༄༅། །བཀའ་དྲིན་མཚུངས་པ་མེད་པའི་འཇམ་མགོན་བླ་མ་ཡིད་བཞིན་ནོར་བུ་འཇིགས་མེད་ཕུན་ཚོགས་འབྱུང་གནས་ལ་མཆོད་པའི་གསོལ་འདེབས་མེ་ཏོག་ཆུན་པོ་ཞེས་བྱ་བ་བཞུགས།^p1
ན་མོ་མཉྫུ་ཤྲཱི་གྷོ་ཥ་ཡ།^p2
སྨྲ་བའི་ཉི་མ་ཐུགས་ཀྱི་པདྨོར་ཤར། །^p3
ངག་གི་ལྷ་མོ་མགྲིན་པའི་འོ་མཚོར་རོལ། །^p4
བརྒྱུད་གསུམ་བླ་མ་སྤྱི་གཙུག་གདན་ལ་བཞུགས། །^p5
སྐྱབས་ཡུལ་ཀུན་འདུས་ཡིད་བཞིན་ནོར་བུ་མཁྱེན། །^p6
ཁྱོད་ནི་དུས་གསུམ་རྒྱལ་ཀུན་རོལ་བའི་སྐུ༵། །^p7
མ་ལུས་ཡིད་འཕྲོག་ཚངས་དབྱངས་དྲུག་ཅུའི་གསུ༵ང་། །^p8
ངོ་མཚར་མཁའ་ཁྱབ་དམིགས་མེད་བརྩེ་བའི་ཐུ༵གས། །^p9
བདག་གི་སྒོ་གསུམ་སྨིན་པར་བྱིན་གྱིས་རློབས། །^p10
ལུང་རྟོགས་བསྟན་པའི་འདབ་བརྒྱ་ཟུམ་པའི་ཚེ། །^p11
འཇམ་དཔལ་དཔའ་བོའི་གསང་གསུམ་ཉི་མའི་འོད། །^p12
བསིལ་ལྗོངས་གསེར་གྱི་རི་ནས་ཤར་བ་གང་། །^p13
བསྟན་པའི་པད་ཚལ་བཞད་ལ་གསོལ་བ་འདེབས། །^p14
ཐུབ་བསྟན་དྭངས་གསལ་ཤེལ་དཀར་མེ་ལོང་ངོས། །^p15
དུས་ངན་འཆལ་ཁྲིམས་དྲི་མས་སྦགས་པའི་ཚེ། །^p16
སྡོམ་གསུམ་དྲི་མེད་དར་དཀར་བྱུག་པ་ཡི། །^p17
རྒྱལ་བསྟན་དག་ཐེར་མཛད་ལ་གསོལ་བ་འདེབས། །^p18
འཆ༵ད་པས་སྐལ་བཟང་མ་བོས་མགྲོན་ལ་འགུགས། །^p19
རྩོ༵ད་པས་ལྟ་མིན་མ་སྤྲད་རྒྱང་དུ་འཁུམས། །^p20
རྩོ༵མ་པའི་སྙན་ཚིག་མ་བཅོས་ཀློང་ནས་རྡོལ། །^p21
མཁས་པའི་ཚུལ་གསུམ་ལྡན་ལ་གསོལ་བ་འདེབས། །^p22
མཁ༵ས་པས་མཁྱེན་དཔྱོད་ཤེས་བྱ་ཀུན་ལ་ཁྱབ། །^p23
བཙུ༵ན་པས་ཉེས་ལྟུང་ཕྲ་མོའི་ཤ་ཆས་བྲལ། །^p24
བཟ༵ང་པོའི་རྣམ་ཐར་མ་ལུས་སྐྱོང་མཛད་པ། །^p25
དམ་པའི་ཚུལ་གསུམ་རྫོགས་ལ་གསོལ་བ་འདེབས། །^p26
ཐོ༵ས་པས་ལུང་རིགས་བྱེ་བའི་རྩལ་རྫོགས་ཤིང་། །^p27
བས༵མ་པ༵ས་དོན་ཀུན་ཐུགས་ཀྱི་བཅུད་དུ་འཁྱིལ། །^p28
སྒོ༵མ་པ༵ས་རིག་གདངས་ཡེ་ནས་ལྷུན་རྫོགས་པ། །^p29
གྲུབ་པའི་ཚུལ་གསུམ་འཆང་ལ་གསོལ་བ་འདེབས། །^p30
ད་ནས་བདག་སོགས་ཚེ་རབས་ཤེལ་དཀར་ཕྲེང་། །^p31
དམ་ཚིག་དར་གྱི་སྐུད་པར་ལེགས་བརྒྱུས་ཏེ། །^p32
སྣ་ཚོགས་འགྲོ་བའི་དོན་ལ་བརྩོན་པའི་ཚེ། །^p33
འབྲལ་མེད་དགྱེས་བཞིན་རྗེས་སུ་འཛིན་པར་མཛོད། །^p34
རྣ༵མ་ད༵ག་ཁྲི༵མས་ཀྱི་པད་དཀར་གཞོན་ནུ་ལ། །^p35
ཉེས་ལྟུང་དྲི་མའི་སད་ཀྱིས་མ་གོས་པར། །^p36
ར༵བ་གས༵ལ་ཤེ༵ས་ར༵བ་གེ་སར་ངོམ་པ་ཡི། །^p37
འཇམ་མགོན་ཁྱེད་དང་སྐལ་བ་མཉམ་པར་མཛོད། །^p38
བདེན་བཞིའི་ཆོས་སྟོན་དགེ་བའི་དུས་ཆེན་འདིར། །^p39
མ་ཧཱ་ཙི་ནའི་ཡུལ་གྲུ་བདེར་བཀོད་ནས། །^p40
འཇམ་དཔལ་དབྱངས་དངོས་འཇམ་དཔལ་ཁྲི་ལ་འཁོད། །^p41
ཞབས་པད་སྲིད་མཐར་བརྟན་པའི་རྟེན་འབྲེལ་སྨོན། །^p42
དེ་ལྟར་གསོལ་འདེབས་དབྱངས་ཀྱི་མཆོད་པ་འདི། །^p43
འཇམ་དཔལ་སྤྲུལ་པའི་ཞིང་ཁམས་དག་པ་རུ། །^p44
སྨྲ་བའི་དབང་ཕྱུག་བཤེས་གཉེན་སྣང་བའི་ཚེ། །^p45
སྐལ་བཟང་སློབ་བུས་དགའ་སྟོན་སྤེལ་བ་ལགས། །^p46
ཁྱེད་ཀྱི་གདམས་ཟབ་ཚིག་གཅིག་ཡོན་ལ་ཡང་། །^p47
ནམ་མཁའི་གོས་ཅན་གསེར་གྱིས་ཡོངས་གཏམས་ནས། །^p48
མཆོད་སྤྲིན་རྒྱ་མཚོས་ཕུལ་ཀྱང་གཞལ་མིན་ན། །^p49
ཆོས་སྲིད་ཟུང་གི་དྲིན་ཉིད་ཇི་ལྟར་གཟོ། །^p50
འོན་ཀྱང་མཚུངས་མེད་བརྩེ་བའི་བཀའ་དྲིན་ལ། །^p51
ཟང་ཟིང་མཆོད་པའི་ཚོགས་ཀྱིས་རྣམ་པར་དབེན། །^p52
ངལ་བས་ཞབས་ཏོག་གུས་བཀུར་མ་མཆིས་པས། །^p53
དྭངས་བའི་ཡིད་ཀྱིས་ཚིགས་ཕྲེང་མེ་ཏོག་འབུལ། །^p54
ཞེས་པའང་རྒྱ་ནག་རི་བོ་རྩེའི་ལྔའི་ཡང་དབེན་ལྷོ་རི་མདངས་བཟང་བཀྲ་བའི་ཉེ་འདབས་སུ་གཏོགས་པ་རྡོ་དྭངས་བསིལ་དགོན་པ་རུ། དེ་བཞིན་གཤེགས་པས་བཀའ་དང་པོའི་ཆོས་འཁོར་བསྐོར་བའི་དུས་ཆེན་ལ་གྲྭ་མིང་བསོད་དར་རྒྱས་ནས་གུས་པས་ཕུལ་བ་དགེའོ། །སརྦ་མངྒ་ལཾ།^p55