྒྱལ་དང་། ཆོས་རྒྱལ་ཆེན་པོ་དང་། སྣ་ནམ་རྡོ་རྗེ་བདུད་འཇོམས་གསུམ་རེད། ཁྱད་པར་དུ་ཨོ་རྒྱན་རིན་པོ་ཆེའི་ཐུགས་ཡོངས་སུ་མཉེས་པར་བྱེད་པ་ལ་སྣ་ནམ་རྡོ་རྗེ་བདུད་འཇོམས་དེ་ཆོས་རྒྱལ་ཆེན་པོ་ལས་ཀྱང་ལྷག་པའི་སློབ་མ་མཆོག་ཏུ་གྱུར་པ་ཞིག་རེད། དེའི་དབང་གིས་སྣ་ནམ་གྱི་སྐུ་ཕྲེང་རིམ་བྱོན་རྣམས་ཀྱིས་གཏེར་ནས་བཏོན་པའི་རྫོགས་པ་ཆེན་པོ་ནི་གཞན་ལས་ཀྱང་ཁྱད་པར་འཕགས་པའི་ཟབ་པ་ཁ་ཚང་བ་ཞིག་ཡིན་ཏེ། དཔེར་ན་རིག་འཛིན་རྒོད་ཀྱི་ལྡེམ་འཕྲུ་ཅན་གྱི་ཀུན་བཟང་དགོངས་པ་ཟང་ཐལ་དང་། གཏེར་ཆེན་ལས་རབ་གླིང་པའི་ཡེ་ཤེས་ཐིག་ལེ་ལྟ་བུ་སོགས་རྫོགས་ཆེན་གྱི་ཆོས་དེ་དག་ཧ་ཅང་ཞལ་གསལ་ལ་བྱིན་རླབས་ཆེ་བ་ཤ་སྟག་ཡིན། དེ་ལ་ད་རེས་ཀྱི་སྐབས་སུ་འཆད་པར་བྱ་བའི་ཆོས་ཚུལ་དེ་ནི་གང་ཡིན་ཞེ་ན། དེ་དག་གི་ནང་ནས་པདྨ་ཀ་རའི་མན་ངག་གི་གནད་འདུས་པ་གཞིར་བཞག་གི་སྟེང་ནས་གཙོ་བོ་པཎྜི་ཏ་ཆེན་པོ་བི་མ་ལའི་བཀའ་སྲོལ་གྱི་རྗེས་སུ་འབྲངས་ཏེ་ལྕེ་བཙུན་སྙིང་ཏིག་འཆད་རྒྱུ་ཡིན། པཎྜི་ཏ་ཆེན་པོ་བི་མ་ལ་མི་ཏྲ་འདི་ཉིད་རྒྱ་ནག་རི་བོ་རྩེ་ལྔ་ལ་བྱོན་ནས་ལོ་ཉིས་བརྒྱ་བརྒྱད་ཅུ་གྱ་གཉིས་སོན་པའི་རྗེས་སུ་ལྕེ་བཙུན་ཆེན་པོ་འདི་ཉིད་མངོན་སུམ་དུ་རྗེས་སུ་བཟུང་ནས་དབང་ཁྲིད་མན་ངག་དང་བཅས་པ་ཐམས་ཅད་རྫོགས་པར་གནང་། དགུང་ལོ་བདུན་ཅུ་དོན་ལྔའི་བར་དུ་ལྕེ་བཙུན་སེང་གེ་དབང་ཕྱུག་ཅེས་བྱ་བར་གྲུབ་པ་མཐར་ཕྱིན་པ་མ་ཐོབ་ལ། དེ་རྗེས་གྲུབ་པ་ཐོབ་ཀྱང་སློབ་མ་མ་རྙེད་པར་ཡུན་རིང་ལུས་ཤིང་། ཁྱོན་དགུང་ལོ་བརྒྱ་དང་ཉི་ཤུ་རྩ་ལྔའི་བར་དུ་བཞུགས་པ་རེད། དེ་ནས་ལྕེ་བཙུན་སེང་གེ་དབང་ཕྱུག་ཁོང་ཡོངས་སུ་མྱ་ངན་ལས་འདས་པའི་རྗེས་སུ་འོད་ཀྱི་ཕུང་པོའི་དཀྱིལ་ན་སྐུ་མི་སྣང་བར་འོད་ཀྱི་རང་བཞིན་དུ་གྱུར། དེ་ནས་སླར་ཡང་མཁའ་འགྲོ་མ་དཔལ་གྱི་བློ་གྲོས་མ་ལ་སོགས་པས་གསོལ་བ་བཏབ་པའི་ངོར། འོད་ཕུང་གི་དཀྱིལ་ནས་ཁོང་གི་སྐུ་མངོན་སུམ་དུ་བསྟན་ནས་དེང་སང་གི་མན་ངག་འདི་ཉིད་བསྟན་པ་ཡིན། མན་ངག་འདི་ཉིད་ནི་མཁའ་འགྲོ་མ་རྣམས་ཀྱིས་གནས་སོ་སོ་རུ་ཁྱེར་སོང་ནས་རེ་ཞིག་ལ་མི་ཡུལ་དུ་མི་སྣང་བར་གྱུར། རྗེས་སུ་བཀའ་བབས་བདུན་གྱི་མངའ་བདག་འཇམ་དབྱངས་མཁྱེན་བརྩེ་དབང་པོས་སླར་ཡང་རྗེས་དྲན་གྱི་ཚུལ་གྱིས་ཆོས་འདི་ཉིད་གཏན་ལ་ཕབ་པ་ཡིན། གཞུང་དེ་ལ་མན་ངག་དུམ་བུ་གསུམ་ཡོད་པ་ལས་དུམ་བུ་དང་པོའི་ནང་དོན་གཙོ་བོ་ནི་རྒྱུད་མ་སྨིན་པ་སྨིན་པར་བྱེད་པའི་དབང་དང་། ལམ་དངོས་ཉམས་སུ་ལེན་ཐབས། ལམ་གྱི་ཆ་ལག་བཤད་པ་བཅས་གསུམ་དུ་གནས། དུམ་བུ་གཉིས་པ་ལམ་གྱི་རིམ་པ་ཆ་ཚང་བ་སྟེ་སྐྱབས་འགྲོ་སེམས་བསྐྱེད་ནས་དགེ་བསྔོ་ཤིས་བརྗོད་ཀྱི་བར་གྱི་ཆོ་གའི་ཡན་ལག་ཡོངས་སུ་རྫོགས་པ་ཞིག་བསྟན། དུམ་བུ་གསུམ་པ་ལ་སྔོན་འགྲོ་དང་། དངོས་གཞི་དང་། རྗེས་ཀྱི་རིམ་པ་སྟེ་རྣམ་པ་གསུམ་དུ་བཤད། སྔོན་འགྲོ་ལ་ནང་གསེས་ས་བཅད་གསུམ་དང་། དངོས་གཞི་ཀ་དག་ཁྲེགས་ཆོད་དེ་ལའང་ནང་གསེས་ས་བཅད་གསུམ། རྗེས་ལྷུན་གྲུབ་ཐོད་རྒལ་དེ་ལའང་ནང་གསེས་ས་བཅད་གསུམ་སྟེ་གསུམ་ཚན་གསུམ་གྱི་སྒོ་ནས་གཏན་ལ་ཕབ་ཡོད། དེས་ན་ཆོས་ཚན་འདིའི་མིང་ལ་ཡང་།^p51
ལྕེ་བཙུན་ཆེན་པོ་བི་མ་ལའི་ཟབ་ཐིག་དུམ་བུ་གསུམ་པ་བཞུགས་སོ། །^p53
ཞེས་ད་ལྟ་གཞུང་འདི་ཉིད་མཐར་ཆགས་སུ་འཆད་པར་འདོད་དེ། ཐོག་མར་མཆོད་པར་བརྗོད་པ་ནི།^p54
རང་བྱུང་རིག་པའི་ལྷ་ལ་ཕྱག་འཚལ་ལོ། །^p55
ཞེས་པ་དེའི་ཚིག་གི་དོན་ནི་རང་གི་སེམས་ཀྱི་ཆོས་ཉིད་ནི་རྒྱུ་ལས་མ་བྱུང་བའི་འབྲས་བུ། སེམས་ལས་མ་བྱུང་བའི་སངས་རྒྱས། ལུང་ལས་མ་བྱུང་བའི་མན་ངག་ཁྱད་པར་ཅན་དང་ལྡན་པ་ཡིན་པའི་ཕྱིར་ན་རང་བྱུང་རིག་པའི་ལྷ་ལ་རང་ངོ་ཤེས་པའི་སྒོ་ནས་ཕྱག་འཚལ་ལོ་ཞེས་གསུངས། དེ་ལ་ལེའུ་དང་པོའི་གཞུང་དངོས་ལ་ལོ་རྒྱུས་དང་མན་ངག་དངོས་བསྟན་པ་གཉིས་ལས། ཐོག་མའི་ལོ་རྒྱུས་དེ་ལའང་ལྕེ་བཙུན་ཆེན་པོས་ཆོས་འདི་ཇི་ལྟར་གསུངས་ཚུལ་དང་། རྗེས་སུ་འཇམ་དབྱངས་མཁྱེན་བརྩེ་དབང་པོ་ལ་བཀའ་ཇི་ལྟར་འབབ་ཚུལ་ཏེ་རྣམ་པ་གཉིས་ཡོད། དེ་ནི་དེ་རིང་སྔ་དྲོའི་དབང་གི་ལོ་རྒྱུས་ཀྱི་སྐབས་སུ་རྒྱ་ཆེར་གཏན་ལ་ཕབ་ཟིན་པས་སྐབས་འདིར་སྤྲོ་བར་མི་བྱ། གཉིས་པ་ལམ་ཉམས་སུ་ལེན་ཚུལ་གྱི་མན་ངག་ནི། འདིའི་ཆོས་ཚུལ་གྱི་བཀའ་སྲོལ་དེ་མན་ངག་དབང་གི་ལུགས་སུ་གདམས་པ་ཞེས་བྱ་བ་ཡིན་པའི་ཕྱིར་ན་ད་ནངས་བཤད་པའི་དབང་གི་དོན་དེ་མ་ལུས་པ་མཐར་ཆགས་སུ་མར་དགྲོལ་དགོས། དེ་ནས་དབང་བསྐུར་བའི་དུས་དང་གདམས་པ་ཉམས་སུ་ལེན་པའི་དུས་གང་ཡིན་ནའང་འདྲ་སྟེ། མདོར་ན་འཁོར་བའི་བྱ་བ་ཐམས་ཅད་ལ་ཞེན་ཆགས་མེད་པའི་ངེས་འབྱུང་གི་བློ་རྣམ་པར་དག་པ་ཞིག་ཐོག་མར་བསྐྱེད་དགོས། དེ་ལྟ་བུའི་ངེས་འབྱུང་གི་བློ་བསྐྱེད་པ་ལ་པད་འབྱུང་དང་བི་མ་ལའི་བཀའ་སྲོལ་གཉིས་ཀྱི་དབང་གིས་བཤད་ཚུལ་རྣམ་པ་གཉིས་ཡོད་པས། པདྨ་ཀ་རའི་བཤད་ཚུལ་གྱི་དབང་དུ་བྱས་ན། དལ་འབྱོར་རྙེད་པར་དཀའ་བ་དང་། འཆི་བ་མི་རྟག་པ་གཉིས་ལ་བསམ་སྟེ་ཚེ་འདིའི་སྣང་ཤས་ཀྱི་ཞེན་པ་ལྡོག་པར་བྱ་བ་དང་། ལས་རྒྱུ་འབྲས་དང་འཁོར་བའི་ཉེས་དམིགས་གཉིས་ལ་བསམ་སྟེ་ཕྱི་མའི་སྣང་ཤས་ཀྱི་ཞེན་པ་ལྡོག་པར་བྱེད་པ་སྟེ་བློ་ལྡོག་རྣམ་པ་བཞིས་གཞི་བཏིང་ནས་གཟོད་སྒོམ་པར་བྱེད་པ་ཡིན། བི་མ་ལ་མི་ཏྲའི་བཀའ་སྲོལ་འདི་ལ་ནི་རིན་པོ་ཆེ་ཟངས་ཡིག་ཅན་གྱི་དགོངས་པ་བཞིན་དུ་སེམས་སྦྱོང་བདུན་ལ་བརྟེན་ནས་བློ་སྦྱང་བར་བྱ་བ་ཡིན། དེའི་དགོངས་དོན་འགྲེལ་ཚུལ་ལ་ཀུན་མཁྱེན་ཆོས་ཀྱི་རྒྱལ་པོ་ཀློང་ཆེན་རབ་འབྱམས་ཀྱིས་བླ་མ་ཡང་ཏིག་ལས་བསྟན་པ་དང་། ད་སྐབས་ལྕེ་བཙུན་ཆེན་པོས་གསུངས་པའི་དུམ་བུ་གསུམ་པ་ལས་བསྟན་པ་གཉིས་ཀྱི་བཤད་སྟངས་ཅུང་མི་འདྲ་བ་ཡོད་ཀྱང་། ད་རེས་ཀྱི་སྐབས་སུ་བབ་པ་ནི་ལྕེ་བཙུན་ཆེན་པོའི་བཀའ་སྲོལ་གྱི་དབང་དུ་བྱས་ཏེ་འཆད་པ་ཡིན། དེ་གང་ཡིན་ན།^p56
༼༡ ༽ཁྲིད་རྐང་དང་པོ་ནི།^p58
འདི་ལྟར་འདུས་བྱས་ཐམས་ཅད་ནི་མི་རྟག་པ་སྟེ་ཆུའི་ལྦུ་བ་ལྟ་བུའོ༔^p59
ཞེས་ཐོག་མར་རྒྱུ་རྐྱེན་ལས་བྱུང་བའི་འདུས་བྱས་ཀྱི་ཆོས་ཤིག་ཡིན་ནས་བཟུང་སྟེ་རྣམ་པ་ཀུན་ཏུ་མི་རྟག་པའི་བདག་ཉིད་ཅན་ཞིག་ཡིན་ཏེ། ཕྱི་སྣོད་ཀྱི་འཇིག་རྟེན་ལ་བསམ་བློ་བཏང་ན། རི་རབ་གླིང་བཞི་གླིང་ཕྲན་ལྕགས་རི་མུ་ཁྱུད་དང་བཅས་པའི་བཀོད་པ་རྒྱ་ཆེ་ལ་སྲ་ཞིང་བརྟན་པ་འདི་ཉིད་ཀྱང་། ནམ་ཞིག་ན་མེ་བདུན་དང་ཆུ་གཅིག་གིས་ཡོངས་སུ་འཐོར་ཏེ་ནམ་མཁའ་སྟོང་པ་འབའ་ཞིག་ཏུ་གྱུར་པའི་དུས་སྐབས་ཀྱང་ཡོད་པའི་ཕྱིར་ན་དེ་ཡང་མི་རྟག་པ་ཡིན། ནང་བཅུད་ཀྱི་སེམས་ཅན་ལ་བསམ་ན་ཡང་མི་རྟག་པ་ཡིན་ཏེ། དཔེར་ན་སྔོན་འཛམ་བུ་གླིང་འདི་ལ་འཁོར་ལོས་བསྒྱུར་བའི་རྒྱལ་པོ་ཡང་དུ་མ་བྱོན། དེ་བཞིན་དུ་རྒྱ་གར་འཕགས་པའི་ཡུལ་དུ་ཡང་པཱ་ལ་རྣམ་གསུམ། ཙནྡྲ་སོ་བདུན་ལ་སོགས་པ་ཆེས་ཤིན་ཏུ་མང་པོ་ཞིག་བྱུང་བ་ཡིན་ལ། དེ་ཐམས་ཅད་ཀུན་ཀྱང་ད་ལྟ་མིང་ཙམ་ལས་མེད་པ་ཡིན་པས། སྐྱེ་དགུའི་བདག་པོ་ཡང་མི་རྟག་པའི་རང་བཞིན་ཅན་ཡིན། དམ་པའི་སྐྱེས་བུ་ལ་བསམ་བློ་བཏང་ན། སྔོན་གྱི་དུས་སུ་བྱོན་པའི་སངས་རྒྱས་འཁོར་བ་འཇིག་དང་། གསེར་ཐུབ་དང་། འོད་སྲུང་ལ་སོགས་པ་ཡང་ཡོངས་སུ་མྱ་ངན་ལས་འདས་པ་དང་། མ་ཟད་བདག་ཅག་གི་སྟོན་པ་ཐབས་མཁས་ལ་ཐུགས་རྗེ་ཆེན་པོ་དང་ལྡན་པ་འདི་ཉིད་དང་། འཁོར་བྱང་ཆུབ་སེམས་དཔའ་ཉན་ཐོས་རང་རྒྱལ་གྱི་ཚོགས་བསམ་གྱིས་མི་ཁྱབ་པ་དང་བཅས་པ་ཐམས་ཅད་ཀུན་ཀྱང་ད་ལྟ་རིམ་པ་བཞིན་དུ་ཡོངས་སུ་མྱ་ངན་ལས་འདས་ཏེ་བསྟན་པའི་ལྷག་འཕྲོ་ཙམ་དུ་གྱུར་པས། དམ་པའི་སྐྱེས་བུ་ཡང་མི་རྟག་པ་ཡིན། དུས་ཀྱི་འཕོ་འགྱུར་ལ་བསམ་ན་ཡང་མི་རྟག་པ་ཡིན་ཏེ། སྔོན་བསྐལ་པ་དང་པོའི་དུས་སུ་རྫོགས་ལྡན་དང་། དེ་ནས་ཉིས་ལྡན། སུམ་ལྡན། རྩོད་ལྡན་ལ་སོགས་པ་ཡང་རིམ་གྱིས་བྱུང་སྟེ་མི་རྟག་པར་གྱུར་པ་དང་། ད་ལྟའི་གནས་སྐབས་ན་ཡང་དུས་བཞིའི་འཕོ་འགྱུར་དབྱར་རྗེས་སུ་སྟོན་དང་། སྟོན་རྗེས་སུ་དགུན། དགུན་རྗེས་སུ་དཔྱིད་མཐུད་དེ་རིམ་བཞིན་འབྱུང་བས་ཀྱང་མི་རྟག་པ་ཡིན། ཁྱད་པར་དུ་ད་ནངས་དང་ད་ལྟ། དོ་དགོང་། ནམ་གུང་གི་དུས་ཚོད་བཞི་པོ་ཡང་མི་རྟག དེ་ལས་ཀྱང་ཆེས་མྱུར་བ་ནི་ཆོས་ཐམས་ཅད་སྐད་ཅིག་རེ་རེ་བཞིན་དུ་འགྱུར་འགྲོ་བའི་བདག་ཉིད་ཅན་ཡིན་པས་མི་རྟག་པ་ཡིན། དེ་དག་དཔེར་བྱས་ནས་ཕྱི་སྣོད་ནང་བཅུད་ཐམས་ཅད་ཀྱང་མི་རྟག་པ་ཡིན་ན། རང་གི་ལུས་འདི་ལ་རྟག་པ་དང་བརྟན་པ་རྩ་བ་ནས་ཡོད་རྒྱུ་མ་རེད། དེའི་ཕྱིར་ན་མྱུར་དུ་དགེ་བ་བསྒྲུབ་དགོས་རྒྱུ་རེད་སྙམ་པའི་དམ་བཅའ་ནན་མོ་ཞིག་རང་གི་རྒྱུད་ལ་སྐྱེད། ཁྱད་པར་དུ་དཔེ་ཅན་རང་ལུས་ལ་སྦྱར་ཏེ་མི་རྟག་པ་བསྒོམ་དགོས། རང་ཉིད་ལ་སྦྱར་ཏེ་བསྒོམ་ཚུལ་དེ་ལ་ནི་ངེས་པར་འཆི་བ་དང་། ནམ་འཆི་ཆ་མེད། འཆི་ཚེ་ཆོས་མིན་པ་གང་གིས་ཀྱང་མི་ཕན་པའི་ཚུལ་རྣམ་པ་གསུམ་ལ་བསམ་སྟེ་མི་རྟག་པ་བསྒོམ་དགོས། ངེས་པར་འཆི་བ་ཞེས་བྱ་བ་ནི། ད་ལྟ་ས་སྟེང་ལ་འཁོད་པའི་སྐྱེ་བོ་འདི་དག་གཅིག་ཀྱང་མ་ལྷག་པར་ངེས་པར་འཆི་དགོས། དེ་ནི་ཆོས་ལུགས་སྨྲ་བ་དང་ཚན་རིག་སྨྲ་བ་ཐམས་ཅད་ཀྱིས་དེ་ལྟར་དུ་ཤེས་པ་སྨོས་ཅི་དགོས། མི་རང་ག་བའི་ལུས་རྟེན་དུ་གྱུར་བ་ཞིག་གིས་ཐད་ཀར་བལྟས་ན་ཡང་ངེས་པར་འཆི་འགྲོ་རྒྱུ་རེད་སྙམ་པ་ལ་མི་ཤེས་རྒྱུ་ཆེན་པོ་ཞིག་མེད། ཁྱད་པར་དུ་ནམ་འཆི་ཆ་མེད་དེ་བསྒོམ་དགོས། ནམ་འཆི་ཆ་མེད་ཟེར་བ་དེ་ནི། འུ་ཅག་ཁྱིམ་འདི་ན་འཚོགས་པ་ཐམས་ཅད་སུ་ཡིན་ཡང་ངེས་པར་འཆི་རྒྱུ་རེད་སྙམ་པའི་བློ་དེ་རྒྱུད་ལ་སྐྱེ་དགོས། དེ་མ་སྐྱེས་ན་ཆོས་རྣམ་དག་མི་འགྲུབ་ཅིང་། ཚེ་འདིའི་བྱ་བ་འབའ་ཞིག་ལ་གཡེང་འདུག་པའང་དེ་ལ་ཐུག་པ་ཡིན། དེ་བཞིན་སྔ་ཕྱིར་འབྱུང་བའི་སྐྱེ་བོ་ལ་བསམ་ན་ཡང་ནམ་འཆི་ཆ་མེད་ཡིན་ཏེ། སྔོན་ཆད་ལོ་བརྒྱའི་གོང་རོལ་གྱི་སྐྱེ་བོ་རྣམས་ཀྱང་ད་ལྟ་འཛམ་གླིང་གི་ཁྱོན་ན་རེ་རེ་གཉིས་རེ་ཙམ་མ་གཏོགས་ཚང་མ་ཤི་ཚར་བ་ཡིན་པས་རང་ཉིད་ལའང་རྟག་པ་མེད། སྤྱིར་འཛམ་བུ་གླིང་གི་མི་འདི་རྣམས་ད་ལྟ་ནས་ལོ་བརྒྱ་སོང་བའི་རྗེས་སུ་གསོན་པོར་ཡོད་མཁན་གཅིག་གཉིས་ཙམ་ལས་མེད་ཅིང་། འུ་ཅག་ད་ལྟ་ཚོགས་ཁང་ནང་ཡོད་པའི་མི་ཕལ་ཆེར་ཐམས་ཅད་འཆི་ངེས་པ་ཡིན། དེ་བས་རང་གཞོན་པའི་དུས་ཀྱི་ཉེ་འབྲེལ་དང་ངོ་ཤེས་ཐམས་ཅད་ད་ལྟ་ཕལ་ཆེར་འཇིག་རྟེན་ཕྱི་མའི་ཡུལ་དུ་སོང་ཟིན་པ་ལ་བསམ་བློ་བཏང་ན། རང་ཡང་ངེས་པར་དུ་འཆི་ཞིང་མྱུར་བ་ཉིད་དུ་འཆི་བའི་ཆོས་ཅན་ཞིག་ཡིན། མ་ཟད་རང་རེ་ཁྱིམ་གང་བོའི་མི་འདི་ལ་དཔེར་མཚོན་ན་ཡང་སང་ཕོད་ད་ཚོད་ཀྱི་གནས་སྐབས་ན་གསོན་པོར་ཡོད་ཟེར་དགོས་ན་ཆེས་དཀའ་བས་མང་པོ་ཞིག་ཤི་སོང་ཤས་ཆེ། འཆི་རྒྱུ་དེ་ཡང་རྒས་པོ་ཤ་སྟག་འཆི་རྒྱུའི་ངེས་པ་མེད་ཅིང་། དར་མ་དང་གཞོན་པ་སུ་འཆི་བའི་ངེས་པའང་མེད། དེའི་ནང་གི་འདི་འཆི་རྒྱུ་ཡིན་དང་འདི་འཆི་རྒྱུ་མ་ཡིན་ཟེར་ནས་ཁ་ཚོན་གཅད་དཀའ་མོ་ཡིན། དེའི་ཕྱིར་ན་རང་ཡང་སང་ཕོད་ད་ཚོད་འཆི་རྒྱུའི་མི་རྣམས་ཀྱི་གྲལ་ན་ཡོད་རྒྱུ་ཨེ་ཡིན་ཟེར་ན། དེ་ཡོད་རྒྱུ་མ་རེད་ཟེར་ནས་ཁ་ཚོན་གཅད་དཀའ་མོ་རེད། དེས་ན་ཚེ་ཕྱི་མ་ནི་རྒྱང་རིང་པོ་ཞིག་མ་ཡིན། རང་ཉིད་ཀྱང་ངེས་པར་འཆི་བའི་བདག་ཉིད་ཅན་ཞིག་ཡིན། དེར་མ་ཟད་ཟླ་བ་ཕྱི་མའམ་སང་ཉིན་གྱི་གནས་སྐབས་ན་ཤི་ཡོད་རྒྱུ་མ་རེད་ཟེར་ནས་སུས་ཀྱང་ཁ་ཚོན་གཅོད་མི་ཐུབ་པས་འཆི་བ་དེ་ཤིན་ཏུ་ཐག་ཉེ་མོ་ཞིག་ཡིན། འཆི་ཚེ་ཆོས་མིན་པ་གང་གིས་ཀྱང་མི་ཕན་ཞེས་པ་ནི། ཤི་བའི་གནས་སྐབས་ན་རྒྱུ་རྫས་ལོངས་སྤྱོད་དང་། ཐོབ་མངའ་ཐང་། དེ་བཞིན་དུ་རིགས་དང་གཟུགས་ལ་སོགས་པ་གང་གིས་ཀྱང་ཕན་པ་མེད། དེ་ཡང་ཐོབ་མངའ་ཐང་ལ་བསམ་བློ་བཏང་ན། འཛམ་བུ་གླིང་ལ་དབང་བྱེད་པའི་རྒྱལ་པོ་ཆེན་པོ་ཡིན་ཡང་འཆི་བའི་གནས་སྐབས་ན་རང་ཉིད་གཅིག་པུར་ཚེ་ཕྱི་མའི་ཡུལ་དུ་འགྲོ་བ་མ་གཏོགས་མི་གཅིག་ཀྱང་འཁྲིད་དབང་མེད། རྒྱུ་རྫས་ལོངས་སྤྱོད་ལ་བསམ་བློ་བཏང་ན། སའི་སྟེང་གི་དཔལ་འབྱོར་ལོངས་སྤྱོད་ཚང་མ་མི་གཅིག་ལ་དབང་ཡང་འཆི་བའི་གནས་སྐབས་ན་ཟས་ཁམ་གཅིག་ཀྱང་འཁྱེར་དབང་མེད་པར་ཤུལ་དུ་བསྐྱུར་དགོས། དེ་བཞིན་རིགས་མཐོ་བ་དང་གཟུགས་བཟང་བ་ལ་སོགས་པ་ཐམས་ཅད་ཀྱང་འཆི་བའི་གནས་སྐབས་ན་རྗེས་སུ་མི་འབྲང་བར་རང་ཉིད་ལས་དགེ་སྡིག་གི་རྗེས་སུ་འབྲང་ནས་འཇིག་རྟེན་ཕ་རོལ་ཏུ་འགྲོ་དགོས་པས། དེའི་ཚེ་ཕན་ངེས་པ་དགེ་བ་ཡང་དག་དང་གནོད་ངེས་པ་སྡིག་པ་མི་དགེ་བ་ཡིན་ཕྱིན། ད་ལྟ་རང་ཉིད་ལ་རང་དབང་ཡོད་པའི་གནས་སྐབས་ན་དགེ་སྒྲུབ་སྡིག་སྤོང་ལ་ཅི་ནུས་སུ་འབད་པར་བྱེད་རིགས་པས་སེམས་ཀྱིས་དམ་བཅའ་བ་དང་། ལུས་ངག་གིས་ཀྱང་དེ་ལྟར་བསྒྲུབ་དགོས་པ་ཡིན།^p60
༼༢ ༽ཁྲིད་རྐང་གཉིས་པ་ནི།^p62
འཁོར་བའི་བདེ་བ་ཐམས་ཅད་ནི་འཕྲལ་བདེ་བ་ལྟར་སྣང་ཡང་དོན་ལ་སྡུག་བསྔལ་ཏེ་དུག་གི་འབྲས་བུ་སྨིན་པ་ལྟ་བུའོ༔^p63
ཞེས་འཁོར་བའི་གནས་འདི་ན་བདེ་བ་དང་ཡིད་དུ་འོང་བའི་དངོས་པོ་ཅི་ཡོད་ཐམས་ཅད་འཕྲལ་དུ་བདེ་མོ་སྐྱིད་པོ་ཡིན་པ་ལྟར་སྣང་ཡང་། མཐར་གཏུགས་ན་འཁོར་བའི་གནས་སུ་སྡུག་བསྔལ་སྐྱེད་བྱེད་ཅིག་མ་གཏོགས་གཅིག་ཀྱང་མེད་པས། དཔེར་ན་དུག་གི་རོ་དེ་ཟ་བའི་གནས་སྐབས་ན་མངར་བོ་ཡིན་ཡང་། ཟོས་པའི་རྗེས་སུ་སྲོག་འཕྲོག་པར་བྱེད་པ་ལས་ཕན་པ་ཅུང་ཟད་ཀྱང་མེད་པ་བཞིན། འཁོར་བའི་བདེ་བའང་དུག་ཟོས་པ་ལྟ་བུ་ཡིན་པས་ད་ལྟའི་བདེ་དགེ་ལོངས་སྤྱོད་ལ་སོགས་པ་ལ་ཞེན་ཅིང་ཆགས་ནས་མི་དགེ་བའི་ལས་བྱས་ན། ཕྱི་མར་སྡུག་བསྔལ་མུ་མཐའ་མེད་པ་འབྱུང་བར་འགྱུར་བའི་ཕྱིར་ན་དུག་གི་འབྲས་བུ་སྨིན་པ་ལྟ་བུར་གསུངས་པ་ཡིན།^p64
༼༣ ༽ཁྲིད་རྐང་གསུམ་པ་ནི།^p65
རྐྱེན་སྣ་ཚོགས་པ་ཐམས་ཅད་ནི་ཟིན་པའི་དུས་མེད་པ་སྟེ་སྨིག་རྒྱུའི་ཆུ་ལ་སྙེགས་པ་ལྟ་བུའོ༔^p66
ཞེས་རང་རེས་བདེ་བ་འབྱུང་བའི་དོན་དུ་འབད་པ་སྣ་ཚོགས་བྱེད། སྡུག་བསྔལ་མི་འབྱུང་བའི་ཐབས་སུ་ཡང་འབད་པ་རྣམ་པ་སྣ་ཚོགས་བྱས། དེ་བཞིན་དུ་ཁ་ལ་ཟ་རྒྱུ་དང་། རྒྱབ་ལ་གོན་རྒྱུ། རྒྱུ་རྫས་ལོངས་སྤྱོད་རྒྱ་ཆེན་པོ་འཐོབ་པའི་དོན་དུ་འབད་བརྩོན་བྱེད་པ་དེ་དག་ལའང་སྙིང་པོ་མེད་དེ། དཔེར་ན་རི་དྭགས་སྐོམ་ཚད་ཀྱིས་གདུང་ནས་སྨིག་རྒྱུའི་ཆུ་ལ་ཆུ་དངོས་སུ་ཞེན་ནས་དེའི་རྗེས་སུ་བསྙེགས་ཀྱང་ཆུ་ལག་ཏུ་ཐོབ་པ་མེད་པ་དང་འདྲ་བས་འདི་ནི་ཧ་ཅང་གོ་དགོས་པའི་གནད་ཅིག་ཡིན། ཚེ་འདིའི་བདེ་འབྱོར་སྙན་གྲགས་ཐམས་ཅད་ཀུན་ཀྱང་མི་རྟག་པའི་རང་བཞིན་ཅན་ཡིན་པའི་ཕྱིར་ན་སྙིང་པོ་མེད་ཅིང་འདི་ལ་ཞེན་པ་སྤང་དགོས་ཏེ། དཔེར་ན་ན་ནིང་གི་དུས་སུ་རྒྱུ་རྫས་ལོངས་སྤྱོད་ལ་སོགས་པ་ཧ་ཅང་ཕུན་སུམ་ཚོགས་པ་ཡོད་ཀྱང་ད་ལོའི་གནས་སྐབས་ན་སྤྲང་པོར་གྱུར་སོང་བ་ཡང་མང་པོ་ཡོད། ན་ནིང་གི་གནས་སྐབས་སུ་ཤིན་ཏུ་ཉམ་ཐག་པའི་གང་ཟག་རྣམས་ཀྱང་ད་ལོ་དཔལ་འབྱོར་ལ་སོགས་པ་ཕུན་སུམ་ཚོགས་པར་གྱུར་བ་ཡང་ཡོད། དེའི་ཕྱིར་ན་དཔལ་འབྱོར་ལ་སོགས་པ་བཟང་པོ་ཡོད་པས་དགའ་རྒྱུ་དང་། ངན་པ་ཡིན་པས་སྡུག་རྒྱུ་མེད་པར་ཐམས་ཅད་མི་རྟག་པའི་རང་བཞིན་ཅན་དུ་ཤེས་དགོས། ཁྱད་པར་དུ་དཔལ་འབྱོར་ལོངས་སྤྱད་ནུས་མི་ནུས་ལ་བརྟག་ཚེ། དཔེར་ན་ད་སྐབས་རང་རེའི་མི་གཅིག་ལ་ཨ་སྒོར་དུང་ཕྱུར་མང་པོ་ཡོད་པ་དང་། གཅིག་ལ་ཨ་སྒོར་ཁྲི་ཕྲག་གཅིག་ལས་མེད་པ་གཉིས་ཀས་ཀྱང་ཁ་ལ་ཟ་རྒྱུ་དང་རྒྱབ་ལ་གོན་རྒྱུ། སྡོད་གནས་ལ་སོགས་པ་ཙམ་ལས་གཞན་ལོངས་སུ་སྤྱོད་ས་ཆེར་མེད། དེའི་ཕྱིར་ན་དུང་ཕྱུར་མང་པོ་ཡོད་ཀྱང་གྲངས་ཀ་ཙམ་ལས་དགོས་པ་ཆེན་པོ་མི་འགྲུབ་པས་དེར་བསྙེགས་པ་ལ་དོན་སྙིང་དེ་ཙམ་མེད་པ་ཡིན། འཁོར་བའི་བདེ་བ་དེ་དག་ཇི་ལྟར་བསྒྲུབས་ཀྱང་མཐར་འགྲུབ་པར་མི་ནུས་པའི་བདག་ཉིད་ཅན་ཞིག་ཡིན། ས་སྟེང་གི་མི་ཞིག་ཡིན་ནས་བཟུང་སྟེ་ཐམས་ཅད་ཀྱིས་ཟས་གོས་ལོངས་སྤྱོད་ཀྱི་ཆེད་དུ་ཉིན་མཚན་བར་མེད་དུ་འབད་བརྩོན་བྱེད་ཀྱིན་ཡོད་མོད། ཁོ་རང་ལ་སྔོན་བསགས་ཀྱི་བསོད་ནམས་ཤིག་ཡོད་ན་རང་ཤུགས་ཀྱིས་འགྲུབ་ཡོང་ལ། དེ་མེད་ན་ཇི་ལྟར་འབད་ཀྱང་དབུལ་བོའི་གོ་ས་ལས་གཞན་དུ་འཕར་མི་ཐུབ་པས། འབད་པ་ཐམས་ཅད་དོན་མེད་ཡིན་པར་གསུངས།^p67
༼༤ ༽ ཁྲིད་རྐང་བཞི་པ་ནི།^p68
ཚེ་འདིའི་བྱ་བ་ཐམས་ཅད་ནི་རྣམ་པ་ཀུན་ཏུ་དོན་མེད་པ་སྟེ་གཉིད་ཐུན་གཅིག་གི་རྨི་ལམ་བཟང་ངན་ལྟ་བུའོ༔^p69
ཞེས་ཚེ་འདིའི་དགྲ་འདུལ་གཉེན་སྐྱོང་ཚོང་ཁེ་སོ་ནམ་ལ་སོགས་པའི་བྱ་བ་སྣ་ཚོགས་བསྒྲུབ་རྒྱུ་དེ་ནི་དོན་མེད་པ་སྟེ། དཔེར་ན་གཉིད་ཐུན་གཅིག་གི་རྨི་ལམ་གྱི་སྣང་བ་འདྲ་བར་གསུངས་པ་ཡིན། དེ་ཡང་རྨི་ལམ་དང་འདྲ་ཚུལ་ནི། ངེད་ཅག་སྐྱེས་ནས་ད་ལྟའི་བར་དུ། མི་འགའ་ཞིག་ལ་བདེ་མོ་དང་སྐྱིད་པོ་བྱུང་ཡོད། མི་ཁ་ཤས་ལ་ནི་སྡུག་བསྔལ་དང་མི་འདོད་པ་རྣམ་པ་སྣ་ཚོགས་བྱུང་ཡོད། དེ་དག་ཐམས་ཅད་ལ་ད་ལྟ་བསམ་བློ་བཏང་ན། མདང་སུམ་རྨི་ལམ་གྱི་སྐབས་སུ་བདེ་སྡུག་མྱོང་བ་དང་ཁྱད་པར་མེད་དེ། མདང་སུམ་རྨི་ལམ་སྐབས་ཀྱི་སྡུག་བསྔལ་དང་བདེ་བ་དེའང་ད་ལྟ་དྲན་པའི་ཡུལ་ཙམ་ལས་ཅི་ཡང་མེད། སྐྱེས་ནས་ད་ལ་མ་ཐུག་གི་བར་དུ་མྱོང་བའི་མི་ཚེ་ཡི་བདེ་བ་དང་སྡུག་བསྔལ་ཐམས་ཅད་ཅི་ཡང་མ་གྲུབ་པས་ཁྱད་པར་ཅུང་ཟད་ཀྱང་མེད་པ་ཡིན། དེ་བཞིན་དུ་ཕྱིན་ཆད་འབྱུང་བའི་བདེ་བ་དང་སྡུག་བསྔལ་ཐམས་ཅད་ཀྱང་སང་ནུབ་རྨི་རྒྱུའི་རྨི་ལམ་གྱི་སྣང་བ་དེ་དང་ཁྱད་ཡོད་པ་མིན། གཉིས་ཀ་ཡང་ཐད་ཀར་ཡོད་ཡོད་ལྟར་དུ་འདྲ་ཡང་དོན་ལ་རང་རང་འགག་པའི་རྗེས་ཐོག་དེ་མ་ཐག་ཏུ་དྲན་པའི་ཡུལ་ཙམ་མ་གཏོགས་ཅི་ཡང་མེད་པའི་བདག་ཉིད་ཅན་ཞིག་ཡིན་པས་དེ་ལྟར་གསུངས།^p70
༼༥ ༽ ཁྲིད་རྐང་ལྔ་པ་ནི།^p71
ཐར་བ་དམ་པའི་འབྲས་བུ་ནི་ནམ་ཡང་སྡུག་བསྔལ་བར་མི་ལྡོག་སྟེ། འབྲུམ་ནད་བྱང་བའི་སྐྱེས་བུ་ལྟ་བུའོ༔^p72
ཞེས་འཁོར་བའི་བདེ་བ་དང་སྙན་གྲགས་སོགས་གང་ལ་ཡང་སྙིང་པོ་མེད། འོ་ན་སྙིང་པོ་ཅན་གྱི་ཆོས་ཤིག་བསྒྲུབ་རྒྱུ་ཡོད་དམ་ཞེ་ན། ཐར་བའི་འབྲས་བུ་སངས་རྒྱས་དང་བྱང་ཆུབ་སེམས་དཔའི་གོ་འཕང་ཐོབ་ན་དེའི་བདེ་བ་དེ་ལ་འགྱུར་བ་མེད་ཅིང་། གཏན་དུ་སྡུག་བསྔལ་དང་བྲལ་བ་ཡིན། དཔེར་ན་འབྲུམ་བུའི་ནད་ཅེས་རིམས་ནད་ཅིག་ཡོད་པ་དེ་ལན་གཅིག་ཕོག་ནས་དྲག་སོང་ན། ཕྱིན་ཆད་ལུས་རྟེན་འདིའི་སྟེང་ལ་ཕོག་མི་སྲིད་པ་བཞིན་དུ། ཐར་བ་ཐོབ་ཚར་ནས་བཟུང་སྟེ་སྡུག་བསྔལ་རྩ་བ་ནས་མེད་པས་དུས་མྱུར་བ་ཉིད་དུ་ཐར་བ་བསྒྲུབ་པའི་ཐབས་ལ་འབད་དགོས་གསུངས།^p73
༼ ༦ ༽ཁྲིད་རྐང་དྲུག་པ་ནི།^p75
བླ་མ་དམ་པའི་གདམས་ངག་ནི་ཐར་པའི་ཁང་བཟང་དུ་འཛེག་པའི་ལམ་སྟེ་ཐེམ་སྐས་བཟང་པོ་ལྟ་བུའོ༔^p76
ཞེས་དེ་ལྟ་བུའི་འཁོར་བ་སྤང་ཚུལ་དང་ཐར་བ་ཐོབ་ཚུལ་དེ་རང་སྟོབས་ཀྱིས་ཤེས་མི་ཐུབ་པས། བླ་མ་དམ་པའི་གདམས་ངག་ལ་བརྟེན་དགོས་པ་ཡིན། དཔེར་ན་མཁར་ཐོག་བརྩེགས་མང་པོའི་ཡང་སྟེང་དུ་འགྲོ་དགོས་དུས། གློག་སྐས་དང་ཐེམ་སྐས་ལ་སོགས་པ་གང་ཡང་མེད་ན་རང་སྟོབས་ཀྱིས་འགྲོ་མི་ནུས་པ་བཞིན་དུ། བླ་མ་དམ་པའི་གདམས་ངག་གཏན་ནས་མེད་ན་སངས་རྒྱས་ཀྱི་བཀའ་ལ་སོགས་པ་ཡོད་དུ་ཟིན་ཀྱང་དེ་རང་སྟོབས་ཀྱིས་ཤེས་པར་ནུས་པ་མ་ཡིན། དེའི་ཕྱིར་ན་བླ་མའི་གདམས་ངག་དེ་ཤིན་ཏུ་གལ་ཆེ་བ་ཡིན། གལ་ཏེ་བླ་མ་དམ་པ་མེད་ན་རང་རེ་མི་ཚང་མས་ཀྱང་དགེ་བ་བསྒྲུབ་མི་ཤེས། སྡིག་པ་སྤང་མི་ཤེས། རང་གར་ཅི་བྱ་གཏོལ་མེད་ཀྱི་ངང་དུ་རྟ་དང་བ་ལང་ལྟ་བུའི་གང་ཟག་འབའ་ཞིག་ཏུ་འགྱུར་བ་ཡིན། བླ་མ་དམ་པས་རྗེས་སུ་བཟུང་ན་རང་ཉིད་ཚེ་འདིར་བདེ་མོ་སྐྱིད་པོ་ཡོང་ཐབས་དང་། ཕྱི་མར་ཡང་བདེ་ནས་བདེ་བར་འགྲོ་བའི་ཐབས་ཁྱད་པར་ཅན་ལྡན་པར་བྱེད་པས། བླ་མ་ཞེས་པ་དེ་ནི་ཡིད་བཞིན་གྱི་ནོར་བུ་འབུམ་གྱིས་ཀྱང་འགྲན་དུ་མེད་པས་ཤིན་ཏུ་རྙེད་པར་དཀའ་བ་ཞིག་ཡིན། བླ་མ་དེ་མཉེས་པའི་ཕྱིར་དུ་བསྟེན་ཚུལ་རྣམ་པ་གསུམ་ཡོད་དེ། དགེ་བ་བསྒྲུབས་སྡིག་པ་སྤངས། ཚེ་འདིའི་ཞེན་པ་དོར་ཏེ་ཕྱི་མའི་བདེ་འབྲས་འབའ་ཞིག་དོན་དུ་གཉེར་བའི་སྒོ་ནས་བླ་མའི་ཐུགས་མཉེས་པར་བྱེད་པ་ནི་བླ་མ་བསྟེན་ཚུལ་རབ་བམ་ཨང་དང་པོ་ཡིན། བླ་མ་དམ་པས་ཇི་ལྟར་གསུངས་པའི་བཀའ་བཞིན་བསྒྲུབས་ནས། ཐ་ན་མངག་གཞུག་ཚུན་ཆད་ཀྱི་ལས་ཀ་དང་བྱ་བ་ཅི་ཡོད་དེ་ལ་རྩེ་གཅིག་ཏུ་འབད་ནས་ཞབས་ཞུ་བྱེད་པ་ནི་བླ་མ་བསྟེན་ཚུལ་འབྲིང་པོ་ཡིན། རང་ལ་རྒྱུ་རྫས་གང་ཡོད་ཐམས་ཅད་བླ་མ་དང་ཆོས་ཚོགས། བླ་མས་ལྷ་སྐུ་རྟེན་བཞེངས་ལ་སོགས་པ་བྱེད་པའི་དགེ་བ་དང་བསྲེས་ནས་དབུལ་རྒྱུ་ནི་ཐ་མ་རྣམས་ཀྱིས་བླ་མ་བསྟེན་ཚུལ་ཡིན་པས། དེ་ཙམ་ཞིག་ནི་མེད་དུ་མི་རུང་བ་ཡིན། ངས་ཡང་བསྐྱར་དུ་བླ་མ་བསྟེན་ཚུལ་གསུམ་པོ་མདོར་བསྡུས་ཤིག་ཞུ། ཡིད་བཞིན་ནོར་བུ་ལྟ་བུའི་བླ་མ་དང་འཕྲད་ཡོད་པའི་གནས་སྐབས་ན། ཁྱེད་ཅག་གིས་རབ་ན་བླ་མའི་བཀའ་བཞིན་དུ་དགེ་སྒྲུབ་སྡིག་སྤོང་རྣམ་དག་ཅིག་གྱིས། དེ་མ་ནུས་ན། བླ་མས་གཙུག་ལག་ཁང་བཞེངས་བ་དང་། ལྷ་བྲི་རྟེན་བཞེངས་ལ་སོགས་པའི་ཞབས་ཞུ་བསྒྲུབ་རྒྱུ་དེར་ནན་ཏན་གྱིས། དེ་ཡང་མ་ནུས་ན། རང་ལ་འབྱོར་བ་གང་ཡོད་སེར་སྣ་མེད་པའི་སྒོ་ནས་བླ་མ་དང་ཆོས་ཚོགས། གཙུག་ལག་ཁང་གི་ཕྱོགས་སུ་ཡར་འབུལ་རྒྱུ་རེ་མ་འཆུགས། དེ་གསུམ་པོ་གང་ཡང་མེད་ན་མི་ལུས་ཐོབ་ནས་བླ་མར་འཕྲད་པ་ཡང་དོན་མེད་ཡིན། བླ་མ་དེ་ཡང་ང་འདྲ་བའི་གསར་དུ་ཐོན་པ་དང་། སྐྱོན་དང་ཡོན་ཏན་ལྡན་མིན་མི་ཤེས་པ་དག་ལ་དད་པ་དང་གུས་པ་འཇོག་སྔ་མ་བྱེད། ཁྱེད་རྣམས་དང་རྒྱུན་ལྡན་དུ་འགྲོགས་ཤིང་ཕན་ཐོགས་ནུས་པའི་རང་རང་སོ་སོའི་ཆོས་ཚོགས་ཀྱི་བླ་མ་དང་ས་གནས་འདི་ལ་འཁོད་པའི་བླ་མ་རྣམས་ལ་གུས་བཀུར་དང་ཞབས་ཞུ་རེ་སྒྲུབས་དང་དེ་དག་གིས་ཁྱེད་རྣམས་ལ་ཕན་པར་ངེས་པ་ཡིན་གསུངས།^p77
༼༧ ༽ཁྲིད་རྐང་བདུན་པ་ནི།^p78
རྣམ་པར་མི་རྟོག་པའི་བསམ་གཏན་ནི་ཏིང་ངེ་འཛིན་ཐམས་ཅད་སྐྱེ་བའི་གཞི་སྟེ་ཞིང་ས་དུལ་བ་ལྟ་བུའོ༔^p79
ཞེས་སངས་རྒྱས་དང་བྱང་ཆུབ་སེམས་དཔའི་ཐུགས་རྒྱུད་ཀྱི་ཏིང་ངེ་འཛིན་གྱི་ཡོན་ཏན་བསྐྱེད་པར་འདོད་ན། ཐོག་མར་རང་གི་སེམས་དེ་རང་དབང་དུ་གྱུར་ནས་རྩེ་གཅིག་ཏུ་གནས་པའི་བསམ་གཏན་འདི་ཁོ་ན་དགོས་པས་དེ་ལ་འབད་དགོས་པ་ཡིན། དེ་ཡན་ཆད་དུ་ཐུན་མོང་སེམས་སྦྱོང་བདུན་གྱི་དོན་ཁྲིད་བཤད་ཚར་བ་ཡིན། ད་ནངས་སྔ་དྲོར་ཁྱེད་རྣམ་པས་གཏན་ཁེལ་བྱས་པ་ནི་དུས་ཚོད་གཉིས་ཡིན་ཡང་། དབང་གི་ཆོ་ག་འདི་མཇུག་མ་རྫོགས་པར་ཆུ་ཚོད་ཕྱེད་ཙམ་ཞིག་ལ་འགྱངས་སོང་ཡང་བྱ་ཐབས་བྲལ་བས། རྣམ་པ་ཚོ་ལ་དགོངས་དག་ཞུ། ད་སྐབས་ཀྱི་ཆོས་ཁྲིད་འདི་དུས་ཚོད་གཉིས་ཏག་ཏག་ཏིག་ཏིག་གི་སྟེང་ནས་གྲོལ་རྒྱུ་ཡིན། དེ་རིང་ལས་ཀ་གཞན་ཅི་ཡང་མེད་པས་ཐམས་ཅད་ཀྱིས་དགའ་དགའ་སྤྲོ་སྤྲོ་གྱིས། ད་མར་ཁྱིམ་ལ་སོང་ནས་ཉལ་རན་སོང་བ་ཡིན། ༼དགོད་སྒྲ།༽^p80
ཟབ་ཆོས་རྣམ་གཉིས་ཉམས་སུ་ལེན་ཚུལ།^p81
ཕྱི་ཟླ་༧པའི་ཚེས་༡༡ཉིན། ཆོས་རྗེ་ཉིད་ཀྱིས་ཕུར་པ་མགུལ་ཁུག་མའི་དབང་གནང་ཞིང་། དབང་གི་སྐབས་སུ་འཕྲོས་དོན་གསུང་བ་འདི་ལྟར།^p83
དེ་ཡང་འཇམ་དཔལ་ཞི་སྒྲུབ་དང་ཕུར་བ་མགུལ་ཁུག་མ་གཉིས་ལ་བསམ་བློ་བཏང་ན། ད་དུང་ཡང་ཆོས་ཚན་འགའ་ཞིག་ཡོད་ཀྱང་། རྙིང་མའི་གཏེར་ཁ་གཞན་ལྟར་ཆོས་ཚན་མང་པོ་མེད་པར་ཧ་ཅང་ཉུང་ཉུང་ཡིན། འཇམ་དཔལ་ཞི་སྒྲུབ་ལྟ་བུ་ལ་མཚོན་ན། ནང་གསེས་ལམ་གྱི་རིམ་པ་ཆ་ཚང་བ་སྔོན་འགྲོ་ནས་བཟུང་སྟེ་དངོས་གཞིའི་བར་དུ་ལམ་ཉམས་སུ་བླང་བའི་ཐབས་ཏེ། ཕྱི་ལྟར་དུ་གདམས་ངག་དང་། ནང་ལྟར་དུ་ལུང་བསྟན། གསང་བ་ལྟར་དུ་མན་ངག་དང་སྦྱར་ནས་འཆད་དུ་རུང་། གཞན་ཡང་རྒྱུད་ཀྱིས་བཤད་པ་དང་། རྡོ་རྗེའི་ཚིག་བདུན་གྱིས་བཤད་པ། འགྲེལ་བཤད་སོགས་ཀྱང་ཡོད་པ་ཡིན།^p84
སྤྱིར་ང་རང་གིས་བརྩམས་པའི་ཆོས་མང་པོ་ཞིག་ནི་ལོ་ན་ཆུང་ངུའི་དུས་ནས་བརྩམས་པ་ཡིན། དེ་ཚང་མ་ཡང་རང་རང་སོ་སོ་སུས་བསྐུལ་བ་ཡིན་ན་དེ་ལ་གཏད་འཇོག་རྒྱུ་མ་གཏོགས། ང་རང་ཉིད་ཀྱིས་ཡི་གེ་ལ་བདག་པོ་བྱེད་པའི་སྲོལ་མེད། ཡིན་ན་ཡང་། སློབ་མ་ཁ་ཤས་ཀྱིས་ཉར་ཚགས་བྱས་ཡོད་པ་དེང་སང་ཕྱོགས་གཅིག་ཏུ་བསྡུས་ན་དུམ་པ་བཞི་ཙམ་གྱི་གྲངས་སུ་ལོངས་བར་འདུག དེ་དག་ནི་བོད་ཀྱི་སྔར་གྱི་ལག་རྩལ་དང་མཐུན་པར་ཤིང་པར་དུ་བརྐོས་པ་ད་ལྟའང་ཡོད་ཅིང་། རྒྱ་ནག་གི་འཕྲུལ་དཔར་ལ་བཀོད་པ་སོགས་ཀྱང་མང་པོ་ཡོད། དེའི་ནང་ནས་འཇམ་དཔལ་ཞི་སྒྲུབ་ཀྱི་སྐོར་འདི་ལ་ས་ཆའི་མིང་བཏགས་ནས། རྒྱ་ནག་གི་ཆོས་སྐོར་ཞེས་ད་ལྟ་ཡོངས་སུ་གྲགས་པ་ཡིན། ཕུར་པ་མགུལ་ཁུག་མ་འདི་ལ་ཡང་སྤྲོས་བཅས་ཀྱི་དུས་སུ་ཉེ་བར་མཁོ་བའི་བསྐང་བ་དང་། བཤགས་པ། གཞན་ཡང་བསྟན་རྒྱམ་རིན་པོ་ཆེ་དང་གནས་ཆུང་རྡོ་རྗེ་གྲགས་ལྡན་གྱིས་ཆེད་བསྐུལ་མཛད་པའི་ངོར་བརྩམས་པའི་བསྒྲལ་ལས་དང་མེ་མཆོད་ལ་སོགས་པའི་ཆོས་ཚན། འབྲུག་ཡུལ་སྤ་གྲོ་སྟག་ཚང་དུ་གཏན་ལ་ཕབ་པའི་གྲོ་ལོད་བདེ་གཤེགས་འདུས་པའི་ལུས་དཀྱིལ། རྒྱ་གར་གྱི་ཡུལ་དུ་བརྩམས་པའི་སྨོན་ལམ། དེ་དག་ཐམས་ཅད་ཕྱོགས་གཅིག་ཏུ་བསྡུས་པ་ལ་ད་ལྟ་འཕགས་ཡུལ་གྱི་ཆོས་སྐོར་ཞེས་ཡོངས་སུ་གྲགས་པ་ཡིན།^p85
དེས་ན་ད་རེས་ཀྱི་སྐབས་སུ་བབ་པ་ཡང་ཁྱེད་རྣམ་པས་འཕྲུལ་དཔར་དུ་བཀོད་ཡོད་པའི་འཇམ་དཔལ་ཞི་སྒྲུབ་གྱི་སྐོར་དང་ཕུར་པ་མགུལ་ཁུག་མའི་ལུང་བཏོན་ཟིན། དེ་ནས་ཆོས་འདི་གཉིས་ཉམས་སུ་ལེན་པའི་གནས་སྐབས་ན། མེད་དུ་མི་རུང་བའི་ཆ་རྐྱེན་རྣམ་པ་གསུམ་ཚང་དགོས་པ་ནི། དད་པ་དང་། སྙིང་རྗེ། སྟོང་ཉིད་རྟོགས་པའི་ལྟ་བ་བཅས་གསུམ་ཡིན།^p86
དང་པོ། སངས་རྒྱས་དཀོན་མཆོག་ལ་དམིགས་པའི་དང་བའི་དད་པ་དང་། ཆོས་དཀོན་མཆོག་ལ་དམིགས་པའི་འདོད་པའི་དད་པ། དགེ་འདུན་དཀོན་མཆོག་ལ་དམིགས་ནས་ཡིད་ཆེས་པའི་དད་པ་སྟེ་གསུམ་ནི་མེད་དུ་མི་རུང་བ་ཡིན།^p88
གཉིས་པ། སྡུག་བསྔལ་མུ་མཐའ་མེད་པ་ལ་སྤྱོད་པའི་སེམས་ཅན་ཐམས་ཅད་སྡུག་བསྔལ་དང་འབྲལ་བར་འདོད་པའི་སྙིང་རྗེ་ཁྱད་པར་ཅན་ཞིག་ཡོད་དགོས།^p89
གསུམ་པ། བསྐྱེད་རིམ་དང་། རྫོགས་རིམ། རྫོགས་པ་ཆེན་པོའི་ལམ་གང་ཉམས་སུ་བླངས་ཀྱང་། མཐའ་ཀུན་དང་བྲལ་བའི་སྟོང་ཉིད་རྟོགས་པའི་ལྟ་བ་རྨད་དུ་བྱུང་བ་ཞིག་ཡོད་དགོས་པ་ཡིན། ཆ་རྐྱེན་དེ་གསུམ་དང་ལྡན་པའི་སྒོ་ནས་དངོས་གཞིའི་དུས་སུ་ཀ་དག་ཁྲེགས་ཆོད་ཀྱི་ལྟ་བ་དང་། ལྷུན་གྲུབ་ཐོད་རྒལ་གྱི་བསྒོམ་པའི་རྩལ་ཕྱུང་སྟེ། འཇམ་དཔལ་ཞི་སྒྲུབ་དང་ཕུར་བ་མགུལ་ཁུག་མ་གཉིས་ཀྱི་ཆོ་ག་འདི་འདོན་དགོས།^p90
དེ་ནས་ཆོ་ག་འདི་གཉིས་ལ་ཡང་ནང་གསེས་རྒྱུ་མཚན་རྣམ་པ་གསུམ་ཚང་དགོས་པ་རེད། དེ་གང་ཡིན་ན། གཙོ་བོར་ཁུངས་རྒྱུད་སྡེ་དང་མཐུན་པ་ཞིག་དགོས། རྒྱུད་དེ་ཉིད་སྒྲུབ་ཐབས་དང་འབྲེལ་བ་ཡོད་དགོས། སྒྲུབ་ཐབས་བླ་མའི་མན་ངག་དང་འབྲེལ་བ་ཞིག་དགོས་ཏེ། རྒྱུད་ཁོ་རང་ཐད་ཀར་ཡོད་ཀྱང་བླ་མ་དམ་པའི་མན་ངག་གིས་ཟུར་བརྒྱན་པ་མེད་ན། རྒྱུད་ཇི་བཞིན་དུ་ཉམས་སུ་ལེན་མི་ཤེས་པས། དེར་སྒྲུབ་ཐབས་ཀྱི་ཆོ་གའི་ཡན་ལག་ཆ་ཚང་བ་ཞིག་དགོས་ཟེར་བའི་དོན་རེད།^p91
སྒྲུབ་ཐབས་ཀྱང་རིམ་པ་བཞིན་དུ་བླ་མ་དམ་པའི་ཕྱག་བཞེས་ཤིག་ཡོད་དགོས། དཔེར་ན། རྙིང་མའི་ཆོས་ཚུལ་ལྟ་བུ་ལ་མཚོན་ན། སྟོད་དུ་རྡོར་སྨིན་དཔལ་གསུམ་གྱི་ཕྱག་བཞེས་དང་། སྨད་དུ་ཀཿ དཔེ་རྫོགས་གསུམ་གྱི་ཕྱག་བཞེས་ལྟ་བུ་ཞིག་དང་འབྲེལ་དགོས་པ་ཡིན། ཕྱག་བཞེས་དེ་ཡང་མཐོང་བརྒྱུད་དང་འབྲེལ་བ་ཞིག་ཡིན་དགོས་ཏེ། བླ་མ་གཅིག་གིས་ཕྱག་བཞེས་དེ་འདོན་པ་དང་སྒྲུབ་པ་སོགས་ལག་ལེན་གྱི་སྒོ་ནས་མཐོང་བ་བརྒྱུད་པའི་ཕྱག་བཞེས་དང་འབྲེལ་དགོས་པ་རེད་མ་གཏོགས། རང་གར་དེའི་ལས་འགྲིག་ཅིག་དང་སྟོང་ཐུན་ཞིག་ཡོད་པ་ཙམ་ཞིག་གིས་ཤེས་མི་ཐུབ།^p92
དེས་ན། སྤྱིར་ཆོས་ཚན་འདི་གཉིས་ཀྱང་གསར་མ་དང་། རྙིང་མ། ས་སྐྱ། བཀའ་བརྒྱུད། ཇོ་ནང་ལ་སོགས་པ་གྲུབ་མཐའ་གང་གི་ཕྱག་བཞེས་བཞིན་དུ་བཏོན་ཡང་འགྲིག་གི་རེད།^p93
གལ་ཏེ་ནང་དོན་གསལ་བོ་ཡང་དག་པ་ཞིག་མ་ཤེས་ཀྱང་། གཙོ་བོ་ཁྱེད་རྣམ་པས་ཡི་གེའི་སྟེང་དུ་བཀོད་པ་བཞིན་དུ་ཐོན། དེའི་རྗེས་སུ། ཨོཾ་ཨ་ར་པ་ཙ་ན་དྷིཿ དང་། ཨོཾ་བཛྲ་ཀཱི་ལི་ཀཱི་ལ་ཡ་ཧཱུཾ་ཕཊ༔ ཅེས་སྔགས་ཅི་མང་ཞིག་བཟླས་ནས་མཇུག་རྫོགས་པར་གྱིས་དང་མི་འགྲིག་རྒྱུ་ཅི་ཡང་མེད།^p94
ཅུང་མིན་ན་ཕེབས་རྒྱུ་མ་བྱུང་།^p95
ཆོས་རྗེ་ཉིད་རི་བོ་རཱོ་ཁཱེས་སུ་བྱོན་པ་ནས་བཟུང་། ཁོང་གི་སྐུ་གཟུགས་དེ་ཙམ་མི་བདེ་བར་གྱུར། ལྷག་པར་དུ་ནཱ་ཕཱ་ལུང་དུ་བྱོན་རྗེས། ཉིན་ཁ་ཤས་ཀྱི་རིང་གཟིམ་ལེགས་པོར་མ་ཁུག་པས་སྙུང་ཚབས་ཇེ་ཆེར་སོང་། ང་ཚོ་སློབ་མ་རྣམས་ཀྱིས་བྱ་ཐབས་གང་དགོས་ཐག་མ་ཆོད་པས་འོག་ནས་ཐེངས་མང་དུ་གྲོས་མོལ་བྱས། ད་དུང་འདི་ལྟར་མུ་མཐུད་ནས་ས་ཚིགས་མང་པོར་འབྱོན་དགོས་ན། ཁོང་གི་སྐུ་གཟུགས་ཀྱིས་ཕལ་ཆེར་མི་ལྕོགས་པས། ཕྱི་ཟླ་༧པའི་ཚེས་༡༢ཉིན་གྱི་སྔ་དྲོར། ངེད་ཅག་མཉམ་གཅིག་ཏུ་རྗེ་ཉིད་ཀྱི་མདུན་ལ་བཅར་ནས། གཞུག་གི་ལས་རིམ་རྣམས་མཚམས་འཇོག་དགོས་མིན་གྱི་སྐད་ཆ་ཞུས།^p96
ཁོང་གིས་ཅི་ཡང་མི་གསུང་བར་འདུག་པས། ང་ཚོས་གདན་ཞུ་བྱེད་མཁན་གྱི་ཆོས་ཚོགས་སོ་སོའི་གཙོ་འགན་མི་སྣ་རྣམས་བོས་ཏེ་མཉམ་གཅིག་གྲོས་སྡུར་ཚོགས་འདུ་བསྡུས། དེ་ལ་འགའ་ཞིག་གིས། ཆོས་རྗེ་ཉིད་ཆོས་གསུང་བར་འབྱོན་པའི་ལས་རིམ་ཐམས་ཅད་གཏན་ཁེལ་བྱས་ཏེ་འཛམ་གླིང་སྤྱི་ལ་བསྒྲགས་ཟིན་ལ། ཆོས་གསུང་སའི་ཚོགས་ར་རྣམས་ལ་ཡང་གླ་ཆ་སྤྲད་ཚར་བས་མ་བྱོན་ན་མི་འགྲིག་ཟེར། འགའ་ཞིག་གིས། ཁོང་གི་སྐུ་གཟུགས་ཀྱི་བདེ་ཐང་ནི་རྩ་བ་ཡིན་པས། ད་རུང་མུ་མཐུད་དུ་འདི་ལྟར་འོ་བརྒྱལ་ཆེན་པོ་མཛད་ན་མི་འགྲིག་པས། རབ་ན་ས་ཚིགས་ཕྱི་མ་རྣམས་བསྟུང་ན་ལེགས་ཞེས་ཕྱོགས་གཉིས་ནས་ཕན་ཚུན་རྩོད་པ་ལས་གཅིག་གྱུར་གྱི་གྲོས་ཆོད་མ་བྱུང་།^p97
སྐབས་དེར། ང་ཚོས་གྲུབ་དབང་རིན་པོ་ཆེ་དང་རྒྱ་སྤྲུལ་རིན་པོ་ཆེས་མངགས་པའི་ཐེངས་འདིའི་བྱོན་བཞུགས་ལས་རིམ་གྱི་འབྲེལ་གཏུག་བྱེད་མཁན་གཙོ་བོ་ནི་ལྕམ་ཁའེ་ཧེན་རཱེ་（Kay Henry）ཡིན་པས། མོའི་བསམ་ཚུལ་ལ་རྒྱུས་ལོན་བྱས་པ་ན། མོས་ཟླ་བ་མང་པོའི་རིང་ལ་རྗེ་ཉིད་འབྱོན་སའི་ས་གནས་དང་དུས་ཚོད་ཐད་འབྲེལ་གཏུག་དང་བཀོད་སྒྲིག་གི་ལས་ཀ་མང་དུ་བསྒྲུབས་ཤིང་། ཐ་ན་ཆོས་རྗེ་ཉིད་དང་འཁོར་སློབ་ཚང་མའི་གནམ་གྲུའི་གླ་ཆ་སོགས་འབྲེལ་ཡོད་འགྲོ་གྲོན་ཚང་མ་བསྡུ་རུབ་བྱས་ཟིན་པས། མོ་རང་གིས་གནས་ཚུལ་འདི་དག་ཐོས་རྗེས་བརྒྱལ་ལ་ཉེ་བ་ལྟར་ཤིན་ཏུ་ཧང་སང་པར་གྱུར།^p98
མོས་ལྷག་བསམ་རྣམ་དག་གི་སྒོ་ནས། སྤྱིར་ཆོས་རྗེ་ཉིད་ཀྱི་སྐུ་གཟུགས་ཀྱི་བདེ་ཐང་ནི་གཙོ་བོ་ཡིན་པས། གལ་ཏེ་སྙུང་གཞིའི་དབང་གིས་འབྱོན་མ་ཐུབ་ན། ང་ཚོས་འཕྲལ་དུ་ས་ཚིགས་རྗེས་མ་རྣམས་བསྟུང་བར་བྱ་ཆོག ཡིན་ནའང་། ད་ལྟ་འཛམ་གླིང་གི་མི་བརྒྱ་སྟོང་ཁྲི་ཕྲག་མང་པོས་རྗེ་ཉིད་འབྱོན་པར་རེ་སྒུག་བྱས་ཡོད་ལ། འབྲེལ་ཡོད་ཀྱི་གྲ་སྒྲིག་སྣ་ཚོགས་ཀྱང་ཡོངས་སུ་གྲུབ་ཟིན་པས། གལ་ཏེ་གསོལ་ཟས་དང་དེ་མིན་མཐུན་རྐྱེན་གང་གིས་ཁོང་གི་སྐུ་ལུས་ཀྱི་སྙུང་གཞི་དྭངས་པར་ཕན་པ་ཡོད་ན་ང་ཚོར་གསུང་རོགས་གྱིས་དང་། ངེད་ཅག་གིས་རང་ནུས་ཅི་ལྕོགས་ཀྱིས་བརྩོན་ལེན་བྱ་ཡོང་། གལ་སྲིད་མུ་མཐུད་དུ་ས་ཚིགས་ཕྱི་མ་རྣམས་སུ་འབྱོན་ཐུབ་ན། དད་ལྡན་དང་སེམས་ཅན་གྲངས་མེད་ལ་ཕན་ཐོགས་ངེས་ཅན་ཡིན་ཞེས་ཟེར།^p100
ཆོས་རྗེ་ཉིད་ཀྱིས་ཅིའང་མི་གསུང་བར་དར་ཅིག་བཞུགས། ང་ཚོས་སླར་ཡང་སྐར་མ་བཅུ་ལྷག་ལ་གྲོས་སྡུར་བྱས་རྗེས། ཁོང་གིས་ཐུགས་ཐག་ཆོད་པོའི་སྒོ་ནས། ད་ང་མུ་མཐུད་ནས་ས་ཚིགས་ཕྱི་མ་རྣམས་སུ་འགྲོ་རྒྱུ་ཡིན་ཞེས་གསུངས་བྱུང་།^p101
ལྕེ་བཙུན་སྙིང་ཐིག་གི་ཁྲིད་ཐུན་གཉིས་པ།^p102
ཉིན་དེའི་ཕྱི་དྲོར་ཆོས་རྗེ་ཉིད་ཀྱིས་ཁྲིད་ཐུན་གཉིས་པ་འདི་ལྟར་གསུང་།^p103
དེ་ལ་གང་གསན་པར་བྱ་བའི་ཆོས་ནི། ལྕེ་བཙུན་སྙིང་ཐིག་ཆེན་པོའི་རྩ་བའི་གཞུང་ལ་དུམ་བུ་གསུམ་ཡོད་པ་ལས་འདིར་དུམ་བུ་དང་པོ་དེ་ཉིད་འཆད་པར་བྱེད་པ་ལ། སྨིན་བྱེད་ཀྱི་དབང་དང་གྲོལ་བྱེད་ཀྱི་གདམས་པ་བསྟན་པ་གཉིས་སུ་ཡོད་པ་ལས། དང་པོ་དབང་སྔོན་དུ་སོང་ཟིན་ནས། གྲོལ་བྱེད་ཀྱི་གདམས་པ་ལ་སྔོན་འགྲོ་དང་། ལམ་དངོས། ལམ་གྱི་ཆ་ལག་བཤད་པ་དང་གསུམ་ལས།^p104
སྔོན་འགྲོ་ལ་ཐུན་མོང་ཕྱིའི་སྔོན་འགྲོ་དང་ཐུན་མིན་ནང་གི་སྔོན་འགྲོ་གཉིས་ཡོད་པ་ལས། ཐུན་མོང་གི་སྔོན་འགྲོ་ནི་གོང་གི་སེམས་སྦྱོང་གི་རིམ་པ་བདུན་སྔོན་དུ་སོང་བའི་སྒོ་ནས། ཚེ་འདིའི་བྱ་བ་ཐམས་ཅད་ལ་ཞེན་པ་གཏིང་ནས་ལྷོད་པོར་བྱས་ཏེ། ཕྱི་མ་འབའ་ཞིག་གི་དོན་བསྒྲུབ་འདོད་ཀྱི་བསམ་པ་ཡང་དག་པ་ཞིག་མ་སྐྱེས་ཀྱི་བར་དུ་ཐོག་མར་སེམས་སྦྱང་དགོས་པ་ཡིན།^p105
ཐུན་མིན་གྱི་སྔོན་འགྲོ་ལ་སྐྱབས་སུ་འགྲོ་བ་དང་སེམས་བསྐྱེད་པ་གཉིས་སུ་ཡོད་པ་ལས། དང་པོ་སྐྱབས་སུ་འགྲོ་བ་ནི། གང་ལ་སྐྱབས་སུ་འགྲོ་བའི་ཡུལ་ནི་མདུན་གྱི་ནམ་མཁར་འོད་ཕུང་གི་དབུས་སུ་བི་མ་མི་ཏྲ་ལ་འཁོར་རྩ་གསུམ་རྒྱལ་བ་རབ་འབྱམས་ཀྱིས་ཡོངས་སུ་བསྐོར་བར་དམིགས་པ་དེ་ཡིན། སྐྱབས་སུ་འགྲོ་བ་པོ་ནི་དེའི་མདུན་དུ་ཁྲོམ་ཚོགས་པ་བཞིན་དུ་ཡོངས་སུ་འཁོད་པར་མོས་པའི་བདག་དང་མཁའ་མཉམ་གྱི་སེམས་ཅན་ཐམས་ཅད་ཡིན། ཚུལ་ཇི་ལྟ་བུའི་སྐྱབས་སུ་འགྲོ་བ་ནི། ལུས་གུས་པས་ཐལ་མོ་སྦྱར། ངག་གུས་པས་ཡོན་ཏན་བརྗོད། ཡིད་གུས་པས་དད་པ་རྩེ་གཅིག་ཏུ་བསྐྱེད་པའི་སྒོ་ནས་སྐྱབས་སུ་འགྲོ་དགོས། དེ་ཡང་དམ་བཅའ་བའམ་ཁས་ལེན་ཁྱད་པར་ཅན་ཞིག་གི་མིང་ལ་སྐྱབས་སུ་འགྲོ་བ་ཟེར།^p107
དེ་ལ་ཐུན་མོང་མདོ་དང་མཐུན་པའི་སྐྱབས་སུ་འགྲོ་ཚུལ་དང་ཐུན་མོང་མ་ཡིན་པ་རྫོགས་པ་ཆེན་པོ་རང་རྐང་གི་སྐྱབས་སུ་འགྲོ་ཚུལ་གཉིས་ཡོད་པ་ལས། མདོ་དང་མཐུན་པ་ནི་བདག་ལ་སྟོན་པ་སངས་རྒྱས་མ་གཏོགས་གཞན་གང་ཡང་མེད་སྙམ་དུ་སངས་རྒྱས་ལ་སྟོན་པར་ཁས་ལེན་པ་དང་། བདག་གིས་ཆོས་གང་ཉམས་སུ་ལེན་དགོས་ན། སངས་རྒྱས་ཀྱི་ཞལ་ནས་གསུངས་པའི་ཆོས་ཁོ་ན་ཉམས་སུ་ལེན་པ་ལས་གཞན་ཉམས་སུ་མི་ལེན་སྙམ་པ་དང་། གྲོགས་ནི་སངས་རྒྱས་ཀྱི་རྗེས་སུ་འཇུག་པའི་འཕགས་པའི་དགེ་འདུན་པ་རྣམས་དང་ལྟ་སྤྱོད་མཐུན་པར་བྱེད་པ་མ་གཏོགས། གཞན་ལ་ལྟ་སྤྱོད་མཐུན་པར་མི་བྱེད་སྙམ་པའི་སྟོན་པ་ལམ་གྲོགས་ཀྱི་ཚུལ་དུ་སྐྱབས་སུ་འགྲོ་བ་ལ་རྒྱུའི་སྐྱབས་འགྲོ་ཟེར། དེ་ལྟར་ལམ་སྟོན་པ་པོ་དང་ཉམས་སུ་བླང་བྱའི་ཆོས། ལམ་སྒྲུབ་པའི་གྲོགས་གསུམ་ལ་བསྟེན་ཏེ་མཐར་ཐུག་སངས་རྒྱས་ཀྱི་གོ་འཕང་ཡོངས་སུ་བསྒྲུབ་པར་བྱ་སྙམ་པ་ལ་འབྲས་བུའི་སྐྱབས་འགྲོ་ཟེར། དེ་ལྟ་བུའི་དམ་བཅའ་ཁྱད་པར་ཅན་རང་རྒྱུད་ལ་སྐྱེད་བཞིན་དུ་སྐྱབས་འགྲོའི་ཚིག་དེ་ཡང་བརྒྱ་སྟོང་ཁྲི་འབུམ་གྱི་གྲངས་སུ་བགྲང་བ་ལ་ཐུན་མོང་མདོ་དང་མཐུན་པའི་སྐྱབས་འགྲོ་ཟེར།^p108
ཐུན་མོང་མ་ཡིན་པ་རྫོགས་པ་ཆེན་པོ་རང་རྐང་གི་སྐྱབས་སུ་འགྲོ་སྟངས་ནི། རང་གི་སེམས་ཉིད་ངོ་བོ་སྟོང་པ་ཆོས་ཀྱི་སྐུ་དང་། རང་བཞིན་གསལ་བ་ལོངས་སྤྱོད་རྫོགས་པའི་སྐུ་དང་། དབྱེར་མེད་ཐུགས་རྗེ་སྤྲུལ་པའི་སྐུ་སྟེ་སྐུ་གསུམ་དབྱེར་མེད་རང་ལ་རང་ཆས་སུ་ཡེ་ནས་བཞུགས་ཡོད་པ་ལ་ཡིན་པར་ཤེས་པའི་ལྟ་བའི་ངང་སྐྱོང་བ་ནི་རྫོགས་པ་ཆེན་པོ་རང་གི་སྐྱབས་སུ་འགྲོ་སྟངས་ཡིན།^p109
དེ་དྲའི་བསམ་པ་དང་ལྡན་པའི་སྒོ་ནས།^p110
ཨཿ ཀ་དག་གཏིང་གསལ་ཆོས་ཀྱི་སྐུ༔ ལྷུན་གྲུབ་རིག་རྩལ་ལོངས་སྤྱོད་རྫོགས༔^p111
དབྱེར་མེད་ཐུགས་རྗེ་སྤྲུལ་པའི་སྐུར༔ རང་ངོ་ཤེས་པས་སྐྱབས་སུ་མཆི༔^p112
ཞེས་འདི་བཀླག་དགོས། འདི་ལྟ་བུའི་གདོན་བྱའི་ཚིག་ཐམས་ཅད་དབྱིན་ཇིའི་སྐད་སོགས་ལ་བསྒྱུར་ན་བདེན་ཚིག་གྲུབ་པའི་གསུང་ལ་ནུས་པ་མེད་པར་འགྱུར་འགྲོ་ཞིང་། རྩ་བའི་ཚིག་འདི་ཡང་ལྕེ་བཙུན་ཆེན་པོས་བོད་སྐད་ལ་བྱིན་གྱིས་བརླབས་ཡོད་པས། དོན་གོ་བ་གཞིར་བཞག་སྟེ་བོད་སྐད་ཀྱི་སྟེང་ནས་བསོག་དགོས།^p114
སྤྱིར་ན་ཡང་འདི་འདྲའི་འདོན་པ་དང་སྨོན་ལམ་གསོལ་འདེབས་ཀྱི་རིགས་ཚང་མ་བདེན་ཚིག་གྲུབ་པའི་གང་ཟག་གིས་སྐད་ཡིག་གང་གི་སྟེང་ལ་བྱིན་གྱིས་བརླབས་ཡོད་ན་དེ་ལྟར་དུ་འདོན་དགོས་པ་ཡིན་ཏེ། བོད་སྐད་དུ་བྱིན་གྱིས་བརླབས་ཡོད་ན་བོད་སྐད་རང་བཞག་བྱས་ནས་བཀླག་དགོས། དེ་བཞིན་དུ་དབྱིན་ཇིའི་སྐད་ལ་སོགས་པའི་སྟེང་ལ་བྱིན་གྱིས་བརླབས་ཡོད་ན་དེ་དེ་བཞིན་དུ་བཀླག ལེགས་སྦྱར་སཾ་སྐྲྀ་ཏ་ལྷའི་སྐད་དུ་བྱིན་གྱིས་བརླབས་ཡོད་ན་དེ་ལྟར་དུ་འདོན་དགོས།^p115
དཔེར་ན་ཡི་གེ་བརྒྱ་པ་ལྟ་བུར་མཚོན་ན་བོད་པས་འདོན་ནའང་ལེགས་སྦྱར་གྱི་སྐད་ལྟར་དུ་བཀླག་དགོས་ཤིང་། རྒྱ་ནག་པ་དང་། རྒྱ་གར་པས་འདོན་ན་ཡང་དེ་ལྟར་འདོན་དགོས། དབྱིན་ཇི་པས་འདོན་ན་ཡང་ཡི་གེ་བརྒྱ་པ་གང་ལ་བྱིན་གྱིས་བརླབས་པའི་སྐད་དུ་ཀློག་རྒྱུ་མ་གཏོགས། དེ་བོད་སྐད་དང་རྒྱ་ནག་གི་སྐད་སོགས་ལ་བསྒྱུར་ན་བྱིན་རླབས་མེད་པར་བྱེད་པ་ཡིན། འདོན་ཆོག་ཚང་མ་དེ་ལྟ་བུ་ཡིན་པ་ནི་སྤྱི་ཁྱབ་ཀྱི་གོ་བ་ཞིག་ཡིན། ལྕེ་བཙུན་སྙིང་ཐིག་འདི་ལྟ་བུ་ནི་བོད་སྐད་དུ་བྱིན་གྱིས་བརླབས་པས་བོད་སྐད་ཀྱི་སྟེང་ནས་འདོན་དགོས།^p116
ཁ་སང་གི་འཇམ་དཔལ་ཞི་སྒྲུབ་ལ་དཔེར་མཚོན་ན། འཇམ་དཔལ་ཞི་སྒྲུབ་ཀྱི་འདོན་ཆའི་སྐོར་བོད་སྐད་ཀྱིས་བཀླག་དགོས། དེ་ནི་འཇམ་དཔལ་དབྱངས་ཀྱིས་བོད་སྐད་ཉིད་དུ་བྱིན་གྱིས་བརླབས་ཡོད་པས་ཡིན། ཁྲིད་ཡིག་སངས་རྒྱས་ལག་སྟེར་ལ་སོགས་པ་ནི་གང་ལྟར་བཀླག་ཀྱང་ཁྱད་པར་མི་འདུག་ལ། གཙོ་བོ་གོ་བརྡ་སྤྲོད་བྱེད་ཙམ་རེད། དབྱིན་ཇིའི་སྐད་ཐོག་ནས་གོ་བ་བླངས་ན་ཡང་ཆོག་ལ་བོད་སྐད་ཀྱི་སྟེང་ནས་གོ་བ་ལོན་ན་ཡང་འགྲིག རང་གིས་སྐད་གང་ཤེས་མ་གཏོགས་མཐའ་གཅིག་ཏུ་དེ་ཁོ་ན་དགོས་པའི་ངེས་པ་མེད། སྤྱིར་དེ་ལྟ་བུའི་རིགས་ཚང་མ་ལ་དེ་ལྟར་ཤེས་དགོས་པ་ཡིན།^p117
དེ་ནས་སྐྱབས་འགྲོའི་བསླབ་བྱ་ནི། སངས་རྒྱས་ལ་སྐྱབས་སུ་སོང་ནས་བཟུང་སྟེ་སངས་རྒྱས་ལ་གསོལ་བ་རྩེ་གཅིག་ཏུ་འདེབས་རྒྱུ་ལྷག་མི་རུང་ཞིང་། ཆོས་ལ་སྐྱབས་སུ་སོང་ནས་བཟུང་སྟེ་སེམས་ཅན་ཐམས་ཅད་ལ་བྱམས་པ་དང་སྙིང་རྗེ་བསྒོམས་ནས་གནོད་པའི་ལས་ལ་སྤྱོད་མི་རུང་བ་ཡིན། དགེ་འདུན་ལ་སྐྱབས་སུ་སོང་ནས་བཟུང་སྟེ་ཡུལ་ཁྱད་པར་ཅན་བླ་མ་དང་དགེ་འདུན་པ་ཚང་མ་ལ་གུས་བཀུར་དང་ཞབས་ཞུ་བསྒྲུབ་རྒྱུ་ལ་རྩེ་གཅིག་ཏུ་འབད་དགོས།^p118
སྐྱབས་སུ་སོང་བའི་ཕན་ཡོན་ནི། གང་ཞིག་དཀོན་མཆོག་གསུམ་ལ་སྐྱབས་སུ་འགྲོ་བའི་གང་ཟག་དེ་ནི་མི་དགེ་བ་ལས་ངན་པའི་དབང་དུ་མི་འགྲོ། འདོད་ཆགས་ཞེ་སྡང་གཏི་མུག་ལ་སོགས་པ་ཉོན་མོངས་པའི་དབང་དུ་མི་འགྲོ། བདུད་བགེགས་འབྱུང་པོ་ལ་སོགས་བདུད་ཀྱི་དབང་དུ་ཡང་མི་འགྲོ་བ་ཡིན། ཚེ་འདིར་ཚེ་རིང་བ་དང་། ནད་མེད་པ། ལོངས་སྤྱོད་འབྱུང་བ། གཟུགས་བཟང་བ་སོགས་བསམ་པའི་དོན་ཐམས་ཅད་ཀུན་ཀྱང་གེགས་མེད་ཡིད་བཞིན་དུ་འགྲུབ་པར་འགྱུར་ཞིང་། ཕྱི་མར་ཡང་ངེས་པར་དུ་ངན་འགྲོ་ལོག་པར་མི་ལྟུང་ཞིང་། བདེ་ནས་བདེ་བར་བྱང་ཆུབ་ཆེན་པོ་སངས་རྒྱས་ཀྱི་གོ་འཕང་འཐོབ་པར་འགྱུར་བ་ཡིན།^p119
གཉིས་པ་སེམས་བསྐྱེད་པ་ནི། ལས་དང་ཉོན་མོངས་པས་སྡུག་བསྔལ་གྱིས་གཞན་དབང་དུ་གྱུར་པའི་ནམ་མཁས་གར་ཁྱབ་ཀྱི་སེམས་ཅན་ཐམས་ཅད། ལས་དང་ཉོན་མོངས་པའི་སྡུག་བསྔལ་དེ་དག་དང་བྲལ་ན་ཅི་མ་རུང་སྙམ་པའི་སྙིང་རྗེ་ཤས་མི་བཟོད་པ་ཞིག་བསྐྱེད་པ་ནི་སྙིང་རྗེས་གཞན་དོན་ལ་དམིགས་པའི་ཟུར་དང་། དེ་དག་ལ་སྙིང་རྗེ་བ་རྐྱང་པས་མི་ཆོག་པར་རྣམ་གྲོལ་གཏན་གྱི་བདེ་བ་རྫོགས་པའི་སངས་རྒྱས་ཀྱི་གོ་འཕང་ལ་བདག་གཅིག་པུས་དགོད་པར་བྱ་སྙམ་པའི་དམ་བཅའ་བ་དེ་ཤེས་རབ་རྫོགས་བྱང་ལ་དམིགས་པའི་ཟུར་ཡིན། ཟུར་དེ་གཉིས་དང་ལྡན་པ་ལ་སྨོན་པ་བྱང་ཆུབ་ཀྱི་སེམས་ཟེར།^p120
དེ་ལྟ་བུའི་སངས་རྒྱས་འཐོབ་པར་བྱ་བའི་ཆེད་དུ་བདག་གིས་སྦྱིན་པ་སྦྱིན། ཚུལ་ཁྲིམས་བསྲུང་། བཟོད་པ་བསྒོམ། བརྩོན་འགྲུས་བརྩམ། བསམ་གཏན་གྱི་དོན་ལ་མཉམ་པར་གཞག ཤེས་རབ་བདག་མེད་རྟོགས་པའི་ཡེ་ཤེས་མངོན་དུ་བསྒྲུབ་པར་བྱའོ་སྙམ་པའི་དམ་བཅའ་བ་དང་འགྲོགས་པའི་སྒོ་ནས། ཕ་རོལ་ཏུ་ཕྱིན་པ་དྲུག་ལ་བསླབ་པར་བྱ་བ་ནི་འཇུག་པ་སེམས་བསྐྱེད་ཡིན། དེ་ནི་ཐུན་མོང་མདོ་དང་མཐུན་པའི་སེམས་བསྐྱེད་ཚུལ་ཡིན།^p121
ཐུན་མོང་མ་ཡིན་པ་རྫོགས་པ་ཆེན་པོའི་དབང་དུ་བྱས་ན། སེམས་ཅན་ཐམས་ཅད་ཡེ་ནས་སངས་རྒྱས་པའི་རང་བཞིན་ཅན་ཡིན་མོད་ཀྱང་། དེ་ལྟར་མ་རྟོགས་པར་འཁོར་བའི་གནས་སུ་མུ་མཐུད་དུ་འཁོར་གྱིན་ཡོད་པ་འདི་རྣམས་སྙིང་རེ་རྗེ། དེ་རྣམས་ཀྱིས་རང་གནས་ཀྱི་ཡེ་ཤེས་མངོན་དུ་འགྱུར་བར་བྱ་བའི་སླད་དུ། ཅོག་བཞག་ཆེན་པོའི་ལྟ་བ་ཡོངས་སུ་བསྒོམ་པར་བྱའོ་སྙམ་པའི་འདུན་པ་དང་མ་བྲལ་བའི་སྒོ་ནས། གནས་ལུགས་ཀྱི་དོན་ལ་མཉམ་པར་འཇོག་པ་ནི་ཐུན་མིན་རང་ལུགས་ཀྱི་སེམས་བསྐྱེད་ཚུལ་ཡིན།^p122
དེ་ལྟ་བུའི་དམ་བཅའ་དང་མ་བྲལ་བའི་ངང་ནས།^p123
ཧོཿ གློ་བུར་འཁྲུལ་བའི་འགྲོ་བ་ཀུན༔ གདོད་ནས་རྣམ་དག་དབྱིངས་ཀྱི་ངང་༔^p124
ཡེ་ཤེས་རིག་པས་རང་གྲོལ་ཕྱིར༔ ཅོག་བཞག་ཆེན་པོར་སེམས་བསྐྱེད་དོ༔^p125
ཞེས་འདི་རང་གིས་གང་ནུས་སུ་བརྒྱ་སྟོང་ཁྲི་འབུམ་བསོག་དགོས་པ་ཡིན།^p126
སེམས་བསྐྱེད་ཀྱི་བསླབ་བྱ་ནི། རང་ལས་ཀྱང་གཞན་གཅེས་པར་བཟུང་བའི་ཀུན་སློང་གིས་གཞན་དོན་འབའ་ཞིག་བསྒྲུབ་པར་བྱ་སྙམ་པ་བསམ་པ་དག་པ་དང་། སྤྱོད་པ་དག་པའི་སྒོ་ནས་རྩེ་གཅིག་ཏུ་དུས་རྟག་ཏུ་བརྩོན་པར་བྱ་བ་ནི་བྱང་ཆུབ་སེམས་དཔའི་བསླབ་བྱ་ཡིན།^p127
བྱང་ཆུབ་སེམས་ཀྱི་ཕན་ཡོན་ནི། རྒྱས་པར་སྡོང་པོས་བཀོད་པའི་མདོ་སྡེ་ལས་དཔེ་བརྒྱ་ཕྲག་ལྷག་གི་སྒོ་ནས་གསུངས་ཡོད་པས་དེ་ལྟ་བུར་ཤེས་དགོས་པ་དང་། འབྲིང་ནི་སྤྱོད་འཇུག་ལེའུ་དང་པོ་ནས་གསུངས་པ་དེ་ཤེས་དགོས། དེ་ཚང་མ་མ་ཤེས་ན་ཡང་བྱང་ཆུབ་སེམས་དཔའ་བྱམས་པའི་སྨོན་ལམ་ལས་གསུངས་པའི་ཕན་ཡོན་རྣམ་པ་གསུམ་པོ་དུས་རྒྱུན་དུ་དྲན་དགོས་པ་ཡིན།^p128
དེ་ཡང་བྱམས་པའི་སྨོན་ལམ་ལས་གསུངས་པའི་ཕན་ཡོན་རྣམ་པ་གསུམ་ནི། བྱང་ཆུབ་ཀྱི་སེམས་འདི་རྒྱུད་ལ་སྐྱེས་པ་ནས་བཟུང་སྟེ། དམྱལ་བ་ཡི་དྭགས་དུད་འགྲོ་ལ་སོགས་པའི་ངན་སོང་གི་སྐྱེ་སྒོ་ཐམས་ཅད་རྩ་བ་ནས་ཡོངས་སུ་ཁེགས་པར་འགྱུར་བ་དང་། མཐོ་རིས་ལྷ་དང་མིའི་བདེ་སྐྱིད་ཕུན་སུམ་ཚོགས་པ་ལ་ངང་ངམ་ཤུགས་ཀྱིས་སྤྱོད་པར་འགྱུར་བ་དང་། མཐར་ཐུག་རྒ་ཤི་མེད་པ་སངས་རྒྱས་ཀྱི་གོ་འཕང་ཡང་དཀའ་ཚེགས་མེད་པར་འཐོབ་པར་འགྱུར་བ་བཅས་གསུངས་པ་ཡིན།^p129
སྐྱབས་སུ་འགྲོ་བ་དང་སེམས་བསྐྱེད་པ་གང་ཡིན་ཡང་ཐུན་འཇོག་རན་དུས་སྐྱབས་ཡུལ་གྱི་ལྷ་ཚོགས་ཐམས་ཅད་འོད་དུ་ཞུ་ནས་རང་ལ་ཐིམ་པས། རང་གི་སྡིག་སྒྲིབ་ཉེས་ལྟུང་ཐམས་ཅད་ཡོངས་སུ་དག་པར་བསམ་པའི་ངང་ལ་རྩེ་གཅིག་ཏུ་བཞག་ནས་དགེ་བ་བསྔོ་དགོས།^p130
གཉིས་པ་ལམ་དངོས་གཞི་བླ་མའི་རྣལ་འབྱོར་སྒོམ་ཚུལ་ནི། དེ་ཡང་ལྕེ་བཙུན་སྙིང་ཐིག་གི་གཞུང་ལས་བཤད་པའི་བླ་མའི་རྣལ་འབྱོར་འདི་ལ་གཞན་ལས་ཁྱད་པར་དུ་འཕགས་ཤིང་ཁྱད་ཆོས་མི་འདྲ་བ་ཞིག་ཡོད། བླ་རྣམ་ཁོ་ནའི་ནང་དུ་བསྐྱེད་རིམ་གྱི་ཡན་ལག་ཆ་ཚང་བ་ཞིག་དང་། རྫོགས་རིམ་གྱི་མན་ངག་ཆ་ཚང་བ་ཞིག རྫོགས་པ་ཆེན་པོའི་གཞི་ལམ་འབྲས་བུའི་ཁྲིད་ཀྱང་གསལ་བོར་བསྟན་ཡོད།^p131
གོང་དུ་བཤད་རྒྱུ་དེ་དག་ནི་སྤྱིར་ཁ་རྩང་དབང་གི་དུས་སུ་ཚང་མ་བཤད་ཚར་ཡང་། ངས་སྐྱབས་འགྲོ་སེམས་བསྐྱེད་རྣམས་སླར་ཡང་གསལ་བཤད་ཅིག་བྱས་ནས་བཤད་པ་ཡིན།^p132
འདི་ལ་ཁྱེད་རྣམ་པ་མི་སྐྱ་ཕོ་མོ་སྤྱི་དང་ཁྱད་པར་དུ་བླ་སེར་རྣམས་ཀྱིས་ནན་ཟབ་ཀྱིས་གཟིགས། མི་ཤེས་རྒྱུ་ཡོད་ན་རྗེས་མ་ཡར་དྲིས་ཤོག་དང་ངས་འཆད་ཆོག ད་ལམ་དངོས་འཆད་པའི་སྐབས་ཡིན་པས་ངས་ཡིག་ཐོག་ནས་བཏོན་ཏེ་ཅུང་ཟད་འགྲེལ་ཞོར་དང་སྒྱུར་ཞོར་གྱི་སྒོ་ནས་མར་འགྲོ།^p133
དེ་ནས་བླ་མའི་བྱིན་རླབས་ལམ་དུ་བྱ་སྟེ༔ གནས་ཤིན་ཏུ་དབེན་པར་མཚམས་དམ་དུ་བཅད་ལ༔ སྔོན་འགྲོའི་སྦྱོང་བས་རྒྱུད་དག་པར་བྱ༔^p134
ཞེས་དང་པོ་བླ་མའི་རྣལ་འབྱོར་སྒོམ་པར་བྱེད་པ་ལ་དབེན་པའི་གནས་སུ་སྐྱབས་འགྲོ་དང་སེམས་བསྐྱེད་སྔོན་དུ་སོང་ནས་རྒྱུད་དག་པར་བྱ་དགོས་གསུངས།^p135
རླུང་རོ་བསལ་ལ་ཤེས་པ་རྣལ་དུ་དབབ༔^p136
ཞེས་རླུང་རོ་ལན་གསུམ་བསལ་ནས་ནད་གདོན་སྡིག་སྒྲིབ་དག་པར་བསམ། སེམས་རྩེ་གཅིག་ཏུ་གནས་ནས་རྣལ་དུ་དབབ་ཅེས་མལ་གསོའམ་ངལ་གསོ་བ་ལྟ་བུའི་ངང་དུ་འདུག་དགོས་གསུངས།^p137
ཀ་དག་གི་ངང་ལས་གཉུག་མའི་ལྷ་དང་བླ་མ་དབྱེར་མེད་པར་བདག་ཉིད་སེཾ་ཧེ་ཤྭ་ར་བསྒོམ་པར་བྱའོ༔^p138
ཞེས་ཆོས་ཐམས་ཅད་སྟོང་ཉིད་ཀ་དག་གི་ངང་ལས་ངོ་བོ་རང་ཉིད་ཡེ་ནས་ཡིན་པའི་གཉུག་མའི་ལྷ་དང་བླ་མ་དབྱེར་མེད་པའི་བདག་ཉིད་ཅན་རྣམ་པ་སེཾ་ཧེ་ཤྭ་ར་བསྒོམ་པར་བྱ་གསུངས།^p139
དེ་ལ་སེངྒེ་དང་པདྨ་ཉི་མའི་ལྟེ་བར་རྣལ་འབྱོར་སྤྱོད་པ་ཁྲོ་འཛུམ་སྒེག་པའི་ཉམས་ཅན་ཁ་དོག་དམར་ཞིང་མཉམ་གཞག་དང་སྐྱིལ་ཀྲུང་ཅན༔^p140
ཞེས་སེང་གདན་དང་པདྨ། ཉི་མའི་ལྟེ་བར་རྣལ་འབྱོར་སྤྱོད་པའི་ཆ་ལུགས་འཛིན་ཞིང་ཁྲོ་འཛུམ་སྒེག་པའི་ཉམས་ཅན་ཞེས། སྤྱན་ཧ་ཅང་བགྲད་ནས་བལྟས་ཡོད་པ་ཁྲོ་བོའི་ཉམས་དང་། ཞལ་འཛུམ་པ་སྒེག་པའི་ཉམས་ཅན་སྐུ་མདོག་དམར་པོ། ཕྱག་མཉམ་བཞག ཞབས་རྡོ་རྗེ་སྐྱིལ་ཀྲུང་གིས་བཞུགས་ཡོད་པ་ཞིག་བསྒོམ་དགོས་གསུངས།^p141
དར་དང་རིན་པོ་ཆེ་དང་རུས་པའི་རྒྱན་གྱིས་བརྒྱན་པ༔^p142
ཞེས་ལོངས་སྐུའི་དར་དཔྱངས་ཙམ་ལས་སྤྱིར་སྐུ་ལུས་གཅེར་བུ་ཡིན། རུས་པའི་རྒྱན་གྱིས་བརྒྱན་ཞིང་སྤྱི་བོ་ན་རུས་པའི་འཁོར་ལོ་ཡོད་པ་དང་། དབུ་སྐྲ་འཁོར་ལོའི་དཀྱིལ་ནས་ཡར་བཅིངས་ཡོད་པ་ཞིག་ལ། རུས་པའི་ཕྱང་ཕྲུལ་དྲ་བ་དྲ་ཕྱེད་སུམ་ཅུ་སོ་གཉིས་ཡོད་པ། མགྲིན་པ་རུ་རྩ་འཁོར་གྱི་གྲངས་དང་མཉམ་པའི་རུས་པའི་དྲ་བ་དང་པདྨས་བརྒྱན་པའི་ཕྲེང་བ་བཅུ་དྲུག་འཆང་བ། མདུན་ན་རྡོ་རྗེ་དང་རྒྱབ་ན་པདྨ་གཉིས་སྙིང་ཀའི་རྩ་འཁོར་དང་མཉམ་པའི་རུས་པའི་ཕྲེང་བ་བརྒྱད་ཀྱིས་སྦྲེལ་ཡོད་པ། དེའི་བར་བར་ན་རིན་པོ་ཆེའི་མཆོད་ཕྱིར་ཐོགས་དང་། རིན་པོ་ཆེ་དང་དར་རྣམས་ཀྱིས་བརྒྱན་ཡོད་པ། ལྟེ་བར་རྡོ་རྗེ་རྒྱ་གྲམ་དུ་རུས་པའི་ཕྱང་ཕྲུལ་དྲུག་ཅུ་རྩ་བཞི་སྟེ་རྩ་གནས་ཀྱི་གྲངས་དང་མཉམ་པ་ཞིག་ཡོད་དགོས། སྨད་ན་རང་རེའི་ཆུ་དོར་དང་འདྲ་བའི་ཨང་རག་གསོལ་ཡོད་པ་དང་། སྐུ་ལུས་དམར་སྨུག་ཅན་དེ་ལྟ་བུ་ཞིག་བསྒོམ་དགོས་གསུངས།^p143
བ་སྤུའི་ཁུང་བུ་ཐམས་ཅད་ནས་རྡོ་རྗེ་ཡེ་ཤེས་ཀྱི་མེ་ཁྲོ་ཆུང་གི་ཚོགས་དང་བཅས་པ་འཕྲོ་བས་བདུད་དང་བར་དུ་གཅོད་པ་ཐམས་ཅད་སྲེག་པར་མཛད་པ༔^p144
ཞེས་སྐུ་ལུས་བ་སྤུའི་ཁུང་བུ་ནས་མེ་དཔུང་དང་ཁྲོ་ཆུང་གི་ཚོགས་འཕྲོས་པ། རྡོ་རྗེ་ཞེས་པ་ཕར་ཐམས་ཅད་འཇོམས་པར་བྱེད་ཅིང་ཚུར་གང་གིས་ཀྱང་མི་ཚུགས་པའི་བདག་ཉིད་ཅན་ཡིན། དེ་ལྟ་བུ་འཕྲོས་ནས་བདུད་བགེགས་བར་དུ་གཅོད་པ་ཐམས་ཅད་སྲེག་པར་བྱེད་པའི་བདག་ཉིད་ཅན་དུ་བསྒོམ་དགོས།^p145
འཁོར་དུ་བརྒྱུད་གསུམ་གྱི་བླ་མ་དང་༔ དཔའ་བོ་དང་༔ མཁའ་འགྲོའི་ཚོགས་ཀྱིས་བསྐོར་བ༔^p147
ཞེས་དེའི་མཐའ་སྐོར་དུ་རྒྱལ་བ་དགོངས་བརྒྱུད་རིག་འཛིན་བརྡ་བརྒྱུད་གང་ཟག་སྙན་བརྒྱུད་དེ་བརྒྱུད་གསུམ་གྱི་བླ་མ་དང་། གཞན་ཡང་དཔའ་བོ་དང་མཁའ་འགྲོ་ཐམས་ཅད་ཀྱིས་ཡོངས་སུ་བསྐོར་ཡོད་བསམས་ནས་བསྒོམ་དགོས།^p148
སྨིན་མཚམས་སུ་ཆོས་འབྱུང་གི་ནང་དུ་དགའ་བ་འཁྱིལ་བ་དྲག་ཏུ་འཁོར་བ༔^p149
ཞེས་སྨིན་མའི་མཚམས་ན་ཆོས་འབྱུང་ཞེས་པ་གྲུ་གསུམ་མ་ཞིག་སྟེ་ཁ་གདངས་གཡེལ་ཆེ་བ། ཟུར་གཅིག་ཡར་བསྟན་ཅིང་ཟུར་གཞན་གཉིས་ཀ་གཡས་གཡོན་གཉིས་སུ་བསྟན་ཡོད་པ་དེའི་རྩ་བ་ཇེ་ཕྲ་ནས་ཇེ་ཕྲར་དབུ་མའི་ནང་ལ་ཟུག་ཡོད་ཅིང་། དེ་འདྲ་ཆོས་འབྱུང་གི་དཀྱིལ་ན་དགའ་འཁྱིལ་གཡོན་ཕྱོགས་སུ་དྲག་ཏུ་འཁོར་བ་ཞིག་བསྒོམ་དགོས།^p150
དེའི་ཐད་ཀའི་མདུན་གྱི་ནམ་མཁར་རིགས་ཀྱི་བདག་པོ་བི་མ་ལ་དགྱེས་ཡེ་རེ་བཞུགས་པ༔^p151
ཞེས་སེཾ་ཧེ་ཤྭ་རའི་སྨིན་མཚམས་ཀྱི་ཕར་ཁྲུ་གང་དང་ཡར་ཁྲུ་གང་སོང་སའི་ཐད་ཀའི་ནམ་མཁའ་ལ་བི་མ་ལ་མི་ཏྲ་སྐུ་མདོག་དཀར་པོ་ཞལ་གཅིག་ཕྱག་གཉིས་དང་། ཕྱག་གཉིས་མཉམ་བཞག་གི་སྟེང་ལ་ཐོད་ཞལ་བདུད་རྩིས་གང་བ་བསྣམས་པ། སྐུ་ལ་ཆོས་གོས་རྣམ་གསུམ་གསོལ་བ། དར་སྔོན་པོའི་སྟོད་གཡོག་གམ་པཎྜི་ཏའི་གསང་གོས་སྔོན་པོ་མནབས་པ། སྣ་རྩེ་ན་ཡི་གེ་ཨ་དཀར་པོ་ཐུག་ལ་ཁད་པ་ཅན་ཞིག་ཡོད་པར་བསྒོམ་དགོས།^p152
སྣང་སྲིད་ཐམས་ཅད་འཇའ་ཟེར་ཐིག་ལེར་མེར་མེར་ཤིག་ཤིག་གཡོ་བར་གསལ་གདབ་ལ༔^p153
ཞེས་སྣང་སྲིད་སྣོད་བཅུད་ཐམས་ཅད་འཇའ་དང་འོད་དང་ཐིག་ལེ་ཐིག་ཕྲན་རྣམ་པ་སྣ་ཚོགས་ཀྱིས་གང་ཡོད་ཅིང་། བི་མ་ལ་མི་ཏྲ་དེ་ཡང་འཇའ་འོད་ཀྱི་དཀྱིལ་ན་ཡོངས་སུ་བཞུགས་ཡོད་པ་ཞིག་ཏུ་བསྒོམ་དགོས།^p154
ཡེ་ཤེས་པ་སྤྱན་དྲངས་ཤིང་བསྟིམ༔^p155
ཞེས་དབྱིངས་ནས་ཡེ་ཤེས་པ་རྒྱལ་བ་སྲས་དང་བཅས་པ་ཐམས་ཅད་སྤྱན་དྲངས། ཁྱད་པར་དུ་རྒྱ་ནག་རི་བོ་རྩེ་ལྔ་ནས་བི་མ་ལ་མི་ཏྲ་དཀར་པོ་སེར་པོ་དམར་པོ་ལྗང་གུ་མཐིང་ག་དང་། མཁའ་འགྲོའི་གནས་ནས་ལྕེ་བཙུན་ཆེན་པོ་དཀར་སེར་དམར་ལྗང་མཐིང་གའི་རྣམ་པ་ཅན་དཔག་ཏུ་མེད་པ་བྱོན་ནས་བི་མ་མི་ཏྲ་རྣམས་ནི་མདུན་གྱི་ནམ་མཁའི་བི་མ་མི་ཏྲ་ལ་ཐིམ། ལྕེ་བཙུན་ཆེན་པོ་ནི་རང་ལ་ཡོངས་སུ་ཐིམ་པར་བསྒོམ་དགོས།^p156
མདུན་གྱི་བླ་མ་ལ་གསོལ་བ་གདབ་པ་ནི༔^p157
ཞེས་མདུན་གྱི་ནམ་མཁའ་ན་བི་མ་མི་ཏྲ་བཞུགས་ཡོད་པ་ལ་གསོལ་བ་འདི་ལྟར་གདབ་དགོས་གསུངས།^p158
འོད་གསལ་སྣང་བཞི་མཐར་ཕྱིན་ནས༔ རིག་པ་མི་འགྱུར་སྐུ་ལྔར་བཞེངས༔ འཇའ་ལུས་འཕོ་ཆེན་དྭངས་མའི་གཟུགས༔ འཆི་མེད་བི་མ་མི་ཏྲ་ཀྱེ༔ བདག་ལ་ཐུགས་རྗེས་བརྩེར་དགོངས་ནས༔ མངོན་སུམ་བྱིན་རླབས་དེང་སྩོལ་ཅིག༔^p159
ཅེས་བརྒྱ་སྟོང་ཁྲི་འབུམ་མང་པོ་འདོན་དགོས་ཤིང་། དེ་ཡང་གོང་བཞིན་གཙོ་བོ་བོད་སྐད་ཀྱི་སྟེང་ནས་ཀློག་དགོས།^p160
དེ་ལྟར་གསོལ་བ་བཏབ་ནས།^p161
ཨོཾ་ཨཱཿ ཧཱུྃ་གུ་རུ་བི་མ་ལ་མི་ཏྲ་ཧཱུྃ་ཧཱུྃ༔^p162
ཨོཾ་ཨཱཿ ཧཱུྃ་ཞེས་པ་རྒྱལ་བ་ཐམས་ཅད་ཀྱི་སྐུ་གསུང་ཐུགས་དང་དབྱེར་མེད་པ་དང་། གུ་རུ་བི་མ་ལ་མི་ཏྲ་ཞེས་པ་ལེགས་སྦྱར་གྱི་སྐད་ཡིན། དེ་བོད་ཀྱི་སྐད་དུ་བསྒྱུར་ན་དྲི་མེད་བཤེས་གཉེན་ཟེར། ཧཱུྃ་ཧཱུྃ༔ ཞེས་གཉིས་གསུངས་པ་ནི་བི་མ་ལ་མི་ཏྲ་ཁྱེད་ཀྱིས་བདག་གི་རྒྱུད་ལ་མཆོག་ཐུན་མོང་གི་དངོས་གྲུབ་རྣམ་པ་གཉིས་སྩོལ་ཅིག་ཅེས་པའི་དོན་ཡིན། དེ་ཡང་བརྒྱ་སྟོང་ཁྲི་འབུམ་དུ་མ་བཟླ།^p163
ཉམས་སྐྱེས་པ་ན་དབང་བཞི་བླངས་ནས༔ མཐར་འོད་དུ་ཞུ༔^p164
ཞེས་ཐུན་འཇོག་ཁའམ་ཡང་ན་བླ་མ་ལ་དད་གུས་ཚད་མེད་པ་སྐྱེས་པའི་མཐར་དབང་བཞི་ལེན་དགོས་གསུངས།^p165
དབང་བཞི་ལེན་པའི་དམིགས་རིམ་ནི། བླ་མའི་དཔྲལ་བའི་ཨོཾ་ལས་འོད་ཟེར་དཀར་པོ་ཟླ་བ་ཤར་བ་ལྟ་བུ་འཕྲོས། རང་གི་དཔྲལ་བར་ཐིམ། ལུས་དང་རྩའི་སྒྲིབ་པ་དག ལམ་བསྐྱེད་རིམ་སྒོམ་པ་ལ་དབང་། བུམ་པའི་དབང་དང་སྤྲོས་བཅས་ཀྱི་དབང་ཐོབ། མཐར་ཐུག་སྤྲུལ་སྐུའི་གོ་འཕང་རྒྱུད་ལ་བཞག་པར་བསམ། དེ་ནས་བླ་མའི་མགྲིན་པའི་ཨཿ ལས་འོད་ཟེར་དམར་པོ་དང་ཨཱ་ལི་ཀཱ་ལིའི་ཕྲེང་བ་དཔག་ཏུ་མེད་པ་འཕྲོས། རང་གི་མགྲིན་པར་ཐིམ། ངག་དང་རླུང་གི་སྒྲིབ་པ་དག གསང་སྔགས་བཟླ་བ་ལ་དབང་། གསང་བའི་དབང་དང་སྤྲོས་མེད་ཀྱི་དབང་ཐོབ་པར་གྱུར། མཐར་ཐུག་ལོངས་སྐུའི་གོ་འཕང་རྒྱུད་ལ་བཞག་པར་བསམ། དེ་ནས་བླ་མའི་ཐུགས་ཀའི་ཧཱུྃ་ལས་འོད་ཟེར་མཐིང་ག་དང་ཨ་ཡིག་མཐིང་གསལ་དཔག་ཏུ་མེད་པ་འཕྲོས། རང་གི་སྙིང་ཁར་ཐིམ། ཡིད་དང་ཐིག་ལེའི་སྒྲིབ་པ་དག ཐིག་ལེ་སྒོམ་པ་ལ་དབང་། ཤེར་དབང་དང་ཤིན་ཏུ་སྤྲོས་མེད་ཀྱི་དབང་ཐོབ། མཐར་ཐུག་ཆོས་སྐུའི་གོ་འཕང་རྒྱུད་ལ་བཞག་པའི་སྐལ་བ་ཅན་དུ་གྱུར་སོང་བར་བསམ། སླར་ཡང་བླ་མའི་གནས་གསུམ་དང་ཙིཏྟ་རིན་པོ་ཆེའི་སྦུབས་ནས་འོད་ལྔའི་གོང་བུ་ཚོན་གང་བ་ཞིག་འཕྲོས། རང་གི་གནས་གསུམ་དང་སྙིང་དབུས་སུ་ཐིམ། ཆ་མཉམ་ཡེ་ཤེས་ཀྱི་སྒྲིབ་པ་དག ཚིག་དབང་རིན་པོ་ཆེ་དང་རབ་ཏུ་སྤྲོས་མེད་ཀྱི་དབང་ཐོབ། མཐར་ཐུག་ངོ་བོ་ཉིད་སྐུའི་གོ་འཕང་ཐོབ་པའི་སྐལ་བ་ཅན་དུ་བྱས་པར་གྱུར་སོང་བསམ།^p166
སྨིན་མཚམས་ཀྱི་དགའ་བ་འཁྱིལ་བའི་དབུས་སུ་ཐིམ་པས་ཐིག་ལེ་དཀར་པོ་ཨ་ཡིག་གིས་མཚན་པ་སྲན་མ་ཙམ་དུ་གྱུར་པར་བསམ༔^p167
ཞེས་དབང་བཞིའི་རྗེས་སུ་མདུན་གྱི་ནམ་མཁའི་བི་མ་ལ་མི་ཏྲ་འོད་དུ་ཞུ་ནས་རང་གི་སྨིན་མཚམས་ཀྱི་ཐིག་ལེའི་དབུས་སུ་དགའ་བ་འཁྱིལ་བ་གཡོན་དུ་དྲག་པོ་འཁོར་བ་དེར་ཐིམ་སོང་བར་བསམ། བི་མ་ལ་མི་ཏྲ་མཚོན་བྱེད་ལ་ཨ་ཡིག་དཀར་པོ་སྤུས་བྲིས་པ་ལྟ་བུ་ཞིག་བསྒོམ་དགོས། གོང་དུ་རང་ཉིད་སེཾ་ཧེ་ཤྭ་རར་བསྒོམས་པ་དང་། མདུན་གྱི་ནམ་མཁར་བི་མ་ལ་མི་ཏྲ་བསྒོམས། དེ་ལ་གསོལ་བ་བཏབ་པ་དང་། དབང་བཞི་ལེན་པའི་དམིགས་རིམ་ཚང་མ་ནི་གསོལ་འདེབས་དང་འབྲེལ་བའི་བསྐྱེད་རིམ་གྱི་ཁྲིད་ཡིན།^p168
སྤྲོས་པ་ལ་དགའ་ན་མཆོད་བསྟོད་སོགས་བྱ༔^p169
ཞེས་སྤྲོས་པ་ལ་དགའ་ན་དེའི་རྗེས་སུ་སྨིན་མཚམས་ཀྱི་བླ་མ་ལ་དམིགས་ནས་མཆོད་བསྟོད་སོགས་བྱས་ན་ཆོག་གསུངས།^p170
ལྷའི་གསལ་སྣང་འཇའ་ཚོན་ལྟ་བུ་ལ་ཡུན་རིང་དུ་མཉམ་པར་འཇོག༔^p171
ཞེས་སྣང་བ་ཡང་བདེན་པར་མ་གྲུབ་པའི་འཇའ་ཚོན་ལྟ་བུའི་རང་བཞིན་ཅན་ལ་མཉམ་པར་འཇོག་དགོས་གསུངས།^p172
མཐར་ཐིག་ལེ་ལ་སེམས་བཟུང་༔ སྤྲོས་ན༔ ཨོཾ་ཨཱཿ ཧཱུྃ་བཛྲ་གུ་རུ་སེཾ་ཧེ་ཤྭ་ར་སིདྡྷི་ཧཱུྃ་ཧཱུྃ་ཧཱུྃ༔ ཞེས་དབྱངས་དང་བཅས་པའམ༔ ཇི་ལྟར་རིགས་པས་བཟླ༔^p173
ཞེས་སྨིན་མཚམས་ཀྱི་ཐེག་ལེ་ཨ་ཡིག་གིས་མཚན་པ་དེ་ལ་སེམས་བཟུང་། རང་ཉིད་སེཾ་ཧེ་ཤྭ་ར་ཡིན་པར་བསྒོམས། དེ་ནས་ཨོཾ་ཨཱཿ ཧཱུྃ་བཛྲ་གུ་རུ་ཞེས་དུས་གསུམ་སངས་རྒྱས་ཐམས་ཅད་ཀྱི་སྐུ་གསུང་ཐུགས་དང་དབྱེར་མེད་པ་བླ་མ་སིཾ་ཧེ་ཤྭ་རའམ་སེང་གེ་དབང་ཕྱུག སིཾ་ཧེ་ཤྭ་ར་སརྦ་སིདྡྷི་ཧཱུྃ་ཧཱུྃ་ཧཱུྃ༔ ཞེས་མཆོག་དང་ཐུན་མོང་གི་དངོས་གྲུབ་དམ་པ་སྩོལ་ཅིག་གསུངས། སྔགས་དེ་བརྒྱ་སྟོང་ཁྲི་འབུམ་དུ་མའི་བར་དུ་བཟླ་དགོས། དེ་ཡན་ཆད་ཀྱིས་མདུན་གྱི་བི་མ་ལ་མི་ཏྲ་ལ་སེམས་གཏད་དེ་གསོལ་བ་གདབ་པ་ནི་མདུན་བསྐྱེད་ཀྱི་དམིགས་པ་དང་། རང་ཉིད་སིཾ་ཧེ་ཤྭ་རར་བསྒོམས་ནས་སྣང་གྲགས་རིག་གསུམ་ཐམས་ཅད་ལྷ་སྔགས་ཆོས་ཉིད་ཀྱི་རང་བཞིན་ཅན་དུ་ཤེས་པའི་ངང་ནས་རྩེ་གཅིག་ཏུ་བཟླ་བ་ནི་བདག་བསྐྱེད་ཀྱི་དམིགས་པ་ཡིན། དེ་ནི་གཙོ་བོ་བསྐྱེད་རིམ་གྱི་ཁྲིད་ཡིན།^p174
དེ་ནས་བླ་མའི་རྣལ་འབྱོར་འདི་ཁོ་ནས་བདག་བསྐྱེད་དང་མདུན་བསྐྱེད་གཉིས་ཀ་འཐུས་པར་བྱས་ན་ཡང་ཆོག གལ་སྲིད་དེ་ལས་རྒྱས་པར་འདོད་ན། བླ་རྣམ་གྱི་སིཾ་ཧེ་ཤྭ་ར་སོགས་འདོན་རྒྱུ་འདི་ཡིས་བསྙེན་པ་བྱེད། རྗེས་སུ་སྒྲུབ་པའི་སྐབས་སུ་ལེའུ་གཉིས་པར་བཤད་པ་བཞིན་དུ་བསྙེན་སྒྲུབ་ལས་གསུམ་ལ་རྒྱ་ཆེར་གཞོལ་དགོས།^p175
མཐར་རྡོ་རྗེའི་བཟླས་པ་དལ་བུ་ལ་སེམས་འཛིན༔^p176
ཞེས་རྡོ་རྗེའི་བཟླས་པ་དལ་བུ་ལ་སེམས་འཛིན་པ་ནི་རང་གི་རླུང་ཚུར་རྔུབ་པའི་གནས་སྐབས་ན་ཨོཾ་དཀར་པོའི་རྣམ་པར་གྱུར་ནས་ཚུར་ཡོང་བར་བསམ། ཁོང་དུ་གནས་པའི་གནས་སྐབས་ན་ཨཱཿ ཡིག་དམར་པོ་སྒྲ་དང་ཡིག་འབྲུའི་རང་བཞིན་ཅན་དུ་གནས་སོང་བར་བསམ། ཕར་འཕྲོ་བའི་གནས་སྐབས་ན་ཧཱུྃ་སྔོན་པོ་སྒྲ་དང་བཅས་པའི་རང་བཞིན་དུ་གྱུར་སོང་བར་བསམ། དེ་ལྟར་རྒྱུན་ཆགས་སུ་དབུགས་ཀྱི་འགྲོ་འོང་དང་སྦྱར་ཏེ་བསྒོམ་རྒྱུ་ནི་རྡོ་རྗེའི་བཟླས་པ་ཡིན།^p177
སྐྱོ་ན་སྨིན་མཚམས་ཀྱི་ཐིག་ལེ་ལས་འོད་ཟེར་འཕྲོས༔ དག་པའི་ཞིང་རབ་འབྱམས་ཐམས་ཅད་དུ་ཁྱབ༔ དེ་དག་ན་གནས་པའི་སྐྱབས་གནས་དཀོན་མཆོག་རྒྱ་མཚོ་ཐམས་ཅད་དང་༔ ཁྱད་པར་དུ་འོད་གསལ་སྙིང་ཐིག་གི་བརྒྱུད་པའི་བླ་མ་རྣམས་ཀྱི་གསང་བ་གསུམ་གྱི་བྱིན་རླབས་ཐམས་ཅད་སྐུ་དང་ཡིག་འབྲུ་ཕྱག་མཚན་གྱི་རྣམ་པར་ཆར་དྲག་ཏུ་བབས་པ་ཙམ་དུ་སྤྱན་དྲངས་ནས་ཐིག་ལེ་ལ་ཐིམ་པས་ལུས་ཐམས་ཅད་ཁྱབ་པར་བསམ༔^p179
ཞེས་སྨིན་མཚམས་ཀྱི་ཐེག་ལེ་ལས་འོད་འཕྲོས། ཕྱོགས་བཅུའི་ཞིང་རབ་འབྱམས་ན་བཞུགས་པའི་རྒྱལ་བ་སྲས་བཅས་ཐམས་ཅད་དང་། ཁྱད་པར་དུ་ཆོས་སྐུ་ཀུན་ཏུ་བཟང་པོ་ནས་ད་ལྟའི་རྩ་བའི་བླ་མའི་བར་གྱི་གསང་བ་སྙིང་ཐིག་གི་བླ་མ་བརྒྱུད་པའི་རིམ་པ་ཐམས་ཅད་ནི། སྐུ་ཕྱག་རྒྱ། གསུང་ཡིག་འབྲུ། ཐུགས་ཕྱག་མཚན་གྱི་རྣམ་པར་ཁ་ཆར་བུ་ཡུག་དྲག་ཏུ་འཚུབ་པ་ལྟར་རང་གི་སྨིན་མཚམས་ཀྱི་ཐིག་ལེ་ལ་ཐིམ་པར་བསམ་ནས། རང་གི་རྒྱུད་བྱིན་གྱིས་བརླབས་པའི་དམིགས་པ་འཛིན་དགོས།^p180
ཡང་འཕྲོས་མ་དག་པའི་ཞིང་ཁམས་རབ་འབྱམས་ཐམས་ཅད་ལ་ཁྱབ༔ བརྟན་གཡོ་སྣོད་བཅུད་ཐམས་ཅད་དག་པའི་ཞིང་ཁམས་རབ་འབྱམས་སུ་བསྒྱུར་བར་བསམ་མོ༔^p181
ཞེས་ཡང་འོད་ཟེར་འཕྲོས་ནས་མ་དག་པ་འགྲོ་བ་རིགས་དྲུག་ཕྱི་ནང་སྣོད་བཅུད་ཐམས་ཅད་ལ་ཕོག་ནས། མ་དག་པའི་སྣོད་བཅུད་ཐམས་ཅད་སྦྱངས་ནས་དག་པ་སྐུ་དང་ཡེ་ཤེས་ཀྱི་རོལ་བ་འབའ་ཞིག་ཏུ་གྱུར་སོང་བསམ།^p182
དེ་ནས་སྣོད་བཅུད་ཐམས་ཅད་རིལ་གྱིས་བསྡུས་ཏེ་རང་གི་ལུས་ལ་བཅུག༔ དེ་ཡང་བསྡུས་ཏེ་སྨིན་མཚམས་ཀྱི་ཐིག་ལེ་ལ་ཐིམ་པས་ཤིན་ཏུ་འོད་གསལ་བར་བསམས་ལ་སེམས་ཡུན་རིང་དུ་འཇོག་པས་རྣམ་རྟོག་གི་རྦ་རླབས་ཞི་བའི་ཏིང་ངེ་འཛིན་མུ་མཐའ་མེད་པར་སྐྱེའོ༔ མཐར་དེ་ཡང་འཇའ་ཚོན་མཁའ་ལ་ཡལ་བ་ལྟར་དམིགས་སུ་མེད་པའི་ངང་དུ་མཉམ་པར་འཇོག་གོ༔^p183
ཞེས་གོང་དུ་ཐིག་ལེ་ལ་འཛིན་པ་མན་ཆད་ནས་རྫོགས་རིམ་རེད། དེ་ཡང་ཐིག་ལེ་ལ་དམིགས་ནས་འོད་ཟེར་སྤྲོ་བསྡུ་བྱ་རྒྱུ་དང་། དེ་རྗེས་རྒྱལ་བ་སྲས་བཅས་མཆོད། འགྲོ་དྲུག་གི་ལས་སྒྲིབ་སྦྱང་བར་བྱེད་པ་ལ་སོགས་པ་དེ་མཚན་བཅས་རྫོགས་རིམ་ཡིན། མཐར་འཇའ་ཚོན་མཁའ་ལ་ཡལ་བ་ལྟར་མི་དམིགས་པའི་ངང་ལ་འཇོག་རྒྱུ་ནི་མཚན་མེད་ཀྱི་རྫོགས་རིམ་ཡིན།^p184
དེ་ནི་རྒྱུད་སྡེ་དང་སྒྲུབ་སྡེ་མཐའ་དག་གི་ནང་ནས་གསུངས་པའི་བསྐྱེད་རིམ་དང་རྫོགས་རིམ་གྱི་གནད་ཚང་མ་མན་ངག་གཅིག་ཏུ་དྲིལ་ཏེ་མདོར་བསྡུས་སུ་བཤད་པ་ཡིན། འདིའི་རྗེས་ཐོག་ཏུ་རྫོགས་ཆེན་ཀ་དག་ཁྲེགས་ཆོད་ཀྱི་ལྟ་བ། སྒོམ་པ། སྤྱོད་པ། འབྲས་བུའི་གནད་ཐམས་ཅད་འཆད་རྒྱུ་ཡོད། དེ་ནི་སང་ཉིན་གྱི་ཆོས་ཁྲིད་ཀྱི་སྐལ་བ་ཡིན།^p185
མི་སེམས་སྒྱུར་བའི་ནུས་པ།^p186
ཕྱི་ཟླ་༧པའི་ཚེས་༡༣ཉིན་གྱི་སྔ་མོར། ཆོས་རྗེ་ཉིད་དང་ངེད་ཅག་རླངས་འཁོར་དུ་ཞུགས་ནས་སན་ཧྥི་རན་སའེ་སི་ཁོ་རུ་ཡོད་པའི་ཧྥ་རན་སིའི་གཞུང་ཚབ་ཁང་དུ་ཕྱིན་ཏེ། ཧྥ་རན་སི་ལ་འགྲོ་བའི་ཐོངས་མཆན་དགོད་ཨེ་ཐུབ་བལྟས་པ་ཡིན། སྤྱིར་ངེད་ཅག་གིས་ལམ་ཡིག་དང་གདན་ཞུ་ཡི་གེ་སོགས་འབྲེལ་ཡོད་ཡིག་ཆ་རྣམས་སྔར་ནས་གཞུང་ཚབ་ཁང་དུ་སྤྲད་ཟིན་ཀྱང་། ངེད་ཅག་མི་དྲུག་པོ་དངོས་སུ་གཞུང་ཚབ་ཁང་དུ་མ་སོང་ན་ལོན་ཐབས་མི་འདུག་པས་ཚང་མ་ཕྱིན་པ་ཡིན།^p187
བསམ་ཡུལ་ལས་འདས་པའི་དོན་དག་ཅིག་བྱུང་བ་དེ་ནི། ལོ་ངོ་མང་པོ་འགོར་ཡང་ལྕམ་ཁའེ་ཧེན་རཱེ་（Kay Henry）ཡིས་ད་དུང་ཡང་གསལ་པོར་དྲན་གྱིན་འདུག་པས་མོས་ཕྱིར་དྲན་བྱས་པ་འདི་ལྟར།^p188
ཆོས་རྗེ་འཁོར་བཅས་ཧྥ་རན་སི་རྒྱལ་ཁབ་ལ་འགྲོ་བར་ཐོངས་མཆན་དགོད་པའི་ཆེད་དུ། ངས་ཧྥ་རན་སིའི་གཞུང་ཚབ་ཁང་ལ་རེ་ཞུ་དང་འབྲེལ་གཏུག་ཐེངས་མང་དུ་བྱས་ཀྱང་། ལས་ཁང་དེའི་མགོ་གཙོས་སེམས་ཐག་ཆོད་པོའི་སྒོ་ནས་ཐོངས་མཆན་གཏན་ནས་མ་བཀོད།^p189
ཉིན་དེར། ང་ཚོ་ཚང་མ་མཉམ་དུ་སན་ཧྥི་རན་སའེ་སི་ཁོའི་ཧྥ་རན་སིའི་གཞུང་ཚབ་ཁང་དུ་འབྱོར་སྐབས། ལས་ཀ་པ་རྣམས་ཀྱིས་ལས་ཁང་གི་སྒོ་ཕྱེས་མ་ཐག་ཏུ། བོད་བརྒྱུད་ནང་བསྟན་གྱི་གྲྭ་ཆས་གྱོན་པའི་མི་དྲུག་གློ་བུར་ཁོ་ཚོའི་མིག་ལམ་དུ་མངོན་པ་ལ་ཡ་མཚན་པའི་རྣམ་འགྱུར་སྣ་ཚོགས་བསྟན་སོང་།^p190
ངས་དེ་སྔོན་བཞིན་ནུས་པ་ཡོད་དགུ་སྤྲུགས་ཏེ་ཐོངས་མཆན་དགོད་པར་བརྩོན་ལེན་ཇི་ལྟར་བྱས་ཀྱང་། མགོ་གཙོས་སྔར་བཞིན་རྣམ་འགྱུར་གསལ་པོའི་སྒོ་ནས་ཐོངས་མཆན་བཀོད་མ་བྱུང་། དེའི་ཚེ་ང་རང་ཅི་བྱ་གཏོལ་མེད་དུ་གྱུར་ནས་ཆོས་རྗེ་མཆོག་གི་ཞལ་ལ་བལྟས་པ་ན། ཁོང་གིས་ཀྱང་ང་ལ་གཟིགས་ཙམ་གནང་།^p191
ཡ་མཚན་པ་ཞིག་ལ། བར་སྐབས་དེར་གོ་བརྡ་རྩ་བ་ནས་འཕྲོད་ཐབས་མེད་པའི་ཧྥ་རན་སིའི་མི་དེའི་རྣམ་འགྱུར་ལ་གློ་བུར་དུ་འགྱུར་བ་གནམ་ས་ལྟ་བུ་བྱུང་ནས། ཡིག་ཆ་རྣམས་ཚགས་སྒྲིག་བྱེད་ཞོར་དུ། ཡིག་ཆ་ཚང་འདུག་པས་ཐོངས་མཆན་འགོད་ཆོག་ཅེས་ཚེགས་མེད་དུ་བཀོད་བྱུང་བར་བཤད།^p192
ལྕེ་བཙུན་སྙིང་ཐིག་གི་ཁྲིད་ཐུན་གསུམ་པ།^p193
ཉིན་དེའི་ཕྱི་དྲོར་ཆོས་རྗེ་ཉིད་ཀྱིས་མུ་མཐུད་དུ་ལྕེ་བཙུན་སྙིང་ཐིག་འདི་ལྟར་གསུང་།^p194
དེ་ལ་གང་གསན་པར་བྱ་བ་ནི། ལྕེ་བཙུན་སྙིང་ཐིག་ཆེན་པོ་འདི་ཉིད་འཆད་པར་བྱེད་པའི་དུམ་བུ་དང་པོ་ལ་སྨིན་བྱེད་ཀྱི་དབང་དང་གྲོལ་བྱེད་ཀྱི་གདམས་པ་བསྟན་པ་གཉིས་སུ་ཡོད་པ་ལས་ཕྱི་མའི་སྐབས་སུ་བབས་པ་ཡིན། གྲོལ་བྱེད་ཀྱི་གདམས་པ་ལ་ཡང་སྔོན་འགྲོ་དང་། ལམ་དངོས། ལམ་གྱི་ཆ་ལག་བཤད་པ་དང་གསུམ་ཡོད་པ་ལས། ལམ་དངོས་གཏན་ལ་དབབ་པའི་སྐབས་ཡིན། ལམ་དངོས་གཞི་བླ་མའི་རྣལ་འབྱོར་འདི་ཉིད་གཏན་ལ་དབབ་པ་ལ་བསྐྱེད་རིམ་དང་། རྫོགས་རིམ། རྫོགས་པ་ཆེན་པོ་དང་མཐུན་པར་ཉམས་སུ་བླང་ཐབས་གསུམ་ཡོད་པ་ལས་དང་པོ་གཉིས་ལེགས་པར་བཤད་གྲུབ་ནས། ད་ལྟ་རྫོགས་པ་ཆེན་པོའི་སྐབས་ཡིན། དེ་ལ་ཡང་ཀ་དག་ཁྲེགས་ཆོད་ཀྱི་ལྟ་བ་གཏན་ལ་དབབ་པ་དང་། ལྷུན་གྲུབ་ཐོད་རྒལ་གྱི་བསྒོམ་ཚུལ་བཤད་པ་གཉིས་སུ་ཡོད་པ་ལས། ད་རེས་སྐབས་སུ་བབས་པ་ནི་གཙོ་བོ་ཀ་དག་ཁྲེགས་ཆོད་ཀྱི་ལྟ་བ་གཏན་ལ་དབབ་པ་ཡིན། དེ་ལ་ཡང་ལྟ་བས་གཏན་ལ་དབབ་པ། སྒོམ་པས་ཉམས་སུ་བླང་པ། སྤྱོད་པས་བོགས་དབྱུང་བ། འབྲས་བུས་བཙན་ས་གཟུང་བ་སྟེ་རྣམ་པ་བཞིར་ཡོད་པ་ལས། དང་པོ་ལྟ་བས་གཏན་ལ་དབབ་པ་ནི།^p195
དེའི་ཚེ་འདི་ལྟར་ངེས་པར་བྱ་སྟེ༔ འདི་ལྟར་སྣང་བ་ཐམས་ཅད་བློས་བཀོད༔^p196
ཅེས་དང་པོ་ཕྱི་ཡུལ་དུ་སྣང་བའི་ས་རྡོ་རི་བྲག་ར་བ་ཁང་ཁྱིམ་ལ་སོགས་པ་འདི་དག་ཐམས་ཅད་སེམས་ཀྱི་དབང་གིས་སྣང་ཞིང་། ཐམས་ཅད་སེམས་ཀྱི་ཆོ་འཕྲུལ་ཡིན། དེ་ཡང་དཔེ་ཡི་སྒོ་ནས་ངེས་པར་བྱས་ན། དཔེར་ན་རྨི་ལམ་གྱི་གནས་སྐབས་སུ་རི་མཐོན་པོ་དང་། ཆུ་ཆེན་པོ། འཕྲང་དོག་མོ། བྲག་གཟར་མོ་ལ་སོགས་པ་རྣམ་པ་སྣ་ཚོགས་ཇི་ལྟ་བུ་ཞིག་སྣང་ཡང་། ཕྱི་རོལ་ན་རི་ཡང་མེད། ཆུ་ཡང་མེད། འཕྲང་ཡང་མེད། དེ་བཞིན་དུ་རྟ་གླང་སྐྱེས་པ་བུད་མེད་ལ་སོགས་པ་གང་ཡང་མེད་པར། རང་གི་སེམས་ཀྱི་ཆོ་འཕྲུལ་ཙམ་ཞིག་ཡིན་པ་ཐམས་ཅད་ཀྱིས་ཤེས་སླ་བ་ཡིན། དཔེ་དེ་བཞིན་དུ་ད་ལྟའི་སྣང་བ་འདི་དག་ཐམས་ཅད་ཀྱང་ཕྱི་རོལ་ན་ཐད་ཀར་ཡོད་ཡོད་ལྟར་དུ་སྣང་ཡང་། དོན་གྱི་ངོས་ནས་བསམ་བློ་བཏང་ན་སེམས་ལ་བག་ཆགས་བཞག་པའི་དབང་གིས་ཕྱི་རོལ་ཏུ་སྣང་བ་སྣ་ཚོགས་ཞིག་སྣང་བའམ། རང་གི་སེམས་ཀྱི་ཆོ་འཕྲུལ་ཙམ་ཞིག་མ་གཏོགས་ཕྱི་རོལ་ཏུ་དེ་ལྟ་བུའི་དངོས་པོ་མཚན་མར་གྲུབ་པ་ནི་གང་ཡང་ཡོད་པ་མིན།^p197
ཡང་དཔེར་ན་ཆུ་གཅིག་ལའང་དམྱལ་བའི་འགྲོ་བ་ཞིག་གིས་བལྟས་ན་ཁྲོ་ཆུ་ཁོལ་མ་ཉིད་དུ་མཐོང་བར་འགྱུར། ཡི་དྭགས་རྣམས་ཀྱིས་བལྟས་ན་རྣག་ཁྲག་གི་རང་བཞིན་ཅན་དུ་མཐོང་། མི་རྣམས་ཀྱིས་བལྟས་ན་ཆུའི་རང་བཞིན་དུ་མཐོང་། དེ་བཞིན་དུ་ལྷ་རྣམས་ཀྱིས་བལྟས་ན་བདུད་རྩི་ཡན་ལག་བརྒྱད་ལྡན་གྱི་རང་བཞིན་དུ་མཐོང་། བྱང་ཆུབ་སེམས་དཔའ་རྣམས་ཀྱིས་བལྟས་ན་མཱ་མ་ཀིའི་རང་བཞིན་ཉིད་དུ་མཐོང་། ཐམས་ཅད་ཀྱིས་མཐོང་བ་དེ་ཡང་རང་རང་གི་ལས་དང་སེམས་ཀྱི་དབང་གིས་སྣང་བ་ཙམ་མ་གཏོགས་ཕྱི་རོལ་ན་ཆུ་ཡང་མེད། རྣག་ཀྱང་མེད། ཁྲོ་ཆུ་ཁོལ་མ་ཡང་མེད་པས་གང་ཡང་གྲུབ་པ་མེད།^p199
དེ་བཞིན་དུ་ད་ལྟ་རང་རེའི་ཡུལ་ན་འཁོད་པའི་མི་དང་དུད་འགྲོ་ལྟ་བུ་སྐམ་སར་གནས་པ་རྣམས་ཆུའི་ནང་དུ་མཆོངས་བར་གྱུར་ན། མིག་དང་སྣ་ལ་སོགས་པ་འགག་ནས་གཟུགས་མི་མཐོང་ཞིང་འཆི་བར་འགྱུར་བ་ཡིན། ཡིན་ཡང་ཆུའི་ནང་དུ་གནས་པའི་སྲོག་ཆགས་ཉ་དང་སྲམ་ལ་སོགས་པ་ཐམས་ཅད་ནི། ཆུའི་ནང་དུ་འཚོས་ན་གཟུགས་གསལ་བར་མཐོང་བ་དང་། ལུས་ཀྱི་སྟོབས་རྒྱས་པ་ལ་སོགས་པ་དེ་ཡང་སེམས་ཅན་གྱི་ལས་སྣང་ཙམ་མ་གཏོགས་ཆུ་རང་གི་ངོས་ན་དངོས་པོ་གང་ཡང་གྲུབ་པ་མེད།^p200
གཞན་ཡང་མེ་ལྟ་བུ་གཅིག་ལ་མཚོན་ན་ཡང་། ད་ལྟའི་མི་དང་དུད་འགྲོ་མང་ཆེ་བ་ཞིག་གི་ལུས་ལ་རེག་ན་ཤིན་ཏུ་སྲེག་པ་དང་སྡུག་བསྔལ་སྐྱེད་པར་བྱེད་པའི་བདག་ཉིད་ཅན་ཡིན་ཡང་། མེའི་ནང་དུ་གནས་པའི་མེའི་བྱི་བ་ཞེས་པས་ཟས་གོས་གཉིས་ཀ་མེ་ལ་བརྟེན་ཅིང་། མེ་དོང་ཆེན་པོའི་ནང་ན་རྟག་ཏུ་གནས་ཡོད། རི་དྭགས་མེའི་གཙང་སྦྲ་ཅན་ཞེས་པའང་མེ་དོང་ཆེན་པོའི་ནང་དུ་མཆོངས་ན་ཁོའི་བ་སྤུ་ཐམས་ཅད་ཀྱང་མི་འཚིག་པར་མ་ཟད། བཀྲག་མདངས་རྒྱས་པར་འགྱུར་བ་ཐམས་ཅད་ཀུན་ཀྱང་། ལས་དང་སེམས་ཀྱི་སྣང་བ་ཙམ་མ་གཏོགས་ཕྱི་རོལ་ན་མེ་རང་མཚན་དུ་གྲུབ་པ་ཞིག་གཏན་ནས་མེད་པའི་རྟགས་ཡིན།^p201
འདི་ལྟ་བུའི་གནད་མ་རྟོགས་ནས། འཛམ་བུ་གླིང་ལྟ་བུ་ཞིག་ཕྱི་རོལ་ན་བདེན་བདེན་གྲུབ་གྲུབ་ཏུ་ཡོད་པར་བཟུང་ནས་རྣམ་པར་དཔྱད་ན། ཆོས་ལུགས་གཞན་དང་ཚན་རིག་པ་མང་ཆེ་བས། ཉི་ཟླ་འཆར་ནུབ་དང་དུས་བཞིའི་འཕོ་འགྱུར་སོགས་གང་བཤད་ཀྱང་། གཅིག་ལ་འགྲིག་ཀྱང་ཅིག་ཤོས་ལ་མི་འགྲིག གཅིག་ལ་བདེན་ཡང་ཅིག་ཤོས་ལ་མི་བདེན་པར་གྱུར་ནས་ཅི་བྱ་གཏོལ་མེད་དུ་གྱུར་ཡོད། ནང་པ་སངས་རྒྱས་པ་རྣམས་ཀྱིས། ཐམས་ཅད་སེམས་ཀྱི་བག་ཆགས་ཀྱི་དབང་གིས་སྣང་བ་ཡིན་ཞིང་། ཅིར་ཡང་མ་ཡིན་པ་ལས་ཅིར་ཡང་འཆར་དུ་རུང་བས་སེམས་ཅན་རྣམས་ལ་ལས་སྣང་འདྲ་མིན་སྣ་ཚོགས་ཡོད་པར་འདོད་པ་ཡིན། དེ་ལྟ་བུར་དཔྱད་ན་འཛམ་གླིང་གི་སྣང་ཚུལ་མི་འདྲ་བ་ཅི་སྣང་ཡང་འགལ་བ་མེད་པ་ལྟ་བུར་གྱུར་ཡོད། དེ་ནི་སྣང་བ་ཐམས་ཅད་བློས་བཀོད་ཅེས་པ་དཔེ་དང་དོན་གྱི་སྒོ་ནས་མདོར་བསྡུས་པ་ཙམ་ཁྱེད་རྣམ་པ་ལ་ཞུས་པ་ཡིན། སྤྱིར་དབུ་མ་དང་སེམས་ཙམ་པ་ལ་སོགས་པའི་གཞུང་ལྟར་བྱས་ན་རྒྱ་ཆེར་བཤད་རྒྱུ་ཡོད་མོད། འོན་ཀྱང་མང་པོ་བཤད་ན་གོ་བརྡ་ཡང་འཕྲོད་དཀའ་བས་མདོར་བསྡུས་ཙམ་ཞིག་ཡིན།^p202
ལྕེ་བཙུན་སྙིང་ཐིག་འདིར་ཁྲེགས་ཆོད་བཤད་སྐབས་ཚིག་གཅིག་གཉིས་མ་གཏོགས་མི་འདུག དེ་ནི་ལྕེ་བཙུན་སྙིང་ཐིག་གི་སྙིང་དང་མིག་ལྟ་བུའི་གནད་མཐར་ཐུག་པ་དང་། རྒྱུད་ལུང་མན་ངག་མཐའ་དག་གི་གནད་ཀྱང་ཕྱོགས་གཅིག་ཏུ་བསྡུས་པ་ཞིག་རེད།^p203
ངས་གོང་གི་བཤད་ཚུལ་ལྟར་ཅུང་རྒྱས་པའི་སྒོ་ནས་བཤད་བསམ་ཡང་། རྒྱས་པར་བཤད་ན་གཅིག་ནས་རང་རེའི་དུས་ཚོད་ལ་གཏན་ཁེལ་ཡོད་པས་འགོར་འགྲོ་ཞིང་། གཉིས་སུ་ཁྱེད་རྣམ་པ་ཉམས་ལེན་ངོ་མ་བྱེད་མཁན་རྣམས་ཀྱི་གོ་བ་ཡང་སྒྲིབ་འགྲོ། དེ་མིན་མང་པོ་ཞིག་གཉིད་ཀྱང་དུབ་ཡོང་བར་འདུག་པས། ད་རེས་ངས་ཁྲེགས་ཆོད་ཀྱི་དངོས་གཞི་དེ་ཚིག་ཧ་ཅང་བསྡུས་པའི་སྒོ་ནས་ངོ་སྤྲོད་བྱེད། གོང་གི་འགྲེལ་སྟངས་དེ་ཚང་མས་ཅུང་རྒྱས་ཆེ་སོང་སྙམ་བཞིན་པ་འདྲ། ཡིན་ཡང་རྒྱས་པའི་ནང་ནས་ཆེས་བསྡུས་པ་དེ་ཡིན།^p204
གོང་དུ་སྣང་བ་གང་སྣང་ཐམས་ཅད་སེམས་ཀྱི་ཆོ་འཕྲུལ་ཡིན་པར་གསུངས།^p205
བྱུང་ཚོར་དང་བཅས་པའི་བློ་ནི་མེད་པ་གསལ་བར་སྣང༔^p206
ཞེས་ཕྱི་རོལ་གྱི་སྣང་བ་ཐམས་ཅད་སྣང་ཡོང་བྱེད་ཀྱི་སེམས་དེ་ཇི་ལྟ་བུ་ཞིག་རེད་ཅེ་ན། དེ་ནི་མེད་བཞིན་དུ་སྣང་བ་དཔེར་ན་མེ་ལོང་ནང་གི་གཟུགས་བརྙན་འདྲ་བ་ཡིན། མེད་པ་གསལ་སྣང་ཞེས་པའི་སེམས་འདི་ཇི་ལྟར་མེད་པ་ཡིན་ཞེ་ན། དེ་ལ་གྲུ་བཞི་ཟླ་གམ་ལ་སོགས་པའི་དབྱིབས་མེད་པ་དང་། སེར་པོ་དམར་པོ་སྔོན་པོ་ལ་སོགས་པའི་ཁ་དོག་མེད། དེ་བཞིན་དུ་སྙན་དང་མི་སྙན་བར་མ་སོགས་རྣ་བའི་ཡུལ་དུ་གྲགས་པའི་སྒྲ། ཞིམ་དང་མི་ཞིམ་དྲི་ངན་ལ་སོགས་ཀྱི་དྲི། མངར་བ་དང་། སྐྱུར་བ། ཁ་བ། བསྐ་བ། ལན་ཚ་བ་སོགས་ལྕེའི་ཡུལ་དུ་མྱོང་བའི་རོ། འཇམ་པ་རྩུབ་པ་ལྕི་བ་ཡང་བ་ལ་སོགས་པའི་ལུས་ཀྱི་ཡུལ་དུ་མྱོང་བའི་རེག་བྱ་སོགས་གང་ཡང་མེད། དཔེར་ན་འདོད་ཆགས་ཞེ་སྡང་གཏི་མུག་ལ་སོགས་པ་སྐྱེ་སྐབས་དེའི་ངོ་བོ་ལ་ལྟོས་དང་གང་དུ་ཡང་མེད་ཅིང་། ལུས་ཀྱི་ཕྱི་ནང་བར་གསུམ་གང་དུ་ཡང་མ་གྲུབ་པའི་བདག་ཉིད་ཅན་ཞིག་ཡིན་པས་དེ་ལ་མེད་པ་ཟེར་བ་ཡིན། གསལ་བར་སྣང་བ་ཞེས་དེ་ལྟ་བུའི་གཏན་ནས་མེད་པ་ཡིན་ཡང་ཡས་བསམ་མས་བསམ་རྣམ་པ་སྣ་ཚོགས་ཞིག་བསམ་པ་ལ་ནི་འགག་པ་མེད་པ། དེ་གཉིས་འགལ་བ་མེད་པ་ཡིན་པས་བྱུང་ཚོར་དང་བཅས་པའི་བློ་ནི་མེད་པ་གསལ་བར་སྣང་ཞེས་གསུངས།^p207
དེའི་དབྱིངས་ནི་བསམ་པའི་ཡུལ་ལས་འདས༔^p208
ཞེས་ཡུལ་ཡང་མ་གྲུབ་ལ་ཡུལ་ཅན་ཡང་མ་གྲུབ་པའི་དབྱིངས་དེ་ཇི་ལྟ་བུ་ཞིག་ཡིན་ཞེ་ན། ཡོད་པ་ཡིན་ཞེ་ན་ཡོད་པར་གྲུབ་པའི་དངོས་པོ་གང་ཡང་མེད། མེད་པ་སྟོང་རྐྱང་ཞིག་ཡིན་ཞེ་ན། ཡོད་པ་མ་གྲུབ་ན་མེད་པ་ཡང་འཇོག་ཐབས་མེད། དཔེར་ན་བུམ་པ་མ་ཡོད་ན་བུམ་མེད་ཟེར་རྒྱུ་ཞིག་འཇོག་ཐབས་མེད་པས་མེད་པ་ཡང་མིན། ཡོད་མེད་གཉིས་ཀ་ཡིན་པའི་ཆོས་ཀྱང་འགལ་བ་ཡིན། གཉིས་ཀ་མ་ཡིན་པའི་ཆོས་དེ་ཡང་ཤེས་བྱ་ལ་མི་གྲུབ། དེའི་ཕྱིར་ན་དབྱིངས་ནི་ཡོད་པ་དང་མེད་པ་གཉིས་ཀ་དང་གཉིས་མིན་ཐམས་ཅད་དང་བྲལ་བའི་ཕྱིར་ན། ཚུར་མཐོང་གི་བློས་བསམ་ནས་བཟུང་སྟེ་ཡང་ན་ཡོད་པ་དང་། ཡང་ན་མེད་པ། ཡང་ན་གཉིས་ཀ ཡང་ན་གཉིས་མིན་མ་གཏོགས་བསམ་ལུགས་གཞན་ཞིག་ཡོད་པ་མིན། དེ་གང་གིས་ཀྱང་བསམ་པའི་ཡུལ་ལས་འདས་པ་ཞིག་རེད་གསུངས།^p209
སོ་སོ་རང་རིག་པའི་ཡེ་ཤེས་ཀྱིས་རྟེན་མེད་པར་མཐོང་བ་ནི་ཆོས་ཐམས་ཅད་ཀྱི་གནས་ལུགས་ཀ་དག་གཏིང་གསལ་འདུས་མ་བྱས་པའོ༔^p211
ཞེས་མིག་གི་ཡུལ་དུ་གཏན་ནས་མ་གྱུར་པའི་ཕྱི་རོལ་མུ་སྟེགས་གསང་བ་པའི་བདག་འདྲ་ཞིག་ཡིན་ནམ་ཞེ་ན། དེ་ཡང་མ་ཡིན་ཏེ། ཡུལ་དང་ཡུལ་ཅན་གཉིས་སུ་མེད་ཀྱང་། རང་གི་རང་བཞིན་སོ་སོ་རང་རིག་པའི་ཡེ་ཤེས་ཀྱིས་རྟེན་དང་དམིགས་གཏད་ཐམས་ཅད་དང་བྲལ་བའི་སྒོ་ནས། ཉིན་པར་མིག་ལྡན་གྱིས་གཟུགས་མཐོང་བ་བཞིན་དུ་གསལ་བར་མཐོང་རྒྱུ་ཞིག་ཡོད། དེ་ལྟ་བུའི་རིག་སྟོང་དོན་གྱི་ཡེ་ཤེས་ནི་ཆོས་ཐམས་ཅད་ཀྱི་གནས་ལུགས་ཡིན།^p212
ཀ་དག་གཏིང་གསལ་ཞེས་པའི་ཀ་དག་ནི། སྣང་བ་ཡང་མ་གྲུབ། ཡུལ་ཅན་ཡང་མ་གྲུབ། དེའི་དབྱིངས་ཀྱང་བསམ་བརྗོད་ཀྱི་ཡུལ་ཐམས་ཅད་ལས་འདས་པ་ཡིན་པའི་ཕྱིར་ན་ཀ་ནས་དག་པར་གསུངས། འོན་ཀྱང་སོ་སོ་རང་རིག་པའི་ཡེ་ཤེས་ཀྱིས་རྟེན་མེད་པར་ཉམས་སུ་མྱོང་ཆོག་པའི་ཕྱིར་ན་གཏིང་གསལ་དང་། དེ་རྒྱུ་དང་རྐྱེན་ལ་སོགས་པ་གང་གིས་ཀྱང་མ་བྱས་པའི་འདུས་མ་བྱས་ཀྱི་བདག་ཉིད་ཅན་ཞིག་ཡིན་གསུངས་ཤིང་། དེ་ཡན་ཆད་ནི་ལྟ་བ་ངོ་སྤྲད་པ་ཡིན།^p213
དེ་ལྟར་ཁོང་དུ་ཆུད་པས་ནམ་མཁའ་རྣལ་འབྱོར་དུ་བྱ་སྟེ༔^p214
ཞེས་སྒོམ་པས་ཉམས་སུ་ལེན་ཚུལ་བཤད་པ་སྟེ། ནམ་མཁའ་རྣལ་འབྱོར་ལ་འགྲེལ་ལུགས་མང་པོ་ཞིག་ཡོད་ཀྱང་། ད་རེས་ཀྱི་སྐབས་སུ་བབས་པ་ནི་དཔེ་ནམ་མཁའ་ལ་འཛིན་རྟོག་དང་བྱེད་རྩོལ་གང་ཡང་མེད་པ་ལྟ་བུའི་ཉམས་ལེན་དེ་བསྒོམ་དགོས་གསུངས་པ་ཡིན།^p215
མི་བསྒོམ་པའི་ཚུལ་གྱིས་དོན་དང་མི་འབྲལ་བ་ལ་བསླབ་བོ༔^p216
ཞེས་བསྒོམ་རྒྱུ་ཅི་ཡང་མེད་དེ། ཡོད་པར་མི་བསྒོམ། མེད་པར་མི་བསྒོམ། གཉིས་ཀར་མི་བསྒོམ། གཉིས་མིན་དུ་མི་བསྒོམ། དེ་བཞི་དང་བྲལ་བའི་བསྒོམ་ཚུལ་གཞན་གང་ཡང་མེད། གཡེང་བ་ཡང་མེད་ལ་འབྲལ་བ་ཡང་མེད། རང་བཞིན་ཐ་མལ་གྱི་རྣམ་རྟོག་དང་ཅི་ཡང་མི་བསམ་པའི་ངང་དུ་འབྱམས་སོང་བ་ལྟ་བུ་ཡང་མ་ཡིན་པར། མི་བསྒོམ་པའི་ཚུལ་གྱིས་ཉམས་སུ་བླངས་བ་འདི་ལ་འབད་དགོས་གསུངས། དེ་ནི་བསྒོམ་པ་ཉམས་སུ་བླང་བའི་ཐབས་ཡིན།^p217
ཚོགས་དྲུག་གི་སྣང་བ་བཀྲ་ལམ་གྱིས་ཤར་ན་དེ་ལ་མི་དཔྱོད་པར་ཆོས་ཉིད་རང་གི་ངོ་བོའི་ངང་དུ་རྩོལ་བ་གློད་ལ་ལས་ཟིན་པའི་སྐྱེས་བུ་ལྟར་སྤྱོད་དོ༔^p218
ཞེས་དེས་ནི་སྤྱོད་པ་བསྟན་པ་ཡིན། ཚོགས་དྲུག་ཅེས་པ་ནི། ཡུལ་གྱི་དབང་དུ་བྱས་ན་གཟུགས་སྒྲ་དྲི་རོ་རེག་ཆོས་ཁམས་དང་། ཡུལ་ཅན་གྱི་དབང་དུ་བྱས་ན་མིག་རྣ་བ་སྣ་ལྕེ་ལུས་ཡིད་ཀྱི་ཤེས་པ་རེད། དེ་ལྟ་བུའི་སྣང་བ་དང་ཤེས་པ་གང་ཤར་ཡང་། དེ་ལ་རྣམ་པར་རྟོག་པས་བཟང་ངན་སྙམ་པའི་རྗེས་སུ་མི་འབྲང་ཞིང་དགག་སྒྲུབ་གང་ཡང་མི་བྱ་བར། བསྒོམ་པ་ངང་གིས་ཀློད་ནས་འཇོག་དགོས་གསུངས་པ་ཡིན། དཔེར་ན་བྱ་བ་རླབས་ཆེན་གྲུབ་ཟིན་པའི་སྐྱེས་བུ་ནི་སེམས་བདེ་ཐང་ངེར་འདུག་པ་བཞིན། དགག་སྒྲུབ་དང་རྩོལ་སྒྲུབ་གང་ཡང་མི་བྱེད་པར་རྩལ་སྦྱོང་རྒྱུ་དེ་ལ་སྤྱོད་པ་ཞེས་གསུངས།^p219
དེའི་ཚེ་རླུང་སེམས་ཟིན་པའི་རྟགས་རྣམས་ཀྱང་རྩོལ་མེད་དུ་འབྱུང་ཞིང་འོད་གསལ་བའི་ལྷག་མཐོང་གྲུབ་པས་ཞི་བར་གནས་པ་ཉིད་དོ༔^p220
ཞེས་རླུང་སེམས་རྩེ་གཅིག་ཏུ་གནས་པའི་སྟོབས་ཀྱིས་སྟོང་གཟུགས་ཀྱི་རྟགས་སྣང་རྣམས་འབྱུང་བ་དང་། རིག་པ་རང་གི་ངོ་བོ་ངོ་ཤེས་ཤིང་རྩལ་རྫོགས། བརྟན་པ་ཐོབ་པ་ལ་སོགས་པའི་འབྲས་བུའི་ཡོན་ཏན་ཐམས་ཅད་ཀུན་ཀྱང་ཡོངས་སུ་འབྱུང་བར་འགྱུར་གསུངས་ནས། ཞི་གནས་དང་ལྷག་མཐོང་གི་འབྲས་བུ་བཤད་པ་རེད། དེ་ཡན་ཆད་དུ་རྫོགས་པ་ཆེན་པོའི་ཀ་དག་ཁྲེགས་ཆོད་ཀྱི་ལྟ་སྒོམ་སྤྱོད་པ་འབྲས་བུ་དང་བཅས་པ་གསལ་བོར་བཤད་གྲུབ་པ་ཡིན།^p221
དེ་ནས་བསྐྱེད་རིམ་དང་། རྫོགས་རིམ། རྫོགས་ཆེན་གསུམ་གྱི་ཉམས་ལེན་གྱི་གནད་ཚང་བའི་བླ་མའི་རྣལ་འབྱོར་བསྒོམ་པའི་ཕན་ཡོན་བསྟན་པ་ནི།^p222
རྣལ་འབྱོར་འདི་བདུན་ཕྲག་གཅིག་ཏུ་གཡེང་བ་ཐམས་ཅད་སྤངས་ཏེ་བསྒོམ་པས་ཀྱང་དངོས་སམ་ཉམས་དང་རྨི་ལམ་དུ་གྲུབ་པ་ཆེན་པོའི་ཡེ་ཤེས་ཀྱི་སྐུ་བརྙེས་པ་བི་མ་མི་ཏྲ་དང༔ བདག་ཉིད་སིཾང་ཧེ་ཤྭ་རས་ངེས་པར་བྱིན་གྱིས་རློབས་ཏེ༔ དེའི་ཚེ་སྔར་མ་ཤེས་པའི་ཟབ་མོའི་ཚིག་དོན་མང་དུ་ཤེས་པ་དང་༔ ཏིང་ངེ་འཛིན་གྱི་སྒོ་རྙེད་པར་གདོན་མི་འཚལ་ལོ༔^p223
ཞེས་འདིའི་སྐབས་སུ་གོ་དགོས་པ་ཞིག་ཡོད་དེ། གཡེང་བ་ཐམས་ཅད་སྤངས་ནས་ཞག་བདུན་ལ་སྒོམས་དང་། བི་མ་མི་ཏྲ་དང་སིཾང་ཧེ་ཤྭ་རས་མངོན་སུམ་དུ་རྗེས་སུ་གཟུང་ཡོང་གསུངས། དེང་སང་གི་མི་རྣམས་ཀྱིས་ཆོས་ཀྱི་གནད་ནི་མ་རྟོགས། ཡས་བསམ་མས་བསམ་གྱི་རྣམ་རྟོག་ནི་ཤིན་ཏུ་མང་པོ་ཡོད་པས། མི་འགའ་ཞིག་གིས་ཁོ་བོའི་བླ་རྣམ་འདི་ཉི་མ་བདུན་མ་ཟད་ཟླ་བ་གཅིག་གི་ཡུན་དུ་མཚམས་ལ་བསྡད་ནས་བསྒོམས་ནའང་རྨི་ལམ་བཟང་པོ་ཞིག་ཀྱང་རྨི་རྒྱུ་མི་འདུག་སྙམ་ན། རྩ་ཚིག་ནང་དུ་རྣལ་འབྱོར་འདི་གཡེང་བ་ཐམས་ཅད་སྤངས་ཏེ་ཞག་བདུན་ཕྲག་གཅིག་ཏུ་བསྒོམ་པས་ཞེས། གཡེང་བ་ཐམས་ཅད་སྤངས་ཟེར་བ་ཡང་བསྐྱེད་རིམ་དང་རྫོགས་རིམ། རྫོགས་ཆེན་གང་རུང་དང་། ཡང་ན་གསུམ་ཆར་ཡིན་ནའང་དེའི་ཉམས་ལེན་གྱི་ངང་ནས་སྐད་ཅིག་མ་གཅིག་དང་སེ་གོལ་གཅིག་གི་རིང་ལའང་མ་འབྲལ་བར་ཞག་མ་བདུན་གྱི་བར་དུ་བསྒོམ་གསུངས་པ་ཡིན། ཞག་རེ་ལ་ཆུ་ཚོད་ཉི་ཤུ་རྩ་བཞི་རེ་ཡོད་པས། དེ་ལྟར་ཞག་མ་བདུན་ལ་སྒོམས་དང་གང་ལྟར་ཡང་རྨི་ལམ་དུ་བི་མ་མི་ཏྲས་རྗེས་སུ་མི་འཛིན་པ་མི་སྲིད་གསུངས་པ་ཡིན། དེ་མ་ཐུབ་ནའང་གལ་ཏེ་ཉི་མ་རེ་རེ་ལ་ཡིག་བརྒྱ་ཚར་རེ་ཙམ་གྱི་ཡུན་ལ་སྒོམ་ཐུབ་ན། དེ་མཐུད་ནས་ཞག་མ་བདུན་གྱི་ཁ་ཅི་ཙམ་ཞིག་གིས་གང་ཐུབ། ལ་ལས་ལོ་གསུམ་ལ་བསྒོམས་ནའང་ད་རུང་གཡེང་བ་ཐམས་ཅད་སྤངས་བའི་ཞག་བདུན་གྱི་གོ་ཆོད་ཡོད་རྒྱུ་མ་རེད། དེས་ན་དེང་སང་ནང་པ་སངས་རྒྱས་པའི་ཆོས་པ་འགའ་ཞིག་གིས་ཀྱང་། ནང་པ་སངས་རྒྱས་པའི་ཆོས་ཀྱི་ནང་ན་བཤད་པ་ལྟར་འབྲས་བུ་མི་འདུག་ཅེས་དང་པོ་ཚུར་ཞུགས་ཀྱང་རྗེས་སུ་ཕྱིར་ནུར་རྒྱག་མཁན་མང་པོ་ཡོད། འདི་ལྟ་བུའི་དོན་ལ་བརྟག་དཔྱད་ཞིབ་མོ་གཏང་དགོས། བཅོམ་ལྡན་འདས་ཀྱིས་གསུངས་པའི་ཆོས་འདི་ཁོ་རང་གི་གཞུང་ལས་གསུངས་ཡོད་པ་ལྟར་དུ་བསྒྲུབས་ཀྱང་མ་འགྲུབ་ན་སངས་རྒྱས་ཀྱི་གསུང་དེ་རྫུན་རེད། འོན་ཀྱང་གཞུང་རང་གི་ནང་དུ་དེ་ལྟར་གསུངས་ཡོད་པ་ལྟར་བསྒྲུབས་ན་འབྲས་བུ་ངེས་པར་འགྲུབ་པ་ཡིན།^p224
དེས་ན་ཞག་མ་བདུན་གྱིས་འགྲུབ་རྒྱུ་ཞིག་གཏན་ནས་སྲིད་རྒྱུ་མ་རེད་སྙམ་ན། ཞག་བདུན་ཟེར་བ་ནི་དུས་ཚོད་ཀྱིས་མཚམས་བཟུང་བ་རེད། རང་རེ་དངོས་གནས་དུས་ཚོད་བརྒྱ་དང་དྲུག་ཅུ་རེ་བརྒྱད་ཀྱི་ཡུན་ལ། གཡེང་བ་ཐམས་ཅད་སྤངས་ནས་སྒོམ་པའི་དབང་དུ་བྱས་ན་འགྲུབ་པར་གསུངས། དེ་སྒོམ་ཐུབ་བམ་ཞེ་ན་ཐུབ་སྟེ། བླ་མ་བཟང་པོ་མང་ཆེ་བས་ཞག་བདུན་གྱི་བར་རྣམ་རྟོག་གི་འགྱུ་བ་མེད་པའི་ངང་དུ་བསྒོམས་ནས་འབྲས་བུའང་གྲུབ་པ་ཡིན་ལ། ལ་ལས་ཞག་མ་བཅུ་བཞི། ལ་ལས་ཞག་མ་ཉི་ཤུ་རྩ་གཅིག ལ་ལས་ལོ་གཅིག་དང་གཉིས་སོགས་ལོ་མང་པོའི་རྗེས་སུ་འགྲུབ་པ་ཡང་ཡོད། དེ་འགྲུབ་གཏན་ནས་མི་སྲིད་པ་མ་ཡིན་པར་དུས་ཚོད་ཀྱིས་ཚད་བཟུང་བ་ལྟར་དུ་རེད། དུས་ཚོད་བརྒྱ་དང་དྲུག་ཅུ་རེ་བརྒྱད་ཙམ་ཞིག་གི་ཡུན་ལ། རྣམ་རྟོག་ཐམས་ཅད་མེད་པ་ཞིག་ནམ་བསྒོམ་ཐུབ་ན་དེའི་སྐབས་སུ་འབྲས་བུ་འགྲུབ་ཡོང་གསུངས། དེ་ཡན་ལམ་གྱི་དངོས་གཞི་སོང་བ་ཡིན།^p225
གསུམ་པ་ལམ་གྱི་ཆ་ལག་བཤད་པ་ནི།^p226
ལམ་གྱི་ཡན་ལག་ནི་འདི་དག་ཡིན་ཏེ༔ སྔོན་ཏུ་ལྟེ་འོག་སོར་བཞིའི་ཐད་དུ་བཅོམ་ལྡན་འདས་རྡོ་རྗེ་སེམས་དཔའ་བསྒོམས་ལ་སྔགས་བཟླས་པའི་རྐྱེན་གྱིས་ཡེ་ཤེས་ཀྱི་མེ་འབར་བས་འཁོར་ལོ་བཞིའི་གནས་ཐམས་ཅད་ཁྱབ་པས་སྒྲིབ་པ་བཞི་བསྲེག་པར་བསམ་མོ༔^p227
ཞེས་རྡོར་སེམས་བསྒོམ་བཟླས་ཀྱི་ཁྲིད་ནི། ལྟེ་འོག་སོར་བཞིའི་གནས་སུ་བཅོམ་ལྡན་འདས་རྡོ་རྗེ་སེམས་དཔའ་དམར་པོ་ཞིག་བསྒོམ། རང་གིས་རླུང་བཟུང་བའི་རྐྱེན་གྱིས་དེའི་སྐུ་ལས་ཡེ་ཤེས་ཀྱི་མེ་འབར། ལུས་ཀྱི་ནད་གདོན་སྡིག་སྒྲིབ་རྩ་རླུང་ཐིག་ལེའི་མ་དག་པའི་ཆ་ཐམས་ཅད་ཡོངས་སུ་དག་པར་གྱུར་སོང་སྙམ་དུ་རྡོ་རྗེ་སེམས་དཔའི་ཡི་གེ་བརྒྱ་པའི་བསྒོམ་བཟླས་དགོས་གསུངས།^p228
མཐར་སྤྱི་བོའི་ཧྃ་ཡིག་ལ་རེག་པས་སངས་རྒྱས་ཐམས་ཅད་འདུས་པའི་བདུད་རྩིའི་རྒྱུན་བྱུང་བས་འཁོར་ལོ་བཞིའི་གནས་གསོས་བཏབ་སྟེ་བླ་མ་སྐུ་བཞིའི་དཀྱིལ་འཁོར་མཆོག་ཏུ་མཉེས་པར་བསམ་ལ༔ མ་ཧཱ་སུ་ཁ་བཛྲ་ས་ཏྭ་ཨ་ཧཾཿ ཞེས་བརྗོད་པར་བྱའོ༔^p229
ཞེས་མཎྜལ་གྱི་ཁྲིད་ནི། ལྟེ་འོག་གི་བླ་མ་རྡོ་རྗེ་སེམས་དཔའི་སྐུ་ལས་ཡེ་ཤེས་ཀྱི་མེ་འབར། སྤྱི་བོའི་སངས་རྒྱས་ཐམས་ཅད་འདུས་ཤིང་དྲན་པ་ཙམ་གྱིས་བདེ་སྟོང་བསྐྱེད་པའི་ཧྃ་ཡིག་ལས་བདུད་རྩིའི་རྒྱུན་བབས། སྤྱི་བོ་དང་། མགྲིན་པ། སྙིང་ཁ། ལྟེ་བའི་རྩ་གནས་བཞི་བོ་ཡོངས་སུ་གང་། དེ་ལ་བཞུགས་པའི་སྐུ་རྡོ་རྗེ་དང་། གསུང་རྡོ་རྗེ། ཐུགས་རྡོ་རྗེ། ཡེ་ཤེས་རྡོ་རྗེའི་བླ་མ་རྣམས་མཉེས་ཤིང་། རང་གི་རྒྱུད་ལ་དགའ་བ་བཞི་དང་སྟོང་པ་བཞིའི་ཡེ་ཤེས་སྐྱེས་པར་བསམས་ནས་མ་ཧཱ་སུ་ཁ་བཛྲ་ས་ཏྭ་བརྗོད། མ་ཧཱ་ནི་ཆེན་པོ་དང་། སུ་ཁ་ནི་བདེ་བ། བཛྲ་ས་ཏྭ་ནི་རྡོ་རྗེ་སེམས་དཔའ། ཨ་ཧཾ་ནི་བདེ་བ་ཆེན་པོའི་ཡེ་ཤེས། དེ་ལྟ་བུའི་བདེ་བ་ཆེན་པོའི་ཡེ་ཤེས་རྒྱུད་ལ་སྐྱེས་སོང་སྙམ་པ་ནི་ནང་གི་བསྲེག་བླུག་གི་ཚུལ་གྱི་མཎྜལ་གྱི་ཁྲིད་རེད།^p230
ཁྱེད་རྣམ་པས་ཉམས་སུ་ལེན་པའི་གནས་སྐབས་ན་ངག་འདོན་དང་སྦྲགས་ནས་བསྒོམ་ན་བདེ་རྒྱུ་རེད། ད་ནི་དུས་བཞི་སངས་རྒྱས་མཉམ་སྦྱོར་གྱི་སྒོམ་པ་ཞེས། ཉིན་པར་དང་ནམ་སྟོད། ནམ་ལངས་ཁའི་ཐོ་རེངས། སྲོད་རྣམས་ཀྱི་སྒོམ་སྟངས་བཞི་པོ་དེ་འོག་ཏུ་འཆད་རྒྱུ་ཡིན།^p231
དང་པོ་ཉིན་པར་སྣང་བ་རྒྱ་ཡིས་གདབ་པའི་ཁྲིད་ནི།^p232
ཉིན་པར་དུས་སུ་སྒོ་ཡུལ་རླུང་རིག་གི་གནད་ལ་བརྟེན་ནས་རླུང་སེམས་རྡོ་རྗེ་ལུ་གུ་རྒྱུད་ཀྱི་དྲ་བར་བཙུད་ལ་ལྷུན་གྲུབ་བསྒོམ་མོ༔^p233
ཞེས་ཉིན་པར་ལུས་བཞུགས་སྟངས་གསུམ་དང་། ངག་གི་སྨྲ་བ་བཅད། ཡིད་རྩེ་གཅིག་ཏུ་བཞག་ནས་ཐོད་རྒལ་གྱི་གནད་ལ་རྩེ་གཅིག་ཏུ་སྒོམ་པར་བྱེད་པ་ལ་ཟེར།^p234
གཉིས་པ་ནམ་སྟོད་ཤེས་བྱ་བུམ་པར་གཞུག་པའི་མན་ངག་ནི།^p235
མཚན་མོ་སྙིང་དབུས་སམ་སྨིན་མཚམས་ཀྱི་ཐིག་ལེ་ཨ་ཡིག་དང་བཅས་པ་ལ་སེམས་རྩེ་གཅིག་ཏུ་བཟུང་ཞིང་འོད་གསལ་བ་བསྒོམ་མོ༔^p236
ཞེས་མཚན་མོ་རྨི་ལམ་ཟིན་པར་འདོད་ན་སྨིན་མཚམས་སུ་ཨ་དཀར་པོ་ལ་སེམས་འཛིན་དགོས་ཤིང་། མཚན་མོ་འོད་གསལ་ཟིན་པར་འདོད་ན་སྙིང་ནང་དུ་ཨ་དཀར་བོ་འོད་དང་འོད་ཟེར་འཕྲོ་བ་ཞིག་ལ་སེམས་བཟུང་ནས་གཉིད་དགོས་གསུངས་ཤིང་། དེ་ནམ་གུང་ཤེས་བྱ་བུམ་པར་གཞུག་པའི་གདམས་ངག་ཡིན།^p237
གསུམ་པ་ཐོ་རངས་རིག་པ་དྲུངས་སུ་གཞུག་པའི་མན་ངག་ནི།^p238
ཐོ་རངས་ཧ་ཧ་ཞེས་རླུང་བསངས་ནས་ནམ་མཁའི་དཀྱིལ་དུ་རང་བྱུང་གསང་བ་ཆེན་པོའི་ཡི་གེ་ཨ་གསལ་ཞིང་འབར་བ་ལ་ཡིད་མིག་རླུང་གསུམ་མདུང་ཚུགས་སུ་གཏད་དེ་རིག་པ་དྲུངས་སུ་བཅུག་གོ༔^p239
ཞེས་ནངས་དུས་སུ་ཁ་ནང་ནས་ཧ་ཧ་ཞེས་རླུང་ལན་གསུམ་བུས། དེ་ནས་སྙིང་ནང་གི་ཨ་ཡིག་དེ་མདུན་གྱི་ནམ་མཁའ་ལ་ཨ་དཀར་པོ་འོད་དང་འོད་ཟེར་འཕྲོ་བ་ཞིག་ལིངས་སེ་ཡོད་པ་ལ་སེམས་བཟུང་ན། རིག་པ་བྱིང་རྨུགས་ལ་སོགས་ཀྱིས་དུབ་ཆ་མེད་པར་དྭངས་བར་འགྱུར་གསུངས། དེ་ནས་མན་ངག་གཞན་ཐམས་ཅད་ཀྱི་ནང་ན་སྲོད་ལ་དབང་པོ་གནས་སུ་བསྡུ་བ་ཞེས་བདེ་སྟོང་གི་ལམ་སྒོམ་ཚུལ་ཞིག་ཡོད་པ་གོང་དུ་རྡོར་སེམས་བསྒོམ་བཟླས་ཀྱི་སྐབས་སུ་བཤད་པ་དེས་འཐུས་པས་གཞན་བཤད་མི་དགོས་པར་འདུག^p240
རྣམ་པ་ཀུན་ཏུ་རང་རིག་པ་སྐད་ཅིག་མའི་ངང་བསྐྱངས་བས་འཁྲུལ་པའི་རྟོག་ཚོགས་ཐམས་ཅད་སྤྲིན་ནམ་མཁའ་ལ་དེངས་པ་ལྟར་རང་གྲོལ་བ་ལ་བསླབ་བོ༔^p241
ཞེས་དུས་རྒྱུན་དུ་ཀ་དག་ཁྲེགས་ཆོད་ཀྱི་ལྟ་བའི་ངང་དུ་རྩེ་གཅིག་ཏུ་བཞག་ན། རྣམ་རྟོག་ཐམས་ཅད་སྤྲིན་ནམ་མཁའ་ལ་དེངས་བ་བཞིན་དབྱིངས་སུ་དེངས་པར་འགྱུར་གསུངས་ཤིང་། དེ་དག་ནི་ཚེ་འདིར་གྲོལ་བར་བྱེད་པའི་མན་ངག་ཡིན།^p242
འཆི་ཁ་གྲོལ་བའི་མན་ངག་རྣམ་པ་གཉིས་ཡོད་པས་དེ་འཆད་པ་ལ། དང་པོ་ནམ་མཁའ་སུམ་སྤྲུགས་ཀྱི་མན་ངག་ནི།^p243
ཚེ་འདི་ཉིད་ལ་གོ་འཕང་མཆོག་མ་འགྲུབ་ན་ནམ་མཁའ་སུམ་སྤྲུགས་ཀྱི་སྦྱོར་བས་མྱ་ངན་ལས་འདའ་བར་བྱའོ༔^p244
ཞེས་ཚེ་འདི་ལ་སངས་རྒྱས་ཀྱི་གོ་འཕང་མ་ཐོབ་ན། འབྱུང་འགྱུར་འཆི་བའི་སྐབས་སུ་ཕྱི་རོལ་ཡུལ་གྱི་ནམ་མཁའ་སྟོང་པ་དང་། ནང་གི་མིག་རྩ་སྟོང་པ། གསང་བ་རིག་པ་སྟོང་པ་གསུམ་ལ་རྩེ་གཅིག་ཏུ་གཏད་དེ་མཉམ་པར་བཞག་ནས་འཕོ་བར་བྱ་རྒྱུ་ལ་ཟེར།^p245
གཉིས་པ་འཕོ་བའི་མན་ངག་བཤད་པ་ནི།^p246
ཡང་ན་རླུང་སེམས་ཐིག་ལེ་ཨ་ཡིག་དང་བཅས་པ་ལ་སེམས་རྩེ་གཅིག་ཏུ་བསྡུས་ཏེ་ཚངས་པའི་ལམ་ནས་བླ་མའི་ཐུགས་ཀར་བསྟིམས་ལ་མེ་རི་འབར་བ་ལ་སོགས་པར་གཤེགས་སུ་གསོལ་བར་བྱའོ༔^p247
ཞེས་འཆི་བའི་སྐབས་སུ་རང་སེམས་སྙིང་ནང་དུ་ཨ་ཡིག་དཀར་པོ་བསྒོམས། སྤྱི་གཙུག་གི་བླ་མ་ལ་གསོལ་བ་རྩེ་གཅིག་ཏུ་བཏབ་པའི་མཐུས། སྙིང་ནང་གི་ཨ་ཡིག་ཚངས་པའི་ལམ་ནས་ཐོན་ཏེ་ཇེ་མཐོ་ཇེ་མཐོར་སོང་ནས་བླ་མའི་ཐུགས་ཀར་ཐིམ། བླ་མ་ཡང་མཐར་ཇེ་མཐོ་ཇེ་མཐོར་མེ་རི་འབར་བའི་ཞིང་ཁམས་སུ་གཤེགས་པར་བསྒོམ་པར་གསུངས།^p248
དེ་ནས་ཆོས་ཉིད་བར་དོ་འཆར་བས་དེར་གྲོལ་བའི་མན་ངག་བཤད་པ་ནི།^p250
གལ་ཏེ་བར་དོའི་སྣང་བ་ཅི་ཤར་ཡང་རིག་པ་རང་མལ་ལས་མ་གཡོས་པ་མི་འགྱུར་བ་གསེར་གྱི་ཐུར་མ་ལྟ་བུའི་གནད་དྲན་པར་བྱའོ༔^p251
ཞེས་བར་དོར་སྒྲ་འོད་ཟེར་སྐུ་ལ་སོགས་པའི་སྣང་བ་གང་ཤར་ཡང་། ཁྲེགས་ཆོད་རིག་པ་རང་མལ་ལས་མ་གཡོས་པར་རྩེ་གཅིག་ཏུ་འཇོག་པ་ལ། མི་འགྱུར་བ་གསེར་གྱི་ཐུར་མ་ལྟ་བུའི་གདམས་ངག་ཟེར་བ་ཡིན་གསུངས།^p252
ཅུང་ཟད་སྤྲོས་པ་དང་བཅས་པས་ནི་ཚོགས་ཀྱི་འཁོར་ལོའི་འདུ་བ་ལ་སོགས་པ་ཇི་ལྟར་རིགས་པའི་དུས་སུ་ལོངས་སྤྱད་དོ༔^p253
ཞེས་གཞན་ཡང་སྤྲོས་པ་དང་བཅས་པའི་གང་ཟག་ཐམས་ཅད་ཀྱིས་སྤྱིར་ཚོགས་ཀྱི་འཁོར་ལོ་བྱེད་དགོས་ཀྱང་། རྣལ་འབྱོར་པ་རྟོགས་པ་མཆོག་ལྡན་མ་གཏོགས་ཚོགས་ཀྱི་འཁོར་ལོ་དངོས་མི་ཡོང་། དེ་མ་ཡོང་ནའང་ཡར་ངོའི་ཚེས་བཅུ་དང་མར་ངོའི་ཉེར་ལྔའི་དུས་སུ་ཚོགས་ཀྱི་མཆོད་པ་ཙམ་བྱས་པ་ལ་ཡང་ཕན་ཡོན་ཚད་མེད་པ་ཡོད་པས། ཚོགས་ཀྱི་མཆོད་པ་སོགས་ལ་རྒྱ་ཆེར་འབད་དགོས་པར་གསུངས། འོ་ཡ། དེ་རིང་ཆོས་ཁྲིད་ཀྱི་མཚམས་འདི་ནས་འཇོག^p254
སྲོག་ཆགས་གླིང་གར་ཕེབས་པ།^p255
ཕྱི་ཟླ་༧པའི་ཚེས་༡༤ཉིན་གྱི་སྔ་དྲོར། ཆོས་རྗེ་ཉིད་ཝཱལ་ལེ་ཧཱོའི་（Vallejo）མཚོ་གླིང་སྐྱེད་ཚལ་དུ་གཟིགས་སྐོར་ལ་ཕེབས། དེ་ནི་དེར་འཁོད་ཀྱི་ཨ་རིའི་ཆོས་པ་དང་བོད་རིགས་རྣམས་ཧ་ཅང་དགའ་བའི་གནས་ཤིག་ཀྱང་ཡིན། གླིང་ག་འདི་ནི་སྲོག་ཆགས་གླིང་ག་གཞན་ལྟར་སྲོག་ཆགས་ཚང་མ་གཟེབ་དྲྭའི་ནང་དུ་བཙུད་འདུག་པ་མ་ཡིན་པར། མིས་ལྟ་སྐྱོང་དང་སྦྱོང་བརྡར་གང་ལེགས་བྱས་ཏེ་ཚང་མ་གཏན་ཁེལ་གྱི་ཁོར་ཡུག་རྣམས་སུ་རང་དབང་གིས་འགྲོ་འདུག་བྱེད་ཅིང་། སྤྲོ་འཁྱམ་པ་རྣམས་དང་རྩེ་དགའ་མཉམ་རོལ་བྱེད་ཀྱིན་འདུག^p256
ཉིན་དེར་ནམ་མཁའ་དྭངས་ཤིང་ཉི་འོད་རབ་ཏུ་འཚེར། ཆོས་རྗེ་ཉིད་ཁྲེའུ་འཁོར་ལ་བཞུགས་ཤིང་ཕྱག་ཏུ་རྒྱང་ཤེལ་ཆུང་ངུ་ཞིག་བསྣམས་ནས། ལྗོན་ཤིང་ཚར་དུ་དངར་ཞིང་འདབ་ཆགས་ཀྱིས་དབྱངས་སྙན་ཅི་དགར་སྒྲོག་པ། དཀར་དམར་མེ་ཏོག་གི་བསུང་ཞིམ་ཕྱོགས་ཀུན་འཐུལ་བའི་མཛེས་ལྗོངས་ཉམས་དགའ་བ་དེར། ཆེད་བསྐོས་མི་སྣས་ལྟ་སྐྱོང་བྱས་ཤིང་རང་བྱུང་གི་འཇིགས་པ་བྲལ་བའི་སྲོག་ཆགས་རྣམས་ཅི་དགར་རྒྱུ་བ་ལ་གཟིགས་མོ་མཛད། ཅུང་ཟད་རྒྱང་རིང་པོར་ཡོད་པ་རྣམས་ལ་རྒྱང་ཤེལ་གྱིས་གཟིགས་ཤིང་ཐུགས་སྣང་ཧ་ཅང་སྤྲོ་མོ་བྱུང་།^p257
གནས་འདིར་མཚོ་གླིང་སྐྱེད་ཚལ་ཞེས་མིང་བཏགས་འདུག་ཀྱང་། གླིང་ག་དེར་སྐམ་སའི་སྲོག་ཆགས་ཀྱང་མང་པོ་ཡོད་པར་མ་ཟད། ང་ཚོར་འདྲིས་ཆེ་བའི་བོད་ཡུལ་གྱི་འབྲི་གཡག་ཀྱང་མཐོང་བྱུང་། ཐོག་མར་སྲོག་ཆགས་ཆེ་རིགས་ཀྱི་འགྲེམ་ཁུལ་དུ། དེ་སྔོན་ང་ཚོས་རིག་མ་མྱོང་བའི་སྲོག་ཆགས་མང་པོར་མཐོང་བས་ཧ་ཅང་ངོ་མཚར་བར་གྱུར། དེ་ནས་ཐོག་ཁེབས་མེད་པའི་འཁྲབ་སྟོན་ཁང་ཆེན་པོ་ཞིག་ཏུ། མཚོ་ཕག་གིས་ཉམས་མཚར་བའི་འཁྲབ་སྟོན་བྱེད་པ་ལ་ལྟད་མོ་བལྟས། མཚོ་ཕག་དེ་དག་ལ་ཡུན་རིང་པོར་མིས་སྦྱོང་བརྡར་བྱས་པས་འཁྲབ་སྟོན་སྒྱུ་རྩལ་ལ་ཤིན་ཏུ་བྱང་ཆུབ་པར་གྱུར་འདུག་སྟེ། སྐབས་རེར་མི་དང་མཉམ་དུ་ཆུ་རྩེད་འགྲན་ཞིང་། ཐེངས་རེར་ཆུ་དཀྱིལ་ནས་ཀྲོང་ངེར་ལངས་པ་སོགས་འཁྲབ་སྟོན་སྣ་ཚོགས་བསྟན་པས། ལྟད་མོ་བའི་དགའ་བསུའི་ཐལ་སྒྲ་རྒྱུན་མི་ཆད།^p259
ཐོག་མར་རྗེ་ཉིད་ཐུགས་སྣང་ཧ་ཅང་སྤྲོ་ཞིང་དགྱེས་པར་འདུག་ཀྱང་། ཅུང་ཙམ་ནས་སྨིན་མཚམས་བསྡུས་ཤིང་སྐྱོ་བའི་རྣམ་འགྱུར་དང་བཅས་ཏེ། སེམས་ཅན་འདི་དག་ལས་ངན་རེད། མནར་གཅོད་ཀྱི་སྒོ་ནས་སྦྱོང་བརྡར་སྣ་ཚོགས་བཏང་བས་ད་ལྟ་མི་རྣམས་ཀྱི་རྩེད་ཆས་ལྟ་བུར་གྱུར་འདུག མི་རྣམས་ཀྱིས་ཀྱང་རང་དགར་བཟའ་བཏུང་ཙམ་ལ་ལོངས་སུ་སྤྱོད་པ་ལས། རྒྱུ་འབྲས་སྤང་བླང་མི་ཤེས་པ་ནི་སྲོག་ཆགས་འདི་དག་དང་ཁྱད་པར་མི་འདུག་གསུངས།^p261
དེ་ལྟར་མུ་མཐུད་གཟིགས་སྐོར་དུ་ཕེབས་པ་ན། དམིགས་བསལ་གྱི་སྲོག་ཆགས་འགའ་རེ་ལྕགས་ཀྱི་གཟེབ་དྲྭའི་ནང་དུ་བཙུད་ཡོད་པ་གཟིགས་ཚེ། འདི་དག་ནི་ཚེ་གཅིག་གི་བཙོན་པ་ལྟ་བུ་རེད་ཅེས་ཐུགས་ཤིན་ཏུ་སྐྱོ་བའི་རྣམ་འགྱུར་བྱུང་། རྗེས་ཕྱོགས་ཀྱི་དུས་ཚོད་རྣམས་སུ། ཁོང་གིས་སེམས་ཅན་དེ་དག་གི་ཆེད་དུ་གཟུངས་སྔགས་ཟློ་པ་དང་བྱིན་རླབས་སྩོལ་བ་ལས་གསུང་བཤད་མང་པོ་ཆེར་མ་གནང་། དེ་ལྟ་ནའང་། བདག་གིས་ནི་སེམས་ཅན་འདི་རྣམས་ལ་རྗེ་ཉིད་སྐུ་དངོས་ཀྱིས་ཐུགས་བསྐྱེད་སྨོན་ལམ་མཛད་པས་ལས་ངན་ནང་ནས་ལས་དག་རེད་སྙམ་པ་བྱུང་།^p263
ལོ་མང་པོའི་རྗེས་སུ། སྔར་གྱི་མཚོ་གླིང་སྐྱེད་ཚལ་ཞེས་པའི་སྲོག་ཆགས་གླིང་ག་དེ་རོལ་རྩེད་གླིང་དུ་བསྒྱུར་བས། གནས་དེ་གའི་སྲོག་ཆགས་རྣམས་ཀྱང་ཇེ་ཉུང་ནས་ཇེ་ཉུང་ལ་ཕྱིན་ཏེ་རིམ་བཞིན་མི་སྣང་བར་གྱུར།^p265
ལྕེ་བཙུན་སྙིང་ཐིག་གི་ཁྲིད་ཐུན་བཞི་པ།^p266
ཉིན་དེའི་ཕྱི་དྲོར་ཆོས་རྗེ་ཉིད་ཀྱིས་ལྕེ་བཙུན་སྙིང་ཐིག་གི་ཁྲིད་ཐུན་རྗེས་མ་འདི་ལྟར་གསུང་།^p267
དེ་ལ་གང་གསན་པར་བྱ་བའི་ཆོས་ནི། སྔ་འགྱུར་རྙིང་མའི་འོད་གསལ་རྫོགས་པ་ཆེན་པོའི་ལམ་ཉམས་སུ་ལེན་པའི་བཀའ་སྲོལ་གྱི་དབང་དུ་བྱས་ན། རིག་འཛིན་སྔོན་མ་ཐམས་ཅད་ནི་འཇའ་ལུས་འཕོ་བ་ཆེན་པོའི་སྐུར་བཞེངས་ཤིང་། ཁོང་རྣམས་ཀྱི་སྐུ་ལུས་འཇའ་ལུས་འོད་སྐུར་བཞེངས་བའི་རྗེས་སུ། སློབ་མ་རྣམས་ལ་ཡང་རང་རང་སོ་སོའི་སྐུ་ཚེ་གཅིག་གི་ཟབ་མོ་མན་ངག་གི་གནད་ཐམས་ཅད་གཅིག་ཏུ་བསྡུས་པའི་འདས་རྗེས་རེ་མཛད་པའི་སྲོལ་ཡོད།^p268
རྫོགས་པ་ཆེན་པོའི་ལམ་འདི་ཉིད་ཡང་དག་པར་ཉམས་སུ་ལེན་པའི་གང་ཟག་རྣམས་སྐུ་ཡོངས་སུ་མྱ་ངན་ལས་འདའ་བའི་དུས་སུ། གདོས་བཅས་ཤ་ཁྲག་གི་རྣམ་པ་ཅན་འདི་དག་ཐམས་ཅད་ཀུན་ཀྱང་འོད་དུ་དེངས་འགྲོ་རྒྱུ་ནི་རྫོགས་པ་ཆེན་པོ་ཁོ་ནའི་ཁྱད་ཆོས་ཡིན། འོད་དུ་དེངས་ཚར་བའི་རྗེས་སུ། སྐལ་བ་དང་ལྡན་པའི་སློབ་མ་རྣམས་ལ་སླར་ཡང་འོད་དང་འོད་ཟེར་གྱི་སྐུ་དེ་འོད་ཕུང་གི་དཀྱིལ་ནས་བསྟན་ཏེ་གདམས་པ་སྟོན་རྒྱུ་ཡང་། རྫོགས་པ་ཆེན་པོའི་ལམ་ཉམས་སུ་ལེན་པའི་ཁྱད་ཆོས་ལས་གྲུབ་མཐའ་གཞན་དང་ཆོས་ལུགས་གཞན་ལ་མེད་པ་ལྟ་བུ་རེད།^p269
དེ་ཡང་འཛམ་བུ་གླིང་འདིར་རྫོགས་པ་ཆེན་པོའི་བསྟན་པ་ཐོག་མར་སྤེལ་བ་པོ་རིག་འཛིན་དགའ་རབ་རྡོ་རྗེ་ཡིན་ཞིང་། དགའ་རབ་རྡོ་རྗེ་ཁོང་སྐུ་ལུས་འོད་ཀྱི་ཕུང་པོ་ཉིད་དུ་གྱུར་པའི་རྗེས་སུ། ཁོང་གི་སློབ་མ་འཇམ་དཔལ་བཤེས་གཉེན་ལ་ཚིག་གསུམ་གནད་དུ་བརྡེག་པའི་མན་ངག་ཅེས་བྱ་བ་འདས་རྗེས་སུ་གནང་བ་དང་། དེ་ནས་འཇམ་དཔལ་བཤེས་གཉེན་གྱི་སྐུ་འོད་ཕུང་དུ་གྱུར་པའི་རྗེས་སུ། ཁོང་གི་སློབ་མ་རྒྱ་ནག་གི་སློབ་དཔོན་ཤྲཱི་སིངྷ་ལ་འདས་རྗེས་སྒོམ་ཉམས་དྲུག་པ་ཞེས་བྱ་བ་བབས། སློབ་དཔོན་ཤྲཱི་སིངྷ་འོད་ཕུང་དུ་གྱུར་པའི་རྗེས་སུ་ཁོང་གི་སློབ་མ་ཛྙཱ་ན་སུ་ཏྲ་ལ་གཟེར་བུ་བདུན་པ་ཞེས་བྱ་བའི་འདས་རྗེས་གནང་། ཛྙཱ་ན་སུ་ཏྲ་ཡོངས་སུ་མྱ་ངན་ལས་འདས་ནས་འོད་ཀྱི་ཕུང་པོ་རུ་གྱུར་པའི་དུས་སུ་ཁོང་གི་སློབ་མ་བི་མ་ལ་མི་ཏྲ་ལ་བཞག་ཐབས་བཞི་པ་ཞེས་བྱ་བའི་འདས་རྗེས་གནང་།^p271
བི་མ་ལ་མི་ཏྲ་དང་པདྨ་འབྱུང་གནས་གཉིས་ལ་འདས་རྗེས་མེད། མེད་པའི་རྒྱུ་མཚན་ཡང་བི་མ་ལ་མི་ཏྲ་ནི་སྐུ་ལུས་མ་སྤངས་བར་ད་ལྟ་ཡང་རྒྱ་ནག་རི་བོ་རྩེ་ལྔ་རུ་དག་པའི་གདུལ་བྱ་རྣམས་ལ་ཆོས་བསྟན་ནས་བཞུགས་ཡོད་ཅིང་། པདྨ་འབྱུང་གནས་ནི་རྔ་ཡབ་སྲིན་པོའི་གླིང་དུ་བྱོན་ནས། ད་ལྟ་སྲིན་པོ་རྣམས་ལ་ཆོས་གསུང་བཞིན་ཡོད་པས། ཁོང་གཉིས་ནམ་མཁའ་ཇི་སྲིད་དུ་མྱ་ངན་ལས་མི་འདའ་བར་སྐུ་དངོས་ཀྱིས་འགྲོ་དོན་མཛད་པ་རེད།^p272
དེས་ན་རང་རེ་དཔོན་སློབ་ཚང་མས་ཀྱང་རྫོགས་པ་ཆེན་པོའི་ལམ་འདི་ཉམས་སུ་བླངས་ནས་མཐར་ཕྱིན་ན། སྐྱེ་ཤི་མང་པོ་བརྒྱུད་མི་དགོས་པར་ནམ་ཞིག་འཆི་བ་ལ་ཉེ་བའི་དུས་སུ། སྐུ་ལུས་འདིའི་སྟེང་དུ་འགྲོ་དོན་ཡོད་ན་པདྨ་འབྱུང་གནས་དང་བི་མ་ལ་མི་ཏྲ་བཞིན་དུ་ནམ་མཁའ་ཇི་སྲིད་དུ་སྐུ་ལུས་འདི་མ་སྤངས་བར་བཞུགས་ཤིང་། སྐུ་ལུས་འདིའི་སྟེང་དུ་འགྲོ་དོན་མེད་ན་འོད་དུ་དེངས་ནས་སླར་ཡང་གདུལ་བྱའི་སྣང་ཚུལ་གྱི་དབང་གིས་སྤྲུལ་བ་རྣམ་པ་སྣ་ཚོགས་འགྱེད་པར་འགྱུར་བ་ཡིན།^p273
དེ་ལྟར་རིག་འཛིན་སྔ་མ་རྣམས་སྐུ་མྱ་ངན་ལས་འདས་པའི་རྗེས་སུ། རང་གི་སློབ་མ་ཕྱི་མ་རྣམས་ལ་མངོན་སུམ་དུ་ཡེ་ཤེས་སྒྱུ་མའི་སྐུའི་ཞལ་བསྟན་ནས་ཆོས་གསུངས་པ་ཡང་། གནའ་ཞིག་ལ་དེ་ལྟ་བུའི་གསུང་སྲོལ་ཡོད་ཅེས་པའི་ལོ་རྒྱུས་ཙམ་ཞིག་མ་ཡིན་པར། ངོ་མ་དངོས་ཐོག་ནས་ཁོང་རྣམ་པའི་གསུང་དེ་དག་ཚང་མའང་རིག་འཛིན་རྣམ་བཞིའི་འདས་རྗེས་ཞེས་རྫོགས་པ་ཆེན་པོའི་རྒྱུད་ལུང་མན་ངག་ཐམས་ཅད་ཀྱི་གནད་འདུས་པ་ཞིག་སྟེ། བི་མ་སྙིང་ཐིག་དང་བླ་མ་དགོངས་འདུས་ལ་སོགས་པའི་ཡིག་ཆའི་ནང་ན་ད་ལྟ་ཡང་མངོན་གསལ་དུ་མཇལ་རྒྱུ་ཡོད།^p274
དེ་ནས་བི་མ་ལ་མི་ཏྲའི་སློབ་མ་ལྕེ་བཙུན་ཆེན་པོ་སེང་གེ་དབང་ཕྱུག་འདི་ཉིད་སྐུ་ཡོངས་སུ་མྱ་ངན་ལས་འདས་པའི་རྗེས་སུ། འོད་ཕུང་གི་དཀྱིལ་ནས་ཡེ་ཤེས་སྒྱུ་མའི་སྐུའི་ཞལ་མཁའ་འགྲོ་མ་དཔལ་གྱི་བློ་གྲོས་མ་ལ་སོགས་པའི་མཁའ་འགྲོ་མ་བྱེ་བ་འབུམ་ལ་མངོན་སུམ་དུ་བསྟན་ནས་འདས་རྗེས་དུམ་བུ་གསུམ་པ་འདི་ཉིད་གསུངས།^p275
མཁའ་འགྲོ་མ་དཔལ་གྱི་བློ་གྲོས་མ་ལ་སོགས་པས། མན་ངག་ཟབ་མོ་དེ་ཀློང་ལྔའི་ཡི་གེ་ལྔ་ཡི་ནང་དུ་བསྡུས་ནས་མི་བརྗེད་པའི་གཟུངས་ཀྱིས་བཟུང་བ་ཡིན། ཀློང་ལྔའི་ཡི་གེ་ནི་འ་ཨ་ཧ་ཤ་ས་མ་ལྔ་ཡིན། རྗེས་སུ་འཇམ་དབྱངས་མཁྱེན་བརྩེ་དབང་པོ་ལ་ཆོས་འདི་ཉིད་བཀའ་བབས་པའི་སྐབས་སུ། མཁའ་འགྲོ་མ་བྱེ་བ་འབུམ་གྱིས་འ་ཨ་ཧ་ཤ་ས་མ་ཞེས་པའི་མགུར་དབྱངས་སྙན་པོ་བསྒྲགས་ཡོང་དུས། སྔོན་ཆད་ཁོང་ལ་དེ་ལྟ་བུ་གསུངས་པ་རྣམས་ཐུགས་ལ་བཀྲ་ལམ་མེར་ཤར་བར་གྱུར། དེས་ན་ཆོས་འདིའི་གནད་ཡོངས་སུ་རྫོགས་པ་ཡང་ཚུར་བསྡུས་ན་འ་ཨ་ཧ་ཤ་ས་མ་ཡི་གེ་ལྔ་པོའི་ནང་དུ་འདུ། ཁྱེད་རྣམ་པ་ལ་ཡི་གེ་ལྔ་ཡི་མི་ཚད་པར་དྲུག་འདུག་སྙམ་པའི་དོགས་པ་ཞིག་སྐྱེ་སྲིད་ཀྱང་། སྤྱིར་ན་རིགས་དྲུག་གི་འགྲོ་བ་ཐམས་ཅད་སྒྲོལ་བར་བྱེད་པ་ལ་ཡི་གེ་དྲུག་ཏུ་བགྲང་ན་ཡང་ཆོག་ལ། རྫོགས་ཆེན་གྱི་རྒྱུད་ཀྱི་ནང་ན་ཡི་གེ་དྲུག་ཏུ་བགྲང་ཡོད་ས་ཡང་འདུག^p276
ལྕེ་བཙུན་སྙིང་ཐིག་འདིའི་སྐབས་ན་ཀློང་ལྔའི་ཡི་གེ་ཞེས་གསུངས་ཡོད་ཅིང་། ཀློང་ལྔའི་ཡི་གེ་ཞེས་པ་ནི་ཆོས་དབྱིངས་སྐྱེ་བ་མེད་པའི་མཚོན་བྱེད་ཆོས་དབྱིངས་ཡེ་ཤེས་ཀྱི་བདག་ཉིད་ཅན་དུ་འ་ཆུང་དང་ཨ་ཆེན་ཞེས་བོད་ཡིག་ལ་གཉིས་ཡོད་ཅིང་། རྒྱ་གར་གྱི་ལེགས་སྦྱར་སྐད་ལ་ཡི་གེ་རིང་ཐུང་ཙམ་ཞིག་མ་གཏོགས་ཡོད་པ་མིན། དེའི་ཨ་དང་བོད་ཀྱི་འ་གཉིས་གཅིག་ཏུ་བསྡུས་ནས་ཆོས་ཀྱི་དབྱིངས་ཀྱི་ཡེ་ཤེས་མཚོན་པར་བྱེད་པའི་ཡི་གེ་ཨ་སྟེ་ལྔར་གྱུར་བ་ཡིན།^p277
དེ་ལ་ཆོས་ཅུང་ཤེས་ཤིང་སྦྱང་བ་མཐར་མ་ཕྱིན་པ་ཁ་ཅིག་གིས། འདིར་འ་ཆུང་ཞིག་ཡོད་པ་དེ་སཾ་སྐྲྀ་ཏའི་སྐད་ལ་རྩ་བ་ནས་མེད་པས་བོད་ཀྱི་སྐད་ཅིག་ཡིན་རྒྱུ་རེད། རྫོགས་ཆེན་ཚང་མ་ཡང་བོད་སྐད་ཀྱི་ཆོས་ཡིན་པ་ལས་རྒྱ་གར་ན་དེ་འདྲ་ཞིག་དར་མ་མྱོང་ཤས་ཆེ་སྙམ་ན། འདི་ནི་བོད་སྐད་རྐྱང་བ་ཙམ་མ་ཡིན་པར། མཁའ་འགྲོ་མ་དང་རིག་པ་འཛིན་པ་ཐམས་ཅད་ཀྱི་བརྡ་སྐད་ཐུན་མོང་མ་ཡིན་པ་ཞིག་ཡིན།^p278
འདི་ལྟ་བུའི་བརྡ་སྐད་ནི་སཾ་སྐྲྀ་ཏ་རྐྱང་པའི་སྐད་ཡིན་པའི་ངེས་པ་ཡོད་པ་མིན་ཏེ། དཔེར་ན་དུས་འཁོར་རྩ་རྒྱུད་དེ་དེང་སང་བཀའ་ཆོས་ཀྱི་ནང་ན་འཁོད་ཡོད་ཀྱང་། དེའི་སྒྲ་ཚང་མ་ལེགས་སྦྱར་གྱི་སྐད་ལྟར་བསྒྲུབ་དགོས་ན་རྩ་བ་ནས་བསྒྲུབ་ཐུབ་རྒྱུ་མ་རེད། དཔེར་ན་ཤམྦྷ་ལའི་སྐད་ཀྱིས་སྒྲ་སྒྲུབ་སྟངས་མི་འདྲ་བ་ཡོད་ལ། ཡུལ་སོ་སོ་ལ་སྒྲ་སྒྲུབ་སྟངས་འདྲ་མིན་སྣ་ཚོགས་ཡོད་པས། སྔགས་ཡིན་ན་མཐའ་གཅིག་ཏུ་སཾ་སྐྲྀ་ཏ་ཁོ་ན་ཡིན་པའི་ངེས་པ་མེད།^p279
འོ་ན་རྒྱ་གར་འཕགས་པའི་ཡུལ་དུ་ཡང་མ་དར་བའི་ཆོས་ཟབ་མོ་ཞིག་བོད་པ་རྣམས་ཀྱིས་རྙེད་ཐབས་མི་སྲིད་སྙམ་ན། དེ་ཡང་ལོ་རྒྱུས་ཀྱི་དབང་དུ་བྱས་ན། སྔོན་ཆད་སངས་རྒྱས་སྣང་བ་མཐའ་ཡས་དགེ་བའི་བཤེས་གཉེན་གྱི་ཚུལ་བཞེངས་བ་མཉམ་མེད་ཇོ་བོ་རྗེ་དཔལ་ལྡན་དི་པཾ་ཀ་ར་ཉིད་བོད་དུ་བྱོན་ནས། བསམ་ཡས་རྒྱ་དཔེ་ལ་གཟིགས་པའི་དུས་སུ་ང་རྒྱལ་གཏིང་ནས་ཞི་སོང་བ་རེད། ཁོང་གི་བསམ་པ་ལ་བསམ་ཡས་ཀྱི་རྒྱུད་སྡེ་རྣམས་ལ་མི་ཤེས་རྒྱུ་སྣ་གཅིག་ཀྱང་མེད། བདག་གིས་ལྷ་ཀླུ་མི་ལ་སོགས་པའི་ཡུལ་ན་བཞུགས་པའི་གླེགས་བམ་རྣམས་ལ་དངོས་སུ་བལྟས་མྱོང་བར་མ་ཟད། མཁའ་འགྲོ་མ་རྣམས་ཀྱིས་ནམ་མཁའ་ནས་བསྟན་པའི་གླེགས་བམ་གྱི་སྒོ་མང་པོ་ཕྱེས་པ་རྣམས་ལའང་བལྟས་མྱོང་བས་མི་ཤེས་བསམ་པ་མེད་མོད། འོན་ཀྱང་བསམ་ཡས་རྒྱ་དཔེའི་ཁྲོད་དུ་བལྟས་ཡོང་དུས། ཁོང་གིས་དེ་སྔ་མཇལ་མ་མྱོང་བའི་གསང་སྔགས་ཀྱི་རྒྱུད་སྡེ་ཆེས་ཤིན་ཏུ་མང་པོ་བཞུགས་ཡོད་པ་མཇལ། དེ་དག་ནི་སྔོན་ཨོ་རྒྱན་ཆེན་པོ་དང་བི་མ་ལ་མི་ཏྲ་སོགས་ཀྱིས་རྫུ་འཕྲུལ་ལ་བརྟེན་ནས་ལྷ་ཀླུ་མི་གནོད་སྦྱིན་དྲི་ཟ་ལ་སོགས་པའི་ཡུལ་ནས་སྤྱན་དྲངས་པ་ཡིན་ཚོད་གདའ། བོད་ཀྱི་རྒྱལ་པོའི་དུས་སུ་ཆོས་དར་བ་ལྟ་བུ་རྒྱ་གར་འཕགས་པའི་ཡུལ་དུ་ཡང་དར་མྱོང་མི་འདུག་ཅེས་གསུངས་ནས་བསྟོད་བསྔགས་མཛད།^p280
དེ་ལྟར་རྫོགས་པ་ཆེན་པོ་ལ་འདས་རྗེས་བབས་ཚུལ་སོགས་ཀྱི་བསྟན་པའི་ཆེ་བ་བཤད་པ་དང་། འ་ཨ་ཧ་ཤ་ས་མ་ལས་འཕྲོས་པའི་བསྟན་པ་ལ་ལོག་རྟོག་སེལ་བའི་སྒོ་ཙམ་ཞིག་བཤད་པ་གཉིས་ནི། ཁྱེད་རྣམ་པ་ཚང་མ་ཡང་རྫོགས་པ་ཆེན་པོའི་ལམ་ལ་སློབ་པ་ཤ་སྟག་ཡིན་ལ། རྗེས་མ་སྐལ་ལྡན་རྗེས་སུ་འཛིན་པ་དང་། སྐལ་མེད་ཀྱང་ཚར་གཅད་དགོས་པས། ངས་དེ་རིང་དེའི་རྟེན་འབྲེལ་ཙམ་ལ་དམིགས་ནས་སྐད་ཆ་མདོར་བསྡུས་ཙམ་བཤད་པ་ཡིན། གཞན་དེ་འདྲ་མང་པོ་བཤད་ན་དགོས་པ་ཆེར་མི་འདུག^p281
གཞན་ཡང་འ་ཨ་ཧ་ཤ་ས་མ་ཡིག་འབྲུ་དྲུག་པོའི་ནང་དུ་རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞིའི་གནད་ཡོངས་སུ་རྫོགས་པ་འདུ་བ་ཡིན། དེས་ན་ཁྱེད་རྣམ་པས་རྗེས་སུ་སྔགས་འདི་རང་གི་ཐུགས་ལ་འཛིན་རྒྱུ་དང་ཁ་ཏོན་བྱས་ན་ཕན་ཡོན་བསམ་གྱིས་མི་ཁྱབ་པ་ཡོད། ལྕེ་བཙུན་སྙིང་ཐིག་འདི་དབྱིན་ཇིའི་ཡི་གེ་སོགས་སུ་སྒྱུར་དུས་ཀྱང་འ་ཨ་ཧ་ཤ་ས་མ་ཞེས་པའི་ཡིག་གཟུགས་ནི་བོད་ཡིག་ལྟར་འཇོག་པ་ལས་ཡིག་གཟུགས་གཞན་དུ་བསྒྱུར་མི་རུང་། འདི་བརྡ་ཡིག་ཡིན་པས་རང་སོར་ཞོག^p282
ད་གཞུང་དངོས་ལ་གདམས་པའི་ཆ་རྐྱེན་དང་གདམས་པ་དངོས་བཤད་པ་གཉིས་ལས། ཐོག་མར་གདམས་པའི་ཆ་རྐྱེན་ནི།^p283
ཁྱད་པར་བཅོས་མ་མ་ཡིན་པའི་མོས་གུས་དྲག་པོས་བླ་མ་ལ་ནན་ཏན་དུ་གསོལ་བ་གདབ་པ་ནི་གེགས་སེལ་དང་བོགས་འདོན་ཐམས་ཅད་ཀྱི་མཆོག་ཏུ་འགྱུར་རོ༔^p284
ཞེས་དེ་ཡང་ཆོས་གཞན་དང་ཉམས་ལེན་གཞན་གྱི་དབང་དུ་བྱས་ན། གེགས་སེལ་བྱེད་ལ་གེགས་སེལ་གྱི་མན་ངག་མང་པོ་ཡོད་ཅིང་། བོགས་ཐོན་བྱེད་ལའང་བོགས་འདོན་གྱི་མན་ངག་མང་པོ་ཞིག་ཡོད་དགོས་ཀྱང་། རྫོགས་པ་ཆེན་པོ་འདིའི་སྐབས་ན། བླ་མ་ལ་མོས་གུས་ཐུན་མོང་མ་ཡིན་པ་བསྐྱེད། དད་པ་བཞག གསོལ་བ་འདེབས་པ་འདིས་གེགས་ཀྱང་སེལ། བོགས་ཀྱང་ཐོན་ཡོང་གསུངས་པ་ཡིན།^p285
དེས་ན་སྐབས་འདིར་ཁྱེད་རྣམ་པས་གོ་དགོས་པ་གཅིག་ཡོད་པ་ནི། སྤྱིར་སངས་རྒྱས་ཀྱི་ཆོས་དང་། ཁྱད་པར་དུ་བོད་དུ་དར་བའི་རྙིང་མ་ས་སྐྱ་བཀའ་བརྒྱུད་དགེ་ལྡན་ཇོ་ནང་རྣམས་ཀྱི་ཆོས་ལས་གང་གི་ལམ་དེ་ཉམས་སུ་བླངས་ན་བཟང་སྙམ་ན། གཞན་གྲུབ་མཐའ་དེ་དག་གི་ཆོས་གང་ཉམས་སུ་བླངས་ན་ཡང་ཐོག་མར་ངེས་པར་དུ་བླ་མ་ཧ་ཅང་མཁས་པ་ཞིག་བསྟེན་དགོས་ཤིང་། བསྟེན་ལུགས་ཀྱང་ཡུན་རིང་པོའི་བར་དུ་ལོ་སྣེར་ལོ་མཐུད་དེ། ལོ་ལྔ་དྲུག་གི་བར་ལ་ཡང་ནས་ཡང་དུ་ཐོས་བསམ་དང་། ཡང་ནས་ཡང་དུ་སྒྲོ་འདོགས་མ་བཅད་ན་ཆོད་ཐུབ་རྒྱུ་མ་རེད། དེའི་སྐབས་སྒོམ་པའི་རིམ་པ་དང་བསྟུན་ནས་སྐབས་སྐབས་སུ་གེགས་སེལ་བྱེད་དང་སྐབས་སྐབས་སུ་ཉམས་ལེན་ལ་བོགས་ཐོན་བྱེད་ཀྱི་མན་ངག་མང་པོ་ཞིག་དགོས་རྒྱུ་རེད། དེ་ཚང་མ་ཡང་གང་ཟག་ཕལ་བ་ཞིག་གིས་བསྒྲུབ་དགོས་ན་ཧ་ཅང་འགྲུབ་དཀའ་མོ་ཡིན།^p286
རྫོགས་པ་ཆེན་པོ་འདིའི་དབང་དུ་བྱས་ན་ནི། བླ་མ་ལ་ལོ་ཟླ་མང་པོར་བསྟེན་མི་དགོས་པར་དུས་ཡུན་ཐུང་ངུ་ཙམ་ཞིག་ལ་བསྟེན་ན་ཆོག་ཅིང་། ཆོས་ལ་ཡང་ཧ་ཅང་མཁས་མི་དགོས་པར། སེམས་ངོ་ཙམ་ཞིག་ཤེས་པས་ཆོག དེས་ན་འདི་མ་ཡིན་པའི་གེགས་སེལ་བོགས་འདོན་གྱི་མན་ངག་གཞན་གང་ཡང་མི་དགོས་པར། བླ་མ་ལ་དད་པ་བཞག གསོལ་བ་བཏབ། ཆོས་དེ་ལ་མོས་པ་ཁྱད་པར་ཅན་ཞིག་སྐྱེ་བར་གྱིས་དང་། དེས་གེགས་ཀྱང་སེལ། བོགས་ཀྱང་ཐོན་ཡོང་བ་ཡིན། དེའི་ཕྱིར་ན། རྫོགས་པ་ཆེན་པོ་འདི་ཁོ་ན་ཉམས་སུ་ལེན་པ་ནི་ཤིན་ཏུ་གལ་ཆེ་བ་ཡིན།^p287
ངེས་འབྱུང་སྙིང་ལ་གཅག༔^p288
ཅེས་རྫོགས་པ་ཆེན་པོའི་ལམ་ཉམས་སུ་ལེན་པར་བྱེད་པ་ལ། ཚེ་འདིའི་དགྲ་འདུལ་གཉེན་སྐྱོང་ཚོང་ཁེ་སོ་ནམ་ལ་སོགས་པ་གང་ལ་ཡང་མི་ཆགས་པར། ཚེ་ཕྱི་མར་ཐར་བ་ཐོབ་པ་འབའ་ཞིག་དོན་དུ་གཉེར་བའི་ངེས་འབྱུང་ཅན་ཞིག་དགོས། དེའི་ཕྱིར་ན་ངེས་འབྱུང་བསྒོམ་དགོས་གསུངས།^p289
མོས་གུས་རྩལ་དུ་བཏོན༔^p291
ཞེས་ཆོས་དང་བླ་མ་ལ་སེམས་ཀྱིས་མོས་པ་དང་། ལུས་ཀྱིས་གུས་པ་རྩལ་དུ་བཏོན། མོས་གུས་ཀྱང་ཆུང་ཆུང་ཙམ་ཞིག་གིས་མི་ཆོག་པར་རྒྱུན་བསྐྱངས་ནས་རྩལ་དུ་འདོན་དགོས་གསུངས།^p292
སྙིང་རྗེ་ཤས་མི་བཟོད་པ་ཕྱུངས༔^p293
ཞེས་མཐའ་ཡས་པའི་སེམས་ཅན་ཐམས་ཅད་སྡུག་བསྔལ་དང་བྲལ་འདོད་ཀྱི་བློ་དེ་ལ་སྙིང་རྗེ་ཟེར། དེ་ཡང་སྙིང་རྗེ་ཆུང་ཆུང་ཙམ་མ་ཡིན། དཔེར་ན་བུ་གཅིག་ལས་མེད་པའི་མས་བུ་ལ་བརྩེ་བ་ལས་ཀྱང་བརྒྱ་འགྱུར་སྟོང་འགྱུར་གྱིས་ལྷག་པའི་སྙིང་རྗེ་སྟེ། མདོར་ན་རང་ལས་ཀྱང་གཅེས་པའི་སྒོ་ནས་སྙིང་རྗེ་རྩལ་དུ་བཏོན་ཏེ་ཤུགས་ཕྱུངས་དགོས་གསུངས།^p294
ཡུལ་གྱི་བདུད་རྩི་བསྟེན༔^p295
ཞེས་དཔེར་ན་གཟུགས་སྒྲ་དྲི་རོ་རེག་བྱ་ལ་སོགས་པའི་ཆོས་ཐམས་ཅད་ངོ་བོ་སྟོང་ཉིད་ཡིན་ལ་རྣམ་པ་སྣ་ཚོགས་སུ་ཤར་བ་ཡང་། རིག་པའི་རྒྱན་ཙམ་ཡིན་པར་ཤེས་པའི་སྒོ་ནས་ཉམས་རྟོགས་ཀྱི་ཡོན་ཏན་སྐྱེད་པའི་བདུད་རྩི་ལྟ་བུ་ཡིན་པ་དེ་བསྟེན་དགོས་གསུངས།^p296
སྤྲོས་པ་ནང་དུ་བསྡུ༔^p297
ཞེས་དགྲ་འདུལ་གཉེན་སྐྱོང་ལ་སོགས་པའི་བྱ་གཞག་མང་པོས་མི་གཡེང་བར། ཟས་ལྟོ་འགྲངས་དང་གོས་ལྷགས་སྐྱོབ་ཙམ་ཞིག་གིས་ཆོག་ཤེས་པར་བྱས་ནས། རབ་ན་རྫོགས་ཆེན་གྱི་བྱ་བ་དགུ་ཕྲུགས་དོར་བའམ། དེ་མིན་ཡང་བྱ་བ་ངན་པ་ཚང་མ་བསྐྱུར་ནས་རྫོགས་པ་ཆེན་པོའི་དོན་འབའ་ཞིག་སྒོམ་དགོས་གསུངས།^p298
རླུང་རྒྱ་ཡན་དུ་འཇོག༔^p299
ཅེས་གཞན་རྩ་རླུང་ཐིག་ལེ་ལ་སོགས་པ་སྒོམ་པའི་རྫོགས་རིམ་གྱི་དབང་དུ་བྱས་ན། རླུང་དེ་ཡང་ཚུར་རྔུབ། ནང་དུ་འཛིན། ཕར་འབྱིན་པ་ལ་སོགས་པ་རྩོལ་བ་དང་བཅས་པའི་སྒོ་ནས་སྒོམ་པར་བྱེད་ཀྱང་། རྫོགས་པ་ཆེན་པོའི་སྐབས་ན་དེ་ལྟ་བུའི་རྩོལ་བ་གང་ཡང་བསྐྱེད་མི་ཉན་གསུངས། རླུང་དེ་ཡང་ཁ་ནང་ནས་དལ་བུས་མངགས་ཏེ་རླུང་རྒྱུ་བ་མི་ཚོར་བ་ཙམ་དུ་བཞག་ན་རྩོལ་མེད་ཀྱི་ལམ་ཡིན། དེ་ལ་གེགས་སེལ་བོགས་འདོན་གྱི་མན་ངག་ཀྱང་མང་པོ་མི་དགོས་པས་རྫོགས་པ་ཆེན་པོའི་ལུགས་འདི་ལ་རླུང་རྒྱ་ཡན་དུ་འཇོག་རྒྱུ་ཡིན་གསུངས།^p300
ལུས་གནད་དང་མ་བྲལ་བར་བྱ༔^p301
ཞེས་ཁྲེགས་ཆོད་ཀྱི་དུས་སུ་ལས་དང་པོ་པས་ལུས་རྣམ་སྣང་ཆོས་བདུན་བྱེད་ཅིང་། ལུས་ཚུགས་བཟུང་ནས་སྒོམ་དགོས་པ་ལས། དང་པོ་ནས་ཉལ་བ་དང་ཁེན་པ་སོགས་བྱས་ན་བྱིང་རྨུགས་འཐིབས་གསུམ་གྱི་སྣ་དྲངས་ཡོང་། ཁྲེགས་ཆོད་ལ་བརྟན་པ་ཐོབ་པའི་གང་ཟག་ནི་གར་བདེ་གར་སྐྱིད་བྱས་ན་ཆོག ཐོད་རྒལ་སྒོམ་པའི་གནས་སྐབས་ན་ལུས་ཀྱི་གནད་ཆོས་སྐུ་ལོངས་སྐུ་སྤྲུལ་སྐུའི་བཞུགས་སྟངས་གསུམ་ཡོད་པ་དང་མ་བྲལ་བ་དགོས་མ་གཏོགས། དེ་དང་བྲལ་སོང་ན་དབྱིངས་ཐིག་རིག་པ་རྣམས་འཆར་བ་མིན་ཞེས་གསུངས།^p302
དབང་པོའི་མཆོག་དབྱིངས་ལ་གཟིར༔^p303
ཞེས་བསྒོམ་པའི་གནས་སྐབས་ན་ཉི་མ་དང་། ཟླ་བ། མར་མེ། ཡང་ན་ནམ་མཁའ་སྟོང་པ་སོགས་ལ་ཡིད་མིག་རླུང་གསུམ་ཐིམ་སོང་བ་ལྟ་བུ་བྱས་ཏེ་དབྱིངས་ལ་གཏད་ནས་བསྒོམ་དགོས་གསུངས།^p304
སྐབས་སྐབས་སུ་བུམ་པ་ཅན་འཇམ་པོ་བཟུང༔^p305
ཞེས་རླུང་བུམ་པ་ཅན་ནི་རླུང་ཚུར་རྔུབ་ནས་ཕོ་བ་ཅུང་ཟད་རླུང་གིས་འགེངས་བའི་མིང་ལ་ཟེར། དེ་ཡང་སྐབས་སྐབས་སུ་ཞེས་པ་ནི་དད་པ་དང་སྙིང་རྗེ། བྱང་ཆུབ་ཀྱི་སེམས་ལ་སོགས་པ་དགེ་བའི་རྟོག་པ་སྐྱེ་བའི་གནས་སྐབས་ན་རླུང་ནང་ལ་ཅུང་ཟད་ཅིག་འཛིན་དགོས། འཇམ་པོར་བཟུང་ཞེས་པ་ནི་རྩ་རླུང་གི་མན་ངག་གཞན་ལྟར་ཤེད་ཀྱིས་དྲག་འཛིན་བྱེད་མི་དགོས་པར་རླུང་འཇམ་པོར་འཛིན་དགོས་ཤིང་། དེ་ཡང་རླུང་ནང་དུ་འཛིན་ཙམ་ཞིག་བྱས་ན་དེས་ཆོག་པར་གསུངས།^p306
དུས་རྟག་ཏུ་རིག་སྟོང་རྗེན་ནེ་བའི་ངང་བཟུང་ལ་གནད་དུ་བཏང་ངོ་༔^p307
ཞེས་ཁྲེགས་ཆོད་སྒོམ་པའི་གནས་སྐབས་ན་ཅི་ཡང་མི་བསམ་པ་ཙམ་ཞིག་མ་ཡིན་པར། རང་ངོ་རང་གསལ་དུ་ཤེས་པའི་རིག་སྟོང་གི་རང་ངོ་ཟིན་དགོས། ཐོད་རྒལ་སྒོམ་པའི་གནས་སྐབས་ན་ཡང་རིག་སྟོང་གི་རང་ས་བཟུང་ནས་སྒོམ་པ་མ་གཏོགས། ཕྱི་རོལ་ཡུལ་ལ་རྣམ་རྟོག་འཕྲོས་སོང་བ་ལྟ་བུའམ་ནང་དུ་ཅི་ཡང་མི་བསམ་པར་བཞག་བསྡད་པ་ལྟ་བུ་ཞིག་མ་ཡིན་པར་གསུངས།^p308
མདོར་བསྡུས་པའོ༔^p309
ཞེས་དེ་ཐམས་ཅད་མན་ངག་གི་གནད་ཚུར་བསྡུས་ནས་མདོར་བསྡུས་པ་ཙམ་ཞིག་བཤད་པ་ཡིན་གསུངས།^p310
སྤྲོས་པའི་སྒྲོ་འདོགས་ནི་སྙིང་ཏིག་ལས་ཆོད་པར་བྱའོ༔ ཞིབ་ཏུ་བླ་མ་ལས་མཉན་ནོ༔^p311
ཞེས་ད་རུང་སྤྲོས་པའི་སྒྲོ་འདོགས་མང་པོ་སེལ་དགོས་ན། བི་མ་སྙིང་ཐིག་ཆེན་པོའི་ནང་ན་མན་ངག་བརྒྱ་དང་བཅུ་དགུ་ཡོད་པས་དེའི་ནང་ལ་བལྟས་ནས་སྒྲོ་འདོགས་ཆོད་དགོས་ཤིང་། ཞིབ་མོའི་དོན་རྣམས་རང་གར་ཁ་བཤད་ཙམ་གྱིས་མི་འོང་ལ། བླ་མའི་མན་ངག་ཉན་ནའང་མང་པོ་ཞིག་བཤད་རྒྱུ་མེད་པར་བླ་མ་ལ་ཚིག་གཅིག་གཉིས་ཤིག་བཤད་རྒྱུ་ཡོད་པས། མན་ངག་དེར་ཉན་ནས་རིག་པ་ངོ་འཕྲོད་དགོས་གསུངས།^p312
དེ་ལྟར་ནན་ཏན་དུ་བརྩོན་པས་རབ་ཟླ་བ་དྲུག༔ འབྲིང་ལོ་གསུམ༔ ཐ་མའང་ལོ་བཅུ་གཉིས་ནས་ཟག་བཅས་ཀྱི་ཕུང་པོ་འོད་དུ་དེངས་པར་འགྱུར་རོ༔^p314
ཞེས་འདི་ལྟ་བུའི་རྫོགས་པ་ཆེན་པོའི་ལམ་བསྒོམ་ན། དབང་པོ་རབ་འབྲིང་ཐ་གསུམ་རིམ་པ་བཞིན་གྲོལ་བ་ཡིན་པས་ལམ་ཤིན་ཏུ་མྱུར་བར་གསུངས།^p315
སྒྲ་ཚིག་དབུ་མར་དེངས་པར་འགྱུར་རོ༔ རྟོག་ཚོགས་ནང་གསལ་དུ་དེངས་པར་འགྱུར་རོ༔^p316
ཞེས་ངག་ཚིག་ཐམས་ཅད་ཀུན་དབུ་མར་དེངས་ནས་སངས་རྒྱས་ཀྱི་གསུང་ཉིད་དུ་འགྱུར་ཞིང་། རྟོག་ཚོགས་ཐམས་ཅད་ཀུན་ཀྱང་དབྱིངས་སུ་ཐིམ་ནས་སངས་རྒྱས་ཀྱི་ཐུགས་ཉིད་དུ་འགྱུར་འགྲོ་བར་གསུངས།^p317
འདོད་ན་ལུས་དང་༔ ངག་དང་༔ ཡིད་ཐམས་ཅད་པའི་མཆོག་འགྲུབ་པར་འགྱུར་རོ༔^p318
ཞེས་གདུལ་བྱའི་ཁམས་དབང་མོས་པ་བསམ་པའི་བྱེ་བྲག་དང་མཐུན་པའི་སྤྲུལ་པ་རྣམ་པ་སྣ་ཚོགས་འགྱེད་ནས། ལུས་ངག་ཡིད་གསུམ་གྱི་འབྲས་བུ་མཆོག་འགྲུབ་པར་འགྱུར་བར་གསུངས།^p319
དེ་བས་ན་འདི་ཁོ་ན་ལྟར་བརྩོན་པར་བྱའོ༔ འདི་ནི་མ་འོངས་སྙིགས་མ་ལྔ་ཆེས་བདོ་ཞིང་བོད་ཁམས་ཀླ་ཀློའི་འཇིགས་པས་བསྟན་ཞབས་སྡུད་པ་ལ་ཉེ་བ་ན༔ སྙིང་ཏིག་སྙིང་པོའི་དོན་ལ་མོས་པའི་རྣལ་འབྱོར་བ༔ ལྟར་སྣང་ཐ་མལ་བ་རྣམས་དང་ཤིན་ཏུ་མཉམ་པར་སྤྱོད་པ༔ གསང་བ་སུས་ཀྱང་བརྟག་པར་དཀའ་བ༔ ཆོས་ཅན་ཐམས་ཅད་སྒྱུ་མ་ལྟ་བུར་ཉམས་འོག་ཏུ་ཆུད་པས་གང་གིས་ཀྱང་ཟིལ་གྱིས་མི་གནོན་པ༔ སྨིན་མཚམས་སུ་དཔའ་བོའི་རྒྱ་རྟགས་ཀྱིས་སྤྲས་པ༔ སློབ་དཔོན་འཇམ་དཔལ་བཤེས་གཉེན་གྱི་བྱིན་གྱིས་བརླབས་པས་ཐུག་ཕྲད་ཤེས་རབ་ཀྱི་གཏེར་བརྡོལ་པ༔ ཁྱད་པར་ངེས་པའི་དོན་ལ་ངེས་ཤེས་རྙེད་ཅིང་བདག་དང་བདག་གི་བཀའ་སྲོལ་ཟོལ་མེད་པ་ཁོ་ན་ལ་མོས་པ་མི་འཕྲོག་པར་བརྟན་པ་འོད་གསལ་སྤྲུལ་པའི་རྡོ་རྗེ་ཞེས་བྱ་བ་དུས་རིང་མོ་ནས་འབྱུང་བར་འགྱུར་བའི་དོན་དུ་བསྟན་ཏོ༔ དེའི་ཕྱིར་དེའི་སླད་དུ༔ རེ་ཞིག་ཡེ་ཤེས་དབྱིངས་ཀྱི་དྷཱ་ཀི་མ་རྣམས་ཀྱིས་ཀློང་ལྔའི་ཡི་གེར་ཟུངས་ལ༔ དུས་སུ་བབས་པའི་ཚེ་གང་ཟག་དེའི་རྒྱུད་ལ་བྱིན་གྱིས་བརླབས་སར་སད་པར་གྱིས་ཤིག༔ སྐལ་ལྡན་ཅིག་ཅར་བའི་རིགས་ཅན་འགའ་ཞིག་ལ་ཕན་པར་འགྱུར་རོ༔ ཞེས་གསུངས་སོ༔^p320
ཞེས་གསུངས་པའི་དོན་གོང་ནས་དབང་གི་ལོ་རྒྱུས་ཀྱི་དུས་སུ་རྒྱ་ཆེར་བཤད་ཚར་བས་འདིར་མི་འཆད། སྤྱིར་ཆོས་འདི་ནི་ལྕེ་བཙུན་ཆེན་པོས་མ་འོངས་པའི་གནས་སྐབས་ན་འོད་གསལ་སྤྲུལ་པའི་རྡོ་རྗེའམ་འཇམ་དབྱངས་མཁྱེན་བརྩེ་དབང་པོས་གཏེར་ནས་འདོན་པར་གསུངས། དབང་པོ་ཤིན་ཏུ་རྣོ་བ་རྫོགས་པ་ཆེན་པོའི་ཆེད་དུ་བྱ་བའི་གདུལ་བྱ་འགའ་ཞིག་ལ་ཆོས་འདིས་ཕན་ཐོགས་པར་གསུངས། དེའི་ཚིག་ཚང་མ་གོང་དུ་དབང་གི་དུས་སུ་བཀྲལ་ཚར་བ་ཡིན།^p321
སྐབས་འདིར་ང་རང་གི་ཡིད་ལ་གང་ཤར་གྱི་སྙིང་གཏམ་ཚིག་འགའ་ཁྱེད་རྣམ་པར་ཞུ། སྤྱིར་ཨ་རིའི་ལུང་པ་ན་ཡོད་པའི་ཁྱེད་ཅག་མི་ཚང་མའི་མོས་པ་དང་རིགས་རྒྱུད་ཐ་དད་པ་མ་ཟད། བསམ་བློའང་མི་འདྲ་བ་མང་པོ་ཡོད་པའི་དབང་གིས། ཆོས་ལུགས་གཏན་ནས་མེད་པ་ཞིག་དང་ཆོས་ལུགས་ལ་ཞུགས་མཁན་སྐོར་གཉིས་ཡོད། དེ་གཉིས་ཀྱི་ནང་ནས་གང་དགའ་སྙམ་དུ་ཐམས་ཅད་ཀྱིས་བསམ་བློ་ཞིབ་མོ་ཞིག་གཏང་དགོས་མ་གཏོགས། བསམ་བློ་གང་ཡང་མ་བཏང་ན། ང་ཚོར་སེམས་མེད་པ་ནི་མ་ཡིན། སྨྱོན་པ་ནི་མིན། དེས་ན་ང་ཚོ་ལ་ཆོས་ལུགས་གཏན་ནས་མེད་ན་དགའམ་ཆོས་ལུགས་ཤིག་ཡོད་ན་དགའ་སྙམ་དུ་བསམ་བློ་ཐོང་།^p322
ཆོས་ལུགས་མེད་པ་རྣམས་ཀྱིས་ནི་ཚེ་འདི་དང་ཕྱི་མ་ཀུན་ཏུ་བདེ་བ་འབྱུང་ཐབས་དང་སྡུག་བསྔལ་མི་འབྱུང་ཐབས་ལ་བསམ་བློ་གཏན་ནས་མ་བཏང་པར། ཟས་གོས་རྐྱང་པ་ཙམ་ཞིག་གིས་ཅི་འབྱུང་གང་ཤར་བྱེད་པ་དེ་རེད། དཔེར་ན་དེ་རིང་ང་ཁྱེད་ཅག་གི་ཡུལ་འདིའི་སྲོག་ཆགས་གླིང་ག་རུ་སོང་བ་ཡིན། དེ་ན་གནས་པའི་སྲོག་ཆགས་ལྟར། ཅིར་གྱུར་ན་ཅིར་གྱུར། ཅི་བྱུང་ན་ཅི་བྱུང་སྙམ་པ་དག་ནི་ཧ་ཅང་གི་སྡུག་པོ་རེད།^p323
ངས་བསམ་ན་ཆོས་ལུགས་ཤིག་ངེས་པར་ཡོད་དགོས་འདུག་སྙམ། འོན་ཀྱང་ཆོས་ལུགས་འགའ་རེས་རང་ཁོ་ན་བདེ་བྱེད་སྐྱིད་བྱེད་ཅིག་བསམ་ནས་གཞན་ལ་གནོད་པ་བྱེད་ཀྱིན་ཡོད། ཆོས་ལུགས་དེ་ཧ་ཅང་སྡུག་པོ་རེད། ཚེ་འདི་ལ་ཡང་སྡུག་པོ་དང་ཕྱི་མ་ལ་ཡང་སྡུག་བསྔལ་འབྱུང་བ་ཡིན། དེས་ན་ཕྱི་རོལ་བའི་ཆོས་ལུགས་ཚང་མའི་ནང་ནས་བཟང་ཤོས་ནི་ཡེ་ཤུའི་ཆོས་ལུགས་ཡིན་རྒྱུ་རེད་སྙམ། དེ་ཡིན་པའི་རྒྱུ་མཚན་ཡང་ཆོས་ལུགས་དེས་གཙོ་བོ་བྱམས་པ་དང་སྙིང་རྗེ་ཆེས་ཆེར་དུ་སྒོམ་པས་ཡིན།^p324
དེ་ཡང་ནང་པ་སངས་རྒྱས་པའི་ཆོས་དང་བསྡུར་ན་རྩ་བ་ནས་གཤིབ་ཐུབ་རྒྱུ་མ་རེད། དེ་མི་ཐུབ་པའི་རྒྱུ་མཚན་གང་ཡིན་ཞེ་ན། ཆོས་ལུགས་དེའི་བཟང་ཆ་དང་ལེགས་ཆ་ཡོད་ཚད་སངས་རྒྱས་ཆོས་ལུགས་ཀྱི་ནང་ན་ཚང་མ་བཤད་ཡོད་པར་མ་ཟད། ཡེ་ཤུའི་ཆོས་ལུགས་ཀྱིས་གཏན་ནས་སྟོན་མ་ཐུབ་པའི་རང་གཞན་སེམས་ཅན་ཡོངས་རྫོགས་ཚེ་འདི་བདེ་ཞིང་ཕྱི་མ་ཡང་བདེ་བའི་ཐབས་མང་པོ་ཞིག་སངས་རྒྱས་ཆོས་ལུགས་ཀྱི་ནང་དུ་གསུངས་ཡོད།^p325
དེ་བསྟན་པ་ཙམ་དུ་མ་ཟད་ཡིད་ཆེས་པའི་ཁུངས་ཀྱང་ཡོད། དེའང་ལོ་གྲངས་སྟོང་ཕྲག་མང་པོའི་སྔོན་རོལ་ནས་སངས་རྒྱས་བཅོམ་ལྡན་འདས་དང་འཇམ་དཔལ་དང་སྤྱན་རས་གཟིགས་ལ་སོགས་པ་བློ་གྲོས་མཆོག་དང་ལྡན་པ་ཐམས་ཅད་ཀྱི་རྣམ་པར་དག་པའི་ལུང་དང་ལྡན་ཞིང་། རིགས་པ་རྣམ་དག་གིས་ལོ་སྟོང་ཕྲག་མང་པོའི་བར་དུ་དཔྱད་པ་བྱས་ན་ཡང་། སངས་རྒྱས་ཀྱི་གསུངས་ལ་འགལ་བ་སྤུའི་རྩེ་མོ་ཙམ་ཞིག་མེད་པར་ངེས་པ་ཡང་དག་སྐྱེད་པའི་རིགས་པ་དང་ལྡན། ཉམས་མྱོང་གི་སྒོ་ནས་བསམ་བློ་བཏང་ན། ཆོས་ཇི་ལྟ་བ་བཞིན་དུ་ཉམས་སུ་བླངས་ན། རང་རང་གི་གཞུང་ལས་བཤད་པའི་གནས་སྐབས་ཀྱི་བདེ་བ་དང་མཐར་སངས་རྒྱས་ཀྱི་འབྲས་བུ་འཐོབ་རྒྱུ་ཚང་མ་ཡང་། སྔོན་ཆད་མི་དུང་ཕྱུར་མང་པོའི་ཉམས་མྱོང་གི་སྟེང་ནས་གྲུབ་ཡོད་པ་ཡིན། དེ་དག་གིས་ཀྱང་ལུང་རིགས་མན་ངག་རྣམ་པ་གསུམ་གྱི་སྒོ་ནས་སངས་རྒྱས་ཀྱི་ཆོས་ལ་ཡིད་ཆེས་པ་ཡིན་པ་ལས་ཁ་ནས་བཤད་པ་ཙམ་མིན།^p326
སངས་རྒྱས་ཀྱི་ཆོས་ལ་ཡང་རྣམ་པ་མང་པོ་ཞིག་ཡོད་ཀྱང་། དེ་ཐམས་ཅད་ཀྱི་ནང་ནས་མཆོག་ཏུ་གྱུར་པ་ནི་རྫོགས་པ་ཆེན་པོ་འདི་ཁོ་ན་ཡིན། རྫོགས་པ་ཆེན་པོ་ནི་གང་ཟག་མཆོག་དམན་རབ་འབྲིང་སུས་ཉམས་སུ་བླངས་ན་ཡང་མི་ཤེས་རྒྱུ་ཆེར་མེད་ཅིང་། ཡུན་རིང་པོ་མི་དགོས་པར་དད་པ་ཁྱད་པར་ཅན་དང་ལྡན་ན་ཟླ་བ་དྲུག་གིས་ཀྱང་སངས་རྒྱས་ཀྱི་གོ་འཕང་འགྲུབ་ཐུབ་པའི་ལམ་བདེ་ཞིང་སླ་བ་འདི་ལྟ་བུ་ནི་སངས་རྒྱས་ཀྱི་གསུང་གང་ན་ཡང་དཀོན་པོ་རེད།^p328
དེ་དག་ནི་ང་རང་གིས་ཡུན་རིང་པོའི་བར་དུ་ཞིབ་འཇུག་བྱས་པའི་གྲུབ་འབྲས་ཙམ་ཁྱེད་རྣམ་པ་ལ་ཞུས་པ་ཡིན། ང་རང་ངོས་ནས་བསམ་བློ་བཏང་ན། སྐྱེས་ཙམ་ཉིད་ནས་རྣམ་དཔྱོད་ཧ་ཅང་རྣོ་བའི་ཚད་དུ་གླེང་བ་མ་ཟད། ལོ་བཅུ་བཞི་ནས་ད་སྐབས་ལོ་དྲུག་ཅུའི་བར་དུ་ཡང་སངས་རྒྱས་ཀྱི་གསུང་དང་། ཕྱི་རོལ་མུ་སྟེགས་པའི་གཞུང་མང་པོ་ཞིག་ལ་བརྟག་དཔྱད་བྱས་ནས་དེ་ལྟར་བཤད་པ་ཡིན་མ་གཏོགས། གཞན་ཕྱི་རོལ་པ་ལ་སྡང་བ་དང་ནང་པ་སངས་རྒྱས་པ་ལ་དགའ་བའི་སྐད་ཆ་རྩ་བ་ནས་མིན། དངོས་གནས་ཀྱི་གྲུབ་དོན་དེ་ལྟ་བུ་ཞིག་ཏུ་གྱུར་འདུག^p329
དེས་ན་འདིར་བཞུགས་པའི་རིན་པོ་ཆེ་རྣམས་དང་། བལ་པོ་དང་རྒྱ་གར་སོགས་ཡུལ་ཁམས་གཞན་ནས་བྱོན་པའི་བླ་སྤྲུལ་རྣམས་ལ་ཞུས་པ་མིན་པར། ཁྱེད་མི་སྐྱ་ཕོ་མོ་ཞིག་གིས་ལོ་བཅུ་ཕྲག་མང་པོའི་བར་དཔྱད་པ་བྱས་ཀྱང་འདིའི་དབྱེ་བསལ་ཤེས་དཀའ་བར་བསམ་ནས། ངས་དྲང་པོའི་སྒོ་ནས་ཁྱེད་རྣམ་པ་ལ་སྐད་ཆ་དེ་བཤད་པ་ཡིན། དེ་བཞིན་དུ་ཁྱེད་རྣམ་པས་ཀྱང་དུས་ད་ནས་བཟུང་སྟེ་བློ་སྣ་ཙབ་ཙུབ་མང་པོ་མི་བྱེད་པར། སྙིང་ཐག་པ་ནས་རྫོགས་པ་ཆེན་པོ་འདི་ཁོ་ན་ལ་ཉམས་བཞེས་མཛད་ན། འདི་ཕྱི་ཀུན་ཏུ་ཆེས་ལེགས་པོ་ཞིག་ཡོང་རྒྱུ་རེད། དེ་ལྟ་ནའང་ཁྱེད་རྣམ་པར་འོད་གསལ་རྫོགས་པ་ཆེན་པོ་ལ་གཞན་ལས་ཁྱད་པར་དུ་འཕགས་པའི་ཁྱད་ཆོས་ཡོད་པར་ཐེ་ཚོམ་སྐྱེས་ཤིང་། ཆོས་ལུགས་དང་གྲུབ་མཐའ་གཞན་དག་དང་གཅིག་མཚུངས་ཡིན་རྒྱུ་རེད་སྙམ་པའི་དོགས་པ་ཡོད་ན། ཁོམ་སྐབས་དང་བསྟུན་ཏེ་ང་ལ་དྲིས་དང་ངས་ཁྱེད་རྣམ་པའི་དོགས་པ་བསལ་ཆོག གལ་སྲིད་ང་ལ་ཁོམ་ལོང་མེད་ན་མཁན་པོ་རྣམ་གྲོལ་དང་མཁན་པོ་བསོད་དར་རྒྱས་གཉིས་ལ་ཡང་དྲིས་དང་། ཁྱེད་རྣམ་པའི་དོགས་པ་ཡོད་ཚད་བསལ་ཆོག་པ་རེད། ཡུན་རིང་པོའི་བར་དུ་འབད་པ་བྱས་ནས་དོགས་པ་བསལ་ན། ཁྱེད་རྣམ་པ་རྫོགས་པ་ཆེན་པོ་ལ་ཡིད་ཆེས་ཐུན་མོང་མ་ཡིན་པ་ཞིག་སྐྱེ་སྲིད་རྒྱུ་རེད།^p330
དེ་ཡན་ཆད་དུ་དུམ་བུ་དང་པོའི་དོན་རྒྱས་ཤིང་ཕྲ་བའི་སྒོ་ནས་བཤད་ཚར་བ་ཡིན། དུམ་བུ་གཉིས་པ་འདོན་ཆ་ཡིན། དུམ་བུ་གསུམ་པ་མན་ངག་གི་ཆིངས་ས་བཅད་ཀྱིས་ཚུར་བསྡུས་པ་ཡིན། དེ་ལ་འགྲེལ་བཤད་མི་བྱེད་པར་འདི་ནས་དེའི་ལུང་ཞིག་འདོན།^p331
དེ་ལྟར་ལྕེ་བཙུན་སྙིང་ཐིག་གི་རྩ་བ་དུམ་བུ་གསུམ་པ་ཆ་ཚང་བར་ཚིག་གཅིག་ཀྱང་མ་ལྷག་པར་ཁྱེད་རྣམ་པ་ལ་ཞུས་ཟིན་པ་ཡིན། འདི་ལ་ཁྲིད་ཀྱི་དབང་དུ་བྱས་ན་རྒྱ་ཆེ་བ་དང་ཟབ་པའི་ལུགས་གཉིས་ཡོད་པ་ལས། རྒྱ་ཆེ་བའི་ལུགས་ནི་ཨ་འཛོམས་འབྲུག་པ་རིན་པོ་ཆེས་གསུངས་པ་སྔོན་འགྲོའི་ཁྲིད་ཡིག་རིག་འཛིན་ཞལ་ལུང་དང་ཁྲིད་ཡིག་ལམ་བཟང་ཡེ་ཤེས་སྙིང་པོ་སོགས་མང་པོ་ཞིག་ཡོད་པ་ལས་ཤེས་པར་གྱིས། ཟབ་པའི་ལུགས་ལ། ཟབ་པ་ལས་ཀྱང་ཆེས་ཤིན་ཏུ་ཟབ་པའི་མཐར་ཐུག་པ་ནི་ཉག་བླ་བསོད་རྒྱལ་གྱིས་གསུངས་པའི་ཁྲིད་ཡིག་ཡེ་ཤེས་ཐིག་ལེ་ཞེས་པ་ལས་ཤེས་པར་གྱིས། དེ་དག་གི་གནད་ཚུར་མདོར་བསྡུས་ཙམ་ཞིག་བཤད་པ་ཀོང་སྤྲུལ་ཡོན་ཏན་རྒྱ་མཚོའི་གསུང་ཁྲིད་ཡིག་སྙིང་པོ་བཅུད་དྲིལ་ཐིག་ལེ་གསང་རྫོགས་ལས་ཤེས་པར་གྱིས། རྗེས་མ་དེ་ཚང་མ་ལ་ག་ལེར་ལྟ་རྟོག་བྱེད་ཐུབ་ན་ཧ་ཅང་བཟང་པོ་རེད། གལ་ཏེ་དེ་དག་ལ་བལྟ་མ་ཐུབ་ན་ཡང་། ད་ལན་ཉི་མ་གསུམ་བཞིའི་རིང་ལ་ཁྲིད་བཤད་རྒྱུ་འདི་ནི། ཁོང་རྣམ་པས་གསུངས་པའི་དགོངས་པའི་གནད་མཐར་ཐུག་པ་ཚིག་གཅིག་ཀྱང་མ་ལྷག་པ་ལྟ་བུ་བྱས་ནས་གསལ་བོར་ཁྱེད་རྣམ་པ་ལ་ཞུས་ཡོད།^p332
ཁྲིད་བཤད་སྟངས་དེ་ཡང་དེ་སྔོན་ལྕགས་མདུད་རིན་པོ་ཆེ་སོགས་ཀྱིས་འཁོར་སློབ་ཡོངས་རྫོགས་ཀྱི་ཚབ་བྱས་ནས་ང་ལ་གསུངས་དོན། ད་སྐབས་ཆོས་ཞུ་མཁན་ཚང་མ་རྫོགས་པ་ཆེན་པོ་ཉམས་ལེན་བྱེད་མཁན་ཤ་སྟག་ཡིན། ཁ་ཞེ་གཉིས་མེད་ཀྱིས་མོས་པ་དང་འདོད་པའང་ཧ་ཅང་ཆེན་པོ་ཞིག་འདུག་པས། ད་རེས་ཁྱེད་ཀྱིས་དོ་དོ་ཏན་ཏན་གྱིས་བཤད་དགོས་ཞེས་གསུངས་པ་ལྟར་དུ། ང་རང་གིས་ཀྱང་ད་རེས་ལྷག་ལུས་མེད་པར་མན་ངག་ཚང་མ་ཁྱེད་རྣམ་པ་ལ་བཤད་པ་ཡིན། ཁྱེད་རྣམས་ཀྱིས་ཀྱང་ཉམས་ལེན་ཡང་དག་པ་རེ་བྱ་རྒྱུ་ངའི་རེ་བ་ཡིན། སྔོན་ཆད་བོད་དུ་ཡོད་ཚེ་ངས་དེ་ལྟར་མི་བཤད་པ་དང་། ཁྱེད་རྣམ་པ་ལ་འདི་ལྟར་བཤད་དགོས་པའི་རྒྱུ་མཚན་ཁ་ཉིན་ཞུས་པ་ལྟར་ཡིན། ཐུགས་རྗེ་ཆེ་དང་བཀྲ་ཤིས་བདེ་ལེགས་ཞུ་བ་ཡིན། ༼ཐལ་སྒྲ།༽^p333
ཐེངས་དང་པོར་དབྱིངས་སྐྱོད་དབུགས་ལྒང་ལ་བསྡད།^p334
ཕྱི་ཟླ་༧པའི་ཚེས་༡༥ཉིན་གྱི་སྔ་དྲོར། ཨ་རིའི་སློབ་མ་འགའ་ཞིག་གིས། ཆོས་རྗེ་ཉིད་དབྱིངས་སྐྱོད་དབུགས་ལྒང་ལ་བཞུགས་ནས་གནས་འདིའི་རི་ཆུ་ནགས་གསུམ་གྱི་སྤྲོ་འཁྱམ་ལ་ཐེངས་གཅིག་ཕེབས་པའི་རེ་འདུན་ནན་གྱིས་ཞུས་ཀྱང་། དེ་སྙིང་ནད་དང་ཁྲག་ཤེད་མཐོ་བའི་མི་ལ་དེ་ཙམ་འཚམ་པོ་མེད་པས། སྐུ་ཉིད་ཀྱི་བདེ་འཇགས་ལ་དམིགས་ཏེ་མ་བྱོན་ཞིང་། ངེད་ཅག་ཞབས་འབྲིང་པ་རྣམས་བར་སྣང་དབྱིངས་སྐྱོད་དངོས་མྱོང་བྱེད་དུ་ཕྱིན་པ་ཡིན།^p335
དབྱིངས་སྐྱོད་དབུགས་ལྒང་ནི་ནུབ་ཕྱོགས་སུ་གནམ་གྲུ་གསར་གཏོད་མ་བྱས་སྔོན་ནས་བྱུང་བའི་བར་སྣང་འཕུར་ཆས་ཤིག་ཡིན་ཞིང་། སྟོད་ཀྱི་ཆ་དབུགས་ལྒང་ཆེན་པོ་ཞིག་དང་སྨད་ཕྱོགས་དཔྱངས་སླེ་ཡིས་གྲུབ་པ་ཞིག་ཡིན། གཙོ་བོ་ཚ་རླངས་ཀྱི་རྒྱུན་དང་མཁའ་དབུགས་ཀྱི་ནུས་སྟོབས་གཉིས་ཀྱི་ལྡིང་ཤུགས་ལ་བརྟེན་ནས་ནམ་མཁར་གཡེང་སྐྱོད་བྱེད་པ་ཞིག་ཡིན་ལ། ཉིན་རེའི་སྔ་དྲོའི་ཉི་མ་ཤར་མ་ཐག་དང་ཕྱི་དྲོའི་ཉི་ནུབ་ལ་ཉེ་བའི་མཚམས་སུ་ཆུ་ཚོད་གཉིས་རེ་ཙམ་ལ། མཁའ་རླུང་ཤིན་ཏུ་ཞི་འཇགས་དང་རླུང་རྒྱུན་ཧ་ཅང་བརྟན་པོ་ཡིན་པས། དེ་ནི་དབྱིངས་སྐྱོད་དབུགས་ལྒང་འཕུར་སྐྱོད་བྱ་བའི་ཆེས་ལེགས་པའི་དུས་ཚོད་ཡིན།^p336
ཉིན་དེར་ནམ་མཁའ་དྭངས་ཤིང་གསལ་ལ་སྤྲིན་པ་མཐེ་བོང་ཙམ་ཡང་མཐོང་རྒྱུ་མི་འདུག སྔ་དྲོའི་ཆུ་ཚོད་དགུ་པ་ཡས་མས་ནས་བཟུང་སྟེ། ཐོག་མར་རས་ཡུག་ཆེན་པོ་ཞིག་ཡིན་པའི་དབྱིངས་སྐྱོད་དབུགས་ལྒང་ལ་ཚ་རླངས་བསྣན་ནས་རིམ་གྱིས་ལྒང་བུར་གྱུར་ཅིང་། ངེད་ཅག་དཔྱངས་སླེའི་ནང་དུ་བསྡད་དེ་ནམ་མཁའི་དབྱིངས་སུ་བསྐྱོད་པས་སེམས་སུ་ངོ་མཚར་ཆེན་པོ་སྐྱེས། དབྱིངས་སྐྱོད་དབུགས་ལྒང་དུ་ཞུགས་ནས་ནམ་མཁར་འཕུར་བ་ན། ས་ངོས་དང་བྲལ་ནས་སྨི་སུམ་བརྒྱ་ལ་མ་ཐོན་བར་དུ་ཧ་ཅང་མགྱོགས་པོར་འཕུར་ཞིང་། རིམ་གྱིས་མགྱོགས་ཚད་སྙོམས་པོའི་ངང་ནས་གྲོང་ཁྱེར་དང་ཞིང་ཁ། ནགས་ཚལ། རི་ཀླུང་སོགས་བཀོད་ལེགས་མཛེས་སྡུག་ལྡན་པའི་ཡུལ་ལྗོངས་སྣ་ཚོགས་མིག་འོག་ཏུ་ཚུད་པར་བྱས་ཤིང་། བར་སྣང་མཐོན་པོར་གཡེང་སྐྱོད་བྱེད་ཀྱིན་གནམ་སའི་བར་ལ་ལྟད་མོར་རོལ་བ་ནི། ནང་སེམས་ཀྱི་རང་དབང་ཁྱད་པར་ཅན་ཞིག་ཡིན་པས་ལྷག་ཏུ་སྤྲོ་སྣང་སྐྱེས། ང་ཚོ་རི་མཐོན་པོའི་རྩེ་མོ་བརྒྱུད་སྐབས། ནམ་མཁའ་ནས་གནམ་གྲུ་རླུང་རྒྱུན་དང་འཕྲད་པ་ལས་ཀྱང་ལྷག་པའི་གཡོ་འགུལ་ཆེན་པོ་བྱུང་ཡང་། ཐོག་མཐའ་བར་གསུམ་དུ་ནང་སེམས་ལ་དངངས་སྐྲག་མེད་པར་ཤིན་ཏུ་ལྷིང་འཇགས་ཡིན།^p338
ཆུ་ཚོད་གཅིག་ལྷག་གི་འཕུར་ཡུན་བརྒྱུད་ནས་མར་བབས་པ་ན། དེ་ནི་ཆེས་ངོ་མཚར་བའི་མཁའ་དབྱིངས་ཀྱི་སྤྲོ་འཆམ་ཐེངས་གཅིག་སྟེ། ངས་ཆེས་གཏོས་ཆེ་བའི་འཇིག་རྟེན་གྱི་བཀོད་པ་མཐོང་ལ། འགྲོ་བ་མིའི་ཆེས་གཉོམ་ཆུང་གི་གནས་སྟངས་ཀྱང་ཚོར་བྱུང་། དེ་སྔོན། དབྱིངས་སྐྱོད་དབུགས་ལྒང་གི་འདྲ་པར་ཙམ་ལས་མ་མཐོང་ཡང་། ད་རེས་འཚོ་བའི་དངོས་མྱོང་ཐེངས་གཅིག་བྱས་པས་ཚོར་བ་གཞན་ཞིག་ཀྱང་སྟེར་བྱུང་།^p340
གསང་སྔགས་གསང་དགོས་པའི་རྒྱུ་མཚན།^p341
ཉིན་དེའི་ཕྱི་དྲོར་འཇམ་དཔལ་རྫོགས་པ་ཆེན་པོའི་དབང་གནང་རྗེས་འདི་ལྟར་གསུང་།^p342
དབང་འདི་ནི་རིག་འཛིན་མཁའ་འགྲོ་འབུམ་གྱི་སྙིང་ཁྲག ང་རང་གི་ཡང་སེམས་ཀྱི་བཅུད་ལྟ་བུར་གྱུར་པ་དེ་ཁྱེད་རྣམས་ལ་ཕངས་པ་མེད་པར་ཚང་མ་བསྩལ་ཟིན་པ་ཡིན། སའི་སྟེང་མ་ལུས་པ་ཀུན་ཏུ་སྔར་ཡང་བྱུང་མ་མྱོང་ལ། ད་ལྟར་ཡང་མི་འབྱུང་། ཕྱིས་སུ་ཡང་འབྱུང་བར་དཀོན་པ་ལྟ་བུའི་གདམས་ངག་ཟབ་ལ་བྱིན་རླབས་ཀྱི་ཚན་ཁ་དང་ལྡན་པ། སངས་རྒྱས་ལག་སྟེར་ཞེས་བྱ་བའི་ཁྲིད་ཀྱང་ཁྱེད་རྣམ་པ་ལ་འབུལ་བ་ཡིན།^p344
ཆོས་ཚུལ་འདི་ནི་ཤིན་ཏུ་ཟབ་ལ་རྨད་དུ་བྱུང་བ་ཞིག་ཡིན་པར་མ་ཟད་ཁེ་ཉེན་ཡང་ཆེ་བ་སྟེ། འགའ་ཞིག་ཆོས་འདི་དང་འཕྲད་ནས་ཁེ་ཁ་ཆེན་པོ་ཐོབ་པ་དང་། འགའ་ཞིག་ལ་ཉེན་ཁ་ཆེན་པོ་ཡང་འབྱུང་བ་ཞིག་ཡིན། དེ་ཡང་བླ་མ་ལ་བཅོས་མ་མ་ཡིན་པའི་དད་པ་རྣམ་པར་དག་པ་ཡོད། ཆོས་ལ་ཡང་མོས་པ་ཁྱད་པར་ཅན་གྱི་སྒོ་ནས་ཉམས་ལེན་ལ་རྩེ་གཅིག་ཏུ་འབད་ནས། འདི་གཞན་ལ་མི་སྨྲ་བའི་གསང་བ་ཟབ་མོའི་གནས་བསྲུང་ཐུབ་པའི་གང་ཟག་ཅིག་ཡིན་ན། ཡུན་རིང་པོའི་ཚེགས་ལ་མི་ལྟོས་པར་སྙིགས་དུས་ཀྱི་ཚེ་ཐུང་གཅིག་ལ་ཡང་སངས་རྒྱས་ཀྱི་གོ་འཕང་འགྲུབ་པར་བྱེད་པའི་ཕྱིར་ན། ཡིད་བཞིན་གྱི་ནོར་བུ་འབུམ་ལས་ཀྱང་ལྷག་པའི་ཁེ་ཁ་ཆེན་པོ་ཞིག་འཐོབ་རྒྱུ་རེད། དེ་ལས་ལྡོག་སྟེ་བླ་མ་ལ་དད་པ་མེད་པ་དང་། ཁྱད་པར་དུ་དངོས་སུ་བསྟོད་ཅིང་ལྐོག་ནས་སྨད་པའི་ལྕེ་གཉིས་སྦྲུལ་དང་འདྲ་བའི་སྐྱེ་བོ་རྣམས་ནི་ངེས་པར་དུ་ངན་སོང་གི་གནས་སུ་ལྟུང་བར་བྱེད་པའི་རྒྱུ་ཡང་ཡིན།^p345
ཁྱེད་རྣམས་ཚང་མ་ཡང་ཆོས་ཟབ་མོ་འདིའི་སྒོར་ཞུགས་ཟིན་པས་ཁ་ཞེ་གཉིས་མེད་ཀྱིས་ཆོས་ལ་མོས་པ་ཁྱད་པར་ཅན་གྱི་སྒོ་ནས་ཉམས་སུ་ལེན་དགོས་པ་རེད་མ་གཏོགས། ཆོས་འདི་ཡག་པོ་རེད་དམ་བརྩོག་པ་རེད་ཟེར་ནས། ཞིབ་འཇུག་ལ་སོགས་པ་བྱས་ནས་དཔྱད་པ་མང་པོ་བྱེད་པ་དང་། ལོ་གཅིག་གཉིས་ཤིག་གི་རིང་ལ་ནང་པ་སངས་རྒྱས་པའི་ཆོས་སྒོར་ཞུགས། རྗེས་སུ་ཆོས་ལུགས་གཞན་དང་གཞན་ལ་ཞུགས་ནས་ནང་པ་སངས་རྒྱས་པའི་ཆོས་ལ་རྒྱབ་འགལ་དུ་གྱུར་པ་ལྟ་བུ་བྱས་ན། ངེས་པར་ཡང་ངན་སོང་གི་གནས་སུ་སྐྱེ་བར་འགྱུར་བས་ཕོངས་ཚབས་ཆེ་བའི་ཆོས་ཤིག་ཀྱང་ཡིན།^p346
ཆོས་འདི་དབང་མ་ཐོབ་པ་དང་སྐལ་བ་མེད་པའི་གང་ཟག་ལ་ནི་གསང་དགོས་པ་ཡིན། བླ་མ་དང་ནང་དམ་ཚིག་གི་འབྲེལ་འདྲིས་ཧ་ཅང་ཆེ་བའི་རྡོ་རྗེ་གྲོགས་པོ་འགའ་རེ་མ་གཏོགས། སུ་དང་གང་ལ་ལྟ་བ་དང་སྒོམ་པ་བཤད་ག་ལ་རུང་། ཚིག་ཙམ་བསྒྲགས་པར་བྱས་ན་ཡང་ངེས་པར་ངན་སོང་གི་གནས་སུ་ལྟུང་བར་འགྱུར་བ་ཡིན་པའི་ཕྱིར་ན་ཕོངས་ཚབས་ཆེ་བ་ཡིན། དེས་ན་ཁྱེད་རྣམ་པས་རྫོགས་པ་ཆེན་པོའི་ཆོས་འདི་སུ་ལ་ཡང་མི་བཤད་པར་གསང་དགོས། དེའི་ནང་དོན་གོ་སོང་ངམ། རྫོགས་པ་ཆེན་པོ་དེ་དེ་འདྲའི་གསང་དགོས་པ་ཞིག་ཡིན་ཚེ། འདི་བཤད་མི་ལོ་པའི་སྐྱོན་ཅན་སྡུག་པོ་ཞིག་ཨེ་ཡིན་ནམ་སྙམ་ན་རྩ་བ་ནས་མ་རེད། གསང་ན་མཆོག་དང་ཐུན་མོང་གི་དངོས་གྲུབ་ཐམས་ཅད་བདེ་བླག་ཏུ་འགྲུབ་པར་བྱེད་ཅིང་། མ་གསང་བར་གསང་སྒོ་འཆོལ་ཏེ་ཐམས་ཅད་ལ་བསྒྲགས་སྔ་དང་བཤད་སྔ་བྱས་སོང་ན། ངན་སོང་གི་གནས་སུ་ལྟུང་བར་འགྱུར་བའི་རྒྱུ་ཐུན་མོང་མ་ཡིན་པ་ཡིན་པས་གསང་དགོས་པ་རེད་མ་གཏོགས། གསང་སྔགས་ལ་སྐྱོན་ཆེ་བས་གསང་དགོས་པ་མ་ཡིན་པའི་གནད་དོན་ཡང་ཤེས་དགོས།^p347
དཔེར་ན་ང་རང་ཉིད་ལྟ་བུ་ལ་མཚོན་ན། ཤར་ཕྱོགས་ཡ་གླིང་གི་རྒྱལ་ཁབ་ནས་ས་ཐག་ཧ་ཅང་རིང་བ་ནུབ་ཕྱོགས་མེ་གླིང་གི་རྒྱལ་ཁབ་འདི་ལ་ཐོན་པའི་སྐབས་སུ། ཁྱེད་ཅག་འཁོར་སློབ་མང་པོ་ཞིག་རང་ཤུགས་ཀྱིས་འདུས་ཡོང་བ་རེད། དེས་ན་ཁྱེད་རྣམ་པར་ཡང་བསྐལ་པ་མང་པོའི་གོང་རོལ་ནས་ལས་དང་སྨོན་ལམ་གྱི་འབྲེལ་བ་ཞིག་ཡོད་རྒྱུ་རེད་སྙམ་པའི་རྒྱུ་མཚན་གཅིག་དང་། གཉིས་སུ་འུ་ཅག་ཀྱང་ཡང་ནས་ཡང་དུ་འཛོམས་མི་ཐུབ། རྗེས་སུ་ང་ཨ་མེ་རི་ཀའི་ས་ཁུལ་འདི་ལ་ཐོན་ཐུབ་རྒྱུ་མ་རེད། ད་རེས་ཐེངས་གཅིག་པུ་ཁོ་ན་ཡིན་རྒྱུ་རེད་བསམ། དེ་ཡིན་ན་ཁྱེད་རྣམ་པ་ཤ་ཚ་སྙིང་རྗེ་བསམས་ནས་སྔོན་ཆད་ངས་བོད་ཡུལ་དུ་ཡང་འདི་འདྲའི་རྒྱ་ཆེར་སྤེལ་མ་མྱོང་བའི་གདམས་ངག་མང་པོ་ཞིག་སྤེལ་བཞག་པ་ཡིན། ངས་སྙིང་རྗེས་མ་བཟོད་པར་ཆོས་ཤིག་བཤད་པ་དེ། ལག་ལེན་འཆུག་འགྲོ་བྱེད་དུ་གྱུར་ནས་རྗེས་མ་ཁྱེད་རྣམ་པས་ཀྱང་གཞན་ལ་དེ་ལྟར་ཁྱབ་བརྡལ་དུ་སྤེལ་བ་དང་འཆད་པར་བྱས་ན་རང་གཞན་གཉིས་ཀ་འཕུང་བར་འགྱུར་བ་ཡིན།^p348
དེས་ན་གསང་སྔགས་ཟབ་མོའི་དབང་དང་གདམས་པ་འདི་ལྟ་བུ་ནི་ཕོངས་ན་ཕོངས་ཤག་ཤག་ཉེས་པ་ཆེ་ཤོས་དང་། འཚེངས་ན་འཚེངས་ངེས་ཀྱི་ཁེ་ཁ་ཐོབ་ཤག་ཤག་གི་ཆོས་ཤིག་ཡིན་ཟེར་ནས་ངས་ཡང་བསྐྱར་ཁྱེད་རྣམ་པར་ལན་གཅིག་ཞུས་པ་ཡིན།^p350
ཁྱེད་རྣམས་ཀྱིས་བླ་མ་ལ་མངོན་ལྐོག་མེད་པའི་དད་པ་བྱ་དགོས། མངོན་ལྐོག་མེད་ཟེར་བ་ནི་སུ་ཡིན་ཡང་ངོ་ལ་བལྟས་ནས་དད་ཀྱང་ལྐོག་ནས་མི་དད་པ་མ་ཡིན་པ་དང་། ཆོས་ལ་ཡང་ཐང་ལྷོད་མེད་པའི་མོས་པ་དགོས། དང་པོ་ཆོས་ལ་མོས་པ་ཡོད་ནས་དགའ་ཡང་རྗེས་སུ་མ་མོས་མ་སྤྲོ་ན་དེ་ལ་ཐང་ལྷོད་ཅན་ཟེར། གསང་སྔགས་ཟབ་མོའི་ཆོས་རྫོགས་པ་ཆེན་པོ་འདི་སུ་ལ་ཡང་མི་བསྒྲགས་པར་རང་གཅིག་པུས་སྙིང་གི་དབུས་སུ་འཆང་ནས་ཉམས་སུ་བླངས་ན། ཚེ་གཅིག་ལུས་གཅིག་ལ་སངས་རྒྱས་ཀྱི་གོ་འཕང་འགྲུབ་པར་བྱེད་པའི་གདམས་ངག་གཞན་གང་དང་ཡང་མི་འདྲ་བའི་ཁྱད་པར་དུ་འཕགས་པ་ཞིག་ཡིན་པ་དེ་ཚང་མས་ཐུགས་ལ་འཛིན་རོགས་ཞུ།^p351
ཉམས་ལེན་གནད་བསྡུས།^p352
སངས་རྒྱས་ལག་སྟེར་གྱི་གཞུང་གི་ཐོག་ནས་མི་བཤད། སང་ཉིན་ཡང་ཁྱེད་རྣམ་པ་གསར་ཐོན་མང་པོ་ཡོད་རྒྱུ་རེད། དེ་རིང་འདི་ན་ཡོད་པའི་མི་མང་པོ་ཞིག་སང་ཉིན་ཕར་འགྲོ་རྒྱུ་རེད། དེའི་ཕྱིར་ན་ཁྲིད་ཡིག་སངས་རྒྱས་ལག་སྟེར་གྱི་གནད་ཀྱི་སྙིང་པོ་མདོར་བསྡུས་པ་ཙམ་ཞིག་ཁྱེད་རྣམ་པ་ལ་ཞུ།^p353
ཁྲིད་འདི་ཉམས་སུ་ལེན་ལུགས་ལ་ཐོག་མར་གལ་ཆེ་བ་དང་། བར་དུ་གལ་ཆེ་བ་དང་། ཐ་མར་གལ་ཆེ་བའི་ཆོས་རྣམ་པ་གསུམ་ཡོད།^p354
ཐོག་མར་གལ་ཆེ་བ་ནི། འཁོར་བའི་བྱ་བ་མཐའ་དག་ལ་ཞེན་པ་གཏིང་ནས་ལྷོད་པོར་གྱུར་ནས་ཐར་བ་ཡང་དག་པ་སྒྲུབ་པའི་ལམ་བཅོས་མ་མ་ཡིན་པ་བསྒྲུབ་འདོད་ཀྱི་བསམ་པ་རང་གི་རྒྱུད་ལ་སྐྱེ་བ་ཞིག་དགོས།^p355
དེ་ནི་དང་པོ་དལ་འབྱོར་རྙེད་པར་དཀའ་བ་དང་། འཆི་བ་མི་རྟག་པ་ལ་ཞིབ་ཏུ་བསམ་བློ་བཏང་ནས། ཚེ་འདི་སྣང་ལ་ཞེན་པ་ལྡོག་པར་བྱ་བ་དང་། ལས་རྒྱུ་འབྲས་དང་འཁོར་བའི་ཉེས་དམིགས་ལ་བསམ་བློ་བཏང་ནས། ཕྱི་མའི་སྣང་ཤེས་ཐམས་ཅད་ལ་ཞེན་པ་ལྡོག་པར་བྱས་ནས། མདོར་ན་འཁོར་བ་ལ་ཞེན་པའི་བློ་ལྷོད་པོར་མ་སོང་གི་བར་དུ་བསྒོམ་དགོས།^p356
བར་དུ་གལ་ཆེ་བ་ནི། རང་དང་གཞན་ལ་ཕན་པ་རྒྱ་ཆེན་པོ་བསྒྲུབ་པར་བྱ་བ་དེ་ཡིན། རང་དང་གཞན་ལ་ཕན་པ་སྒྲུབ་པའི་ཐབས་གང་ཡིན་ཞེ་ན། སྐྱབས་སུ་འགྲོ་བ་དང་སེམས་བསྐྱེད་པ་འདི་གཉིས་ཡིན། དེ་ཇི་ལྟར་ཡིན་ཞེ་ན། ཐོག་མར་རང་ནང་བ་སངས་རྒྱས་པ་རྣམ་པར་དག་པ་ཞིག་ཡིན་པར་ཁས་བླངས་ཤིང་དམ་བཅས་པ་གཞིར་བཞག་གི་སྟེང་ནས་དེའི་ཆོས་ལ་བསླབ་དགོས། ནང་པ་སངས་རྒྱས་པའི་ཆོས་ལ་བསླབ་དགོས་ན་ཐེག་པ་དམན་པའམ་ཐེག་པ་ཐུན་མོང་གི་ཆོས་ཤིག་དང་། ཐེག་ཆེན་ཐུན་མོང་མ་ཡིན་པའི་ཆོས་གཉིས་ཡོད།^p357
དེ་ལས་ཐེག་པ་དམན་པ་བ་རྣམས་ཀྱིས་རང་གི་ལུས་དང་སྲོག་ལ་ཐུག་ཀྱང་གཞན་སེམས་ཅན་ལ་གནོད་པ་མི་བྱ་བའི་ཐབས་སུ་ཁྱིམ་པའམ་རབ་ཏུ་བྱུང་བའི་ཕྱོགས་ཀྱི་སྡོམ་པ་གང་རུང་ཞིག་བླངས་ནས་དེར་གནས་པར་བྱ་བ་ཡིན། དེ་ཡང་གཞན་ལ་གནོད་པ་མ་བྱས་པ་རྐྱང་བ་ཙམ་གྱིས་མི་ཆོག་པར། གཞན་ལ་གནོད་པ་རྩ་བ་ནས་མི་བྱ་བསམ་པའི་དམ་བཅའ་ཡོད་དགོས། དམ་བཅའ་ཡོད་ན་ནང་པ་སངས་རྒྱས་པ་ཉིད་དུ་འགྱུར་བ་རེད་མ་གཏོགས། དམ་བཅའ་མེད་པར་གཞན་ལ་གནོད་པ་མ་བྱས་པ་ཙམ་ནི་ས་རྡོ་རི་བྲག་ལ་སོགས་པ་ལའང་ཡོད་ཀྱང་དེ་ཙམ་ལ་ནང་པ་སངས་རྒྱས་པ་མི་ཟེར།^p358
གཞན་ལ་གནོད་པ་མི་བྱ་བའི་ཕྱིར་དཀོན་མཆོག་གསུམ་ལ་སྐྱབས་སུ་འགྲོ་བསམ་རྒྱུའི་དམ་བཅའ་རྒྱུད་ལ་བརྟེན་རྒྱུ་ལ་སྐྱབས་སུ་འགྲོ་བ་ཟེར།^p359
གཞན་ལ་གནོད་པ་མི་བྱེད་པའི་ཐབས་སུ་ཐམས་ཅད་ཀྱིས་རང་གི་རྒྱུད་ལ་སྡོམ་པ་རེ་ལེན་དགོས། དེ་ལྟ་བུའི་སྡོམ་པ་ལེན་པར་བྱེད་པ་ལ་དགེ་ཚུལ་སློང་གི་སྡོམ་པ་ཟེར་བའི་རབ་བྱུང་གི་སྡོམ་པ་ཞིག་ཡོད། དེ་ནི་ཤར་ཕྱོགས་ཨེ་ཤ་ཡའི་རྒྱལ་ཁབ་མང་ཆེ་བ་ལ་དེའི་སྲོལ་ཡོད། ཁྱད་པར་དུ་བོད་དང་རྒྱ་གར་དང་སིང་གྷ་ལ་ལ་སོགས་པའི་ཡུལ་ན་ཡང་ཆེས་མང་པོ་ཞིག་ཡོད། དཔེར་ན་ཨ་རིའི་ལུང་པ་ནས་དེ་ལྟ་བུ་བསྒྲུབ་དགོས་ན་ཧ་ཅང་དཀའ་མོ་ཡིན།^p360
འོན་ཀྱང་ཁྱེད་རྣམ་པས་ཀྱང་དགེ་བསྙེན་ནམ་གསོ་སྦྱོང་། ཐ་ན་བར་མའི་སྡོམ་པ་གང་རུང་རེ་རང་གི་རྒྱུད་ལ་ལེན་དགོས། ཅི་ལྟ་བུ་ཞིག་ལ་དགེ་བསྙེན་གྱི་སྡོམ་པ་ཟེར་ཞེ་ན། ཤི་མ་སོང་གི་བར་དུ་འགྲོ་བ་མིའི་རིགས་ཚང་མ་མི་གསད་བསམ་པ་དང་། དེ་བཞིན་དུ་གཞན་ལ་གནོད་ཚབས་ཆེ་ཞིང་མགོ་སྐོར་ཆེན་པོའི་རྫུན་མི་བཤད་བསམ་པ། གཞན་གྱི་ཆུང་མ་ལ་འདོད་པས་ལོག་པར་མི་སྤྱོད་བསམ་པ། གཞན་གྱི་རྒྱུ་རྫས་མ་བྱིན་པར་མི་ལེན་པ་དང་ཆང་བཅས་རྩ་བ་ནས་སྤང་བསམ་རྒྱུའི་དམ་བཅའ་ཡོད་དགོས། ཚང་མ་སྤངས་ཐུབ་ན་ཨང་དང་པོ་རེད། མ་ཐུབ་ན་ཡང་དེའི་ནང་གི་རེ་རེ་གཉིས་རེ་ཞིག་ཤི་མ་སོང་གི་བར་དུ་སྤང་སྙམ་ནས་དམ་བཅའ་ཡང་དག་པར་རྒྱུད་ལ་བླངས་ན་དགེ་བསྙེན་ཟེར། སྲོག་མི་གཅོད་པ་དང་། མ་བྱིན་པ་མི་ལེན་པ། འདོད་པས་ལོག་པར་མི་གཡེམ་པ། རྫུན་མི་སྨྲ་བ་ལ་རྩ་བ་བཞི་ཟེར་ཞིང་། དེ་རིང་ཉི་མ་ཤར་བ་ནས་བཟུང་སང་ཉིན་ཉི་མ་མ་ཤར་བའི་བར་དུ་དེ་བཞི་པོ་མི་བྱེད་པར་ཁས་ལེན་པ་ལ་གསོ་སྦྱོང་གི་སྡོམ་པ་ཟེར། ཐ་ན་དེ་ལྟ་བུའི་སྡོམ་པ་གང་ཡང་རྒྱུད་ལ་ལེན་མི་ཐུབ་ནའང་། ཁྱེད་རྣམ་པས་སྐོར་བ་བྱེད་པ་དང་། ཕྱག་འཚལ་བ། ཐ་ན་ཁ་ཏོན་དགེ་སྦྱོར། མ་ཎི་དང་ཨ་ར་པ་ཙ། བཛྲ་གུ་རུ་ལ་སོགས་པ་གྲངས་ཅུང་མང་རེ་འདོན་པ་ཁས་བླངས་ནས་ཅི་ནུས་ཀྱིས་འདོན་དགོས་པ་ཡིན།^p361
ཆོས་འཇིག་རྟེན་གྱི་བྱ་བ་རླབས་ཆེན་པོ་གང་ཞིག་བསྒྲུབ་པར་བསྐུལ་བའི་ཚེ། ང་ཚོ་བོད་ཀྱི་ལུང་པ་ལ་ཁ་ཕོ་རུས་སློང་ཟེར་བའི་སྲོལ་ཞིག་ཡོད། ངས་ཁྱེད་རྣམ་པར་ཁ་ཕོ་རུས་བསླངས་ནས་བསྐུལ་མ་ཞིག་བྱ། ཁ་ཕོ་རུས་ཟེར་བ་ནི་འགྲན་བསྡུར་བྱེད་དུས་སྙིང་སྟོབས་བསྐྱེད་པ་དེ་རེད། ཁ་ཕོ་རུས་ཇི་ལྟར་སློང་ཟེར་ན། དཔེར་ན་ངེད་བོད་ལུང་པ་ལྟ་བུ་ལ་མཚོན་ན་མི་གྲངས་ཀྱང་ཉུང་ཉུང་དང་། སྟོབས་འབྱོར་ཡང་དམན་པ་རེད། ཤེས་ཡོན་གྱི་དཔང་ཚད་ཀྱང་ཞན་པོ་རེད། ཡིན་ཡང་བོད་ཀྱི་བླ་མ་དང་མི་སྐྱ་ཕོ་མོ་ཐམས་ཅད་ཕལ་ཆེར་མི་རེར་ཡང་མ་ཎི་དང་ཨ་ར་པ་ཙ་ལ་སོགས་པ་དུང་ཕྱུར་ཙམ་རེ་མི་འདོན་མཁན་གཅིག་ཀྱང་མེད་པ་ལྟ་བུ་རེད། དེ་ཡིན་ན་ཁྱེད་ཨ་རིའི་ལུང་པ་འདི་མི་གྲངས་ཀྱང་མང་། སྟོབས་འབྱོར་ཡང་ཆེ། ཤེས་རྒྱ་ཡང་བཟང་། དེ་ལྟ་བུ་ཞིག་ཡིན་ན་ཁྱེད་རྣམ་པས་ཅི་ཡང་མ་བཏོན་པར་ལག་པས་ལག་པ་བཟུང་ནས་སྡུག་སྒོང་བྱས་ནས་བསྡད་ན། ངེད་བོད་ཀྱི་བླ་མ་ཐམས་ཅད་ཀྱི་ཁ་སྔུན་དུ་ཁྱེད་རྣམ་པ་ངོ་ཚ་མོ་ཡོང་རྒྱུ་རེད། ༼དགོད་སྒྲ།༽ ཅི་ནུས་ཀྱིས་འདོན་པ་འདོན་དགོས་པ་ཡིན།^p362
འོ་ཡ། ད་གཞན་ལ་གནོད་མི་སྐྱེལ་བས་མི་ཚད་གཞན་དོན་འབའ་ཞིག་ཆེད་དུ་བསྒྲུབས་ནས་བྱམས་སྙིང་རྗེ་ཁོ་ནས་ཁོག་བསྲིངས་བ་ནི་རྫོགས་པ་ཆེན་པོའི་གཞི་རྩ་ཡིན། དེས་ན་ནང་པ་སངས་རྒྱས་པའི་ཆོས་ཀྱི་སྙིང་པོ་མཐར་ཐུག་པ་ནི་བྱམས་པ་དང་སྙིང་རྗེ་ཁོ་ན་ཡིན་པས་རང་དོན་ཡལ་བར་བོར་ནས་དུས་རྟག་ཏུ་སེམས་ཅན་རྣམས་ལ་བསམ་པ་བཟང་པོ་དང་སྤྱོད་པ་བཟང་པོ་འབའ་ཞིག་གིས་གཞན་དོན་བསྒྲུབ་རྒྱུ་ནི་མེད་དུ་མི་རུང་བ་ཡིན། དེ་ལ་ནི་བྱང་ཆུབ་མཆོག་ཏུ་སེམས་བསྐྱེད་པ་ཟེར།^p363
ཐ་མར་གལ་ཆེ་བའི་ཆོས་ནི། ནོར་འཁྲུལ་གང་ཡང་མེད་ཅིང་ཡིད་ཆེས་པའི་ཚད་མ་རྣམ་པར་དག་པ་དང་ལྡན་པའི་ཆོས་ཤིག་ལ་བརྟེན་ནས་སངས་རྒྱས་ཀྱི་གོ་འཕང་སྒྲུབ་པར་བྱེད་དགོས། དེ་ལྟ་བུའི་ཆོས་གང་ཡིན་ན། གསང་སྔགས་རྡོ་རྗེ་ཐེག་པ་སྤྱི་དང་། ཁྱད་པར་དུ་ཐེག་པ་ཐམས་ཅད་ཀྱི་རྩེ་མོ་མཐར་ཐུག་པ་འོད་གསལ་རྫོགས་པ་ཆེན་པོ་ཡིན། དེའི་ཉམས་ལེན་ཁོ་ན་ལ་བརྩོན་རྒྱུ་ནི་ཐ་མར་གལ་ཆེ་བ་ཡིན།^p364
དེས་ན་ནང་བ་སངས་རྒྱས་ཀྱི་བསྟན་པ་ཐམས་ཅད་རིགས་བསྡུ་ན་གཞན་ལ་གནོད་པ་མི་བྱེད་པ་དང་། གཞན་ཕན་གཙོ་བོར་སྒྲུབ་པ་དང་། གཞན་ཕན་ཡང་རྒྱ་ཆེན་པོ་དང་དཀའ་ཚེགས་མེད་པར་མྱུར་དུ་སྒྲུབ་པར་བྱེད་པ་གསུམ་གྱི་ནང་དུ་འདུ་བ་ཡིན། ཁྲིད་ཡིག་སངས་རྒྱས་ལག་སྟེར་གྱི་ཉམས་ལེན་གྱི་སྙིང་པོ་ཡང་ཚིག་དེ་གསུམ་དུ་བསྡུས་ནས་བཤད་ཡོད་པ་ཡིན། དེ་ལ་གསན་འདོད་ཡོད་པ་ཐམས་ཅད་སང་ཉིན་གཟའ་པ་སངས་ཀྱི་ཕྱི་དྲོའི་དུས་ཚོད་ལ་ཚང་མ་འབྱོན་པར་ཞུ། དེ་མིན་ཅི་ཡང་མེད།^p366
བྱིན་རླབས་གཏད་རྒྱ།^p368
ཕྱི་ཟླ་༧ཚེས་༡༦ཉིན་གྱི་སྔ་དྲོར་ཆོས་རྗེ་ཉིད་ཀྱིས་ཁྲིད་ཡིག་སངས་རྒྱས་ལག་སྟེར་གྱི་དབུ་ནས་རྫོགས་རིམ་བར་དུ་རེ་རེ་བཞིན་བཀྲལ་ནས་གསུངས་ཤིང་། གཞན་རྫོགས་ཆེན་གྱི་སྐོར་ལུང་གིས་འཐུས་པར་མཛད། བར་སྐབས་སུ་ཁྲིད་ཡིག་འདི་ཉིད་གཏད་རྒྱུའི་ཚུལ་དུ་གསུང་གླེང་གནང་བ་འདི་ལྟར།^p369
གོང་དུ་ཐོག་མར་དགེ་བའི་ཁྲིད་ཐེག་དམན་སྤྱི་ཁྱབ་དང་མཐུན་པའི་ཆོས་བཤད་ཟིན་ལ། གཉིས་པ་ཐེག་ཆེན་མདོ་དང་སྔགས་སྤྱི་ཁྱབ་དང་མཐུན་པའི་བར་དུ་དགེ་བ་གཞུང་གི་ཁྲིད་ཀྱང་བཤད་གྲུབ་པ་ཡིན།^p370
ད་ནི་ཐ་མར་དགེ་བའི་ཁྲིད་རྫོགས་པ་ཆེན་པོ་རང་གི་ཐུན་མོང་མ་ཡིན་པའི་མན་ངག་གཏན་ལ་དབབ་པ་ཡིན། དེ་ལ་སྔོན་འགྲོ་དང་དངོས་གཞི། རྗེས་ཀྱི་ཁྲིད་རྣམ་པ་གསུམ་ཡོད། དེ་ལས་སྔོན་འགྲོའི་ཁྲིད་ཅེས་པ་ནི་སྒོ་གསུམ་གྱི་འཁྲུལ་བ་སྟེ་ལུས་ངག་ཡིད་གསུམ་གྱི་མ་དག་པའི་ཆ་ཐམས་ཅད་དག་པར་བྱེད་པའམ་སྦྱོང་བར་བྱེད་པའི་ཐབས་ཤིག་ཡིན།^p371
དངོས་གཞི་ཀ་དག་ཁྲེགས་ཆོད་ཀྱི་ཁྲིད་ཅེས་པ་ནི། རང་གི་སེམས་ཀྱི་གནས་ལུགས་མ་ནོར་བར་མངོན་སུམ་དུ་མཐོང་བར་བྱེད་པའི་ཁྲིད་ལ་ཟེར།^p372
རྗེས་ལྷུན་གྲུབ་ཐོད་རྒལ་གྱི་ཁྲིད་ཅེས་བྱ་བ་ནི་རང་རྩལ་སྐུ་དང་ཡེ་ཤེས་ཀྱི་སྣང་བ་རྩོལ་མེད་དུ་འཆར་བར་བྱེད་པ་ལ་ཟེར། ཁྲིད་འདི་དག་ཉམས་སུ་ལེན་པར་བྱེད་པའི་ཐབས་ནི། དང་པོ་མཐོང་བརྒྱུད་ཀྱི་ལག་ཁྲིད་ལ་བརྟེན་ནས་ཉམས་སུ་ལེན་པ་དང་། གཉིས་པ་ཉམས་ལེན་སྔ་མ་སྔ་མ་ཐམས་ཅད་ལ་ཉམས་མྱོང་ཐོབ་པ་གཞིར་བཞག་གི་སྟེང་ནས་ཕྱི་མ་ཕྱི་མ་ཐམས་ཅད་ཀྱི་ཁྲིད་འདེབས་དགོས་པ་ཡིན།^p373
ང་སོང་བའི་རྗེས་སུ་ལག་ཁྲིད་དང་ཉམས་མྱོང་གི་ཁྲིད་ནི། འདི་ན་བཞུགས་པའི་བོད་ཀྱི་བླ་མ་རྣམ་པ་ལ་དྲིས་དང་ཁོང་རྣམ་པའི་ཞལ་ན་ཡང་གསལ་བོར་ཡོད་རྒྱུ་རེད། ཁྱེད་རྣམ་པས་དེ་དག་གི་མདུན་ནས་ཞུས་ནའང་ཆོག གལ་ཏེ་བླ་མ་གཞན་དང་མི་འཕྲད་པའི་དབང་དུ་བྱས་ན། འདི་ཡན་ཆད་ཀྱི་ཉམས་ལེན་དེ་སྲ་ཞིང་བརྟན་པ་ཡང་དག་པ་ཞིག་འོང་བར་བྱོས་དང་། རྗེས་སུ་འདི་མན་ཆད་ཀྱི་ཁྲིད་ཀྱི་ཉམས་ལེན་ནི་དཀའ་ཚེགས་མི་དགོས་པར་རང་རྒྱུད་ལ་སྐྱེ་འོང་བར་ངས་སྨོན་ལམ་གྱིས་གཏད་རྒྱ་བྱེད་ཆོག^p374
སྨོན་ལམ་གྱི་གཏད་རྒྱ་ཟེར་བ་ནི། ངས་འདི་ལྟ་བུའི་དོན་ཁྱེད་རྣམ་པའི་རྒྱུད་ལ་སྐྱེ་ཡོང་བར་སྨོན་ལམ་འདེབས་པར་མ་ཟད། རྩ་གསུམ་ཆོས་སྐྱོང་སྲུང་མ་དང་བཅས་པ་དཔང་དུ་བཞག་ནས་ཁོང་རྣམ་པ་ལ་འཕྲིན་ལས་བཅོལ་ཏེ། འདི་ལྟ་བུའི་མན་ངག་ཁྱད་པར་ཅན་དུས་སུ་སྨིན་པའི་སྐབས་ན་སད་པར་གྱུར་ཅིག་ཅེས་གཏད་རྒྱ་ཡང་བྱ་རྒྱུ་ཡིན་པས་རྒྱུད་ལ་རང་ཤུགས་ཀྱིས་སྐྱེ་ཡོང་རྒྱུ་རེད། གལ་ཏེ་ངེད་ཅག་གིས་ཁྲིད་འདི་ད་རེས་མུ་མཐུད་དུ་རྒྱ་ཆེར་བཤད་ནའང་ཕན་པ་ཆེན་པོ་འབྱུང་རྒྱུ་མ་རེད། དཔེར་ན་ཁང་པ་ཞིག་ལ་སྐས་ཐེམ་བཅོ་བརྒྱད་ཡོད་ན། སྐས་ཐེམ་དང་པོ་དང་གཉིས་པ་ལ་སོགས་པ་རིམ་བཞིན་མ་བགྲོད་པར་ཐད་ཀར་བཅོ་བརྒྱད་པའི་སྟེང་དུ་སྤོ་གྲབས་བྱས་ནའང་སྤོ་ཐུབ་པ་མིན། དེ་བཞིན་དུ་ཁྱེད་རྣམ་པ་ལ་ཉམས་ལེན་སྔ་མ་སྔ་མ་རྣམས་ལ་ཉམས་མྱོང་མ་ཐོབ་པར་ཕྱི་མ་མང་པོ་མང་པོ་ཞིག་ངས་ཟླ་བའི་སྣེ་ལ་ཟླ་བ་མཐུད་ནས་བཤད་ན་ཡང་གོ་ཐུབ་རྒྱུ་མ་རེད།^p376
ཁྱེད་རྣམ་པས་དངོས་གཞི་འདི་ལ་གོ་རྒྱུ་ཡོད་ས་མ་རེད་སྙམ་ནས་སེམས་མ་ཕམ་པར། བློ་ལྡོག་རྣམ་བཞི་དང་སྐྱབས་འགྲོ་སེམས་བསྐྱེད། བླ་མའི་རྣལ་འབྱོར་བཅས་ལ་ནན་ཏན་གྱིས་དང་། དེའི་དོན་ཡང་དག་པར་རྒྱུད་ལ་སྐྱེས་སྐབས། ཁྲིད་ཡིག་འདི་ལ་ཐད་ཀར་བལྟས་ནའང་དོན་རང་རྒྱུད་ལ་སྐྱེ་ཡོང་བའི་ཁག་ཐེག་བྱ་ཆོག^p377
དེ་ནས་ཁྲིད་རྒྱུན་མི་ཉམས་པར་བྱ་བའི་ཆེད་དུ། འདི་མན་ཆད་ཀྱི་ཁྲིད་ངས་བོད་སྐད་ཀྱི་སྟེང་ནས་ལུང་ཞིག་འབུལ་རྒྱུ་ཡིན། ཚང་མས་དད་གུས་དང་ལྡན་པའི་སྒོ་ནས་གསན་པར་ཞུ།^p378
སྔོན་འགྲོ་འབུམ་ལྔ་སོགས་ལེགས་པར་གྲུབ་ཅིང་བླ་མ་དང་ཆོས་ལ་དད་པ་རྣམ་དག་ཡོད་ཀྱང་། ཆོས་རྗེ་ཉིད་ཀྱི་ཞལ་དངོས་མ་མཇལ་ཞིང་སྐུ་མདུན་ནས་ཆོས་ཀྱང་ཐོབ་མ་མྱོང་བའི་མ་འོངས་པའི་སྐལ་ལྡན་གདུལ་བྱ་རྣམས་ལ། ཆོས་རྗེ་ཉིད་ཀྱིས་ཁྲིད་ཡིག་འདི་ཉིད་བརྒྱུད་ནས་བཀའ་གཏད་གནང་བ་ཡིན་པར་སེམས་སོ། །^p379
འཇམ་དཔལ་དབྱངས་དང་ཆེས་ཉེ་བའི་ཆོས།^p380
སྔོན་ཆད་ཆོས་རྗེ་ཉིད་ཀྱི་ཆོས་ཁྲིད་ཞུ་མྱོང་བའི་སྐུ་ཞབས་ལྗེ་མཱེ་ཁེའོ་ཧྥེ་སི་（Jamie Kalfas）ལགས་ཀྱིས་ང་ཚོར་འདི་ལྟར་བཤད།^p381
སྐྱབས་རྗེ་བླ་མ་ཁོང་ནཱ་ཕཱ་ལུང་དུ་བྱོན་སྐབས། ཁོང་གིས་ངེད་ཅག་ལ་ལོ་ངོ་དྲུག་གི་ཡར་སྔོན་ཏེ། ཕྱི་ལོ་༡༩༨༧ལོར་རི་བོ་རྩེ་ལྔ་ནས་གཏེར་ལས་བཞེས་པའི་འཇམ་དཔལ་ཞི་སྒྲུབ་ཀྱི་དབང་ཁྲིད་དང་། ལྕེ་བཙུན་སྙིང་ཐིག་གཉིས་ཤིན་ཏུ་རྒྱས་པར་གསུངས།^p383
ཆོས་རྗེ་མཆོག་གིས་ཆོས་ཁྲིད་གསུང་སྐབས། མ་ཡིན་ཡིན་མདོག་གི་རྣམ་པ་དང་བཅས་བཅོས་གང་ཡང་མེད་པར། གང་འདོད་ཀློང་བརྡོལ་གྱི་ཚུལ་དུ་གསུངས་པས། མི་རྣམས་ལ་བར་ཐག་ཧ་ཅང་ཉེ་བའི་ཚོར་སྣང་སྦྱིན། ཁོང་གིས་ཐེངས་རེར་ཕྱག་ཕྲེང་དེ་རྣ་བར་བཀལ་ནས་ཆོས་གསུངས།^p384
སྐབས་དེའི་ཆོས་ཚོགས་ལ་ཞུགས་མཁན་རྣམས་ལས། འགའ་རེ་འཇམ་དཔལ་ཞི་སྒྲུབ་ཀྱི་ཆོས་ལ་དགའ་པོ་ཡོད་ཅིང་། འགའ་རེ་ལྕེ་བཙུན་སྙིང་ཐིག་གི་ཆོས་ལ་ཤིན་ཏུ་དགའ། ང་རང་ནི་འཇམ་དཔལ་ཞི་སྒྲུབ་ཀྱི་ཆོས་ལ་ལྷག་ཏུ་དགའ་བས། དུས་ཡུན་རིང་པོར་ཉིན་རེ་བཞིན་དུ་སྒོམ་སྒྲུབ་བྱས་ཀྱང་། ཉེ་ཆར་བརྩོན་འགྲུས་ཀྱིས་ཅུང་འདང་གིན་མེད་པས། ཡང་བསྐྱར་སྔོན་ཆད་ལྟར་ཉིན་བཞིན་ཆག་མེད་དུ་ཉམས་སུ་ལེན་པ་གལ་ཆེ་བར་འདུག་སྙམ། གཞན་ང་ཚོའི་མཚམས་སྒྲུབ་ཆོས་ཚོགས་ཀྱི་མི་རྣམས་ཀྱིས་ཀྱང་གཟའ་འཁོར་རེ་ལ་མཉམ་དུ་ཉམས་ལེན་ཐེངས་རེ་བྱེད་ཀྱིན་ཡོད།^p385
ཆོས་འདི་ཇི་ལྟར་ཉམས་སུ་བླངས་པ་དེ་ལྟར་དུ་རྗེ་བཙུན་འཇམ་པའི་དབྱངས་ལ་ཐག་ཇེ་ཉེ་རུ་འགྲོ་བཞིན་པའི་སྣང་བ་འཆར་ཡོང་བས། ང་རང་ཆོས་འདི་ལ་ཧ་ཅང་དགའ་བ་ཡིན། ནམ་རྒྱུན་ཕྱི་ལོགས་སུ་འགྲོ་སྐབས། ཡི་གེ་ལུས་ལ་འཆང་ཡོད་མེད་ཀྱི་སྐབས་ཅི་རིགས་ཡོད་ཀྱང་། ཉིན་རེ་བཞིན་ཆོས་འདིའི་སྔགས་བཟླ་བ་ནི་ཡེ་ནས་ཆད་མ་མྱོང་བར་བཤད།^p386
ཁོང་གིས་ཆོས་རྗེ་ཉིད་ཀྱི་གསོལ་འདེབས་ཤིག་མགུར་དུ་དྲངས་བ་ན། བར་མཚམས་ཤིག་ནས་མགྲིན་པ་བརྣངས་ཏེ་ལེན་མི་ཐུབ་པར་གྱུར་ལ། འདི་ལྟར་མུ་མཐུད་བླངས་ན་ང་རང་ངུ་བྲོད་ཀྱིན་འདུག་ཅེས་མཚམས་བཞག་བྱུང་། དེ་ལྟར་རྗེ་ཉིད་ཀྱི་བྱིན་རླབས་ནི་ད་དུང་ཡང་ཁོང་གི་སེམས་སུ་གནས་ཡོད།^p387
མི་སྒེར་གནམ་གྲུར་བཞུགས་པ།^p388
ཉིན་དེའི་ཕྱི་དྲོར། སྦྱིན་བདག་ཅིག་གིས་ཆོས་རྗེ་ཉིད་ཁོ་རང་སྒེར་གྱི་གནམ་གྲུར་ཞུགས་ནས་བྱིན་རླབས་མཛད་པ་དང་། མཁའ་དབྱིངས་སུ་འགྲུལ་བཞུད་ཐེངས་གཅིག་གནང་བར་གདན་ཞུ་བྱས་པ་དང་ལེན་གནང་།^p389
ང་ཚོ་གནམ་ཐང་དུ་འབྱོར་ཚེ། དེར་མི་སྒེར་གྱི་གནམ་གྲུ་མང་པོ་བཞག་འདུག་པ་མཐོང་། ཨ་རིར་མི་སྒེར་ལ་དབང་བའི་གནམ་གྲུ་ཡོད་མཁན་ཤིན་ཏུ་མང་ཡང་། སྐབས་དེར་ང་ཚོའི་ས་ཆར་མི་སྒེར་གནམ་གྲུ་ལྟ་ཅི། མི་སྒེར་ལ་དབང་བའི་རླངས་འཁོར་ཡོད་པའང་ཤིན་ཏུ་བསམ་ཡུལ་ལས་འདས་པའི་ཚད་དུ་འཇོག^p391
གནམ་གྲུར་མི་མང་པོ་སྡོད་ཐབས་མེད་པས། ཆོས་རྗེ་ཉིད་དང་ཨ་ནེ་མེ་སྒྲོན། བླ་མ་མུ་མཚོ། སྐད་སྒྱུར་མཁན་གཅིག་བཅས་ཕེབས་ཤིང་། ང་ཚོས་གནམ་ཐང་ནས་བསྒུགས་པ་ཡིན། གནམ་གྲུ་ཇེ་མཐོ་ནས་ཇེ་མཐོར་འཕུར་བ་དང་བསྟུན། མིག་ལམ་དུ་ཆུང་ནས་ཆུང་དུ་ཕྱིན་མཐར་མི་སྣང་བར་གྱུར།^p393
ཉིན་དེར་རླུང་དྲག་ཏུ་ལྡང་བས་བདག་ལ་སེམས་ཁུར་ཆེན་པོ་བྱུང་ཞིང་། ཡུན་རིང་བར་དུ་གནམ་གྲུ་འཕུར་བའི་ཕྱོགས་སུ་བལྟས། དུས་ཚོད་རིང་པོ་འགོར་རྗེས་ཁོང་རྣམ་པ་ཕྱིར་གནམ་ཐང་དུ་བབས་བྱུང་ལ། བདག་གི་སེམས་ཀྱང་གནམ་གྲུ་དང་མཉམ་དུ་ལྷོད་ལ་བབས།^p394
ཆོས་རྗེ་ཉིད་ཐུགས་ཧ་ཅང་མཉེས་པར་འདུག ནམ་མཁའ་ནས་འཕུར་སྐྱོད་གནང་བ་ནི་ཆེས་ངོ་མཚར་བ་ཡིན་པར་གསུངས་ཀྱང་། གང་དུ་བྱོན་པ་དང་ལྟད་མོ་གང་གཟིགས་སོགས་བདག་གིས་ཤེས་མ་བྱུང་།^p396
ཕུར་པ་ཡང་ཟབ་སྙིང་པོ།^p397
ཕྱི་ཟླ་༧པའི་ཚེས་༡༧ཉིན་གྱི་ཕྱི་དྲོར། ལས་གླིང་གི་ཕུར་པའི་དབང་བསྐུར་བའི་ཐོག་མར་འདི་ལྟར་གསུང་།^p399
སྔོན་གྱི་དུས་སུ་མཆོད་རྟེན་བདེ་བྱེད་བརྩེགས་པ་རུ་འཕགས་ཡུལ་གྱི་རིག་འཛིན་བརྒྱད་ཀྱིས་རྩེ་གཅིག་ཏུ་སྒྲུབ་པ་ཉམས་ལེན་མཛད་པའི་ལག་རྗེས་ལ་སྒྲུབ་པ་བརྒྱད་སོ་སོར་བཀའ་བབས་པར་གྱུར། དེ་ལས་སྒྲུབ་པ་བཀའ་བརྒྱད་འདི་མ་ཧཱ་གུ་རུ་ལའང་བབས་པས། ཁོང་གིས་སྒྲོམ་བུ་ལས་དངོས་སུ་བཏོན་ནས་དཔལ་བསམ་ཡས་ཀྱི་ཡང་དབེན་མཆིམས་ཕུ་བྲག་དམར་ཀེའུ་ཚང་དུ་བཀའ་བརྒྱད་བདེ་གཤེགས་འདུས་པའི་དབང་ཡོངས་རྫོགས་རྗེ་འབངས་སྙིང་གི་བུ་དགུ་སོ་སོ་ལ་ཆེ་མཆོག་དང་། ཡང་དག གཤིན་རྗེ། པདྨ། རྟ་མགྲིན། ཕུར་པ་ལ་སོགས་སོ་སོར་གནང་།^p401
དེའི་རྗེས་སུ་མངའ་བདག་ཁྲི་སྲོང་ལྡེའུ་བཙན་གྱི་བློན་པོ་ཡོངས་ཀྱི་ཆེ་ཤོས་སྔགས་པ་རྡོ་རྗེ་བདུད་འཇོམས་ཀྱིས། སྔར་ཕུར་བའི་བཀའ་བབས་དེ་མཁའ་འགྲོ་ཡེ་ཤེས་མཚོ་རྒྱལ་ཡིན་པས་ཁོང་ལ་ཕུར་བའི་ཆོས་བཀའ་འདི་ཉིད་གསུང་བར་ཡང་ཡང་བསྐུལ་མ་གནང་བ་ན། ཕུར་བའི་ཆོས་བཀའ་རབ་འབྱམས་ནི་ཁོ་མོས་གསུངས་བའི་དུས་མིན། མ་ཧཱ་གུ་རུ་ཆེན་པོ་དངོས་ལ་ཞུས་པས་ཆོག འོན་ཀྱང། ཁྱོད་ཀྱིས་ཚོགས་རྫས་ལ་སོགས་པ་གྱ་ནོམ་པ་ལྟ་གོན་གྱིས་ཞེས་འཕྲིན་བརྫངས་བའི་དུས་སུ། རྡོ་རྗེ་བདུད་འཇོམས་ཀྱིས་ཚོགས་ཀྱི་མཆོད་པ་ཡང་མཐའ་བཞིའི་རྒྱལ་ཁམས་གཞན་ལ་བསྒྲག་ཏུ་རུང་བའི་མཆོད་རྫས་གྱ་ནོམ་པ་བསྒྲིགས་ཏེ། མ་ཧཱ་གུ་རུ་དངོས་ཀྱི་སྐུ་མདུན་ནས་ཕུར་བའི་གདམས་ངག་མ་ལུས་པ་ཞུས། དེའི་དུས་སུ་མེ་ཏོག་ཀྱང་སྔར་ཡེ་ཤེས་མཚོ་རྒྱལ་དང་གཅིག་པར་ཕུར་པ་འཕྲིན་ལས་ཀྱི་ལྷ་ལ་བབས་པ་རེད། དེ་ནས་རྡོ་རྗེ་བདུད་འཇོམས་ཁོང་གངས་རིའི་ལྗོངས་ན་མཐུ་དང་ནུས་པ་ལ་འགྲན་དུ་མེད་པ། རྔ་རྡུང་ཕུར་ཐོགས་ཡོངས་ཀྱི་གཙོ་བོ་རུ་མངའ་གསོལ་ཞིང་། དེའི་རྟེན་འབྲེལ་གྱི་དབང་གིས་ཕྱི་མའི་དུས་ནའང་རྡོ་རྗེ་བདུད་འཇོམས་ཀྱི་སྐྱེ་མཐའ་སྤྲུལ་པའི་གཏེར་སྟོན་ཚང་མ་ལ་ཕུར་བུའི་ཆོས་བཀའ་རེའི་གཏེར་ཁ་མེད་པ་མི་སྲིད་པ་ལྟ་བུ་བྱུང་བ་ཡིན།^p402
རྡོ་རྗེ་བདུད་འཇོམས་དེ་ཉིད་ཀྱང་བོད་ཡུལ་དུ་རིག་འཛིན་ཆེན་པོ་རྒོད་ཀྱི་ལྡེམ་འཕྲུ་ཅན་དང་། བྱང་པ་པདྨ་འཕྲིན་ལས་ལ་སོགས་པའི་སྐུ་ཕྲེང་རིམ་པར་བརྒྱུད་ནས། རྗེས་སུ་ཉག་ཨ་འཛི་ལུང་པའི་ས་ཆར་གཏེར་སྟོན་འཁོར་ལོས་བསྒྱུར་བ་ཆེན་པོ་གཏེར་ཆེན་ལས་རབ་གླིང་པའམ་ཉག་བླ་བསོད་རྒྱལ་ཞེས་བྱ་བའི་སྐུ་སྐྱེ་བཞེས་པ་ཡིན། གཏེར་སྟོན་བསོད་རྒྱལ་ཁོང་ཡང་མཁས་པ་དང་གྲུབ་པའི་ཡོན་ཏན་རྨད་དུ་བྱུང་ཞིང་། ཁྱད་པར་དུ་ཆོས་གཏེར་དང་རྫས་གཏེར་བསམ་གྱིས་མི་ཁྱབ་པ་ལ་མངའ་དབང་འབྱོར་བའི་གྲུབ་པའི་སྐྱེས་བུ་ཆེན་པོ་ཞིག་ཡིན།^p403
ཁོང་གི་ཆོས་གཏེར་ཡོངས་རྫོགས་ཀྱི་སྙིང་པོའམ་བཅུད་ལྟ་བུར་གྱུར་པ་ནི་ཕུར་བའི་ཆོས་སྐོར་འདི་ཡིན། དེ་ལ་ཡང་རྒྱས་པ་ཡང་གསང་ཁྲོས་པ་དང་། འབྲིང་པོ་ཡང་སྙིང་སྤུ་གྲི། བསྡུས་པ་ཡང་ཟབ་སྙིང་པོ་སྟེ་ཆོས་ཚན་རྣམ་པ་གསུམ་དུ་བཞུགས་པ་ཡིན། ཕུར་བ་ཡང་གསང་ཁྲོས་པ་ནི་གང་ཟག་སུ་མ་ཡིན་གྱིས་བསྒྲུབ་རྒྱུ་དཀའ་ལ་སྒྲུབ་ཀྱང་མི་རུང་བ། གལ་ཏེ་དམ་ཚིག་དང་ལྡན་པ་ཁོ་ན་མ་གཏོགས་གཞན་སུས་བསྒྲུབས་ནའང་མཁའ་འགྲོ་ཆོས་སྐྱོང་ཐམས་ཅད་ཀྱིས་བཀའ་ཆད་འབྱུང་བའི་ཆོས་བཀའ་རྒྱ་དམ་པ་ཞིག་ཡིན། ཕུར་བ་ཡང་ཟབ་སྙིང་པོ་འདི་ནི་བྱིན་རླབས་ཀྱི་ཚན་ཁ་ཆེ་ཞིང་། གང་ཟག་མཆོག་དམན་རབ་འབྲིང་སུས་བསྒྲུབས་ཀྱང་སྒྲུབ་ཆོག་པའི་བཀའ་རྒྱ་ཡངས་མོ་ཞིག་ཡིན།^p405
རྟེན་འབྲེལ་དེ་ཡི་དབང་གིས་ད་ལྟ་ང་ཚོ་བོད་ཀྱི་ལུང་པ་ན། ཡང་གསང་ཁྲོས་པ་ནི་ཚེ་གཅིག་སྒྲུབ་པ་ཉམས་ལེན་ལ་བརྩོན་པའི་གང་ཟག་འགའ་ཞིག་གིས་དབེན་པའི་གནས་སུ་བསྒྲུབ་པར་བྱ་བ་མ་གཏོགས་གཞན་སུ་ཡིན་ཡིན་གྱིས་སྒྲུབ་ཀྱིན་མེད། ཕུར་བ་ཡང་ཟབ་སྙིང་པོ་ནི་མི་སྐྱ་རྣམས་ཀྱིས་གྲོང་གཏོ་བྱས་ནས་རང་རང་གི་ཁྱིམ་དུ་ཡང་རྒྱ་ཆེན་པོར་འདོན་པའི་སྲོལ་ཡོད།^p406
སྤྱིར་བསམ་བློ་བཏང་ན་ཕུར་པ་རྒྱས་འབྲིང་བསྡུས་གསུམ་གང་ཉམས་སུ་བླངས་ནའང་དབང་ཚང་མ་གཅིག་པ་ཡིན་པས། གཅིག་གི་དབང་ཐོབ་དུས་རང་རང་གིས་གང་ཉམས་ལེན་བྱས་ནའང་དེའི་དབང་ཐོབ་པ་དང་འདྲ་འདྲ་ཡིན། ད་རེས་ཀྱི་སྐབས་སུ་བབས་པ་ནི་ཕུར་བའི་ཆོས་བཀའ་རབ་འབྱམས་ཀྱི་གནད་ཕྱོགས་གཅིག་ཏུ་བསྡུས་པ་ཕུར་བ་ཡང་ཟབ་སྙིང་པོའི་དབང་སྐུར་བའི་སྐབས་སུ་བབས་པ་ཡིན།^p407
རྒྱལ་སྲས་ལག་ལེན་གྱི་ཕན་ཡོན།^p408
དེ་ནས་ཆོས་རྗེ་ཉིད་ཀྱིས་རྒྱལ་སྲས་ལག་ལེན་གྱི་ལུང་གནང་བའི་སྐབས་སུ་འདི་ལྟར་གསུང་།^p409
ད་སྐབས་རང་རེ་རྣམས་ཀྱིས་ཞག་དགུའི་བར་དུ་རྫོགས་པ་ཆེན་པོ་གཙོ་བོར་གྱུར་པའི་སྨིན་བྱེད་ཀྱི་དབང་བསྐུར་བ་དང་གྲོལ་བྱེད་ཀྱི་གདམས་པ་རྒྱ་ཆེར་བཤད་པ་ཡིན། ཁྱེད་རྣམས་ཀྱིས་ཀྱང་གཙོ་བོ་ད་སྔོན་བཤད་པ་བཞིན་དུ་རྫོགས་པ་ཆེན་པོའི་ཆོས་འདི་ཁོ་ན་ལ་ཉམས་བཞེས་མཛད་པ་གལ་ཆེ། གལ་སྲིད་རྫོགས་པ་ཆེན་པོའི་ལམ་ཉམས་སུ་ལེན་མི་ནུས་པ་དང་། མི་ཤེས་པ། ཤེས་སུ་ཟིན་ཀྱང་ལམ་ལ་རིམ་གྱིས་སློབ་པར་འདོད་པ་རྣམས་ཀྱིས་ཐོག་མའི་བསླབ་བྱ་དེ་གང་ཡིན་ན། བྱང་ཆུབ་སེམས་དཔའི་གཞུང་འདི་ལྟ་བུ་ལ་བསླབ་དགོས་པ་ཡིན་པས། བྱང་ཆུབ་སེམས་དཔའི་ལམ་ཡོངས་སུ་རྫོགས་པའི་གཞུང་ཤིང་དུ་གྱུར་བ། རྒྱལ་བའི་སྲས་ཀྱི་ལག་ལེན་སུམ་ཅུ་སོ་བདུན་མ་ཞེས་བྱ་བ་འདི་ཉིད་ཀྱི་བཀླག་ལུང་ཞིག་ཁྱེད་རྣམ་པ་ལ་དབུལ་རྒྱུ་ཡིན།^p411
ཆོས་འདི་མཛད་པ་པོ་རྒྱལ་སྲས་དངུལ་ཆུ་ཐོགས་མེད་ཅེས་བྱ་བ་ནི་འཕགས་པ་སྤྱན་རས་གཟིགས་ཀྱི་རྣམ་སྤྲུལ་ཡིན་ལ། ཁོང་གང་དུ་བཞུགས་པའི་ས་ཕྱོགས་སུ་སྲོག་ཆགས་དགྲ་གཤེད་དུ་གྱུར་པའི་ལུག་དང་སྤྱང་ཀི ཁྲ་དང་བྱེའུ་རྣམས་ཀྱང་ཕན་ཚུན་གཅིག་གིས་གཅིག་ལ་བྱམས་པའི་སེམས་ཀྱིས་རྩེད་མོ་རྩེ་བ་སོགས་ཐུགས་རྒྱུད་ལ་བྱང་སེམས་འབྱོངས་བའི་རང་རྟགས་ཕྱི་རོལ་ཡུལ་ལའང་སྨིན་ཡོད་པའི་བྱང་ཆུབ་སེམས་དཔའ་ཆེན་པོ་ཞིག་ཡིན།^p412
རྒྱལ་སྲས་ལག་ལེན་འདི་ཉམས་སུ་བླངས་ན་ཕན་ཡོན་བསམ་གྱིས་མི་ཁྱབ་པ་ཡོད་པ་སྨོས་མ་དགོས་ལ། གལ་ཏེ་ཉམས་སུ་ལེན་མ་ནུས་ཀྱང་ཚིག་ཙམ་རྣ་བར་ཐོས་པས་རྒྱུད་ལ་ཐར་བའི་ས་བོན་འཇོག་པར་བྱེད་པ་ཡིན། ཆོས་འདིའི་ཚིག་དོན་ཧ་ཅང་གོ་སླ་བ་དང་ཉམས་སུ་ལེན་བདེ་མོ་ཡིན། རྗེས་མ་ཁྱེད་རྣམས་ཀྱིས་བླ་མ་མེད་ཀྱང་ཡི་གེ་རྐྱང་པ་ལ་བལྟས་ནས་དོན་ཨེ་ཁྲོལ་བལྟས་ནའང་གོ་ཐུབ་རྒྱུ་རེད།^p413
རྫོགས་པ་ཆེན་པོ་གཙོ་བོར་གྱུར་པའི་གསང་སྔགས་ཀྱི་ཆོས་ནི་དང་པོར་བླ་མ་བསྟེན། བླ་མའི་མདུན་ནས་དབང་ཐོབ། ཁྲིད་བཤད། དོན་རྟོགས་རྗེས་གཟོད་ཉམས་སུ་ལེན་དགོས་པ་རེད་མ་གཏོགས། གལ་ཏེ་བླ་མ་མ་བསྟེན། དབང་ཁྲིད་མ་ཞུས་པར་གསང་སྔགས་ཀྱི་ཆོས་ལ་ཐད་ཀར་རང་སྟོབས་ཀྱིས་བལྟས་ན། དེ་ལ་ཕན་པ་མེད་པར་མ་ཟད་ཉེས་པ་རྒྱ་ཆེན་པོ་འབྱུང་བར་འགྱུར་བ་ཡིན། ཡིན་ནའང་ཆོས་འདི་ལྟ་བུ་ནི་བླ་མ་མེད་ཅིང་དབང་ཁྲིད་ལ་སོགས་པ་གང་ཡང་མ་ཐོབ་ཀྱང་། རང་སྟོབས་ཀྱིས་ཉམས་སུ་བླངས་ནའང་འགྲིག་པས་ཧ་ཅང་ཉམས་སུ་ལེན་བདེ་མོ་ཡིན།^p414
གསང་སྔགས་ཀྱི་ཆོས་ཚུལ་རྣམས་ནི་ཁ་སང་ཞུས་པ་ལྟར་དབང་ཐོབ་ཅིང་དམ་ཚིག་གཅིག་པའི་གྲོགས་མ་གཏོགས་གཞན་སུ་ལའང་བསྒྲག་མི་རུང་ཡང་། འདི་ནི་མཆོག་དམན་རབ་འབྲིང་སེམས་ཅན་སུའི་རྣ་བར་ཐོས་ནའང་བསྒྲག་མི་ཆོག་པ་མེད་པར་ཇི་ལྟར་བསྒྲགས་ན་ཕན་ཡོན་དེ་ལྟར་ཆེ་བ་ཡིན་ཏེ། འདི་དར་བའི་ཡུལ་ཁམས་སུ་ནད་མུག་འཁྲུག་རྩོད་ཀྱི་རྒྱུན་ཆད། ཚེ་དཔལ་འབྱོར་བ་གོང་ནས་གོང་དུ་འཕེལ་བར་བྱེད་པའི་ཕན་བདེ་རྒྱ་ཆེན་པོ་འབྱུང་བའི་སྒོ་གཅིག་པུར་གྱུར་པ་ཞིག་ཀྱང་ཡིན། ད་སྐབས་ཆོས་ཚོགས་ཁག་གསུམ་དང་། ཁྱེད་སློབ་མ་རྣམས་ཀྱིས་འདིའི་ལུང་ཐོན་ཞེས་ང་ལ་བསྐུལ་མ་མ་བྱུང་ཡང་། ངས་ཕན་སེམས་འབའ་ཞིག་གིས་ཀུན་ནས་བསླངས་ཏེ་ཁྱེད་རྣམ་པ་ལ་དེ་རིང་ཐོས་གྲོལ་ཆེན་མོའི་ཆོས་འདི་ལན་གཅིག་བཀླགས་པ་ཡིན།^p415
ཆོས་འདི་ནི་ཧ་ཅང་ཟབ་པ་སྟེ། ང་རང་ངོས་ནས་བསམ་བློ་བཏང་ན། བྱིས་པའི་དུས་ནས་ད་ལྟའི་བར་དུ་གཙོ་བོ་ཉམས་ལེན་གྱི་མཐིལ་ལྟ་བུ་ནི་རྒྱལ་སྲས་ལག་ལེན་འདི་ལ་བྱས་པ་ཡིན་ཞིང་། ངས་ཆོས་འདི་དང་པོ་ཉན་ཚུལ་གྱི་དབང་དུ་བྱས་ན་ཡང་། ལན་གཅིག་ཙམ་མ་ཡིན་པར་བླ་མ་བརྒྱ་ལྷག་གི་སྐུ་མདུན་ནས་ཡང་ནས་ཡང་དུ་ཞུ་མྱོང་། གཞན་རང་གིས་འབྲེལ་བ་ཐོགས་པ་ཚང་མ་ལའང་ཆོས་འདི་བཤད་པ་ཡིན་ལ། མི་གྲངས་འབུམ་ཐེར་མང་པོ་ལ་ལན་གྲངས་སྟོང་ལ་ཉེ་བ་ཙམ་ལ་བཤད་ཚར་ཡོད། དེས་ན་ད་རེས་ཁྱེད་རྣམ་པའི་ཐུགས་རྒྱུད་ལའང་ཕན་པ་ཞིག་ཨེ་ཐོགས་སྙམ་ནས་བཤད་པ་ཡིན།^p416
ཁ་ཞེ་གཉིས་མེད་ཀྱིས་ང་ལ་བསྟེན་པའི་སློབ་མ་ཞིག་ཡིན་ན། འདིའི་ཚིག་དོན་ཚང་མ་བློ་ལ་འགྲོ་དགོས་པ་ཡིན་ལ། ཉིན་རེ་བཞིན་དུ་ཆོས་འདིའི་དོན་ཡོངས་རྫོགས་ཉམས་སུ་ལེན་དགོས་ཟེར་ན་དཀའ་མོ་ཡིན་ཡང་། ཚིག་རེ་རེ་ཉམས་སུ་ལེན་རྒྱུ་མི་ཆག་པར་ཁས་ལེན་དང་དམ་བཅའ་དགོས་པའི་སྲོལ་ཡང་ཡོད་པ་ཡིན།^p417
ཞལ་ཏ་ཚིག་གསུམ།^p418
ད་རེས་འུ་ཅག་ཚང་མ་བླ་མ་རྣམས་ཀྱི་བཀའ་དྲིན་གྱི་མཚམས་སྦྱོར་ལ་བརྟེན་ནས། ཧ་ཅང་འབྲེལ་འདྲིས་ཆེ་བ་དང་དད་འདུན་ཆེ་བ་སོགས་གང་ཐད་ནས་ཀྱང་ཤིན་ཏུ་བཟང་པོར་གྱུར་སོང་། ད་ཕལ་ཆེར་འགྲོ་རན་པའི་དུས་ལ་བབ་པ་ཡིན་པས། ང་ལ་ཁྱེད་རྣམ་པར་ཁ་ཏ་ཚིག་གསུམ་ཞུ་རྒྱུ་ཡོད།^p419
ཁ་ཏ་དང་པོ་ནི། ཁྱེད་རྣམ་པ་ཚང་མ་ནང་པ་སངས་རྒྱས་པའི་ཆོས་སྒོར་ཞུགས་ལ། གཞན་ཡང་རང་ལ་འབྲེལ་བ་ཐོགས་ཚད་ཁ་ལྟ་ངོ་ཤེས་ཚང་མ་ནང་པ་སངས་རྒྱས་པའི་ཆོས་སྒོར་བཙུད་རྒྱུར་མ་འཆུགས། དེ་ཞུ་དགོས་པའི་རྒྱུ་མཚན་ཡང་ཁྱེད་རྣམ་པ་ལ་གོང་དུ་ལན་གྲངས་དུ་མར་ཞུས་ཡོད། ང་རང་གི་ངོས་ནས་བསམ་བློ་བཏང་ན། སྙན་གྲགས་དང་དཔལ་འབྱོར་ལ་སོགས་པ་གང་གི་ཆེད་དུའང་མིན། ནུབ་ཕྱོགས་རྒྱལ་ཁབ་ཀྱི་མི་ཁ་ཤས་རེ་སངས་རྒྱས་ཀྱི་བསྟན་པའི་ཆོས་སྒོ་ལ་བཙུད་རྒྱུ་ཨེ་རྙེད་བསམ་ནས་ཡོང་བ་ཡིན། དེས་ན་ཁྱེད་རྣམ་པས་ཀྱང་ངའི་བསམ་པ་མཐར་ཕྱིན་པར་བྱ་བའི་ཆེད་དུ་དེ་ལྟ་བུའི་ལས་ཀ་ཞིག་བསྒྲུབ་རྒྱུར་མ་འཆུགས།^p420
ནང་པ་སངས་རྒྱས་པའི་ཆོས་ཞེས་བྱ་བ་ནི། རིག་གཞུང་རྣམ་དག་གིས་བརྟག་ནའང་ཆོས་རྣམ་པར་དག་པ་ཡིན་པར་བསྒྲུབ་རྒྱུ་ཡོད་ལ། དེར་མ་ཟད་སྔོན་བྱོན་གྱི་བླ་མ་དམ་པ་རྣམས་ཀྱིས་ཉམས་མྱོང་གི་སྟེང་ནས་བསྒྲུབ་ནའང་ཆོས་འདི་རྣམ་པར་དག་པ་ཡིན་པ་ནི། ནང་པ་སངས་རྒྱས་པའི་ཆོས་ལ་ལོ་བརྒྱའི་བར་དུ་དཔྱད་པ་བྱས་ནའང་ཇེ་བཟང་ཇེ་དགའ་ཇེ་སྤྲོར་འགྱུར་བ་མ་གཏོགས། དེ་ལ་མི་བདེན་པ་དང་ཡིད་མི་ཆེས་ས་ཞིག་འདུག་སྙམ་པ་ངོ་མ་རྩ་བ་ནས་ཡོད་པ་མིན།^p421
རང་རེ་རྣམས་ལ་མི་ལུས་ཟེར་བ་ལན་གཅིག་ཙམ་ཐོབ་པ་ལས་ཡང་ནས་ཡང་དུ་འཐོབ་དཀའ། ནང་པ་སངས་རྒྱས་པའི་ཆོས་སྒོར་འཇུག་ཏུ་རུང་བའི་མི་ལུས་ལན་གཅིག་ཐོབ་པའི་སྐལ་བ་བཟང་པོ་འདིར་ཆོས་ལ་འཇུག་དགོས་པ་རེད་མ་གཏོགས། མ་ཞུགས་ན་མི་ལུས་ཐོབ་པར་དོན་མེད་དེ། མིའི་ཁོག་ན་སྙིང་མེད་པ་ལྟ་བུ་ཡིན། དཔེར་ན། གསེར་གྱི་གླིང་དུ་ཕྱིན་ནས་གསེར་སྲང་གང་ཙམ་མི་འཛིན་པར་ལག་སྟོང་དུ་ཐོན་ཡོང་ན། ཐམས་ཅད་ཀྱིས་འཕྱ་བའི་འོས་སུ་གྱུར་པ་དང་ཞེན་ལོག་པའི་གནས་ཤིག་ཡིན་པ་བཞིན་དུ། ད་རེས་ཆོས་སྒོར་འཇུག་པའི་སྐལ་བ་བཟང་པོ་ཐོབ་པའི་གནས་སྐབས་སུ་ཚང་མ་ཆོས་སྒོར་ཞུགས་ན་ཧ་ཅང་བཟང་པོ་རེད།^p423
ཆོས་སྒོར་ཞུགས་ཞེས་པའི་དོན་དེ་ཡང་། རང་གར་ཆོས་སྒོར་ཞུགས་པ་ཙམ་གྱིས་མི་ཚད་པར་དུས་རྒྱུན་དུ་སངས་རྒྱས་ལ་གསོལ་འདེབས་བྱ་རྒྱུ་དང་ལས་རྒྱུ་འབྲས་ལ་ཡིད་ཆེས་ཡོད་པ་ཞིག་དགོས། དེ་ཡང་དགེ་བ་བསྒྲུབས་ན་བདེ་བ་དང་མི་དགེ་བ་བསགས་ན་སྡུག་བསྔལ་འབྱུང་བ་ཚང་མ་ལ་ཡིད་ཆེས་དང་ལྡན་པའི་སྒོ་ནས་ཆོས་ཉམས་སུ་ལེན་རྒྱུ་དང་། བླ་སེར་སོགས་ཆོས་སྒྲུབ་པའི་གང་ཟག་ཐམས་ཅད་ལ་གུས་བཀུར་ཁྱད་པར་ཅན་དུས་རྒྱུན་དུ་གྱིས་དང་། དེ་ལ་ནང་པ་སངས་རྒྱས་པའི་ཆོས་སྒོར་ཞུགས་པ་ཟེར་བ་ཡིན།^p424
ཁ་ཏ་གཉིས་པ་ནི། ནང་པ་སངས་རྒྱས་པའི་ཆོས་ཀྱི་སྲོག་ཤིང་དངོས་ནི་བྱམས་པ་དང་སྙིང་རྗེ་ཡིན། ཁྱེད་རྣམས་ཀྱིས་ཀྱང་དུས་རྒྱུན་དུ་སེམས་ཅན་ཐམས་ཅད་བདེ་བ་དང་ལྡན་ན་སྙམ་པའི་བྱམས་པ་དང་། སྡུག་བསྔལ་དང་འབྲལ་ན་སྙམ་པའི་སྙིང་རྗེ་ཅི་ནུས་ཅི་ལྕོགས་ཀྱིས་བསྒོམ་དགོས། བྱམས་པ་དང་སྙིང་རྗེ་འདི་གཉིས་ཀྱིས་ཚེ་འདིར་རང་གི་ཆོས་དང་སྲིད་ཀྱི་ལེགས་ཚོགས་གང་བསམ་པའི་དོན་ཐམས་ཅད་ཀུན་ཀྱང་གེགས་མེད་ཡིད་བཞིན་དུ་འགྲུབ་པར་འགྱུར་བ་དང་། མཐར་ཐུག་རྣམ་པ་ཐམས་ཅད་མཁྱེན་པ་སངས་རྒྱས་ཀྱི་གོ་འཕང་འཐོབ་པར་འགྱུར་བའི་ཕན་ཡོན་ལ་བསམ་ནས་ཀྱང་། ཡང་ནས་ཡང་དུ་རྒྱུད་ལ་ཅི་ནུས་སུ་བསྒོམ་དགོས།^p425
ཁ་ཏ་གསུམ་པ་ནི། ཁྱེད་རྣམ་པ་ཚང་མས་དུས་རྒྱུན་དུ་འོད་གསལ་རྫོགས་པ་ཆེན་པོའི་ལམ་ཁོ་ན་ཉམས་བཞེས་སུ་མཛད་རྒྱུའི་རེ་བ་ཡིན། རྫོགས་ཆེན་གྱི་ཆོས་ཉམས་སུ་ལེན་དགོས་པའི་རྒྱུ་མཚན་ཡང་། སངས་རྒྱས་ཀྱི་ཆོས་གཞན་ཡིན་ན་བསྟན་པ་ལ་འཕེལ་འགྲིབ་ཅི་རིགས་པ་ཞིག་ཡོད་ཀྱང་། དེང་སང་རྫོགས་པ་ཆེན་པོའི་བསྟན་པ་འདི་ལ་བསམ་བློ་བཏང་ན། སྤྱིའི་ཆ་ནས་དར་རྒྱས་ཕུན་སུམ་ཚོགས་པ་དང་འགྲོ་དོན་དུས་ལ་བབ་པའི་སྒང་ཡིན། ཁྱད་པར་དུ་ཁྱེད་ཨ་མེ་རི་ཀའི་ཡུལ་ཁམས་ལ་མཚོན་ན། ཆོས་གཞན་གང་གིས་ཀྱང་ཕན་ཐོགས་དཀའ་མོ་ཡིན་ཡང་། ཚང་མ་ལ་ཕན་ངེས་པའི་ཆོས་ནི་རྫོགས་པ་ཆེན་པོ་འབའ་ཞིག་ཡིན་ངེས་པའི་བསམ་པ་ང་ལ་ཡོད། ཕྱི་ནང་གི་རྟེན་འབྲེལ་ལ་བསམ་བློ་བཏང་ནའང་། དེ་སྔོན་ལོ་སུམ་ཅུ་ལྷག་ནས་བཟུང་ཁྱེད་ཨ་རིའི་ལུང་པ་འདི་ལ་བོད་ཀྱི་ཆོས་ཡོངས་རྫོགས་ཀྱི་ཐོག་མ་ཡང་རྫོགས་པ་ཆེན་པོའི་བསྟན་པ་དར་ཡོད་ས་རེད། ད་སྐབས་ཁྱེད་རྣམ་པས་ཆོས་ཉམས་སུ་ལེན་དགོས་ན། རྫོགས་པ་ཆེན་པོའི་ཆོས་འདི་ཧ་ཅང་ཉམས་སུ་ལེན་བདེ་མོ་ཡིན། དེའི་རྒྱུ་མཚན་ནི། ད་ལྟ་ཁྱེད་ཚོའི་བླ་མ་རྣམས་ཀྱི་ཉམས་ལེན་གྱི་མཐར་ཐུག་ཀྱང་རྫོགས་པ་ཆེན་པོ་རེད། ཁྱེད་རྣམ་པར་རྫོགས་པ་ཆེན་པོའི་ཆོས་འཆད་དགོས་ནའང་ཁོང་རྣམ་པ་ལ་ཉམས་མྱོང་དང་བྱང་ཆ་ལྡན་པ་མ་ཟད། ཁྱེད་ཚང་མ་ཆོས་འདི་ལ་མོས་པ་ཧ་ཅང་ཆེ་བ་ཡིན་པས་འདི་ཁོ་ནས་ཕན་ཐོགས་ཆེ་རྒྱུ་རེད་སྙམ།^p426
ང་རང་ཡང་བོད་ཡུལ་ལུང་པར་ཡོད་པའི་དུས་སུ། རང་གི་སྙིང་དང་འདྲ་བའི་སློབ་མ་ཁྲི་ཕྲག་མང་པོར་བཤད་མ་བྲ་བའི་ཆོས་དེ། ད་ལྟ་ཁྱེད་རྣམ་པ་དང་འཕྲད་མ་ཐག་ཏུ་སློབ་མ་བརྟག་ལོང་ཙམ་ཡང་མེད་པར་ཐད་ཀར་ཚང་མ་ཚང་སྤྲུགས་བྱས་ནས་བཤད་པའི་རྒྱུ་མཚན་ཡང་། ད་ལྟའི་ཁྱེད་རྣམ་པ་དང་རྗེས་མ་ཡང་ཆོས་འདིས་ཨ་རིའི་ལུང་པ་ལ་ཕན་ཐོགས་རྒྱ་ཆེན་པོ་ཡོད་ངེས་ཅན་རེད་བསམ་ནས་བཤད་པ་ཡིན། དེས་ན་ཁྱེད་རྣམ་པས་ཆོས་འདི་བརྩོན་པ་དྲག་པོས་ཉམས་བཞེས་གནང་རྒྱུ་བདག་གི་རེ་བ་ཡིན།^p427
བརྗེད་དུ་མེད་པའི་གྱེས་བྲལ།^p429
ཕྱི་ཟླ་༧པའི་ཚེས་༡༨ཉིན་ཀྱི་ཕྱི་དྲོར། ཉིན་ཐ་མའི་ཆོས་ཁྲིད་ཀྱི་སྐབས་སུ། ཆོས་རྗེ་ཉིད་ཀྱིས་གཏེར་ཆེན་ལས་རབ་གླིང་པའི་གཏེར་ཆོས་ཚེ་སྒྲུབ་ཡིད་བཞིན་ནོར་བུ་ལས་དོན་དབང་བདུད་རྩིའི་སྤྲིན་ཕུང་ཞེས་བྱ་བའི་ཚེ་དབང་གནང་།^p430
ལིན་ཁིན་ཟློས་གར་གླིང་གི་མཛད་རིམ་བདེ་བླག་ངང་མཇུག་གྲུབ་པའི་དགའ་སྟོན་དུ། ཆོས་རྗེ་ཉིད་དད་ལྡན་རྣམས་དང་མཉམ་དུ་ཚོགས་ཀྱི་འཁོར་ལོ་རྒྱ་ཆེན་པོར་རོལ། སྐབས་དེར། ཆོས་ཚོགས་སོ་སོའི་བླ་སྤྲུལ་རྣམས་ཀྱིས་མཎྜལ་དང་མཆོད་པ་ཆེན་པོ་ཕུལ་བ་དང་། རྗེ་ཉིད་ཀྱི་སྐུ་ཚེ་ཡུན་དུ་བརྟན་ཕྱིར་ཨ་རིའི་བུ་མོ་ལྔའི་ལུས་ལ་མཁའ་འགྲོ་སྡེ་ལྔའི་སྐུ་ཆས་དང་མགོ་ལ་རིགས་ལྔའི་དབུ་རྒྱན་གསོལ་ཏེ་དར་ཚོན་སྣ་ལྔ་དང་བཅས་རྡོ་རྗེའི་བྲོ་གར་འཁྲབ། ལྕགས་མདུད་རིན་པོ་ཆེས་ཆོས་ཚོགས་བཞིའི་ཚབ་བྱས་ཏེ་རྗེ་ཉིད་ལ་བཀའ་དྲིན་གཏང་རག་གི་གསུང་བཤད་གནང་།^p431
དེ་ལྟར་ལས་རིམ་མཇུག་དྲིལ་བ་ན། དད་ལྡན་རྣམས་ཀྱི་འབྲལ་མི་ཕོད་པའི་སྐྱོ་སྣང་ཁྲོད། རྗེ་ཉིད་ཀྱིས་གྱེས་བརྡའི་ཕྱག་ཟུང་ཡུག་ཡུག་མཛད་དེ་ཞལ་གྱེས་པ་ན། འགའ་རེའི་མིག་ནས་མཆི་མ་བྱུང་ཞིང་འགའ་རེས་དད་གུས་ཀྱི་ཐལ་སྒྲ་མཚམས་མི་ཆད་པར་བྱས། སྤྱིར་བཏང་ནུབ་ཕྱོགས་པར་མཚོན་ན། མི་ཕལ་མོ་ཆེར་རྟོག་གེ་པའི་རང་གཤིས་ལྡན་ཞིང་དཔྱོད་ཤེས་ཅན་ཡིན་པས་བྱ་བ་ཆུང་ངུས་དགའ་སྐྱོའི་རྣམ་པ་མངོན་མི་ནུས་མོད། འོན་ཀྱང་ད་ལན་ཁོང་གིས་མན་ངག་ཟབ་མོ་ཅི་དགར་བསྩལ་ནས་ཐམས་ཅད་ལ་ཕན་ཐོགས་རྒྱ་ཆེན་པོ་བྱུང་བས། ཁོ་ཚོས་བཀའ་དྲིན་དྲན་པའི་སྒོ་ནས་ཆོས་རྗེ་ཉིད་དང་འབྲལ་མི་ཕོད་པར་སྐྱོ་གདུང་གི་རྣམ་པ་ཡང་ཡང་མངོན།^p434
ས་ཚིགས་འདིའི་ལས་རིམ་གྱི་དུས་ཚོད་བཀོད་སྒྲིག་ཧ་ཅང་ཚགས་དམ་པོ་བྱས་ཡོད་དེ། ཉིན་རེ་བཞིན་ཆོས་རྗེ་ཉིད་ཀྱིས་དབང་དང་ཆོས་ཁྲིད་གསུང་བའི་དུས་ཚོད་ལས། གཞན་སྔ་དྲོ་དང་ཕྱི་དྲོའི་ཁོམ་སྐབས་རྣམས་སུ། ཡང་ན་བླ་མ་མུ་མཚོས་དབང་གནང་བ་དང་། ཡང་ན་མཁན་པོ་རྣམ་གྲོལ་ངེད་གཉིས་ཀྱིས་སྐྱོར་སྦྱང་དང་དྲི་བར་ལན་འདེབས་པ་སོགས་བྱེད་པའི་མཛད་རིམ་གྱི་བྱ་བ་མང་ཙམ་འབྲི་རྒྱུ་ཡོད་ཀྱང་ཡིག་ཚོགས་ལ་འཇིགས་ནས་འདིར་མ་བཀོད།^p436
བདག་ལ་མཚོན་ན། རྗེ་ཉིད་དང་མཉམ་དུ་ཕྱི་ལོགས་སུ་སོང་ནས། ཡུལ་ཁམས་མི་འདྲ་བའི་ཡུལ་སྲོལ་གོམས་གཤིས་ལ་ལྟ་སྐོར་བྱུང་བ་འདི་ཧ་ཅང་སྐལ་བ་བཟང་པོ་ཡིན་ཡང་། དེ་ལས་ཀྱང་དབང་ཁྲིད་མང་དུ་ཐོབ་པ་དང་། ཁྱད་པར་དུ་ལྕེ་བཙུན་སྙིང་ཐིག་དང་ཁྲིད་ཡིག་སངས་རྒྱས་ལག་སྟེར་གྱི་ཐུན་མིན་མན་ངག་ཟབ་མོ་ཐོབ་པ་ནི་མི་ཚེ་འདིར་ཆེས་རིན་ཐང་བྲལ་བ་ཡིན་པས། ད་ནི་ནམ་ཤི་ཡང་འགྱོད་པ་མེད་སྙམ་པ་མང་དུ་བྱུང་།^p439
ལོ་ཟླས་གསུབ་ཏུ་མེད་པའི་དྲན་པ།^p440
ཆོས་རྗེ་ཉིད་ཀྱིས་ནཱ་ཕཱ་ལུང་དུ་ཉིན་བཅུ་ལ་དབང་ཁྲིད་གནང་བའི་རིང་། ཁོང་གི་བསམ་ཡུལ་ལས་འདས་པའི་བྱིན་རླབས་ཐོབ་པའི་ཨ་རིའི་ཆོས་པ་མང་པོ་ཞིག་གིས་སེམས་ཀྱི་ངོ་བོ་ཤེས་རྟོགས་གང་ལེགས་བྱུང་སྟེ། ནམ་རྒྱུན་ཆོས་རྗེ་མཆོག་གླེང་སྐབས། ལོ་ངོ་སུམ་ཅུ་འདས་ཀྱང་ཁོ་ཚོའི་དད་པ་ནི་ད་དུང་བླ་ལྷག་ཏུ་འཕེལ་གྱིན་འདུག^p441
དཔེར་ན། སྐབས་དེར་རྗེ་ཉིད་ལ་ཞོགས་ཟས་ལས་མཁན་སྐུ་ཞབས་ལཱོན་ཧཱིལ་（Lon Hill）གྱིས་ཕྱིར་དྲན་བྱས་པ་འདི་ལྟར།^p442
བདག་ནི་དེ་དུས་ཆོས་ལ་ཞུགས་མ་ཐག་ཡིན་པས་ཅི་ཡང་མི་ཤེས་མཁན་ཞིག་ཡིན། འོན་ཀྱང་། ཁོ་ཚོས་ང་རང་ཆོས་རྗེ་བླ་མ་སྐུ་འཁོར་དང་བཅས་པར་ཞོགས་ཟས་ལས་མཁན་དུ་བཀོད་སྒྲིག་བྱས་འདུག་པས། ང་ལ་སེམས་འུར་ཆེན་པོ་ལངས་ནའང་སྐལ་བ་བཟང་པོ་ཐོབ་སོང་སྙམ་དུ་ཞོགས་ཟས་གཡོ་སྐོལ་གྱི་བྱ་བ་བསྒྲུབས།^p443
ཆོས་རྗེ་ཉིད་ཀྱི་ཚིག་གསལ་ལ་དོན་འདུས་པ། ཐད་ཀར་བ་དང་སེམས་སུ་ཟུག་ཡོང་བ་ལྟ་བུའི་སྒོ་ནས་སེམས་དོན་ངོ་སྤྲོད་གནང་བར་ང་ལྷག་པར་དགའ་པོ་བྱུང་། ངས་ནམ་རྒྱུན་ཆོས་དེ་སྒོམ་སྒྲུབ་བྱེད་ཐེངས་རེར། མི་ཚེ་གསོན་པོར་གནས་པའི་དོན་པོ་ནི་འདི་ཉིད་ཉམས་སུ་ལེན་པ་ཁོ་ན་ཡིན་སྙམ་གྱིན་ཡོད།^p445
ཁྱད་པར་དུ་འཇམ་དཔལ་རྫོགས་པ་ཆེན་པོའི་བླ་རྣམ་དེ་གཞན་གང་དང་ཡང་མི་འདྲ་བ་ཞིག་སྟེ། ངས་རྟག་ཏུ་བླ་རྣམ་ལ་སྒོམ་སྒྲུབ་བྱེད་སྐབས། བླ་མ་ཁོང་སྐུ་དངོས་སུ་མཇལ་བའི་སྣང་བ་ཤར་ཡོང་བར་བཤད།^p446
གཞན་ཡང་དེ་དུས་ཀྱི་བརྙན་ལེན་མཁན་སྐུ་ཞབས་ལྗོན་སི་ཝེར་ཀྱེན་（John Swearingen）གྱིས་རང་ཉིད་ཀྱི་མྱོང་ཚོར་གླེང་བ་འདི་ལྟར།^p447
སྐབས་དེར་བདག་གིས་ཆོས་རྗེ་ཉིད་ཀྱི་རྒྱབ་ལྗོངས་གསལ་པོ་མི་ཤེས་མོད། འོན་ཀྱང་སྐུ་དངོས་སུ་མཇལ་བ་ན། རྒྱབ་ལྗོངས་གང་ཡང་མ་ཤེས་ཀྱང་ཁོང་ནི་གཞན་དང་མི་འདྲ་བའི་ཚོར་སྣང་ཞིག་རང་བཞིན་ཤུགས་ཀྱིས་སྐྱེ་ཡོང་། སྤྱིར་ང་ཚོའི་དུས་རབས་འདིའི་མི་རྣམས་རྒྱུ་མཚན་དང་གནས་ལུགས་ཁོ་ནར་མཐོང་ཆེན་དང་ཁས་ལེན་བྱེད་མཁན་ཡིན་ཡང་། གྲུབ་པ་བརྙེས་པའི་གང་ཟག་གི་བྱིན་རླབས་ཀྱི་ནུས་མཐུ་ནི་རྒྱུ་མཚན་གང་གིས་ཀྱང་འགྲེལ་བཤད་བྱ་དཀའ་བར་འདུག^p449
སྐབས་དེར་ང་རང་བརྙན་ལེན་མཁན་ཡིན་པས། ཆོས་རྗེ་ཉིད་ཀྱིས་དབང་གནང་བའི་རྗེས་སུ་དད་ལྡན་རྣམས་ལ་བྱིན་རླབས་སྩོལ་བའི་ཆུ་ཚོད་ཕྱེད་ཀྱི་རིང་ལ། ནམ་རྒྱུན་ང་པར་ཆས་ཀྱི་འགྲམ་དུ་ལངས་ཏེ། ཐེངས་རེར་བརྙན་ཤེལ་བརྒྱུད་ཅིང་ཐེངས་རེར་ཐད་ཀར་ཁོང་ལ་བལྟས་པ་ཡིན། པར་ཆས་ཀྱི་བརྙན་ཤེལ་མདུན་ནས་མི་མང་པོ་འགྲོ་འོང་བྱེད་ཀྱང་། ངས་ཆོས་རྗེ་རིན་པོ་ཆེ་མཐོང་བ་ལ་བར་དུ་གཅོད་ཐུབ་ཀྱིན་མི་འདུག་པས། སྐབས་དེར་འཇིག་རྟེན་ཧྲིལ་པོ་ཆོས་རྗེ་ཉིད་གཅིག་པུ་མ་གཏོགས་གཞན་ཅི་ཡང་མི་འདུག་སྙམ་པའི་སྣང་བ་ཤར། དེ་འདྲའི་སྟོབས་ཤུགས་ཆེ་བའི་བྱིན་རླབས་ནི་ད་ལྟ་ད་དུང་ཡང་ངའི་སེམས་སུ་བརྟན་པོར་གནས་ཡོད།^p450
དེ་དུས་ཐོབ་པའི་འཇམ་དཔལ་ཞི་སྒྲུབ་དེ་ཉིད་ཉིན་རེ་བཞིན་དུ་ཉམས་ལེན་བྱེད་ཐུབ་ཀྱིན་མེད་ཀྱང་། དེབ་ཆུང་དེ་ད་ལྟའི་བར་དུ་ལུས་ལ་འབྲལ་མེད་དུ་འཆང་ཡོད་ཅིང་། སྐབས་སྐབས་སུ་ཀློག་འདོན་དང་བསྐྱར་བསམ་བྱས་ནས་སྒོམ་བཞིན་ཡོད། དེའི་སྐབས་ཀྱི་ཆོས་གྲོགས་འགའ་ཞིག་གིས་ཆོས་འདི་ཆག་མེད་དུ་ཉམས་སུ་ལེན་གྱིན་ཡོད་པར་ཐོས་ཞེས་གླེང་བར་མ་ཟད། སྐུ་ཞབས་ལྗོན་ཁོང་གིས་ད་དུང་བརྗེད་དཀའ་ཞིང་མཐོང་དཀོན་པའི་དངོས་མྱོང་དོན་དག་ཅིག་བཤད་པ་འདི་ལྟར།^p451
ཉིན་ཞིག དད་ལྡན་མང་པོས་རང་རང་གི་གཅེས་རྟེན་སྲོག་ཆགས་རྣམས་ཆོས་ཚོགས་ཀྱི་སྒོ་ཁར་ཁྲིད་དེ། རྗེ་ཉིད་ཀྱིས་བྱིན་རླབས་སྩོལ་བར་རེ་སྒུག་བྱེད་ཀྱིན་པའི་སྒང་ལ། ཁྱི་དང་བྱི་ལ་རྣམས་ཀྱིས་ཕན་ཚུན་སྙད་བསྐོ་རྔམ་སྟོན་གྱི་ངར་སྒྲ་འབྱིན་པར་མ་ཟད། སྦར་འབྲད་སོ་འདེབས་ཀྱིས་རྩོད་ཅིང་འཛིང་ནས་བར་ཕྱེ་མི་ཐུབ་པར་གྱུར།^p452
མི་རྣམས་ཀྱིས་བར་ཕྱེ་མ་ནུས་པར་སེམས་ཁུར་བྱེད་པ་ལས་བྱ་ཐབས་བྲལ་བའི་སྐབས་དེར་ཆོས་རྗེ་ཉིད་བྱོན་བྱུང་། ཁོང་གིས་སྒྲ་ཆེན་པོ་ཞིག་བསྒྲགས་པ་དང་མཉམ་དུ། གོང་གི་ངར་སྐད་སྒྲོག་པའི་ཁྱི་དང་བྱི་ལ་རྣམས་སྐད་ཅིག་དེ་ཉིད་ལ་རི་བོང་བཞིན་ཞི་ཞིང་དུལ་བར་གྱུར་ཏེ་འཇམ་ཐིང་ངེར་སོང་།^p453
འདི་ནི་ལོ་ཟླ་ཅི་ཙམ་འདས་ཀྱང་བརྗེད་ཐབས་མེད་པའི་ཕྱིར་དྲན་ཞིག་ཡིན་ལ། ད་ལྟ་ཡང་འབྲེལ་ཡོད་ཀྱི་མི་མང་པོ་ཞིག་གིས་ངོ་མཚར་བའི་གནས་ཚུལ་དུ་བརྩིས་ནས་དུས་རྒྱུན་གླེང་གིན་འདུག་པར་བཤད།^p454
རིག་འཛིན་གླིང་དུ་ཕེབས་པ།^p455
ཕྱི་ཟླ་༧པའི་ཚེས་༡༩ཉིན་གྱི་སྔ་དྲོར། ནཱ་ཕཱ་ལུང་དུ་ཆོས་ཀྱི་མཛད་རིམ་རྣམས་མཇུག་ཡོངས་སུ་གྲུབ་པས། ངེད་ཅག་གནས་དེ་དང་ཁ་བྲལ་ཞིང་རླངས་འཁོར་དུ་བསྡད་དེ་ཆུ་ཚོད་གསུམ་ཙམ་སོང་བ་ན་རིག་འཛིན་གླིང་དུ་འབྱོར། དེ་ནི་ལྕགས་མདུད་རིན་པོ་ཆེས་ཕྱག་བཏབ་གནང་བའི་ཆོས་ཚོགས་ཤིག་ཡིན་ལ། ཁོར་ཡུག་རྣམས་ནགས་ཚལ་དང་སྤང་ལྗོངས་ཀྱིས་མཛེས་པར་བརྒྱན་པས། སྒྲུབ་པ་ཉམས་ལེན་བྱེད་མཁན་ལ་མཚོན་ན་ཆེས་དབེན་ཞིང་ལྷིང་འཇགས་ཀྱི་གནས་ཤིག་ཏུ་གྱུར་འདུག་པས། ནགས་མའི་ཚལ་གྱི་ཚང་ཚིང་རབ་ཏུ་འཁྲིགས་པའི་རྒྱབ་རིའི་ངོས་སུ་མཚམས་ཁང་ཡང་མང་དུ་མཆིས།^p456
ཕྱི་དྲོར། ཆོས་རྗེ་ཉིད་ཀྱིས་ངལ་གསོ་མཛད་པའི་ཁོམ་སྐབས་དང་བསྟུན་ནས། བདག་མཚོ་སྔོན་ཕྱོགས་ནས་ཕེབས་པའི་བླ་སེར་འགའ་དང་མཉམ་དུ། གནས་འདིའི་ཁོར་ཡུག་གི་མཛེས་ལྗོངས་རྣམས་ལ་ལྟད་མོར་རོལ་ཞིང་། སྤང་ཐང་དུ་བསྡད་དེ་ལབ་གླེང་བྱས་ཤིང་པར་ཡང་འགའ་རེ་བླངས་པ་ཡིན།^p459
དགོང་མོ་ཆོས་རྗེ་ཉིད་ཀྱིས་ཐམས་ཅད་ལ་རྟེན་འབྲེལ་ཉེས་སེལ་གྱི་དབང་དང་ཞལ་གདམས་གནང་།^p460
ཕྱི་ཉིན་སྔ་མོར། ཆོས་རྗེ་ཉིད་ས་ཆ་དེ་དང་ཅུང་མ་བྲལ་བའི་སྔོན་དུ། དད་ལྡན་མང་པོས་ཞི་ལ་དང་ཁྱི། བྱ་སོགས་གཅེས་རྟེན་སྲོག་ཆགས་སྣ་ཚོགས་ཁྲིད་ཡོང་བར་ཆེད་དུ་བྱིན་རླབས་མཛད། སྤྱིར་ཁོ་ཚོས་གཅེས་རྟེན་ལ་བྱིན་རླབས་མཛད་པ་ཉིན་རེའི་ལས་རིམ་དུ་བཀོད་མེད་ཀྱང་སྔ་སོར་ནས་གྲ་སྒྲིག་འཐུས་ཚང་བྱས་འདུག་སྟེ། ས་ཆ་ཆེས་ཐག་རིང་པོར་སྡོད་པའི་མི་རྣམས་ཀྱིས་ཀྱང་རང་གི་གཅེས་རྟེན་རྣམས་ཁྲིད་དེ་བསྒུགས་འདུག^p462
ཨ་རིའི་མི་རྣམས་གཅེས་རྟེན་སྲོག་ཆགས་ལ་ཤིན་ཏུ་དགའ་སྟེ། རང་གི་ཁྱིམ་མི་ལྟར་གང་དུ་སོང་ཡང་དེར་ཁྲིད་དེ་འགྲོ་བ་ཡིན། དེ་དག་ལས་ཁྱི་ལ་ལའི་ལུས་བོངས་ཆེ་ཞིང་ཤིན་ཏུ་གཏུམ་དྲག་གི་རྣམ་པར་འདུག་པས། ང་ཚོས་བདེ་འཇགས་ལ་བསམ་སྟེ་ཆོས་རྗེ་ཉིད་གཅར་དུ་འཇུག་མི་འདོད་ཀྱང་། ཁོང་གིས་ནི་དེ་དག་ལ་ཐུགས་ཤིན་ཏུ་གཤིན་པའི་སྒོ་ནས། སངས་རྒྱས་རིན་ཆེན་གཙུག་ཏོར་ཅན་གྱི་མཚན་དང་མ་ཎི་སོགས་གསུངས་ཏེ་བྱིན་རླབས་མཛད་པས་ཐམས་ཅད་ཀྱི་སེམས་ཧ་ཅང་དགའ་བར་གྱུར། དོན་དེ་བྱུང་ནས་ལོ་སུམ་ཅུ་འདས་ཀྱང་། སྐབས་དེ་དུས་ཀྱི་རྣམ་པ་ནི་མི་མང་པོ་ཞིག་གིས་ད་དུང་གསལ་ལྷང་ངེར་དྲན་གྱིན་འདུག་སྟེ། ཁོ་ཚོས་དོན་དེ་ནི་ཤིན་ཏུ་ངོ་མཚར་ཞིང་དྲོ་སྐྱིད་ལྡན་པ་ཞིག་ཡིན་ཞེས་གླེང་གིན་ཡོད།^p463
བཀྲ་ཤིས་ཆོས་གླིང་དུ་འབྱོར་བ།^p465
ཕྱི་ཟླ་༧པའི་ཚེས་༢༠ཉིན་གྱི་སྔ་དྲོར། ང་ཚོ་རིག་འཛིན་གླིང་དང་གྱེས་ནས་རླངས་འཁོར་ལ་ཞུགས་ཏེ་བཀྲ་ཤིས་ཆོས་གླིང་གི་ཕྱོགས་སུ་སོང་ཞིང་། ལམ་བར་ནས་ནགས་ཚལ་དང་རི་བོ་སོགས་མཛེས་ལྗོངས་སྣ་ཚོགས་མིག་ལམ་དུ་བརྒྱུད། ཨ་རིའི་ནུབ་མཚོའི་འགྲམ་ངོགས་ཀྱི་ཡུལ་ལྗོངས་ནི་ང་ཚོ་བོད་ཀྱི་ས་ཆ་དང་འདྲ་བར་ཧ་ཅང་སྐྱིད་པོ་འདུག^p466
དེ་ལས་བདག་གིས་བརྗེད་དུ་མེད་པ་ནི་ལམ་བར་ནས་མཐོང་བའི་གནས་རི་མཱོན་ཐི་ཆཱ་སི་ཏ་（Mount Shasta）ཞེས་པ་དེ་ཡིན། རི་བོ་འདིར་ལོ་བརྒྱ་ཕྲག་རེར་མེ་རི་ཐེངས་རེ་འཕྱུར་བར་གྲགས་ཤིང་། མཚོ་འཕགས་ལ་སྨི་སྟོང་བཞི་སུམ་བརྒྱ་ལྷག་དང་རི་རྩེ་རྟག་ཏུ་ཁ་བས་བཀླུབས་ཡོད། ཨ་རིའི་གདོད་མའི་མི་རྣམས་ཀྱིས་རི་འདི་ནི་འཇིག་རྟེན་གྱི་ཐོག་མའི་འབྱུང་ཁུངས་སུ་འདོད་ལ། ཁོ་ཚོའི་སེམས་སུ་གནས་རི་འདི་ནི་བོད་མིའི་སེམས་ཀྱི་གངས་རིན་པོ་ཆེ་བཞིན་ཤིན་ཏུ་གཙིགས་ཆེན་བྱེད། འདི་ནི་རྣལ་འབྱོར་ཉམས་ལེན་པ་དང་སྒོམ་སྒྲུབ་པ་ཚོ་ཆེས་དགའ་བའི་གནས་ཤིག་སྟེ། རི་འདབས་སུ་ནང་པའི་ཆོས་ཚོགས་དང་བསམ་གཏན་པའི་ཆོས་ཚོགས། རྣལ་འབྱོར་བའི་ཆོས་ཚོགས་སོགས་ཀྱི་མི་ཆེས་མང་པོས་རང་རང་སར་ཉམས་ལེན་ལ་གཞོལ་གྱིན་འདུག གནས་རི་འདིར་བྱིན་རླབས་ཚད་མེད་ལྡན་པས་ནང་སེམས་ཞི་འཇགས་སུ་འགོད་ནུས་པར་ཡང་བཤད། ཆོས་རྗེ་ཉིད་རླངས་འཁོར་ལས་བབས་ཏེ་གནས་རི་དེར་གཟིགས་ཙམ་གནང་ནས། དེར་འཁོད་ཀྱི་མི་རྣམས་ཀྱིས་གནས་རི་དང་འབྲེལ་བའི་ངོ་མཚར་བའི་ལོ་རྒྱུས་ཞུས་པ་ལ་གསན་བཞེས་མཛད།^p468
དེ་ནས་མུ་མཐུད་དུ་ཆུ་ཚོད་གསུམ་ཙམ་སོང་བ་ན། ཨོ་རཱེ་གྷོན་ཞིང་ཆེན་（State of Oregon）ལྷོ་ཕྱོགས་ཀྱི་བཀྲ་ཤིས་ཆོས་གླིང་དུ་འབྱོར། བཀྲ་ཤིས་ཆོས་གླིང་ནི་རྒྱ་སྤྲུལ་རིན་པོ་ཆེས་ཕྱག་བཏབ་གནང་བའི་དགོན་པ་གཙོ་བོ་ཡིན་ཞིང་། དགོན་པ་དེས་བོད་བརྒྱུད་ནང་བསྟན་གྱི་འགྲོ་ལུགས་ལྟར། རྗེ་ཉིད་ལ་གདན་ཞུ་གཟབ་རྒྱས་མཛད་རྗེས། གཙུག་ལག་ཁང་གི་ཁྲི་མཐོན་པོར་བཞུགས་སུ་གསོལ་ཏེ་རྟེན་གསུམ་འབུལ་བ་སོགས་བྱས། རྗེ་ཉིད་ཀྱིས་ཀྱང་དགོན་པ་འདིའི་རྟེན་དང་བརྟེན་པ་རྣམས་ལ་རབ་གནས་མཛད།^p470
ཕྱི་དྲོར་དེར་འདུས་ཀྱི་དད་ལྡན་རྣམས་ལ་ཆོས་ཁྲིད་དང་ཞལ་གདམས་གསུངས།^p472
དགོང་མོར་ཕྱིར་དགོན་ནང་དུ་ཕེབས་རྗེས། ཆོས་རྗེ་ཉིད་ཀྱིས་ངེད་འཁོར་སློབ་རྣམས་དང་མཉམ་དུ། སྐྱབས་རྗེ་བདུད་འཇོམས་རིན་པོ་ཆེས་རྡོ་རྗེ་སེམས་དཔའི་དབང་གནང་བའི་བརྙན་ཕབ་ཟེར་སྡེར་ལ་གཟིགས། ཁོང་གི་ཞལ་ནས། སྤྱིར་ང་རང་གིས་བདུད་འཇོམས་རིན་པོ་ཆེ་མཇལ་འདོད་ཧ་ཅང་ཆེ་ཡང་། ཁོང་ཞིང་ལ་གཤེགས་ཟིན་པས་ཚེ་འདིར་མཇལ་བའི་སྐལ་བ་བྲལ། ཡིན་ནའང་། ད་ལྟ་ཁོང་གི་གསུང་ལ་འབྲེལ་བ་འཇོག་ཕྱིར་དབང་ཞུ་རྒྱུ་ཡིན་ཞེས། བརྙན་ཕབ་ལ་གཟིགས་ཏེ་དབང་གི་མགོ་ནས་མཇུག་བར་ཞུས་ཤིང་། བར་སྐབས་ཀྱི་རྗེས་ཟློས་རྣམས་ཀྱང་དབང་བསྐུར་དངོས་ཀྱི་ཡུལ་ངོས་ལྟར་དུ་བཟླས་བརྗོད་མཛད།^p474
དབང་དེ་ནི་ཕལ་ཆེར་འབྲས་ལྗོངས་སམ་རྒྱ་གར་གང་རུང་དུ་བསྐུར་སྐབས་བརྙན་དུ་བླངས་པ་འདྲ་ལ། དྭངས་ཚད་ཀྱང་ཆེས་ཤིན་ཏུ་གསལ་བར་འདུག དབང་རྫོགས་པར་ཞུས་པ་ན། ཆོས་རྗེ་ཉིད་ཀྱིས་དབང་དེ་ཉིད་སྐུ་དངོས་ཀྱི་མདུན་ནས་ཐོབ་པ་ལྟ་བུའི་ཚུལ་མཛད།^p476
སྤྱིར་བཏང་གི་མི་ཞིག་ལ་མཚོན་ན། བརྙན་གཟུགས་ཀྱི་ལམ་ནས་དབང་དང་ཁྲིད་སོགས་ཐོབ་པ་ཙམ་གྱིས་གཞན་ལ་སྤེལ་མི་རུང་མོད། སྒེར་ངོས་ནས་ཆོས་ཉམས་སུ་ལེན་པ་ལ། བླ་མ་རྣམས་ཀྱིས་ཆོས་གསུངས་པའི་བརྙན་དང་སྒྲ་ལ་བརྟེན་ནའང་བྱིན་རླབས་ངེས་ཅན་འཐོབ་ཐུབ་སྙམ།^p477
རས་གུར་ནང་གི་དགོད་སྒྲ།^p478
ཕྱི་ཟླ་༧པའི་ཚེས་༢༡ཉིན་གྱི་སྔ་དྲོར། རྒྱ་སྤྲུལ་རིན་པོ་ཆེས་ཆོས་རྗེ་ཉིད་ལ་རས་གུར་ཞིག་ཕུལ་ནས་རྩྭ་ཐང་དུ་ཕུབ་འདུག ཆོས་རྗེ་ཉིད་ཀྱིས་ཐུགས་ཤིན་ཏུ་དགྱེས་ཚུལ་མཛད་ནས། འདི་དབྱར་ཁ་བོད་ཡུལ་དུ་བེད་སྤྱོད་བྱ་ཆོག་གསུངས།^p479
གུར་དེ་ལྟར་སྣང་ལ་ཆུང་ཆུང་ཞིག་ཡིན་ཡང་། ནང་དུ་ངེད་ཅག་མི་བཅུ་གསུམ་བསྡད་ཀྱང་ཡངས་མོར་ཤོང་ཐུབ་པར་འདུག ཁོང་གིས་རས་གུར་དེར་བྱིན་རླབས་གནང་བའི་ཚུལ་དུ། ཚང་མ་དང་མཉམ་དུ་དབང་སྡུད་གསོལ་འདེབས་དང་གར་དབང་ལྷ་དགུའི་བསྙེན་པ་གསུངས། དེ་ནས་མུ་མཐུད་དུ་ཛམ་བྷ་ལྷའི་བསྙེན་པ་གསུངས་བའི་བར་སྐབས་ཤིག་ལ། གློ་བུར་དུ་ཁོང་གི་ཞལ་ནས། འོ། ངས་ཅིའི་ཕྱིར་ཛམ་བྷ་ལྷའི་བསྙེན་པ་བཏོན་པ་ཡིན། ད་དམིགས་བསལ་གྱི་རྟེན་འབྲེལ་འདི་ལ་བལྟས་ན། ང་རང་ལོ་དྲུག་ཅུ་ཡན་ཆད་དུ་རྒྱུ་མེད་ཡིན་ཡང་། ལོ་དྲུག་ཅུ་ནས་བཟུང་སྟེ་རྒྱུ་ཆེན་པོ་ཅན་ཞིག་ཏུ་འགྱུར་འགྲོ་ས་རེད་གསུངས། དུས་དེ་ནས་བཟུང་སྟེ་ཁོང་དངོས་གནས་སྔོན་ལས་ལྷག་པར་སྐུ་བསོད་ཇེ་ཆེ་རུ་སོང་བ་ཡིན།^p481
ཡང་ཁོང་གིས་ཉམས་མཚར་གྱི་ཚུལ་དུ། ད་རྒྱུ་ཇེ་ཆེར་སོང་ན་ཡང་ཡག་པོ་རེད། སྔོན་ངའི་ཕ་ཡུལ་དུ་བླ་མ་འཇམ་དབྱངས་ཞེས་པ་ཞིག་ཡོད། ཁོང་གིས་རྟག་ཏུ་རྒྱུ་ཆེན་པོ་ཡོད་ན་བཟང་གི་རེད། བཅོམ་ལྡན་འདས་ཀྱིས་ཀྱང་། ཆོས་རྣམས་ཐམས་ཅད་རྒྱུ་ལས་བྱུང་ཞེས་གསུངས་འདུག་པས། ཆོས་རྣམ་དག་སྒྲུབ་པར་ངེས་པར་དུ་རྒྱུ་ཆེ་དགོས་ནི་རེད། རྒྱུ་ཆེ་དགོས་ནི་རེད་ཅེས་གསུངས་དར་ཞེས་ལད་མོ་མཛད་པ་ན། རས་གུར་ནང་དུ་དགོད་སྒྲ་དིར་རེར་གྱུར།^p483
དེ་ནས་ཁོ་ཚོས་ཆོས་རྗེ་ཉིད་ལ་ཞོ་ཡང་དྲངས་སོང་། སྐབས་དེར་ཁོང་གི་ཞལ་ནས། སྔོན་ཆད་ངས་རྫ་སྟོད་ལྕང་མ་སྒར་དུ་ཆོས་སློབ་གཉེར་བྱེད་སྐབས། འཚོ་རྟེན་གཙོ་བོ་ཞོ་འདི་ཡིན། དེ་རིང་གཙོ་བོ་རྟེན་འབྲེལ་གྱི་ཚུལ་དུ་ཕོར་བ་མི་བཀོལ་བར་ཁྱེད་ཚོའི་ལག་ནང་དུ་བླུག་རྒྱུ་ཡིན་གསུངས་པས། ཚང་མ་དགའ་སྤྲོ་དང་བཅས་ཆོས་རྗེ་ཉིད་དང་མཉམ་དུ་ཞོ་ལ་རོལ།^p484
ཆོས་རྗེ་ཉིད་ཀྱིས་ཐམས་ཅད་དང་མཉམ་དུ་ཞོ་གསོལ་ཞོར་དུ། སྐྱབས་རྗེ་བདུད་འཇོམས་རིན་པོ་ཆེའི་སྐོར་ནས་གསུང་གླེང་གནང་། ཁོང་གི་ཞལ་ནས། ང་ནི་ཤི་མ་ཐག་བདེ་བ་ཅན་དུ་འགྲོ་རྒྱུ་ཡིན། ཁྱེད་ཅག་འགའ་རེ་བདུད་འཇོམས་རིན་པོ་ཆེའི་ཐུགས་བསྐྱེད་ལྟར་ཁོང་དང་མཉམ་དུ་ཟངས་མདོག་དཔལ་རིར་འགྲོ་ས་རེད། ང་རང་དང་མཉམ་དུ་བདེ་བ་ཅན་དུ་སོང་ན། ནམ་ཡིན་ཡང་ཁྱེད་ཅག་གི་ཞིང་ཁམས་ལ་འགྲོ་ཆོག་གི་རེད། དེ་ཡང་བདེ་སྨོན་ལས། པོ་ཊ་ལ་དང་ལྕང་ལོ་ཅན། །རྔ་ཡབ་གླིང་དང་ཨོ་རྒྱན་ཡུལ། །སྤྲུལ་སྐུའི་ཞིང་ཁམས་བྱེ་བ་བརྒྱར། །སྤྱན་རས་གཟིགས་དང་སྒྲོལ་མ་དང་། །ཕྱག་རྡོར་པད་འབྱུང་བྱེ་བ་བརྒྱ། །མཇལ་ཞིང་མཆོད་པ་རྒྱ་མཚོས་མཆོད། །དབང་དང་གདམས་ངག་ཟབ་མོ་ཞུ། །མྱུར་དུ་རང་གནས་བདེ་ཆེན་ཞིང་། །ཐོགས་པ་མེད་པར་ཕྱིན་པར་ཤོག །ཅེས་པ་ལྟར་ཡིན་ཡང་། ཁྱེད་ཅག་བདེ་བ་ཅན་ལ་ཡོང་ནས་སླར་རང་གི་ཞིང་ཁམས་ལ་ལོག་ཆོག་པར་བཤད་མེད་པས། དེ་འདྲའི་ལས་སླ་མོ་ཞིག་མིན་པ་འདྲ། མཁན་རྣམ་གྲོལ་དང་རྒྱ་སྤྲུལ་རིན་པོ་ཆེ། ཁྱེད་རྣམས་ཟངས་མདོག་དཔལ་རིར་སྐྱེ་བར་སྨོན་མཁན་ཨེ་ཡིན། གཞན་པ་མང་ཆེ་བ་ཞིག་ང་དང་མཉམ་དུ་བདེ་བ་ཅན་ལ་འགྲོ་རྒྱུ་རེད་ཅེས་གསུངས་པ་ན། ཐམས་ཅད་དགོད་སྒྲ་ལྷང་ངེར་གྱུར།^p486
ཡང་ཁོང་གིས་ཐུགས་ཅུང་ཟད་སྐྱོ་བའི་ཚུལ་གྱིས། ང་རང་སྔོན་ཆད་བོད་ཡུལ་ན་ཡོད་དུས། ཚེ་འདི་ཉིད་ལ་སྐྱབས་རྗེ་བདུད་འཇོམས་རིན་པོ་ཆེ་མཇལ་འདོད་ཧ་ཅང་ཆེ། ནུབ་གཅིག་རྨི་ལམ་དུ་མི་ཞིག་གིས། སྐྱབས་རྗེ་བདུད་འཇོམས་རིན་པོ་ཆེས་དགོངས་པ་དག་ཞིང་ལ་གཏད་ཟིན་པས། ཁྱེད་གཉིས་ཚེ་འདིར་མཇལ་འཕྲད་ཡོང་བའི་ཐབས་མི་འདུག་ཅེས་བཤད་པ་རྨིས་པས། རྗེས་སོར་ཁོང་གིས་ལོ་གཉིས་གསུམ་རིང་ལ་གསུང་མང་པོ་མི་འབྱོན་པར་དགོངས་པ་མི་ཡུལ་ནས་གཞན་དུ་གཏད་སོང་བ་ད་གཟོད་གོ་བྱུང་། དེ་བས་ངེད་གཉིས་ལ་ཚེ་འདིར་འཕྲད་པའི་སྐལ་བ་ཡོད་མ་སོང་ཞེས་གསུངས།^p487
ཡང་ཁོང་གིས་གློ་བུར་དུ། མདང་དགོང་ངེད་ཚོས་བརྙན་འཕྲིན་ལས་ཞུས་པའི་དབང་ཆོག་དེ་སུའི་གཏེར་ཆོས་རེད་ཅེས་དྲིས་བྱུང་། རྒྱ་སྤྲུལ་རིན་པོ་ཆེས། དེ་ཁོང་རང་གི་གཏེར་ཆོས་ཡིན་ས་རེད་གསུངས།^p488
དེ་ལྟར་རྗེ་ཉིད་ཀྱིས་ཐམས་ཅད་དང་མཉམ་དུ་སྐད་ཆའི་གླེང་མོལ་མང་དུ་བགྱིད་པ་ན། གུར་ནང་ནས་བཞད་སྒྲའང་མུ་མཐུད་དུ་བྱུང་།^p489
བདག་གིས་གསུང་མོལ་ལ་ཉན་ཞོར་དུ། རས་གུར་འདིར་ཕྱི་ནང་རིམ་པ་གཉིས་ཡོད་ཅིང་ཧ་ཅང་ལྕི་བར་འདུག་པས་ལམ་ནས་ཇི་ལྟར་འཁྱེར་བ་སོགས་ལ་བསམ་བློ་ཡང་ཡང་བཏང་།^p491
གཏེར་བུམ་སྦ་ས།^p492
དེ་རྗེས། ཁོང་རྣམ་པས་ཆོས་རྗེ་ཉིད་རླངས་འཁོར་ལ་བཞུགས་སུ་གསོལ་ནས་ཐག་མི་རིང་བའི་མཚམས་སུ་གདན་ཞུ་བྱས། མཐའ་འཁོར་རྩི་ཤིང་གིས་བསྐོར་བའི་རི་རྐེད་ཀྱི་ལྷས་ཆེན་པོ་ཞིག་ཏུ་འབྱོར་བ་ན། རྒྱ་སྤྲུལ་རིན་པོ་ཆེས་ཤིང་སྡོང་ཞིག་ལ་མཛུབ་མོ་བཙུགས་ནས་འདི་སྐད་དུ་ཞུས།^p493
ཕྱི་ལོ་༡༩༨༠ལོ་སྟེ་སྤྲེལ་ལོ་སྤྲེལ་ཟླའི་ཚེས་བཅུ་ཉིན། ཕལ་ཆེར་ཁྱེད་ཀྱིས་བླ་རུང་ནང་བསྟན་སློབ་གླིང་གསར་འཛུགས་མཛད་པའི་ཉིན་དེར། སྐྱབས་རྗེ་བདུད་འཇོམས་རིན་པོ་ཆེ་ཁོང་སན་ཧྥི་རན་སའེ་སི་ཁོ་ནས་ཨ་ཤཱི་ལན་དིར་ཕེབས་ཤིང་། ཁོང་དང་ཁོང་གི་མཁའ་འགྲོ་རིག་འཛིན་དབང་མོ། སྲས་གཞན་ཕན། སྤྲུལ་སྐུ་པད་མ་དབང་རྒྱལ་བཅས་ཐད་འཕུར་གནམ་གྲུར་ཞུགས་ནས་གནས་འདིར་བྱོན་པ་ཡིན། སྐབས་དེར་གནས་འདི་ནི་ལམ་སོགས་འཛུགས་སྐྲུན་ཅིའང་བྱས་མེད་པའི་ས་སྟོང་ཞིག་ཡིན། བདག་སྔ་མོ་ནས་གནས་འདིར་ལྷགས་ཏེ། ལག་ཏུ་གཏེར་བུམ་བཟུང་ནས་བསྒུགས། བདུད་འཇོམས་ཚང་གིས་གཏེར་བུམ་ས་འོག་ཏུ་སྦས་ནས་ས་འདུལ་མཛད་རྗེས། ཡལ་ག་ཞིག་ལ་ཁ་དར་བཏགས་ཤིང་གནས་དེར་བཙུགས་ནས། རྗེས་སུ་གནས་འདིར་ཆོས་ཚོགས་ཚུགས་ནས་ཆོས་པ་མང་པོས་འཇའ་ལུས་ཀྱི་སྐུ་འགྲུབ་པར་འགྱུར་ཞེས་ལུང་བསྟན་ཅིང་། ཆུ་ཚོད་གཉིས་ཙམ་ལ་ཞལ་འདོན་དང་བྱིན་རླབས་མཛད་ནས་ཕྱིར་ཕེབས། ལོ་འགའ་སོང་རྗེས། ངོ་མཚར་བ་ཞིག་ལ་སྐབས་དེའི་ཡལ་ག་དེ་འདི་འདྲའི་ཤིང་སྡོང་ཆེན་པོར་གྱུར་འདུག་གསུངས།^p495
ཆོས་རྗེ་ཉིད་ཀྱིས་ཀྱང་གནས་འདིར་དབང་སྡུད་གསོལ་འདེབས་སོགས་གསུངས་ནས་བྱིན་རླབས་གནང་།^p497
རྡོར་སེམས་ཀྱི་སྐུ་ལ་རབ་གནས་མཛད།^p498
ཉིན་དེའི་ཕྱི་དྲོར། ཡུལ་དེར་ལེགས་པར་གྲུབ་པའི་རྡོར་སེམས་ཀྱི་སྐུ་ལ་ཆོས་རྗེ་ཉིད་ཀྱིས་རབ་གནས་མཛད།^p499
སྤྱིར་རྒྱ་སྤྲུལ་རིན་པོ་ཆེ་ནི་གཏེར་སྟོན་ཀུན་བཟང་ཉི་མའི་རྡོར་སེམས་ཆོས་སྐོར་གྱི་ཆོས་བདག་ཅིག་ཡིན་པའི་རྟེན་འབྲེལ་གྱིས། ཁོང་གིས་ཡུལ་འདིར་ཆེས་ཆེ་ཞིང་མཐོ་ལ་བླ་གབ་མེད་པའི་རྡོར་སེམས་ཀྱི་སྐུ་ཞིག་བཞེངས། སྐུ་ཡི་གཡོན་ཕྱོགས་སུ་སྒྲོལ་མ་ལྗང་མོ་དང་། གཡས་ཕྱོགས་སུ་སྒྲོལ་མ་དཀར་མོ། རྒྱབ་ཕྱོགས་སུ་ཡིག་བརྒྱའི་དུང་འཁོར་སོགས་བཞེངས་འདུག^p501
ཆོས་རྗེ་ཉིད་ཀྱིས་ཞབས་ཐང་དུ་སྐུ་དེར་སྐོར་བ་མཛད་ཅིང་ཐུགས་བསྐྱེད་སྨོན་ལམ་གནང་རྗེས། དུས་ཡུན་རིང་པོར་རབ་གནས་ཀྱི་ཆོ་ག་གསུངས། ཉིན་དེར་ཉི་འོད་རབ་ཏུ་འཚེར་ཞིང་མེ་ཏོག་དཀར་པོ་རྣམས་ཕན་ཚུན་འགྲན་པ་བཞིན་དུ་གཅལ་དུ་བཀྲམ་པའི་ཁོར་ཡུག་ཡིད་འཕྲོག་པ་དེར། ཆོས་རྗེ་ཉིད་ཀྱིས་ཀྱང་། གནས་དེའི་སེམས་ཅན་མང་པོར་ཕན་ངེས་པའི་རྟེན་གསུམ་ཁྱད་པར་ཅན་འདི་འདྲ་ལེགས་འགྲུབ་བྱུང་བར་དགྱེས་ཚོར་ཆེན་པོ་མཛད།^p503
སྐྱེ་འཆིའི་མན་ངག^p506
ཉིན་དེའི་དགོང་མོར་གྲོང་ཁྱེར་ཨ་ཤུ་ལཱན་དཱི་（Ashland）ཡི་ཐམས་ཅད་སྐྱོབ་པའི་ཆོས་ཁང་（Rogue Valley Unitarian Universalist Fellowship）དུ་ཚང་མའི་རེ་བ་ལྟར་རྗེ་ཉིད་ཀྱིས་འཕོ་བ་དང་ཚེ་དབང་ཚེ་འགུགས་གསུངས་པ་ཡིན། སྤྱིར་འཕོ་བ་དང་ཚེ་དབང་དག་ནི་མང་པོ་ཞིག་གིས་འདོན་ཤེས་ཀྱང་། རྗེ་ཉིད་ཀྱི་གསུང་སྲོལ་ཤེས་པ་སོགས་སུ་དམིགས་ནས་ཐམས་ཅད་ཇི་བཞིན་དུ་ཡི་གེར་བཀོད་པ་འདི་ལྟར།^p507
ད་རེས་རང་རེ་རྣམས་ཀྱིས་རྙེད་པར་དཀའ་བ་དལ་འབྱོར་གྱི་མི་ལུས་རིན་པོ་ཆེ་ཐོབ། མི་ལུས་ཐོབ་པ་ཙམ་དུ་མ་ཟད་མཚན་ཉིད་དང་ལྡན་པའི་བླ་མ་དགེ་བའི་བཤེས་གཉེན་དང་ཡང་མཇལ། བླ་མ་མཇལ་བ་ཙམ་དུ་མ་ཟད་བླ་མའི་དྲུང་ནས་གདམས་ངག་རྒྱ་ཆེན་པོ་ཐོབ་པའི་སྐལ་བ་བཟང་པོ་རྙེད་ཡོད་པ་ཡིན། དེ་ཡིན་ཡང་། འདི་ལྟ་བུའི་དལ་འབྱོར་དེ་ཡུན་རིང་པོར་རྟག་པ་དང་བརྟན་པ་མེད་པར། ངེས་པར་འཆི་བ་དང་། ནམ་འཆི་ཆ་མེད། འཆི་རྐྱེན་ངེས་མེད་ཀྱི་བདག་ཉིད་ཅན་ཡིན་པ་ལ་ཡང་ནས་ཡང་དུ་བློ་སྦྱངས་ནས། ཚེ་འདིའི་བྱ་གཞག་གང་ལ་ཡང་ཞེན་ཆགས་མེད་པ་ཞིག་བྱ་དགོས་མ་གཏོགས། དེ་ཡང་རང་ཉིད་འཆི་བའི་ཚེ་རྒྱུ་ལོངས་སྤྱོད་དང་། ཐོབ་མངའ་ཐང་། མཚན་སྙན་གྲགས། རིགས་གཟུགས་ལ་སོགས་པ་གང་གིས་ཀྱང་ཕན་པ་མེད། དེ་མིན་མི་གཅིག་གིས་ཀྱང་གྲོགས་མི་བྱེད་ལ། ཟས་ཁམ་གཅིག་ཀྱང་འཁྱེར་བའི་དབང་ཆ་མེད་པར། རང་ཉིད་གཅིག་པུར་རྒྱུས་མེད་ཀྱི་ཡུལ་དུ་ལག་སྟོང་མཆན་དུ་བཅུག་ནས་འགྲོ་དགོས་པའི་དུས་ལ་བབས་པའི་གནས་སྐབས་ན། ཕན་ངེས་པ་ནི་དམ་པའི་ཆོས་ཡིན་ཞིང་གནོད་ངེས་པ་ནི་སྡིག་པ་མི་དགེ་བ་ཡིན། དེའི་ཕྱིར་ན་ད་ལྟ་ནས་ཕན་གནོད་ཀྱི་བྱ་བ་ངོས་ཟིན་དགོས།^p508
དེས་ན་ད་ལྟ་དགེ་བ་སྒྲུབ་པ་ལ་རང་དབང་ཡོད་པའི་གནས་སྐབས་ན། སུ་དང་སུ་ཡིན་ན་དགེ་བ་བསྒྲུབ་དགོས་པ་ཡིན་མ་གཏོགས། གོང་དུ་གསུངས་པ་ལྟར་ཚེ་འདི་སྣང་ལ་ཞེན་ནས། འདིར་ཡོད་པའི་མི་ཚང་མ་ཡང་ཉི་མ་བདུན་གྱི་ནང་ན་ཁོམ་པའི་དུས་སྐབས་ཉིན་གཉིས་མ་གཏོགས་མེད། ཉིན་གཉིས་པོ་དེ་ཡང་གླུ་དང་གར་སོགས་རྩེད་མོ་སྣ་ཚོགས་དང་། ཆང་འཐུང་བ་ལ་སོགས་དོན་མེད་ཀྱི་བྱ་གཞག་མང་པོས་འདས་འགྲོ་བས། ཆོས་དགེ་བ་མ་བསྒྲུབས་པར་ནམ་ཞིག་འཆི་བའི་གནས་སྐབས་ལ་ཐོན་པའི་དུས་སུ། མཆོག་དམན་རབ་འབྲིང་སུ་ཡིན་ཡང་གཟུགས་བཞིས་དོང་བཞི་བརྐོས། མིག་མཆི་མས་བཀང་། སེམས་འགྱོད་པ་དང་བཅས་ཏེ་འགྲོ་དགོས་པ་ཡིན། སྐབས་དེར་དགེ་བ་ཞིག་བསྒྲུབས་མེད་ན་རང་མགོ་རང་གིས་བསྐོར་ན་བསྐོར་ཆེན་ཟེར་བར་འགྱུར་འགྲོ་བ་ཡིན། དེས་ན་མི་སུ་དང་སུ་ཡིན་ཡང་ཚེ་འདི་སྣང་གི་རྒྱུ་རྫས་ལོངས་སྤྱོད་ཙམ་ལ་བསམ་བློ་མི་གཏོང་བར། རང་གི་མགོན་རང་གིས་བྱས་ནས་དགེ་བ་རྣམ་པར་དག་པ་ཞིག་བསྒྲུབ་པ་ལ་ཅི་ནས་ཀྱང་འབད་དགོས་པ་ཡིན། སྤྱིར་འཛམ་གླིང་ན་ཚེ་འདི་ཕྱིའི་ཕན་པ་སྒྲུབ་ཐབས་ཀྱི་ཆོས་ལུགས་ཤིན་ཏུ་མང་པོ་གསུངས་ཡོད་ཀྱང་། དེ་དག་གི་ནང་ནས་ནང་པ་སངས་རྒྱས་པའི་ཆོས་ལུགས་ནི་ཆེས་ཕུལ་དང་མཆོག་ཏུ་གྱུར་བ་ཡིན་པར་རིགས་པ་དང་ལུང་གིས་གྲུབ་ལ། མྱོང་བས་ཀྱང་གྲུབ་པའི་ཆོས་རྣམ་པར་དག་པ་ཞིག་ཡིན། དེས་ན་སྤྱི་ཁྱབ་ནས་ནང་པ་སངས་རྒྱས་པའི་ཆོས་ཉམས་སུ་ལེན་ཚུལ་ལ་ཤིན་ཏུ་མང་པོ་ཡོད་ཀྱང་། དེ་ཐམས་ཅད་ཀྱི་ནང་ནས་བསྒྲུབ་སླ་ལ་ཕན་ཡོན་ཆེ་བའི་ཆོས་ཤིག་ཡོད། དེ་གང་ཡིན་ན། སངས་རྒྱས་འོད་དཔག་མེད་ལ་གསོལ་བ་རྩེ་གཅིག་ཏུ་བཏབ་ནས། ཤི་མ་ཐག་ཏུ་བདེ་བ་ཅན་དུ་སྐྱེ་བའི་ཐབས་ལ་འབད་པར་བྱེད་པ་འདི་ནི། ནང་པ་སངས་རྒྱས་པའི་ཆོས་ཀྱི་སྙིང་པོ་ལྟ་བུར་གྱུར་པ་དེ་ཡིན།^p509
དེར་མ་ཟད་ཆོས་ལུགས་དང་གྲུབ་མཐའ་གཞན་ཏེ། དཔེར་ན་ཧིན་དྷུའི་ཆོས་ལུགས་དང་། ཡེ་ཤུའི་ཆོས་ལུགས་སོགས་ཉམས་སུ་ལེན་མཁན་གྱི་གང་ཟག་ཅིག་ཡིན་ན་ཡང་། དོན་འདི་ལྟ་བུ་ཉམས་སུ་བླངས་ན་ཉེས་པ་མེད་པར་མ་ཟད། ཕན་པ་དཔག་ཏུ་མེད་པ་འབྱུང་བ་དང་། ཁྱད་པར་དུ་སོ་སོའི་ཆོས་ལུགས་ལས་བཤད་པའི་གྲུབ་འབྲས། དགེ་བའི་རེ་འདོད་མཐར་ཐུག་པ་འགྲུབ་པར་བྱེད་པའི་ཐབས་རྨད་དུ་བྱུང་བ་དེ་ཡང་འདི་ཁོ་ནས་འགྲུབ་པར་འགྱུར་བ་ཡིན་པའི་ཕྱིར་ན། འདི་ལ་ཆོས་ལུགས་ཐ་དད་དང་གྲུབ་མཐའ་ཐ་དད་ཟེར་ནས་ཕྱོགས་རིས་མི་བྱ་བར། ཐམས་ཅད་ཀུན་གྱིས་སངས་རྒྱས་འོད་དཔག་མེད་ལ་གསོལ་བ་བཏབ་ནས་བདེ་བ་ཅན་དུ་སྐྱེ་བའི་སྨོན་ལམ་གདབ་རྒྱུ་ནི་མེད་དུ་མི་རུང་བ་ཡིན།^p511
འཕོ་བ།^p512
དེས་ན་ད་རེས་ཀྱི་སྐབས་སུ་བབས་པ་ཡང། མགོན་པོ་འོད་དཔག་མེད་ལ་གསོལ་བ་བཏབ་ནས་བདེ་བ་ཅན་དུ་སྐྱེ་བར་བྱེད་པའི་ལམ་རྣམ་པར་དག་པ་ཞིག་ངས་ཁྱེད་རྣམས་ལ་འཆད་རྒྱུ་ཡིན། ཐོག་མར་ཁྱེད་རང་རྣམས་ཀྱིས་སངས་རྒྱས་འོད་དཔག་མེད་སྲས་བྱང་ཆུབ་སེམས་དཔའི་ཚོགས་དང་བཅས་པ་ཐམས་ཅད་ནི། དུས་ད་ནས་བཟུང་སྟེ་མཐར་ཐུག་སངས་རྒྱས་ཀྱི་གོ་འཕང་མ་ཐོབ་བར་དུ་སྐྱབས་སུ་བསྟེན་བསམ་པ་དང་། དེ་ནས་རང་གིས་དགེ་རྩ་ཇི་སྙེད་ཅིག་བསགས་པའི་མཐུས། ནམ་མཁར་མཉམ་པའི་སེམས་ཅན་ཐམས་ཅད་བདེ་བ་ཅན་དུ་སྐྱེ་བར་གྱུར་ཅིག་སྙམ་དུ་སྐྱབས་སེམས་འདི་གཉིས་ཀྱི་རྗེས་ཟློས་གྱིས།^p513
དེ་ནས་ཁྱེད་རང་རྣམས་ཀྱིས་གནས་འདི་ཉིད་ཀྱང་ནུབ་ཕྱོགས་བདེ་བ་ཅན་གྱི་ཞིང་ཁམས་དངོས་ཡིན་སྙམ་པ་དང་། རང་གི་ལུས་པོ་དེ་ཡང་ཐ་མལ་མ་དག་པ་མ་ཡིན་པར། ངོ་བོ་མཁའ་འགྲོ་ཡེ་ཤེས་མཚོ་རྒྱལ་ལ་རྣམ་པ་རྡོ་རྗེ་རྣལ་འབྱོར་མ། སྐུ་མདོག་དམར་པོ། ཞལ་གཅིག ཕྱག་གཉིས། ཕྱག་གཡས་གྲི་གུག་དང་གཡོན་པས་ཐོད་པ་འཛིན་པ། ཞབས་དོར་སྟབས་ཀྱིས་བཞུགས་པ་དེ་ལྟ་བུ་ཞིག་ཡིད་ཡུལ་དུ་གསལ་བོར་སྒོམས། དེའི་ལུས་ཀྱི་དཀྱིལ་ལམ་དབུས་ན་རྩ་དབུ་མ་སྟོང་སང་སྦོམ་ཕྲ་མདའ་སྨྱུག་ཙམ་པ་ལ། ཡར་སྣེ་སྤྱི་བོའི་ཚངས་པའི་བུ་ག་ན་ཁ་ཕྱེ་ཡོད་པ། མར་སྣེ་ལྟེ་འོག་ཏུ་ཁ་ཟུམ་ཡོད་པ། སྙིང་ཁ་ན་ཚིགས་ཀྱིས་བཅད་པ། དེའི་སྟེང་ན་རླུང་གི་ཐིག་ལེ་ལྗང་སྐྱ་ཞིག་གི་སྟེང་ན་རང་གི་སེམས་སམ་རིག་པ་ཧྲཱིཿ ཡིག་དམར་པོ་དེ་ནི། རླུང་གི་ཐིག་ལེ་དེས་ཡར་ལ་བསྐྱོད་ནས་འཕར་ལ་ཁད་དང་ཡལ་ལ་ཁད་པ་ཞིག་སྒོམས། དེ་ནས་རང་གི་སྤྱི་བོའི་ཁྲུ་གང་ཙམ་གྱི་སྟེང་གི་ནམ་མཁའ་ལ་མགོན་པོ་འོད་དཔག་མེད་སྲས་བྱང་ཆུབ་སེམས་དཔའི་ཚོགས་དང་བཅས་པ་མངོན་སུམ་དུ་བཀྲ་ལམ་མེར་བཞུགས་ཡོད་པའི་མོས་པ་གྱིས། དེ་དག་གི་དོན་ནི་བོད་སྐད་ཀྱིས་བཏོན་ན་འདི་ལྟར་ཡིན་པས་ཚིག་འདི་ལའང་གསན་པར་ཞུ།^p519
དེ་ནས་ཁྱེད་རང་རྣམས་ཀྱིས་སྤྱི་བོའི་མགོན་པོ་འོད་དཔག་མེད་ལ་དད་པ་རྩེ་གཅིག་ཏུ་བཞག་ནས། དུས་ད་ལྟ་ཉིད་དུ་རང་སེམས་འདི་ཉིད་མགོན་པོ་འོད་དཔག་མེད་ཀྱི་ཐུགས་ཀར་འཕོ་བར་བྱིན་གྱིས་བརླབ་ཏུ་གསོལ་སྙམ་པའི་དད་མོས་རྩེ་གཅིག་གྱིས་དང་། ངས་མགོན་པོ་འོད་དཔག་མེད་ལ་ཁྱེད་རྣམ་པའི་ཚབ་བྱས་ནས་གསོལ་བ་འདེབས་རྒྱུ་ཡིན་པས། ཁྱེད་རྣམ་པས་ཀྱང་ངའི་ཚིག་འདི་ལ་གསན་ནས་མགོན་པོ་འོད་དཔག་མེད་ལ་ཡིད་ཀྱིས་གསོལ་བ་ཐོབ་ལ་རྩེ་གཅིག་ཏུ་དད་པ་ཞོག^p530
དེ་ནས་ང་རང་གིས་ཧྲཱིཿ ལྔ་ཚན་བརྗོད་པའི་ཚེ་ཁྱེད་རང་གི་སྙིང་ཁ་ན་རླུང་གི་ཐིག་ལེ་ལྗང་སྐྱའི་སྟེང་ན་རང་སེམས་ཧྲཱིཿ ཡིག་དམར་པོ་ཡོད་པ་དེ་ཡར་ཡར་རླུང་གིས་བཏེགས་ནས། སྤྱི་གཙུག་ལ་ཐོན་པ་དང་མཉམ་དུ་ངས་ཧིག༔ཅེས་བརྗོད་པའི་ཚེ་ཁྱེད་རྣམས་ཀྱི་རིག་པ་དེ་མགོན་པོ་འོད་དཔག་མེད་ཀྱི་ཐུགས་ཀར་ཐིམ་སོང་བར་བསམ། སླར་ཡང་དེ་ལྟ་བུ་ཞིག་གསལ། ཡང་ཧྲཱིཿ ལྔ་ཡིས་ཡར་བསྐྱོད་ནས་མགོན་པོ་འོད་དཔག་མེད་ཀྱི་ཐུགས་ཀར་ཐིམ་སོང་བར་བསམ། ཡང་ཆུ་ལས་ཆུ་བུར་རྡོལ་བ་བཞིན་དུ་སྙིང་གི་དབུས་སུ་གསལ་ནས། ཧྲཱིཿ ལྔས་ཡར་བསྐྱོད་དེ་སྤྱི་བོར་ཐོན་པ་དང་མཉམ་དུ་ང་རང་གིས་ཧིཀཿ སྒྲ་ཞིག་བྱས་པའི་སྟོབས་ཀྱིས་ཁྱེད་རང་རྣམས་ཀྱི་རིག་པ་དེ་མགོན་པོ་འོད་དཔག་མེད་ཀྱི་ཐུགས་ཀར་ཐིམ་པའི་མོས་པ་གྱིས།^p539
དེ་ནས་ང་རང་གིས་ཕཊ་སྒྲ་ལྔ་ཚན་བྱས་པའི་མཐུས་ཁྱེད་རང་རྣམས་ཆོས་སྐུ་དང་། ལོངས་སྐུ། སྤྲུལ་སྐུ། ངོ་བོ་མི་འགྱུར་རྡོ་རྗེའི་སྐུ། མངོན་པར་བྱང་ཆུབ་པའི་མགོན་པོ་འོད་དཔག་མེད་ཀྱི་སྐུ་སྟེ་སྐུ་ལྔའི་དབྱིངས་སུ་རྒྱས་བཏབ་ནས་ནམ་ཡང་འོད་དཔག་མེད་དང་དབྱེར་མེད་དུ་གྱུར་སོང་བར་བསམ་པའི་མོས་པ་གྱིས།^p541
དེ་ནས་སླར་ཡང་སྤྱི་གཙུག་ན་ཡོད་པའི་མགོན་པོ་འོད་དཔག་མེད་དེ་ཉིད་འོད་དུ་ཞུ་ནས། ཁྱེད་རང་རྣམས་ཀྱི་ལུས་ལ་ཐིམ་པར་བསམ།^p543
ཚེ་དབང་།^p544
ཁྱེད་རང་རྣམས་སྐད་ཅིག་གིས་བཅོམ་ལྡན་འདས་མགོན་པོ་ཚེ་དཔག་ཏུ་མེད་པ། སྐུ་མདོག་དམར་པོ་པདྨ་རཱ་གའི་མདོག་ལྟ་བུ་ལ་ལོངས་སྤྱོད་རྫོགས་སྐུའི་རྒྱན་ཆས་ཀྱིས་བརྒྱན་པ། ཕྱག་མཉམ་བཞག་གི་སྟེང་ན་འཆི་མེད་ཚེ་ཡི་བདུད་རྩིས་བཀང་བའི་བུམ་པ་བསྣམས་པ། ཞབས་རྡོ་རྗེ་དཀྱིལ་མོ་ཀྲུང་གིས་བཞུགས་པ་ཞིག་གསལ་བར་སྒོམས།^p545
དེ་ནས་ཚེ་རིལ་དང་ཚེ་ཆང་འདི་ཉིད་ཁྱེད་རང་ལ་གཏད་པས། ཁྱེད་རང་གིས་ཁར་མྱོང་བ་ཙམ་གྱིས་མགོན་པོ་ཚེ་དཔག་མེད་དང་སྐལ་བ་མཉམ་པའི་འཆི་མེད་ཚེ་ཡི་དངོས་གྲུབ་ཐོབ་པའི་མོས་པ་གྱིས།^p565
ད་འཕོ་བ་མ་བསྒོམས་སངས་རྒྱས་ཀྱི་ཁྲིད་དང་དུས་མིན་གྱི་འཆི་བ་ཐམས་ཅད་ལས་གྲོལ་བར་བྱེད་པའི་མགོན་པོ་ཚེ་དཔག་མེད་ཀྱི་དབང་བསྐུར་ཟིན་པ་ཡིན། དགེ་བ་འདི་དག་གིས་མཚོན་དུས་གསུམ་བསགས་པའི་དགེ་བའི་རྩ་བ་ཐམས་ཅད་གཅིག་ཏུ་བསྡོམས་ཏེ་རྣམ་པ་ཐམས་ཅད་མཁྱེན་པ་སངས་རྒྱས་ཀྱི་གོ་འཕང་ཐོབ་པར་བྱ་བའི་ཕྱིར་དུ་ཡོངས་སུ་བསྔོ་བར་བགྱིའོ་སྙམ་དུ། བསྔོ་བ་དང་སྨོན་ལམ་འདི་དག་མཉམ་དུ་གསུང་བར་ཞུ།^p578
དེང་འདིར་རྣལ་འབྱོར་པ་བདག་ཅག་དཔོན་སློབ་ཡོན་མཆོད་མི་ནོར་འཁོར་དང་བཅས་པ་ཐམས་ཅད་ཉི་མ་དང་ཟླ་བ། གཟའ་དགྲ་གཅན་གྱི་གནོད་པ་ལས་གྲོལ་བ་བཞིན་དུ་བདུད་དང་བར་ཆད་སྤང་བྱ་མི་མཐུན་པའི་ཕྱོགས་ཐམས་ཅད་ལས་ཤིན་ཏུ་རྒྱལ་ཞིང་བཀྲ་ཤིས་པར་གྱུར་ཅིག ཛ་ཡ་ཛ་ཡ་སུ་ཛ་ཡ། ཛ་ཡ་ཛ་ཡ་སུ་ཛ་ཡ། ཛ་ཡ་ཛ་ཡ་སུ་ཛ་ཡ། རྒྱལ་བར་གྱུར་ཅིག རྒྱལ་བར་གྱུར་ཅིག རྒྱལ་བར་གྱུར་ཅིག ཤིན་ཏུ་རྒྱལ་བར་གྱུར་ཅིག^p593
ངོ་མཚར་བའི་ཕཊ་སྒྲ།^p594
སྤྱིར་ང་ཚོ་ལ་མཚོན་ན་ཆོས་རྗེ་ཉིད་ཀྱིས་འཕོ་བ་གསུང་བ་ནི་ཆེས་སྤྱིར་བཏང་ཞིག་ཡིན་མོད། བསམ་ཡུལ་ལས་འདས་པ་ཞིག་ལ། ཕྱི་ཟླ་༧པའི་ཚེས་༢༡ཉིན་ཆོས་ཚོགས་སུ་འཕོ་བ་གསུང་སྐབས་ཀྱི་ཕཊ་སྒྲ་ཡིས། དེར་འཁོད་ཀྱི་མི་རྣམས་ལ་ལོ་མང་པོར་བརྗེད་ཐབས་མེད་པའི་བག་ཆགས་བཞག་ཡོད་པ་དེ། ཕྱིས་སུ་ཁོང་ཚོ་ལ་བཅར་འདྲི་བྱེད་སྐབས་ད་གཟོད་ཤེས་སོང་།^p595
འཕུར་མཉེད་ལ་མཁས་པའི་ཆོས་ཚོགས་ཀྱི་དྲུང་ཡིག་པ་ལྕམ་ཁཱའེ་（Kay）ལགས་ཀྱིས་འདི་ལྟར་ཕྱིར་དྲན་བྱས།^p596
ཆོས་རྗེ་ཉིད་ཀྱིས་ཐམས་ཅད་སྐྱོབ་པའི་ལྷ་ཁང་དུ་ཆོས་ཀྱི་མཛད་སྒོ་སྤེལ་སྐབས། འགྲེམ་བརྡ་གཏོང་བ་ཤིན་ཏུ་འཕྱིས་ཀྱང་མི་ཧ་ཅང་མང་པོ་འདུས་པས། འདུག་སྟེགས་༢༥༠ཡོད་པའི་ལྷ་ཁང་དེའི་བརྩེགས་རིམ་སྟེང་འོག་ཀུན་མི་ཡིས་གང་བར་མ་ཟད། འགའ་རེས་ཡར་ལངས་ཏེ་ཆོས་མཉན་དགོས་བྱུང་ལ། ཆོས་རྗེ་མཆོག་གིས་ལྷ་ཁང་དེར་འཕོ་བ་དང་ཚེ་དབང་གསུངས།^p597
འཕོ་བ་གསུང་སྐབས། ཁོང་གིས་ཕཊ་སྒྲ་དྲག་པོ་བསྒྲགས་པའི་སྟོབས་ཤུགས་ནི་ཤིན་ཏུ་ཆེ་ཞིང་མི་ཚེ་འདིར་བརྗེད་ཐབས་མེད་པ་ཞིག་ཏུ་གྱུར། ཕྱིས་ཀྱི་ལོ་ཉི་ཤུ་ལྷག་གི་རིང་ལ། མི་རྣམས་ཀྱིས་རྟག་ཏུ་ང་ལ། ཕྱི་ལོ་༡༩༩༣ལོར། ཐམས་ཅད་སྐྱོབ་པའི་ལྷ་ཁང་དུ་ང་ཚོར་ཆོས་ཁྲིད་གནང་མཁན་གྱི་བླ་མ་དེ་དྲན་གྱིན་འདུག་གམ། ཁོང་གིས་སྐབས་དེར་གསུངས་པའི་ཕཊ་སྒྲ་དེ་ནམ་ཡང་བརྗེད་ཐབས་མི་འདུག་ཅེས་གླེང་མཁན་མང་དུ་བྱུང་བར་བཤད།^p598
ད་དུང་སི་པཱན་（Span）ཞེས་པའི་ཧཱ་ཝ་ཡེའི་མི་ཞིག་ཡོད་ཅིང་། ཁོ་བོས་ཆོས་རྗེ་ཉིད་ཀྱི་བཞུགས་འཁོར་ལ་ཁ་ལོ་པ་བྱས་ནས་བཀྲ་ཤིས་ཆོས་གླིང་ནས་སན་ཧྥི་རན་སའེ་སི་ཁོ་ལ་འགྲོ་མྱོང་ཞིང་། ཆོས་རྗེ་ཁོང་གིས་འཕོ་བ་དང་ཚེ་དབང་གསུང་སྐབས། ང་རང་ཁྲི་རྩ་རུ་བཅར་ཏེ་ཆོས་ཉན་པ་ཡིན། སྐབས་དེར་ཁོང་གིས་གློ་བུར་དུ་ཕཊ་སྒྲ་དྲག་པོ་མཛད་པས། ངའི་རྣམ་རྟོག་ཐམས་ཅད་ཞི་ཞིང་ཆོས་ཀྱི་དབྱིངས་སུ་འདྲེས་པར་གྱུར་ནས་དུས་ཚོད་ག་ཙམ་འགོར་བའང་མ་ཤེས། གང་ལྟར་དེ་དུས་ཀྱི་མྱོང་ཚོར་ནི་ངའི་མི་ཚེ་འདིའི་ནང་བརྗེད་ཐབས་ཡོད་རེ་སྐན་ཟེར།^p600
ཡེ་ཤེས་སྙིང་པོའི་ཆོས་ཚོགས་སུ་ཆོས་གསུང་པ།^p601
ཕྱི་ཟླ་༧པའི་ཚེས་༢༢ཉིན་གྱི་སྔ་མོར། ངེད་ཅག་བཀྲ་ཤིས་ཆོས་གླིང་དང་ཁ་གྱེས་ནས་རླངས་འཁོར་དུ་བསྡད་དེ་ཆུ་ཚོད་དྲུག་ལྷག་ལ་སོང་བ་ན། སན་ཧྥི་རན་སའེ་སི་ཁོའི་ཡེ་ཤེས་སྙིང་པོའི་ཆོས་ཚོགས་(Yeshe Nyingpo Orgyen Dorje Den)སུ་འབྱོར། འདི་ནི་རྒྱ་སྤྲུལ་རིན་པོ་ཆེས་གྲོང་ཁྱེར་དེར་བཏབ་པའི་ནང་པའི་ཆོས་ཚོགས་ཤིག་ཡིན། ཆོས་ཚོགས་ཀྱི་མིང་ནི་སྔོན་སྐྱབས་རྗེ་བདུད་འཇོམས་རིན་པོ་ཆེས་གནང་ཞིང་། ཁོང་གིས་ཆོས་ཚོགས་མང་པོ་ལ་ཡེ་ཤེས་སྙིང་པོ་ཞེས་པའི་མིང་འདོགས་སྲོལ་འདུག^p602
ཆོས་ཚོགས་འདི་གཞི་རྒྱ་ཆེན་པོ་མིན་ཡང་། ཤར་ཕྱོགས་དང་ནུབ་ཕྱོགས་ཀྱི་དད་ལྡན་ཤིན་ཏུ་མང་པོ་འདུས་པས། ཆོས་རྗེ་ཉིད་ཀྱིས་དེ་རྣམས་ལ་སྐྱབས་སྡོམ་དང་འཇམ་དཔལ་ཡེ་ཤེས་སེམས་དཔའི་དབང་གནང་།^p604
ཚེས་༢༣ཉིན། ཆོས་རྗེ་ཉིད་སན་ཧྥི་རན་སའེ་སི་ཁོའི་གནམ་ཐང་དུ་འབྱོན་ཁར། ཨ་རིའི་སློབ་མ་རྣམས་ཀྱིས་རྗེ་ཉིད་ལ་ཚད་མཐོ་བའི་བརྩི་བཀུར་དང་ནང་སེམས་ཀྱི་བཀའ་དྲིན་མཚོན་པའི་རྟགས་སུ། འཛམ་གླིང་ན་རིན་ཐང་ཆེ་བའི་རཱོལ་སི་རཱོའེ་སེའམ་ར་གཉིས་རྟགས་ཅན་གྱི་རླངས་འཁོར་（Rolls Royce）གྲ་སྒྲིག་གིས་སྐྱེལ་མ་བྱས། རླངས་འཁོར་དེ་ནི་བརྙན་འཕྲིན་དང་ཁ་པར། བཟའ་བཏུང་སོགས་རྒྱས་སྤྲོས་ཉེར་མཁོ་མང་དུ་འཛོམས་པ་ཞིག་རེད།^p605
མཚམས་འདི་ནས་ནཱ་ཕཱ་ལུང་དང་འབྲེལ་བའི་ཆོས་ཀྱི་མཛད་རིམ་རྣམས་ལེགས་པར་གྲུབ་ཅིང་། གནམ་གྲུར་ཞུགས་ནས་ཨ་རིའི་རྒྱལ་ས་ཝ་ཧྲིང་ཐོན་གྱི་གྲོང་ཁྱེར་དུ་བསྐྱོད།^p607
དྲན་ངོགས་ཀྱི་ནུབ་བསྐྱོད་ལས་ཡུལ་ནཱ་ཕཱ་ལུང་དང་ཨོ་རཱེ་གྷོན་གྱི་མཛད་རིམ་ལེགས་པར་གྲུབ་པའི་སྐབས་ཏེ་བཞི་པའོ། །^p609
