བདུན་པ། ཤེས་རིག་གཞན་བསླབ་པའི་སྐོར།^p1
七 余力学文^p2
不力行 但学文 长浮华 成何人^p4
ལག་བསྟར་མི་བྱེད་པའི། །^p5
རིག་པ་སློབ་པ་ཙམ། །^p6
གསོབ་པའི་རང་བཞིན་ལས། །^p7
བཟང་པོར་འགྱུར་མི་སྲིད། །^p8
དོན་དངོས་གནས་ཀྱི་ལས་ཆོད་ཡོད་པའི་བྱ་བ་ལག་བསྟར་ཅི་ཡང་མི་བྱེད་པར་རང་ཁར་རིག་གནས་མང་པོ་སློབ་ཁུལ་དང་ཡི་གེ་མང་པོར་བལྟ་བ་ཙམ་གྱིས་ནི་སྙིང་པོ་མེད་པའི་གསོག་གསོབ་ཀྱི་རང་བཞིན་ལས་གཞན་ལ་ཕན་ཐོགས་ཡོད་པའི་མི་བཟང་པོར་འགྱུར་མི་སྲིད་དོ། །^p9
但力行 不学文 任己见 昧理真^p11
ལག་ལེན་ཁོ་ན་ལས། །^p12
རིག་པ་མི་སློབ་ན། །^p13
རང་ལྟ་མཁྲེགས་བཟུང་དེས། །^p14
གནས་ལུགས་མཐོང་མི་སྲིད། །^p15
བྱ་བ་རྣམས་ལ་ལག་ལེན་ཁོ་ན་རྩལ་འདོན་བྱེད་པ་ལས་རིག་པ་ཅི་ཡང་མི་སློབ་ན་མཐར་རང་ལྟ་མཁྲེགས་བཟུང་གིས་རང་ཉིད་བསྒྲིབ་ནས་བྱ་བ་དེས་གནས་ལུགས་ཡང་དག་ནམ་ཡང་མཐོང་མི་སྲིད་དེ། མཁས་པ་ཁུང་ཙིས་ཀྱང༌། སློབ་ལ་མི་སེམས་པ་ནི་རྣམ་པར་འཁྲུལ། །སེམས་ལ་མི་སློབ་པ་ནི་ཉེན་ཁ་ཆེ། །ཞེས་པ་ལྟར་རོ། །^p16
读书法 有三到 心眼口 信皆要^p18
ཡི་གེ་སློབ་པའི་སྐབས། །^p19
གནད་གསུམ་ཚང་དགོས་ཏེ། །^p20
སེམས་གཏད་མིག་གིས་བལྟ། །^p21
ཁ་ནས་འདོན་པར་བྱ། །^p22
ཡི་གེ་སློབ་པའི་སྐབས་སུ་མེད་ཐབས་མེད་པའི་གནད་གསུམ་ངེས་པར་ཚང་དགོས་ཏེ། དེ་ཡང་སེམས་གཞན་དུ་མི་གཡེང་བར་ཡི་གེ་ལ་སེམས་རྩེ་གཅིག་ཏུ་གཏད་པ་དང་ཁ་གཡེང་མིག་གཡེང་མི་བྱེད་པར་མིག་གིས་དཔེ་ཆ་ལ་བལྟ་ཞིང་ཁ་ནས་ཀྱང་སྒྲ་ཚིག་དག་མོས་གདོན་པར་བྱའོ། །དེས་ན་དགེ་རྒན་རྣམས་ཀྱིས་སློབ་མ་སྐྱོང་སྐབས་ཡང་འདི་ལྟ་བུས་སློབ་གསོ་བྱས་ཏེ་ཆུང་ངུའི་དུས་ནས་ཤེས་ཡོན་སྦྱང་སྟངས་ཀྱི་གོམས་གཤིས་ལེགས་པོར་ཆགས་པ་དེ་མེད་དུ་མི་རུང་ངོ༌། །^p23
方读此 勿慕彼 此未终 彼勿起^p25
དཔེ་གང་ཀློག་པའི་ཚེ། །^p26
དཔེ་གཞན་བཀླག་མི་བྱ། །^p27
འདི་ཉིད་མ་རྫོགས་པར། །^p28
དེ་ཉིད་འགྲུབ་མི་འགྱུར། །^p29
ལུགས་གཉིས་ཀྱི་བྱ་བ་གང་བསྒྲུབས་ཀྱང་མགོ་མཇུག་ཚང་ཞིང་གོ་རིམ་ལྡན་པ་འདི་གལ་ཆེ་བས། དཔེ་དེབ་གང་ཞིག་ཀློག་པའི་ཚེ་དེ་ཉིད་མཐར་མ་ཕྱིན་པར་དེབ་གཞན་དག་བཀླག་པར་མི་བྱ། དེའི་རྒྱུ་མཚན་ཡང་བྱ་བ་འདི་ཉིད་མ་རྫོགས་པར་བྱ་བ་དེ་ཉིད་དམ་གཞན་ཉིད་འགྲུབ་པར་མི་འགྱུར་བས་སོ། །^p30
宽为限 紧用功 工夫到 滞塞通^p32
སློབ་ཡུན་རིང་བ་དང༌། །^p33
སློབ་དུས་དམ་འཛིན་བྱ། །^p34
བརྩོན་འགྲུས་རྒྱུན་བསྐྱངས་ན། །^p35
དཀའ་གནད་མ་ལུས་རྟོགས། །^p36
ཤེས་རིག་གི་གྲུབ་འབྲས་གཡུར་དུ་ཟ་བ་ནི་དུས་ཚོད་ཐུང་ངུའི་ཡུན་ལ་མངོན་མི་ཐུབ་པས་སློབ་ཡུན་ཅི་ནུས་སུ་རིང་བོར་བྱ་བ་དང༌། སློབ་སྦྱོང་གི་དུས་ཚོད་ཆུད་ཟོས་སུ་མི་གཏོང་བར་རང་གི་ཚེ་སྲོག་ལ་གཅེས་སྤྲས་བྱས་པ་བཞིན་དམ་འཛིན་ལེགས་པོ་བྱ་དགོས། དེ་ལྟའི་བརྩོན་འགྲུས་ཀྱི་རྒྱུན་ཡུན་དུ་བསྐྱངས་ན་ཤིན་ཏུ་དཀའ་བའི་གནད་རྣམས་ཀྱང་དཀའ་ཚེགས་མེད་པར་རྟོགས་པར་འགྱུར་ཏེ། བརྩོན་འགྲུས་ལྡན་པའི་སྐྱེ་བོ་ལ། །མི་འགྲུབ་བྱ་བ་གང་ཡང་མེད། །ཅེས་གསུངས་པ་ལྟར་རོ། །^p37
心有疑 随札记 就人问 求确义^p39
སེམས་ཀྱི་དོགས་པ་རྣམས། །^p40
དུས་སུ་ཟིན་ཐོར་བཀོད། །^p41
གཞན་ལ་དྲིས་ནས་སུ། །^p42
དེའི་དོན་རྟོགས་པར་བྱ། །^p43
དཔེ་ཀློག་བྱེད་དུས་སམ་འཚོ་བའི་ཁྲོད་དུ་བྱུང་བའི་དགྲོལ་བར་དཀའ་བའི་སེམས་ཀྱི་དོགས་པ་རྣམས་དུས་སུ་ཟིན་ཐོར་བཀོད་དེ་ཉར་ཚགས་བྱ། ནམ་ཞིག་མཁས་པ་དང་ཉམས་མྱོང་ཅན་ལ་འཕྲད་པའི་གོ་སྐབས་བྱུང་དུས་དེ་ལ་དྲིས་ཏེ་སྒྲོ་འདོག་བཅད་ནས་དེ་དག་གི་དོན་ཐམས་ཅད་རྟོགས་པར་བྱའོ། །རྒྱ་ནག་པ་སོགས་མི་རིགས་གཞན་གྱི་འཚོ་བའི་ནང་དུ་དར་བའི་སྲོལ་ལྟར་རང་གི་བྱ་བ་རྣམས་ཉིན་ཐོའམ་ཟིན་ཐོར་བཀོད་པ་འདི་མི་ཚེ་བགྲོད་ལམ་རིང་མོ་ལ་ཕྱིར་བལྟས་བྱས་ཚེ་ཆེས་མཁོ་གལ་ཆེ་ལ་རིན་ཐང་ཅན་ཞིག་ཀྱང་ཡིན་པར་སེམས་སོ། །^p44
房室清 墙壁净 几案洁 笔砚正^p46
ཁང་ཁྱིམ་རྩིག་པ་དག །^p47
ཕྱི་ནང་གཙང་སྦྲ་བྱ། །^p48
མདུན་ཅོག་སྣག་སྨྱུག་སོགས། །^p49
ཡིད་འོང་གྲ་འགྲིག་གཞག །^p50
རང་གིས་ཉལ་ཤག་ཐབ་ཚང་ཡིག་ཁང་སོགས་ཁང་ཁྱིམ་རྣམས་དང་སྒོ་ཁྱིམ་རྩིག་པ་ར་བ་སློབ་ཁང་དང་གཞུང་ལས་ཁང་སོགས་ཕྱི་ནང་གི་ཁོར་ཡུག་ཐམས་ཅད་དུས་རྒྱུན་དུ་གཙང་སྦྲ་ལེགས་པོ་བྱ་དགོས། དེ་བཞིན་སློབ་ཁང་དང་གཞུང་ལས་ཁང་སོགས་ཀྱི་འདུག་སྟེགས་མདུན་ཅོག་སྣག་ཚ་སྨྱུ་གུ་སོགས་ཀྱང་ཡིད་དུ་འོང་ལ་གྲ་འགྲིག་པོར་བཞག ཁོར་ཡུག་ཡིད་འོང་མཛེས་སྡུག་ལྡན་པས་ནི་སྣང་བ་སྤྲོ་ཞིང་རིག་པ་དྭངས་ལ་གཞན་གྱི་ཡིད་དབང་འཕྲོག་པ་སོགས་ཡོན་ཏན་དུ་མ་ལྡན་པར་གནའ་དེང་གི་མཁས་པ་རྣམས་ཀྱིས་བསྔགས་བརྗོད་ཀྱི་མེ་ཏོག་ཡང་ཡང་འཐོར་བ་ཡིན། དེས་ན་རང་གི་སྡོད་ཁང་དག་ཀྱང་ཁྱི་ཕག་གི་ཚང་ལྟ་བུ་མ་ཡིན་པར་ཕྱག་བདར་བྱས་ཏེ་གཙང་ཞིང་ཡིད་དུ་འོང་བར་བྱ་བ་གཅེས་སོ། །^p51
墨磨偏 心不端 字不敬 心先病^p53
བརྡར་སྣག་ཡོ་གྱུར་ན། །^p54
བློ་སེམས་གཡེང་བ་ཡིན། །^p55
ཡིག་གཟུགས་མི་འགྲིག་ན། །^p56
སེམས་ཉིད་རྙོག་པའི་རྟགས། །^p57
སྔོན་གྱི་སྲོལ་བཞིན་སྣག་རྡོ་བདར་ནས་སྣག་ཚ་བཟོ་སྐབས་ཡ་ཡོས་སུ་གྱུར་ན་དེའི་བློ་སེམས་རྣམ་པར་གཡེང་བ་ཡིན་པ་དང་། ཡི་གེ་འབྲི་སྐབས་ཡིག་གཟུགས་རབ་རིབ་མི་གསལ་བ་གྲ་མི་འགྲིག་ན་འབྲི་བ་པོའི་སེམས་ལ་རྣམ་རྟོག་མང་པོའི་དྲི་མས་རྙོག་པའི་རྟགས་ཡིན་པས། ལུས་ངག་གི་བྱ་བ་ལས་ཀྱང་ནང་སེམས་ཀྱི་རྣམ་པ་མཚོན་ཐུབ་བོ། །^p58
列典籍 有定处 读看毕 还原处^p60
དཔེ་དེབ་གོ་རིམ་བཞིན། །^p61
གཞག་ས་གཏན་ཁེལ་བྱ། །^p62
དེབ་གང་བཀླགས་ཚར་རྗེས། །^p63
སླར་ཡང་རང་སར་གཞག །^p64
དཔེ་དེབ་མང་ན་དེ་དག་རིགས་དབྱེ་སྟེ་གོ་རིམ་བཞིན་ཡིག་སྟེགས་སམ་ཅོག་ཙེའི་སྟེང་དུ་གཞག གལ་ཏེ་ཡི་གེ་མང་པོ་མེད་ན་ཡང་དེ་དག་ཡར་འཕེན་མར་འཕེན་མི་བྱེད་པར་གཞག་ས་གཏན་ཁེལ་བྱས་ཏེ་གྲ་འགྲིག་པོ་སྒྲོས་གཙང་བར་བྱ། དཔེ་དེབ་གང་རུང་བཀླགས་ཚར་རྗེས་སླར་ཡང་སྔོན་གང་ནས་བླངས་བའི་རང་ཤུལ་དུ་གཞག་དགོས། འདི་ཡང་ཤེས་ཡོན་པ་རྣམས་ལ་ད་ལྟའི་བར་དར་བའི་ཆེས་ལེགས་པའི་སྲོལ་རྒྱུན་ཞིག་གོ །^p65
虽有急 卷束齐 有缺坏 就补之^p67
བྲེལ་བའི་དོན་བྱུང་ཡང༌། །^p68
དཔེ་དེབ་ཚགས་འགྲིག་བྱ། །^p69
དེབ་ལ་སྙད་བྱུང་ན། །^p70
མྱུར་དུ་གསོ་བར་བྱ། །^p71
རྟག་ཏུ་ཡི་གེ་ལ་གཅེས་སྤྲས་བྱ་བ་ནི་མཁས་པའི་ཚུལ་ཡིན་པས། གང་ཞིག་དཔེ་ཀློག་བྱེད་སྐབས་གལ་ཏེ་བྲེལ་འཚུབ་ཆེ་བའི་དོན་དག་བྱུང་ཡང་ཐོག་མར་དཔེ་དེབ་རྣམས་ཉར་ཚགས་དང་བསྡུ་གསོག་གྲ་འགྲིག་བྱས་ཏེ་གཟོད་བྱ་བ་དེར་འཇུག་པར་བྱ། གཞན་ཡང་དཔེ་དེབ་དག་ལ་ལྡེབ་ཆད་དང་ནག་ནོག་སོགས་སྙད་ཀ་བྱུང་ན་ཅི་མི་སྙམ་དུ་མི་གཞག་པར་མྱུར་དུ་བསྐྱར་གསོ་བྱ་དགོས་སོ། །^p72
非圣书 屏勿视 敝聪明 坏心志^p74
འཕགས་པའི་གཞུང་མིན་པར། །^p75
ལྟ་ཀློག་བྱེད་མི་རུང༌། །^p76
བྱས་ན་ཤེས་རབ་བསྒྲིབ། །^p77
ཕུགས་འདུན་བརླག་པར་འགྱུར། །^p78
སྔོན་བྱོན་འཕགས་པའི་སྐྱེ་བོས་གསུངས་པའི་གཞུང་བཟང་མིན་པར་རང་ཁར་མི་རྣམས་ཀྱིས་རང་གི་རྣམ་རྟོག་རི་མོར་སྤེལ་བའི་ཡི་གེ་དག་ནི་ལྟ་སྣང་ལ་ཚིག་དོན་སྙན་སྙན་ལེགས་ལེགས་ལྟར་ཡོད་ཀྱང་དོན་དུ་རང་གཞན་ལ་ཕན་པའི་རིན་ཐང་ཅི་ཡང་མེད་པས་དེ་དག་ལ་རང་གིས་བལྟ་བ་དང་གཞན་ལ་བལྟ་བསྐུལ་ཀློག་འདོན་འཛིན་འཆད་སོགས་བྱ་མི་རུང་སྟེ། གལ་ཏེ་བྱས་ན་བླང་དོར་གྱི་ཤེས་རབ་བསྒྲིབ་པར་འགྱུར་ཞིང་མ་འོངས་བའི་ཕུགས་འདུན་རྣམས་ཀྱང་ངེས་པར་དུ་བརླག་པར་འགྱུར་རོ། །འདིའི་འཕགས་པ་ཞེས་པའི་དོན་སྔོན་གྱི་ཁུང་ཙི་ལྟ་བུའི་མཁས་པ་རྣམས་མཚོན་པ་ཡིན་ཡང་སྤྱིར་ནང་པའི་གཞུང་ལས་བདེན་ཚིག་གྲུབ་པའི་འཕགས་པའི་གསུང་མིན་པར་བྱིན་རླབས་ནུས་པ་དེ་ཙམ་མེད་ཅེས་པའི་དོན་དང་ཆ་འདྲ་ཞིང་འདིས་མཚོན་ནས་རང་གི་ལུས་སེམས་བདེ་ཐང་ལ་གནོད་པའི་གློག་བརྙན་དང་བརྙན་འཕྲིན་གློག་རྡུལ་རོལ་རྩེད་ལ་སོགས་རྒྱུན་དུ་བལྟ་བ་སྤང་དགོས་སོ། །^p79
勿自暴 勿自弃 圣与贤 可驯致^p81
རང་ཉིད་དམའ་འབེབས་དང༌། །^p82
གཉོམ་ཆུང་བྱེད་མི་རུང༌། །^p83
རིམ་གྱིས་བརྩོན་བྱས་ན། །^p84
མཁས་པའི་གོ་སར་སླེབས། །^p85
འཇིག་རྟེན་འདིར་རང་ལ་ཡིད་ཆེས་དང་བརྩོན་འགྲུས་སྙིང་སྟོབས་མེད་ན་བྱ་བ་ཆུང་ངུ་ཡང་འགྲུབ་པར་དཀའ་བས། རང་ཉིད་ལ་རང་གིས་དམའ་འབེབ་དང་ང་ལྟ་བུས་བྱ་བ་བསྒྲུབ་མི་ནུས་སྙམ་དུ་མཐོང་ཆུང་གཉོམ་ཆུང་བྱེད་མི་རུང༌། ཇི་སྐད་དུ། རང་ལ་དགོས་པའི་བསྟན་བཅོས་རྣམས། །ཉི་མ་རེ་ལ་ཚིག་རེ་ཟུང་། །ཞེས་པ་ལྟ་བུའི་རིམ་གྱིས་སློབ་སྦྱོང་དང་འབད་བརྩོན་ཆེན་པོར་བྱས་ན་རིང་པོར་མི་ཐོགས་པར་འགྲན་ཟླ་བྲལ་བའི་མཁས་པ་དང་གྲུབ་པའི་གོ་སར་སླེབས་པར་འགྱུར་རོ། །དེ་ལྟའི་སློབ་མའི་བསླབ་བྱ་ཞེས་པ་འདི་གཞན་ལ་ཅུང་ཟད་ཕན་དུ་རེ་ནས་གསེར་ཐང་ལྔ་རིག་ནང་བསྟན་སློབ་གླིང་དུ་བསོད་དར་རྒྱས་ཀྱིས་བོད་སྐད་དུ་བསྒྱུར་ཞིང་ཚིག་འགྲེལ་བསྡུས་པ་ཞིག་ཀྱང་བྱས་པ་དགེ་བར་གྱུར་ཅིག །^p86
སྤྱི་ལོ་ ༢༠༠༩ ཟླ་ ༦ ཚེས་ ༥ ལའོ།། །།^p87