༄༅། །བླ་མ་མཁྱེན་ཞེས་པའི་སྙན་ཚིག་ཐོར་བུ་གཟུགས་རྒྱན་ལས་དྲངས་བ་བཞུགས་སོ། །^p1
མཚན་དཔེའི་དཔལ་འབར་བཅུ་དྲུག་ལང་ཚོ་ཡིས་སྙེམ་པའི། །^p2
ཚངས་སྲས་ཟླ་གཞོན་བཞད་པའི་མཛེས་སྡུག་གི་འོད་དཀར། །^p3
བདག་ཡིད་ཀུན་ད་དཀར་པོའི་དགའ་ཚལ་ལ་རྩེན་དང་། །^p4
མ་བཅོས་མགྲིན་པའི་རོལ་མོ་དལ་གྱིས་ནི་དཀྲོལ་འདོད། །^p5
བརྩེ་ཆེན་སྤྲིན་འཕྲེང་བྱེ་བའི་གུར་ཁང་གི་དབུས་ན། །^p6
གསུང་སྙན་གཡུ་འབྲུག་གཞོན་ནུའི་གླུ་དབྱངས་ཀྱི་འགྱུར་ཁུག །^p7
ལས་ལྡན་རྨ་བྱའི་ཚོགས་ལ་དགའ་བ་འབུམ་སྦྱིན་པའི། །^p8
རྫོགས་ལྡན་དཔྱིད་དཔལ་བསུ་བའི་བླ་མ་དེ་མཁྱེན་ནོ། །^p9
ཐུབ་བསྟན་འོ་མཚོ་དྭངས་མས་ལུས་སྟོབས་ཆེར་རྒྱས་པའི། །^p10
ཐུགས་བསྐྱེད་གཤོག་ཟུང་དཀར་པོས་སྲིད་མཁའ་ན་རྩེན་བཞིན། །^p11
འགྲོ་བསོད་ནགས་མའི་ཚལ་ཀུན་དབྱངས་སྙན་གྱིས་ཁྱབ་མཛད། །^p12
འཇམ་དཔལ་དགྱེས་པའི་འཛུམ་མདངས་བླ་མ་དེ་མཁྱེན་ནོ། །^p13
གང་གི་ཞབས་སེན་དྲི་མེད་གསེར་རྡུལ་གྱི་ཐིག་ལེ། །^p14
འཆི་མེད་དབང་པོ་འབུམ་གྱི་ཅོད་པན་དུ་འཆིང་བཞིན། །^p15
བསྔགས་བརྗོད་པད་དཀར་ཕྲེང་མཛེས་ཕྱོགས་ཀུན་ན་འཐོར་བའི། །^p16
བསྙིལ་མཛད་ལྷ་བརྒྱའི་གཙུག་ནོར་བླ་མ་དེ་མཁྱེན་ནོ། །^p17
གང་སྐུ༵་ཡིད་འཕྲོག་མདངས་ལྡན་པད་དཀར་གྱི་འཁྲི་ཤིང་། །^p18
ཁྲིམས་ཀྱི་དྲི་བསུང་མངར་བོས་གསེར་ལྗོངས་ཀུན་འཁྱུད་དེ། །^p19
བློ་གསལ་རྐང་དྲུག་ཚོགས་རྣམས་དབང་མེད་དུ་འགུགས་པ། །^p20
ངེས་ལེགས་དཔལ་ཡོན་བཞད་པའི་བླ་མ་དེ་མཁྱེན་ནོ། །^p21
གང་གསུ༵ང་ཡིད་འཕྲོག་སྙན་ཚིག་རྒྱུད་མངས་ཀྱི་གདངས་སྙན། །^p22
འཛུམ་སྒེག་དྲི་ཟའི་བུ་མོའི་གླུ་དབྱངས་ཀྱི་དཔལ་འཕྲོག །^p23
ཡིད་ལ་དམ་ཆོས་བདུད་རྩིའི་དགའ་སྟོན་རང་འགྱེད་པའི། །^p24
མཚོ་བྱུང་དགྱེས་པའི་འཛུམ་མདངས་བླ་མ་དེ་མཁྱེན་ནོ། །^p25
གང་ཐུ༵གས་ཟབ་ཡངས་ན་ཀྲའི་གྲོང་ཁྱེར་གྱི་ཀློང་ན། །^p26
ཟབ་རྒྱས་ལེགས་བཤད་ནོར་བུའི་གཏེར་བརྒྱ་དེ་འཛུམ་པའི། །^p27
གདུང་བ་ཀུན་འཕྲོག་འདོད་དགུ་ཡིད་བཞིན་གྱི་ནོར་བུ། །^p28
གདངས་ཅན་བྱེ་བའི་གཙུག་ནོར་བླ་མ་དེ་མཁྱེན་ནོ། །^p29
མཚམས་སྤྲིན་གུར་གུམ་ཆབ་ཀྱིས་ལན་བརྒྱ་རུ་བྲན་ཅིང་། །^p30
མཛེས་སྡུག་ཉི་མ་འབུམ་གྱི་གཟི་བྱིན་གྱི་ལང་ཚོ། །^p31
ཤེས་རབ་འཁྲི་ཤིང་གཡོ་བ་འཇམ་དཔལ་ནི་དཔའ་བོ། །^p32
རྣམ་པ་མི་ཡི་གར་འཛིན་བླ་མ་དེ་མཁྱེན་ནོ། །^p33
ཟབ་མོ་ལྟ་བའི་སྒོ་འབྱེད་བློ་གྲོས་ཀྱི་ཉི་གཞོན། །^p34
རྒྱ་ཆེན་སྤྱོད་པའི་མཆོག་སྦྱིན་གཞན་ཕན་གྱི་ཟླ་དཀར། །^p35
དབྱེར་མེད་མཁྱེན་གཏེར་རྒྱ་མཚོ་གང་འདོད་ཀྱི་འབྱུང་གནས། །^p36
མཐའ་དག་རྣམ་དཔྱོད་གཅིག་བསྡུས་བླ་མ་དེ་མཁྱེན་ནོ། །^p37
ཐར་འདོད་ཡིད་སྣང་འགུགས་པ་རྒྱུད་སྟོང་གི་སྒྲ་དབྱངས། །^p38
ལེགས་བཤད་གཏེར་གྱི་རོལ་མོ་གདངས་སྙན་གྱི་མྱོས་གླུ། །^p39
སྐྱེ་འགྲོའི་སྒྲ་འཛིན་བདུད་རྩིའི་གསོས་སྨན་དུ་སིམ་པ། །^p40
གསུང་སྙན་ཚངས་སྲས་དགྱེས་བཞད་བླ་མ་དེ་མཁྱེན་ནོ། །^p41
མཁྱེན་བརྩེ་སྤྲིན་རུམ་ཀུན་འཁྲིགས་གདེངས་ཀ་ཡི་ཀློང་ན། །^p42
ལུང་རིགས་སྒྲ་བརྒྱ་གནམ་ལྕགས་ཐོག་ཞགས་ཀྱི་ཚ་ཟེར། །^p43
ཉེས་བཤད་དུག་ཆུས་རབ་མྱོས་བྲག་རི་ཀུན་བསྙིལ་བའི། །^p44
ཕྱོགས་གླང་གྲགས་པའི་ཟློས་གར་བླ་མ་དེ་མཁྱེན་ནོ། །^p45
ཁྱེད་ཀྱི་མཛད་ཕྲིན་ལི་ཁྲིའི་ཐིག་ལེ་ཡི་འཛུམ་དཀར། །^p46
བསིལ་ལྡན་ལྷ་ཡི་ཚལ་ན་ལམ་ལམ་དུ་ངོམ་ཚེ། །^p47
རྒྱལ་བསྟན་པདྨ་དཀར་པོའི་ཚེམས་ཕྲེང་གི་མཛེས་སྡུག །^p48
བཀྲོལ་མཛད་བསྟན་པའི་ཉིན་བྱེད་བླ་མ་དེ་མཁྱེན་ནོ། །^p49
གང་ཐུགས་ཟག་མེད་དྲི་བྲལ་མ་དྲོས་ཀྱི་ཀློང་ཡངས། །^p50
རྣམ་དཔྱོད་རླབས་ཀྱི་ཕྲེང་དཀར་རྩེད་འཇོ་ཡི་འབབ་སྟེགས། །^p51
མཁྱེན་གཏེར་ནོར་བུའི་དོ་ཤལ་འབུམ་ཕྲག་གིས་བརྒྱན་པ། །^p52
རྣམ་དཀར་བྱེ་བའི་འབྱུང་གནས་བླ་མ་དེ་མཁྱེན་ནོ། །^p53
གངས་རི་རང་བྱུང་ཤེལ་དཀར་འདབ་ཕྲེང་གི་གླིང་ན། །^p54
ཆོས་སྲིད་སྣང་བ་དཀར་པོའི་འོད་ཞགས་ཀྱིས་འཁྱུད་བཞིན། །^p55
གྲགས་དཀར་ཁ་བའི་མེ་ཏོག་མཁའ་དབྱིངས་ནས་འབབ་པའི། །^p56
ནོར་འཛིན་དཔལ་མོའི་སྲོག་འཛིན་བླ་མ་དེ་མཁྱེན་ནོ། །^p57
མདོ་སྔགས་འདབ་སྟོང་འཛུམ་པའི་འཁྲི་ཤིང་གི་གཡུ་ལྗོན། །^p58
སྦྲང་རྩིའི་ཐིག་ལེ་གཡོ་བའི་བཅུད་ལྡན་གྱི་རོ་ལ། །^p59
བློ་གསལ་སྦྲང་མ་ར་ཡི་སྤྲིན་ཚོགས་ཀྱིས་རོལ་བཞིན། །^p60
ཡིད་འཕྲོག་དབྱངས་སྙན་འགུགས་མཛད་བླ་མ་དེ་མཁྱེན་ནོ། །^p61
འཇམ་དཔལ་གཞོན་ནུ་བསམ་བཞིན་བཤེས་གཉེན་གྱི་རོལ་གར། །^p62
བརྩེ་ཆེན་དུང་ཟླ་དཀར་པོའི་ཞལ་ཁྱིམ་དེ་མཇལ་ན། །^p63
སྲིད་པའི་ལས་ཉོན་ཚ་གདུང་དུས་གཅིག་ལ་གཞིལ་ནས། །^p64
ཐར་ལམ་སྣང་བ་སྦྱིན་མཛད་བླ་མ་དེ་མཁྱེན་ནོ། །^p65
ཚོགས་གཉིས་འོ་མཚོ་དྭངས་མའི་རླབས་ཕྲེང་ལས་འཁྲུངས་པའི། །^p66
ཡེ་ཤེས་ཟླ་དཀར་གཞོན་ནུ་མཛེས་སྡུག་གི་དཀྱིལ་འཁོར། །^p67
ཕན་བདེ་ག་བུར་ཟེགས་མའི་ཐིགས་ཕྲེང་གི་དགའ་སྟོན། །^p68
འགྱེད་མཛད་ལྷ་བརྒྱའི་ཅོད་པན་བླ་མ་དེ་མཁྱེན་ནོ། །^p69
རབ་དམར་རྡུལ་གྱི་གྲངས་སྙེད་འགྲོ་བ་ཡི་ཚོགས་ཀུན། །^p70
ཆུ་ལྷའི་ཕྱོགས་ཀྱི་བདེ་ཆེན་ཉམས་དགའ་ཡི་གྲོང་ལ། །^p71
བདེ་བླག་འགོད་ཅེས་བཀའ་ལུང་དུང་དཀར་གྱི་རང་སྒྲས། །^p72
གཅིག་མིན་ལན་བརྒྱར་བསྔགས་པའི་བླ་མ་དེ་མཁྱེན་ནོ། །^p73
ད་དུང་སྤྲོས་ན་བསྔགས་བརྗོད་སྣ་ཚོགས་ཤིག་བདོག་མོད། །^p74
ཉིན་བྱེད་གཞོན་ནུའི་འཛུམ་ཞལ་ལྷོ་སྤྲིན་གྱིས་ཁེབས་ཏེ། །^p75
དབྱར་སྐྱེས་བུ་མོའི་མགྲིན་གླུ་དར་དུར་དུ་སྒྲོག་ཚེ། །^p76
ཁོ་བོའི་སོར་མོའི་འདུ་བྱེད་ལྷོད་པོ་རུ་གྱུར་སོང་། །^p77
མདོར་ན་ད་ནས་སྐྱེ་བ་ཚེ་རབས་ཀྱི་ཕྲེང་བར། །^p78
མགོན་ཁྱེད་ཞིང་ཁམས་རྣམས་སུ་གང་འདུལ་དུ་སྣང་ཚེ། །^p79
ཉམ་ཆུང་བདག་ཀྱང་འདུས་པའི་གྲལ་མཐའ་རུ་འཁོད་པར། །^p80
སྙིང་ནས་སྨོན་ན་དེ་ལྟར་མཐུན་འགྱུར་རང་ཞུའོ། །^p81
མཁྱེན་ནོ་མཁྱེན་ནོ་ཁམས་གསུམ་དབང་སྡུད་དེ་མཁྱེན་ནོ། །^p82
མཁྱེན་ནོ་མཁྱེན་ནོ་རྒྱལ་ཀུན་འདུས་ཞལ་དེ་མཁྱེན་ནོ། །^p83
མཁྱེན་ནོ་མཁྱེན་ནོ་བཀའ་དྲིན་འཁོར་མེད་དེ་མཁྱེན་ནོ། །^p84
མཁྱེན་ནོ་མཁྱེན་ནོ་སྐྱེ་ཀུན་འབྲལ་མེད་དེ་མཁྱེན་ནོ། །^p85
ཞེས་པའང་བསོད་དར་རྒྱས་ནས་རང་ལོ་ཉེར་བདུན་དུ་སོན་སྐབས་སྐྱབས་རྗེ་ཡིད་བཞིན་ནོར་བུ་དང་མཉམ་དུ་རྒྱ་གར་ལ་འགྲོ་སྐབས་༡༩༩༠ལོའི་ཟླ་༦ཚེས་༣༠ལ་ཝཱ་ར་ཎ་སའི་གནས་མཆོག་ཏུ་ཤར་མར་བྲིས་པའོ། །^p86