༄༅། །སྙིང་གཏམ་སྙིང་གི་ཐིག་ལེའི་འབྲུ་འགྲེལ་དོན་གསལ་མེ་ལོང་ཞེས་བྱ་བ་བཞུགས་སོ། །^p1

བླ་མ་དང་མགོན་པོ་འཇམ་པའི་དབྱངས་ལ་ཕྱག་འཚལ་ལོ། །^p2

དེ་ལ་འདིར་གང་ཟག་གཅིག་མངོན་པར་འཚང་རྒྱ་བའི་ལམ་ཚང་ལ་ནོར་བ་མེད་པ་སྟོན་བྱེད་ཀྱི་བསྟན་བཅོས་སྙིང་གཏམ་སྙིང་གི་ཐིག་ལེ་ཞེས་བྱ་བ་འདི་ཉིད་འཆད་པ་ལ། ཐོག་མར་དགེ་བ་བརྩམ་པའི་ཡན་ལག་ལ་འཇུག་པའི་བྱ་བ་དང་། བར་དུ་དགེ་བ་བརྩམ་བྱའི་ལུས་ཕུན་སུམ་ཚོགས་པ་དང་། ཐ་མར་དགེ་བ་བརྩམས་པའི་མཇུག་རྫོགས་པའི་བྱ་བ་བཟང་པོ་དང་གསུམ་ལས། དང་པོ་ལ་མཚན་བསྟན་པ། མཆོད་པར་བརྗོད་པ། བརྩམ་པར་དམ་བཅའ་བ་དང་གསུམ་ལས། དང་པོ་ནི། སྙིང་གཏམ་སྙིང་གི་ཐིག་ལེ་ཞེས་གསུངས་པའི་དོན་ནི། འདིར་ཐིག་ལེ་ཞེས་པའི་སྐད་དོད་ལ། ཏི་ལ་ཀ་ཞེས་པའི་སྒྲ་ལས་སྙིང་པོའམ་བཅུད་དུ་འཇུག་པས། གདུལ་བྱ་རྣམས་ལ་ཐུགས་བརྩེ་བ་ཆེན་པོས་ཡོངས་སུ་གདམས་པའི་སྙིང༵་གཏམ༵་འདི་ནི་མན་ངག་ཐམས་ཅད་ཀྱི་ནང་ནས་སྙིང་བཅུད་ལྟ་བུ་སྟེ། དཔེར་ན་རང་གི་ལུས་ཟུངས་ཐམས་ཅད་ཀྱི་ནང་ནས་ཤིན་ཏུ་གཅེས་པའི་སྙིང༵་གི༵་ཐི༵ག་ལེ༵འམ་སྙིང་གི་བཅུད་བཏོན་ནས་གཞན་ལ་ཕངས་པ་མེད་པའི་སྒོ་ནས་ཕན་པར་སྟེར་བའི་དཔེར་བསྟན་པའོ། །^p3

གཉིས་པ་ནི། རབ་འབྱམས་སྲས་བཅས་སོགས་ཏེ། ཕྱོགས་བཅུའི་ཞིང་ར༵བ་འབྱ༵མས་ན་བཞུགས་པའི་སྲ༵ས་བྱང་ཆུབ་སེམས་དཔའི་ཚོགས་དང་བཅ༵ས་པའི་རྒྱལ༵་བ༵་རྫོགས་པའི་སངས་རྒྱས་བཅོམ་ལྡན་འདས་རྣམས་ཀྱི་སྐུ་གསུང་ཐུགས་བསམ་གྱིས་མི་ཁྱབ་པའི་གས༵ང་གསུ༵མ་གྱི་ཡོན་ཏན་མ་ལུས་པ་ཀུ༵ན་གཅི༵ག་ཏུ་བསྡུ༵ས་པའི་བདག་ཉིད་དེ། གདུལ་བྱ་རྣམས་ཀྱི་སྣང་ཚུལ་གྱི་ངོར་མཚ༵ན་དང་དཔེ༵་བྱད་བཟང་པོའི་གཟུ༵གས་སུ༵་སྨི༵ན་ནས་འགྲོ་ལ་ཕན་པར་མཛད་པ༵འི་གཟུགས་ཀྱི་སྐུ༵་བགྲེས་རྒུད་བྲལ་བ་གཞོ༵ན་ནུ༵འི་ཚུལ་འཆང་སྨྲ༵་བའི༵་ཉི༵་མ༵་སྟེ། འཇམ་དཔལ་ཡེ་ཤེས་སེམས་དཔའ་ཞེས་སྲིད་ན་ཡོངས་སུ་གྲགས་པ་ག༵ང་དེ༵་ཡི༵ས་ནི། རྩོམ་པ་པོ་ཁོ་བོའི་རྗེས་སུ་འཇུག་པར་འདོད་པའི་སྐལ་ལྡན་གྱི་སློབ་བུ་ཁྱེ༵ད་རྣམས་དང་། གཞན་ཡང་དེང་དུས་སྐྱེ་བོ་ཕལ་མོ་ཆེས་ཚུལ་ཁྲིམས་དང་ཐོས་བསམ་སྒོམ་པ་སོགས་དོན་དུ་མི་གཉེར་ཞིང་། དོན་མེད་མནོག་ཆུང་གི་འཇིག་རྟེན་ཆོས་བརྒྱད་ལ་ཉིན་མཚན་ཁོར་མོར་འཕྱན་པ་རྣམས་ཀྱི་ཡང་བློ༵་ཁ་བྱ༵ང་ཆུ༵བ་ཆེན་པོའི་ལ༵མ་དུ༵་བསྒྱུ༵ར་ཅིང་མི་ལུས་རིན་པོ་ཆེ་རྒྱལ་བའི་བསྟན་པ་དང་འཕྲད་པའི་དོན་འབྲས་མཆིས་པ༵ར་མཛོ༵ད་ཅིག་ཅེས་པའོ། །^p4

གསུམ་པ་ནི། མཐའ་ཀླས་འགྲོ་བའི་སོགས་ཏེ། སྤྱིར་རྒྱལ་བ་རྫོགས་པའི་སངས་རྒྱས་ཀྱིས་ནམ་མཁའི་མཐ༵འ་ཀླ༵ས་པའི་འགྲོ༵་བ༵་མཆོག་དམན་རབ་འབྲིང་རྣམས་ཀྱི་ཁམས་དབང་མོ༵ས་པ་བསམ་གྱིས་མི་ཁྱབ་པའི་བློ༵་དང༵་འཚ༵མ་པ༵འི་སྒོ་ནས་ཤིན་ཏུ་ཟ༵བ་པ་སྔགས་ཀྱི་སྡེ་སྣོད་དང་། ཡ༵ངས་པ་མཚན་ཉིད་ཐེག་པའི་ཆོ༵ས་ཚུལ༵་དཔ༵ག་གི༵ས་མི༵་ལ༵ང་བ་ཞིག་གསུངས་ན་ཡ༵ང་། ཚེ་ཐུང་བ་སོགས་སྙིགས་མ་ལྔ་བདོའི་སྐབས་འདིར་དེ་དག་ཆ་ཚང་བ་ལྟ་ཅི། ཕལ་ཆེར་གྱིས་ཐ་ན་མདོ་སྔགས་ཀྱི་གཞུང་ཆེན་པོ་གཅིག་ལའང་བསླབ་པར་མི་ནུས་པས་ན། འདིར་མདོ་སྔགས་དགོངས་འགྲེལ་ཐམས་ཅད་ཀྱི་གན༵ད་གཅིག་ཏུ༵་དྲིལ༵་ན༵ས་ཉ༵མས་སུ༵་ལེ༵ན་པ༵འི་ཚུ༵ལ་ཚང་ལ་ནོར་བ་མེད་པ་ནི་སྙི༵ང་གཏ༵མ་སྙིང་གི་ཐིག་ལེ་འདི་ཉིད་དེ། ཁོ་བོའི་མན་ངག་ཐམས་ཅད་ཀྱི་སྙི༵ང་པོ༵འི་དྭངས་བཅུད་ལྟ་བུ་ཡིན་པས། སྐབས་འདིར་སྙིང༵་དང་འདྲ༵་བའི་གྲོ༵གས་པོ་སྟེ་སྐལ་ལྡན་གྱི་སློབ་བུ་ཁྱེད་རྣམས་ལ༵་འདོ༵མས་པར་བྱེད་ན། འདི་ནི་མདོ་སྔགས་ཀྱི་ལམ་ཆ་ཚང་བ་ཚིག་ཉུང་ལ་དོན་འདུས་པའི་སྒོ་ནས་སྟོན་བྱེད་ཀྱི་མན་ངག་ཡིན་པས་མཁས་བླུན་སུ་ཡིན་ཡང་། གོ་ལོ་ཐོས་ལོ་ཙམ་གྱིས་མི་གཞག་པར་ཀུན་གྱིས་དེ་ལྟར་རང་རྒྱུད་ལ་སྦྱར་ཏེ་ཉམས་སུ་ལེན་པར་མཛོད་ཅིག་དང་། གནས་སྐབས་མཐར་ཐུག་གི་དོན་འབྲས་ཕུན་སུམ་ཚོགས་པ་དང་ལྡན་པར་འགྱུར་རོ་ཞེས་པའོ། །^p5

གཉིས་པ་བར་དུ་དགེ་བ་བརྩམ་བྱའི་ལུས་ཕུན་སུམ་ཚོགས་པ་ལ་གཉིས་ཏེ། ལམ་གྱི་རྟེན་བཤད་པ་དང་། ལམ་གྱི་སྙིང་པོ་ཉམས་སུ་ལེན་ཚུལ་དངོས་བཤད་པའོ། །དང་པོ་ལ་གཉིས། འགལ་རྐྱེན་བསལ་བ་དང་། མཐུན་རྐྱེན་སྒྲུབ་པའོ། །དང་པོ་འདོད་པ་ཆེ་ཞིང་ཆོག་མི་ཤེས་པ་སྤང་བ་ནི། ཚེ་འདིར་ཞེན་ལ་སོགས་ཏེ། སློབ་དཔོན་དབྱིག་གཉེན་གྱིས། བསྲིང་གཉིས་ལྡན་ཆོག་མི་ཤེས་དང་། །འདོད་ཆེན་ཅན་ལ་མ་ཡིན་ནོ། །ཞེས་པ་ལྟར་གལ་ཏེ་ཚེ༵་འ༵དི་སྣང་ཁོ་ནར་ཞེ༵ན་ཏེ་དགྲ་འདུལ་གཉེན་སྐྱོང་སོགས་ལ་འབད་ན༵་ཆོ༵ས་པ༵འི་གཟུགས་བརྙན་ཙམ་ལས་ཆོས་ཡང་དག་སྒྲུབ་པའི་སྐལ༵་བ༵་དང་ཡོངས་སུ་བྲལ༵་ཞིང་། དེར་མ་ཟད་ཡུལ་འདོ༵ད་པའི་ལོངས་སྤྱོད་རྣམས་ལ༵་ཅི་ཙམ་ལོངས་སུ་སྤྱ༵ད་ཅི༵ང་སྤྱ༵ད་ན་སླར་ཡང་ཚིམ་པའི་སྐབས་མེད་ཅི༵ང་། ཇི་ལྟར་ལན་ཚྭའི་ཆུ་འཐུང་བ་བཞིན་དེ་ལས་ཀྱང་སྲེད༵་པ༵་འཕེ༵ལ་བར་འགྱུར་བས་ན། ནོར་སོགས་ཟི༵ན་པ༵འི་དུ༵ས་མེ༵ད་རྙེ༵ད་པ་དང་། རང་ཉིད་རྟག་ཏུ་བདེ༵་ཞིང་ཀུན་ལ་སྙན་པར་གྲ༵གས་ཏེ་འགྲོ་བ་མང་པོས་བསྟོ༵ད་པ་སོགས་དོན་དུ་གཉེར་ཞིང་། དེའི་བཟློག་ཕྱོགས་བཞི་པོ་རྣ༵མས་སྤང་བར་འདོད་པའི་འཇིག་རྟེན་ཆོས་བརྒྱད་ལ་རྒྱུན་དུ་སྙེག་པ་ནི། དཔེར་ན་རྨི༵་ལ༵མ་གྱི་དུས་སུ་རྟ་གླང་སོགས་ཉོ༵་ཚོ༵ང་སྣ་ཚོགས་བྱས་ཏེ་རྒྱལ་ཕམ་བྱུང་བ་ལ་སེམས་དགའ་སྡུག་མང་པོ་སྣང་ཡང་། སད་པའི་སྐབས་ན་ཅིར་ཡང་མ་གྲུབ་པ་དང་འདྲ༵་བ༵ས་ན། དེ་དག་ཐམས་ཅད་ཆམ་གྱིས་སྐྱུ༵ར་ལ༵་ཟས་གོས་ངན་ངོན་ཙམ་ལ་བརྟེན་ནས་བཀའ་གདམས་གོང་མའི་རྣམ་ཐར་ལྟར། ཚེ་འདི་སྣང་རྣམས་བློས་ཐོ༵ངས་ཤིག་ཅེས་འདི་སྣང་ལ་ཞེན་པ་ཐར་ལམ་གྱི་སྤང་བྱར་བསྟན་ཏོ། །^p6

གཉིས་པ་མཐུན་རྐྱེན་སྒྲུབ་པ་བཤེས་གཉེན་བསྟེན་པ་ནི། གང་ལ་བསྟེན་ན་སོགས་ཏེ། དེ་ཡང་རིག་འཛིན་འཇིགས་གླིང་གིས། ཇི་ལྟར་མ་ལ་ཡ་ཡི་ནགས་ཀློང་དུ། །རྣམ་པར་འཁྱམས་པའི་སྡོང་དུམ་ཕལ་བ་ ཡང་། །ཡལ་འདབ་བརླན་པས་ཙན་དན་དྲི་བསུང་ལྟར། །གང་ལ་བསྟེན་ན་དེ་ཡི་རྗེས་སུ་འགྲོ། །ཞེས་པ་ལྟར། བཀའ་དྲིན་སངས་རྒྱས་ལས་ཀྱང་ལྷག་པའི་བླ་མ་དགེ་བའི་བཤེས་གཉེན་ག༵ང་ཞིག་ལ༵་རང་གིས་རྟག་ཏུ་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེ༵ན་པར་བྱས་ན༵། རང་རྒྱུད་ལ་སྔོན་མེད་པའི་ཐོས་བསམ་སྒོམ་པ། བྱམས་སྙིང་རྗེ་སོགས་ཡོ༵ན་ཏ༵ན་གྱི་ཚོ༵གས་བསམ་གྱིས་མི་ཁྱབ་པ་ཡར་ཟླ་བཞིན་འཕེ༵ལ་བར་འགྱུར་ཞི༵ང་། རྒྱུ་ཉོན་མོངས་པའི་ཉེས༵་པ་ལས་བྱུང་བའི་མི་དགེ་བ་དང་སྡུག་བསྔལ་གྱི་སྐྱོན༵་མཐ༵འ་ད༵ག་རྣམ་པར་གྲོལ་བའམ་རྒྱ༵ང་དུ༵་སྐྲོ༵ད་པར་བྱེ༵ད་པ་སོགས་ཕན་ཡོན་བརྗོད་ཀྱིས་མི་ལང་བ་ཞིག་ཐོབ་པས་ན། སོར་བྱང་སྔགས་གསུམ་རང་རང་གི་གཞུང་ལས་བཤད་པ༵འི་མཚ༵ན་ཉི༵ད་དང་ལྡ༵ན་པ༵འི་དགེ་བའི་བཤེ༵ས་གཉེ༵ན་ད༵མ་པ༵་དེ༵་ལ། རབ་སྒྲུབ་པ། འབྲིང་ཞབས་ཏོག ཐ་མ་ཟང་ཟིང་སྟེ་མཉེ༵ས་པ༵་གསུ༵མ་གྱི༵་སྒོ་ནས་སྐྱོ་ངལ་སྤངས་ལ་ཡོངས་སུ་སྟེ༵ན་པར་གྱིས་ཤིག་ད༵ང་། རང་གི་གནས་སྐབས་དང་མཐར་ཐུག་གི་བས༵མ་པའི་དོ༵ན་མ་ལུས་པ་ཐམས་ཅད་གེགས་མེད་ཡིད་བཞིན་དུ་འགྲུ༵བ་པར་འགྱུར་རོ་ཞེས་སོ། །^p7

གཉིས་པ་ལམ་དངོས་ཉམས་སུ་ལེན་ཚུལ་ལ་གཉིས་ཏེ། ལམ་གྱི་རིམ་པ་དང་། བྱེ་བྲག་སྒོམ་པ་སླར་རྒྱས་པར་བཤད་པའོ། །དང་པོ་ནི། སློབ་དཔོན་དབྱིག་གཉེན་གྱིས། ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། །ཞེས་པའི་དོན་ལྟར་བཞི་སྟེ། གཞི་ཚུལ་ཁྲིམས་རྣམ་དག་ལ་གནས་པ། ཐོས་པའི་ཤེས་རབ་འཚོལ་བ། ཐོས་དོན་ལ་བསམ་པ། བསམ་དོན་སྒོམ་པར་བྱེད་པའོ། །དང་པོ་ནི། ཇི་ལྟར་མཁའ་དབུས་སོགས་ཏེ། དེ་ཡང་མགོན་པོ་ཀླུ་སྒྲུབ་ཀྱིས། ཁྲིམས་ནི་རྒྱུ་དང་མི་རྒྱུའི་ས་བཞིན་དུ། །ཡོན་ཏན་ཀུན་གྱི་གཞི་རྟེན་ལེགས་པར་གསུངས། །ཞེས་པ་ལྟར། གལ་ཏེ་གཞི་ཚུལ་ཁྲིམས་རིན་པོ་ཆེ་མེད་ན་དཔེ་ཇི༵་ལྟ༵ར་རྟེན་མེད་མཁ༵འ་དབྱིངས་སྟོང་པའི་དབུ༵ས་སུ་ཡིད་འཕྲོག་མེ་ཏོག་སྣ་ཚོགས་ཀྱི་སྐྱེ༵ད་མོ༵ས་ཚ༵ལ་ཉམས་དགའ་བ་ཞིག་བསྐྲུན་ནས། དེ་ལ་ལོངས་སུ་སྤྱོད་པར་འདོ༵ད་པ་བཞི༵ན་དུ། མངོ༵ན་པ༵ར་མཐོ༵་བ་གནས་སྐབས་ལྷ་མིའི་བདེ་འབྲས་ད༵ང་ངེ༵ས་པར་ལེག༵ས་པ་མཐར་ཐུག་སངས་རྒྱས་ཀྱི་ཡོན་ཏན་ཕུན༵་སུམ་ཚོ༵གས་པ་ཀུན༵་གྱི་ནང་ནས་སྣ་གཅིག་ཀྱང་། ཚུ༵ལ་ཁྲིམ༵ས་རྣམ་པར་བྲ༵ལ་བའི་གང་ཟག་དེ་ལ༵་འབྱུ༵ང་བ༵འི་གོ་སྐ༵བས་ཐོབ་པ་མེ༵ད་པ༵འི་ཕྱིར་ན། དགེ་བའི་དམིགས་རྣམས་མི་བརྗེད་པའི་དྲ༵ན་པ་དང་། སྒོ་གསུམ་ལ་ཡང་ཡང་བརྟག་པའི་ཤེ༵ས་བཞིན། གཟོབ་པ་ལྷུར་ལེན་པའི་བ༵ག་ཡོ༵ད་བཅས་ལྡ༵ན་པ༵འི་སྒོ་ནས་སྙིགས་དུས་འདིར་བསླབ་པ་སྣ་གཅིག་ཉིན་མཚན་གཅིག་ཙམ་དུ་བསྲུངས་ཀྱང་ཕན་ཡོན་ཚད་མེད་པའི་ཚུལ་སོགས་བསམ་སྟེ། ར༵ང་རྒྱུད༵་མ་རུངས་པ་དེ་ཉིད་ཐུ༵ལ་ཅིག་ཅེས་པའོ། །^p8

གཉིས་པ་ནི། ཐོག་མེད་སྲིད་པའི་སོགས་ཏེ། འཇམ་མགོན་མི་ཕམ་རིན་པོ་ཆེས། དམ་པ་ཆོས་འདི་སྟོན་པ་མཆོག་གིས་ཀྱང་། །སྐུ་སྲོག་ལན་མང་བཏང་ནས་བཙལ་བ་ཡིན། །ཐོས་ན་དོན་ཆེ་འདི་འདྲ་གཞན་ན་མེད། །ཐོས་དུས་ལེགས་པར་ཉན་ན་མི་འཐད་དམ། །ཞེས་པ་ལྟར་ཐོས་པ་མ་བཙལ་ན། ཚེ་རབས་ཡ་མཐའ་ཐོ༵ག་མ་མེ༵ད་པ་ནས་ལས་ཉོན་གྱི་ལྕགས་སྒྲོག་དམ་པོས་བར་མེད་དུ་བཅིངས་ཏེ། ཁམས་གསུམ་སྲི༵ད་པ༵འི་བཙོན་ར༵་ཆེན་པོར་འཕྱན་ནས། བླང་དོར་མི་ཤེས་པའི་མ༵་རི༵ག་མུ༵ན་ནག་རབ་ཏུ་འཁྲུགས་པའི་ཀློ༵ང་ཆེན་དུ༵། ཐར་ལམ་སྟོན་པའི་བླ་མ་དགེ་བའི་བཤེ༵ས་གཉེན་སོགས་དང་བྲ༵ལ་ཏེ། ལུས་སེམས་རྣལ་དུ་མི་གནས་པའི་སྨྱོ༵ན་པ༵་ཇི་བཞི༵ན་དུ༵་ད༵་ལྟའི་བ༵ར་དུ་འཁྱ༵མས་པ་ནས། ད༵་ལྟ་དལ་འབྱོར་གྱི་མི་ལུས་ཐོབ། མཚན་ལྡན་གྱི་བླ་མ་མཇལ། ཟབ་མོའི་གདམས་པ་ཐོབ་པའི་དུས་འདིར་ནི༵། ཇི་ལྟར་ཁམས་གསུམ་འཁོར་བའི་སྡུག་བསྔལ་མ་ལུས་པ་ཞི༵་ཞིང་གཏན་གྱི་བདེ༵་བ་དམ་པ་ནི་རྫོགས་པའི་སངས་རྒྱས་ཀྱི་གོ་འཕང་ཡིན་ལ། དེ་ལྟ་བུའི་ཁ༵ང་བཟ༵ང་ཉམས་དགའ་བ་འཚོ༵ལ་པའམ་ཐོབ་པ༵འི་ཕྱིར༵་དུ། སྟོན་པ་ཐུགས་རྗེ་ཅན་དང་རྗེས་འཇུག་མཁས་གྲུབ་རྣམས་ཀྱི་ཟབ་དང་རྒྱ་ཆེ་བའི་གསུ༵ང་ར༵བ་རྒྱ༵་མཚོ༵་ལྟ་བུ་རྣམས་ལ་སྐོམ་པ་ཆུ་ལ་འཁྲེང་བའི་འདུ་ཤེས་ཀྱིས་དཀའ་བ་བརྒྱ་ཕྲག་གི་སྒོ་ནས་རྩེ་གཅིག་ཏུ་མཉ༵ན་པ་ལ༵་སྤྲོ༵་བ༵་རབ་ཏུ་བསྐྱེད་པར་བྱ་རི༵གས་སོ། །ཞེས་པའོ། །^p9

གསུམ་པ་ཐོས་དོན་ལ་བསམ་པ་ནི། ཐོས་པ་ཙམ་གྱིས་སོགས་ཏེ། དེ་ཡང་གུང་ཐང་བསྟན་པའི་སྒྲོན་མེས། ཐོས་མང་ཉམས་སུ་མ་བླངས་ན། །རང་གི་རྒྱུད་ལ་མི་ཕན་ཏེ། །ཆུ་ནང་ལོ་བརྒྱར་གནས་པ་ཡི། །རྡོ་ཡི་རང་བཞིན་སྐམ་པོ་ཡིན། །ཞེས་པ་ལྟར། སྤྱིར་ཐོས་པ་ལ་ཕན་ཡོན་བསམ་གྱིས་མི་ཁྱབ་པ་ཡོད་ཀྱང་། དེའི་དོན་ཉམས་སུ་མ་བླངས་ན་ཐོ༵ས་པ༵་ཁོ་ན་ཙ༵མ་གྱི༵ས་ནི་གནས་ལུགས་ཡང་དག་པའི་དོན་ལ་ཕྱིན་ཅི་ལོག་གི་སྒྲོ༵་འདོ༵གས་ངན་པ་རྩ་བ་ནས་མི༵་ཆོ༵ད་ཅི༵ང་། ཁྱད་པར་དུ་བདག་ཅག་གི་སྟོ༵ན་པ་མཉམ་མེད་ཐུབ་པའི་དབང་པོ་དེ་ཉིད་གཞན་ཕྱི་རོལ་མུ་སྟེགས་པའི་སྟོན་པ་སོགས་གང་དང་ཡང་མི་འདྲ་བར་གདུལ་བྱ་རྣམས་ལ་བདེན་པར་སྨྲ་བ་ཉག་གཅིག་གི་ཚད་མའི་སྐྱེས་བུ་ཁོ་ན་ཡིན་པ་དང༵་། དེས་ལེགས་པར་གསུངས་པ་བསྟ༵ན་པ་དམ་པའི་ཆོས་ཀྱང་རྣམ་པར་གྲོལ་བའི་འཇུག་ངོགས་བླ་ན་མེད་པའི་དཔྱད་གསུམ་རྣམ་པར་དག་པ་ཡིན་པ་ལ༵། གཞན་གང་གིས་ཀྱང་མི་འཕྲོག་པའི་ཡི༵ད་ཆེ༵ས་བརྟན་པོ་ནི་དེང་གི་དུས་འདིར་ཤིན་ཏུའང་རྙེད༵་པར་དཀ༵འ་བ༵ས་ན། དུས་རྟག་ཏུ་རྒོལ་བ་ཚར་གཅོད་པའི་རྩོ༵ད་པ་དང་། སྐལ་ལྡན་རྗེས་སུ་འཛིན་པའི་འཆ༵ད་པ། གཉིས་ཀའི་དོན་དུ་རྩོ༵མ་པ་སྟེ་མཁས་པ༵འི་བྱ༵་བ༵་གསུམ་པོ་འདི་འབད་པ་བརྒྱ༵་ཕྲ༵ག་གི༵་སྒོ་ནས་བསྟེན་ཏེ། ཐོས་དོན་ལ་ཡང་ཡང་སེམས་པའི་བས༵མ་བྱུ༵ང་གི་ཤེས༵་ར༵བ་དྲི་མ་མེད་པ་དེ་ཉིད་རང་གི་ཐུག༵ས་ཀྱི༵་བཅུད༵་དུའ༵མ་རྒྱན་དུ་སྟེན༵་པར་མཛོད་ཅིག་དང་། སྟོན་པ་དང་བསྟན་པ་རིན་པོ་ཆེ་ལ་གཞན་གང་གིས་ཀྱང་གཡོ་བར་མི་ནུས་པའི་ཡིད་ཆེས་བརྟན་པོ་སྐྱེ་བར་འགྱུར་རོ། །ཞེས་པའོ། །^p10

བཞི་པ་བསམ་དོན་བསྒོམ་པ་ནི། གཞུང་ལུགས་རབ་འབྱམས་སོགས་ཏེ། དེ་ཡང་ཇི་སྐད་དུ། དཔེར་ན་མི་ཞིག་རྒྱ་མཚོའི་ཆུས་ཁྱེར་ན། །དེ་ནི་སྐོམ་བཞིན་འཆི་བའི་དུས་བྱེད་འགྱུར། །དེ་བཞིན་ཐོས་མང་སྲེད་པས་བག་མེད་པ། །ཆོས་ཀྱི་རྒྱ་མཚོར་གནས་བཞིན་ངན་འགྲོར་འགྲོ། །ཞེས་པ་ལྟར། མདོ་སྔགས་རིག་གནས་དང་བཅས་པའི་གཞུ༵ང་ལུ༵གས་ར༵བ་འབྱ༵མས་ཀྱི་གནས་ལ་མཁས་ཤིང་ཚེ་གང་གཞན་ལ་ཆོས་སྨྲ༵་བའི༵་དགེ་བའི་བཤེས་གཉེན་དུ་གྲགས་ཤིང་མངོན་པར་རློམ་པའི་སྟོ༵ན་པ་ཆེ༵ན་པོ་རྣམས་ཡིན་ཡ༵ང་། དོན་ཐོས་བསམ་གྱིས་ར༵ང་གི་རྒྱུ༵ད་ལ་ཡང་ཡང་གོམས་པར་བྱས་ཏེ་ཉོན་མོངས་པའི་དགྲ་ཆེན་དེ་མ༵་བཏུ༵ལ་བ་ཞིག་ན། ཇི་ལྟར་བྱ་ནེ༵་ཙོ༵་ལ་མི་སྐད་བསླབས་ཏེ་འོན་པ༵འི་སྒྲ་ཙམ་ཞིག་ཀློག་ཤེས་པ་དང་འདྲ༵་བས་ན། ནམ་ཞིག་འཆི༵་བའི་སྣང་བ༵་མི་འདོད་བཞིན་དུ་བཙ༵ན་ཐ༵བས་སུ་འོ༵ང་བའི་དུས་ན༵། རང་གི་རང་ལ་ངས་བླང་དོར་གྱི་གནས་ཤེས་ཀྱང་ཉམས་སུ་མ་བླངས་ཤིང་། ང་རྒྱལ་དང་མཁས་རློམ་གྱིས་མི་ཚེ་ཐལ་བས། ད་ནི་ངན་སོང་དུ་མི་ལྟུང་བའི་གདེང་ཙམ་ཡང་མི་འདུག་སྙམ་དུ་འགྱོ༵ད་པ༵་ཆེན་པོ་སྐྱེ་བའི་རྒྱུ༵་རུ་ངེས་པས། ཟབ་མོའི་གད༵མས་ངག་གི་དོ༵ན་རྣམས་རང་རྒྱུད་འདུལ་བའི་ཐབས་སུ་སྤྱོད་ལམ་ཀུན་ཏུ་སྙི༵ང་གི་དཀྱིལ་ལ༵་སྟེ༵ན་ཅི༵ག་ཅེས་སྙི༵ང་དང་འདྲ་བའི་གྲོ༵གས་པོའམ་སྐལ་ལྡན་གྱི་སློབ་བུ་རྣ༵མས་ལ་ནན་ཏན་དུ་བསྐུལ་བའོ། །^p11

གཉིས་པ་བྱེ་བྲག་སྒོམ་པ་སླར་རྒྱས་པར་བཤད་པ་ལ་གཉིས། མདོར་བསྟན་དང་རྒྱས་བཤད་དོ། །དང་པོ་ནི། མང་མང་སོགས་ཏེ། དེ་ཡང་མ༵ང་མ༵ང་ཞེས་ཐོག་མའི་སྒྲ་རྒྱན་དུ་བྱས་ཏེ། རྒྱ༵ལ་བ༵་རྫོགས་པའི་སངས་རྒྱས་ཀྱིས་གདུལ་བྱ་རྣམས་ལ། ཆོས་སྒོ་བརྒྱད་ཁྲི་བཞི་སྟོང་སོགས་ཆོ༵ས་ཚུ༵ལ་ར༵བ་འབྱ༵མས་ཤིག་གསུངས་པ་ཀུ༵ན་ཀྱང་། དོན་དུ་སེམས་ཅན་སོ་སོའི་ར༵ང་རྒྱུ༵ད་ཀྱི་དུག་གསུམ་འདུ༵ལ་བ༵འི་གཉེན་པོ་ཁོ༵་ན༵འི་ཐ༵བས་སུ༵་གད༵མས་པ་ཡིན་པས་ན། རྟོན་པ་བཞི་ཕྱིན་ཅི་ལོག་ཏུ་གྱུར་ནས་ཚི༵ག་ཙམ་ལ༵་མ༵་འཆེ༵ལ་བར་འོག་ནས་འཆད་པའི་བསྒོམ་བྱ་དོ༵ན་གྱི༵་ཟ༵བ་གན༵ད་མཆོ༵ག་ཏུ་གྱུར་པ་རྣམས། དུས་ཀུན་སྙི༵ང་གི༵་བཅུ༵ད་དུ༵་བསྟི༵མས་ལ་ཉམས་སུ་ལེན་པར་བྱའོ་ཞེ༵ས་འདི་ཉིད་ཤིན་ཏུ་གལ་ཆེ་བས་སླ༵ར་ཡ༵ང་སྒོམ་ཚུལ་རྒྱས་པ་ལ་མཚམས་སྦྱར་ཏེ་བསྐུ༵ལ་བའོ། །^p12

གཉིས་པ་སྒོམ་ཚུལ་རྒྱས་པར་བཤད་པ་ལ། ཐུན་མོང་ཕྱིའི་སྔོན་འགྲོ། ཐུན་མིན་ནང་གི་སྔོན་འགྲོ། ཉམས་ལེན་དངོས་གཞིའི་རིམ་པ་དང་གསུམ་ལས། དང་པོ་ལ་བཞི་སྟེ། དལ་འབྱོར་རྙེད་དཀའ། ཚེ་མི་རྟག ལས་རྒྱུ་འབྲས། འཁོར་བའི་ཉེས་དམིགས་བསྟན་པའོ། །དང་པོ་ནི་རྙེད་དཀའི་རྟེན་འདི་སོགས་ཏེ། དེ་ཡང་རྒྱུ་དཔེ་གྲངས་གསུམ་གང་ནས་ཀྱང་རྙེད༵་པར་ཤིན་ཏུ་དཀ༵འ་ཞིང་དལ་བརྒྱད་འབྱོར་བཅུ་ཚང་བའི་མི་ཡི་ལུས་རྟེ༵ན་ཁྱད་པར་ཅན་འདི༵་ནི། དཔེ་ཇི་ལྟར་འཇིག་རྟེན་ན་འབྱུང་བར་དཀོན་པ་མེ་ཏོག་ཨུ༵་དུ༵མ་ཝ༵་ར༵འམ་བོད་སྐད་དུ་མཆོག་འཕགས་ཞེས་ཡོངས་སུ་གྲགས་པ་དང་འདྲ༵་ཞིང་། དེའང་གལ་ཏེ་ཡིད་བཞིན་ནོ༵ར་བུ༵་འབུ༵མ་ཕྲག་གཅིག་དུས་གཅིག་ལ་རྙེད་ཀྱང་དེས་ཟས་གོས་ཙམ་སྟེར་གྱི། མི་ལུས་རིན་ཆེན་འདིས་ནི་དེ་ལ༵ས་ཀྱང་ཆེས་ལྷག༵་པའི༵་སངས་རྒྱས་ཀྱི་གོ་འཕང་དམ་པ་སྟེར་བའི་དོ༵ན་འབྲ༵ས་ཕུན་སུམ་ཚོགས་པ་དང་ལྡ༵ན་པ་ཡིན་པས། སྐབས་འདི་ཙམ་མ་གཏོགས་ཕྱི༵་ན༵ས་འདི༵་འདྲ༵འི་ལུས་རྟེན་ཁྱད་པར་ཅན་ཡང་ནས་ཡང་དུ་ཤི༵ན་ཏུ༵འང་རྙེད༵་པར་དཀ༵འ་བ༵ས་ན། ཐར་འདོད་རྣམས་ཀྱིས་བསམ་མནོ་རྣལ་དུ་བཏང་སྟེ་དོ༵ན་ཆེ༵ན་ཚེ་རབས་གཏན་གྱི་འདུ༵ན་མ༵་སངས་རྒྱས་ཀྱི་གོ་འཕང་སྒྲུ༵བ་པ་ལ༵་ཉིན་མཚན་ཀུན་ཏུ་མ༵་གཡེ༵ལ་བར་དལ་འབྱོར་རྙེད་དཀའ་འདི་སྒོམ་པ་ལ་བརྩོན་ཅི༵ག་ཅེས་པའོ། །^p13

གཉིས་པ་ཚེ་མི་རྟག་པ་ནི། འཆི་བདག་དགྲ་ཆེན་སོགས་ཏེ། དལ་འབྱོར་གྱི་ལུས་རྟེན་དེ་ཡང་ཡུན་རིང་དུ་མི་སྡོད་པར་ནམ་ཞིག་འཆི༵་བད༵ག་གཤིན་རྗེའི་དགྲ༵་ཆེ༵ན་དེ་ཉིད་ཇི་ལྟར་ན༵མ་མཁ༵འ་ནས་གནམ་ལྕགས་ཀྱི་ཐོ༵ག་བབས་པ་དང་འདྲ༵་བ༵ར་དུས་ན༵མ་ཙ༵མ་ཞིག་ལ་ཐོ༵ན་པ༵་དང་། འཆི་ལུགས་ཇི་ལྟ་བུ་ཡིན་པ་སོགས་ནི་རང་རེ་སུ༵ས་ཀྱ༵ང་དཔ༵ག་པར་མི༵་ནུ༵ས་པས། ད་དུང་རང་ཉིད་མི་འཆི་སྙམ་དུ་ལེ་ལོ་ཕྱི་བཤོལ་གྱི་ངང་ལོ༵་ད༵ང་ཟླ༵་བ༵་མང་པོར་འཇིག་རྟེན་འདིར་སྡོ༵ད་པ༵འི་ཁོམ་ལོ༵ང་མེ༵ད་ཀྱི༵། དེས་ན་ད༵་ལྟ༵་ད༵་ལྟ༵་ཉིད་དུ་ཡང་དག་པའི་དགེ༵་ཆོ༵ས་ཤིག་སྒྲུབ༵་རེ༵་ར༵ན་ཞེས་ཚེ་མི་རྟག་པ་བསྒོམ་པར་བསྐུལ་བའོ། །^p14

གསུམ་པ་ལས་རྒྱུ་འབྲས་ནི། ལུས་ཅན་ལས་ཀྱི་སོགས་ཏེ། དེ་ཡང་ལུ༵ས་ཅ༵ན་ཏེ་སེམས་ཅན་རྣམས་ཀྱིས་བསགས་པའི་དགེ་སྡིག་ལ༵ས་ཀྱི༵་འབྲ༵ས་བུ༵་རྣམས་ནི་བསྐལ་བ་བརྒྱར་སོང་ཡང་ནམ་ཡང་ཆུ༵ད་མི༵་ཟ༵་བར་རང་བྱས་རང་ལ་སྨིན་པར་ངེས་ཤིང་། དེ་ལྟར་རང་གིས་ལས་སྣ་ཚོགས་བྱས་པའི་རྣ༵མ་སྨི༵ན་གྱི་འབྲས་བུ་དངོས་སུ་ཐོ༵ག་ཏུ༵་བ༵བས་པའི་ཚེ༵་ན་སངས་རྒྱས་དང་བྱང་ཆུབ་སེམས་དཔའ་རྣམས་དངོས་བྱོན་ཀྱང་བཅོ༵ས་སུ༵་མེ༵ད་པར་གསུངས་པས། ད༵་ལྟ༵་རྒྱུ་འབྲས་བླང་དོར་ཤེས་པའི་སྐ༵ལ་བ་དང་ལྡ༵ན་ཞིང་། དམ་པའི་ཆོས་སྒྲུབ་པའི་མཐུན་རྐྱེན་ཚང་ནས་ར༵ང་དབ༵ང་ཡོ༵ད་པའི་དུ༵ས་འདི༵ར། རྒྱུ་འབྲས་ཀྱི་གནད་ཟབ་མོ་ལ་ཡིད་ཆེས་ཡོད། ཚུལ་བཞིན་ཉམས་སུ་མི་ལེན་པར་རང་མགོ་ར༵ང་གི༵ས་བསྐོར་ནས་ར༵ང་ཉི༵ད་བསླུ༵ས་པར་གྱུར་ན༵་གཞན་སུ༵་ཞིག་གི་མཐུ་ཡི༵ས་སྐྱོ༵བ་པར་འགྱུར་ཏེ། སྟོན་པ་ཐུགས་རྗེ་ཅན་བྱོན་ཀྱང་སྐྱོབ་པར་མི་ནུས་པས་སོ། །^p15

བཞི་པ་འཁོར་བའི་སྡུག་བསྔལ་ནི། བཟོད་དཀའ་འཁོར་བའི་སོགས་ཏེ། དེ་ཡང་ཤིན་ཏུ་བཟོ༵ད་པར་དཀ༵འ་བའི་ཁམས་གསུམ་འཁོ༵ར་བ༵འི་རྒྱ་མཚོར་འཕྱན་པའི་སེམས་ཅན་རྣམས་ཀྱི་སྡུ༵ག་བསྔ༵ལ་སྤྱི་དང་བྱེ༵་བྲ༵ག་ངན་སོང་གནས་གསུམ་གྱི་སྡུག་བསྔལ་ཆ་ཤས་ཙམ་རེ་རི་མོ་བྲིས་པ་མཐོང་བ་དང་། གཞན་གྱིས་སྨྲས་པ་ཐོས་པ་རྣ༵མས་སེམས་ལ་དྲ༵ན་པར་བྱས་པ༵་ཙ༵མ་གྱི༵ས་ཀྱང་བློ་ལྡན་རྣམས་མི་བཟད་པའི་འཇིགས་པ་སྐྱེས་ཏེ་ལུས་ཀྱི་བ༵་སྤུ༵་རྣམས་ཀྱང་གཡོ༵་བར་ནུ༵ས་པ་ཡིན་ན༵། དངོས་སུ་བགྲ༵ང་ཡ༵ས་པའི་དུཿཁ༵་སྟེ་སྡུག་བསྔལ་དེ་དག་གིས་ལུ༵ས་སེ༵མས་རབ་ཏུ་གདུ༵ང་བར་བྱེད་པ༵འི་ཚེ༵་ན་བཟོད་དམ་མི་བཟོད་ཅི༵་འདྲ༵་ཡི༵ན་ཞེ༵ས་ད་ལྟ་ཉིད་ནས་དེ་དག་གི་སྡུག་བསྔལ་གྱི་རྣམ་གྲངས་དང་། ཚེ་ཚད་སོགས་ལ་བསམ་སྟེ་རང་གིས་ར༵ང་ལ༵་ཉིན་རེ་བཞིན་དུ་གྲོ༵ས་མོ༵ལ་མཛོ༵ད་ཅིག་དང་། གཟོད་འཁོར་བ་ལས་ངེས་པར་འབྱུང་བར་འགྱུར་རོ་ཞེས་པའོ། །^p16

གཉིས་པ་ཐུན་མིན་ནང་གི་སྔོན་འགྲོ་ལ། སྐྱབས་འགྲོ་དང་། སེམས་བསྐྱེད། སྡིག་སྒྲིབ་སྦྱོང་བ་གསུམ་ལས། དང་པོ་སྐྱབས་འགྲོ་ནི། འདི་འདྲའི་འཇིགས་ཆེན་སོགས་ཏེ། གོང་དུ་བཤད་པའི་འདི༵་འདྲ༵འི་འཁོར་བའི་རྒྱ་མཚོར་ཐོག་མེད་ནས་ཉོན་མོངས་པའི་ཆུ་སྲིན་གྱིས་ལུས་ཟོས་པའི་འཇི༵གས་པ་ཆེ༵ན་པོ་ལས་ཤི༵ན་ཏུ༵་ཐ༵ར་བར་དཀ༵འ་བ་ལ༵ས། རང་ཉིད་འདྲེ༵ན་པ༵འི་ནུས༵་པ་དང་ལྡ༵ན་པ་ནི། གཞ༵ན་ལྷ་ཀླུ་མཐུ་བོ་ཆེ་དང་། སྡེ་བརྒྱད་མི་མ་ཡིན་སོགས་གང་ན༵ས་ཀྱང་སྐྱབས་སུ་བརྟེན་འོས་པ་ཞིག་འཇིག་རྟེན་གྱི་ཁམས་འདིར་རྙེ༵ད་པའི་གོ་སྐབས་མི༵་སྲི༵ད་པས། དུས་ཀུན་བསླུ༵་བ་མེ༵ད་པ་གནས་སྐབས་སངས་རྒྱས་ཆོས་དགེ་འདུན་དང་། མཐར་ཐུག་གི་སྐྱབས་ཡུལ་མཁྱེ༵ན་བརྩེ༵་ནུ༵ས་གསུམ་གྱི་ཡོན་ཏན་ཚད་མེད་པ༵འི་བད༵ག་ཉི༵ད་ཅ༵ན་སངས་རྒྱས་བཅོམ་ལྡན་འདས་ཏེ། དཀོན་མཆོག་རི༵ན་པོ་ཆེ༵་རྣ༵མ་པ་གསུ༵མ་གྱི་ཡོན་ཏན་རྗེས་སུ་དྲན་པའི་སྒོ་ནས་ཁ་ཙམ་མིན་པར་སྙིང་ཐག་པ་ནས་རྟག་ཏུ་སྐྱ༵བས་སུ༵་བརྟེ༵ན་པ༵ར་བྱ་རི༵གས་སོ་ཞེས་པའོ། །^p17

གཉིས་པ་སེམས་བསྐྱེད་ནི། སྲིད་གསུམ་སྡུག་བསྔལ་སོགས་ཏེ། དེ་ཡང་འདོད་ཁམས་གཟུགས་ཁམས་གཟུགས་མེད་ཁམས་ཀྱི་སྲི༵ད་པ་གསུ༵མ་ན་མི་འདོད་པའི་སྡུ༵ག་བསྔ༵ལ་ཇི་སྙེད་ཅིག་ཡོད་པ་ཐམས་ཅད་ནི། ཚེ་རབས་ཐོག་མ་མེད་པ་ནས་ར༵ང་ཉིད་བདེ༵་ན་སྐྱིད་ན་ཅི་མ་རུང་སྙམ་པའི་གཅེས་པར་བཟུང་བའི་འདོ༵ད་པ་འདི་ཁོ་ན་ལ༵ས་བྱུ༵ང་བ་ཡིན་ཞིང་། གནས་སྐབས་མཐར་ཐུག་གི་བདེ༵་བ་དང་འཇིག་རྟེན་དང་འཇིག་རྟེན་ལས་འདས་པའི་དགེ༵་བའི་དངོས་པོ་མཐ༵འ་ད༵ག་ནི། གཞན་འགྲོ་བ་སེམས་ཅན་ཐམས་ཅད་གཅེས་པར་བཟུང་བའི་གཞ༵ན་ཕ༵ན་བྱང་ཆུབ་ཀྱི་སེམ༵ས་རིན་པོ་ཆེ་ལ༵ས་འཁྲུ༵ངས་པ་ཡིན་པར་གསུངས་སོ། །དེ༵་ཕྱི༵ར་འཇིག་རྟེན་ལྷ༵་མི༵འི་གཙོས་འགྲོ་བ་ཡོངས་ཀྱི་གཙུག་རྒྱན་དམ་པ་སྟོན༵་པ༵་ཐུགས་རྗེ་ཅན་དེ་ཉིད་ཀྱིས་སྔོན་སློབ་པ་ལམ་གྱི་གནས་སྐབས་སུ་བྱང་ཆུབ་ཏུ་ཐུགས་བསྐྱེད་པ་བཞིན་དུ། རང་རེ་རྣམས་ཀྱིས་ཀྱང་དེའི་རྗེ༵ས་སུ་བསྙེ༵གས་ཏེ༵་གཞན་དོན་དུ་བླ༵་ན་མེ༵ད་པའི་རྫོགས་པའི་བྱ༵ང་ཆུ༵བ་དང་མཚུངས་ལྡན་དུ་གྱུར་བའི་སེམ༵ས་མཆོ༵ག་ཁྱད་པར་ཅན་དེ་ཉིད་ད་ལྟ་ཉིད་ནས་བསྐྱེ༵ད་པ༵ར་བྱ་རི༵གས་སོ་ཞེས་པའོ། །^p18

གསུམ་པ་སྡིག་སྒྲིབ་སྦྱོང་བ་ནི། རང་རྒྱུད་རིག་ཁམས་སོགས་ཏེ། དེ་ཡང་གདུལ་བྱ་མཆོག་དམན་རབ་འབྲིང་རང་ར༵ང་གི་རྒྱུ༵ད་ན་རི༵ག་ཁ༵མས་བདེ་བར་གཤེགས་པའི་སྙིང་པོ་ཞེས་ངོ་བོ་ཡེ་ནས་དག་པ་ཤེ༵ལ་དཀ༵ར་གྱི་ཨཱ༵་ད༵ར་ཤ༵འམ་ཤེལ་གྱི་མེ་ལོང་དྲི་མ་མེད་པ་ལྟ་བུ་རང་བཞིན་གདོད་ནས་རྣམ་པར་དག་པའི་ཚུལ་དུ་ཡོད་ན་ཡང་། གནས་སྐབས་གློ༵་བུ༵ར་འཁྲུལ་སྣང་བའི་ལས་དང་། ཉོན་མོངས་ཤེས་བྱ་བག་ཆགས་ཀྱི་སྒྲི༵བ་པ༵་མཐུག་པོའི་རྡུ༵ལ་གྱི༵ས་ཆེས་ཆེ༵ར་གཡོ༵གས་པར་གྱུར་ན༵་ཟ༵བ་པ་རྫོགས་རིམ་དང་གས༵ལ་བ་བསྐྱེད་རིམ་གྱི་ཏི༵ང་འཛི༵ན་གཟུ༵གས་བརྙ༵ན་ལྟ་བུ་དེ་འཆ༵ར་བའམ་རང་གི་རྒྱུད་ལ་སྐྱེ་བར་ཤིན་ཏུ་དཀ༵འ་བས༵་ན། དུས་ཀུན་ཏུ་རྟེན་དང་། སུན་འབྱིན། སྡོམ་པ། ཀུན་ཏུ་སྤྱོད་པའི་སྟོ༵བས་བཞི༵འི་ར༵ས་དཀ༵ར་ང༵ལ་བ༵ས་བསྐྱོ༵ད་པ༵འམ་སྟོབས་བཞི་ཚང་བའི་སྒོ་ནས་སྒྲིབ་སྦྱོང་བྱེད་པར་འོ༵ས་སོ་ཞེས་པའོ། །^p19

གསུམ་པ་དངོས་གཞི་སྒོམ་པའི་རིམ་པ་ལ། ཕྱི་བསྐྱེད་པའི་རིམ་པ། ནང་རྫོགས་པའི་རིམ་པ། གསང་བ་རྫོགས་པ་ཆེན་པོ་དང་གསུམ་མོ། །དང་པོ་ནི། སྣང་གྲག་རིག་པ་སོགས་ཏེ། དེ་ཡང་སྣ༵ང་བ་སྣ་ཚོགས་སྐུའི་རང་བཞིན། སྒྲ་གྲ༵ག་ཐམས་ཅད་གསུང་གི་རོལ་བ། རི༵ག་པ༵་སྟེ་སེམས་ཀྱི་དྲན་རྟོག་ཐམས་ཅད་ཐུགས་ཀྱི་ངོ་བོར་ཤར་བ་སྟེ། མདོར་ན་གཟུང་བ་ཡུམ། འཛིན་པ་ཡབ། རོལ་བ་གཉིས་སུ་མེད་པའི་དཀྱིལ་འཁོར་ཆེན་པོ་ལྷ༵་སྔ༵གས་ཆོ༵ས་ཉི༵ད་ཀྱི་རང་བཞིན་སྣང་སྲིད་དག་མཉམ་ཆེན་པོའི་ང༵ང་དེར་དབྱེར་མེད་བདེ་བ་ཆེན་པོ་ཡེ༵་གདོད་མ་ན༵ས་གཤིས་ཇི་བཞིན་ཡི༵ན་པ༵་ལ། གཏན་ཚིགས་ཀྱི་སྒོ་ནས་དེ་ལྟར་ཡིན་པར་ཤེ༵ས་པ༵འི་ལྟ༵་བ༵་ཐག་བཅད་པ་ད༵ང་མ༵་བྲ༵ལ་བའི་སྒོ༵མ་པ་དང་། སྤྱོད་པ༵འི་མདེ༵འུ་ལྟ་བུའི་ཁ༵་ལོ་བསྒྱུ༵ར་བར་བྱ༵ས་ན༵ས། རྒོལ་བ་ཚ༵ར་གཅོ༵ད་པ་དང་སྐལ་ལྡན་རྗེ༵ས་སུ༵་འཛི༵ན་པའི་ཚུལ་གྱིས་ཞི་རྒྱས་དབང་དྲག་གི་འཕྲིན་ལས་རབ་འབྱམས་ལ༵་དབ༵ང་བསྒྱུ༵ར་བར་བྱས་ནས་སེམས་ཅན་ཐམས་ཅད་ལ་ཕན་པ་རྒྱ་ཆེར་མཛོ༵ད་ཅིག་ཅེས་པའོ། །^p20

གཉིས་པ་རྫོགས་རིམ་ནི། སྲོག་རྩོལ་བྱེད་བཅིང་སོགས་ཏེ། དེ་ཡང་སྲོ༵ག་ནི་རླུང་དང་རྩོ༵ལ་བ་ནི་འགོག་པར་འཇུག་པས། རླུང་འགོག་པ་དང་། རྩ་དག་པར་བྱེ༵ད་པ། ཐིག་ལེ་བཅི༵ང་བ་སོགས་ཐབས་གྲོལ་གང་རུང་ལ་བརྟེན་པའི་ལུ༵ས་ཀྱི༵་འཕྲུ༵ལ་འཁོ༵ར་སྣ་ཚོགས་ཀྱི༵་མན་ངག་ལ་བརྟེན་ནས་བདེ༵་གས༵ལ་རྣམ་པར་མི༵་རྟོ༵ག་པའི་ཡེ་ཤེས་དེ་ཉིད་གྲོ༵གས་སུ༵་འགུ༵གས་པའམ་ཉམས་སུ་ལེན་པར་ནུ༵ས་ན༵། རྣམ་སྨིན་ཤ་ཁྲག་ལས་གྲུབ་པའི་ཟག་བཅས་ཀྱི་ལུས་འདི་ཡང་དབྱིངས་སུ་ཡལ་ཏེ། སྟོང་བ་འོ༵ད་གས༵ལ་དང་སྣང་བ་སྒྱུ༵་མ༵་ལྟ་བུའི་ལུ༵ས་གྲུབ་པ་ན། དམིགས་པ་ཙམ་གྱིས་ཀྱང་འཕྲིན་ལས་རབ་འབྱམས་ལ༵་མངའ་དབ༵ང་འབྱོ༵ར་བའི་ཕྱི༵ར་དུ་གཞན་ལས་ཆེས་ཟབ་པའི་མཚན་བཅས་རྫོ༵གས་རི༵མ་འདི་ཉིད་ཐུ༵གས་ཀྱི༵་ཐི༵ག་ལེ༵ར་བསྟི༵མ་པའམ་སྙིང་ནས་བསྒོམ་པ༵ར་བྱ་རི༵གས་སོ་ཞེས་གདམས་པའོ། །^p21

གསུམ་པ་རྫོགས་པ་ཆེན་པོ་ལ། ཉམས་སུ་ལེན་པར་བསྐུལ་བ་དང་དངོས་གཞི་ཁྲིད་ཀྱི་རིམ་པ་གཉིས་ལས། དང་པོ་ནི། སྙིགས་ལྔའི་མུན་པ་སོགས་ཏེ། དེ་ལ་འདིར་ཚེ་དང་དུས་དང་ལྟ་བ་དང་ཉོན་མོངས། སེམས་ཅན་ཏེ་སྙི༵གས་མ་ལྔ༵འི་མུ༵ན་པ༵་མཐུག་པོ་དེ་ཉིད་ལྷ༵ག་པ༵ར་བདོ༵་བ་སྟེ་ཆེས་ཆེར་འཁྲིགས་པའི་སྐ༵བས་སུ༵་ནི། འོད་གསལ་རྫོགས་པ་ཆེན་པོ་མ་གཏོགས་པར། དེ་ལས་གཞན་པའི་ཉན་ཐོས་རང་རྒྱལ་བྱང་ཆུབ་སེམས་དཔའི་ཐེག་པ་དང་། ཀྲི་ཡ་ཨུ་པ་ཡོ་གའི་ཕྱི་རྒྱུད་སྡེ་གསུམ་དང་། མ་ཧ་དང་ཨ་ནུ་སྟེ་རྩོལ་བཅས་ཐེ༵ག་པ་བརྒྱ༵ད་པོ་ནི་རྒྱུ༵་སྐ༵ར་གྱི་འོ༵ད་དང་འདྲ་བས་ན། དེ་ཉིད་ཀྱི༵ས་གོང་གི་མུན་པ་མཐུག་པོ་དེ་འཇོ༵མས་པར་ཤིན་ཏུ་དཀ༵འ་བ༵ས། འདིར་ཡ༵ང་གས༵ང་བླ་ན་མེད་པ་རྩོལ་མེད་རྫོགས་པ་ཆེན་པོ་སྙི༵ང་ཐི༵ག་གི་གདམས་པ་ཟབ་མོ་བྱིན་རླབས་དང་དངོས་གྲུབ་ཀྱི་ཉི༵་མ༵འི་ཟེ༵ར་ཕྲེ༵ང་འབུ༵མ་དུ་བརྡལ་བ་དེ་ཉིད། དང་འདོད་ཡིད་ཆེས་པའི་ད༵ད་གསུ༵མ་རྟ༵་བདུ༵ན་ཁྱོ༵གས་ཀྱི༵ས་རང་གི་ཡིད་ཀྱི་མཁའ་དབྱིངས་སུ་འདྲེ༵ན་པ༵ར་བྱ་རི༵གས་སོ་ཞེས་ནན་ཏན་དུ་བསྐུལ་བའོ། །^p22

གཉིས་པ་དངོས་གཞི་ལ་གཉིས་ཏེ། ཀ་དག་ཁྲེགས་ཆོད་དང་། ལྷུན་གྲུབ་ཐོད་རྒལ་ལོ། །དང་པོ་ནི་གང་ཤར་རིག་པ་སོགས་ཏེ། དེ་ཡང་དྲིན་ལྡན་རྩ་བའི་བླ་མའི་མན་ངག་ཟབ་མོ་ལ་བརྟེན་ནས་དགེ་མི་དགེ་སོགས་ག༵ང་ཇི་སྙེད་ཅིག་ཤ༵ར་བའི་རི༵ག་པ༵་རྣམས་ཀྱི་རྗེས་སུ་མི་འབྲང་བར། མ༵་བཅོ༵ས་མཉམ་པ་ཉིད་ཀྱི་ངང་དུ་ཐ་མལ་གྱི་ཤེས་པ་རྒྱ༵་ཡ༵ན་པ་དེ་ལ༵་བཅས་བཅོས་སྤུ་ཙམ་ཡང་མི་བྱེད་པར་ར༵ང་བ༵བས་ར༵ང་བཞ༵ག་གི་ང༵ང་དུ༵་ཤེས་པ་ཁོ་རང་གི་ངོ་བོ་ལ་ཁོ་རང་གིས་ཅེར་གྱིས་ལྟོ༵ས་ཤི༵ག་ད༵ང་། དེའི་ངོ་བོ་ཡེ༵་སྟོ༵ང་རྩ༵་བྲ༵ལ་སྨྲ་བསམ་བརྗོད་ལས་འདས་པ་ཀ་དག་ཆོས་ཀྱི་སྐུ་དང་། ར༵ང་གས༵ལ་འགག་པ་མེད་པ་ལྷུན་གྲུབ་ལོངས་སྤྱོད་རྫོགས་སྐུ། དེ་ལྟར་སྟོང་གསལ་གཉིས་མེད་དུ་ངོ༵་ཤེ༵ས་པ་ནི་ཐུགས་རྗེ་ཀུན་ཁྱབ་སྤྲུལ་བའི་སྐུ་མངོན་དུ་འགྱུར་བས་ན༵། ས༵་བཅུ་ལ༵མ་ལྔའི་ཡོན་ཏན་ཐམས་ཅད་རིམ་མིན་ཅི༵ག་ཅར་དུ་ཆོ༵ད་དེ་མཐར་ཐུག་གི་འབྲ༵ས་བུ༵་བླ་ན་མེད་པ་ཆོས་སྐུའི་གཏ༵ན་སྲི༵ད་ཟི༵ན་པར་འགྱུར་རོ་ཞེས་པའོ། །^p23

གཉིས་པ་ལྷུན་གྲུབ་ཐོད་རྒལ་ནི། ཅོག་གཞག་ངང་ནས་སོགས་ཏེ། ཁྲེགས་ཆོད་ཅོ༵ག་གཞ༵ག་ཆེན་པོའི་ལྟ་བའི་ང༵ང་ན༵ས་བཞུ༵གས་སྟ༵ངས་གསུམ་དང་གཟི༵གས་སྟ༵ངས་གསུམ་གང་རུང་གི་གནད་ཀྱི༵ས་ནམ་མཁའ་རྐྱེན་བྲལ་ལ་བལྟས་པས་ར༵ང་སྣ༵ང་དུ་དབྱི༵ངས་རྣམ་དག་གི་སྒྲོན་མའི་ནང་ཐི༵ག་ལེ་སྟོང་སྒྲོན། དེའི་དབུས་སུ་རི༵ག་པ༵་རྡོ་རྗེ་ལུ་གུ་རྒྱུད་རྣམས་འཆར་བས་དེ་ལ་ཞེན་པ་མེད་པར་ལོ༵ངས་སྤྱ༵ད་ན༵། ཕྱི་གཟུ༵ང་བ་དང་ནང་འཛི༵ན་པའི་མ་དག་འཁོ༵ར་བ༵འི་འཁྲུལ་སྣང་གི་མུ༵ན་པ༵་རྣམས་ཆོས་ཉིད་བསལ་གཞག་མེད་པའི་དབྱི༵ངས་སུ༵་ཡ༵ལ་ཏེ་ཆོས་ཉིད་མངོན་སུམ། ཉམས་གོང་འཕེལ། རིག་པ་ཚད་ཕེབས། ཆོས་ཉིད་ཟད་པ་སྟེ་སྣང༵་བ་བ༵ཞི་མཐ༵ར་འཁྱོ༵ལ་ཏེ་གདོད་མའི་ས་མཆོག་འཇའ་ལུས་འཕོ༵་བ་ཆེ༵ན་པོའི་སྐུ་སྟེ་ཤིན་ཏུ་དྭངས་བ་འོ༵ད་ཀྱི་སྐུ༵ར་སྨི༵ན་ནས་འགྲོ་བའི་ཁམས་ལ་མཛད་ཕྲིན་ནམ་མཁའ་ཇི་སྲིད་དུ་རྟག་ཁྱབ་ཏུ་འཆར་བར་འགྱུར་ཞེས་པའོ། །^p24

གསུམ་པ། ཐ་མར་དགེ་བ་བསྟན་བཅོས་ཀྱི་མཇུག་གྲུབ་པའི་བྱ་བ་བཟང་པོ་ལ། ཇི་ལྟར་བརྩམས་པའི་ཚུལ་དང་། དེ་ལྟར་བརྩམས་པའི་དགེ་བ་གཞན་དོན་དུ་བསྔོ་བ་དང་། བརྩམ་པའི་ཡུལ་སོགས་བཤད་པ་དང་གསུམ་ལས། དང་པོ། དེ་སྐད་གྲོང་ཚིག་སོགས་ཏེ། དེ་ལྟར་མདོ་དང་སྔགས་ཀྱི་ལམ་རིམ་ཆ་ཚང་བར་མན་ངག་ཟབ་མོའི་སྒོ་ནས་དེ༵་སྐད༵་དུ་སྨྲས་པ་འདིས། ཧ་ཅང་གོ་སླ་བའི་གྲོང༵་པའི་ཚི༵ག་རྣམས་དུ༵མ་ཆོ༵ད་དམ་ཚིགས་བཅད་དུ་བྱས་པའི་ཁོ་བོའི་སྙིང༵་གི༵་གཏ༵མ་འདིར། བློ༵་གྲོས་གས༵ལ་བའི་མཁས་པ་རྣམས་དགྱེ༵ས་པ༵འི་སྙ༵ན་ངག་གིས་བརྒྱན་པའི་ཚི༵ག་ཕྲེང་གི་མཛེས་རྒྱན་བདོ༵ག་པ་སྟེ་ཡོད་པ་མི༵ན་ན་ཡ༵ང་། གློ་བུར་མ་བཅོས་ཐོ༵ལ་བྱུ༵ང་གི་ཚུལ་དུ་རིག་སྟོང་ཆོས་སྐུའི་ཀློ༵ང་ལས་རྩོལ་མེད་དུ་རྡོ༵ལ་བ་ཤར་མར་ཡི་གེར་བཀོད་པ་ལས། ཚིག་དང་དོན་གྱི་གནད་ལ་འགྲིག་དང་མི་འགྲིག་གིས་དཔྱད་པ་མང་པོའི་འདེ༵མས་ཀ༵་སྤ༵ངས་བ༵་སྟེ་འདེམས་སྒྲིག་མི་བྱེད་པ་འདི༵་ནི། གསང་སྔགས་སྔ༵་འགྱུ༵ར་བའི་གྲུབ་བརྙེས་རི༵ག་འཛི༵ན་བརྒྱུ༵ད་པ་དང་བཅས་པ༵འི་ར༵ང་གཤི༵ས་སམ་འགྲོ་ལུགས་ཐུན་མོང་མ་ཡིན་པ་ཞིག་ལ༵གས་སོ་ཞེས་པའོ། །^p25

གཉིས་པ། དགེ་བ་འདི་ཡིས་སོགས་ཏེ། དེ་ལྟར་བརྩམས་པའི་ལེགས་བྱས་དགེ༵་བའི་རྩ་བ༵་འདི༵་ཡི༵ས་མཐུ་ལ་བརྟེན་ཏེ། འཇིག་རྟེན་གྱི་ཁམས་མ༵་ལུ༵ས་པ་ན་གནས་པའི་མཐའ་ཡས་པའི་འགྲོ༵་བ༵་རྣམ༵ས་གནས་སྐབས་སུ་ལྷ་མིའི་བདེ་འབྲས་ཐོབ་ཅིང་མཐར་ཐུག་སྐུ༵་བཞི༵་ཡེ་ཤེས་ལྔའི་བདག་ཉིད་སངས་རྒྱས་ཀྱི་ཡོན་ཏན་རྒྱ་མཚོ་ལྟ་བུའི་རྒྱ༵ལ་ཐ༵བས་མཆོ༵ག་ཏུ་གྱུར་བ་ལ༵་མངའ་དབ༵ང་འབྱོ༵ར་ཞི༵ང་། རྩོམ་པ་པོ་བད༵ག་ཀྱ༵ང་དེང་ནས་བཟུང་སྟེ་འགྲོ་ཁམས་མ་སྟོང་བར་དུ་རྒྱལ་སྲས་འཇ༵མ་དཔ༵ལ་གཞོ༵ན་ནུ༵ས་ནམ་མཁའ་ཇི་སྲིད་དུ་འགྲོ་དོན་མཛད་པར་དམ་བཅས་པ་ལྟ་བུའི་ཞུམ་པ་མེད་པའི་སྙི༵ང་སྟོ༵བས་མཆོག་ད༵ང་། ཐ་ན་སྐ༵ད་ཅི༵ག་ཙ༵མ་དུ་ཡ༵ང་འབྲ༵ལ་བ༵ར་མ༵་གྱུར་ཅིང་། བསྟན་འགྲོའི་དོན་ཆེན་འབད་མེད་ལྷུན་གྱིས་འགྲུབ་པར་གྱུ༵ར་ཅི༵ག་ཅེས་པའོ། །^p26

གསུམ་པ་ནི། ཅེས་པ་འདི་ནི་སོགས་ཏེ། དེ་ལ་སྙིང་གཏམ་སྙིང་གི་ཐིག་ལེ་ཞེ༵ས་བྱ་བ༵་འདི༵་ཉིད་མཛད་པའི་ཡུལ་ནི༵་འཇམ་དབྱངས་སྤྲུལ་བའི་ཞིང་མཆོག་རྒྱ༵་ན༵ག་རི༵་བོ༵་རྩེ༵་ལྔ༵འི་ཤར་རིའི་རྒྱུད་དུ་གཏོགས་པའི་ཡ༵ང་དབེ༵ན་ལྷ༵་མཆོ༵ག་རྗེ་བཙུན་འཇ༵མ་དཔ༵ལ་གཞོ༵ན་ནུ༵ས་འཁོར་རྒྱ༵ལ་སྲ༵ས་ཁྲི༵་ཕྲ༵ག་གཅི༵ག་ལ༵་ཟ༵བ་པ་ཇི་ལྟ་བ་དང་། རྒྱ༵ས་པ་ཇི་སྙེད་པའི་ཆོ༵ས་ཀྱི༵་འཁོ༵ར་ལོ༵་བསྐོ༵ར་སའི་རྒྱལ་སྲས་ཁྲི་གླིང་ཞེས་གྲགས་པ༵འི་རི༵་རྩེ༵་ཉམས་དགའ་བ་དེར་ང༵ག་དབ༵ང་བློ༵་གྲོ༵ས་མཚུ༵ངས་མེ༵ད་མཆོག་གིས་ཆུ༵་ཚོ༵ད་སྐ༵ར་མ༵་ཉེ༵ར་གསུ༵མ་གྱི༵་ཡུ༵ན་ལ༵་ཤ༵ར་མ༵ར་སྤེ༵ལ་བ༵་དགེ༵འོ། །^p27

ཞེས་ཚིག་འགྲེལ་མདོར་བསྡུས་ཙམ་རྗེ་བླ་མའི་ཞལ་རྒྱུན་ལྟར་མགོན་པོ་གང་གི་ཞབས་རྡུལ་སྤྱི་བོར་ཐོབ་པའི་སྐལ་བ་ཅན་བསོད་ནམས་དར་རྒྱས་སུ་འབོད་པས་སྦྱར་བ་དགེའོ།། །།^p28